ပြည်တွင်းကုန်သွယ်မှုသတင်း

    ပဲခူးတိုင်းဒေသကြီး၊ သာယာဝတီခရိုင်၊ မင်းလှမြို့ဈေးကွက်အတွင်းရှိ ကုန်စုံဆိုင်များတွင် ရောင်းချလျက်ရှိသော ကြက်သွန်နီဈေးနှုန်းအခြေအနေများမှာ ဒီဇင်ဘာလ တတိယပတ်တွင် အသေးတစ်ပိဿာလျှင် (၃၅၀၀)ကျပ်၊ အလတ်တစ်ပိဿာလျှင် (၄၀၀၀) ကျပ်၊ အကြီးတစ်ပိဿာလျှင် (၄၅၀၀) ကျပ်အထိရှိခဲ့ပါသည်။ ၂၀၂၄ခုနှစ်၊ ဇန်နဝါရီလ တတိယပတ်တွင် ကြက်သွန်နီအသစ်များထွက်ပေါ်လာပြီဖြစ်သဖြင့် အကြီးတစ်ပိဿာလျှင် (၃၅၀၀) ကျပ်၊ အလတ်တစ်ပိဿာလျှင် (၃၀၀၀) ကျပ်၊ အသေးတစ်ပိဿာလျှင် (၂၅၀၀)ကျပ်ရှိခဲ့ပါသည်။ ကြက်သွန်နီအဟောင်းအကြီးတစ်ပိဿာလျှင် (၅၀၀၀) ကျပ်၊ အလတ်တစ်ပိဿာလျှင် (၄၀၀၀) ကျပ်ရှိနေခဲ့ပါသည်။ ကြက်သွန်နီတစ်အိတ်လျှင် (၂၅) ပိဿာ (သို့မဟုတ်) (၃၀) ပိဿာပါရှိသော အိတ်များဖြင့် ဘုရင့်နောင်ပွဲရုံမှ မင်းလှမြို့ဈေးကွက်အတွင်းရှိ ကုန်မျိုးစုံဈေးဆိုင်များသို့ ကုန်ချိန် (၄၀၀၀)ပိဿာမှ (၇၀၀၀) ပိဿာခန့်အတွင်း ဝင်ရောက်လျက်ရှိကြောင်းသိရှိရပါသည်။

DOCA(ပဲခူး)

   ပဲခူးတိုင်းဒေသကြီး၊ သာယာဝတီခရိုင်တွင် ဆောင်းသီးနှံများစိုက်ပျိုးမှုအခြေအနေအနေဖြင့် မတ်ပဲလျာထားဧက (၄၅၃၈၃၇)ဧက၊ ပဲတီစိမ်း (၆၈၄၂၅)ဧက၊ ပဲလွမ်းလျာထားဧက (၆၈၅၆)ဧက၊ ဘိုကိတ်လျာထားဧက (၂၈၂၆)ဧက၊ ပဲပုတ်လျာထားဧက (၂၀၆၀၈) ဧက၊ ကုလားပဲလျာထားဧက (၁၁၈၈၄) ဧက၊ ပဲကြီးလျာထားဧက (၂၇၁၆)ဧက၊ ပဲယဉ်းလျာထား ဧက (၃၉၃၃)ဧက၊ ထောပတ်ပဲလျာထားဧက (၃၁၆၆)ဧက၊ စားတော်ပဲ၊ စွန်တာနီ၊ ပဲနှောက်၊ ပဲဖြူလေးနှင့် အခြားပဲများကိုလည်း လျာထားလျက်ရှိပြီး စုစုပေါင်းလျာထားဧက (၅၇၉၄၆၅) ဧက လျာထားစိုက်ပျိုးလျက်ရှိကြောင်းသိရှိရပါသည်။ ဇန်နဝါရီလဆန်းတွင် ဆောင်းသီးနှံပဲမျိုးစုံစိုက်ပျိုးပြီးစီးမှုအနေဖြင့် မတ်ပဲစိုက်ဧက (၄၄၇၁၂၀)ဧက၊ ပဲတီစိမ်းစိုက်ဧက (၆၈၅၂၈)ဧက၊ ပဲလွမ်းစိုက်ဧက (၁၀၂၃၅)ဧက၊ ဘိုကိတ်စိုက်ဧက (၃၇၆၁)ဧက၊ ပဲပုတ်စိုက်ဧက (၃၃၇၁၁)ဧက၊ ကုလားပဲစိုက်ဧက (၁၂၂၀၃)ဧက၊ ပဲကြီးစိုက်ဧက (၃၃၆၇)ဧက၊ ပဲယဉ်းစိုက်ဧက (၁၀၃၃၁) ဧကများနှင့် အခြားပဲများကိုလည်း အသီးသီးစိုက်ပျိုးထားရှိပြီး စိုက်ပျိုးပြီးသည့် ဧကစုစုပေါင်း (၅၉၅၆၇၇) ဧကစိုက်ပျိုးပြီးစီးကြောင်း ခရိုင်စိုက်ပျိုးရေးဌာန၏ စာရင်းများအရသိရှိရပါသည်။

