ပြည်တွင်းကုန်သွယ်မှုသတင်း

     မန္တလေးတိုင်းဒေသကြီး ၊ ကျောက်ဆည်ခရိုင်တွင် သီးနှံမျိုးစုံအောင်မြင်ဖြစ်ထွန်းလျက်ရှိပြီး စားဖိုဆောင်သီးနှံတစ်မျိုးဖြစ်သည့် ကြက်သွန်သီးနှံကို မြစ်သားမြို့နယ်တွင် အများဆုံးစိုက်ပျိုးလျက် ရှိပါသည်။ ကြက်သွန်သီးနှံစိုက်ပျိုးရန်အတွက် မျိုးစေ့ကို တောင်သူများမှ မျိုးစေ့ထုတ်ကြက်သွန်များကို သီးသန့်စိုက်ပျိုးကြပါသည်။ ကြက်သွန်မျိုးစေ့ထုတ်(၁)ဧက စိုက်ပျိုးရန်အတွက် မျိုးကောင်းမျိုးသန့် ဥချောမျိုးပိဿာ(၆၀၀)ခန့်စိုက်ပျိုးရကြောင်း၊ ယခင်နှစ် မျိုးစိုက်ပျိုးချိန်တွင်(၁)ပိဿာလျှင် (၂၀၀၀) ကျပ် စျေးနှုန်းသာရှိကြောင်း ၊ ယခုနှစ်တွင် မျိုးဥ(၁)ပိဿာလျှင်(၄၀၀၀)ကျပ် စျေးနှုန်းအထိ ဝယ်ယူစိုက်ပျိုးရကြောင်း၊ကြက်သွန်မျိုး စိုက်ပျိုးမှုအနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း (၁၅၀၀၀၀၀-၂၀၀၀၀၀၀)ကျပ် ကုန်ကျကြောင်း၊ စိုက်ပျိုးပြီး(၄)လကြာလျှင် မျိုးစေ့များ အောင်မြင်ဖြစ်ထွန်းပြီဖြစ်ကြောင်း ၊ ယခုနှစ် ကြက်သွန်မျိုးစေ့များကို ဧပြီလ သင်္ကြန်မတိုင်မီ ရိတ်သိမ်းရမှာဖြစ်ကြောင်း၊မျိုးစျေးနှုန်းအနေဖြင့် ယခင်နှစ်ပေါ်ချိန်တွင် (၁)ပြည်လျှင် (၁၁၀၀၀၀)ကျပ် စျေးနှုန်းများဖြင့် ရောင်းဝယ်ခဲ့ပြီး ယခုနှစ် ကြက်သွန်စိုက်ပျိုးချိန်တွင် မျိုးစေ့ (၁)ပြည်လျှင် (၁၅၀၀၀၀)ကျပ်ဖြင့် ဝယ်ယူပျိုးထောင်စိုက်ပျိုးရကြောင်း၊(၁)ဧက အထွက်နှုန်း အနေဖြင့် မျိုးစေ့(၇-၈)တင်းအထိ ထွက်ရှိကြောင်း၊ ထွက်ရှိလာသော မျိုးစေ့များကို မိမိဒေသရှိ တောင်သူများမှ လာရောက်ဝယ်ယူသူများရှိသလို ပွဲစားများမှလည်း လာရောက်ဝယ်ယူ၍ ပြန်လည်ရောင်းချကြကြောင်း ၊ မျိုးစေ့ဝယ်ယူမှုတွင် မျိုးစေ့ထုတ် တောင်သူအပေါ် ယုံကြည်ချက်ဖြင့် ဝယ်ယူစိုက်ပျိုးကြကြောင်း၊ မျိုးစေ့ထုတ်စိုက်ပျိုးသူနည်းပါသဖြင့် ယုံကြည်မှုဖြင့် အများဆုံးဝယ်ယူစိုက်ပျိုးကြကြောင်း ကြက်သွန်နီမျိုးစေ့စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

