ပြည်တွင်းကုန်သွယ်မှုသတင်း

 မြင်းခြံမြို့နယ်တွင်းသို့ ၂၈-၈-၂၀၂၅ ရက်နေ့မှ ၄-၉-၂၀၂၅ ရက်နေ့ထိ တစ်ပတ်တာ အတွင်း ကြက်သွန်နီ ပိဿာချိန် ၄ သိန်းကျော်ဝင်ရောက်ခဲ့ပြီး ကုန်စည်ဒိုင် လက်ကားပြတ် ဈေးအနေဖြင့် အနိမ့် တစ်ပိဿာ ၅၀၀ ကျပ်မှ အမြင့် ၁၁၅၀ ကျပ်တို့ဖြင့် အရောင်းအဝယ်ဖြစ် လျက်ရှိပြီး ဈေးနှုန်းအပြောင်းအလဲ မရှိ မြို့ပေါ်လက်လီအရောင်း သမားများနှင့် နယ်ဝယ် တင်သမားများ ပုံမှန်အဝယ်ရှိအပြီး အရောင်းအဝယ် ပုံမှန်ဖြစ်လျက်ရှိကြောင်းသိရသည်။

မြင်းခြံမြို့၊ အေးမြသီတာစျေး ၊ စံပြဈေးနှင့်ဈေးပြင်ဘက် ပြန်ကျတန်းမျာတွင် ရောင်းချ လျှက်ရှိသော နွေကြက်သွန်နီလက်လီတစ်ပိဿာဈေးနှုန်းများအနေဖြင့် (၈၀၀)ကျပ်စျေးနှုန်းမှ (၁၅၀၀)ကျပ်စျေးနှုန်းရှိကြောင်းသိရသည်။

ကြက်သွန်နီများကို အခွံပါးသည့်ချောင်းစနှင့် အခွံထူသည့်ကုန်းစဟူ၍ နှစ်မျိုးခွဲခြားနိုင်သည်။ အခွံပါးသည့် ချောင်းစကြက်သွန်နီများကို တစ်ပိဿာလျှင်(၁၃၀၀)ကျပ်မှ (၁၅၀၀)ကျပ် စျေးနှုန်းဖြင့် ရောင်းချလျှက်ရှိပြီး အခွံထူသည့်ကုန်းစ ကြက်သွန်နီများကို တစ်ပိဿာလျှင်(၈၀၀) ကျပ်မှစတင်၍ (၁၀၀၀)ကျပ်၊ (၁၂၀၀)ကျပ်၊ (၁၃၀၀)ကျပ်၊ (၁၅၀၀)ကျပ်စျေးနှုန်းများအထိ အလုံးအကြီး အသေးပေါ် လိုက်၍ ချိုသာစွာရောင်းချလျှက်ရှိကြောင်းသိရသည်။ ထို့ပြင် ကြက်သွန်နီများကို မြင်းခြံအနီးကျေးရွာ များတွင် စိုက်ပျိုးကြသော်လည်း ကံဆင့်ကျေးရွာမှထွက်ရှိသော ကြက်သွန်နီများကို ဒေသခံများမှ ပိုမိုအထားခံ၍ ကြိုက်နှစ်သက်ကြ‌ကြောင်း ကုန်သည်တစ်ဦး၏ ပြောကြားချက်အရသိရှိရသည်။

DOCA(မန္တလေး)

   သကြားပြောင်းဖူးသည် လူကြိုက်များသော သီးနှံတစ်မျိုးဖြစ်သည်။ ပြောင်းဖူးကို သရေစာအဖြစ် အမယ်မျိုးစုံပြုလုပ်စားသောက်ကြ၍ ဝယ်ယူစားသုံးမှုများပြီး ဈေးကွက်ခိုင်မာမှုရှိ၍ ရာသီအလိုက် သီးထပ် စိုက်ပျိုးလျက်ရှိကြပြီး နေ့စဉ်အရောင်းအဝယ်ဖြစ်လျက်ရှိသည်။ ပခုက္ကူမြို့ ကုန်စိမ်းသီးနှံဈေးကွက်သို့လည်း သကြားပြောင်းဖူးစိုက်ပျိုးမှုများသော ပခုက္ကူကျွန်းကျေးရွာများဖြစ်သည့် ကျွန်းဦး၊ ကျွန်းညို၊ ကျွန်းညိုကြီး၊ ရွာသစ်၊ ကံလှ၊ နန်းတော်ရပ်၊ တင်းဂတ်၊ သံပုရာပင်ကုန်း၊ ဘောလုံးခုံ၊ လိပ်ကုန်းကျေးရွာများအပြင် မြစ်ခြေ၊ ကမ္မမြို့များနှင့် မန္တလေးတိုင်းဒေသကြီး၊ ညောင်ဦးမြို့နယ်အတွင်းရှိ အထက်ညဉ့်၊ အောက်ညဉ့်၊ သစ်ထောက်ကျွန်းကျေးရွာများမှ ဝင်ရောက်အရောင်းအဝယ်ဖြစ်ကြောင်း၊ စက်တင်ဘာလ(ပထမပတ်)တွင် သကြားပြောင်းဖူး  ဈေးအနည်းကျဆင်း အရောင်းအဝယ်ဖြစ်ကြောင်း သိရှိရသည်။

