ပြည်တွင်းကုန်သွယ်မှုသတင်း

          ကသာမြို့တွင် အောက်တိုဘာလမှစ၍ ဆောင်းပုရစ်များ စတင်ပေါ်ပေါက်လာပြီဖြစ်သည့် အတွက် ကသာမြို့၊ ဧရာဝတီမြစ်ကမ်းဘေးမှ မြေနုကျွန်းများရှိသော မိုးတားကြီးကျေးရွာနှင့် အနီး ပတ်ဝန်းကျင်ကျေးရွာများမှ ကျေးရွာနေပြည်သူများအနေဖြင့် ဆောင်းပုရစ်များအား ကသာမြို့ရှိ ဒေါ်ဇာဇာ ပုရစ်အဝယ်ဒိုင်ထံသို့ အများအပြား လာရောက်ရောင်းချလျက်ရှိပြီး ဈေးများတွင်လည်း ခင်းကျင်းရောင်းချနေကြသည်ကို တွေ့ရပါသည်။

          “ဆောင်းပုရစ်တွေကနှစ်စဉ် အောက်တိုဘာလ၊ နိုဝင်ဘာလဆိုပေါ်ပါတယ်။ ဒီနေ့ပုရစ်အဝယ် ဒိုင်ကို အကောင်ရေ (၇၀၀၀) လာသွင်းတာပါ။ ဒီမှာက ပုရစ်အကောင်ရေနှင့်ရောင်းပါတယ်။ ရွာဈေး အထီး/အမရောရာ အကောင်ကြီးတစ်ရာ (၇၀၀၀) ကျပ်ရှိပါတယ်။ ကသာပုရစ်အဝယ်ဒိုင်က အကောင်တစ်ရာ (၈၀၀၀) ကျပ်နှင့်သိမ်းပါတယ်။ ဈေးကြီးတွေမှာတော့ ဥပါတဲ့ အမသီးသန့် အကောင်တစ်ရာ (၁၂၀၀၀) ကျပ်နှင့် အထီး/အမရောရာ အကောင်တစ်ရာ (၉၀၀၀) ကျပ်ရောင်း ပါတယ်။ ဒီနေ့ ပုရစ်အကောင် (၇၀၀၀)ကို ၈၀၀၀ကျပ်ဈေးနှင့် ရောင်းရလို့ (၅၆၀၀၀၀) ကျပ်ရပါ တယ်။ ဆောင်းပုရစ်ကို ပလတ်စတစ်မိုးကာဖြင့် မီးထောင်ဖမ်းဆီးကြပါတယ်။ ဒီလိုအချိန်မှာ ကျေးလက်နေ ပြည်သူတွေအနေနဲ့ ပုရစ်ဖမ်းပြီး ကသာပုရစ်အဝယ်ဒိုင်ကို အများအပြားရောင်းချ ကြပါတယ်။ ပုရစ်ပေါ်စဈေးကောင်းလို့ ဝင်ငွေများပိုမိုရရှိပါတယ်”လို့ မိုးတားကြီးကျေးရွာမှ ပုရစ်လာ ရောက် ရောင်းချသူ ဦးသန်းကျော်မှ ဖြေကြားခဲ့ပါသည်။

