ပြည်တွင်းကုန်သွယ်မှုသတင်း

          ဧရာဝတီတိုင်းဒေသကြီး ငပုတောမြို့နယ်၌ ဒေသထွက်နေလှန်းဆားများ ဝယ်လိုအား ကောင်းပြီး  အရောင်းအဝယ်ကောင်းမွန်နေကြောင်း ငပုတောမြို့နယ်မှ နေလှန်းဆားထုတ်လုပ် ရောင်းဝယ်ရေး လုပ်ငန်းလုပ်ကိုင်သူ ဒေါ်အေးမြတ်၏ ပြောဆိုချက်အရ သိရသည်။

          ငပုတောမြို့နယ်၌ ဒေသထွက်နေလှန်းဆားများ ယခုနှစ် ဇူလိုင်လ နောက်ဆုံးပတ်မှ စတင်ပြီး လက်ရှိအချိန်ထိ အရောင်းအဝယ် ကောင်းမွန်နေကြောင်း သိရသည်။ "ဒေသထွက် နေလှန်းဆားတွေကို ရန်ကုန်ဈေးကွက်က အဝယ်လိုက်နေပါတယ်။ ရန်ကုန်ဈေးကွက်က ပိဿာ အများအပြားကို ဝယ်ယူနေတာပါ။ လတ်တလောအနေနဲ့  တစ်ရက်ကို  နေလှန်းဆားပိဿာ ၂၅၀၀ ကနေ ၅၅၀၀ အထိ အရောင်းအဝယ်ကောင်းနေပါတယ်။ အခုလိုဆားအရောင်းအဝယ် ကောင်းလာ တော့ ဆားထုတ်လုပ်တဲ့လုပ်ငန်းနဲ့ ဆက်စပ်တဲ့သူတွေ အလုပ်အကိုင်အခွင့်အလမ်းတွေရရှိပြီး အဆင်ပြေ လာပါတယ်''ဟု ဒေါ်အေးမြတ်ကပြောသည်။

          ငပုတောမြို့နယ်၌ ဒေသထွက်နေလှန်းဆားများကို ဆားလုပ်ငန်း လုပ်ကိုင်သူများက စနစ်တကျ ထုတ်လုပ်ပြီး   ရန်ကုန်ဈေးကွက်သို့ အဓိကထား တင်ပို့ရောင်းချလျက်ရှိကြောင်း၊ အဆိုပါဒေသထွက် နေလှန်းဆားများကို ငါးပိ၊ ငါးခြောက်၊ ငံပြာရည် စသည့်လုပ်ငန်းများတွင် အဓိကအသုံးပြုကြ ကြောင်း ၊  နေလှန်းဆားများ အရောင်းအဝယ် ကောင်းမွန်နေခြင်းကြောင့် ဝယ်လိုအားနှင့် ရောင်းလိုအား မျှတမှုရှိလာသဖြင့်   ဒေသဈေးကွက်အတွင်း   ဈေးနှုန်းများ   တည်ငြိမ်စေမည်ဖြစ်ပြီး ဆားလုပ်ငန်း လုပ်ကိုင်သူများနှင့် ဆက်စပ်သူများ၏ သက်သာချောင်ချိရေးကို အထောက်အကူ ပြုစေမည်ဖြစ်ကြောင်း   သိရသည်။   

DOCA (ဧရာဝတီ)

   ဧရာဝတီတိုင်းဒေသကြီး   ဖျာပုံခရိုင် ကျိုက်လတ်မြို့နယ်မှ ရန်ကုန်ဈေးကွက်သို့ ဇူလိုင်လအတွင်း  ငါးမြွေထိုးခြောက် ပိဿာ  ၆၅၀၀၀  အထိ   တင်ပို့ရောင်းချခဲ့ ကြောင်း ကျိုက်လတ်မြို့နယ် ရှိ ငါးခြောက်မျိုးစုံ ရောင်းဝယ်ရေးလုပ်ငန်းလုပ်ကိုင်သူ ဒေါ်နီဝင်း၏ပြောကြားချက်အရ  သိရသည်။ 

