ပြည်တွင်းကုန်သွယ်မှုသတင်း

               ယခုအပတ် ပြည်မြို့ရှိ မန်ကျည်းမှည့်ပွဲရုံများသို့ ပြည်ခရိုင်အတွင်းရှိ မြို့နယ်များဖြစ်သော ပေါက်ခေါင်း၊ ပေါင်းတလည်၊ ရွှေတောင်၊ ပန်းတောင်းနှင့် ပြည်မြို့အနီး ကျေးရွာများမှ မန်ကျည်းမှည့်များ ဝင်ရောက်မှု့ရှိနေတာတွေ့ရပါသည်။ ပေါ်စတွင် မန်ကျည်းမှည့် အစေ့ပါ တစ်ပိဿာလျှင် ပွဲရုံကောက်ဈေးမှာ ၃၅၀၀ကျပ်ဖြစ်ပြီး ပြည်ဈေးကြီး အတွင်းရှိဈေးကွက်များတွင် လက်ကားတစ်ပိဿာလျှင် ၄၀၀၀ကျပ်ဖြစ်ပြီး လက်လီတစ်ပိဿာလျှင် ၈၀၀၀ကျပ် ဈေးတို့ဖြင့် ရောင်းချကြောင်းသိရပါသည်။ အစေ့မပါ (အသား)ဈေးမှာ ပွဲရုံ(လက်ကား)ဈေး တစ်ပိဿာလျှင် ၁၀၀၀၀ကျပ်၊ လက်လီဈေးတစ်ပိဿာလျှင် ၁၃၀၀၀ကျပ် တို့ဖြင့် ရောင်းဝယ်လျက်ရှိပါသည်။ မန်ကျည်းမှည့်ဝင်ရောက်မှုမှာ နေ့စဉ်ပိဿာချိန် ၂၀၀ကျော်ဝင်ရောက်မှုရှိနေကြောင်း သိရှိရပါသည်။

DOCA(ပဲခူး)

          အရောင်အသွေးစုံလင်လှသော ဂန္ဓမာပန်းသည် မြင်သူတိုင်း ကြိုက်နှစ်သက်ကြပါသည်။ ဂန္ဓမာပန်းသည် ကမ္ဘာပေါ်တွင် တန်ဖိုးထားအမြတ်တနိုးသုံးစွဲပြီး စီးပွားဖြစ်စိုက်ပျိုးထုတ်လုပ်သော ပန်း ဖြစ်ပါသည်။ မြန်မာနိုင်ငံတွင် ဂန္ဓမာပန်းအား ဘုရားပန်းအဖြစ်လည်းကောင်း၊ အလှူမင်္ဂလာဆောင် အခမ်းအနားများတွင် အလှပန်းအိုးအဖြစ်လည်းကောင်း အသုံးပြုကြသောပန်းဖြစ်ပါသည်။ အရောင်အသွေးစုံလင်လှသော ဂန္ဓမာပန်းကိုစိုက်ပျိုးခြင်းသည် မြန်မာနိုင်ငံအတွင်း စီးပွားဖြစ် စိုက်ပျိုးရေးလုပ်ငန်းတစ်ခုဖြစ်ပါသည်။ ဂန္ဓမာပန်းတွင် မျိုးကွဲပေါင်းများစွာရှိပြီး ပန်းမျိုးများအား ပန်းပွင့်၏ပုံစံ၊ ပန်းပွင့်၏အရောင်၊ အပင်အရွယ်အစားပေါ်မူတည်၍အမျိုးမျိုးခေါ်ဝေါ်ကြပါသည်။ ဂန္ဓမာပန်းကို ကြွေဖြူ၊ ကြွေဝါ၊ ပုလဲဖြူမျိုးများကို ပြည်မြို့အတွင်းရှိ မှော်ဇာ၊ တောင်လုံးညိုရွာနှင့် ရွှေတောင်မြို့အနီးရှိ ကျေးရွာများတွင် အများဆုံးစိုက်ပျိုးကြပါသည်။ ထွက်ရှိလာသော ဂန္ဓမာပန်းများကို ဈေးကွက်အတွင်းရောင်းချလျက်ရှိရာ ဂန္ဓမာပန်း(၅)ပွင့် တစ်စည်းလျှင် ၂၅၀၀-၃၀၀၀ကျပ်နှုန်းဖြင့် ရောင်းချလျက်ရှိပြီး ဒေသတွင်းနှင့် အနီးအနားရှိ ရွှေတောင်မြို့နှင့် ရန်ကုန်မြို့ရှိ ဈေးကွက်များသို့တင်ပို့ရောင်းချလျက်ရှိကြောင်း သိရှိရပါသည်။

