ပြည်တွင်းကုန်သွယ်မှုသတင်း

            ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်တွင် မိသားစုနေ့စဉ်ဝင်ငွေအတွက် သော်လည်းကောင်း၊ စီးပွားရေးအရသော်လည်းကောင်း သင်ဖြူးဖျာလုပ်ငန်းလုပ်ကိုင်သူ အများအပြား ရှိကြပါသည်။ သင်ဖြူးဖျာမြုလုပ်သည့် သင်မများကို တိုင်းဒေသကြီးအတွင်း သင်မ အများဆုံးစိုက်ပျိုးသော ပန်းတနော်ဒေသမှ ဝယ်ယူပြီး ဖျာလုပ်ငန်းကို လုပ်ကိုင်ကြပါသည်။ သင်တစ်မ (၅ တောင်အရှည်) တစ်စီးလျှင် အချောင်းရည် ၁၀၀ မှ ၁၅၀ အတွင်း ပါဝင်ပြီး တစ်စီးလျှင် အိမ်အရောက် ၃၀၀၀၀/- ကျပ်ဖြင့် ဝယ်ယူရပါသည်။ သင်မများကို ဦးစွာ (၃)ရက်ခန့်ရေစိမ်ပြီး သင်ထိုး၊ သင်စိတ်၊ သင်နှင်ခြင်း လုပ်ငန်းများ လုပ်ရပါသည်။ ထိုသို့ ပြုလုပ်ရာတွင် သင်တူး၊ သင်ချော၊ သင်ပိန်းများ ထွက်ရှိလာပါသည်။ သင်တူကို ကြိုးအဖြစ် ပြန်အသုံးပြုပြီး သင်ချောကို ဖျာလုပ်ငန်းတွင် အသုံးပြုပါသည်။ သင်တစ်မလျှင် ဖျာချော(၂)ချပ် (၅ တောင်ဖျာ) ထွက်ရှိပါသည်။ ၅ တောင်ဖျာ တစ်ချပ်ရရှိရေးအတွက် ကုန်ကြမ်း၊ ဖျာယက်ခ၊ အနားကွပ်ခ အပါအဝင် ၄၅၀၀၀ ကျပ်ကုန်ကျပြီး  ၆၀၀၀၀/- ကျပ်ဖြင့် ရောင်းချရပါသည်။ ဖျာတစ်ချပ်လျှင် ၁၅၀၀၀ ကျပ် အကျိုးအမြတ်ရရှိပြီး တစ်နေ့လျှင် လူတစ်ဦး ဖျာ ၂ ချပ် ယက်လုပ်နိုင် ပါသည်။ ဖျာအချပ်ရေ များများ ထွက်ရှိ‌ရေးအတွက် လုပ်သားဦးရေကို အများအပြားအသုံးပြုရပါသည်။ ထွက်ရှိလာသော ဖျာ များကို ဒေသတွင်းရှိ အသုံးပြုသူများအားရောင်းချခြင်း၊ အရောင်းဆိုင်များသို့ ဖောက်သည်ပေးခြင်းနှင့် ရန်ကုန်တိုင်းဒေသကြီးသို့လည်း တင်ပို့ရောင်းချကြပါသည်။ သို့ဖြစ်ပါ၍ သင်ဖြူးဖျာလုပ်ငန်းသည် စီးပွားရေးတွက်ချေကိုက်သော လုပ်ငန်းတစ်ခုဖြစ်ကြောင်း လေ့လာတင်ပြအပ်ပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် လပွတ္တာမြို့နယ်တာဝန်ခံ ဦးမြင့်ဌေးနှင့်ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ စားအုန်းဆီကိုယ်စားလှယ်တို့နှင့် ပူးပေါင်း၍ (၂၁.၂.၂၀၂၅) ရက်နေ့ နံနက်(၀၈:၀၀) နာရီအချိန်တွင် လပွတ္တာမြို့နယ် အမှတ်(၄)ရပ်ကွက် မြန်မာ့စီးပွားရေးဘဏ်ရှေ့တွင် ပင်စင်စားဝန်ထမ်းများအား ဆီ၊ ဆန်၊ ငရုပ်သီး၊ ကြက်သွန်၊ မန်ကျည်းသီး ရောင်းချပေးမှုနှင့် ဆေးစစ်ဆေးမှုများပြုလုပ်ခဲ့ပါသည်။

