ပြည်တွင်းကုန်သွယ်မှုသတင်း

     ၂၀၂၅ ခုနှစ်၊ စက်တင်ဘာလ ပထမပတ်အတွင်း ကယားပြည်နယ်၊ လွိုင်ကော်မြို့၊ သီရီမင်္ဂလာဈေးတွင်ဖြစ်ပေါ်နေသော စားဖိုဆောင်သီးနှံဈေးနှုန်းများမှာ ကြက်သွန်နီတစ်ပိဿာ လျှင်(၂၀၀၀)ကျပ်၊ ကြက်သွန်ဖြူ (ရှမ်းစ) တစ်ပိဿာလျှင်(၇၀၀၀)ကျပ်၊ ကုလားပဲခြမ်း တစ်ပိဿာ လျှင်(၇၀၀၀)ကျပ်၊ အာလူး တစ်ပိဿာလျှင် (၆၀၀၀)ကျပ်၊ ဆားတစ်ပိဿာလျှင် (၃၀၀၀)ကျပ်၊ သကြားတစ်ပိဿာလျှင်(၆၀၀၀)ကျပ်၊ ငရုတ် သီးခြောက်(အရှည်) တစ်ပိဿာ လျှင်(၁၇၀၀၀)ကျပ်၊ ငရုပ်သီးခြောက်(အပု)တစ်ပိဿာလျှင်(၄၀၀၀၀)ကျပ်၊ ကန်စွန်းရွက်တစ် စည်းလျှင်(၅၀၀)ကျပ်၊ ဂေါ်ဖီထုပ် တစ်ထုပ်လျှင်(၁၅၀၀) ကျပ်၊ ပန်းဂေါ်ဖီ တစ်ပွင့်လျှင်(၂၀၀၀) ကျပ်၊ ခရမ်းချဉ်သီး တစ်ပိဿာလျှင်(၂၀၀၀)ကျပ်၊ ပဲတောင့်ရှည် တစ်စည်းလျှင်(၆၀၀)ကျပ်၊ ပဲနီလေးတစ်ပိဿာလျှင်(၁၃၅၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း သီရိမင်္ဂလာဈေး အတွင်းရှိ ဈေးသည်များထံမှ သိရှိရပါသည်။

    ယခင်တစ်ပတ်ဈေးနှုန်းများနှင့် နှိုင်းယှဉ်ကြည့်လျှင်  ပန်းဂေါ်ဖီ တစ်ပွင့်လျှင် (၅၀၀)ကျပ် ဈေးနှုန်းကျဆင်းခဲ့ပြီး ကျဆင်းသွားရခြင်းမှာ ဒေသတွင်း စိုက်ပျိုးမှုများလာခြင်းကြောင့်ဖြစ်ပြီး အာလူး တစ်ပိဿာလျှင်(၁၀၀၀)ကျပ်၊ ခရမ်းချဉ်သီး တစ်ပိဿာလျှင်(၅၀၀)ကျပ်၊ ပဲတောင့်ရှည် တစ်စည်းလျှင်(၁၀၀)ကျပ်၊ ပဲနီလေး တစ်ပိဿာလျှင်(၅၀၀)ကျပ်စီဖြင့် ဈေးနှုန်းများ တက်သွား ကြောင်းနှင့် ဈေးနှုန်းများတက်ရခြင်းမှာ ရာသီဥတုဒဏ်ကြောင့် ရေများမြှင့်တက်လာပြီး စိုက် ခင်းများ ပျက်စီးမှုများလာသောကြောင့် ဈေးနှုန်းများ မြှင့်တက်ရခြင်းဖြစ်ကြောင်း သုံးသပ်မိပါသည်။

DOCA(ကယား)

                 မြန်မာနိုင်ငံသည် ၂၀၂၅ ခုနှစ် ဧပြီလမှ ဇူလိုင်လအထိ ပျားရည်တန်ချိန် ၇၀၀ကျော် တင်ပို့ခဲ့ ရာ အမေရိကန်ဒေါ်လာ ၁.၀၆ သန်း ရရှိခဲ့ကြောင်း မွေးမြူရေးနှင့် ကုသရေး ဦးစီးဌာနလက်အောက်ရှိ ပျားမွေးမြူရေးဌာနခွဲမှ တာဝန်ရှိသူတစ်ဦးက စက်တင်ဘာလ ၄ ရက်နေ့က ပြောကြားခဲ့ပါသည်။

          ၂၀၂၄-၂၅ ဘဏ္ဍာရေးနှစ်တွင် နိုင်ငံတော်သည် ပျားရည်တန်ချိန် ၁၈၀၀ ကျော် တင်ပို့နိုင်ခဲ့ ကြောင်း ၄င်းက ပြောကြားခဲ့ပြီး စစ်ကိုင်းတိုင်း‌ဒေသကြီး၊ မန္တလေးတိုင်းဒေသကြီးနှင့် ရှမ်းပြည်နယ် တို့သည် ပျားရည်အများဆုံးထွက်ရှိသော ဒေသများဖြစ်ကြောင်း ဖြည့်စွပ်ပြောကြားခဲ့ပါသည်။

