ပြည်တွင်းကုန်သွယ်မှုသတင်း

       တောင်ငူမြို့ ရွှေဆံတော်ဘုရားဈေးတွင် ပေါ်ဦးပေါ်ဖျားထန်းမြစ်များရောင်းချနေပါသည်။ ထန်းမြစ်ကို တချို့မသိသောသူများက ထန်းပင်မှ အမြစ်ဟုထင်ကြပါသည်။ စား၍ရသော ထန်းမြစ်ဆိုသည်မှာ ရင့်မှည့်ပြီးကြွေကျသော ထန်းသီးအမှည့်များအား မြေကြီးအနက်တစ်တောင်ခန့်တူးထားသော ကျင်းထဲတွင်ထည့်ပြီး မြေပြန်ဖိ၍ ၃လခန့်ကြာသောအခါ ပြန်ဖော်ရာမှရရှိသော အပင်ပေါက်လေးများကို ထန်းမြစ်ဟုခေါ်ကြခြင်းဖြစ်ပါသည်။ ဆောင်းရာသီတွင် လှိုင်လှိုင်ပေါ်သော ထန်းမြစ်များမှာ ရာသီနှင့်လိုက်ဖက်လွန်းသော ရာသီစာအစားအစာတစ်မျိုးဖြစ်ပါသည်။

          ၂၀၂၄ခုနှစ်၊ စက်တင်ဘာလ၊ တတိယအပတ်တွင် တောင်ငူမြို့ ရွှေဆံတော်ဘုရားဈေးတွင် ထန်းမြစ် (၁၀) ချောင်းပါ တစ်စည်းလျှင် (၁၀၀၀) ကျပ်ဖြင့်ရောင်းချပေးနေပါသည်။ တောင်ငူမြို့အနီး အနောက်၊ မြောက်အရပ်ရှိ ဒေသများတွင် ထန်းပင် ထန်းတောများပေါများလှပါသည်။ ရွှေဆံတော်ဘုရားဈေးတွင် ရောင်းချနေသာထန်းမြစ်မှာ တောင်ငူမြို့နယ်၊ ကျောင်းကုန်းရွာ၌ ကိုယ်ပိုင်ပြုလုပ်၍ ရောင်းချသောထန်းမြစ်ဖြစ်ကြောင်း ထန်းမြစ်ရောင်းချသူတစ်ဦး၏ ပြောကြားချက်အရသိရှိခဲ့ပါသည်။

DOCA(ပဲခူး)