          ကသာမြို့နယ်ရှိ ကျေးရွာနယ်စုံမှ ဆောင်းပုရစ်များ နေ့စဉ်ဝင်ရောင်လျက်ရှိပြီး ဒိုင်များမှ ပုရစ်ပေါ်စအချိန်ဖြစ်သည့်အတွက် အကောင်တစ်ရာ (၈၀၀၀) ကျပ် ပေးကြောင်းသိသည်။ ၂၀၂၃-ခုနှစ် အောက်တိုဘာလ (၁၆)ရက်မှစပြီး အဝယ်ဒိုင်သို့ အကောင်ရေ ငါးသောင်းကျော်ခန့် ဝင်ရောက် ပြီး အောက်တိုဘာလ (၁၇)ရက်နေ့ နေ့လယ်ပိုင်းထိ အကောင်ရေ ရှစ်သောင်းကျော်ခန့် ဝင်ရောက် လျက်ရှိကြောင်းနှင့် ပုရစ်မှာ ကြာရှည် အထားမခံသောကြောင့် ရေနှင့်ပြုတ် ရေခဲရိုက်၍ သော်လည်းကောင်း၊ သန့်စင်ပြီးသား ပုရစ်များအား အကြွပ်ကြော်ကာ ပလတ်စတစ်အိတ်/ဘူးများဖြင့် ထုပ်ပိုး၍ သော်လည်းကောင်း မြို့နယ်တွင်းနှင့် ရန်ကုန်၊ နေပြည်တော် ၊ မန္တလေး၊ ရွှေဘို၊ မုံရွာ၊ စသည့် ဒေသများသို့ တင်ပို့ ရောင်းချကြကြောင်း ပုရစ်အဝယ်ဒိုင်ထံမှ သိရပါသည်။

DOCA(စစ်ကိုင်း)

 ၂၃.၁၀.၂၀၂၃ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန်ဈေးနှုန်းများအား ယခင်နှစ်၊ ယခင်လ၊ ယနေ့ကာလတူနှိုင်းယှဉ်ချက်အား အောက်ပါ .pdf file တွင် ဝင်ရောက်ကြည့်ရှုနိုင်ပါသည် -

    ၂၃.၁၀.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

  ဖြူးမြို့၊ စည်ပင်သာယာဈေးအတွင်း ဟင်းသီးဟင်ရွက်ဆိုင်များ၌ ၂၀၂၃ခုနှစ်၊ အောက်တိုဘာလ တတိယအပတ်တွင် ခရမ်းချဉ်သီးတစ်ပိဿာလျှင် (၂၀၀၀-၄၀၀၀) ကျပ်အထိ၊ မုန်ညှင်းထုပ်တစ်ပိဿာလျှင် ၃၅၀၀ကျပ်၊ ဂေါ်ဖီတစ်ပိဿာလျှင် ၁၀၀၀ကျပ်ဖြင့် ဈေးနှုန်းတည်ငြိမ်နေပါသည်။

      မုံလာဥနီမှာ ယခင်အပတ်တွင် တစ်ပိဿာလျှင် ၃၀၀၀ကျပ်မှ ယခုအပတ်တွင် ၄၀၀၀ကျပ်၊ ယခင်အပတ်တွင် ဘူးသီးတစ်လုံးလျှင် ၂၀၀၀ကျပ်မှ ယခုအပတ်တွင် ၃၀၀၀ကျပ်၊ ငရုတ်သီးစိမ်း (ကုလားအော်သီး)မှာ ယခင်အပတ်တွင် တစ်ပိဿာလျှင် ၆၀၀၀ကျပ်မှ ယခုအပတ်တွင် ၈၀၀၀ကျပ်အထိ၊ ငရုပ်သီးစိမ်း(မိုးမျှော်သီး)မှာ ယခင်အပတ်တွင် တစ်ပိဿာလျှင် ၂၀၀၀ကျပ်မှ ယခုအပတ်တွင် ၅၀၀၀ကျပ်ဖြစ်၍ ဈေးတက်နေပါသည်။