           ထိုသို့ရောင်းချရာတွင် ဌာနဆိုင်ရာများမှ ပင်စင်စားဝန်ထမ်းများအား သက်သာသောဈေးနှုန်းများဖြင့် ဆီ၊ ဆန်၊ ငရုပ်သီးနှင့် ကြက်သွန်၊ မန်ကျည်းသီးများ ဝယ်ယူရရှိနိုင်ရေးအတွက် ဆောင်ရွက်ပေးခဲ့ကြောင်း သိရှိရပါသည်။ ဆီတပိသာလျှင် (၇၇၀၀)ကျပ်၊ ဧည့်မထဆန်တစ်ပြည်လျှင် (၂၅၀၀)ကျပ်၊ ငရုပ်သီး(၂၅) ကျပ် သားလျှင်(၂၀၀၀)ကျပ်၊ ကြက်သွန်နီ(၂၅)ကျပ်သားလျှင်(၇၅၀)ကျပ်၊ ကြက်သွန်ဖြူ(၂၅)ကျပ်သားလျှင် (၃၅၀၀)ကျပ်နှင့် မန်ကျည်းသီး(၁၀)ကျပ်သားလျှင် (၉၀၀)ကျပ်ဖြင့်ရောင်းချပေးကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်တွင် အသေးစား၊ အလတ်စား၊ အငယ်စား ဖွံ့ဖြိုးတိုးတက်ရန် ကူညီ အားပေးဆောင်ရွက်လျက်ရှိသည်။ ဒေသတွင် စီးပွားရေးလုပ်ငန်းများ ဈေးကွက်ရရှိရေး ပြည်တွင်းကုန်သွယ်မှု ဖွံ့ဖြိုးတိုးတက်ရေးအတွက် မုန့်လုပ်ငန်းများ တပိုင်တနိုင် ထုတ်လုပ်မှုမှ စီးပွားဖြစ်လုပ်ကိုင်နိုင်ရေး နည်းလမ်းကောင်း ရှာဖွေပြီး ပူးပေါင်းဆောင်ရွက်လျှက်ရှိသည်။  မုန့်ဖတ်သည် မြန်မာလူမျိုးတို့ နံနက်စာစားသုံးရန် ကြိုက်နှစ်သက်သော အစားအစာဖြစ်၍ မုန့်ဖတ်လုပ်ငန်း၏ ထုတ်လုပ်မှုအခြေအနေများကို လေ့လာခဲ့သည်။

          မုန့်ဟင်းခါးဖတ်ထုတ်လုပ်သော လုပ်ငန်းသည် ဓနုဖြူမြို့နယ် ၆လမ်း၊ ၁၇ ရပ်ကွက်တွင် ထုတ်လုပ်ကြောင်း သိရပြီး ကုန်ကြမ်းအနေဖြင့် ဆန်(ငစိန်)ကိုသာ အသုံးပြုကြောင်း၊ ထုတ်လုပ်မှု အနေဖြင့် တစ်နေ့ကို ၂၄ပြည် ဆန် ၂အိတ် ကုန်ကျပြီး တစ်နေ့ ရင်းနှီးမြုပ်နှံမှု ကုန်ကျစရိတ်  ၃၀၀၀၀၀ကျပ်မှ -၃၅၀၀၀၀ကျပ် ဝန်းကျင်ခန့်ကုန်ကျကြောင်းသိရသည်။ မုန့်ဖတ် ထွက်ရှိမှု အနေဖြင့် တစ်နေ့ထုတ်လုပ်မှု၏ ပိဿာချိန် ၁၀၀မှ ၂၀၀ခန့် ထွက်ရှိသည်၊၊ မုန့်ဖတ်ရောင်းချမှု ဈေးနှုန်းအနေဖြင့် လက်ကားဈေး ၂၅၀၀ကျပ် လက်လီဈေး ၃၀၀၀ကျပ်ဖြင့် ရောင်းချပြီး ဓနုဖြူမြို့အတွင်းသာ ရောင်းချကြောင်း သိရသည်။ တစ်နေ့ထုတ်လုပ်မှု ထွက်ရှိမှုအပေါ် ရရှိသောအကျိုးအမြတ်အနေဖြင့် ငွေကျပ် ၁၅၀၀၀၀ခန့် ရရှိကြောင်း၊ အလှူ၊ မင်္ဂလာရက်များ ရှိပါက မုန်ဖတ်ပိုမိုထုတ်လုပ်ရောင်းချရသည်။ မုန့်ဖတ်ထုတ်လုပ်သည့် လုပ်ငန်းကို ၁၉၉၄ခုနှစ် ကတည်းက လုပ်ကိုင်လာခြင်းဖြစ်ပြီး စီးပွားဖြစ် တပိုင်တစ်နိုင်လုပ်ကိုင်လျက်ရှိကြောင်း မုန့်ဖတ်ထုတ်လုပ်သူပိုင်ရှင်ထံမှ သိရှိရပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်တွင် ဗူးပင်စိုက်ပျိုး၍ ဗူးသီးထွက်ရှိနေပြီး ရန်ကုန်သို့ တင်ပို့လျက်ရှိကြောင်း သိရသည်။  ဓနုဖြူမြို့နယ်တွင် ဟင်းသီးဟင်းရွက်သီးနှံစုံကို ဆောင်း၊ နွေရာသီတို့တွင် စိုက်ပျိုးတောင်သူများပေါများကြောင်း သိရသည်။