        တစ်နှစ်ပတ်လုံးငွေရရန် သေချာသော ငွေရသီးနှံအဖြစ်အရေးပါသည့် စားသုံးသီးနှံဖြစ်သော ငှက်ပျောကို ပဲခူး (အရှေ့) တွင် စိုက်ပျိုးလျက်ရှိကြောင်းသိရှိရသည်။ ငှက်ပျောအမျိုးအစားပေါင်းများစွာရှိသည့်အနက် ဖီးကြမ်းကို အဓိကထားစိုက်ပျိုးပြီး ဖြူးမြို့နယ်အနောက်ပိုင်းရှိ ပဲခူးရိုးမတောင်ယာတွင်စိုက်ပျိုးသော သီးမွှေးငှက်ပျောသီးမှာလည်း ဒေသတွင်းသာမက အခြားမြို့ရွာများထိ နာမည်ရလျက်ရှိသည်။ ငှက်ပျောကို မိုးဦးကျခါနီးအချိန်တွင် ဧပြီလ၊ မေလတွင် စတင်စိုက်ပျိုးပြီး စိုက်ပျိုးချိန် (၆)လကြာမြင့်လျှင် အဖူးထွက်ပြီး ငှက်ပျောပင်တစ်ခိုင်ရင့်မှည့်ချိန်တွင် ၃လမှ ၄လအထိကြာမြင့်တတ်သည်။ ငှက်ပျောကို ဧကအလိုက်စိုက်ပျိုး၍ အခင်းသစ်တွင် တစ်ဧကအထွက်နှုန်း (၄၈) တန်၊ ပထမနှစ် လမိုင်းခင်းတွင် (၃၆) တန်၊ ဒုတိယနှစ် လမိုင်းခင်းတွင် (၂၂) တန်ထွက်ရှိကြောင်းသိရှိရသည်။ ၂၀၂၄ခုနှစ်၊ စက်တင်ဘာလ တတိယပတ်တွင် သီးမွှေးငှက်ပျောအကြီးတစ်ဖီးလျှင် ကျပ်၆၀၀၀၊ အလတ်တစ်ဖီးလျှင် ကျပ်၅၀၀၀၊ အသေးတစ်ဖီးလျှင် ကျပ်၄၀၀၀ဖြင့်ရောင်းချလျက်ရှိပြီး ဖီးကြမ်းငှက်ပျောတစ်ဖီးလျှင် ၄၀၀၀ကျပ်နှုန်းဖြင့် ဒေသတွင်းငှက်ပျောကုန်သည်များက လာရောက်ဝယ်ယူကြကြောင်းသိရှိရသည်။ ထို့ပြင် ငှက်ပျောသီးမှည့်များကို သကြားဖြူး၍နေလှန်းပြီး တာရှည်ခံသော ငှက်ပျောခြောက်ပြုလုပ်သည့်အပြင် ငှက်ပျောကြော်၊ ငှက်ပျောပေါင်း စသည်ဖြင့်လည်း မိသားစုတစ်နိုင်တစ်ပိုင် ပြုပြင်ထုတ်လုပ်ရောင်းချလျက်ရှိကြောင်းသိရှိရပါသည်။

DOCA(ပဲခူး)

       ပဲခူးတိုင်းဒေသကြီး၊ ပဲခူးမြို့နယ်တွင် သစ်ကိုအခြေခံ၍ အနုပညာလက်မှုပစ္စည်းပြုလုပ်သောလုပ်ငန်း လုပ်ကိုင်ဆောင်ရွက်သော လုပ်ငန်း(၁)ခုရှိပါသည်။ ကုန်ကြမ်းအနေဖြင့် သစ်မာမျိုးစုံ အသုံးပြုပြီး ကုက္ကို၊ ဘင်ဂ၊ ပိတောက်သားများအသုံးပြု၍ ထုတ်လုပ်ကြောင်းသိရှိရပါသည်။ လုပ်ငန်းလုပ်ကိုင်ရာတွင် လုပ်သား (၁၅)ဦးခန့်အသုံးပြုပြီး တစ်ရက်လုပ်အားခငွေကို ပုတ်ပြတ် ၈၀၀၀ကျပ်မှ ၁၂၀၀၀ကျပ်ထိပေးချေရကြောင်းသိရှိရပါသည်။ ပန်းပု၊ ပန်းပွတ် အနုပညာပစ္စည်းများပြုလုပ်ရာတွင် သစ်သားကို လွှပိုင်းဖြင့်သော်လည်းကောင်း၊ ချိန်းစောအတိုဖြင့်သော်လည်းကောင်း ပုံကြမ်းဖော်ခြင်း၊ ပညာရှင်မှ ပန်းပု၊ ပန်းပွတ်ဖြင့် ပုံပြန်ဖော်၍ အချောချောခြင်း၊ ဆေးတင်ခြင်းဖြင့် အဆင့်ဆင့်လုပ်ကိုင်ဆောင်ရွက်လျက်ရှိကြောင်းသိရှိရပါသည်။ အကျိုးအမြတ်မှာ ပစ္စည်းအမျိုးအစားပေါ်မူတည်၍ ၂၀% ခန့်အကျိုးအမြတ်ရရှိကြောင်းသိရှိရပါသည်။ ကုန်ကြမ်းကို ကျွဲပွဲနှင့် တောင်ငူမြို့တွင်းမှ ဝယ်ယူရရှိကြောင်းသိရှိရပြီး ပြည်ပသို့လည်း တင်ပို့ရောင်းချသည့်အပြင် ရန်ကုန်မြို့ Shopping Center များနှင့် ပဲခူးမြို့ ဒေသထွက်ကုန် အရောင်းစင်တင်တွင်လည်း ရောင်းချလျက်ရှိကြောင်းသိရှိရပါသည်။