      သခွားသီးမှာ ယခင်အပတ်တွင် တစ်ပိဿာလျှင် ၂၀၀၀ကျပ်ရှိခဲ့ရာမှ ယခုအပတ်တွင် ၁၀၀၀ကျပ်၊ ပန်းဂေါ်ဖီမှာ ယခင်အပတ်တွင် တစ်ပွင့်လျှင် ၂၀၀၀ကျပ်ရှိခဲံရာမှ ယခုအပတ်တွင် ၁၀၀၀ကျပ်၊ ဂေါ်ရခါးသီးမှာ ယခင်အပတ်တွင် တစ်လုံးလျှင် ၂၅၀ကျပ်ရှိခဲ့ရာမှ ယခုအပတ်တွင် သုံးလုံးလျှင် ၅၀၀ကျပ်ဖြင့် ဈေးနှုန်းကျဆင်းပြီး မျှစ်မှာ တစ်ပိဿာလျှင် ၂၅၀၀ကျပ်ရှိကြောင်းသိရပါသည်။

DOCA(ပဲခူး)

   မြန်မာတို့၏ နံနက်ခင်းထမင်းကြမ်းဝိုင်းတွင် ပဲပြုတ်သည် မပါမဖြစ်သည့် ဟင်းအမည်တစ်မျိုးဖြစ်သည်။ ပဲပြုတ်ပူပူလေးဆိုသည့်အသံကို နံနက်တိုင်း၊ ရပ်ကွက်တိုင်း၊ လမ်းတိုင်းတွင် ကြားနေရပါသည်။ ပဲပြုတ်ကို ထမင်းပူပူနှင့်ဖြစ်စေ၊ ထမင်းကြော်၊ ပလာတာ၊ အီကြာကွေးတို့နှင့်ဖြစ်စေ စားသုံးလေ့ရှိပါသည်။ ပဲပြုတ်ကို အလွယ်တကူဝယ်ယူနိုင်သော်လည်း အရသကောင်းမွန်သည့်ပဲပြုတ်ကိုမူ လွယ်လွယ်ကူကူနှင့်မရပါ။ နှစ်ရက်ခန့် အချိန်ပေးရပါသည်။

   ပဲပြုတ်ကို စားတော်ပဲဖြင့်ပြုလုပ်ပါသည်။ စားတော်ပဲကို ရေထဲသို့လက်နှစ်ကြည့်လျှင် လက်အပူခံနိုင်သည့် ရေနွေးနွေဖြင့် ၃နာရီအကြာစိမ်ရပါမည်။ ထို့နောက် စကာဖြင့်ရေစစ်ပြီး နံနက်တစ်ကြိမ်၊ ညတစ်ကြိမ် ရေလောင်းပေးရပါသည်။ နောက်တစ်နေ့ရောက်လျှင် ပဲအညှောင့်ပေါက်လာမှသာ ပြုတ်ကြပါသည်။ ပြုတ်သည့်အခါတွင် ပဲနှင့်ရေကို အတိဖြစ်အောင်ထည့်ရပါသည်။ ရေခမ်းသွားလျှင် ထမင်းအိုးနှပ်သည့်အတိုင်း မီးအေးအေးဖြင့် ရေခမ်းအငွေ့ထွက်အောင် ထားရပါသည်။ တချို့က ရေခမ်းလာလျှင် စကာနှင့်စစ်ပြီး ရေနွေးငွေ့ဖြင့်ပေါင်းသဖြင့် ပဲပေါင်းဟု ခေါ်ကြသူများလည်းရှိပါသည်။

      စားတော်ပဲကို ယခင်တွင် ပိဿာ ၃၀ဝင် တစ်အိတ်လျှင် ၁၈၀၀၀၀ကျပ်ဖြင့် ဝယ်ယူရစဉ်က ပဲပြုတ်တစ်ဆယ်ကျပ်သားလျှင် ၅၀၀ကျပ်ဖြင့်ရောင်းချခဲ့ပြီး ယခုအခါတွင် စားတော်ပဲ ပိဿာ ၃၀ဝင် တစ်အိတ်လျှင် ၂၀၀၀၀၀ကျပ်ပေးရသဖြင့် ပဲပြုတ် ၁၀ကျပ်သားလျှင် ၆၀၀ကျပ်ဖြင့် ရောင်းချကြကြောင်းသိရပါသည်။

DOCA(ပဲခူး)