ပြည်တွင်းကုန်သွယ်မှုသတင်း

           မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ ကုန်စိမ်းပွဲရုံများသို့ ရှမ်းမြေပဲထောင့်အစိုများ ဈေးကွက်အတွင်းသို့ ဖြိုင်ဖြိုင်ဝင်ရောက်လာပြီး အရောင်းအဝယ်ကောင်းနေကြောင်း သိရှိရပါသည်။ မြေပဲထောင့်အစိုများသည် ယခုအချိန်တွင် မြေပြန့်ဒေသများမှ  ထွက်ရှိမှုနည်းပါးပြီး  တောင်ပေါ်ဒေသများဖြစ်သည့် ပင်းတယ၊ အောင်ပန်း၊ ရေဦး၊ ရွာငံဒေသများမှ အဓိကအများဆုံး ဝင်ရောက်လာကြောင်း၊  မြေပဲစိုက်ပျိုးရာတွင် မြေပဲပင်များကို ကျင်းတူးကာ တစ်ကျင်းလျှင် နှစ်စေ့နှုန်းဖြင့် တစ်တောင်ခြားစိုက်ပျိုးကြကြောင်း၊ တစ်ပတ်အကြာတွင် အညှောင့်များ စတင်ထွက်ရှိပြီး သုံးလအကြာတွင် စတင်နှုတ်ယူ၍ရကြောင်း၊ သဲနှုန်းမြေပေါ်တွင် စိုက်ပျိုးပါက အထွက်နှုန်းတိုး ကြောင်း၊ မြေပဲများအား နှုတ်ယူပြီးပါက မြေပဲတောင့် အစိုများကို  ဈေးကွက်အတွင်းသို့ တင်ပို့ရောင်းချကြပါကြောင်း၊ ရောင်းချရာတွင် လက်ကားဈေးအနေဖြင့်  မြေပဲအစို (၁)ပြည်လျှင် (၂၀၀၀/-)ကျပ်၊ လက်လီဈေး(၁)ပြည်လျှင်(၂၅၀၀/-)ကျပ် များဖြင့် ရောင်းဝယ်ဖြစ်နေကြောင်း၊ ဈေးသည်များမှလည်း ရှမ်းမြေပဲများကိုဝယ်ယူ၍ အစိမ်းရောင်းချသလို ပြုတ်၍လည်း ရောင်းချလျက်ရှိကြောင်း၊ မြေပဲကို ပြုတ်ပြီးပြန်လည်ရောင်းချပါက အစို(၁)ပြည်လျှင်(၂၅၀၀/-)ကျပ်ဈေးဖြစ်ပြီး၊ ပြုတ်၍ရောင်းချပါက (၁)ဗူးလျှင်(၅၀၀/-)ကျပ်နှင့်  (၁)ပြည်လျှင်(၄၀၀၀/-)ကျပ်ရရှိသောကြောင့် ပိုမိုအကျိုးမြတ်ဖြစ်ထွန်းကြောင်း၊ မြေပဲစားသုံးခြင်းဖြင့် ပရိုတိန်းဓာတ်၊ မဂ္ဂနီစီယမ်ဓာတ်တို့ ပါဝင်ကြောင်း၊ သွေးလည်ပတ်မှုကို ကောင်းမွန်စေပြီး သွေးပေါင်ချိန်ကို ထိန်းညှိပေးကြောင်း အဆစ်ရောင်ရမ်းခြင်းနှင့် နှလုံးရောဂါဖြစ်နိုင်ခြေကို လျော့ချပေးကြောင်း လေ့လာသိရှိရပါသည်။ ကျန်းမာရေး အကျိုးကျေးဇူးရှိသော မြေပဲကို ဝယ်ယူစားသုံးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