DOCA(ပဲခူး)   

      ပဲခူးတိုင်းဒေသကြီး၊ ပဲခူးခရိုင်၊ ကဝမြို့နယ်ရှိ သပြုကျေးရွာအတွင်း၌ သတ္တုရေကျို ပုံလောင်းလုပ်ငန်းများကို ဂျပန်ခေတ်ကျော်ကတည်းက လုပ်သားဦးရေ ထောင်နှင့်ချီ၍ စတင်ထုတ်လုပ်ဆောင်ရွက်ခဲ့ကြောင်းသိရှိရသည်။ သတ္တုကိုသန့်စင်၍ ထုတ်လုပ်ရာတွင် ဒယ်အိုးဆိုဒ်စုံ၊ မိုးဗြဲဒယ်၊ ပန်ကာဆိုဒ်စုံ၊ ငရုတ်စုံဆိုဒ်စုံ၊ လျှပ်စစ်မီးကလစ်၊ အသံချဲ့စက်ဟွန်း၊ အလှဆင်အိုး၊ ရေနွေးအိုးများ စသည်ဖြင့် ထုတ်လုပ်လျက်ရှိကြောင်းသိရပြီး ထုတ်လုပ်ရာတွင် အသုံးပြုသည့်ကုန်ကြမ်းအား  စော်ဘွားကြီးကုန်း၊ တောင်ဒဂုံတို့မှ ဒါန်သတ္တုအကြမ်းတစ်ပိဿာလျှင် ၁၄၀၀၀ကျပ်၊ သန့်စင်ပြီးအချောတစ်ပိဿာလျှင် ၁၅၅၀၀ကျပ်ဖြင့်ဝယ်ယူရကြောင်း၊ ကုန်ကြမ်းဝယ်ယူရာတွင် ကား၊ ဆိုင်ကယ်အပိုပစ္စည်းထုတ်လုပ်သည့် ကုမ္ပဏီများ၊ ဒယ်နီထုတ်လုပ်သည့် နည်းပညာမြင့်ကုမ္ပဏီများနှင့် ပြိုင်ဆိုင်ဝယ်ယူရသောကြောင့် ကုန်ကြမ်းရရှိမှုအခက်အခဲရှိကြောင်းသိရှိရသည်။ စက်လှေပန်ကာများကို ထားဝယ်၊ ဘိတ်၊ တောင်ကြီးနှင့် နယ်စုံများသို့ ပို့ဆောင်ပြီး မိုးဗြဲဒယ်နှင့် အခြားပစ္စည်းများကို စစ်တွေ၊ မောင်းတောနယ်စပ်မှတစ်ဆင့် ပြည်ပနိုင်ငံများသို့တင်ပို့လျက်ရှိကြောင်းသိရှိရပြီး ပဲခူးမြို့ဒေသထွက်ကုန်ပစ္စည်းအရောင်းစင်တာသို့လည်း တင်ပို့ရောင်းချလျက်ရှိကြောင်းသိရှိရသည်။  ထို့နောက် ပြုလုပ်ပြီးအိုးတစ်ပိဿာလျှင် ၁၂၀၀၀ကျပ်မှ ၁၃၀၀၀ကျပ်ထိရောင်းချရကြောင်းသိရှိရသည်။