     သာယာဝတီခရိုင်တွင် အများဆုံးစိုက်ပျိုးသောသီးနှံမှာ မတ်ပဲသီးနှံဖြစ်ပြီး တောင်သူများအနေဖြင့် မတ်ပဲသီးနှံကို ရွေးချယ်စိုက်ပျိုးရခြင်းမှာ မတ်ပဲသည် သာယာဝတီခရိုင်၏ မြေအမျိုးအစားနှင့်ကိုက်ညီခြင်း၊ ရိတ်သိမ်းခူးဆွတ်ရလွယ်ကူခြင်းတို့ကြောင့်လည်း စိုက်ပျိုးရခြင်းဖြစ်ပါသည်။ စိုက်ပျိုးသောမတ်ပဲမျိုးများမှာ‌ ရေဆင်း(၂)၊ ရေဆင်း(၃)၊ ရေဆင်း(၅)၊ မတ်ပဲအမျိုးအစားများကို အဓိကစိုက်ပျိုးကြကြောင်း သိရပါသည်။ ဒုတိယအများဆုံးစိုက်ပျိုးသော ပဲတီစိမ်းသီးနှံမျိုးများမှာ ရေဆင်း (၁)၊ ရေဆင်း(၁၄) ဒေသမျိုး(ဝါးခယ်မမျိုး အစရှိသော ဒေသအခေါ်ပဲမျိုးများ) ကိုစိုက်ပျိုးကြကြောင်း စိုက်ပျိုးရေးဦးစီးဌာန၏ ကွင်းဆင်းဆောင်ရွက်မှုများအရသိရှိရပါသည်။

DOCA(ပဲခူး)

     ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့ဈေးအတွင်း၌ ၂၀၂၄ခုနှစ်၊ ဇန်နဝါရီလ ဒုတိယပတ်တွင်  ကြက်သွန်နီအဟောင်းများကို ဈေးကွက်အတွင်း ရောင်းချခြင်းမတွေ့ရှိရဘဲ ကြက်သွန်နီအသစ်အကြီးတစ်ပိဿာလျှင် ၄၅၀၀ကျပ်၊ ကြက်သွန်နီအသစ် (အသေး) တစ်ပိဿာလျှင် ၄၀၀၀ကျပ်ဖြင့် ရောင်းချလျက်ရှိကြောင်းသိရပါသည်။ ဇန်နဝါရီလ တတိယပတ်တွင်လည်း ကြက်သွန်နီအသစ်အကြီးတစ်ပိဿာလျှင် ၄၅၀၀ကျပ်၊ ကြက်သွန်နီအသစ်အသေးတစ်ပိဿာလျှင် ၄၀၀၀ကျပ်ဖြင့် လက်လီဈေးနှုန်းပြောင်းလဲခြင်းမရှိကြောင်း၊  ကြက်သွန်နီလက်ကားဈေးနှုန်းအနေဖြင့် ပိဿာချိန် (၁၀) မှစတင်၍ အိတ်လုံးဈေး ကြက်သွန်နီအကြီးတစ်ပိဿာလျှင် ၃၂၀၀ကျပ်ဖြင့် ရောင်းချလျက်ရှိကြောင်းသိရှိရပါသည်။ ကြက်သွန်နီအသစ်များလည်း လှိုင်လှိုင်ထွက်ပေါ်လျက်ရှိပြီး ကြက်သွန်နီအဟောင်းများမှာ ဈေးကွက်အတွင်း ဝင်ရောက်မှုမရှိတော့ဘဲ ရာသီကုန်၍ တုံးသွားပြီဖြစ်ကြောင်းသိရှိရပါသည်။ ကြက်သွန်နီအသစ်များ ဈေးကွက်သို့ လှိုင်လှိုင်ဝင်ရောက်ခဲ့သော်လည်း ဈေးနှုန်းများကျဆင်းသွားခြင်းမရှိကြောင်းသိရှိရပါသည်။

