ပြည်တွင်းကုန်သွယ်မှုသတင်း

       မကွေးတိုင်းဒေသကြီး၊ ပခုက္ကူမြို့မစည်ပင်သာယာဈေးနှင့် အမှတ်(၂)ဈေးတို့တွင် မန္တလေးတိုင်းဒေသကြီး၊ ပြင်ဦးလွင်၊ ရှမ်းပြည်နယ်၊ အောင်ပန်း၊ ကလော၊ အင်းလေးတို့မှ ဂေါ်ရခါးသီးများ ဝင်ရောက်အရောင်းအဝယ်ဖြစ်လျက်ရှိကြောင်း၊ နိုဝင်ဘာလတွင် စတင်စိုက်ပျိုးပြီး ဖေဖော်ဝါရီလတွင် အညွှန့်များကိုဖြတ်တောက်၍ ရောင်းချရကြောင်း၊ အသီးများသည် ဇွန်လမှ အောက်တိုဘာလထိသီးပြီး တစ်ပင်လျှင် အလုံးရေ (၂၀၀)မှ (၃၀၀)ထိထွက်ရှိကြောင်းသိရသည်။

        ၂၀၂၄ခုနှစ်၊ စက်တင်ဘာလ(တတိယပတ်)တွင် ဂေါ်ရခါးသီးတစ်လုံးလျှင် ကျပ်(၃၅၀)မှ ကျပ်(၅၀၀)ဈေးဖြင့်ရောင်းချလျက်ရှိပြီး နေ့စဉ် အလုံးရေ (၅၀၀) မှ (၁၀၀၀၀)ထိဝင်ရောက်လျက်ရှိကြောင်းသိရှိရပါသည်။

DOCA(မကွေး)

        မကွေးတိုင်းဒေသကြီး၊ အထက်မင်းလှမြို့နယ်အတွင်းရှိ မယ်ဇလီတောကျေးရွာတွင် တောင်သူ(၇၀)ဦးအနေဖြင့် ပဲစင်းငုံသီးနှံစိုက်ဧက (၁၅၀)ဧကကို ၂၀၂၄ခုနှစ်၊ ဇွန်လတွင် မိုးနှမ်းနှင့်အတူ ရော၍ သီးညှပ်အဖြစ်စိုက်ပျိုးထားကြောင်းသိရသည်။

         မယ်ဇလီတောကျေးရွာနေ တောင်သူ ဦးဝင်းသိန်းက ၎င်းအနေဖြင့် ပဲစင်းငုံသီးနှံ(၃)ဧကခွဲခန့်ကို မိုးနှမ်းနှင့်အတူ ထွန်ကြောင်းဆွဲအစေ့ချစနစ်ဖြင့်စိုက်ပျိုးပြီး (၁)ဧကလျှင် မျိုး ၁ပြည်မှ ၂ပြည်ထိကုန်ကျကြောင်း၊ ယခင်နှစ် စိုက်ခင်းမှထွက်ရှိသည့် ပဲစင်းငုံများကို မျိုးအဖြစ်ဖယ်ချန်၍ စိုက်ပျိုးပြီး အပင်သက်တမ်း(၆)လအကြာတွင် ရိတ်သိမ်းရကြောင်း၊ လုပ်အားခနှင့် အခြားသွင်းအားစုစရိတ်အပါအဝင် ကျပ်(၂)သိန်းမှ ကျပ်(၃)သိန်းထိကုန်ကျကြောင်း၊ အထွက်နှုန်းအနေဖြင့် ယခင်နှစ်က (၁)ဧကလျှင် (၁၀)တင်းမှ (၁၅)တင်းထိထွက်ရှိခဲ့ပြီး (၁)တင်းလျှင် ကျပ်(၁၂၀၀၀၀) ဈေးရရှိခဲ့ကြောင်း၊ ဈေးကွက်အနေဖြင့် မင်းလှမြို့နှင့်မကွေးမြို့ရှိပွဲရုံများသို့ တင်ပို့ရောင်းချကြောင်းသိရှိရပါသည်။

DOCA(မကွေး)

      ရန်ကုန်တိုင်းဒေသကြီးအတွင်းမြို့နယ်များရှိ ပုံမှန်ရောင်းချလျက်ရှိသော စက်သုံးဆီဆိုင်များမှာ (၁၂-၈-၂၀၂၄ ) ရက်နေ့မှစ၍ စက်သုံးဆီ (၄)မျိုးအား အပြည့်အဝရောင်းချပေးနိုင်မှု လျော့နည်းမှုများဖြစ်ပေါ်ခဲ့သည့်အတွက် စိစစ်မှုများဆောင်ရွက်ခဲ့ရာ စက်သုံးဆီပြတ်လပ်ခဲ့မှုများမှာ ပြည်ပမှ စက်သုံးဆီမှာယူတင်သွင်းသူ၏  ‌ဒေါ်လာအခက်အခဲကြောင့်လည်းကောင်း၊ ထုတ်ယူရမည့် Terminal များမှ ခွင့်ပြုချက်များအပေါ် အဆင့်ဆင့်စောင့်ဆိုင်းထုတ်နေရခြင်းကြောင့် ရန်ကုန်တိုင်းဒေသကြီးအတွင်း စက်သုံးဆီအရောင်းဆိုင်များ ခေတ္တဆီပြတ်လပ်ခဲ့ခြင်းဖြစ်ကြောင်းနှင့် (၁၈-၈-၂၀၂၄) ရက်နေ့နှင့် (၁၉-၈-၂၀၂၄) ရက်နေ့တို့တွင် စက်သုံးဆီဆိုင်တချို့မှာ ဆီကားများ ပုံမှန်ပြန်လည်ရောက်ရှိ၍ ပုံမှန်အတိုင်း ပြန်လည်ဖြန့်ဖြူးရောင်းချနေပြီဖြစ်ကြောင်း စက်သုံးဆီရောင်းချသည့် ဆိုင်တာဝန်ရှိသူများထံမှသိရှိရပါသည်။

