ပြည်တွင်းကုန်သွယ်မှုသတင်း

   ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့နယ်တွင် စက်တင်ဘာလ ပထမပတ်တွင် ဖြစ်ပေါ်နေသော အခြေခံစားသောက်ကုန်များဖြစ်သော ဧည့်မထဆန်တစ်ပြည်လျှင်  ၂၅၀၀ ကျပ်၊ ကြက်သွန်နီ(အကြီး)တစ်ပိဿာလျှင် ၁၈၀၀ ကျပ်၊(အလတ်) တစ်ပိဿာလျှင် ၁၅၀၀ ကျပ်၊(အသေး) တစ်ပိဿာလျှင် ၁၃၀၀ ကျပ်၊ ကြက်သွန်ဖြူ(ကြူကုတ်) တစ်ပိဿာလျှင် ၂၁၀၀၀ ကျပ်၊ မြန်မာ ကြက်သွန်ဖြူ (တစ်ပိဿာ)လျှင် ၆၀၀၀ ကျပ်၊ ဂျင်း(တစ်ပိဿာ)လျှင် ၄၅၀၀ ကျပ်၊သကြား (တစ်ပိဿာ)လျှင် ၄၉၀၀ကျပ်၊ကုလားပဲ(တစ်ပိဿာ)လျှင် ၆၄၀၀ ကျပ်၊မြေပဲဆံ(တစ်ပိဿာ)လျှင် ၈၅၀၀ ကျပ်၊ငရုတ်သီးခြောက်(တစ်ပိဿာ)လျှင်၁၁၀၀၀ ကျပ်၊အာလူး(တစ်ပိဿာ)လျှင် ၅၀၀၀ကျပ်၊ ဆား(တစ်ပိဿာ)လျှင် ၁၆၀၀ ကျပ်တို့ဖြင့် အရောင်းအဝယ်ဖြစ်လျက်ရှိပါသည်။

DOCA(ပဲခူး)

 ပဲခူးတိုင်းဒေသကြီး၊သာယာဝတီခရိုင်၊မင်းလှမြို့နယ်ရှိ စပါးဈေးကွက်အနေဖြင့် ဩဂုတ်လ နောက်ဆုံးပတ်တွင် ဆင်းသုခ၊မနောသုခဟောင်း ၄၆ပေါင်တစ်တင်းလျှင် ၁၃၈၀၀၀၀ ကျပ်၊နွေစပါး သစ် ၄၆ပေါင် ၁၀၀တင်းကို ၁၂၈၈၀၀၀ ကျပ်ရှိခဲ့ပြီး စက်တင်ဘာလပထမပတ်တွင် ဆင်းသုခ၊ မနောသုခ ဟောင်း ၄၆ပေါင်တင်း ၁၀၀ လျှင် ၁၃၈၀၀၀၀ ကျပ်၊နွေစပါးသစ် ၄၆ ပေါင်တင်း ၁၀၀ ကို ၁၂၈၈၀၀၀ ကျပ်သာရှိခဲ့ပါသဖြင့် စပါးဈေးအနည်းငယ် ကျဆင်းသွားပါကြောင်း စပါးကုန်သည် တစ်ဦးထံမှ သိရှိ ရပါသည်။

          ဆန်ဈေးကွက်အနေဖြင့် ဆင်းသုခ၊မနောသုခ တစ်ပြည်လျှင် ၂၅၀၀ ကျပ်၊အဟောင်းတစ်ပြည် လျှင် ၃၀၀၀ ကျပ်၊ဆန်သစ်တစ်အိတ်လျှင် ၅၅၀၀၀မှ၆၀၀၀၀ ကျပ်၊အဟောင်းတစ်အိတ်လျှင် ၆၀၀၀၀ မှ၆၅၀၀၀ ကျပ်၊ကောက်ညှင်းဆန်တစ်အိတ်လျှင် ၉၀၀၀ ကျပ်၊ ရတနာတိုးတစ်ပြည်လျှင် ၅၀၀၀ ကျပ်ဖြင့် ဈေးကွက်အတွင်းအရောင်းအဝယ်ဖြစ်နေကြောင်း ဆန်ကုန်သည်တစ်ဦးထံမှ သိရှိရပါသည်။

