ပြည်တွင်းကုန်သွယ်မှုသတင်း

             ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်၌ ဆောင်းသီးနှံ မတ်ပဲ ရှစ်သောင်း ကိုးထောင် သုံးရာ ကျော် စိုက်ဧက နှစ်စဉ်စိုက်ပျိုးကြောင်း၊ မိုးစပါး၊ နွေစပါး စိုက်ပျိုးကြပြီး ပဲမျိုးစုံကို ဆောင်းရာသီတွင် သာ စိုက်ပျိုးကြသည်။ မြို့နယ်အတွင်းရှိ ဒေသခံတောင်သူများသည် ရေ၊ မြေ၊ ရာသီဥတုကောင်းမွန်သည့်အတွက် စိုက်ပျိုးရေးလုပ်ငန်းများကို စီးပွားဖြစ်လုပ်ကိုင်ကြပြီး ပြည်တွင်း စားသုံးဆီဖူလုံရေးအတွက် စပါး၊ ပဲ၊ ပြောင်း၊ ငရုတ်နှင့် ဆီထွက်သီးနှံများကို အဓိကထား၍ နှစ်စဉ် စိုက်ပျိုးကြကြောင်း သိရသည်။

             မတ်ပဲကို ဇန်နဝါရီလ ပထမပတ်တွင် အရောင်းအဝယ်ဖြစ်သည့် ဈေးနှုန်းမှာ မတ်ပဲ တစ်တင်း လျှင် ငွေကျပ် ၁၀၅၀၀၀ နှုန်းဖြင့်ရောင်းဝယ်နေပြီး ဖေဖော်ဝါရီ တစ်လအတွင်း  ရန်ကုန်သို့တင်ပို့မှု တင်း ၅၀၀၀ခန့် ရှိကြောင်းသိရသည်။ ဇန်နဝါရီလ အရောင်းအဝယ်ဖြစ်ငေညဈေးနှင့် ဖေဖော်ဝါရီ လ စတုတ္ထပါတ် အရောင်းအဝယ်ဈေးနှုန်း နှိုင်းယှဉ်ပါက ဖေဖော်ဝါရီလ စတုတ္တပါတ် မတ်ပဲအရောင်းအဝယ် ဖြစ်ပေါ်နေသော ဈေးနှုန်းမှာ ငွေကျပ် ၉၇၀၀၀နှုန်း ဖြစ်သောကြောင့် မတ်ပဲသီးနှံ တစ်တင်းလျှင် ငွေကျပ် ၃၀၀၀ ခန့် ဈေးနှုန်းအနည်းငယ် ကျဆင်း၍ အရောင်းအဝယ်ဖြစ်ခဲ့ကြောင်း၊ ဈေးကွက်အနေဖြင့် ရန်ကုန်မြို့ ဘုရင့်နောင်ပွဲရုံံများသို့  တင်ပို့လျက်ရှိကြောင်း ပဲအရောင်းအဝယ်လုပ်ကိုင်သူ မဝေ ပဲပွဲရုံပိုင်ရှင် ဦးနိုင်ဝင်း ထံမှ သိရှိရပါသည်။

DOCA (ဧရာဝတီ)

