ပြည်တွင်းကုန်သွယ်မှုသတင်း

မကွေးတိုင်းဒေသကြီး၊ အောင်လံနှမ်းဈေးကွက်တွင် မြို့အနီးပတ်ဝန်းကျင်ရှိ ကျေးရွာများ၊ ပဲခူးတိုင်းအတွင်းရှိ ကျေးရွာများနှင့် သရက်မြို့နယ်အတွင်းရှိ ကျေးရွာများတို့မှ ထွက်ရှိသည့် နှမ်းသီးနှံများ နေ့စဉ်ဝင်ရောက် အရောင်းအဝယ်ဖြစ်လျက်ရှိပါသည်။

နှမ်းနက်(စမုံ)

အောင်လံနှမ်းဈေးကွက်တွင် နှမ်းနက်(စမုံ)အနေဖြင့် အရည်အသွေးစံချိန် စံညွှန်းပြည့်မီသည့် ထိပ်စသီးနှံများကို ၂၀၂၅ခုနှစ်၊ ဖေဖော်ဝါရီလ(တတိယပတ်)တွင် (၁)တင်းလျှင် ကျပ်(၂၁၃၀၀၀ မှ ၂၂၁၅၀၀)ဈေးနှုန်းဖြင့် အရောင်းအဝယ်ရှိခဲ့ပြီး (စတုတ္ထပတ်)တွင် ကျပ်(၂၁၅၀၀၀ မှ ၂၂၃၅၀၀) ဈေးနှုန်းရှိခဲ့၍  ယခုတစ်ပတ်တွင် ယခင်တစ်ပတ်ထက် (၁)တင်းလျှင် ကျပ်(၂၀၀၀) ဈေးနှုန်းမြင့် တက်ခဲ့ပါသည်။

အရည်အသွေးနိမ့်သည့် (သန့်စင်ရန်လို)သီးနှံများကို ဖေ‌ဖော်ဝါရီလ(တတိယပတ်)တွင် (၁)တင်းလျှင် ကျပ်(၂၀၈၃၀၀ မှ၂၁၁၅၀၀)ဈေးနှုန်းဖြင့် အရောင်းအဝယ်ရှိခဲ့ပြီး (စတုတ္ထပတ်)တွင် ကျပ်(၂၁၀၀၀၀-၂၁၃၅၀၀)ဈေးနှုန်းရှိခဲ့၍ ယခုတစ်ပတ်တွင် ယခင်တစ်ပတ်ထက် (၁)တင်းလျှင် ကျပ် (၁၇၀၀ မှ ၂၀၀၀)ထိဈေးနှုန်းမြင့်တက်ခဲ့ပါသည်။

အရောင်းအဝယ်ပမာဏအနေဖြင့် ဖေဖော်ဝါရီလ(စတုတ္ထပတ်)တွင် နှမ်းနက်စမုံ စုစုပေါင်း တင်းရေ(၃၆၀၀)တင်း၊ တန်ချိန်(၈၈.၁၈)တန်ခန့် အရောင်းအဝယ်ရှိခဲ့ကြောင်း သိရသည်။

နှမ်းနီ

နှမ်းနီ၏ ဈေးနှုန်းဈေးကွက်အခြေအနေမှာ အများအားဖြင့် အောင်လံမြို့အတွင်းရှိ ဆီကြိတ်ခွဲ စက်ရုံများမှ ဝယ်ယူလျက်ရှိပြီး ယခင်ဖေဖော်ဝါရီလ(တတိယပတ်)မှ(စတုတ္ထပတ်)အထိ (၁)တင်း လျှင် ကျပ်(၁၁၀၀၀၀)ဈေးနှုန်းရှိခဲ့၍ ဈေးနှုန်းပြောင်းလဲမှုမရှိပဲ အရောင်းအဝယ်ဖြစ်လျက်ရှိရာ (စတုတ္ထပတ်)တွင် တင်းရေ(၁၅၀၀)တင်း၊ တန်ချိန်(၃၆.၇၄)တန်ခန့် အရောင်းအဝယ်ရှိခဲ့ကြောင်း သိရသည်။

နှမ်းဖြူ

နှမ်းဖြူကို သီးနှံအရည်အသွေးအလိုက် ယခင်ဖေဖော်ဝါရီလ(တတိယပတ်) မှ (စတုတ္ထပတ်) အထိ (၁)တင်းလျှင် အနိမ့်ဈေး ကျပ်(၁၁၁၅၀၀)၊ အမြင့်ဈေး ကျပ်(၁၁၃၃၀၀)ဈေးနှုန်းဖြင့် ပြောင်းလဲ မှုမရှိဘဲ အရောင်းအဝယ်ဖြစ်လျက်ရှိရာ (စတုတ္ထပတ်)တွင် တင်းရေ(၃၀၀)တင်း၊  တန်ချိန်(၇.၃၅) တန်ခန့် အရောင်းအဝယ်ရှိခဲ့ကြောင်း သိရသည်။