DOCA(ရန်ကုန်)

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့် ဆီထွက်သီးနှံများအပြင် ပဲမျိုးစုံကိုလည်းစိုက်ပျိုးကြောင်းသိရသည်။ ယခုအခါ မတ်ပဲသီးနှံများ ဈေးကွက်အတွင်း ဝင်ရောက်လျက်ရှိပြီး စက်တင်ဘာလ တတိယပတ်အတွင်း၌ ဈေးနှုန်းများမှာ မတ်ပဲ(ဂျပန်)တစ်တင်းလျှင် ၉၅၀၀၀ကျပ်၊ မတ်ပဲထွက်တိုးတစ်တင်းလျှင် ၁၀၀၀၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း၊  ဈေးကွက်အနေဖြင့် ကန့်ဘလူခရိုင်မှထွက်ရှိသော မတ်ပဲများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်းသိရသည်။

    မတ်ပဲသီးနှံများသည် ကန့်ဘလူမြို့နယ်အတွင်းရှိကျေးရွာများမှ အဓိကဝင်ရောက်လျက်ရှိပြီး စက်တင်ဘာလ ဒုတိယပတ်ဈေးနှုန်းများနှင့်နှိုင်းယှဉ်ပါက ယခုလ တတိယပတ်အတွင်း မတ်ပဲ(ဂျပန်) တစ်တင်းလျှင် ငွေကျပ်(၂၀၀၀)၊  မတ်ပဲထွက်တိုးတစ်တင်းလျှင် ငွေကျပ်(၂၀၀၀) မြင့်တက်၍ အရောင်းအဝယ်ဖြစ်လျက်ရှိကြောင်း သီးနှံရောင်းဝယ်ရေးလုပ်ငန်းရှင်ထံမှသိရှိရပါသည်။

DOCA(စစ်ကိုင်း)

         မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ကန့်ဘလူခရိုင်၏ အဓိကစိုက်ပျိုးသီးနှံတစ်ခုဖြစ်သည့် အစေ့ထုတ်ပြောင်းများ စတင်ရိတ်သိမ်းလျက်ရှိကြောင်းသိရသည်။

          အစေ့ထုတ်ပြောင်းကို မေလကုန်တွင်စတင်စိုက်ပျိုးပြီး စက်တင်ဘာလဆန်းမှစတင်၍ ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် C.P.808 နှင့် C.P.888 မျိုးများကို အများဆုံးစိုက်ပျိုးကြပြီး၊ စိုက်ပျိုးမှုအတွက် မျိုး၊သွင်းအားစု၊ လုပ်သားခ၊ ထွန်ယက်ခအပါအဝင် တစ်ဧကလျှင် စုစုပေါင်းငွေကျပ်၆၈၀၀၀၀ခန့်ကုန်ကျကြောင်း၊ အထွက်နှုန်းအနေဖြင့် တစ်ဧကလျှင် ၄၉တင်းခန့်ထွက်ရှိပြီး ဈေးနှုန်းအနေဖြင့် စက်တင်ဘာလ တတိယပတ်တွင် အစေ့ထုတ်ပြောင်းတစ်တင်းလျှင် ငွေကျပ်၂၆၀၀၀ဖြင့် အရောင်းအဝယ်ဖြစ်လျက်ရှိကြောင်းသိရသည်။

         အကျိုးအမြတ်အနေဖြင့် အစေ့ထုတ်ပြောင်းတစ်ဧကလျှင်ငွေကျပ်၅၉၀၀၀၀ခန့်အကျိုးအမြတ်ရရှိကြောင်း၊ ဈေးကွက်အနေဖြင့် ရွှေဘိုမြို့၊ မန္တလေးမြို့များရှိပွဲရုံများသို့ တင်ပို့ရောင်းချ ကြောင်း၊ ယခုအပတ်တွင် အရောင်းအဝယ်ဖြစ်လျက်ရှိသော အစေ့ထုတ်ပြောင်းဈေးနှုန်းများသည် ယခင်နှစ်ကာလတူထက် ဈေးကောင်းရရှိသောကြောင့် စိုက်ပျိုးသူများအနေဖြင့် ထိုက်သင့်သည့် အကျိုးအမြတ်များရရှိကာ အဆင်ပြေလျက်ရှိကြောင်းသိရပါသည်။

DOCA(စစ်ကိုင်း)