ပြည်တွင်းကုန်သွယ်မှုသတင်း

    မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ ကိုးတောင့်၊ ရေလယ်ကျွန်း၊ သံဇလုံ၊ ချင်တောင်၊ အောက်ဆိပ်၊ မြင်ကဝ၊ ဆူးလေကုန်း၊ ကမ္ဘားကြီးကျေးရွာများတွင် နှစ်စဉ် ပဲမျိုးစုံ စိုက်ပျိုးလျက်ရှိရာ ပဲကြီးသီးနှံကိုလည်း (၇၀)ဧကခန့်စိုက်ပျိုးကြကြောင်း သိရှိရပါသည်။ ပဲကြီးသီးနှံသည် သဲဆန်သည့် မြေအမျိုးအစားများတွင် စိုက်ပျိုးမှုများကြောင်း၊ ပဲကြီးဖြူ(အလုံးကြီး) မျိုးကို နွားရှဉ်းဖြင့် ထယ်ချောင်းဆွဲ၍ လေးကွက်ကြားစနစ်ဖြင့် စူးထိုးပြီး အစေ့ချ၍ နှစ်တောင်ကြားစိုက်ပျိုးကြောင်း၊ ယခင်နှစ်က အောက်တိုဘာလကုန်ပိုင်းတွင် စတင်စိုက်ပျိုးပြီး ဖေဖော်ဝါရီလတွင် သီးနှံရိတ်သိမ်းကြောင်း၊  စိုက်ပျိုးမှုအနေဖြင့် တစ်ဧကလျှင် မျိုးစေ့(၈)ပြည်ခန့်ကုန်ကျပြီး စိုက်ပျိုးထုတ်လုပ်မှု ကုန်ကျစရိတ်မှာ ကျပ်(၅)သိန်းခန့် ကုန်ကျကြောင်း၊ တစ်ဧကလျှင် တင်း(၂၀ - ၂၂) တင်းခန့် ထွက်ရှိကြောင်း၊ သီးညှပ်သီးနှံအဖြစ် ဗမာပြောင်းဖူးမျိုုးကို စိုက်ပျိုးကြောင်း၊ ပဲကြီးသီးနှံမှာ တစ်ပင်လုံးအသီးရင့်ပြီး ခြောက်သည်အထိထားရှိ၍ သက်တမ်း(၄)လခန့် ကြာမြင့်ကြောင်း သိရှိရပါသည်။

  ဈေးနှုန်းအနေဖြင့် ယခင်နှစ်ကဒေသတွင်းသီးနှံပေါ်ပြီး ဈေးကွက်သို့ရောက်ရှိချိန် မတ်လတွင် ပဲကြီးဖြူ(အလုံးကြီး) တစ်တင်းလျှင် ကျပ်(၇၅၀၀၀)ဖြင့် ရောင်းချရပြီး စက်တင်ဘာလ (ပထမပတ်) တွင် ကျပ်(၈၀၀၀၀)၊ (ဒုတိယပတ်)တွင် ကျပ်(၈၅၀၀၀)ဈေးဖြင့် ရောင်းချရပြီး ဈေးနှုန်း ဆက်လက်မြင့်တက်ခဲ့ရာ စက်တင်ဘာ(တတိယပတ်)တွင် ကျပ်(၉၀၀၀၀) ဈေးအမြင့်ဖြင့် အရောင်းအဝယ်ဖြစ်လျက်ရှိပြီး အကျိုးအမြတ်အနေဖြင့် တစ်ဧကလျှင် ကျပ်(၁၁)သိန်းခန့် အကျိုးအမြတ်ရရှိကြောင်း၊ ဒေသတွင်းပဲကြီးစိုက် တောင်သူများအနေဖြင့် ထွက်ရှိသောပဲကြီးကို သီးနှံပေါ်ချိန်မှစ၍ လက်ကျန်နည်းချိန်အထိ ဈေးနှုန်းဈေးကွက်ပေါ်မူတည်၍ တစ်စုတစ်စည်းတည်း ရောင်းချခြင်းမရှိဘဲ အကြိမ်ကြိမ်ခွဲ၍ ရောင်းချကြောင်း သိရှိရပါသည်။