DOCA(ပဲခူး)

ဩဇာပင်ကို နတ်တလင်းမြိုနယ် အတွင်းရှိ ကျေးရွာများတွင် မိသားစုစားသုံးရန် ပိုလျှံသည်များကို ရောင်းချရန် တစ်ပိုင်တစ်နိုင် စိုက်ပျိုးကြပါသည် အများအားဖြင့် ဒေသမျိုးများကိုသာ စိုက်ပျိုးကြပါသည်။ နတ်တလင်း မြို့နယ်၊ မြို့မဈေးနှင့် ညနေဈေးတို့တွင် ၂၀၂၅ ခုနှစ် ဩဂုတ်လ စတုတ္တပတ်မှ စတင်ပြီး ရှားဖြူကုန်းကျေးရွာ၊ သခွတ်ကုန်းကျေးရွာ၊ အနောက်စုကျေးရွာနှင့် ကျေးရွာအချို့မှ ဩဇာသီးများ ဝင်ရောက်လာကြောင်း သိရှိရပြီး ပေါ်ဦးစ ဩဇာသီး  အကြီးတစ်လုံး လျှင် (၁၃၀၀)ကျပ်၊ အလတ်တစ်လုံး (၁၀၀၀)ကျပ်၊ အသေးတစ်လုံးလျှင် (၈၀၀)ကျပ်နှုန်း ဖြင့်ဈေးကောင်းရရှိခဲ့ပြီး ယခု စက်တင်ဘာလ ပထမပတ် အသီးထွက်ရှိမှု များလာသည့်အတွက် ဩဇာသီး  အကြီးတစ်လုံး လျှင် (၁၀၀၀)ကျပ်၊ အလတ်တစ်လုံး (၈၀၀)ကျပ်၊ အသေးတစ်လုံး လျှင် (၆၀၀)ကျပ်နှုန်းဖြင့် ရောင်းချနေကြောင်း၊ တစ်နှစ် တစ်ကြိမ်သာထွက်ရှိသည့် သီးနှံဖြစ်သည့်အတွက် စားသုံးသူများက ကြိုက်နှစ်သက်စွာ ဝယ်ယူစားသုံး ကြသလို လက်ဆောင်ပေးရန် ဝယ်ယူခြင်းများလည်းရှိ၍ အရောင်းသွက်လျှက်ရှိကြောင်း နှင့် ဥက္ကံမြို့၊  သုံးဆယ်မြို့များသို့ တင်ပို့ ရောင်းချကြောင်း ဩဇာသီး ရောင်းချသူများထံမှ သိရပါသည်။

DOCA(ပဲခူး)

ယခုစက်တင်ဘာလ (ပထမပတ်)တွင် ဈေးများထဲ၌ ရုံးပတီသီးနှင့် ဝါးနွယ်မျှစ်များ အရောင်းသွက်လျက်ရှိကြောင်းသိရသည်။ ရုံးပတီသီးနှင့် ဝါးနွယ်မျှစ်များသည် မြန်မာနိုင်ငံ၏ အပူပိုင်း ရာသီဥတုတွင် ကောင်းစွာ ဖြစ်ထွန်းပြီး မြစ်ဝကျွန်းပေါ်ဒေသများ၊ ကမ်းရိုးတန်းဒေသများတွင် အဓိက စိုက်ပျိုးလေ့ရှိကြပါသည်။ရုံးပတီသီး နှင့်ဝါးနွယ်မျှစ်များသည် မကွေးတိုင်း၊ ပဲခူးတိုင်း၊ ရန်ကုန်တိုင်းနှင့် ဧရာဝတီတိုင်းတို့မှ အဓိကထွက်ရှိပြီး ထိုဒေသ များသည် ရေရရှိမှုကောင်းမွန်ပြီး မြေဩဇာထက်သန်ကာ ရာသီဥတုအခြေအနေကောင်းမွန်သောကြောင့် သီးနှံများ အောင်မြင်ဖြစ်ထွန်းအောင် စိုက်ပျိုးနိုင်ကြ ပါသည်။