           မန္တလေးတိုင်းဒေသကြီး၊ ကျောက်ဆည်မြို့နယ်အတွင်း၌ရှိသော တောင်သူများသည် စပါးနှင့် ဆီထွက်သီးနှံများကို အဓိကထားစိုက်ပျိုးကြသော်လည်း ဝယ်လိုအားရှိပြီး နေ့စဉ်ဝင်ငွေရရှိရေးအတွက်  သီးပင်စားပင်များကိုလည်း စိုက်ပျိုးရောင်းချလျက်ရှိရာ ကျောင်းကုန်း၊ ကလိုင်ကျော်နှင့် မြောင်းဘောင်ကျေးရွာတွင် စိုက်ပျိုးလျက်ရှိပြီး မိသားစုစားဝတ်နေရေး အဆင်ပြေလျက်ရှိကြောင်း သိရှိရပါသည်။ ပဲထောင့်ရှည်စိုက်ပျိုးမှုအနေဖြင့် တိုင်ထောင်ဝါး၊မျိုး၊ သွင်းအားစု၊ လုပ်သားခအပါအဝင် စုစုပေါင်း(၅၀၀၀၀၀/-)ကျပ်ခန့် ကုန်ကျကြောင်း၊ ပဲထောင့်ရှည်မျိုးအနေဖြင့် အစိမ်းရောင်မျိုး၊ ကတီပါရောင်ဟူ၍ နှစ်မျိုးရှိရာ အများဆုံးစိုက်ပျိုးသောမျိုးမှာ အစိမ်းရောင်မျိုးကိုသာ အဓိကထား စိုက်ပျိုးကြကြောင်း၊ တိုင်ထောင်ပဲသည် စိုက်ပျိုးပြီး တစ်လအတွင်း ထွက်ပေါ်သောကြောင့် ရာသီမရွေး၊ အချိန်မရွေးစိုက်ပျိုးကြကြောင်း၊ တစ်ဧကအထွက်နှုန်းအနေဖြင့် (၅၀၀)ပိဿာခန့် ထွက်ရှိကြောင်း၊ အကျိုးအမြတ်အနေဖြင့် စိုက်ပျိုးစရိတ်နှုတ်ပြီး (၇၅၀၀၀၀/-)ကျပ်ခန့် မြတ်ကြောင်း၊ ပဲထောင့်ရှည်များ လှိုင်လှိုင်ခူးဆွတ်နေရပြီး ရောင်းဈေးအနေဖြင့် ပွဲရုံသွင်းဈေး တစ်ပိဿာလျှင် (၂၅၀၀/-)ကျပ် သွင်းရပြီး၊ လက်လီရောင်းဈေးအနေဖြင့် တစ်ပိဿာလျှင် (၃၀၀၀/-) ကျပ်ဖြင့် ရောင်းချကြကြောင်း၊ နေ့စဉ်ခူးဆွတ်ပြီး ရောင်းချရသည့်အတွက် မိသားစုစားဝတ်နေရေး အဆင်ပြေလျက်ရှိကြောင်း ပဲထောင့်ရှည်စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

          မန္တလေးတိုင်းဒေသကြီး၊ ကျောက်ဆည်မြို့နယ်အတွင်းရှိတောင်သူများသည် စပါး၊ ပဲ၊ ပြောင်း၊ နှမ်း၊ ငရုတ်စသည့် သီးနှံမျိုးစုံအားစိုက်ပျိုးကြသည့်အပြင် ကြက်ဟင်းခါးသီးသီးနှံကိုလည်း မိသားစုတစ်ပိုင်တစ်နိုင်မှ စီးပွားဖြစ်အထိစိုက်ပျိုးလာကြပါသည်။ ကြက်ဟင်းခါးသီး သီးနှံသည် ခါးသည့်အရသာရှိသောကြောင့် သွေးလည်ပတ်မှုကောင်းမွန်စေခြင်း၊ မျက်စိနှင့် အာရုံကြောစနစ်ကိုကောင်းမွန်စေခြင်း၊ ကိုယ်ခံအားစနစ်ကိုလည်းကောင်းမွန်စေခြင်း၊ ဆီးချိုရောဂါဖြစ်ပွားမှုနှုန်းကိုလည်း ထိန်းချုပ်ပေးနိုင်ခြင်း၊ အမြင်အားရုံကိုလည်းကောင်းမွန်စေခြင်းနှင့် ကြက်ဟင်းခါးသီးအရည်သည်လည်းအနာနှင့် ယားယံမှုများကုသရာတွင်လည်း အလွန်အသုံးဝင်ပါကြောင်းသိရှိရပါသည်။ ကြက်ဟင်းခါးသီး သီးနှံကို ရာသီမရွေးစိုက်ပျိုးနိုင်ပြီး ဗိုလ်တစ်ထောင် မျိုးကိုအများဆုံးစိုက်ပျိုးကြပါသည်။ အများဆုံးစိုက်ပျိုးသော ကျေးရွာများမှာ ကျောင်းကုန်း၊ ကလိုင်ကျော်နှင့်မင်းစုကျေးရွာများတွင် စိုက်ပျိုးကြပါသည်။ စိုက်ပျိုးမည်ဆိုပါက မျိုးစေ့ကို ပျိုးထောင်ပြီး ရက်(၂၀)ခန့်အတွင်းတွင်စိုက်ပျိုးရပါကြောင်း၊ စိုက်ပျိုးပြီး(၃)လခန့်အကြာတွင် အသီးများစတင်ခူးဆွတ်နိုင်ပါကြောင်း၊ စတင်ခူးဆွတ်သည်မှ တစ်ပတ်နှင့်တစ်ပတ်အထွက်နှုန်းများပိုမိုလာကြောင်း၊ (၁)ဧကအထွက်နှုန်းအနေဖြင့် စတင်ခူးဆွတ်ချိန်တွင် ပိဿာ(၂၀၀-၃၀၀) ခန့်ထွက်ရှိပြီး အများဆုံးထွက်ရှိသောအချိန်တွင် ပိဿာ(၄၅၀-၅၀၀)ခန့်အထိထွက်ရှိကြောင်း၊ (၁)ဧကကုန်ကျစရိတ်အနေဖြင့် ပျိုးထောင်ခြင်း၊ မြေပြင်ခြင်း၊ သွင်းအားစု၊ လုပ်သားခ အပါအဝင် စုစုပေါင်း (၇၀၀၀၀၀/-)ကျပ်ကျော်ခန့်ကုန်ကြကြောင်း၊ ကြက်ဟင်းခါးသီးစျေးနှုန်းအနေဖြင့် လက်လီစျေးအနေဖြင့် (၁)ပိဿာလျှင်(၃၀၀၀/-)ကျပ်၊ လက်ကားစျေးအနေဖြင့်(၁)ပိဿာလျှင် (၂၅၀၀/-)စျေးနှုန်းစျေးနှုန်းများဖြင့်ရောင်းချရပါကြောင်း၊ (၁)ဧက အကျိုးအမြတ်အနေဖြင့် (၆၀၀၀၀၀/-)ကျပ်ခန့်မြတ်ကြောင်း၊ ကုန်စိမ်းသီးနှံဖြစ်သည့်အတွက် တစ်ပတ်နှင့်တစ်ပတ် စျေးနှုန်းများမတူညီကြောင်း၊ ကုန်စိမ်းပွဲစားများမှ စိုက်ခင်းများအထိ လာရောက်ဝယ်ယူသည့်အတွက်ကြောင့် သယ်ယူစရိတ်သက်သာကြောင်း၊ ပွဲစားများမှတဆင့် ရန်ကုန်၊ မန္တလေးမြို့များသို့လည်း တင်ပို့ရောင်းချကြကြောင်း၊ ကျန်းမာရေးအတွက်လည်းအသုံးဝင်ပြီး တွက်ခြေကိုက်သည့် သီးနှံဖြစ်ကြောင်း တောင်သူတစ်ဦး၏ပြောကြားချက်အရ သရှိရပါသည်။

DOCA(မန္တလေး)

       မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်အတွင်းရှိ မြင်ကဝ၊ အောက်ဆိပ်၊ ချင်တောင်၊ ကူရှည်၊ ရွာမ၊ အလယ်စု၊ တပေါင်း၊ လိပ်ခြံ၊ ကုန်းရွာ၊ ကျောင်းရွာ၊ ညောင်နီချောင်းကျေးရွာ များနှင့် အခြားကျေးရွာများတွင် (မိုး)စပါးများ စိုက်ပျိုးလျက်ရှိရာ ဆင်းသုခနှင့်ဧရာပဒေသာစပါးမျိုးကို အဓိကထားစိုက်ပျိုးကြပြီး ဧရာမင်း၊ ရတနာတိုး စသည့် စပါးမျိုးများ စိုက်ပျိုးပြီး စိုက်ဧက အနေဖြင့် (၁၀၀၀၀)ခန့် စိုက်ပျိုးကြောင်း သိရှိရသည်။

          (မိုး)စပါးများကို ၂၀၂၅ခုနှစ်၊ ဇူလိုင်လ(ဒုတိယပတ်)မှ စတင်စိုက်ပျိုးကြပြီး ရက်ပေါင်း (၁၂၀) အကြာတွင် ရိတ်သိမ်းရကြောင်း၊ စိုက်ပျိုးရာတွင် တိုက်ရိုက်အစေ့ချစိုက်ပျိုးခြင်းနှင့် ပျိုးထောင်ပြီး ပျိုးပင်စိုက်ခြင်း နည်းလမ်းနှစ်မျိုးဖြင့် စိုက်ပျိုးရပြီး ပျိုးထောင်စိုက်ပျိုးပါက စပါးမျိုး တစ်တင်းခွဲခန့် ကုန်ကျပြီး တိုက်ရိုက် အစေ့ချစနစ်ဖြင့် စိုက်ပျိုးပါက တစ်တင်းခန့် ကုန်ကျကြောင်း၊ မိမိဒေသထွက် စပါးမျိုးကို စိုက်ပျိုးပြီး တစ်တင်းလျှင် ငွေကျပ်(၃၀၀၀၀)ဈေးဖြင့် ဝယ်ယူစိုက်ပျိုးရကြောင်း၊ စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုး၊ မြေပြုပြင်ခ၊ သွင်းအားစု၊ အလုပ်သမားခအပါအဝင် တစ်ဧက ငွေကျပ်(၁၀)သိန်းခန့် ကုန်ကျမည်ဖြစ်ကြောင်း၊ အထွက်နှုန်းအနေဖြင့် ယခင်နှစ် တစ်ဧက လျှင် အထွက်တင်း(၈၀-၉၀)တင်းထိ ထွက်ရှိပြီး တစ်တင်းလျှင် ငွေကျပ်(၃၀၀၀၀)ဈေးဖြင့် ရောင်းချ ရကြောင်း၊ ဈေးကွက်အနေဖြင့် ဆိပ်ဖြူ မြို့နယ်တွင်းရှိ ဆန်ရောင်းဝယ်ရေးလုပ်ငန်းရှင်များမှ ဝယ်ယူ ကြောင်း၊ ယခုနှစ်တွင်လည်း အထွက်နှုန်း ကောင်းမွန်ပြီး ဈေးကောင်းရရှိပါက အကျိုးအမြတ်ပိုမိုရရှိ နိုင်ကြောင်း စပါးစိုက်တောင်သူတစ်ဦးထံမှ သိရှိရပါသည်။

DOCA(မကွေး)