DOCA(ပဲခူး)

              ပြည်မြို့နယ်အတွင်း ငှက်ပျောပင်များအား တစ်နိုင်တစ်ပိုင်စိုက်ပျိုးလျက်ရှိရာ သစ်ချီတင်ရွာ၊ ရှမ်းစုရွာများတွင် အများအပြားစိုက်ပျိုးကြပါသည်။ ငှက်ပျောပင်အားစိုက်ပျိုးရာတွင် အချို့ရွာသား များသည် မိမိတို့ပိုင်ဆိုင်သည့် အိမ်ခြံများ၏ဘေးပတ်လည်၊ နောက်ဖေးဘက်စသည်များတွင် အပင် ၂၀မှ ၅၀အထိစိုက်ပျိုးထားကြောင်းသိရပါသည်။ စီးပွားဖြစ်စိုက်ပျိုးသော ဥယျာဉ်ခြံများတွင် တစ်ဧကလျှင် ငှက်ပျောပင်တစ်ပင်နှင့်တစ်ပင် အကွာအဝေးမှာ ၁၀ပေခြား စိုက်ပျိုးရပါသည်။ စိုက်ပျိုးသည့် ငှက်ပျောအမျိုးအစားများမှာ ဒေသအခေါ် ရခိုင်ငှက်ပျော၊ ဖီးကြမ်း ငှက်ပျောသီးများ ဖြစ်ကြပါသည်။ ငှက်ပျောပင်တစ်ပင် စတင်စိုက်ပျိုးပြီး(၆)လအကြာတွင် အသီးများ ရင့်မှည့်လာပြီး ခုတ်ယူရောင်းချ၍ရပါသည်။ ပြည်မြို့အနီးရှိ သစ်ချီတင်ရွာနှင့် ရှမ်းစုရွာများမှထွက်ရှိသော ငှက်ပျော များကို ပြည်မြို့နယ်အတွင်းရှိ မြို့မစည်ပင်သာယာဈေး၊ မြို့သစ်ဈေး၊ အောင်မင်္ဂလာဈေးတို့တွင် ရောင်းချကာ ပြည်မြို့မှ ရန်ကုန်၊ နေပြည်တော်စသည့်မြို့များသို့လည်း တင်ပို့ရောင်းချကြောင်း သိရှိပါသည်။

               ရခိုင်ငှက်ပျောသီးမှာ အသီးအမှည့်ကိုစားသုံးရုံသာမက မုန့်ဟင်းခါးချက်ပြုတ်ရာတွင် ငှက်ပျောအူအဖြစ် အသုံးပြုကြောင်းသိရှိရပါသည်။ ရခိုင်ငှက်ပျောဖူးကို ကောက်ညှင်းဆန်မှုန့်ဖြင့် ရောနှောအရသာထည့်သွင်းကာ ရှမ်းဟင်းထုတ်အမည်ဖြင့် အဆာပြေသရေစာအဖြစ် စားသုံးကြကြောင်း သိရှိရပါသည်။

DOCA(ပဲခူး)

စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးလုပ်ငန်းကို အဓိကလုပ်ကိုင်ကြပြီး မြေပဲလုံးဆံနှင့် မြေပဲအတောင့်များကို မြေပဲစိုက်ပျိုးရာ၌လည်းကောင်း ၊ ဆီစက်လုပ်ငန်းရှင်အချို့မှ မြေပဲဆီကြိတ်ကာ ကုန်ချောထုတ်လုပ်၍ ပြန်လည်ရောင်းချကြောင်း၊ မြေပဲလုံးဆံကို မြေပဲယို၊ မြေပဲဆားလှော်စသည်ဖြင့်လည်းကောင်း၊ အစားအသောက်များနှင့်တွဲဖက်စားသုံးခြင်းတို့ ပြုလုပ်ကြ ကြောင်း၊ ကန့်ဘလူခရိုင်တွင် အရောင်းအဝယ်ဖြစ်နေသည့် မြေပဲလုံးဆံများသည် ဒေသတွင်းမှလည်း ကောင်း၊ မန္တလေးမြို့နှင့်ရွှေဘိုမြို့တို့မှလည်းကောင်း ဝင်ရောက်ကြောင်း သိရသည်။

ကန့်ဘလူခရိုင်၌ ဖေဖေါ်ဝါရီလ ဒုတိယပတ်အတွင်း မြေပဲအတောင့်(၁)တင်းလျှင် ငွေကျပ် (၃၈၀၀၀)နှင့် မြေပဲလုံးဆံ(၁)တင်းလျှင် ငွေကျပ်(၁၃၆၀၀၀)ဖြင့် အရောင်းအဝယ်ဖြစ်ခဲ့ကြောင်း၊ ဖေဖေါ်ဝါရီလ တတိယပတ်အတွင်း မြေပဲအတောင့်(၁)တင်းလျှင်(၃၉၀၀၀)ကျပ်နှင့် မြေပဲလုံးဆံ(၁) တင်းလျှင်(၁၄၀၀၀၀)ကျပ်ဖြင့် အရောင်းအဝယ်လျက်ရှိသောကြောင့် မြေပဲအတောင့်(၁)တင်းလျှင် (၁၀၀၀)ကျပ်နှင့် မြေပဲလုံးဆံဈေးမှာ(၄၀၀၀)ကျပ် မြင့်တက်လာကြောင်း လုပ်ငန်းရှင်များထံမှ သိရသည်။

DOCA(စစ်ကိုင်း)

         ကန့်ဘလူခရိုင်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသ တစ်ခုဖြစ်ပြီး ဒေသတွင်းစားသုံးဆီဖူလုံစေရေးအတွက် ကန့်ဘလူမြို့နယ်အတွင်းရှိ ကျေးရွာများတွင် ဆီထွက်သီးနှံဖြစ်သည့် နှမ်းသီးနှံကိုလည်း စိုက်ပျိုးကြကြောင်း၊ ဈေးကွက်အနေဖြင့် ကန့်ဘလူခရိုင် မှထွက်ရှိသော နှမ်းများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်း သိရသည်။

ယခုအခါ နှမ်းဈေးနှုန်းများမှာ ၂၀၂၅ ခုနှစ်၊ ဖေဖေါ်ဝါရီလ ဒုတိယပတ်အတွင်း နှမ်းနက်(စမုံ) တစ်တင်းလျှင်(၂၁၃၀၀၀)ကျပ်၊ နှမ်းဖြူ(ဂျပန်)တစ်တင်းလျှင် (၁၁၀၀၀၀)ကျပ်ဖြင့် အရောင်းအဝယ် ဖြစ်ခဲ့ပြီး၊ ဖေဖေါ်ဝါရီလ တတိယပတ်အတွင်း နှမ်းနက်(စမုံ)တစ်တင်းလျှင် (၂၁၀၀၀၀)ကျပ်၊ နှမ်းဖြူ (ဂျပန်)တစ်တင်းလျှင် (၁၁၃၀၀၀)ကျပ်ဖြင့် အရောင်းအဝယ်ဖြစ်နေသောကြောင့် ယခုပတ်အတွင်း နှမ်းနက်(စမုံ)တစ်တင်းလျှင် (၃၀၀၀)ကျပ်ကျဆင်း၍၊ နှမ်းဖြူ(ဂျပန်)တစ်တင်းလျှင် (၃၀၀၀)ကျပ် မြင့်တက်လာကြောင်း သီးနှံရောင်းဝယ်ရေး လုပ်ငန်းရှင်ထံမှ သတင်းရရှိသည်။

DOCA(စစ်ကိုင်း)