          "ကျိုက်လတ်မြို့နယ်ကနေ ငါးခြောက် တွေကို လစဉ်တင်ပို့ရောင်းချနေပါတယ်။ ဇူလိုင်လ ပထမပတ်လောက်ကတည်းက ရန်ကုန်ဈေးကွက်ကို  ငါးမြွေထိုးခြောက်တွေ တင်ပို့ရောင်းချ အားကောင်းခဲ့ပါတယ်။ တစ်လတာကာလအတွင်း ငါးမြွေ ထိုးခြောက်ပိဿာ ၆၅၀၀၀ အထိ တင်ပို့ ရောင်းချခဲ့ရပါတယ်။  ငါးမြွေထိုးခြောက် လုပ်ငန်းက ဒေသအတွက် အလုပ်အကိုင် ဖန်တီးပေးတဲ့ လုပ်ငန်းပါ။ အခုလို ငါးမြွေထိုးခြောက်တွေ  ဝယ်ယူမှုများလာတာကြောင့် ငါးမြွေထိုးခြောက်လုပ်ငန်း နဲ့    ဆက်စပ်လုပ်ကိုင်တဲ့သူတွေအားလုံး အဆင်ပြေလာပါတယ်''  ဟု ဒေါ်နီဝင်းက ပြောသည်။ 

          ကျိုက်လတ်မြို့နယ်မှ   ရန်ကုန်ဈေး ကွက်သို့    ဇွန်လအတွင်းက   ငါးမြွေထိုး ခြောက်ပိဿာ ၅၅၀၀၀ သာ တင်ပို့ရောင်းချ နိုင်ခဲ့ပြီး ဇူလိုင်လ ၁ ရက်မှ ၃၁ ရက်အထိ တစ်လတာ ကာလ အတွင်း     ငါးမြွေထိုး ခြောက်ပိဿာ  ၆၅၀၀၀  အထိ  တင်ပို့ ရောင်းချနိုင်ခဲ့ကြောင်း သိရသည်။

DOCA(ဧရာဝတီ)

          MSMEလုပ်ငန်းများဖြစ်သော မုန့်ဖတ်(မုန့်တီ၊မုန့်ဟင်းခါး) လုပ်ငန်းများကို မြင်းခြံမြို့ပေါ်ရှိ ရပ်ကွက်များတွင် မိသားစုစားဝတ်နေရေးအတွက် စီးပွားဖြစ်တစ်နိုင်တစ်ပိုင်လုပ်ကိုင်ကြကြောင်း၊ ၂၀၂၅ ခုနှစ်၊ စက်တင်ဘာလ ပထမပတ်တွင်မုန့်တီ၊ မုန့်ဟင်းခါးဖတ် ၂၅ ကျပ်သားလျှင် (၆၅၀)ကျပ်၊ တစ်ပိဿာလျှင် (၂၅၀၀) ကျပ်ခန့်ပေါက်ဈေးများဖြင့်ရောင်းချကြောင်း၊ ယခင်ဩဂုတ်လ ပထမပတ်တွင် ရောင်းချခဲ့သော မုန့်ဖတ် ၂၅ ကျပ်သားလျှင် ၈၀၀ ကျပ်၊ တစ်ပိဿာလျှင် (၃၀၀၀) ကျပ် ပေါက်ဈေးရှိခဲ့ကြောင်း၊ ကာလတူနှိုင်းယှဉ်ပါက ယခုလတွင် မုန့်ဖတ် ၂၅ ကျပ်သားလျှင် (၁၅၀) ကျပ်၊ တစ်ပိဿာလျှင် (၅၀၀) ကျပ်ခန့်ဈေးနှုန်းများကျဆင်းခဲ့ခြင်းဖြစ်ကြောင်း၊ မုန့်ဖတ်ထုတ်လုပ်သော ကုန်ကြမ်းဆန်များဈေးနှုန်း ကျဆင်းသောကြောင့် မုန့်ဖတ်ဈေးနှုန်းကျဆင်းခြင်းဖြစ်ကြောင်း၊ နေ့စဉ်ပုံမှန်ကုန်ချိန် (၁၀၀-၁၅၀) ပိဿာခန့်ရောင်းကုန်ကြောင်း၊ ဈေးကွက်အနေဖြင့် မြို့ပေါ်ရှိ ရပ်ကွက်များနှင့် ကျေးရွာများမှ ဝယ်ယူစားသုံးကြကြောင်း၊ မု့န်တီ၊ မုန့်ဟင်းခါးလက်သုတ် ရောင်းချသူများမှလည်း ဝယ်ယူကြောင်း၊ အလှူပွဲ၊ မွေးနေ့ပွဲ၊ ဘုရားပွဲများတွင် အော်ဒါအမှာရှိပါက မုန့်ဖတ်များပိုမို ထုတ်လုပ်ရကြောင်း MSME လုပ်ငန်းဖြစ်သော မုန့်ဖတ်ထုတ်လုပ်ရောင်းချသူ၏ ပြောပြချက်အရပါ သိရှိရသည်။