          မြန်မာနိုင်ငံ၏ ပျားရည်ထုတ်လုပ်မှုသည် နှစ်စဉ်တန်ချိန် ၄၀၀၀ ကျော်မည်ဟု ခန့်မှန်းထားပြီး ၆၀ ရာခိုင်နှုန်း ပြည်ပဈေးကွက်သို့ တင်ပို့ကြောင်း သတင်းရရှိပါသည်။

DOCA (ရန်ကုန်)

          မန္တလေးတိုင်းဒေသကြီး၊ မိတ္ထီလာခရိုင်၊ သာစည်မြို့နယ်အတွင်းရှိ ကျေးရွာများတွင်  လယ်ယာစိုက်ပျိုးရေး လုပ်ငန်းများကိုအဓိကလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာမှ စက်မှုကုန်ကြမ်းသီးနှံတစ်မျိုးဖြစ်သည့် မိုးနှောင်းဝါသီးနှံများကိုစိုက်ပျိုးကြကြောင်း၊ သာစည်မြို့နယ်တွင် မိုးနှောင်းဝါ စိုက်ဧက( ၄၀၁၇) ဧက စိုက်ပျိုးနိုင်ခဲ့ကြောင်း စိုက်ပျိုးရေးဦီးစီးဌာနစာရင်းအရ သိရှိရပါသည်။

           မိုးနှောင်းဝါကို ဩဂုတ်လဆန်းတွင် စိုက်ပျိုးကြပြီး ရက်ပေါင်း(၁၂၀)အကြာတွင် စတင်ပေါ်ကြောင်း၊ မိုးနှောင်းဝါသီးနှံကိုသီးသန့်စိုက်ပျိုးကြကြောင်း၊ စိုက်ပျိုးသည့် ဝါအမျိုးအစားမှာ ချည်မျှင်ရှည်ဝါများဖြစ်ပြီး ကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစု၊ လုပ်သားခအပါအဝင် တစ်ဧကစုစုပေါင်း ငွေကျပ်( ၈ )သိန်းကျော် ကုန်ကျကြောင်း၊ ယခင်မိုးကြိုဝါမှာ  မိုးများ၍ အထွက်နှုန်းနည်းခဲ့ပြီး ဝါအရည်အသွေးညံ့သဖြင့်တောင်သူများ ဈေးမရကြကြောင်း၊ မိုးနှောင်းဝါ ယခင်နှစ် အထွက်နှုန်းအနေဖြင့်တစ်ဧကလျှင်(၃၀၀-၄၀၀)ပိဿာခန့်ထွက်ရှိကြောင်း၊ ဈေးကွက်အနေဖြင့် ဒေသတွင်း ဝါကြိတ်စက်များ၊ သီးနှံပွဲရုံများမှတစ်ဆင့် မန္တလေး CYT နှင့် စိန်ကမ္ဘာချည်စက်များသို့ အဓိကတင်ပို့ ရောင်းချကြကြောင်း၊ ယခုအချိန်တွင် စိုက်ပျိုးထားသည့်မိုးနှောင်းဝါများမှာ အောင်မြင်ဖြစ်ထွန်းလျက်ရှိပြီး၊ မိုးလေဝသနှင့်ရာသီဥတုကောင်းမွန်ပါက အထွက်နှုန်းကောင်းမွန်နိုင်ကြောင်း၊ ဝါ ပေါ်ချိန်တွင်လည်း ဈေးနှုန်းကောင်းမွန်ပါက အကျိုးအမြတ်များစွာရရှိနိုင်မည်ဟုမျှော်မှန်ထားကြောင်း ဝါစိုက်တောင်သူများ ထံမှသိရပါသည်။

DOCA(မန္တလေး)

          မန္တလေးတိုင်းဒေသကြီး ရမည်းသင်းမြို့နယ်အတွင်းရှိ သရက်ပင်၊ မြို့လှ၊ ပဲ့ပင်၊ အင်းတော်၊ တွင်းကျ၊ ကျောက်ဖူး၊ ရွာတန်းကျေးရွာများတွင်  လယ်ယာစိုက်ပျိုးရေး လုပ်ငန်းများကိုအဓိကလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာမှ ဆီထွက်သီးနှံတစ်မျိုးဖြစ်သည့် မြေပဲကိုအများဆုံးစိုက်ပျိုးကြကြောင်း၊ ရမည်းသင်းမြို့နယ်တွင် ၂၀၂၅-၂၀၂၆ ခုနှစ်တွင် မိုးမြေပဲကို(၁၉၂၀၀)လျာထားသော်လည်း စိုက်ဧက( ၂၀၅၁၃)ဧက စိုက်ပျိုးနိုင်ခဲ့ကြောင်း စိုက်ပျိုးရေးဦီးစီးဌာနစာရင်းအရ သိရှိရပါသည်။