            စိုက်ပျိုးမှုအနေဖြင့် ဗမာမျိုးဗူးကိုသာစိုက်ပျိုးပြီး မြို့နယ်အတွင်း ဝယ်ယူ၍ ရရှိသည်။  ဗူးမျိုးစေ့ ၂၀စေ့ပါ တစ်ထုတ်ကို ၁၅၀၀၀ကျပ် ဝယ်ယူပြီးစိုက်ပျိုးကြောင်း၊ နှစ်စဉ်စိုက်ပျိုးလာ၍ ဗူးပင်မှ မျိုးစေ့ခံ၍ နှစ်စဉ် ဗူးမျိုးစေ့ပါရောင်းချနေပြီး ဗူးစေ့ ၁စေ့ကို ၃၀၀ ကျပ်ထိဈေးရရှိသည်။  စိုက်ပျိုးရာတွင် စင်တင်စိုက်ပျိုးခြင်းနည်းဖြင့်သာ စိုက်ပျိုးကြသည်။ အခြားသော ဗူးစိုက်ပျိုးသူများက မြေချစင်မဲ့စိုက်ပျိုးခြင်းလဲရှိကြောင်း၊ စင်ထိုးစိုက်ပျိုးပါက ဝါးစင်သည် ၂နှစ်အတွင်း ပြန်လည်အသုံးပြု၍ ရရှိကြောင်းသိရသည်၊ ဗူးသက်တမ်းမှာ ၂၀၂၄ခုနှစ် နိုဝင်ဘာလတွင် စိုက်ပျိုးပါက ၂၀၂၅ခုနှစ် ဖေဖော်ဝါရီလမှ မေလအထိထွက်ရှိကြောင်း၊ စိုက်ပျိုးရာတွင် ၀.၃၀ ဧကတွင် အပင်ရေ ၅၀ ခန့် စိုက်ပျိုးပြီး  ၂လခွဲ အကြာတွင် အသီး စတင်ခူးရကြောင်း ဗူး စိုက်ပျိုးထုတ်လုပ်မှု ကုန်ကျ စရိတ်အနေဖြင့် မျိုး၊ သွင်းအားစု၊ လုပ်သားခ၊ ဝါး ဖိုး အပါအဝင် ငွေကျပ် ၁၈၀၀၀၀ခန့် ကုန်ကျကြောင်း၊ ၁လကို ၄ကြိမ်ခူးရပြီး ၁ကြိမ်ခူးလျှင် ၅၀လုံးခန့်ထွက်ရှိသည်။ ၄လအကြာအထိ အသီးလှိုင်လှိုင်ထွက်ရှိသောကြောင့်  ဗူးသီးထွက်ရှိမှု  အလုံး ၄၀၀-၅၀၀ ထိ ထွက်ရှိကြောင်းသိရသည်။

            ယခု ဗူးသီးဈေးနှုန်းအနေဖြင့် အလုံးကြီး(၁)လုံးလျှင် (၁၅၀၀-၂၀၀၀)ကျပ်ဖြင့် လက်ကားဈေးရောင်းချ ရပြီး  ရန်ကုန်တင်ပို့မည်ဆိုပါက ဗူးသီးတစ်လုံး ၁၀၀၀ ကျပ်ဖြင့် တင်ပို့ရောင်းချရသည်။    အကျိုးအမြတ်အနေဖြင့် ယခုနှစ်တွင်  ၃၅၀၀၀၀-၄၀၀၀၀၀ကျပ် နီးပါး အကျိုးအမြတ်ရရှိ၍ ဗူးပင်စိုက်သူများ စီးပွာဖြစ်အဆင်ပြေလျက် ရှိကြောင်း၊   ဈေးကွက်တင်ပို့မှုအနေဖြင့် ရန်ကုန်သို့ အဓိကထားတင်ပို့ပြီး  မြို့နယ်တွင်းနှင့် ပန်းတနော် မြို့များရှိ ဗူးသီးကျော်သူများထံသို့လဲ တင်ပို့ရောင်းချရပြီး ဗူးပင်စိုက်ပျိုးမှု ကုန်ကျစရိတ်သက်သာ၍ အကျိုးအမြတ်ရရှိ၍  နှစ်စဉ်စိုက်ပျိုးလျက်ရှိကြောင်း သိရှိရပါသည်။