            ဧရာဝတီတိုင်းဒေသကြီး၊ မြန်အောင်ခရိုင်၊ မြန်အောင်မြို့နယ်အတွင်း ပြည်တွင်းအသေးစား၊ အလတ်စားစီးပွားရေးလုပ်ငန်းများအနက်မှ အိမ်တွင်းတစ်နိုင်တစ်ပိုင်လုပ်ငန်းဖြစ်သော ဖယောင်းတိုင် လုပ်ငန်းသည် ဈေးကွက်ရရှိ၍ စီးပွားဖြစ်လုပ်ငန်းတစ်ခုဖြစ်ကြောင်းသိရှိရပါသည်။ မြန်အောင်မြို့နယ် အမှတ်(၆)ရပ်ကွက်၊ ရွှေဘုံသာတာကြီးတန်းလမ်းရှိ “ထန်းတော”ဖယောင်းတိုင်ထုတ်လုပ်မှုမှာ တစ်နှစ် လျှင် ဖယောင်းတိုင်အထုပ်ရေ အမျိုးမျိုး(၂၅၀၀၀)ခန့်ထုတ်လုပ်နိုင်ပြီး၊ တစ်နေ့လျှင် အထုပ် (၁၅၀) မှ (၂၀၀) ခန့်ထိ ပျှမ်းမျှ ထုတ်လုပ်နိုင်ကြောင်း သိရသည်။ “ထန်းတော” ဖယောင်းတိုင်လုပ်ငန်းကို ၁၉၉၅ ခုနှစ်တွင် ကျပ်သိန်း(၂၀)ခန့်ဖြင့် စတင် ရင်းနှီးလုပ်ကိုင်လာကြောင်း  အကျိုးအမြတ်အနေဖြင့် တစ်လ လျှင် ၃ သိန်းကျပ် ရရှိကြောင်း သိရှိရပါသည်။ ဖယောင်းတိုင် အမျိုးအစား (၅)မျိုးခန့် ထုတ်လုပ်ပြီး ဖယောင်းတိုင် အကြီး ၆ တိုင်ပါ တစ်ထုပ်လျှင် ၁၇၀၀ ကျပ်၊  (၃၂)တိုင်ပါ အသေးတစ်ထုပ်လျှင် ၁၆၀၀ ကျပ်နှင့် ‌ရောင်စုံ အသေး ဖယောင်းတိုင် တစ်ထုပ်လျှင် ၄၀၀ ကျပ်ဖြင့် လက္ကားရောင်းချလျက်ရှိပါသည်။ ဖယောင်းကြမ်းများမှ အဆင့်ဆင့် ထုတ်လုပ်ပြီး ထွက်ရှိလာသော ဖယောင်းတိုင်များအား ကုန်အညွှန်း အမှတ်အသားများ ပြည့်စုံစွာ ပါရှိပြီး ထုတ်ပိုး၍ မိမိတို့ဆိုင်တွင် လည်းကောင်း၊ ရှားတောကျေးရွာ၊ ကနောင်မြို့ နှင့် မြန်အောင် မြို့မနေခြည်ဈေးအတွင်းရှိ ဈေးဆိုင်များသို့ လည်းကောင်း ဖြန့်ဖြူးရောင်းချ လျက်ရှိပြီး ၊ စားသုံးသူရေးရာဦးစီးဌာနမှ ကုန်အညွှန်းအမှတ်အသား ခွင့်ပြုချက်ရရှိပြီး၊ အသေးစားစက်မှုလုပ်ငန်းလိုင်စင်လည်းရှိပါသည်။ ဈေးကွက် ပိုမိုရရှိစေရန် ထုတ်ကုန်များအား  အရည်အသွေးပြည့်မှီစွာ ထုတ်လုပ်ရောင်းချလျက်ရှိကြောင်း ဖယောင်းတိုင်လုပ်ငန်းရှင်ထံမှ သိရှိရပါသည်။

DOCA(ဧရာဝတီ)

          သထုံခရိုင်အတွင်းရှိ မြို့နယ်များတွင် ဖေဖော်ဝါရီလ၏ တတိယအပတ်တွင် ဆန်စပါး ဈေးနှုန်းမှာ ကျဆင်းလျှက်ရှိကြောင်း သိရှိရပါသည်။ သထုံခရိုင်အတွင်းမှ အခြားတိုင်း ဒေသကြီးနှင့် အခြားခရိုင်မြို့နယ်များသို့ ဆန်စီးထွက်မှုနှုန်းမှာ မော်လမြိုင်သို့ (၃၀၀၀) အိတ်ခန့်၊ ကရင်ပြည်နယ်သို့ (၂၀၀၀) အိတ်ခန့် စုစုပေါင်း (၅၀၀၀) အိတ်ခန့်၊ တန်ချိန်အားဖြင့် (၂၅၀) တန်ခန့် စီးထွက်ခဲ့ပါသည်။ ယခု ဖေဖော်ဝါရီလ၏ နောက်ဆုံးအပတ်တွင် မော်လမြိုင်သို့ (၂၅၀၀) အိတ်ခန့်၊ ကရင်ပြည်နယ်သို့ (၂၀၂၀) အိတ်ခန့်၊ စုစုပေါင်း (၄၅၂၀) အိတ်ခန့်၊ တန်ချိန်အားဖြင့် (၂၂၆) တန်ခန့် စီးထွက်ခဲ့ပြီး တတိယအပတ်နှင့်နှိုင်းယှဉ်ပါက  အနည်းငယ် လျော့၍ စီးထွက်ခဲ့ပါသည်။

          သထုံခရိုင်အတွင်းသို့ ဖေဖော်ဝါရီလ၏ တတိယအပတ်တွင် ဆန်စီးဝင်မှုနှုန်းမှာ ရန်ကုန်တိုင်းဒေသကြီးမှ (၂၉၀၀) အိတ်ခန့်၊ ပဲခူးတိုင်းဒေသကြီးမှ (၂၁၀၀) အိတ်ခန့်၊ စုစုပေါင်း (၅၀၀၀) အိတ်ခန့် တန်ချိန်အားဖြင့် (၂၅၀) တန်ခန့်စီးဝင်ခဲ့ပြီး ဖေဖော်ဝါရီလ၏ နောက်ဆုံးအပတ်တွင် ရန်ကုန်တိုင်းဒေသကြီးမှ (၃၀၀၀) အိတ်ခန့်၊ ပဲခူးတိုင်းဒေသကြီးမှ (၁၈၀၀) အိတ်ခန့်၊ စုစုပေါင်း (၄၈၀၀) အိတ်ခန့် တန်ချိန်အားဖြင့် (၂၄၀) တန်ခန့်စီးဝင်ခဲ့ပြီး သထုံခရိုင်အတွင်းသို့ ဆန်စီးဝင်မှုနှုန်းမှာ တတိယအပတ်နှင့် နှိုင်းယှဉ်ပါက အနည်းငယ်လျော့၍ ာစီးဝင်ခဲ့ပါသည်။