နှမ်းသီးနှံကို ၂၀၂၅ခုနှစ်၊ ဖေဖော်ဝါရီလ(စတုတ္ထပတ်)တွင် တင်းရေ (၅၄၀၀)တင်း၊ တန်ချိန် (၁၃၂.၂၇)တန်ခန့် အရောင်းအဝယ်ရှိခဲ့ပြီး ရန်ကုန်မြို့နှင့်မန္တလေးမြို့သို့တင်ပို့ကြောင်း အောင်လံ နှမ်းဈေးကွက်မှ သိရှိ ရပါသည်။

DOCA(မကွေး)

           မန်ကျည်းသီးသည် မြန်မာနိုင်ငံအလယ်ပိုင်းနှင့် အပူပိုင်းဒေသတို့တွင် အများဆုံးပေါက်လျက်ရှိကြောင်း သိရှိရပါသည်။ မန်ကျည်းသီးသည် မြန်မာဟင်းလျာများတွင် လွန်စွာပင်မှ အသုံးဝင်သော အစားအစာတစ်ခုဖြစ်သည်။ ပူအိုက်သောရာသီတွင် မန်ကျည်းသီးမှည့်နှင့် ထန်းလျက်ကိုရေစိမ်ပြီး မန်ကျည်းဖျော်ရည်အဖြစ် ပြုလုပ်သောက်သုံးကြပါသည်။ အိမ်ရှင်မ တို့၏ မီးဖိုချောင်၌ အမြဲနေရာယူထားသော အသီးဖြစ်ပြီး အစိမ်းပေါ်ချိန်၌ အစိမ်းစားကြသကဲ့ သို့ မှည့်သောအချိန်တွင်လည်း အစေ့ထုတ်ပြီး မန်ကျည်းသီးမှည့်များပြုလုပ်၍  သိမ်းဆည်းကြ ပါသည်။

          ယခု၂၀၂၅ခုနှစ် ဖေဖော်ဝါရီလနောက်ဆုံးပတ်တွင် မြိတ်မြို့နယ်တွင် မန်ကျည်းသီးမှည့် တစ်ပိဿာလျှင်(၁၁၅၀၀)ကျပ်ရှိကြောင်း သိရှိရပါသည်။

DOCA(တနင်္သာရီ)

            တနင်္သာရီတိုင်းဒေသကြီး၊ မြိတ်ခရိုင်၊ မြိတ်မြို့နယ်တွင် စိုက်ပျိုးသည့် ဘူးသီး၊ ပဲသီး၊ သခွားသီး၊ ငရုတ်သီးစသည့်ခြံထွက်သီးနှံများ အရောင်းအဝယ်လိုက်နေသည့်အတွက်ကြောင့် ဈေးရောင်းရတာအဆင်ပြေကြောင်း သိရှိရပါသည်။ မြိတ်မြို့နယ်၊ ကျောက်ဖျာကျေးရွာအုပ်စု၊ အဒွင်းကျေးရွာမှ ဥယျာဉ်ခြံထွက်သီးနှံများဖြစ်သော ဘူးသီးတစ်လုံးလျှင်(၂၀၀၀)ကျပ်၊ သခွား သီးတစ်လုံးလျှင်(၆၀၀)ကျပ်၊ ပဲသီးအစီးကြီးတစ်စီးလျှင်(၂၀၀၀)ကျပ်ဖြင့် ရောင်းချနေကြောင်း အဒွင်းကျေးရွာရှိ ဥယျာဉ်ခြံစိုက်ပျိုးနေသူ တစ်ဦးထံမှသိရှိရပါသည်။ မနှစ်ကထက်ဈေးကောင်း နေကြောင်းလည်း သိရှိရပါသည်။ ရာသီပေါ်သီးနှံများဈေးကောင်းနေသဖြင့် ထိုင်းနိုင်ငံမှတင် သွင်းလာသော မျိုးစေ့နှင် မြေဩဇာဈေးနှုန်းလည်း ဈေးတက်နေကြောင်းလည်း တောင်သူများထံမှ သိရှိရပါသည်။ မြိတ်မြို့နယ်ရှိကျေးရွာတစ်ချို့တွင် ရာသီပေါ်သီးနှံများစိုက်ပျိုးနေသော်လည်း လုံလောက်မှုမရှိသောကြောင့် ရန်ကုန်နှင့် မော်လမြိုင်ကုန်စည်ဒိုင်များတွင်လည်း ကုန် ကားများနှင့် တင်သွင်းနေကြောင်းလည်း သိရှိရပါသည်။

DOCA(တနင်္သာရီ)