DOCA(မန္တလေး)

             မန္တလေးတိုင်းဒေသကြီး၊ မြင်းခြံမြို့နယ်သည် အပူပိုင်းဒေသမိုးနည်းရပ်ဝန်းဒေသတစ်ခုဖြစ်ပြီး ဆည်ရေသောက်အသင့်အတင့်ရှိ၍ လယ်ယာစိုက်ပျိုးရေးလုပ်ငန်းကို လုပ်ကိုင်ကြပြီး သီးနှံမျိုးစုံကို စိုက်ပျိုးလျက်ရှိပါသည်။ ရာသီအလိုက်သီးနှံမျိုးစုံစိုက်ပျိုးလျက်ရှိရာ ၂၀၂၄-၂၀၂၅ ခုနှစ်တွင် မြင်းခြံမြို့နယ်အနေဖြင့် မတ်ပဲဆောင်းသီးနှံကို(၆၃၀)ဧက စိုက်ပျိုးထားခဲ့ပြီး စိုက်ဧကအားလုံး ရိတ်သိမ်းနိုင်ခဲ့၍ တစ်ဧကလျှင်ပျမ်းမျှအထွက်နှုန်း(၁၁)တင်းနှုန်းထွက်ရှိခဲ့ကြောင်း မြို့နယ်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရပါသည်။

          မတ်ပဲသီးနှံကို ဆောင်းရာသီဖြစ်သည့် အောက်တိုဘာ၊ နိုဝင်ဘာလနှင့်ဒီဇင်ဘာလတို့တွင် စိုက်ပျိုးကြပြီး၊ မတ်လ၊ ဧပြီလနှင့်မေလတို့တွင် ရိတ်သိမ်းထွက်ပေါ်ကြောင်း၊ စိုက်ပျိုးချိန်မှ(၄)လ အကြာတွင် ရိတ်သိမ်းရကြောင်း၊ ဒေသအနေဖြင့် အများဆုံးစိုက်ပျိုးသောမျိုးမှာ ရေဆင်း-၄ မျိုးဖြစ်ပြီး စိုက်ပျိုးမှုပုံစံမှာ ပက်ကျဲစနစ်နှင့် စိုက်တန်းကျင်းဖော်၍ စိုက်ပျိုးမှုများရှိရာ စိုက်တန်းကျင်းဖော်ပြီး စိုက်ပျိုးမှုများကြကြောင်း၊ တစ်ကျင်းလျှင်(၃-၄)လက်မခြား၍ ကျင်းအနက်တစ်မခန့် တစ်ကျင်းလျှင် မျိုးစေ့နှစ်စေ့ချ၍ စိုက်ပျိုးကြကြောင်း၊ တစ်ဧကလျှင် မျိုးစေ့ကုန်ကျမှုအနေဖြင့်(၆-၈)ပြည်ခန့် ကုန်ကျကြောင်း၊ ပက်ကျဲစနစ်ဖြင့် စိုက်ပျိုးလျှင် (၁၀-၁၂)ပြည်ခန့်ကုန်ကျကြောင်း၊ တစ်ဧကစိုက်ပျိုးမှုကုန်ကျစရိတ်အနေဖြင့်မျိုး၊ သွင်းအားစု၊ လုပ်သားခအပါအဝင် စုစုပေါင်းကုန်ကျ စရိတ်(၆၃၀၀၀၀)ကျပ်ဝန်းကျင်ခန့် ကုန်ကျကြောင်း၊ ယခုနှစ်တွင်ဖြစ်ပေါ်ခဲ့သော ဈေးနှုန်းအရ တစ်ဧကတောင်သူအကျိုးအမြတ်အနေဖြင့်(၃၉၃၀၀၀)ကျပ်ခန့်ရရှိကြောင်း၊ မြို့နယ်အတွင်း စိုက်ပျိုးမှုများသောကျေးရွာများမှာ ခေါင်းကွဲ၊ တလုပ်၊ တောပုနှင့်ဆင်ချောင်းကျေးရွာများဖြစ်ကြောင်း၊ ဒေသတွင်းကျေးရွာများမှ ထွက်ရှိသော မတ်ပဲများကို မြင်းခြံမြို့ရှိ ပွဲရုံများသို့ တင်သွင်းရောင်းချကြကြောင်း၊ ထိုမှတစ်ဆင့် မန္တလေးမြို့နှင့်ရန်ကုန်မြို့ လှိုင်သာယာသို့ တင်ပို့ရောင်းချကြကြောင်း၊ ၂၀၂၅ ခုနှစ်၊ စက်တင်ဘာပထမပတ်တွင် မြင်းခြံကုန်စည်ဒိုင်တွင် မတ်ပဲထိပ်စ တစ်တင်းလျှင် (၉၀၀၀၀) ကျပ်၊ မတ်ပဲ(အလတ်စ) တစ်တင်းလျှင်(၈၀၀၀၀)ကျပ်၊ မတ်ပဲအောက်စတစ်တင်းလျှင် (၅၆၀၀၀) ကျပ် ပေါက်ဈေးများဖြင့် အရောင်းအဝယ်ဖြစ်ခဲ့ကြောင်း၊ နေ့စဉ်အိတ်အရောင်းအဝယ် (၅၀-၁၀၀) အိတ်ခန့်အရောင်းအဝယ်ဖြစ်ကြောင်း၊ ကာလတူနှိုင်းယှဉ်ပါက ယခုလတွင်မတ်ပဲဈေးများ ကျဆင်းခဲ့ကြောင်း ပဲကုန်သည်တစ်ဦး၏ ပြောပြချက်အရ သိရှိရပါသည်။