         ဘဲကိုလွန်ခဲ့သော နှစ်ပေါင်း (၄၀၀၀)ကျော်ကပင် အိမ်မွေးတိရိစ္ဆာန်များအဖြစ် စတင်မွေးမြူခဲ့ကြပါသည်။ ဘဲမွေးမြူရေးကို မြန်မာပြည်အနှံ့အပြားစီးပွားဖြစ်သောလည်းကောင်း၊ တစ်ပိုင် တစ်နိုင်အဖြစ်သောလည်းကောင်း မွေးမြူခဲ့ကြပါသည်။ ဘဲမွေးမြူရာတွင် မိုးရွာသွန်းမှုအကောင်းဆုံး မြို့နယ်များတွင် အများဆုံးမွေးကြသည်ကို တွေ့ရှိရပါသည်။ အထူးသဖြင့် ဧရာဝတီ၊ ရန်ကုန်နှင့် ပဲခူးတိုင်းတို့တွင် ဘဲကိုအများဆုံး မွေးမြူလျက်ရှိကြောင်း သိရှိရပါသည်။ ၄င်းဒေသများသည် မြစ်ချောင်း၊ အင်းအိုင်နှင့် ရေနက်ကွင်းစသည့်နေရာပေါ်များသည့်အတွက် ဘဲများ၏ သဘာဝ ဓလေ့နှင့်ကိုက်ညီပြီး ၎င်းတို့လိုအပ်သည့် အစားအစာများကို အလွယ်တကူစားသောက်နိုင်သဖြင့် မွေးမြူရေးလုပ်ငန်း ဆောင်ရွက်ရာတွင် ကုန်ကျစရိတ်သက်သာပြီး ဘဲမွေးမြူရာ၌ အရင်းအနှီး နည်းပါးပြီး စီးပွားရေးအကျိုးအမြတ်ပိုမိုရရှိနိုင်ပါသည်။ မွေးမြူရေးလုပ်ငန်း ဆောင်ရွက်ရာ၌ ရင်းနှီးမြှုပ်နှံမှု စုစုပေါင်း (၇၀%)သည် အစာအာဟာရ ဝယ်ယူကျေးမွေးစရိတ်ဖြစ်သည့်အတွက် ယခုကဲ့သို့ သဘာဝအစားအစာပေါများသည့် နေရာဒေသများတွင်  ဘဲမွေးမြူရန်အတွက် ပို၍ အကောင်းဆုံးခွင့်လမ်းတစ်ခုဖြစ်ပါသည်။ ယခုအခါ မန္တလေးတိုင်းဒေသကြီး၊ ကျောက်ဆည်ခရိုင်တွင်လည်း တစ်ပိုင်တစ်နိုင် ဘဲမွေးမြူလာသည်ကိုလည်း နေရာဒေသအတော်များများတွင် တွေ့ရှိခဲ့ရပါသည်။ ယခု ဘဲမွေးမြူသူများသည် အစားအစာစရိတ် သက်သာစေရန်အတွက် လူကိုယ်တိုင်ဘဲအုပ်များကို စပါးခင်းများအတွင်း လွှတ်ကျောင်းစေကာ စပါးခင်းအတွက်လည်း ပေါင်းပင်နှင့်ပိုးမွှားများ ရှင်းလင်းစေပြီး၊ စပါးခင်းအတွက်လည်း အထူးကောင်းမွန်စေပါသည် ။ ဘဲများသည် အာဟာရဓါတ်များ နေ့စဉ်မှန်မှန်စားသုံးရသည့်အတွက် ဘဲဥများပိုမိုဥချနိုင်ပြီး ဘဲအုပ် အကောင်(၁၀၀)မွေးမြူထားပါက ဘဲဥအလုံးရေ (၁၅၀-၂၀၀)လုံး ရရှိကြောင်း၊ ဘဲဥစျေးနှုန်းအနေဖြင့် တစ်လုံးလျှင် လက်လီ(၇၀၀-၈၀၀)ကျပ်၊ လက်ကားစျေး(၅၀၀/-)ကျပ် စျေးနှုန်းများဖြင့် ရောင်းချလျက်ရှိပြီး မိသားစု စားဝတ်နေရေး အဆင်ပြေစေသော ဘဲများကို တစ်ပိုင်တစ်နိုင် မွေးမြူသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)