မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့သည် စိုက်ပျိုးရေးကိုအခြေခံပြီး ဒေသထွက်ကုန် များစွာထွက်ရှိရာမှ ဆီးသီး(ဇီးသီး)လည်းတစ်မျိုးအပါအဝင်ဖြစ်ပါသည်။ ပခုက္ကူဈေးကွက်တွင် ဆီးချဉ်သီး အစို၊ အခြောက်များ ဈေးကွက်သို့လှိုင်လှိုင်ဝင်ရောက်လျက်ရှိပြီး ယခု၂၀၂၅ခုနှစ်၊ ဖေဖော်ဝါရီလ (စတုတ္ထပတ်)တွင် ဆီးသီးနှင့်ဆီးစေ့များ ဈေးအမြင့်ဖြင့် အရောင်းအဝယ်ဖြစ်လျက်ရှိပြီး ဆီးသီးပေါ်ချိန် ဖြစ်၍ မြို့ပေါ်ရှိ ဆီးခွဲစက်များလည်း တွင်ကျယ်စွာလည်ပတ်လျက်ရှိသည်။ မြန်မာနိုင်ငံနေရာအနှံ့ အပြားတွင် ဆီးပင်များ ပေါများစွာအလေ့ကျပေါက်ရောက်ပြီး အထူးသဖြင့် ပူပြင်းသောမန္တလေး၊ မကွေးနှင့်စစ်ကိုင်းတိုင်းဒေသကြီးများတွင် အများဆုံး ဆီးပင်ပေါများစွာ ပေါက်ရောက်တွေ့ရှိရပြီး ဆီးသီး အများဆုံးထွက်ရှိရာ ဒေသများဖြစ်သည်။ ဆီးပင်သည် သဘာဝအလေ့ကျပေါက်သောအပင်ဖြစ်ပြီး ဆီးပင်မှ အသီးအစေ့၊ ခွဲခြမ်းနှင့် ဆီးရွက်၊ ဆီးသားမှအစ တစ်ပင်လုံး အသုံးဝင်သောကြောင့် ရောင်းချ ခြင်းဖြင့် မိသားစုအပိုဝင်ငွေရရှိ၍ ယခင်က သဘာဝအလျှောက် အလေ့ကျပေါက်ခြင်းအပြင် ယခု အခါတွင် တောင်သူများမှ လယ်ယာမြေ၊ ခြံစည်းရိုးနှင့် ဥယျာဉ်ခြံမြေများတွင် စနစ်တကျတိုးချဲ့ စိုက်ပျိုး လာကြသည်။
ဆီးပင်စိုက်ပျိုးထွက်ရှိရာ အညာဒေသများတွင် ဆောင်းရာသီ ဆီးသီးမှည့်ချိန်တွင် လယ်ယာမြေ ပိုင်ရှင်များက ဆီးပင်အောက် ပေါင်းမြက်ရှင်းလင်းကာ ဆီးသီးကောက်၍ ရောင်းချကြောင်း၊ အညာမြေ ကျေးလက်တောင်သူများ လယ်ယာလုပ်ငန်းနားချိန်တွင် ဆီးသီးကောက်၍ ရောင်းချကြကြောင်း၊ ဆီးတစ်ပင်လျှင် ဆီးသီးအစို ပျမ်းမျှ (၅)တင်းမှ (၁၀)တင်းအထိ ထွက်ရှိကြောင်း၊ ဆီးခြံတစ်ခုတွင် ဆီးပင် (၁၀)ပင်ခန့် ရှိပါကဆီးသီးတင်း (၁၀၀)ခန့်ရရှိကြောင်း၊ ယခုနှစ် ဆီးသီးဈေးကွက်ကောင်း၍ စိုက် တောင်သူများ အကျိုးအမြတ်များစွာရရှိကြောင်း၊ အညာမြေဒေသတွင် ဆီးသီးပင်များစိုက်ခြင်းဖြင့် တောင်သူများအတွက် ကုန်ကျစရိတ်မရှိဘဲ မိသားစုအတွက် တစ်ဖက်တစ်လမ်းမှ နှစ်စဉ်အပိုဝင်ငွေ ဖြည့်ဆည်းပေးနေသော အလေ့ကျတန်ဖိုးရှိ ပဒေသာဆီးပင်များ ဖြစ်သည်။
