ပြည်တွင်းကုန်သွယ်မှုသတင်း

     ပဲခူးတိုင်း‌ဒေသကြီး၊ ပဲခူးမြို့နယ်တွင် စက်တင်ဘာလအတွင်း ငါးရံ့ခြောက်ကို ဒေသထွက်ကုန် တစ်ခုအနေဖြင့် ထုတ်လုပ်ရောင်းချလျက်ရှိပါသည်။ ငါးရံ့ခြောက်ကို ခရီးသွားပြည်သူများအနေဖြင့် လက်ဆောင်ပေးခြင်းအတွက်သော်လည်းကောင်း ကိုယ်တိုင်စားသုံးရန်အတွက်သော်လည်းကောင်း ဝယ်ယူလျက်ရှိကြပါသည်။

      ၂၀၂၄ခုနှစ် စက်တင်ဘာလတတိယအပတ်တွင် ငါးရံ့ခြောက်ပြုလုပ်ရာတွင် ငါးရံ့အစို တစ်ပိဿာကို ၇၀၀၀၀ကျပ်ဈေးမှ ၇၂၀၀၀ဈေးအထိ အကောင်ကြီး၊ သေးပေါ်မူတည်၍ ဝယ်ယူရပြီး အဆိုပါငါးအစိုကို ခွဲခြမ်းပြီးနေလှန်းရာတွင် ငါးခြောက်အဖြစ် ၃၅ ကျပ်သားသာ ထွက်ရှိပါသည်။ ငါးရံ့ခြောက်ထုတ်လုပ်သူများအနေဖြင့် ငါးရံ့အစိုတစ်ပိဿာကို အခြောက်ပြုလုပ်ရာ၌ ခန့်မှန်းကုန်ကျ ငွေ ၂၅၀၀၀ ကျပ်ဖြစ်ပြီး ငါးရံခြောက်တစ်ပိဿာ ၇၇၀၀၀ကျပ် မှ ၈၀၀၀၀ကျပ်ဈေးဖြင့်ရောင်းချရသည့် အပေါ် စီးပွားဖြစ်လုပ်ကိုင်သူများအတွက် တွက်ခြေကိုက်ပြီး တစ်ပိုင်တစ်နိုင် ထုတ်လုပ်သူများအတွက် အမြတ်အစွန်းအနည်းငယ်သာကျန်ရှိမည်ဖြစ်သော်လည်း ပဲခူးမြို့အတွင်း ငါးရံ့ခြောက်လုပ်ငန်းမှာ တွင်တွင်ကျယ်ကျယ် လုပ်ကိုင်ဆောင်ရွက်လျက်ရှိပါကြောင်း သိရှိရပါသည်။

DOCA(ပဲခူး)

    မြင်းခြံခရိုင်၊ မြင်းခြံမြို့၊ အေးမြသီတာဈေးတွင် ရောင်းချနေသောငါးမျိုးစုံမှာ ရန်ကုန်တိုင်းဒေသကြီး၊ ကြည်မြင့်တိုင်မြို့နယ်၊ ဗဟိုစံပြဈေးကြီးမှ ဝင်ရောက်လျက်ရှိကြောင်း သိရှိရပါသည်။

   ၂၀၂၄ ခုနှစ်၊ စက်တင်ဘာလ တတိယပတ်တွင် ရောင်းချနေသော ငါးအမျိုးအစားအလိုက် ဈေးနှုန်းများမှာ ငါးကြင်းမျက်ဆံနီ(အကောင်လိုက်)တစ်ပိဿာလျှင်(၈၅၀၀/၉၅၀၀)ကျပ်၊ ငါးကြင်းဖြူ(အကောင်လိုက်)တစ်ပိဿာလျှင်(၁၀၀၀၀/၁၂၀၀၀)ကျပ်၊ ငါးမြင်း(အကောင်လိုက်) တစ်ပိ ဿာလျှင် (၆၅၀၀/၇၀၀၀)ကျပ်၊ ငါးခူတစ်ပိဿာ (၈၅၀၀/၉၀၀၀)ကျပ်၊ ငါးကြင်းရွှေဝါတစ်ပိ ဿာလျှင်(၇၀၀၀/၇၅၀၀)ကျပ်၊ ငါးကြင်းဖြူ ခုတ်သားတစ်ပိဿာလျှင်(၁၇၀၀၀/၁၉၀၀၀)ကျပ်၊ ငါးကြင်းခြစ်တစ်ပိဿာ(၁၇၀၀၀/၁၉၀၀၀)ကျပ်၊ ပုဇွန်ထုတ်အလတ်တစ်ပိဿာလျှင်(၃၅၀၀၀/ ၃၉၀၀၀)ကျပ်များဖြင့် အသီးသီးရောင်းချလျှက်ရှိကြောင်း သိရှိရပါသည်။

