ပြည်တွင်းကုန်သွယ်မှုသတင်း

        မကွေးတိုင်းဒေသကြီး၊ အထက်မင်းလှမြို့နယ်၊ ပန်းတော်ပြင်ကျေးရွာအုပ်စု၊ မယ်ဇလီတောကျေးရွာရှိ တောင်သူများသည် သပြေပန်းကို မိမိအိမ်ခြံဝန်းနှင့် ဥယျာဉ်ခြံမြေ၊ ယာမြေများတွင် တစ်နိုင်တစ်ပိုင်စိုက်ပျိုးကြကြောင်းသိရသည်။

         မယ်ဇလီတောကျေးရွာနေ တောင်သူ ဒေါ်စန်းဌေးက ၎င်းအနေဖြင့် သပြေပန်းကို  ကိုင်းကူးမျိုးတစ်ပင်လျှင် ကျပ်(၃၀၀)ဖြင့် မန္တလေးမြို့မှဝယ်ယူ၍ စိုက်ဧက (၀.၅)ဧကပေါ်တွင် အပင်ရေ (၄၀၀)ခန့်စိုက်ပျိုးထားရှိကြောင်း၊ ကိုင်းကူးမျိုးဖြစ်သည့်အတွက် စိုက်ပျိုးပြီး (၅)လအကြာတွင် ခူးဆွတ်နိုင်ကြောင်း၊ သပြေပန်းမှာ ရာသီမရွေးခူးဆွတ်နိုင်သောပန်းဖြစ်သော်လည်း မိုးရာသီနှင့်နွေရာသီတွင် သပြေပန်းအခက်များလှိုင်လှိုင်ပွင့်တက်ပြီး ဆောင်းရာသီတွင် ပိုးကျတက်သောကြောင့် အထွက်နှုန်းနည်းပါကြောင်း၊ ကုန်ကျစရိတ်အနေဖြင့် (၀.၅)ဧကအတွက် မျိုးဖိုး၊ ရေသွင်းခနှင့် အခြားသွင်းအားစုစရိတ်အပါအဝင် ကျပ်(၃၀၀၀၀၀)ခန့်ကုန်ကျကြောင်း၊ ထွက်ရှိသည့်သပြေပန်းများကို ကျပ်(၃၀၀-၅၀၀-၁၀၀၀)အစည်းများစည်း၍ မန်းသံပုရာကန်ရေနံချက်စက်ရုံ (PIC) ဈေးတွင် ကိုယ်တိုင်သွားရောက်၍ ရောင်းချကြောင်း၊  ဝင်ငွေအားဖြင့် နေ့စဉ် ကျပ်(၁၅၀၀၀)ခန့်ရရှိကြောင်း၊ သပြေပန်းမှာ နှစ်ရှည်ပင်ဖြစ်သောကြောင့် စိုက်ပျိုးထွက်ရှိချိန်မှစပြီး နေ့စဉ်ပုံမှန်ဝင်ငွေရရှိသောအပင်ဖြစ်၍ မိသားစုအပိုဝင်ငွေကို တစ်ဖက်တစ်လမ်းမှရရှိကာ အဆင်ပြေလျက်ရှိကြောင်းသိရှိရပါသည်။

DOCA(မကွေး)

        မကွေးတိုင်းဒေသကြီး၊ စလင်းမြို့နယ်၊ ငလင်ပန်းကျေးရွာ၌ စားဖိုဆောင်သီးနှံတစ်မျိုးဖြစ်သည့် ချဉ်ပေါင်ကို မြေအောက်ရေတင်စနစ်ဖြင့် တစ်နှစ်ပတ်လုံးစိုက်ပျိုးကြပြီး ၄ဧကခန့်စိုက်ပျိုးထားရှိကြောင်းသိရသည်။