           တနင်္သာရီတိုင်းဒေသကြီး၊ မြိတ်မြို့ဈေးများအတွင်းရှိ ရာသီပေါ်သီးနှံတစ်မျိုးဖြစ်သည့် မရမ်းသီးများအား တခြားကုန်စိမ်းများနှင့် တစ်နိုင်တစ်ပိုင်ရောင်းချနေကြောင်း သိရှိရပါသည်။ မရမ်းသီးစိမ်းများကို မရမ်းသီးငပိထောင်း၊ မရမ်းသီးငပိချက် အစရှိသည့် ဟင်းလျာအမျိုးမျိုးထဲတွင် ထည့်၍ပြုလုပ်ပြီး စားသုံးကြပါသည်။ဈေးကျသည်အချိန်တွင် မရမ်းသီးများကို ခွဲခြမ်း ပြီး နေလှမ်းအခြောက်ခံကာ အသားဟင်းတို့တွင် တွဲဘက်စားသုံးကြပါသည်။ ရာသီစာသီးနှံ တစ်မျိုးလည်းဖြစ်သလို ခံတွင်းကိုမြိန်စေသော သီးနှံတစ်မျိုးလည်းဖြစ်ပါသည်။

             ယခုဖေဖော်ဝါရီ တတိယပတ်တွင်မရမ်းသီးများကို တစ်ထုပ်ငယ်များထုပ်၍ ရောင်းချနေသလို နို့ဆီဘူးများဖြင့်လည်းရောင်းချနေကြောင်း သိရှိရပါသည်။ မရမ်းသီးအထုပ်ငယ် တစ်ထုပ် လျှင်(၅၀၀)ကျပ်ရှိပြီး နို့ဆီဘူးနှစ်ဘူးလျှင်(၁၅၀၀)ကျပ်ဖြင့် ရောင်းချနေကြောင်းလည်း သိရှိရပါသည်။

DOCA(တနင်္သာရီ)

ဒလမြို့နယ် ၊ ဖေဖော်ဝါရီလ  (၂၅) ရက်

          ရန်ကုန်တိုင်းဒေသကြီး၊ တွံတေးခရိုင်၊ ဒလမြို့နယ်၌ လူငယ်ရေးရာ အသိပညာပေး ဟောပြောပွဲနှင့် စားသုံးသူကာကွယ်ရေး အသိပညာပေးဟောပြောပွဲကို ဖေဖော်ဝါရီလ (၂၁)ရက် နေ့၊ နေ့လည် (၁၄:၀၀)နာရီအချိန်တွင် ရွှေလှချောင်ကျေးရွာ အ.မ.က မူလွန်စာသင်ကျောင်း တွင်ကျင်းပခဲ့ကြောင်း သိရသည်။

          အဆိုပါဟောပြောပွဲတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့နယ်ဦးစီး အရာရှိမှ ကျောင်းသား၊ ကျောင်းသူ လူငယ်မောင်မယ်များအနေဖြင့် မိမိတို့အတွက် အကျိုးရှိ စေမည့် အတတ်ပညာများကို လူငယ်ဘဝမှစ၍ လေ့လာဆည်းပူးသင့်ပြီး ပညာရဲ့ရင့်ပွဲလယ်တင့် စေရန် စာပေကောင်းများဖတ်ကာ မိမိတို့နိုင်ငံ၏ အနာဂတ်လှပစေရန် နိုင်ငံကိုချစ်မြတ်နိုးစိတ်၊ တိုင်းရင်း သားညီကိုမောင်နှမအချင်းချင်း ချစ်ကြည်ရင်းနှီးစွာနေထိုင်ပြီး ကျောင်းသား၊ ကျောင်းသူများအနေဖြင့် မိမိဘဝတိုးတက်ရေးအတွက် ပညာရေးကိုအပတ်တကုတ်ကြိုးစားရန် လိုကြောင်းဟောပြောခဲ့ပြီး စားသုံးသူရေးရာဦးစီးဌာန မြို့နယ်တာဝန်ခံမှလည်း စားသုံးသူ အခွင့်အရေးနှင့်တာဝန်များ၊ စားသုံးသူဘေးအန္တရာယ် ကင်းရှင်းစေရေးနှင့် နစ်နာဆုံးရှုံးမှုများ မရှိစေရေးအတွက် ကုန်ပစ္စည်းနှင့် ဝန်ဆောင်မှုများ ဝယ်သုံးစွဲခြင်းမပြုမီ သတိပြုဆောင်ရွက် ရမည့်အချက်များ၊ ကုန်ပစ္စည်းတစ်ခုချင်းစီ ၌ ဖော်ပြပါရှိသည့် ကုန်အညွှန်းအမှတ်အသားများ အားသေချာဖတ်ရှု့ ဝယ်ယူသုံးစွဲပါရန်နှင့် စားသုံးသူများနစ်နာဆုံးရှုံးမှုများ ရှိလာပါက တိုင်ကြားနိုင်မည့် နည်းလမ်းများ စသည့်တို့ကို စားသုံးသူ ကာကွယ်ရေးအသိပညာပေး ဆွေးနွေး ပြောကြားခဲ့ကြောင်း သိရသည်။    

DOCA(ရန်ကုန်)