  ယခင်လတတိယပတ်အတွင်း ဖြစ်ပေါ်ခဲ့သော ငါးအမျိုးအစားအလိုက် ဈေးနှုန်းများမှ ငါးကြင်မျက်ဆံနီ(အကောင်လိုက်) တစ်ပိဿာလျှင်(၈၀၀၀/၉၀၀၀)ကျပ်၊ ငါးကြင်းဖြူ(အကောင် လိုက်)တစ်ပိဿာလျှင်(၁၀၀၀၀/၁၁၀၀၀)ကျပ်၊ ငါးမြင်း(အကောင်လိုက်)တစ်ပိဿာလျှင်(၅၅၀၀ /၆၅၀၀)ကျပ်၊ ငါးခူတစ်ပိဿာ (၇၅၀၀/၈၅၀၀)ကျပ်၊ ငါးကြင်းရွှေဝါ(အကောင်လိုက်) တစ်ပိဿာ လျှင်(၆၀၀၀/၆၅၀၀)ကျပ်၊ငါးကြင်းဖြူ ခုတ်သားတစ်ပိဿာလျှင်(၁၆၀၀၀/၁၈၀၀၀) ကျပ်၊ ငါးကြင်းခြစ် တစ်ပိဿာ(၁၆၀၀၀/၁၈၀၀၀)ကျပ်၊ ပုဇွန်ထုတ်အလတ်တစ်ပိဿာလျှင်(၂၈၀၀၀/ ၃၂၀၀၀)ကျပ်များဖြင့် အရောင်းအဝယ်ဖြစ်နေ‌ကြောင်း သိရှိရပါသည်။

   ဩဂုတ်လတတိယပတ်နှင့် စက်တင်ဘာလ တတိယပတ်တို့အတွင်း ရောင်းဝယ်မှုဖြစ်ခဲ့သောဈေးနှုန်းများကို ကာလတိုနှိုင်းယှဉ်ပါက ယခုစက်တင်ဘာလတတိယပတ်တွင် ဖြစ်ပေါ်ပြောင်းလဲခဲ့သော ငါးအမျိုးအစားအလိုက် ငါးကြင်းမျက်ဆံနီ၊ ငါးမြင်း၊ ငါးခူးနှင့် ငါးကြင်းရွှေဝါတို့မှာ တစ်ပိဿာလျှင်(၅၀၀)ကျပ် ဈေးနှုန်းမြင့်တက်ခဲ့ပြီး၊ ငါးကြင်းဖြူ၊ ငါးကြင်းဖြူခုတ်သားနှင့်ငါးကြင်းခြစ်(အသား)တို့မှာ တစ်ပိဿာလျှင်(၁၀၀၀)ကျပ် မြင့်တက်ခဲ့ကြောင်း၊ ပုဇွန်ထုတ်အလတ်တစ်ပိဿာလျှင်(၇၀၀၀) ကျပ်ထိ အသီးသီးဈေးနှုန်မြင့်တက်ခဲ့ခြင်းမှာ မိုးများ၍ မြစ်ရေကြီးခြင်းကြောင့်ဖြစ်ပြီး၊ ငါးအကြီး၊ အသေးအရွယ်အစားပေါ်လိုက်၍လည်း ဈေးနှုန်းအနည်းငယ်ကွာခြားကြောင်း ငါးအရောင်းအဝယ်လုပ်ကိုင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

    ပဲခူးတိုင်းဒေသကြီး၊ ဒိုက်ဦးမြို့နယ်၊ သံတံတားရပ်ကွက်တွင် တစ်နိုင်တစ်ပိုင် အိမ်တွင်းလုပ်ငန်းဖြစ်သော ငါးခြောက်ခြင်းတောင်းနှင့် ငါးပိခြင်းတောင်းရက်လုပ်သော လုပ်ငန်းလုပ်ကိုင်လျက်ရှိကြောင်း သိရှိရပါသည်။