မကွေးတိုင်းဒေသကြီး၊ ပခုက္ကူမြို့ ဆီးသီးရောင်းဝယ်ရေးဈေးကွက်တွင် ဆောင်းရာသီထွက် ဆီးချဉ်သီးများ ဇန်နဝါရီလမှစ၍ ဆီးသီးများ ဝင်ရောက်အရောင်းအဝယ်ဖြစ်လျက်ရှိကြောင်း သိရှိရ သည်။ မန်ကျည်းတစ်လှည့် ဆီးတစ်လှည့် ဆိုရိုးစကားနှင့်အညီ ယခုနှစ်တွင် ဆီးပင်များ အသီးတင် ရောက်မှုများ၍ ပခုက္ကူဈေးကွက်သို့ ဆီးချဉ်သီးများ လှိုင်လှိုင်ဝင်ရောက်အရောင်းအဝယ်ဖြစ်လျက်ရှိ သည်။ ဈေးကွက်သို့ ဆီးပင်စိုက်ပျိုးထွက်ရှိမှုများသော ပခုက္ကူ၊ မြစ်ခြေ၊ ကမ္မ၊ မြိုင်၊ ပေါက်၊ ရေစကြို၊ ဆိပ်ဖြူမြို့နယ်များနှင့် ယောနယ်ဒေသများအပြင် ပခုက္ကူမြို့နှင့် ထိစပ်လျက်ရှိသော မန္တလေးနှင့် စစ်ကိုင်းတိုင်းဒေသကြီးအတွင်းရှိ ကျေးရွာများမှလည်း နှစ်စဉ်ဝင်ရောက်အရောင်းအဝယ်ဖြစ်လျက်ရှိရာ ရာသီဥတုနှင့် ဆီးပင်အသီးသီးမှုအပေါ်မူတည်၍ နှစ်စဉ်ဆီးသီး တင်းရေ သိန်း(၂၀-၃၀)တင်းခန့် ဝင်ရောက်အရောင်းအဝယ်ဖြစ်ကြောင်း သိရှိရသည်။
ယခုဆောင်းရာသီထွက် ဆီးချဉ်သီးများ လှိုင်လှိုင်ပေါ်ချိန်တွင် ပခုက္ကူမြို့၌ ဆီးခွဲစက်များလည်း တွင်တွင်ကျယ်ကျယ် လည်ပတ်လျက်ရှိ၍ ဒေသခံပြည်သူများလည်း အလုပ်အကိုင်အခွင့်အလမ်း များစွာ ရရှိလျက်ရှိသည်။ ဆီးခွဲစက်များတွင် တစ်ရက်လျှင် ဆီးသီးအခြောက်ပိဿာ(၁၀၀၀)ခန့် ကြိတ်ရကြောင်း၊
တစ်ပိဿာကြိတ်လျှင် ဆီးဆံ(၂၅)ကျပ်သားခန့်ထွက်ရှိကြောင်း၊ ဆောင်းအကုန် နွေအကူး မတ်လဆန်း ပိုင်းတွင် လယ်ယာမြေထွက် ဆီချဉ်သီးများ ဈေးကွက်သို့ ပိုမိုဝင်ရောက်လာမည်ဖြစ်ကြောင်း ဈေးကွက်မှ သိရှိရသည်။
ဆီးချဉ်သီး ဈေးနှုန်းဈေးကွက်အနေဖြင့် ၂၀၂၅ခုနှစ်၊ ဖေဖော်ဝါရီလ(စတုတ္ထပတ်)တွင် ဈေးကွက် သို့ တစ်ရက်လျှင် ဆီးသီးအစိုအခြောက် တင်း(၅၀-၁၀၀)ခန့် ဝင်ရောက်အရောင်းအဝယ်ဖြစ်ကြောင်း၊ ဈေးနှုန်းအနေဖြင့် ဆီးသီးအခြောက် တစ်တင်းလျှင် ကျပ်(၁၄၀၀၀-၁၃၀၀၀)၊ ဆီးသီးအစိုတစ်တင်းလျှင် ကျပ်(၇၀၀၀-၆၀၀၀)ဈေးဖြင့် အရောင်းအဝယ်ဖြစ်ပြီး ဆီးဆံတစ်ပိဿာလျှင် ကျပ်(၆၀၀၀၀)ဈေးဖြင့် အရောင်းအဝယ်ဖြစ်ကြောင်း၊ နှစ်အလိုက်ကာလတူ ဈေးနှုန်းနှိုင်းယှဉ်ပါက ၂၀၂၄ခုနှစ်တွင် ဆီးသီး အခြောက်တစ်တင်းလျှင် ကျပ်(၁၂၅၀၀-၁၂၀၀၀)၊ ဆီးသီးအစိုတစ်တင်းလျှင် ကျပ်(၅၅၀၀-၅၀၀၀) ဈေးဖြင့် အရောင်းအဝယ်ဖြစ်ပြီး