DOCA(ဧရာဝတီ)

            မြန်မာလူမျိုးများသည် ဟင်းသီးဟင်းရွက်၊ သား၊ ငါး၊ များကို မိသားစု ထမင်းဝိုင်တွင် စုံလင်စွာဖြင့် စားသောက်နေထိုင်ကြသည်။ အတို့အမြုတ် ငပိ ရေဖြင့် ထမင်းစားကြပြီး သား၊ငါးကို အဓိကဟင်းလျာဖြင့် စားလေ့ရှိသည်။ ဟင်းသီးဟင်းရွက်သည် လူခန္ဓာကိုယ်အတွက် အဟာရဓါတ်ပြုခြင်းကြောင့် စားသုံးသင့်သည်။ ဟင်းသီးဟင်းရွက်များကို ဓနုဖြူမြို့နယ်တွင် နှစ်စဉ်စိုက်ဧက (၆၅၇၉) ဧက စိုက်ပျိုးလျှက်ရှိပြီး တပိုင်တစ်နိုင် စိုက်ပျိုးမှုမှ စီးပွားဖြစ် စိုက်ပျိုးခြင်းများလည်းရှိကြောင်း လေ့လာသိရှိရသည်။

            ဟင်းသီးဟင်းရွက် စိုက်ဧကများထဲမှ ၁၇ရပ်ကွက် ဓနုဖြူမြို့ ရှိ ဦးအေးလွင်၏ ခရမ်းကျွတ်သီး ၀.၅၀ ဧက စိုက်ပျိုးထွက်ရှိမှုကို ကွင်းဆင်းလေ့လာခဲ့သည်။ စိုက်ပျိုးမှုအနေဖြင့် ပဒေသာ ခရမ်းကျွတ်သီး (ထိုင်ဝမ်) မျိုးကို  ဓနုဖြူမြို့နယ် စိုက်ပျိုးသီးနှံအရောင်းဆိုင်များမှ ဝယ်ယူစိုက်ပျိုးသည်။ ၂၀၂၄ခုနှစ် နိုဝင်ဘာလတွင် စတင်စိုက်ပျိုးပြီး ၂လအကြာတွင် အသီးစတင်ထွက်ရှိပြီး   ၂၀၂၅ခုနှစ်  ဇန်နဝါရီလမှ မေလ အထိ  ခရမ်းကျွတ်သီး ၅လ အကြာထိ ထွက်ရှိသည်။ ထွက်ရှိမှု အနေဖြင့် ၅ ရက် တကြိမ် ခူးဆွပ်ရပြီး အလုံရေ ၁၅၀၀ ခန့် ခူးရသည်။ ၅လအတွင်း ခရမ်းကျွတ်သီး ထွက်ရှိမှု ၄၀၀၀၀ ခန့် ခူးဆွပ်ရရှိသည်။  စိုက်ပျိုးမှု ကုန်ကျစရိတ် ၀.၅၀ ဧက တွင် ၅၀၀၀၀၀ကျပ် ကုန်ကျကြောင်းသိရသည်။

            ခရမ်’ကျွတ်သီး ရောင်းချမှု ဈေးနှုန်း အနေဖြင့်  အလုံး ၁၀၀၀ ကို ငွေကျပ် ၅၀၀၀၀ဖြင့် လက်ကား ရောင်းချသည်။ စိုက်ဧက အကျိုးအမြတ်အနေဖြင့် ငွေကျပ် ၁၅၀၀၀၀၀ အကျိုးအမြတ်ရရှိသဖြင့် တပိုင်တစ်နိုင် စိုက်ပျိုးမှုမှ မိသားစုအပိုဝင်ငွေရရှိသဖြင့် စိုက်ပျိုးလျက်ရှိပြီး  ဒေသတွင်းကုန်စိမ်းရောင်းချသူထံသို့  ဖြန့်ဖြူးရောင်းချပြီး ကုန်သည်များမှ တဆင့် ရန်ကုန်ဈေးကွက်သို့ တင်ပို့ကြောင်း စိုက်ပျိုးသူထံမှ သိရှိရပါသည်။

DOCA(ဧရာဝတီ)