     အာလူးဈေးကွက်အနေဖြင့် အာလူးတစ်ပိသာလျှင် ဇန်နဝါရီလ ဒုတိယပတ်တွင်  ၂၈၀၀ကျပ်မှ ၃၀၀၀ကျပ်ဈေးနှုန်းရှိခဲ့သော်လည်း ယခုဇန်နဝါရီလ တတိယပတ်အတွင်း၌မူ အာလူးတစ်ပိဿာလျှင် ၃၅၀၀ကျပ်ဖြင့် အရောင်းအဝယ်ရှိနေသဖြင့် ဈေးနှုန်းအနည်းငယ်မြင့်တက်လျက်ရှိကြောင်းသိရှိရပါသည်။

DOCA(ပဲခူး)

   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ် နတ်အင်းကျေးရွာ၊ တောက္ကရှပ်ကျေးရွာ၊ မြေထူးကျေးရွာနှင့် အင်ကြင်းစုကျေးရွာများတွင် “ဗမာခရမ်းချဉ်သီး”နှင့် “ထိုင်ဝမ်ခရမ်းချဉ်သီး”မျိုးများကို မိသာစုတစ်နိုင်တစ်ပိုင် စိုက်ပျိုးလျက်ရှိရာ ယခုအခါ ဈေးကွက်အတွင်း ရောင်းချနေရသောကြောင့် မိသာစုအဆင်ပြေလျက်ရှိကြောင်း ခရမ်းချဉ်သီးစိုက် တောင်သူတစ်ဦးက ပြောသည်။

       အဆိုပါကျေးရွာများတွင် ခရမ်းချဉ်သီးများကို တော်သလင်းလမှစ၍ စိုက်ပျိုးခဲ့ရာ အပင်များ အောင်မြင်ဖြစ်ထွန်းသည့်အပြင် အထွက်နှုန်းကောင်းကာ ဈေးကောင်းရနေကြောင်း၊ လက်ရှိရောင်း ချနေရသည့် ဈေးနှုန်းများမှာ “ဗမာခရမ်းချဉ်သီး”အကြီးတစ်ပိဿာလျှင် ငွေကျပ် ၁၆၀၀၊ အသေး တစ်ပိဿာလျှင် ငွေကျပ် ၁၅၀၀ နှုန်းနှင့် “ထိုင်ဝမ်ခရမ်းချဉ်သီး” တစ်ပိဿာလျှင် ငွေကျပ် ၁၃၀၀ မှ ၁၄၀၀ နှုန်း ဖောက်သည်များထံ ရောင်းချရသဖြင့် အပိုဝင်ငွေများရရှိပြီး အဆင်ပြေနေကြကြောင်း သိရသည်။

     ကန့်ဘလူမြို့မဈေးရှိ ခရမ်းချဉ်သီးလက်လီ၊လက်ကား ပြန်လည်ရောင်းချသူများသည် စားသုံးသူများထံသို့ “ဗမာခရမ်းချဉ်သီး”တစ်ပိဿာလျှင် ငွေကျပ် ၁၇၀၀ မှ ၁၈၀၀ ကျပ်နှင့် “ထိုင်ဝမ်ခရမ်းချဉ်သီး” တစ်ပိဿာလျှင် ငွေကျပ် ၁၅၀၀ မှ ၁၆၀၀ ကျပ်ဖြင့် ပြန်လည်ရောင်းချရသော ကြောင့် စိုက်ပျိုးထုတ်လုပ်သူ ရောင်းချသူအားလုံး ဝင်ငွေရရှိကာ အဆင်ပြေလျက်ရှိကြောင်း သိရသည်။

