ပြည်တွင်းကုန်သွယ်မှုသတင်း

      နတ်တလင်းခရိုင် ၊ နတ်တလင်းမြို့ရှိ ကုန်စုံဆိုင်များတွင်  ကုလားပဲခွဲခြမ်း(စိမ်း)၊ ပဲမှုန့်(စိမ်း)၊  ပဲမှုန့် (ကျက်)၊ ကုလားပဲခွဲခြမ်းကြော်၊ ပဲကြီးခြမ်းကြော်များ ရောင်းချလျက် ရှိပါသည်။

       ဩဂုတ်လစတုတ္ထပတ်တွင် ကုလားပဲခွဲခြမ်း(ကြော်) တစ်ပိဿာ (၁၀၈၀၀) ကျပ်၊ ကုလားပဲ ခွဲခြမ်း (စိမ်း) တစ်ပိဿာ (၈၀၀၀) ကျပ်၊ ပဲမှုန့်(အကျက်) တစ်ပိဿာ (၈၀၀၀) ကျပ်၊ ပဲမှုန့်(အစိမ်း) တစ်ပိဿာ (၈၀၀၀)ကျပ်၊ တောင်တွင်းပဲကြီးခြမ်းကြော် တစ်ပိဿာ (၁၀၀၀၀)ကျပ်၊ ရိုးရိုးပဲကြီးခြမ်းကြော် တစ်ပိဿာ (၁၄၀၀၀)ကျပ်နှုန်းဖြင့် ရောင်းချနေပါသည်။

      စက်တင်ဘာလဒုတိယပတ်တွင် ရောင်းချနေသော ဈေးနှုန်းများမှာ ကုလားပဲခွဲခြမ်းကြော် တစ်ပိဿာ (၁၁၂၀၀)ကျပ်၊ ကုလားပဲခွဲခြမ်းအစိမ်း တစ်ပိဿာ (၈၀၀၀) ကျပ်၊ ပဲမှုန့်အကျက် တစ်ပိဿာ (၈၀၀၀)ကျပ်၊ ပဲမှုန့်အစိမ်း တစ်ပိဿာ (၈၀၀၀) ကျပ်၊ တောင်တွင်းပဲကြီးခြမ်းကြော် တစ်ပိဿာ (၁၀၀၀၀) ကျပ်၊ ရိုးရိုးပဲကြီးခြမ်းကြော် တစ်ပိဿာ (၁၄၀၀၀) ကျပ်ဖြင့်ရောင်းချလျက် ရှိရာ ဩဂုတ်လစတုတ္တပတ်ဈေးနှုန်းဖြင့် နှိုင်းယှဉ်ကြည့်ပါက ကုလားပဲခွဲကြမ်းကြော်ဈေးနှုန်း အနည်းငယ်မြင့်တက်လျက်ရှိပြီး ကျန်ဈေးနှုန်းများမှာ ပြောင်းလဲမှုမရှိကြောင်း သိရှိရပါသည်။

DOCA(ပဲခူး)

     မာလကာသီးသည် အပူပိုင်းသီးနှံမျိုးဖြစ်ပြီး မြေအမျိုးအစားမရွေး ဖြစ်ထွန်းနိုင်ပါသည်။ ရေဝပ်ခြင်းကို မနှစ်သက်သော်လည်း စိုက်ပျိုးရလွယ်ကူသော နှစ်ရှည်ပင်သီးနှံမျိုးဖြစ်ပါသည်။ နတ်တလင်းခရိုင်၊   နတ်တလင်းမြို့နယ်ရှိ ကျေးရွာအချို့တွင် ကီလိုမာလကာသီးကို စီးပွားဖြစ်တစ်ပိုင်တစ်နိုင် စိုက်ပျိုးကြပါသည်။