ရုံးပတီသီးများကို တောင်ငူမြို့နယ်အတွင်းရှိ သဲဖြူချောင်း၊ ပွတ်စုရွာရှိ ရုံးပတီသီး စိုက်ပျိုးသူ များထံမှ တစ်ဆင့်ရောင်းချလျက်ရှိပြီး ရုံးပတီသီး ၁၀ ကျပ်သားလျှင် ၅၀၀ ကျပ်၊ ၁ ပိဿာလျှင် ၄၀၀၀ ကျပ်ဖြင့်လည်းကောင်း၊ ဝါးနွယ်မျှစ်များကို တောင်ငူမြို့၊ ရေတာရှည်မြို့နယ်ရှိ ဝါးပင်များအောက်ခြေမှ ဝါးအနုကို ခုတ်ယူရရှိပြီး ရရှိလာသောဝါးအနုများကို ရေနှင့်နနွင်းမှုန့်ထည့်ကာ အချိန် ၃နာရီ ၄နာရီ ခန့် ပြုတ်ပြီး ဝါးနွယ်မျှစ်များကို ၁၀ ကျပ်သားလျှင် ၅၀၀ ကျပ်၊ ၁ ပိဿာလျှင် ၄၀၀၀ ကျပ်ဖြင့် ရောင်းချ လျက်ရှိကြောင်းသိရသည်။

DOCA(ပဲခူး)

          ငှက်ပျောသီးသည် ကမ္ဘာပေါ်တွင် လူကြိုက်အများဆုံးသစ်သီးအမျိုးအစားဖြစ်ပြီး အရှေ့တောင်အာရှနိုင်ငံများတွင် ငှက်ပျောမျိုးကွဲများစွာဖြင့် စိုက်ပျိုးထွက်ရှိမှု အများဆုံးသစ်သီး ဖြစ်သကဲ့သို့ မြန်မာနိုင်ငံတွင်လည်း နေရာအနှံ့အပြားတွင် စိုက်ပျိုးထွက်ရှိသည့် သီးနှံဖြစ်သည်။ ငှက်ပျောသီးတွင် ပိုတက်စီယမ်ဓါတ်၊ ဗီတာမင်(B6)၊ ဗီတာမင်(C)၊ မဂ္ဂနီဆီယမ်ဓာတ်၊ ကစီဓာတ်၊ ပရိုတင်းဓာတ်နှင့် အဆီဓာတ်အနည်းငယ်တို့ ပါဝင်ကြောင်း၊ ငှက်ပျောသီးတွင် ဓာတ်တိုး ဆန့်ကျင် ပစ္စည်း(Antioxidants) များစွာပါဝင်သည့်အတွက် ခန္ဓာကိုယ်အတွင်းရှိ ဆဲလ်များပျက်စီးမှု ကိုကာကွယ်ခြင်း၊ ကိုယ်ခံအားစနစ်ကို မြှင့်တင်ပေးခြင်း၊ အသားအရေနှင့် ကျန်းမာရေးကို ထိန်းသိမ်း ပေးခြင်း၊ အိုမင်းရင့်ရော်ခြင်းကို နှေးကွေးစေခြင်းတို့ကို အထောက်အကူပြုကြောင်း သိရှိရသည်။