DOCA(စစ်ကိုင်း)

    စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနအနေဖြင့်  စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးတိုးတက်ရေးလုပ်ငန်းများကိုပါ ဆောင်ရွက်လျက်ရှိရာ စစ်ကိုင်းတိုင်းဒေသကြီး ၊ ကန့်ဘလူခရိုင် ၊ ကန့်ဘလူမြို့၊ အမှတ်(၂)ရပ်ကွက်တွင် ၊ မိသားစု စားဝတ်နေရေး အပိုဝင်ငွေရရှိရန်အတွက် ကိုက်လန်ပင်ကို တစ်နိုင်တစ်ပိုင် စိုက်ပျိုးလာကြသည်။

   ကိုက်လန်ပင်ကို မျိုးစေ့ပျိုးရန် မျိုးစေ့ကို အရင်ပျိုးထားပြီး ပျိုးပင်သက်(၁)လအကြာတွင် စတင်စိုက်ပျိုးနိုင်ပါသည်။ ကိုက်လန်ပင်ကို စက်တင်ဘာလတွင်စတင် စိုက်ပျိုးကာ နိုဝင်ဘာလ၌ စတင်ခူးဆွတ်ရောင်းချရပါသည်။ ယခုစိုက်ပျိုးထားသော ကိုက်လန်ပင်၏ အပင်အရေ အတွက်အားဖြင့် (၅၀၀၀)ခန့်ရှိပြီး တစ်ကျင်းလျှင် တစ်ပင်ခန့် စိုက်ပျိုးထားခြင်ဖြစ်ပါသည်။  ကိုက်လန်ပင်များ ကို (၅)ရက်လျှင်တစ်ကြိမ် ရေပေးရပါသည်။ ထွန်ယက်မြေပြုပြင်ခြင်း၊ စိုက်ပျိုးခြင်း၊ ရေပေးခြင်း၊ ပေါင်းမြက်ရှင်းခြင်း၊ သွင်းအားစုထည့်ခြင်းအတွက် စုစုပေါင်းကုန်ကျစရိတ်မှာ(၂)သိန်းခန့် ကုန်ကျနိူင်ပြီး ကိုက်လန်ဖူးများကို ခေါင်ညွှန့်စခူးတဲ့အချိန်တွင် တစ်ရက်ကို (၅၀)စည်းခန့်သာ ဆွတ်ခူးရကာ နောက်အတက်ပေါက်များ ခူးဆွတ်ချိန်တွင် တစ်ရက်ကိုအစည်း(၃၀၀)ခန့် ခူးဆွတ်၍  တစ်စည်းကို ပေါ်ဦးပေါ်ဖျားတွင် ကျပ်(၃၀၀)ဈေးရောင်းရပြီး ယခုဇန်နဝါရီလ လှိုင်လှိုင်ပေါချိန်တွင် ကိုက်လန်တစ်စည်းကိုကျပ်(၂၀၀)ဖြင့် နေ့စဉ်ခူးဆွတ်ရောင်းချရပါသည်။

    ကိုက်လန်ပင်သည် အနည်းဆုံးခူးဆွတ်ရသည့်ကာလမှာ (၂)လကျော် ကြာမြင့်သဖြင့် တွက်ချေကိုက်သော စားဖိုဆောင်သီးနှံပင်ဖြစ်သည့်အတွက် စိုက်ပျိုးနိုင်ပြီး နေ့စဉ်ခူးဆွတ် ရောင်းချရသော အပင်ဖြစ်၍ စိုက်ပျိုးသင့်သော အပင်ဖြစ်ကြောင်းနှင့် ကန့်ဘလူမြို့ ၊ အမှတ်(၂)ရပ်ကွက်အတွင်း  ကိုက်လန်ပင်ကို မြေအောက်ရေတင်စနစ်ဖြင့် စိုက်ပျိုးလာကြကြောင်း သိရှိရပါသည်။

DOCA(စစ်ကိုင်း)