          သထုံခရိုင်အတွင်း၌ ဖေဖော်ဝါရီလ၏ တတိယအပတ်တွင် ဆန်စပါးဈေးနှုန်းမှာ စပါးတင်း (၁၀၀) လျှင် ဒေသပေါက်ဈေး ကျားပျံဟိုတယ် (၃၀၀၀၀၀၀) ခန့်၊ ပေါ်ဆန်းဝါ (၂၈၀၀၀၀၀) ခန့်၊ ကမာကြည် (၂၄၀၀၀၀၀) ခန့်၊ ဧည့်မထ (၁၉၀၀၀၀၀) ခန့်နှင့် (၂၄) ပြည်ဝင် ဆန်တစ်အိတ်လျှင် ကျားပျံဟိုတယ် (၁၂၀၀၀၀) ခန့်၊ ပေါ်ဆန်းဝါ (၁၁၁၀၀၀) ခန့်၊ ကမာကြည် (၉၇၀၀၀) ခန့်၊ ဧည့်မထ (၇၃၀၀၀) ခန့်ရှိပြီး  ယခုအပတ်တွင် စပါး၊ ဆန်ဈေးနှုန်းမှာ ယခင်အပတ်ထက် အနည်းငယ်ကျဆင်းလျှက်ရှိကြောင်း သိရှိရပါသည်။

DOCA(မွန်)

 မန္တလေးစျေးကွက်သို့  ဖေဖော်ဝါရီလနောက်ဆုံးပတ်အတွင်း အစေ့ထုတ်ပြောင်းသီးနှံအများ အပြားဝင်ရောက်လျက်ရှိပါတယ်။မန္တလေးတိုင်းဒေသကြီးအတွင်းစိုက်ပျိုးသည့်အစေ့ထုတ်ပြောင်း (ထိုင်ဝမ်)မျိုးနှင့် ရှမ်းပြောင်းမျိုးတို့အပြင်   စစ်ကိုင်းတိုင်းဒေသကြီး နှင့် ရှမ်းပြည်နယ်တို့မှလည်း ဝင်ရောက်ကြောင်း သိရပါတယ်။ မန္တလေးတိုင်းဒေသကြီးအတွင်း ၂၀၂၄ - ၂၀၂၅ ခုနှစ်တွင် အစေ့ ထုတ်ပြောင်းစိုက်ပျိုးမှု  ၃၆၆၂၂ ဧက၊ရိတ်သိမ်းမှု ၁၃၃၃၁ ဧက၊ အထွက်နှုန်း ၄၉.၅၅ တင်း၊အထွက် တင်း စုစုပေါင်း ၆၆၀၅၉၁တင်းဖြစ်ကြောင်း သိရပါတယ်။ မန္တလေး ပွဲစား၊ ကုန်သည် စက်ပိုင်များ မဟာကထိန်တော်အသင်းတွင် ၂၀၂၅ ခုနှစ် ဖေဖော်ဝါရီလ  နောက်ဆုံးပတ်အတွင်းဖြစ်ပေါ်သည့် အစေ့ထုတ်ပြောင်းစျေးမှာ၃တင်းဝင်တစ်အိတ်လျင်ပြောင်းဖူးစေ့(ဗမာ)၈၁၀၀၀နှင့် ၈၂၀၀၀ကျပ်၊ ပြောင်းဖူးစေ့(ရှမ်း) နှင့်(စီပီ) မှာ ၈၃၀၀၀ကျပ်နှင့် ၈၄၀၀၀ကျပ်၊အထွက်တိုးပြောင်းနီ ၇၆၀၀၀ကျပ် နှင့် ၇၇၀၀၀ကျပ်၊အထွက်တိုးပြောင်းဖြူ ၈၂၀၀၀ ကျပ်နှင့် ၈၃၀၀၀ ကျပ်၊တစ်ပိဿာစျေးအနေဖြင့် ပြောင်းဖူးစေ့(ဗမာ) ၁၅၀၀ ကျပ်နှင့် ၁၅၁၉ကျပ်၊(ရှမ်း) နှင့်(စီပီ)၁၅၃၇ကျပ်နှင့်၁၅၅၆ကျပ်၊အထွက် တိုးပြောင်းနီ ၁၄၅၃ကျပ်၊အထွက်တိုးပြောင်း(ဖြူ) ၁၅၄၇ကျပ်နှင့် ၁၅၆၆ကျပ်တို့စျေးဖြစ်ပေါ်လျက် ရှိကြောင်းသိရပါတယ်။ယခင်နှစ်ကာလတူ တစ်ပိဿာပေါက်စျေးမှာပြောင်းဖူးစေ့(ဗမာ)၉၀၇ကျပ် နှင့်၉၂၆ ကျပ်၊(ရှမ်း) ၉၆၃ ကျပ်နှင့် ၉၇၂ကျပ်၊(စီပီ) ၉၄၄ကျပ်နှင့် ၉၅၄ကျပ်၊ အထွက်တိုးပြောင်းနီ ၁၂၂၆ကျပ်နှင့် ၁၃၂၁ ကျပ်တို့ဖြစ်ပေါ်ခဲ့ပြီး၊ ယခုနှစ်စေျးနှင့် ယခင်နှစ်စျေးနှိုင်းယှဉ်ပါကတစ်ပိဿာ လျှင် ၅၉၃ကျပ်ခန့်စျေးပိုမိုရရှိကြောင်း သိရပါတယ်။ ပြောင်းသီးနှံမှာမွေးမြူရေးအစားစပ်လုပ်ငန်း တွင်သုံးစွဲမှုများပြားခြင်း၊ ပြည်ပတင်ပို့ ခြင်းတို့ကြောင့်မန္တလေးစျေးကွက်တွင်အရောင်းသွက်သည့် ကုန်စည်ဖြစ်ကြောင်း သိရပါတယ်။မန္တလေးစျေးကွက်အတွင်းသို့ ၂၀၂၅ခုနှစ်ဖေဖော်ဝါရီလအတွင်း ရှမ်းပြည်နယ်မှ ပြောင်းကား( ၂၂ဘီး/ ၁၂ဘီး/ ၆ဘီး) ၂၀၃၃ စီးနှင့်ပြောင်း ဖူးစေ့ ၄၂၆၇၇ တန် ဖြစ် ဝင်ရောက်ကြောင်း ဂိတ်ဖြတ်စာရင်းများအရ  သိရပါတယ်။