            မြင်းခြံမြို့၊ အေးမြသီတာဈေးနှင့် စည်ပင်သာယာဈေးကြီးအတွင်း ရောင်းချလျက်ရှိသော ငှက်ပျောသီးများ၏(၆၀%)ခန့်ကို ကျောက်ဆည်မြို့နယ်နှင့် မြစ်သားမြို့နယ်တို့မှ အဓိကဝင်ရောက်လျက်ရှိပြီး (၄၀%)ခန့်ကို တောင်ငူ၊ ပခုက္ကူ၊ ညောင်ဦး၊ ပုပ္ပါးဒေသတို့မှ အနည်းငယ်စီ ဝင်ရောက်လျက်ရှိကြောင်း သိရှိရသည်။ ငှက်ပျောသီးအစိမ်းများသည် တာရှည်ခံသဖြင့် သာသနာပွဲ၊ နတ်ပွဲစသည့် ကန်တော့ပွဲများ တင်လှူပူဇော်ရန်အတွက် ဝယ်ယူအသုံးပြုကြပြီး ငှက်ပျောသီးအမှည့်များသည် တာရှည်မခံသောကြောင့် မုန့်ပဲသရေစာများတွင် ထည့်သွင်းအသုံးပြုရန်နှင့် စားသုံးရန်အတွက်သာ ဝယ်ယူကြကြောင်း၊   ငှက်ပျောသီးအစိမ်းများသည်    ငှက်ပျောသီးအမှည့်များထက်ဈေးနှုန်းမြင့်မားကြောင်း၊ နာမည်ကြီး/ တန်ခိုးကြီးဘုရားများတွင် အဓိဌာန်ဖြင့် လှူ၍ပူဇော်ပြီးနောက် ပြန်လည်စွန့်ထားသည့် ငှက်ပျောသီးများသည်လည်း ဘုရားပွဲကျ ငှက်ပျောသီးအနေဖြင့် ဈေးကွက်အတွင်း ဈေးနှုန်းချိုသာစွာဖြင့် တွင်တွင်ကျယ်ကျယ် ရောင်းချလျက်ရှိကြောင်း၊ ကုန်ကျစရိတ်သက်သာစွာဖြင့် ဝယ်ယူအသုံးပြုလိုသူများအနေဖြင့် ဘုရားပွဲကျငှက်ပျောသီးများကိုသာဝယ်ယူ အသုံးပြုလျက်ရှိကြောင်း သိရှိရသည်။

            ဈေးနှုန်းများအနေဖြင့် ဖီးကြမ်းအစိမ်း(အကြီး)တစ်ဖီးလျှင်(၅၅၀၀)ကျပ်မှ(၆၀၀၀)ကျပ်၊ ဖီး ကြမ်း အစိမ်း(အသေး)တစ်ဖီးလျှင်(၃၀၀၀)ကျပ်မှ(၃၅၀၀)ကျပ်၊ ဖီးကြမ်းအမှည့်(အကြီး) တစ်ဖီး လျှင်(၃၀၀၀) ကျပ်မှ(၃၅၀၀)ကျပ်၊ ဖီးကြမ်းအမှည့်(အသေး)တစ်ဖီးလျှင်(၁၅၀၀)ကျပ်မှ(၂၀၀၀)ကျပ်၊ ရခိုင်အစိမ်း(အကြီး) တစ်ဖီးလျှင်(၃၀၀၀)ကျပ်မှ(၄၀၀၀)ကျပ်၊ ရခိုင်အစိမ်း(အသေး) တစ်ဖီးလျှင် (၁၅၀၀)ကျပ်မှ (၂၀၀၀)ကျပ်၊ ရခိုင်အမှည့်(အကြီး)တစ်ဖီးလျှင်(၂၀၀၀)ကျပ်မှ(၂၅၀၀)ကျပ်၊ ရခိုင် အမှည့် (အသေး)တစ်ဖီးလျှင်(၁၀၀၀) ကျပ်မှ(၁၅၀၀)ကျပ်၊ ဘုရားပွဲကျငှက်ပျောသီးတစ်ဖီးလျှင် (၁၀၀၀)ကျပ်မှ(၂၅၀၀)ကျပ်အထိ ရောင်းချလျက်ရှိကြောင်းနှင့် ငှက်ပျောဖီးတွင်ပါဝင်သည့် ငှက်ပျောသီးများ၏ အကြီး၊ အသေးနှင့် အရေအတွက်အပေါ်မူတည်၍ (၂၀၀)ကျပ်မှ(၅၀၀)ကျပ် အထိ ဈေးနှုန်းကွာခြားမှုရှိကြောင်း သိရှိရပါသည်။

DOCA(မန္တလေး)