ဆီးဆံတစ်ပိဿာလျှင် ကျပ်(၄၀၀၀၀)ဈေးဖြင့် အရောင်းအဝယ်ဖြစ် ကြောင်း၊ ၂၀၂၃ခုနှစ်တွင် ဆီးသီးအခြောက်တစ်တင်းလျှင် ကျပ်(၁၀၀၀၀-၉၀၀၀)၊ ဆီးသီးအစို တစ်တင်းလျှင် ကျပ်(၅၀၀၀-၄၀၀၀)ဈေးဖြင့် အရောင်းအဝယ်ဖြစ်ပြီး ဆီးဆံတစ်ပိဿာလျှင် ကျပ် (၂၆၀၀၀)ဈေးဖြင့် အရောင်းအဝယ်ဖြစ်ကြောင်း၊ နှစ်အလိုက် ဆီးသီးဆီးဆံဈေးနှုန်း တရိပ်ရိပ်မြင့်တက် အရောင်းအဝယ်ဖြစ်ကြောင်း သိရှိရသည်။
ပခုက္ကူဈေးကွက်သို့ ဝင်ရောက်လာသည့် ဆီးသီးအစိုအခြောက်များကို မြို့ပေါ်ရှိ ဆီးခွဲစက် လုပ်ငန်းရှင်များ ဒေသတွင်း ဆီးဖျော်ရည်၊ ဆီးယို၊ ဆီးပြား၊ ဆီးငံစပ်၊ ဆီးမှုန့် စားသောက်ကုန်လုပ်ငန်း ရှင်များနှင့် စားသုံးပြည်သူများသို့ ရောင်းချလျက်ရှိပြီး ပခုက္ကူဆီးသီးပွဲစားများမှလည်း ရန်ကုန်၊ မန္တလေး ဈေးကွက်သို့ တင်ပို့ကြောင်း၊ ဆီးသီးကြိတ်ခွဲထုတ်လုပ်ပြီး ရရှိသောဆီးဆံများကိုလည်း ဒေသတွင်း သုံးစွဲ မှုအပြင် ကျန်းမာရေးဆေးဖက်ဝင်ခြင်းကြောင့် ပြည်ပနိုင်ငံများသို့လည်း မန္တလေးဈေးကွက်မှတစ်ဆင့် တင်ပို့လျက်ရှိ၍ ဆီးသီးရာသီချိန်တွင် ပြည်တွင်း ဆီးသီးဈေးကွက်မြင့်တက်ကြောင်း သိရှိရသည်။
ဆီးပင်သည် အမြဲစိမ်းလန်း၍ ကိုင်းဖြာသောအပင်လတ်တစ်မျိုးဖြစ်ပြီး အရိပ်အာဝါသ ကောင်းမွန် ပြီး တစ်ပင်လုံးအသုံးဝင်သော ဆေးဖက်ဝင်အပင်ဖြစ်သည်။ စားသုံးမှုအနေဖြင့်လည်း ဆီးသီးတွင် အမျှင်ဓာတ်များစွာပါရှိ၍ ကျန်းမာရေးကောင်းကျိုးများစွာ ရရှိသော သီးနှံဖြစ်သည်။ ယခုအချိန် အခါတွင် ဆီးသီးများ ပေါပေါများများရရှိနေ၍ တစ်နေ့တစ်လုံး ပုံမှန်စားပေးခြင်းဖြင့် စိတ်ပိုင်းဆိုင်ရာ စိုးရိမ် ကြောင့်ကြမှုများ လျှော့ချပေးပြီး နှလုံးကျန်းမာရေးကိုလည်း အထူးကောင်းမွန်စေပါသည်။ ဆီးပင်မှ ရရှိသော ဆီးသီးများကို ကုန်ကြမ်းမှတစ်ဆင့် တန်ဖိုးမြှင့် ထုတ်ကုန်အမျိုးမျိုး ထုတ်လုပ်ရောင်းချ ဖြန့်ဖြူးလျက်ရှိသည်။ ဆီးပင်စိုက်ပျိုးသူများအနေဖြင့်လည်း ကုန်ကျစရိတ်နည်းပါးပြီး ဆီးသီး၊ ဆီးစေ့ များ ရောင်းချခြင်းဖြင့် မိသားစုအပိုဝင်ငွေ ရရှိလျက်ရှိ၍ ဆီးသီးဈေးကွက် ခိုင်မာမှုရှိခြင်းကြောင့် ပိုမို စိုက်ပျိုးသင့်ကြောင်း ရေးသားလိုက်ရပါသည်။
DOCA(မကွေး)