DOCA(မန္တလေး)

         မြင်းခြံ‌မြို့နယ်အတွင်းရှိ လေးအိမ်တန်းကျေးရွာ၊ လှိုင်းတက်ကျေးရွာနှင့် အနိမ့်ကျေးရွာတို့သည် ဧရာဝတီမြစ်ဖြင့်နီး၍ ကျေးရွာသူ၊ ကျေးရွာသားများသည် ငါးဖမ်းလုပ်ငန်း၊ ငါးရောင်းချခြင်းလုပ်ငန်းများဖြင့် အသက်မွေးဝမ်းကျောင်းပြုကြသည်။ မြစ်အတွင်းမှရရှိသောငါးများကို အနီးအနားပတ်ဝန်းကျင်များသို့ရောင်းချ၍ ပိုလျှံသေားငါးများကို ‌စံပြဈေးနှင့် အေးမြသီတာဈေးများသို့ ရောင်းချကြောင်း၊ ၂၀၂၅ ခုနှစ်၊ စက်တင်ဘာလ ပထမပတ်တွင် ရောင်းချနေသော ဈေးနှုန်းများအနေဖြင့် ငါးဘတ် ၂၅ ကျပ်သားလျှင် (၇၀၀၀)ကျပ်၊ တစ်ပိဿာလျှင် (၂၆၀၀၀) ကျပ်ပေါက်ဈေးများဖြင့် ရောင်းချကြောင်း၊ ငါးဘတ်မွှေကြော်သည် လူသိများသော ဟင်းတစ်မည်ဖြစ်ပြီး "ငါးဘတ်ပုပ်ပုပ်၊ ငရုတ်စပ်စပ်" ဟူ၍ဆိုရိုးစကားအတိုင်း လူကြိုက်များ၍ စားသုံးမှုများသောကြောင့် အရောင်းအဝယ်ကောင်းကြောင်း၊ မြစ်အတွင်းမှ ငါးငယ်များ၊ အင်းဆက်များကိုများကို စားသောက်ကြီးထွားသော  သဘာဝအသားစားငါးများဖြစ်၍ ငါးဘတ်အသားမှာ နုညံ့ချိုမြသောကြောင့် အရောင်းအဝယ်ဖြစ်ကြောင်း၊  ဈေးကွက်တွင်နေ့စဉ် (၁၀-၂၀) ပိဿာချိန်ခန့်ရောင်းချရကြောင်း၊ မြစ်အတွင်းမှ သဘာဝငါးဘတ်ဈေးနှုန်းသည် မွေးမြူရေးငါးများထက် ဈေးနှုန်းပိုများကြောင်း ငါးရောင်းချ၏ ပြောပြချက်အရသိရှိရသည်။

DOCA(မန္တလေး)