     မန္တလေးတိုင်းဒေသကြီး ၊ ကျောက်ဆည်ခရိုင်အတွင်းတွင် ပဲမျိုးစုံသီးနှံများအား ရာသီအလိုက် စိုက်ပျိုးလျက်ရှိရာ ထောပတ်သီးနှံအား မြစ်သားမြို့နယ်တွင် ထောပတ်ပဲစိုက်ဧက(၁၆၀)ဧက စိုက်ပျိုးထားရှိပြီး ကျီတိုင်၊ သရက်ပင် နှင့် ကံဆွယ်ကျေးရွာများတွင် အများဆုံးစိုက်ပျိုးကြပါသည်။ ထောပတ်ပဲတွင် ပင်ထောင်ပဲနှင့် ပင်ပြန့်ပဲဟူ၍(၂)မျိုးရှိပြီး ပင်ထောင်ပဲ အစေ့ကကြီးပြီး ပင်ပြန့်ပဲကအစေ့သေးကြောင်း ၊ မြို့နယ်အတွင်း အများဆုံးစိုက်ပျိုးသောမျိုးမှာ ပင်ပြန့်ပဲဖြစ်ကြောင်း၊(၁)ဧကစိုက်ပျိုးမှုအနေဖြင့် မျိုး(၁၀)ပြည်ကုန်ကျကြောင်း၊ ထောပတ်ပဲစိုက်ပျိုးမှု (၁)ဧကကုန်ကျစရိတ်အနေဖြင့် မျိုး၊သွင်းအားစု၊လုပ်သားခအပါအဝင် စုစုပေါင်း(၁၃၀၀၀၀)ကျပ်ခန့် ကုန်ကျကြောင်း၊ အောက်တိုဘာလကုန်ပိုင်းတွင် စိုက်ပျိုးပြီး ယခုဇန်နဝါရီလဆန်းတွင် စတင်ထွက်ရှိနေပြီဖြစ်ကြောင်း၊ ထောပတ်ပဲသက်တမ်းမှာ စိုက်ပျိုးပြီး (၂)လကျော်တွင် စတင်ခူးဆွတ်နိုင်ပြီဖြစ်ကြောင်း၊ (၁)ဧကအထွက်နှုန်းအနေဖြင့် (၅-၆)တင်းခန့်ထွက်ရှိကြောင်း ၊ ယခင်နှစ်တွင် ထောပတ်ပဲ စျေးနှုန်းအနေဖြင့် (၁)တင်းလျှင် (၆၆၀၀၀)ကျပ်စျေးနှုန်းများရှိပြီး ယခုလက်ရှိထောပတ်ပဲ (၁)တင်းလျှင် (၁၅၀၀၀၀)ကျပ် စျေးနှုန်းများဖြင့် ရောင်းဝယ်လျက်ရှိပါသည် ။ စိုက်ပျိုးစရိတ်သက်သာပြီး အကျိုးအမြတ်များရရှိသော ထောပတ်ပဲသီးနှံကို တိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

   စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင် ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများ၏ အရောင်းအဝယ်ဖြစ်မှုတင်း/တန်စာရင်းတို့ကို အပတ်စဉ်၊ လစဉ်တင်ပြလျက်ရာ ဇန်နဝါရီလ၊ တတိယပတ်အတွင်း အရောင်းအဝယ်ဖြစ်သည့် သီးနှံနှင့် ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းခဲ့ရာ ဇန်နဝါရီလ၊ ဒုတိယပတ်မှစတင်၍ ရွှေဘိုဈေးကွက်သို့ ပဲစင်းငုံ(နီ၊ ဖြူ)များ စတင်ဝင်ရောက်ခဲ့သော်လည်း တတိယပတ်တွင် ပဲစင်းငုံ(နီ)တစ်မျိုးတည်းသာ ဝင်ရောက်ခဲ့ကြောင်း၊ ယခုဇန်နဝါရီလ တတိအပတ်တွင် အရောင်းအဝယ်ဖြစ်သည့် ဈေးနှုန်းမှာ ပဲစင်းငုံ(နီ)တစ်တင်းလျှင် (၁၁၂၀၀ဝိ/-)ကျပ် ပေါက်ဈေးရှိပြီး တစ်ပတ်အတွင်း အရောင်းအဝယ်ဖြစ်မှုမှာ(၁၃၅၀၀)တင်း/(၄၄၁)တန်ဖြစ်ကြောင်း၊ ယခင်ဇန်နဝါရီ ဒုတိယအပတ်နှင့် ယခုတတိအပတ်တို့၏ အရောင်းအဝယ်ဖြစ်သည့်ဈေးနှုန်းတို့ကို နှိုင်းယှဉ်ပါက ယခင်အပတ်၌ ပဲစင်းငုံ(နီ)တစ်တင်းလျှင် (၁၁၀၀၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် ပဲစင်းငုံ(နီ)တစ်တင်းလျှင် (၂၀၀ဝိ/-)ဈေးပိုရရှိခဲ့ကြောင်းနှင့် ဝင်ရောက်သမျှ အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(စစ်ကိုင်း)