      ၂၀၂၅ ခုနှစ်၊ စက်တင်ဘာလ(ပထမပတ်)တွင် သကြားပြောင်းဖူးဈေးနှုန်းများအနေဖြင့် ပြောင်းဖူး အရွယ်အစား၊ အစေ့အကြီးအသေး အောင်မြင်မှုနှင့် သီးနှံလတ်ဆတ်မှုအပေါ်မူတည်၍ သကြား ပြောင်းဖူးစိမ်း တစ်ဖူးလျှင် လက်ကားဈေး ကျပ်(၄၅၀)၊ လက်လီဈေး တစ်ဖူးလျှင် ကျပ်(၅၀၀)ဖြင့် အရောင်းအဝယ် ဖြစ်လျက်ရှိကြောင်း၊ ပြောင်းဖူးပြုတ်တစ်ဖူးလျှင် ကျပ်(၇၀၀-၅၀၀)ဈေးဖြစ်ကြောင်း၊ ယခင်ဩဂုတ်လ (စတု တ္ထပတ်)နှင့် ဈေးနှုန်းနှိုင်းယှဉ်ပါက သကြားပြောင်းဖူး တစ်ဖူးလျှင် ကျပ်(၁၀၀)ခန့် ဈေးတက်၍ အရောင်း အဝယ်ဖြစ်ကြောင်း၊ ဒေသတွင်းစိုက်ခင်းများမှ ယခုအချိန်တွင် မြစ်ရေတက်ချိန်ဖြစ်၍ စိုက်ပျိုးမှု မရရှိသေး၍ အခြားမြို့နယ်များဖြစ်သည့် ကျောက်ပန်းတောင်း၊ ပုပ္ပါးဒေသထွက်ပြောင်းဖူးများ၊ ညောင်ဦးမြို့နယ်အတွင်း ရှိ ကျေးရွာများမှ ပခုက္ကူဈေးကွက်သို့ ဝင်ရောက် အရောင်းအဝယ်ဖြစ်ကြောင်း သိရှိရသည်။ ပြောင်းဖူးသည် လူ့ခန္ဓာကိုယ်ကို ခွန်အားဖြစ်စေပြီး ကျန်းမာရေးနှင့် ညီညွတ်သော သီးနှံတစ်မျိုးဖြစ်၍ ဝယ်ယူစားသုံးမှု မြင့်မားခြင်းကြောင့် နေ့စဉ်အရောင်းအဝယ်သွက်လျက်ရှိကြောင်း၊ မြို့ပေါ်ရှိ စားသောက်ဆိုင်များ၊ အကြော် ဆိုင်များ၊ အသုပ် မျိုးစုံဆိုင်များမှ ဝယ်ယူမှုများကြောင်း သိရှိရသည်။

DOCA(မကွေး)

   မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးအတွင်း၌ ရောင်းချနေသော ထောပတ်သီးများကို ရှမ်းပြည်နယ် (တောင်ပိုင်း၊ မြောက်ပိုင်း)တောင်ကြီး၊ ညောင်ရွှေ၊ ကလော၊ ကျောက်မဲ၊သီပေါ၊ နောင်ချို ဒေသတို့မှ တင်သွင်းကြောင်း သိရသည်။

 ၂၀၂၅ ခုနှစ်၊ စက်တင်ဘာလ(ဒုတိယပတ်)တွင် ရောင်းချနေသော ထောပတ်သီး ဈေးနှုန်း များမှာ တစ်ပိဿာလျှင် အမြင့်ဈေး ကျပ်(၄၀၀၀)၊ အလတ်ဈေး ကျပ်(၃၀၀၀-၃၅၀၀)၊ အနိမ့်ဈေး ကျပ်(၂၅၀၀) ဈေးနှုန်းဖြင့် အသီး၏ အရည်အသွေးအပေါ် မူတည်၍ အမျိုးအစားလိုက်ခွဲပြီး ရောင်းချလျက်ရှိကြောင်း သိရှိရပါသည်။

DOCA(မကွေး)

  မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့  ကုန်စိမ်းသီးနှံဈေးကွက်တွင် စားသုံးသူ များ ဝယ်ယူသုံးစွဲလျက်ရှိသည့် ကြက်သွန်ဖြူသီးနှံများ နေ့စဉ်အရောင်းအဝယ်ဖြစ်လျက်ရှိကြောင်း သိရှိရသည်။ စိုက်ပျိုးမှုအနေဖြင့် မကွေးတိုင်းဒေသကြီး အအေးပိုင်း ဒေသများ ဖြစ်သည့် ဆော၊ ကျောက်ထု၊ ပေါက်ဒေသများတွင် အများဆုံး စိုက်ပျိုးကြောင်း၊ ပခုက္ကူ ဈေးကွက်သို့ ယောနယ် ဒေသနှင့် ရှမ်းပြည်နယ်ထွက် ကြက်သွန်ဖြူများဝင်ရောက်ပြီး အရောင်းအဝယ်ဖြစ် ကြောင်း  သိရှိရသည်။

      ဈေးနှုန်းအနေဖြင့် ၂၀၂၅ခုနှစ်၊ စက်တင်ဘာလ(ပထမပတ်)တွင် ဗမာကြက်သွန်ဖြူ အလုံးအကြီး အသေးနှင့် အရည်အသွေးလိုက်၍ တစ်ပိဿာလျှင် ကျပ်(၁၃၀၀၀-၁၀၀၀၀)ဈေးဖြင့် အရောင်းအဝယ် ဖြစ်ကြောင်း၊ ရှမ်းကြက်သွန်ဖြူ(ဥကြီး) မျိုး တစ်ပိဿာလျှင် ကျပ်(၁၅၀၀၀-၁၃၀၀၀)ဈေးရှိပြီး ယခင် ဩဂုတ်လ(စတုတ္ထပတ်)နှင့် ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၁၀၀၀)ခန့် ဈေးကျပြီး အရောင်းအဝယ်ဖြစ်ကြောင်း ကုန်စိမ်းသီးနှံရောင်းဝယ်ရေးဈေးကွက်မှ သိရှိရပါသည်။

DOCA(မကွေး)

          စစ်ကိုင်းတိုင်းဒေသကြီး၊ မုံရွာမြို့ရှိ သစ်သီးဆိုင်များတွင် ပန်းသီးနှင့် နဂါးမောက်သီးများ အများအပြား ရောင်းချလျက်ရှိကြပါသည်။  ပန်းသီးနှင့် နဂါးမောက်သီးများကို သစ်သီးပွဲရုံများ မှ မှာယူရောင်းချလျက်ရှိကြောင် သိရှိရပါသည်။     နဂါးမောက်သီးပင်များသည် အပူပိုင်းဒေသ ရာသီဥတုရှိရာ နေရာအနှံ့အပြားတွင် စိုက်ပျိုးဖြစ်ထွန်းပြီး ရေငတ်ခံနိုင်သော ရှားစောင်း နွယ်ဝင် အပင်တစ်မျိုးဖြစ်သည်။ နဂါးမောက်သီးတွင် အဖြူ၊ အနီ၊ အဝါ သုံးမျိုးရှိပါသည်။ ပန်းသီးနှင့် နဂါးမောက်သီးသည် ကျန်းမာရေးအတွက် အထောက်အကူများစွာပေးပြီး၊ ပန်းသီး ဖျော်ရည်၊ နဂါးမောက်သီးဖျော်ရည်များ ပြုလုပ်စာသောက်ရသည့်အတွက် လူကြိုက်များ ကြောင်း သိရှိရပါသည်။

             ၂၀၂၅ ခုနှစ် ၊ စက်တင်ဘာလ ဒုတိယပတ်အတွင်း မုံရွာမြို့ရှိ သစ်သီးဆိုင်များတွင် ပန်းသီးအလုံးကြီး(၁)လုံးလျှင် (၃၅၀၀)ကျပ်၊ (၃)လုံးလျှင်(၁၀၀၀၀)ကျပ်နှင့်  ပန်းသီးအလုံးသေး (၄)လုံးလျှင် (၅၄၀၀)ကျပ်ဖြင့် ရောင်းချလျက်ရှိပြီး၊ နဂါးမောက်သီး အလုံးသေးတစ်လုံးလျှင် (၅၀၀)ကျပ်၊ အလုံးလတ်တစ်လုံးလျှင် (၆၀၀)ကျပ်နှင့် အလုံးကြီးတစ်လုံးလျှင်(၇၀၀) ကျပ်ဖြင့် ရောင်းချလျက်ရှိရာ လူကြီးလူငယ်မရွေး ကြိုက်နှစ်သက်သည့်အတွက် အရောင်းအဝယ်ဖြစ် လျက်ရှိကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)