DOCA(မန္တလေး)

၂၅.၂.၂၀၂၅    

               မန္တလေးမြို့တွင်းသို့ ကချင်ပြည်နယ်၊ မြစ်ကြီးနားနှင့် မိုးကုတ်ဒေသများမှ ဂရိတ်ဖု သီးများ ဝင်ရောက်လျှက်ရှိပါသည်။ ဂရိတ်ဖုသီးကို ဖျော်ရည်လုပ်၍ သောက်သုံးခြင်းအားဖြင့် သွေးတိုးကိုကျစေပြီး ရာသီဥတုပူလာသည့်အခါ အသက်အရွယ်ကြီးသူများကို ဂရိတ်ဖုဖျော်ရည် တိုက်ပေးခြင်းအားဖြင့် မောပမ်းမှုဒဏ်ကိုခံနိုင်သည့်အတွက် လူကြီးများအတွက် သင့်တော်သည့် ဖျော်ရည်တစ်မျိုးအဖြစ် မှီဝဲကြပါသည်။ ဂရိတ်ဖုဈေးနှုန်းဈေးကွက်အနေနှင့် မြစ်ကြီးနားနယ်မှ ဝင်ရောက်သည့်အသီးများမှာ ၂၅ လုံးလျှင် ၁၄၀၀၀ ကျပ်မှ ၁၅၀၀၀ ကျပ် မိုးကုတ်ဒေသမှ ဝင်ရောက်သည့်အသီးအနေနှင့် ၂၅ လုံးလျှင် ၁၅၀၀၀ ကျပ်မှ ၁၆၀၀၀ ကျပ်၊ လက်လီဈေးနှုန်း အနေနှင့် တစ်လုံးလျှင် ၈၀၀ ကျပ်မှ ၁၀၀၀ ကျပ်ထိ ဈေးနှုန်းရှိပြီး၊ ဂရိတ်ဖု ဖျော်ရည် ၁ ခွက်လျှင် ၅၀၀၀ ကျပ်ဈေးနှုန်းများနှင့် ဈေးကွက်တွင် အရောင်းအဝယ်ဖြစ်လျှက် ရှိပြီး ယခုရက်ပိုင်းအတွင်း မန္တလေးမြို့သည် နေ့အခါတွင်ပူသည့်အတွက် ဂရိတ်ဖုသီးများအနေနှင့် ဈေးကွက်တွင် အရောင်းအဝယ်ဖြစ်ကြောင်း လေ့လာသိရှိရပါသည်။

DOCA(မန္တလေး)