   ဈေးကွက်အနေဖြင့် ဒေသတွင်းထွက်ရှိသည့် ပဲကြီးများကို မြို့ပေါ်ရှိပဲကြော်ပဲလှော် လုပ်ငန်းရှင်များမှဝယ်ယူကြောင်း၊ ချောက်မြို့ရှိပွဲရုံသို့လည်း ရောင်းချလျက်ရှိပြီး ထိုမှတစ်ဆင့် ဒေသ တွင်းနေရာအနှံ့အပြား ရောင်းချကြောင်း သိရှိရပါသည်။ ပဲကြီးသီးနှံကုန်ကြမ်းမှ တစ်ဆင့်ထုတ်လုပ်ရရှိသော ပဲခြမ်းကြော်၊ ပဲပူးကြော်အမျိုးမျိုးနှင့် ပဲကြီးလှော်စသည့် စားသောက်ကုန်များသည် မြန်မာလူမျိုးများအတွက် ရိုးရာအခြေခံစားကုန်တစ်မျိုးဖြစ်ခြင်းကြောင့် နှစ်စဉ်မပြတ်စိုက်ပျိုးကြောင်း၊ ယခုအချိန်တွင် ပဲကြီးလက်ကျန်နည်းပြီး ဈေးနှုန်းတရိပ်ရိပ်မြင့်တက်လာ၍ စိုက်တောင်သူများမှာ ရာသီဥတုအပေါ်မူတည်၍ ဆောင်းအဝင် အောက်တိုဘာလကုန် နိုဝင်ဘာလဆန်းပိုင်းတွင် ပဲကြီးသီးနှံများကို စိုက်ပျိုးရရှိသည့်မြေများတွင် တိုးချဲ့စိုက်ပျိုးရန် မြေပြုပြင်ဆောင်ရွက်လျက်ရှိကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီး၊ အထက်မင်းလှမြို့နယ်၊ တောင်ဦးကျေးရွာအုပ်စု၊ တောင်ဦးကျေးရွာ၌ မိုးမြေပဲစိုက်ဧက(၅၀)ဧကခန့်ကို တောင်သူ(၂၅)ဦးမှ ၂၀၂၄ခုနှစ်၊ မေလကုန်တွင် စိုက်ပျိုးခဲ့ပြီး ယခု စက်တင်ဘာလ (ဒုတိယပတ်)တွင် စတင်ခူးဆွတ်နေပြီဖြစ်ကြောင်း သိရှိရပါသည်။

   တောင်ဦးကျေးရွာနေ တောင်သူဒေါပြုံးကြည်က ၎င်းအနေဖြင့် မိုးမြေပဲ(၃)ဧကခန့်ကို ထွန်ကြောင်းဆွဲအစေ့ချစနစ်ဖြင့် စိုက်ပျိုးရာ (၁)ဧကလျှင် မျိုး(၂)ပြည်ခန့်ကုန်ကျကြောင်း၊ မျိုးအနေ ဖြင့် မကွေး(၁၆)မျိုးကို မင်းလှမြို့စိုက်ပျိုးရေးဦးစီးဌာနမှ အခမဲ့ရရှိကြောင်း၊  (၁)ဧကလျှင်  လုပ်အားခ၊ မြေပြုပြင်ခနှင့် အခြားသွင်းအားစုစရိတ်အပါအဝင် စုစုပေါင်း ကျပ်(၅)သိန်း ခန့်ကုန်ကျ ကြောင်း၊ အထွက်နှုန်းအနေဖြင့် (၃၅)တင်းထိထွက်ရှိကာ အကျိုးအမြတ်အနေဖြင့် ကျပ်(၉၀၀၀၀၀) ခန့်ရှိပါကြောင်း၊ စက်တင်ဘာလ(တတိယပတ်)အတွင်း မြေပဲတောင့်(၁)တင်း လျှင် ကျပ်(၃၅၀၀၀-၄၀၀၀၀)ဈေးရရှိကြောင်း၊ ဈေးကွက်အနေဖြင့် မကွေးမြို့ရှိပွဲရုံများသို့ တင်ပို့ရောင်းချပါကြောင်း၊ ယခုနှစ်တွင် မိုးမြေပဲထွက်ပေါ်ချိန်တွင် ဈေးကောင်းရလျက်ရှိသောကြောင့် မိုးမြေပဲစိုက်တောင်သူ များအနေဖြင့် အဆင်ပြေလျက်ရှိကြောင်း သိရှိရပါသည်။

DOCA(မကွေး)

     မကွေးတိုင်းဒေသကြီးသည် ဆီထွက်သီးနှံနှင့် ပဲမျိုးစုံတို့ကို အဓိကစိုက်ပျိုးထွက်ရှိသည့် ဒေသတစ်ခုဖြစ်ပါသည်။ မကွေးဈေးကွက်သို့ မကွေး၊ မြို့သစ်၊ နတ်မောက်၊ ရေနံချောင်းနှင့် မင်းဘူးမြို့နယ်များရှိ ကျေးရွာများမှ ထွက်ရှိသည့် မြေပဲသီးနှံ(မြေပဲလုံးဆံဖြူ၊ မြေပဲ လုံးဆံနီ၊ မြေပြန့်လုံးဆံ)များ ဝင်ရောက်အရောင်းအဝယ်ဖြစ်လျက်ရှိကြောင်း သိရှိရပါသည်။

