ပြည်တွင်းကုန်သွယ်မှုသတင်း

      ဂေါ်ဖီထုပ်သည် မြန်မာနိုင်ငံနှင့်အိမ်နီးချင်းနိုင်ငံများဖြစ်သည့် တရုတ်၊ ဂျပန်နှင့် အာရှတိုက် တစ်ဝန်းလုံးစိုက်ပျိုးကြပြီး  မြန်မာနိုင်ငံတွင်လည်း  ဒေသမရွေး စိုက်ပျိုးနိုင်သော သီးနှံဖြစ်သည်။ ဒေသမရွေးစိုက်ပျိုးနိုင်သော်လည်း သင့်တင့်သောရာသီဥတုရှိသည့် ရှမ်းပြည်နယ်၌ ပိုမိုဖြစ်ထွန်း သည်။ ဂေါ်ဖီထုပ်များသည် တစ်နှစ်ပတ်လုံး စိုက်ပျိုးစားသုံးနိုင်သောသီးနှံတစ်မျိုး ဖြစ်သည့်အတွက် စိုက်ပျိုးသူတောင်သူများအနေဖြင့် တစ်နိုင်တစ်ပိုင်စိုက်ပျိုးရောင်းချနိုင်ပြီး ဝင်ငွေကောင်းသော သီးနှံ တစ်မျိုးလည်း ဖြစ်ပါသည်။

          ထားဝယ်မြို့ပေါ်ရှိ မြို့မဈေးကြီးနှင့်ရပ်ကွက်ဈေးများတွင် မေးမြန်းသိရှိရသောဈေးနှုန်းများ အရ ဂေါ်ဖီထုပ်တစ်လုံးလျှင် (၅၀၀၀)ကျပ်အထိ စျေးကောင်းရရှိနေသဖြင့် မိသားစုအပိုဝင်ငွေများ ရရှိ ကြောင်း သိရှိရပါသည်။

DOCA(တနင်္သာရီ)

   သကြားသည် များသောအားဖြင့် အစားအသောက်များ၊ လက်ဖက်ရည်များ၊ ကော်ဖီများနှင့် မြန်မာအစားအစာများနှင့်အလွယ်တကူတွဲဖက် စားသုံးနိုင်သည့် အရာတစ်မျိုးဖြစ်သည်။ ဟင်းလျာများ၊ သစ်သီးဖျော်ရည်များတွင် ထည့်သွင်းစားသုံးနိုင်သဖြင့် အိမ်ရှင်မများအတွက်လည်း အလွန် အသုံးဝင်ပါသည်။ သကြားကို အလွန်အကျွံစားသုံးမိလျှင်   ခန္ဓာကိုယ်အတွက်မလိုအပ်သော ဆီးချို၊ သွေးတိုး၊ နှလုံးရောဂါစသဖြင့် ကျန်းမာရေးဆိုးကျိုးများရရှိနိုင်သဖြင့် အလွန်အကျွံသုံးစွဲရန် မသင့်ပါ။

     ထားဝယ်မြို့ စည်ပင်သာယာစျေးများ၊ ရပ်ကွက်စျေးများနှင့် ကုန်စုံဆိုင်များတွင် ရောင်းချနေ သောစျေးနှုန်းများအရ သကြားတစ်ပိဿာလျှင် (၅၅၀၀)ကျပ် ခန့်ရှိကြောင်း သိရှိရပါသည်။

DOCA(တနင်္သာရီ)

      မန်ကျည်းပင်သည် သစ်မာပင်အမျိုးအစားဖြစ်ပြီး အပူပိုင်းဒေသဖြစ်သည့် မြန်မာနိုင်ငံ အလယ်ပိုင်းတွင်လည်း ပိုမိုပေါက်လျက်ရှိသည်။ စားသုံးသူများအတွက် တစ်ပင်လုံးအသုံးဝင်သော ဆေးဖက်ဝင်တန်ဖိုးရှိသည့် အပင်တစ်မျိုးဖြစ်သည်။ အိမ်ရှင်မတို့၏ မီးဖိုချောင်၌ အမြဲနေရာယူထား သောအသီးဖြစ်ပြီး အစိမ်းပေါ်ချိန်၌ အစိမ်းစားကြသကဲ့သို့ မှည့်သည့်အချိန်တွင်လည်း အစေ့ထုတ်ကာ နှစ်ရှည်ခံအောင် သိမ်းထား၍ရသော အသီးဖြစ်သည်။ ထားဝယ်ဈေးကွက်၌ မန်ကျည်းသီး အစိမ်းတစ်ဘူးလျှင် (၂၅၀၀)ကျပ်၊ အမှည့်တစ်ပိဿာလျှင် (၈၀၀၀) ကျပ်ရှိကြောင်း သိရှိရပါသည်။

DOCA(တနင်္သာရီ)

      တနင်္သာရီတိုင်းဒေသကြီး၊ ထားဝယ်မြို့နယ်တွင် ရာသီဥတုမျှတပြီး ရေထွက်ပစ္စည်း ပေါများသော်လည်း ဟင်းသီးဟင်းရွက်များလည်းပေါများသောမြို့နယ်ဖြစ်ပါသည်။ ယခုအခါ တောင်သူများ သည် ဒေသတွင်းလိုအပ်သော ဟင်းသီးဟင်းရွက်များကို မြို့နယ်အတွင်းရှိ အနီးနားပတ်ဝန်းကျင် ကျေးရွာ များတွင်စိုက်ပျိုးလာကြပါသည်။နွေရာသီတွင် မြေအောက်ရေများစုပ်ယူပြီး စိုက်ပျိုးကြသော်လည်း ဒေသတွင်း ဖြစ်ထွန်းနေသော ဂေါ်ဖီပွင့်၊ ခရမ်းချဉ်သီး၊ ငရုပ်သီးစိမ်း၊ ပဲတောင့်ရှည်သီး၊ ကျောက်ဖရုံသီးတို့ကို စိုက်ပျိုးရောင်းချနေကြောင်း သိရပါသည်။ ယခုရက် သတ္တပတ်အတွင်း ဂေါ်ဖီပွင့် (တစ်ပွင့်) ကျပ် ၅၀၀၀၊ ခရမ်းချဉ်သီး (တစ်ပိဿာ) ကျပ်- ၆၀၀၀ ၊ ငရုပ်သီးစိမ်း(တစ်ဗူး) ကျပ်-၃၀၀၀၊ ပဲတောင့်ရှည်သီး (တစ်စည်းလျှင်) ကျပ်-၂၀၀၀ ဈေးနှုန်းများဖြင့် အရောင်းအဝယ် ဖြစ်လျက်ရှိကြောင်း သိရပါသည်။

DOCA(တနင်္သာရီ)