      သတ္တုရေကျို ပုံလောင်းလုပ်ငန်းကို သပြုကျေးရွာအတွင်း လုပ်ငန်းရှင်ပေါင်း ၆၀ကျော်လုပ်ကိုင်လျက်ရှိကြောင်းသိရပြီး အသေးစားမှ အကြီးစားလုပ်ငန်းရှင်အလိုက် လုပ်သားဦးရေ ၁၅ယောက်မှ အယောက် ၄၀ကျော်ထိအသုံးပြုကြကြောင်းသိရှိရသည်။ ထိုသို့ လုပ်ငန်းတွင်ကျယ်လာသည်နှင့်အမျှ နေ့စဉ်ပုံမှန်ဝင်ငွေရရှိ၍ ရွာနီးပတ်ဝန်းကျင်ရွာများမှ လာရောက်လုပ်ကိုင်ကြသူများလည်းရှိကြပြီး သံရည်ကျို၍ ပုံလောင်းထုတ်လုပ်ရေးလုပ်ငန်းသည် လုပ်ငန်းတိုးချဲ့၍ အဆင့်မြင့်နည်းပညာများကိုအသုံးပြု၍ ထုတ်လုပ်ပါက လုပ်ငန်းရှင်အတွက်လည်း တွက်ခြေကိုက်သည့် လုပ်ငန်းတစ်ခုဖြစ်သည့်အပြင် ‌ဒေသတွင်းစီးပွားရေးလည်းဖွံ့ဖြိုးတိုးတက်လာမည်ဖြစ်ကြောင်း သတင်းရရှိပါသည်။

DOCA(ပဲခူး)

      မကွေးတိုင်းဒေသကြီး၊ အထက်မင်းလှမြို့၊ ပန်းတော်ပြင်ကျေးရွာအုပ်စုရှိ မယ်ဇလီတောကျေးရွာတွင် သကြားပြောင်းနှင့်ပြောင်းစီးကို တောင်သူ(၂၅)ဦးက စိုက်ဧက(၁၅)ဧကခန့်အား ၂၀၂၄ခုနှစ်၊ ဩဂုတ်လလယ်တွင် စတင်စိုက်ပျိုးခဲ့ကြောင်းသိရသည်။

          မယ်ဇလီတောကျေးရွာနေ တောင်သူ ဒေါ်စန်းဌေးက ၎င်းအနေဖြင့် ပြောင်းစီး(၀.၅)ဧကခန့်ကို ထွန်ကြောင်းဆွဲအစေ့ချစနစ်ဖြင့် စိုက်ပျိုးထားကြောင်း၊ မျိုး(၂)ထုပ်ခန့်ကုန်ကျပြီး (၁)ထုပ်လျှင် ကျပ်(၅၀၀၀၀)ဖြင့် မင်းလှမြို့ပေါ်ရှိ စိုက်ပျိုးရေးဆေးဆိုင်များမှဝယ်ယူကြောင်း၊ စိုက်ပျိုးပြီး ရက်ပေါင်း (၆၇)ရက်အကြာတွင် ခူးဆွတ်နိုင်ကြောင်း၊ ယခင်နှစ်တွင် ကျပ်(၁၅၀၀၀၀)ခန့် ကုန်ကျခဲ့သော်လည်း ယခုနှစ်တွင် သွင်းအားစုစရိတ်မြင့်တက်လာ၍ မျိုးဖိုး၊ မြေပြုပြင်ခနှင့် အခြားသွင်းအားစုစရိတ်အပါအဝင် ကျပ်(၂၀၀၀၀၀)ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်တွင် အဖူးရေ(၂၀၀၀) နီးပါးထွက်ရှိပြီး တစ်ဖူးလျှင် ကျပ်(၃၀၀)ဈေးရရှိခဲ့ကြောင်း၊ အကျိုးအမြတ်အနေဖြင့် ကျပ်(၄၅၀၀၀၀)ခန့်ရရှိခဲ့ကြောင်း၊ ဈေးကွက်အနေဖြင့် မန်းသံပုရာကန်ရေနံချက်စက်ရုံ (PIC) ဈေးတွင် ကိုယ်တိုင်သွားရောက်ရောင်းချကြောင်း၊ ပြောင်းသီးနှံမှာ စိုက်တောင်သူများအတွက် အကျိုးအမြတ်ဆတူရရှိသောသီးနှံဖြစ်၍ တိုးချဲ့စိုက်ပျိုးသင့်သောသီးနှံပင်ဖြစ်ကြောင်းသိရှိရပါသည်။

DOCA(မကွေး)