   ဈေးနှုန်းများအနေဖြင့် ၂၀၂၄ ခုနှစ်၊ စက်တင်ဘာလ(တတိယပတ်)အတွင်း မြေပဲလုံးဆံဖြူ တစ်ပိဿာလျှင် ငွေကျပ်(၈၅၀၀-၈၈၀၀)၊ မြေပဲလုံးဆံနီ တစ်ပိဿာလျှင် ငွေကျပ်(၈၆၀၀-၈၉၀၀)၊  AK တစ်ပိဿာလျှင် ငွေကျပ်(၆၅၀၀-၆၆၀၀)တို့ဖြင့် အရောင်းအဝယ်ဖြစ်လျက်ရှိပြီး ရန်ကုန်မြို့၊ မန္တလေးမြို့နှင့် ပြည်မြို့များသို့ တင်ပို့ရောင်းချလျက်ရှိကြောင်းနှင့် ဒေသတွင်း ဆီကြိတ်ခွဲထုတ်လုပ်သည့်လုပ်ငန်းရှင်များမှ ဝယ်ယူကြကြောင်း၊ မြေပဲအသစ်များ ထွက်ပေါ်ချိန်ဖြစ်သော်လည်း ဈေးကွက်ဝယ်လိုအားကောင်းခြင်းတို့ကြောင့် မြေပဲဈေးနှုန်းများအနည်းငယ်မြင့်တက်လာကြောင်း မကွေးဈေးကွက်မှ သိရှိရပါသည်။

DOCA(မကွေး)

      စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရှိရာ စက်တင်ဘာလ၊ တတိယအပတ်အတွင်း အရောင်းအဝယ်ဖြစ်သည့် သီးနှံနှင့်ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ် မေးမြန်းခဲ့ပါသည်။ အစေ့ထုတ်ပြောင်းမှာ စက်တင်ဘာလ၊ ဒုတိယအပတ်မှစတင်၍ ရွှေဘိုဈေးကွက်သို့ စတင်ဝင်ရောက်ခဲ့ပြီး စက်တင်ဘာလ၊ တတိယအပတ်တွင် အရောင်းအဝယ်ဖြစ်သည့် ဈေးနှုန်းမှာ အစေ့ထုတ်ပြောင်း တစ်တင်းလျှင်(၂၆၀၀ဝိ/-)ကျပ် ပေါက်ဈေးရှိပြီး တစ်ပတ်အတွင်း အရောင်းအဝယ် ဖြစ်မှုမှာ (၂၂၅၀)တင်း/ (၅၆)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ် ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်အပတ်၌ အစေ့ထုတ်ပြောင်းတစ်တင်းလျှင်(၂၆၅၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်အောက် အစေ့ထုတ်ပြောင်းတစ်တင်းလျှင် (၅၀ဝိ/-) ကျပ် ဈေးလျော့နည်းခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကို နှိုင်းယှဉ်ပါက ယခင်နှစ်ကာလတူ၌ အစေ့ထုတ်ပြောင်းတစ်တင်းလျှင် (၁၈၆၀ဝိ/-)ကျပ် ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် အစေ့ထုတ်ပြောင်းတစ်တင်းလျှင် (၇၄၀ဝိ/-)ကျပ် ဈေးပိုမိုရရှိခဲ့ကြောင်း၊ ရွှေဘိုဈေးကွက်သို့ ကန့်ဘလူနယ်မှ အစေ့ထုတ်ပြောင်းများ အဝင်များပြီး ဝင်ရောက်သမျှ အရောင်းအဝယ်ဖြစ်လျက်ရှိကြောင်း သတင်းရရှိပါသည်။

DOCA(စစ်ကိုင်း)

      စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှု တင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရှိရာ ၂၀၂၄ခုနှစ်၊ စက်တင်ဘာလ၊ တတိယအပတ်တွင် အရောင်းအဝယ်ဖြစ်သည့် သီးနှံဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့်ဆက်သွယ်မေးမြန်းခဲ့ပါသည်။ ဆက်သွယ်မေးမြန်းမှုအရ မြေပဲလုံးဆံများမှာ စက်တင်ဘာလ၊ ဒုတိယအပတ်မှ စတင်၍ ရွှေဘိုဈေးကွက်သို့ ဝင်ရောက်ခဲ့ကြောင်း၊ စက်တင်ဘာလ တတိယအပတ်တွင် အရောင်းအဝယ်ဖြစ်သည့်ဈေးနှုန်းမှာ မြေပဲလုံးဆံတစ်တင်းလျှင် (၁၃၆၀၀ဝိ/-)ကျပ်ပေါက်ဈေးရှိပြီး တစ်ပတ်အတွင်းအရောင်းအဝယ်ဖြစ်မှုမှာ (၂၂၅)တင်း/ (၅)တန်ဖြစ်ကြောင်း၊   ‌ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်ပတ်၌     မြေပဲလုံးဆံတစ်တင်းလျှင် (၁၄၇၂၀ဝိ/-)ကျပ် ပေါက်ဈေးရှိခဲ့သဖြင့် ယခုအပတ်တွင် ယခင်အပတ်အောက်        မြေပဲလုံးဆံ တစ်တင်းလျှင်(၁၁၂၀ဝိ/-)ကျပ် ဈေးလျော့နည်းခဲ့ကြောင်း ဝင်ရောက်သမျှ အရောင်းအဝယ်ဖြစ်လျက်ရှိ‌ကြောင်း သတင်းရရှိပါသည်။

DOCA(စစ်ကိုင်း)