    အဆိုပါ ငါးခြောက်ခြင်းတောင်းနှင့် ငါးပိခြင်းတောင်း ရက်လုပ်ရာတွင် အသုံးပြုရသော ကုန်ကြမ်းမှာ ဝါးဖြစ်ပြီး ကုန်ကြမ်းကို ဒေသတွင်းရှိ ဝါးဆိုင်များမှ ဝယ်ယူရရှိပါသည်။ ခြင်းတောင်းတစ်ခြင်း ထုတ်လုပ်ရာတွင် ကုန်ကျစရိတ်အနေဖြင့် ၃၅၀ဝကျပ်ခန့်ကုန်ကျပြီး ၂၀၂၄ခုနှစ် စက်တင်ဘာလ တတိယပတ်တွင် ခြင်းတစ်ခြင်းရောင်းရငွေမှာ ၄၅၀ဝကျပ်ခန့်ရရှိသည့်အတွက် ခြင်းတစ်ခြင်းရောင်းရငွေ အကျိုးအမြတ်မှာ ၁၀၀ဝကျပ်ခန့်ရရှိကြောင်း သိရှိရပါသည်။ တစ်နေ့လျှင် ခြင်း(၁၀)ခြင်းခန့် ထုတ်လုပ်နိုင်ပြီး ဒိုက်ဦးမြို့နယ်အတွင်းရှိ ငါးပွဲရုံများနှင့် ငါးပိပွဲရုံများသို့ ပေးပို့‌ရောင်းချလျက်ရှိကြောင်း သိရှိရပါသည်။ လက်ရှိတွင် အဆိုပါ ငါးခြောက်ခြင်းတောင်းနှင့် ငါးပိခြင်းတောင်း ရက်လုပ်သော လုပ်ငန်းကို လုပ်သား (၅)ဦးခန့်ဖြင့် မိသားစု တစ်နိုင်တစ်ပိုင် ထုတ်လုပ်ရောင်းချလျက်ရှိကြောင်း သိရှိရပါသည်။

DOCA(ပဲခူး)

    ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်သည် ပုသိမ်-မုံရွာကားလမ်း ဘေးတွင် တည်ရှိပြီး လမ်းမကြီး၏ ဘေးဝဲယာတစ်လျှောက်တွင် မြေလွတ်မြေရိုင်းများစွာ ပေါများသည့်အလျောက် တောင်ကုန်းတောင်တန်းများတွင် စီးပွားရေးအရ တွက်ခြေကိုက်သည့် နှစ်ရှည်ပင်များ စိုက်ပျိုးလျက်ရှိကြပါသည်။ လေးမျက်နှာမြို့နယ်အတွင်း ကျွန်း၊ ပျဉ်ကတိုး၊ မာန်ဂျန်ရှား စသည့် ရတနာတန်းဝင်သစ်ပင်များ စိုက်ပျိုးကြသည့်အပြင် စက်မှုကုန်ကြမ်းအတွက် အထူးလိုအပ်လျက်ရှိသော ရာဘာကိုလည်း စီးပွားဖြစ် စိုက်ပျိုးလာကြရာ (၃၀၄၀)ဧကသည် ကုမ္ပဏီ(၅)ခုမှ စိုက်ပျိုး၍ ကျန်(၁၆၈၀)ဧကသည် ပုဂ္ဂလိကပိုင် တစ်နိုင်တစ်ပိုင်စိုက်ပျိုးကြပြီး စုစုပေါင်း (၄၇၂၀)ဧက ရှိပါသည်။ ရာဘာ တစ်ဧကလျှင် တန်းကြား(၂၄')နှင့်ပင်ကြား(၁၀')ကြား ထားရှိပြီး ရာဘာပင်(၂၀၁) ပင် စိုက်ပျိုးနိုင်ပါသည်။ အပင်သက်တမ်း(၇)နှစ်တွင် ရာဘာပင်၏ အောက်ခြေမှ(၄၈")အမြင့်တွင်၊ အချင်း(၁၈")ရှိပါက စတင်အစေးခံယူနိုင်ပြီး လက်ရှိရာဘာအစေးခြစ်လျက်ရှိသည့် ဧကပေါင်း (၂၁၂၅) ဧကရှိပါသည်။ လေးမျက်နှာမြို့နယ်တွင် ရာဘာစိုက်ပျိုးထုတ်လုပ်သည့် ကုမ္ပဏီ(၅)ခုရှိပြီး၊ ၎င်းတို့မှာ တိုးတက် ကုမ္ပဏီ၊ ညီပေါင်းကုမ္ပဏီ၊ ကြယ်နီကုမ္ပဏီ၊ 711 ကုမ္ပဏီနှင့် မျိုးကျော်လင်း ကုမ္ပဏီတို့ ဖြစ်ပါသည်။ တိုးတက်ကုမ္ပဏီသည် စိုက်ဧက (၆၀၀) ရှိပြီး လက်ရှိ အစေးခြစ် ဧက (၅၀၀)၊  ကြယ်နီကုမ္ပဏီသည် စိုက်ဧက(၄၄၀)ရှိပြီး လက်ရှိအစေးခြစ် ဧက (၂၅၀)၊ မျိုးကျော်လင်း ကုမ္ပဏီသည် ဧကပေါင်း (၁၂၀၀) ရှိပြီး အစေးခြစ်ဧက (၇၀၀)၊ ညီပေါင်းကုမ္ပဏီသည် ဧက(၃၀၀)ရှိပြီး အစေး ခြစ်ဧက(၂၇၅)နှင့် 711 ကုမ္ပဏီသည် ဧကပေါင်း(၅၀၀)ရှိပြီး လက်ရှိ အစေးခြစ်ဧက(၁၅၀)ရှိပါသည်။   စိုက်ပျိုးသည့် ရာဘာမျိုးများမှာ (BBM-24)၊ (2000-စီးတီး)၊ (39-35) မျိုးနှင့် (260) မျိုးတို့ဖြစ်ပါသည်။ ရာဘာ အစေးခံယူရာတွင် စက်တင်ဘာလ ဒုတိယပတ်မှ မတ်လ ဒုတိယပတ်အထိ (၆)လ ဆက်တိုက် အစေးခံယူနိုင်ပြီး၊ ရာဘာပင်များအရွက်ဟောင်းကြွေ၍ ရွက်သစ်အနုထွက်ချိန်တွင် တစ်လခွဲ ခန့်အစေးခံခြင်းရပ်နားထားပြီး ရာဘာခြံများတွင် မီးတားလမ်းများ ပြုလုပ်ရှင်းလင်းရပါသည်။ ဧပြီလ တတိယပတ်လောက်တွင် ရာဘာအစေးခံခြင်းလုပ်ငန်းကို ပြန်လည်စတင်ခဲ့ပြီး ဇွန်လပိုင်း မိုးများ သောကာလတွင် အစေးခံခြင်းကို ရပ်နားပြီး ရာဘာခြံအတွင်း ပေါင်းမြက်ရှင်းခြင်း၊ ဓါတ်မြေဩဇာ ထည့်သွင်းခြင်းစသည်တို့ကို   ဆောင်ရွက်ကြရပါသည်။

      ရာဘာအပင်မှ အစေးများကို အခဲအဖြစ်ပြုပြင်၍ လူသုံးကုန်ပစ္စည်းများတွင် အသုံးပြုသည့် အတွက် အလွန်အသုံးဝင်သော စက်မှုကုန်ကြမ်းဖြစ်သည့်အလျှောက် ယခုအခါ ရာဘာဈေးနှုန်းမှာ  တစ်ပေါင်လျှင် ( ၃၀၀၀/-ကျပ် )အထိ ဈေးရရှိပြီး၊ ရာဘာမှိုင်းခံပြားများကို Rs-1, Rs-2, Rs-3 ဟူ၍ အမျိုးအစား အဆင့်(၃)ဆင့်ခွဲ၍ သတ်မှတ်ကြပါသည်။ Rs-2 သတ်မှတ်သော မှိုင်းခံပြား တစ်ပေါင်လျှင် (၂၅၀၀/-ကျပ် )၊ Rs-3 သတ်မှတ်သော မှိုင်းခံပြား တစ်ပေါင်လျှင် (၂၄၀၀/-ကျပ်) ဈေးနှုန်းရရှိပြီး၊ ရန်ကုန်တိုင်းဒေသကြီးနှင့် မန္တလေးတိုင်းဒေသကြီးရှိ ရာဘာ လူသုံးကုန်ပစ္စည်း ထုတ်လုပ်ရေးစက်ရုံ များနှင့်ရာဘာကုန်ကြမ်းသုံးစက်ရုံများသို့ တင်ပို့ရောင်းချလျက်ရှိပါသည်။ ရာဘာပင်သည် နှစ်ရှည်ပင် ဖြစ်၍ နှစ်(၃၀)ခန့် ဆက်တိုက် ရာဘာအစေးခြစ်နိုင်သည်ဖြစ်၍ ရေရှည်စီးပွားရေးအတွက် အကျိုးရှိသော လုပ်ငန်းတစ်ခုဖြစ်ပါသည်။ အဆင့်မှီ ရာဘာပြားများကို တိုးတက်ထုတ်လုပ်ခြင်းဖြင့်ပြည်ပသို့ တင်ပို့နိုင်ပြီး နိုင်ငံခြားဝင်ငွေရရှိစေကာ နှစ်ရှည်စိုက်ပျိုးရေးလုပ်ငန်းတစ်ခုဖြစ်ကြောင်း လေ့လာတင်ပြအပ်ပါသည်။