   ဧရာဝတီတိုင်းဒေသကြီးအတွင်း (၁၂.၆.၂၀၂၃) ရက်နေ့နှင့် (၂၁.၁.၂၀၂၄) ရက်နေ့တွင် ဖြစ်ပေါ်ခဲ့သော ကုန်ဈေးနှုန်း ပြောင်းလဲမှု အခြေအနေများမှာ ပေါ်ဆန်းဆန်၊ ဧည့်မထဆန်ဈေးနှုန်းတို့မှာ (၁၂.၆.၂၀၂၃) ဈေးနှုန်းနှင့် နှိုင်းယှဉ်ပါက ပေါ်ဆန်းဆန် (၃၀၀၀၀/-၊ ၃၅၀၀၀/-) ကျပ်၊ ဧည့်မထဆန် (၁၄၀၀၀/-) ကျပ်၊ မြင့်တက်နေကြောင်း တွေ့ရှိရပြီး ဓါတ်ဆီ၊ ဒီဇယ်ဆီ ၊ ဈေးနှုန်းများမှာ (၁၂.၆.၂၀၂၃) ဈေးနှုန်းနှင့် နှိုင်းယှဉ်လျှင်ပါက ဓါတ်ဆီဈေးနှုန်းမှာ တစ်ဂါလန်လျှင် (၂၁၈၂/) ကျပ်၊ ဒီဇယ်ဈေးနှုန်းမှာ (၁၈၈၉/) ကျပ် မြင့်တက်နေကြောင်း တွေ့ရှိရပါသည်။ ရည်ညွှန်းဈေးပေါ်မူတည်ပြီး အတက်၊ အကျဖြစ်ပေါ်နေသည်ဟု သုံးသပ်ရပါ သည်။

   စားအုန်းဆီ ဈေးနှုန်းမှာလည်း (၁၂.၆.၂၀၂၃) ဈေးနှုန်းနှင့် နှိုင်းယှဉ်ပါက (၅၂၀/) ကျပ် လျော့ နည်းကြောင်းတွေ့ရှိရပါသည်။ (ရည်ညွှန်ဈေး+သယ်ယူစရိတ် +၂%) ရောင်းချနေခြင်းကြောင့် ဖြစ်ပြီး ရွှေ ဈေးနှုန်းအနေဖြင့် (၁၂.၆.၂၀၂၃) ရက်နေ့နှင့်နှိုင်းယှဉ်ပါက ၁၆ ပဲရည် (၇၇၀၀၀၀/) ကျပ် ၁၅ ပဲရည် (၇၃၀၀၀၀/) ကျပ် ဈေးနှုန်းများ မြင့်တက်နေကြောင်းတွေ့ရှိရပြီး ကမ္ဘာ့ရွှေဈေးနှုန်းအပေါ် ရန်ကုန်မြို့ရှိ ရွှေလက်ကားရောင်းဝယ်သည့် အောင်သမာဓိ၊ ဇွဲထက်၊ ဝိန့်စိန် ရွှေဆိုင်များ၏ ဈေးနှုန်းများအတိုင်း ရောင်းချလျက်ရှိကြောင်း တွေ့ရှိရပါသည်။

    ထိုပြင့် စားဖို‌ဆောင်သီးနှံများဖြစ်သည့် ကြက်သွန်နီ၊ ကြက်သွန်ဖြူ (ကြူကုတ်)၊ (ရှမ်းဖြူ)၊ အာလူး ဈေးနှုန်းမှ (၁၂.၆.၂၀၂၃) ရက်နေ့ ဈေးနှုန်းနှင့်နှိုင်းယှဉ်ပါက ဈေးနှုန်းများမြင့်တက်နေကြောင်း တွေ့ရှိရပါသည်။ အသားဈေးနှုန်းများမှာ စည်ပင်သာယာရေးအဖွဲ့၏ ထိန်းကြောင်းကြပ်မတ်မှုကြောင့် ဈေးနှုန်းများ အနည်းငယ်ကျဆင်းလျက်ရှိကြောင်း တွေ့ရှိရပါသည်။ ငါးကြင်း (၁) ပိဿာ လျှင် (၅၀၀၀/-၊ ၆၀၀၀/-) ကျပ် မြင့်တက်ရခြင်းမှာ ငါးကြင်းမှာ အခြားမွေးမြူရေးငါးများထက် ကြီးထွားနှုန်းနှေးကွေးခြင်းနှင့် သွင်းအားစုအစာဈေးနှုန်းများ မြင့်တက်လာခြင်းကြောင့်ဖြစ်သည်ဟု သတင်းရရှိပါသည်။