         ချဉ်ပေါင်မျိုးအနေဖြင့် အဖြူ၊ အနီမျိုးကိုစိုက်ပျိုးပြီး တစ်ဧကလျှင် မျိုးစေ့(၁.၅)ပြည်ခန့်ကုန်ကျကြောင်း၊ စိုက်ပျိုးရာတွင် မြေကိုထွန်ယက်ပြုပြင်ကာ ထွန်းကြောင်းဆွဲ၍ မျိုးစေ့ကို ကြဲပက်စနစ်ဖြင့်စိုက်ပျိုးကြောင်း၊  ၂၀၂၄ခုနှစ်၊ ဩဂုတ်လတွင် စတင်စိုက်ပျိုးပြီး စက်တင်ဘာလ ပထမပတ်တွင် လှိုင်လှိုင်ထွက်ပေါ်လျက်ရှိကြောင်း၊ စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧကလျှင် ငွေကျပ်၃၅၀၀၀၀ကုန်ကြကြောင်း၊ အထွက်နှုန်းပိဿာလျှင် (၈၀၀-၉၀၀) ခန့်ထွက်ရှိပြီး  ငွေကျပ်၈၅၀၀၀၀ခန့်အကျိုးအမြတ်ရရှိကြောင်းသိရသည်။

          ဈေးနှုန်းအနေဖြင့် စက်တင်ဘာလ ဒုတိယပတ်တွင် လက်ကားဈေး ချဉ်ပေါင်ရွက်တစ်ပိဿာလျှင် ငွေကျပ် (၁၅၀၀-၁၈၀၀) ဖြင့် မကွေးမြို့နှင့် မင်းဘူးမြို့သို့တင်ပို့ကြောင်း၊ မိုးရွာသွန်းမှုများပြားသော်လည်း အထွက်နှုန်းကောင်းမွန်၍ ဈေးကောင်းရသောကြောင့် စိုက်ပျိုးရောင်းချသူများအနေဖြင့် အကျိုးအမြတ်များရရှိကြောင်းသိရှိရပါသည်။

DOCA(မကွေး)

       ဝါးတန်းဆန်စပါးကုန်စည်ဒိုင်သို့ (၃-၉-၂၀၂၄) မှ (၉-၉-၂၀၂၄) နေ့ထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုကလေး၊ လပွတ္တာ၊ မော်ကျွန်း၊ ကျိုက်လတ်၊ ဟင်္သာတ၊ ဓနုဖြူ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၂၈၀၆၃) အိတ်၊ ပေါ်ကျွဲ (၈၂၉၃) အိတ်၊ ဧည့်မထ (၇၂၃၇၉) အိတ်၊ ဆန်ကွဲ (၁၃၃၆၁) အိတ် ဝင်ရောက်ခဲ့ပြီး ပဲခူးတိုင်း (အရှေ့) ကျောက်တံခါး၊ ညောင်လေးပင်၊ ဖြူးမြို့နယ်များမှ ဧည့်မထ (၆၇၅၆) အိတ်နှင့် ပဲခူးတိုင်း (အနောက်) မြို့နယ်များဖြစ်သော သာယာဝတီ၊ သုံးဆယ်၊ လက်ပံတန်း၊ ကြို့ပင်ကောက်မြို့နယ်များမှ ဧည့်မထ (၂၀၉၃၇) အိတ်၊ ငစိန် (၁၃၀၄) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ ပျော်ဘွယ်၊ တိုက်ကြီး၊ ခရမ်း၊ သုံးခွ၊ ဥက္ကံမြို့နယ်များမှ ဧည့်မထ (၁၇၀၂၀) အိတ်တို့ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရသိရှိရပါသည်။

DOCA(ရန်ကုန်)

     ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့မဈေးအတွင်း ရောင်းချလျက်ရှိသော ကြက်သွန်နီဈေးနှုန်းများမှာ ဩဂုတ်လဒုတိယပတ်မှ ဩဂုတ်လနောက်ဆုံးပတ်တွင် ကြက်သွန်နီ (အကြီး) လက်လီဈေးနှုန်း တစ်ပိဿာလျှင် (၂၅၀၀/၂၈၀၀) ကျပ်ဈေးနှုန်းဖြင့် အရောင်းအဝယ်ရှိနေ ခဲ့သော်လည်း ကြက်သွန်နီများကို မိုးရာသီတွင်စားသုံးရန် စားသုံးသူများက သိုလှောင်ကြပြီး ကြက်သွန်နီများမှာ ဈေးကွက်အတွင်း၌ ယခုစက်တင်ဘာလဒုတိယပတ်ထိ(၂၈၀၀/၃၀၀၀)ကျပ် ဈေးနှုန်း ဖြင့် ရောင်းချလျက်ရှိကြောင်း သိရှိရပါသည်။