          မိုးမြေပဲကို ဇွန်လဆန်းပိုင်းတွင် စိုက်ပျိုးကြပြီး ဩဂုတ်လဒုတိယပတ်တွင် မိုးမြေပဲကို  စတင်ရိတ်သိမ်းကြကြောင်း၊ မိုးမြေပဲကို သီးသန့်တန်းချစနစ်ဖြင့်စိုက်ပျိုးကြသဖြင့် တစ်ဧကလျှင် မျိုး(၂၄) ပြည် ကုန်ကျကြောင်း၊ ကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစု၊ လုပ်သားခ အပါအဝင် တစ်ဧကစုစုပေါင်း ငွေကျပ်(၃)သိန်းကျော်ကုန်ကျကြောင်း၊  ယခုနှစ်အထွက်နှုန်းမှာ တစ်ဧကလျှင်(၇၀) တင်းခန့်ထွက်ရှိ၍ အကျိုးအမြတ်ရရှိကြောင်း မြေပဲစိုက်တောင်သူများထံမှ သိရပါသည်။

           ရမည်းသင်းမြို့ပေါ်ရှိသီးနှံပွဲရုံများတွင် နေ့စဉ် မိုးမြေပဲများလှိုင်လှိုင်ဝင်ရောက်လျက်ရှိပြီး အရောင်းအဝယ်ဖြစ်လျက်ရှိကြောင်း၊ ယခုစက်တင်ဘာလပထမပတ်တွင် မိုးမြေပဲအတောင့်တစ်တင်း လျှင် (၂၉၄၀၀)ကျပ်၊ မြေပဲလုံးဆံတစ်ပိဿာလျှင်(၇၅၀၀)ကျပ်၊ ဆီဆံတစ်ပိဿာလျှင်(၇၀၀၀)ကျပ် ဖြင့် အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ဒေသတွင်းဆီကြိတ်စက်များအပြင် မန္တလေးမြို့သို့ အဓိကတင်ပို့ရောင်းချကြကြောင်း သိရပါသည်။

DOCA(မန္တလေး)

           မန္တလေးတိုင်းဒေသကြီး၊ ရမည်းသင်းခရိုင်၊ ပျော်ဘွယ်မြို့နယ်အတွင်းရှိ ကျေးရွာများတွင်  လယ်ယာစိုက်ပျိုးရေး လုပ်ငန်းများကိုအဓိကလုပ်ကိုင်ကြပြီး သီးနှံမျိုးစုံစိုက်ပျိုးလျက်ရှိရာမှ ဆီထွက်သီးနှံတစ်မျိုးဖြစ်သည့် နေကြာများစိုက်ပျိုးကြကြောင်း၊ ရမည်းသင်းမြို့နယ်တွင် မိုးနေကြာစိုက်ဧက ( ၄၂၀၈) ဧက စိုက်ပျိုးနိုင်ခဲ့ကြောင်း စိုက်ပျိုးရေးဦီးစီးဌာနစာရင်းအရ သိရှိရပါသည်။

          မိုးနေကြာကို ဇွန်၊ ဇူလိုင်လများတွင် စိုက်ပျိုးကြပြီး စက်တင်ဘာ၊ အောက်တိုဘာလ များတွင်ရိတ်သိမ်းကြကြောင်း၊ မိုးနေကြာသီးနှံကိုသီးသန့်စိုက်ပျိုးကြကြောင်း၊ ကုန်ကျစရိတ်အနေဖြင့် မျိုး၊ မြေပြုပြင်ခ၊ သွင်းအားစု၊ လုပ်သားခအပါအဝင် တစ်ဧကစုစုပေါင်း ငွေကျပ်( ၂ )သိန်းကျော် ကုန်ကျကြောင်း၊ မိုးနေကြာမှာ ယခင်နှစ် အထွက်နှုန်းအနေဖြင့်တစ်ဧကလျှင် (၂၄) တင်းခန့်ထွက်ရှိကြောင်း၊ ဈေးကွက်အနေဖြင့် ဒေသတွင်းဆီကြိတ်စက်များသို့ အဓိကတင်ပို့ရောင်းချကြကြောင်း၊ ယခုအချိန်တွင် စိုက်ပျိုးထားသည့်မိုးနေကြာများမှာ အောင်မြင်ဖြစ်ထွန်းလျက်ရှိပြီး၊ မိုးလေဝသနှင့် ရာသီဥတုကောင်းမွန်ပါက အထွက်နှုန်းကောင်းမွန်နိုင်ကြောင်း၊ နေကြာပေါ်ချိန်တွင်လည်း ဈေးနှုန်းကောင်းမွန်ပါက အကျိုးအမြတ်များစွာရရှိနိုင်မည်ဟု မျှော်မှန်ထားကြောင်း နေကြာစိုက်တောင်သူများ ထံမှသိရပါသည်။

DOCA(မန္တလေး)