DOCA(ဧရာဝတီ)

    မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့၊ မြို့မစည်ပင်သာယာဈေးတွင် အိမ်ရှင်မများအတွက် ဟင်းလျာများထဲ၌ မရှိမဖြစ်အသုံးပြုသော ခရမ်းချဉ်သီးများဈေးနှုန်းများမှာ ၂၀၂၄ခုနှစ်၊ ဇန်နဝါရီလ (တတိယပတ်)တွင် ပြန်လည်ဈေးနှုန်းမြင့်တက်ကြောင်း မြို့မစည်ပင်သာယာဈေး၊ အမှတ်(၂) ဈေးနှင့် ပျံကျဈေးသည်များထံမှသိရှိရပါသည်။   ထိုင်ဝမ်ခရမ်းချဉ်သီးကို  ပခုက္ကူမြို့နယ်ရှိ ကျွန်းများဖြစ်သော ရွာသစ်ကုန်း၊ ကုက္ကိုလ်လှ၊ သင်္ဘောကုန်း၊ ကျွန်းဦး၊ ကျွန်းညို၊ ဆယ်ရွာ၊ နန်းတော်ရပ်အုပ်စုရှိကျေးရွာများ၊ မြစ်ခြေမြို့နယ်ရှိရွာများ၊ ကမ္မမြို့နယ်ရှိရွာများသာမက မန္တလေးတိုင်းဒေသကြီးအတွင်းရှိ ကျောက်ပန်းတောင်းမြို့နယ်အတွင်းရှိရွာများတွင် တိုင်ထောင်ခရမ်းချဉ်သီးကို တစ်ကွင်းတစ်စပ်ရေသွင်း၍ စိုက်ပျိုးကြသည်။ ထွက်ရှိလာသောခရမ်းချဉ်သီးများကို မြို့မစည်ပင်ဈေး၊ အမှတ်(၂)ဈေးနှင့် ပျံကျဈေးတို့ ၌ ဝင်ရောက်အရောင်းအဝယ်ဖြစ်နေကြောင်း ဈေးသည်များထံမှသိရှိရ ပါသည်။

    ပခုက္ကူမြို့မဈေး၊ အမှတ်(၂)ဈေးနှင့် ပျံကျဈေးတို့တွင် ဇန်နဝါရီလ(ပထမပတ်)တွင် ခရမ်းချဉ်သီးဈေးနှုန်းများမှာ အလုံးအကြီး/အသေးပေါ်မူတည်၍ တစ်ပိဿာလျှင် ကျပ်(၈၀၀-၉၀၀)၊ အလုံးသေးတစ်ပိဿာလျှင် ကျပ်(၆၀၀-၇၀၀)၊ ဒုတိယအပတ်တွင် တစ်ပိဿာလျှင် ကျပ်(၇၅၀-၈၀၀)၊ အလုံးသေးတစ်ပိဿာလျှင် ကျပ်(၆၅၀-၇၀၀)ဖြစ်ခဲ့ပြီး တတိယအပတ်တွင် တစ်ပိဿာလျှင် ကျပ်(၁၂၀၀-၁၃၀၀)၊ အလုံးသေးတစ်ပိဿာလျှင် ကျပ်(၁၀၀၀-၁၂၀၀)ဖြစ်၍ တစ်ပိဿာလျှင် ကျပ်(၃၀၀-၄၀၀)ထိ ဈေးနှုန်းများပြန်လည်မြင့်တက်နေကြောင်း မြို့မစည်ပင်သာယာဈေး၊ အမှတ်(၂)၊ ပျံကျဈေးသည်များထံမှသိရှိရပြီး နေ့စဉ် ကုန်ချိန် (၅၀၀၀မှ ၆၀၀၀)ထိဝင်ရောက်လျက်ရှိပါသည်။ ထိုသို့ဈေးနှုန်းမြင့်တက်ရခြင်းမှာ စက်သုံးဆီဈေးနှုန်းကြီးမြင့်မှုကြောင့် အပင်များရေသွင်းအားလျော့နည်းလာပြီး အသီးသီးနှုန်းများလျော့နည်းလာမှုကြောင့် ဈေးနှုန်းမြင့်တက်ရခြင်းဖြစ်ကြောင်း ခရမ်းချဉ်စိုက်တောင်သူများထံမှသိရှိရပါသည်။

DOCA(မကွေး)