   နတ်တလင်းမြို့နယ်၊ ကုန်းကြီးကျေးရွာတွင် အိမ်တိုင်းလိုလို ကီလိုမာလကာသီးများကို စိုက်ပျိုးကြပါသည်။ အများအားဖြင့် ကိုင်းကူးပျိုးပင်များကို စိုက်ပျိုးကြပါသည်။ ကိုင်းကူးပင်များ အမြစ်ထွက်လာပါက ပျိုးထုပ်အတွင်းသို့ ရွှေ့ပြောင်းစိုက်ပျိုးရပြီး ပျိုးထုပ်သက်(၇-၈)လသားရှိပါက မြေချစိုက်ပျိုးနိုင်ပြီး အများအားဖြင့် မိုးဦးကာလ အစိုဓာတ်ကောင်းမွန်စွာ ရရှိသည့်ဇွန်လ၊ ဇူလိုင်လ များတွင် စိုက်ပျိုးကြပါသည်။ ကီလိုမာလကာသီး တစ်ဧကစိုက်ပျိုးမည်ဆိုလျှင် ပင်ခြားတန်းခြား ၁၁ ပေ အကွာအဝေးဖြင့် ကိုင်းကူးပျိုးပင်တစ်ပင်လျှင် ငွေကျပ် (၅၀၀၀)ကျပ်နှုန်းဖြင့် အပင်ရေ ၃၂၀ခန့် စိုက်ပျိုးရကြောင်း ၊ စိုက်ပျိုးပြီး တစ်နှစ်သားရှိပါက အသီးများ စတင်ခူးဆွတ်ရပါသည်။ စိုက်ပျိုးမှု ကုန်ကျစရိတ်အနေဖြင့် မျိုး၊ သွင်းအားစု၊ အလုပ်သမားခအပါအဝင် ငွေကျပ်(၅၀၀၀၀၀၀) ကုန်ကျပါကြောင်း၊ နွေရာသီတွင် ရေလောင်း၊ ရေသွင်းခြင်းများ ပြုလုပ်ပေးပါက တစ်နှစ်ပတ်လုံး အသီးထွက်ရှိနိုင်ပြီး အထွက်နှုန်းအနေဖြင့် အပင်ဖြစ်ထွန်းမှုပေါ်မူတည်၍ ကီလိုမာလကာပင် တစ်ပင်သည် တစ်နှစ်လျှင်အလုံး ရေပျမ်းမျှ (၁၅၀)မှ (၂၀၀)ခန့်ထွက်ရှိပါကြောင်း  သိရှိရပါသည်။

     ဈေးနှုန်း၊ ဈေးကွက်အနေဖြင့် ယခုစက်တင်ဘာလဒုတိယအပတ်တွင် ကီလိုမာလကာသီး တစ်လုံးလျှင် ငွေကျပ် (၃၅၀-၄၀၀)ကျပ်နှုန်းဖြင့်ရောင်းချရကြောင်း၊ ဈေးကွက်အနေဖြင့်လည်း မြို့ နယ်တွင်းနှင့် ကြို့ပင်ကောက်၊ ဇီးကုန်း၊ ပေါင်းတည်၊ တာပွန်မြို့များသာမက အခြားမြို့နယ်များသို့ပါ တင်ပို့ရောင်းချကြကြောင်း သိရှိပါသည်။

DOCA(ပဲခူး)

      ပြည်ကုန်စည်ဒိုင်၏ စက်တင်ဘာဒုတိယပတ်၏ ပဲမျိုးစုံအရောင်းအဝယ်ဖြစ်လျက်ရှိရာ  မတ်ပဲ၊ ပဲစင်းငုံ၊ ကုလားပဲဈေးကျလျက်ရှိပါသည်။

     စက်တင်ဘာဒုတိယအပတ်အတွင်း မတ်ပဲတစ်တင်းလျှင် ၁၂၈၀၀၀ကျပ်ဖြင့် ရန်ကုန်အဝယ် တစ်ရက်လျှင် အိတ် ၂၀၀/၂၅၀ခန့် တင်ပို့မှုရှိပါသည်။ ပဲစင်းငုံဈေးလည်းကျဆင်းနေပြီး တစ်တင်းကို ၁၅၉၀၀၀ ကျပ်ဖြင့် တစ်ရက်ကိုအိတ် ၂၀၀ခန့် ရန်ကုန်အဝယ်ရှိပါသည်။ စက်တင်ဘာလဒုတိယပတ် တွင် ကုလားပဲ(HL)တစ်တင်းကို ၉၇၀၀၀ကျပ်၊ မြကြေးမှုံတစ်တင်းကို ၉၉၀၀၀ကျပ်ဖြင့် ဈေးကျနေပြီး မြို့တွင်းနှင့် ရန်ကုန်အဝယ် တစ်ရက်ကိုအိတ် ၃၀၀ခန့်ရှိပါသည်။ ပဲကြီး (ရွှေကျွန်း) တစ်တင်းကို ၉၀၀၀၀ ကျပ်၊ ကုန်ပဲတစ်တင်းကို ၈၅၀၀၀ကျပ်ဖြင့် မြို့တွင်းပဲကြော်သမားများ တစ်ရက်ကို အိတ် ၃၀၀ခန့် အဝယ်ရှိပါသည်။

    စားတော်ပဲ(ကျွန်း)တစ်တင်းကို ၁၁၃၀၀၀ကျပ်ဖြင့် မြို့တွင်းအဝယ်တစ်ရက်ကိုအိတ် ၂၀/၂၅ ခန့် အဝယ်ရှိပါသည်။ ဘိုကိတ်ပဲတစ်တင်းကို ၁၀၀၀၀၀ကျပ်ဖြင့် မြို့တွင်းနှင့် ရန်ကုန်အဝယ် တစ်ရက်ကို အိတ် ၁၀၀/၁၅၀ခန့် အဝယ်ရှိပါသည်။