     အာလူးဈေးကွက်ရောင်းချမှုအနေဖြင့် အာလူးတစ်ပိဿာလျှင် ဩဂုတ်လဒုတိယပတ်မှ တတိယပတ်ထိ အာလူးတစ်ပိဿာလျှင် (၄၅၀၀/၆၀၀၀)ကျပ်ပေါက်ဈေးဖြင့် အရောင်းအဝယ်ရှိနေခဲ့ပြီး ယခုစက်တင်ဘာဒုတိယပတ်တွင် (၄၅၀၀/၆၀၀၀)ကျပ်ဖြင့် ဈေးငြိမ်စွာ ဆက်လက်ရောင်းချလျက်ရှိကြောင်း  ဈေးကွက်အတွင်းမှ ရောင်းချသူတစ်ဦးထံမှ သိရှိရပါသည်။

DOCA(ပဲခူး)

        ရန်ကုန်တိုင်းဒေသကြီး၊ လှိုင်မြို့နယ်၊  သီရိမင်္ဂလာဈေးတွင် စက်တင်ဘာလ (၃) ရက်နေ့မှ စက်တင်ဘာလ (၉) ရက်နေ့အထိဖြစ်ပေါ်ခဲ့သော ပုပ္ပါးမှ ဩဇာသီးဂျပ်ဖာတစ်ခုလျှင် အလုံးကြီး ကျပ်၂၅၀၀၀၊ အလုံးလတ် ကျပ်၂၂၀၀၀၊ အလုံးသေး ကျပ်၂၀၀၀၀၊ ဝမ်းတွင်းမှ ဖရဲသီး(ဘာဟု)တစ်လုံးလျှင် အလုံးကြီး ကျပ်၄၀၀၀၊ အလုံးလတ် ကျပ်၃၀၀၀၊ အလုံးသေး ကျပ်၂၀၀၀၊ ဝမ်းတွင်းမှ ဖရဲသီး(855)တစ်လုံးလျှင် အလုံးကြီး ကျပ်၉၀၀၀၊ အလုံးလတ် ကျပ်၈၀၀၀၊ အလုံးသေး ကျပ်၆၀၀၀၊ သီပေါမြို့ မှ နာနတ်သီးတစ်လုံးလျှင် အလုံးကြီး ကျပ်၁၈၀၀၊ အလုံးလတ် ကျပ်၁၅၀၀၊ အလုံးသေး ကျပ်၁၀၀၀၊ ပြင်ဦးလွင်မှ နဂါးမောက်သီးဂျပ်ဖာတစ်ခုလျှင် အလုံးကြီး ကျပ်၃၃၀၀၀၊ အလုံးလတ် ကျပ်၂၅၀၀၀၊ အလုံးသေး ကျပ်၁၈၀၀၀၊ မော်လမြိုင်မှ ကျွဲကောသီးတစ်လုံးလျှင် အလုံးကြီး ကျပ်၅၀၀၀၊ အလုံးလတ် ကျပ်၃၀၀၀၊ အလုံးသေး ကျပ်၂၀၀၀၊ ကလောမှ ပန်းသီး စက္ကူပုံးတစ်ပုံးလျှင် အလုံးကြီး ကျပ်၄၆၀၀၀၊ အလုံးသေး ကျပ်၃၆၀၀၀၊ ပုပ္ပါးမှ မာလကာသီးအလုံးကြီးတစ်လုံးလျှင် ကျပ်၆၀၀၊ ရှမ်းပြည်မှ သရက်သီး(ရင်ကွဲ) (၆၀) လုံးပါ အလုံးကြီးတစ်ခြင်းလျှင်  ကျပ်၄၅၀၀၀၊ အလုံးလတ်တစ်ခြင်းလျှင် ကျပ်၄၀၀၀၀၊ အလုံးသေးတစ်ခြင်းလျှင် ကျပ်၃၅၀၀၀ဈေးတို့ရှိကြောင်း သီရိမင်္ဂလာဈေးရှိ မြန်မာနိုင်ငံသစ်သီးဝလံပန်းမန်ဟင်းသီးဟင်းရွက်စိုက်ပျိုးထုတ်လုပ်တင်ပို့ရောင်းချသူများအသင်း (MFVP) မှသိရှိရပါသည်။

DOCA(ရန်ကုန်)