DOCA(ဧရာဝတီ)

     မကွေးတိုင်းဒေသကြီး၊ သရက်ခရိုင်၊ အောင်လံမြို့၊ အောင်လံကုန်စည်ဒိုင်တွင် နှမ်းနှင့် ပဲမျိုးစုံသီးနှံများ အရောင်းအဝယ်ဖြစ်လျက်ရှိကြောင်း သိရသည်။

      ၂၀၂၄ခုနှစ်၊ စက်တင်ဘာလ(ဒုတိယပတ်)တွင် အနိမ့်စ နှမ်းနက်(စမုန်) (၁)တင်းလျှင် ကျပ်(၁၆၀၀၀၀ မှ ၁၆၆၅၀၀)၊ ထိပ်စ နှမ်းနက်(စမုန်) (၁)တင်းလျှင် ကျပ်(၁၇၀၀၀၀ မှ ၁၉၆၅၀၀) ဖြစ်၍ ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် အနိမ့်စ နှမ်းနက်(စမုန်) ကျပ်(၁၀၀၀၀) ဈေးနှုန်းမြင့်တက်ခဲ့ပြီး ထိပ်စ နှမ်းနက်(စမုန်) ကျပ်(၃၀၀၀ မှ ၁၃၅၀၀)ဈေးနှုန်းကျဆင်း၍ အရောင်းအဝယ်ဖြစ်ခဲ့ကြောင်း၊ တစ်ပတ်အတွင်း နှမ်းနက်(စမုန်)တင်းရေ (၂၂၄၀၀)တင်း၊ တန်ချိန်(၂၇၉)တန် အရောင်းအဝယ်ရှိခဲ့ပါကြောင်း သိရသည်။

     နှမ်းနီဈေးနှုန်းမှာ (ဒုတိယပတ်)တွင် (၁)တင်းလျှင် အနိမ့်စ ကျပ်(၁၁၀၀၀၀)၊ ထိပ်စ ကျပ်(၁၁၃၃၀၀)ဖြစ်၍ ဈေးနှုန်းပြောင်းလဲမှုမရှိကြောင်း၊ တစ်ပတ်အတွင်း နှမ်းနီတင်းရေ (၆၆၀)၊ တန်ချိန်(၁၆)တန် အရောင်းအဝယ်ရှိခဲ့ကြောင်း၊ နှမ်းဖြူ (၁)တင်းလျှင် ကျပ်(၁၁၀၀၀၀)ဖြစ်ပြီး ယခင်တစ်ပတ်အတိုင်း ဈေးနှုန်းပြောင်းလဲမှုမရှိဘဲ တင်းရေ(၂၇၀)၊ တန်ချိန်(၆.၆)တန် အရောင်းအဝယ်ဖြစ်ခဲ့ကြောင်း သိရသည်။

    ဈေးကွက်အနေဖြင့် နှမ်းနက်(စမုန်)နှင့်နှမ်းဖြူတို့ကို မန္တလေးမြို့သို့တင်ပို့ရောင်းချပြီး နှမ်းနီကို မြို့နယ်တွင်း ဆီစက်လုပ်ငန်းများမှ ဝယ်ယူကြကြောင်း အောင်လံကုန်စည်ဒိုင်မှ သိရှိရပါသည်။

DOCA(မကွေး)