      ပြည်ကုန်စည်ဒိုင်၏ ပဲအရောင်းအဝယ်မှာ မတ်ပဲ၊ ပဲစင်းငုံ၊ ကုလားပဲ၊ ပဲကြီးသီးနှံမှာ အဝယ် သွက်လျက်ရှိပြီး ကျန်ပဲများမှာ ပုံမှန်သာအဝယ်ရှိပါသည်။

DOCA(ပဲခူး)

     ပြည်ဈေးကွက်အတွင်း ယခုနှစ်တွင် ပီနန်ငရုတ်သီးစိမ်းများ ဝင်ရောက်မှုနည်းပါးလျက်ရှိပြီး ပြည်မြို့အနောက်ဘက်ကမ်းရှိ ရွှေဘုံသာရွာ၊ ညောင်ပင်သာရွာဘက်မှသာ အဝင်ရှိသည့်အတွက် ဈေးကွက်အတွင်း ရှားပါးလျက်ရှိကြောင်း သိရပါသည်။ (၅)ရက်ခြားလျှင် တစ်ကြိမ်ခန့်သာ ဝင်ရောက်မှုရှိပြီး မြို့ပေါ်ဈေးများသို့ အပါအဝင် ပိဿာချိန် (၃)ပိဿာခန့်သာ အဝင်ရှိနေပါသည်။

     ယခုနှစ်တွင် ပီနန်ငရုတ်သီးစိမ်းမှာ ရန်ကုန်ဘက်မှပြန်လည်ဝင်ရောက်မှုရှိသော်လည်း ယခုနှစ်တွင် အဝင်မရှိသေးကြောင်း သိရပြီး ယခင်နှစ်ဈေးမှာ (၁၀)ကျပ်သားလျှင် ကျပ် ၂၂၀၀-၂၃၀၀ဖြင့် ရောင်းချမှုရှိခဲ့ကြောင်း သိရပါသည်။ ၂၀၂၄ခုနှစ် စက်တင်ဘာလ ဒုတိယပတ်တွင် (၁၀)ကျပ်သားလျှင် ကျပ် ၂၈၀၀-၃၀၀၀နှုန်းဖြင့် ရောင်းချသည့်အတွက် ယခင်နှစ်နှင့် နှိုင်းယှဉ်လျှင် ကျပ် ၈၀၀နှုန်း ဈေးမြင့် တက်လျက်ရှိကြောင်း သိရပါသည်။  

DOCA(ပဲခူး)

      ပဲခူးတိုင်းဒေသကြီး၊ ပြည်ခရိုင်အတွင်းရှိ မြို့မဈေးကြီးနှင့် မြို့နယ်အတွင်းရှိဈေးများတွင် ငါးသလောက်များ အရောင်းအဝယ်သွက်လျက်ရှိကြောင်း သိရှိရပါသည်။ ငါးမှာ ငါးသလောက်ဆိုသည့်အတိုင်း အခြားငါးများနှင့် အရသာမတူပဲ ချိုပြီးလေးပင်သောအရသာရှိပါသည်။ ငါးသလောက်မှာ စားသုံးသူတို့ သဘောကျသောအရွယ်အစားရှိသောကြောင့် အရောင်းသွက်ကြောင်း သိရပါသည်။ ငါးသလောက်ပေါင်းရန် သင့်တော်သောအရွယ်အစားငါးများကို ထမင်းဆိုင်များမှ အများဆုံး ဝယ်ယူကြောင်း သိရှိရပါသည်။ ရန်ကုန်မြို့မှ ငါးဝင်ရောက်မှုမှာ ပုံမှန်ဝင်ရောက်လျက်ရှိပြီး မြစ်မှရရှိသော ရေချိုငါးသလောက်မှာ ပို၍လူကြိုက်များပါသည်။ ငါးလောက်ငါးသည် ရေချို၊ ရေငန်နှစ်မျိုးစလုံးတွင် နေထိုင်နိုင်ပါသည်။ ငါးသလောက်ဈေးများအနေဖြင့် ယခင်နှစ်တွင် ငါးသလောက် အကောင်ကြီး တစ်ပိဿာလျှင် ၃၀၀၀၀ကျပ်နှုန်းဈေးဖြင့် အရောင်းအဝယ်ဖြစ်ခဲ့ပြီး ယခုနှစ်တွင် ငါးသလောက် အကောင်ကြီး တစ်ပိဿာလျှင် ၄၅၀၀၀ကျပ်မှ ၅၀၀၀၀ကျပ်အထိဈေးများ မြင့်တက်လာကြောင်း သိရှိရပါသည်။

DOCA(ပဲခူး)