ပြည်တွင်းကုန်သွယ်မှုသတင်း

     ပြည်ပဲဈေးကွက်အတွင်း မိုးပဲတီစိမ်းသီးနှံများ ဩဂုတ်လဆန်းမှစ၍ ပဲအသစ်များ နေ့စဉ်ဝင်ရောက်မှု ရှိနေခဲ့ပါသည်။ ယခုသြဂုတ်လကုန်ပတ်တွင် ပဲအထွက်လှိုင်လာပြီဖြစ်သောကြောင့် ပဲဝင်ရောက်မှုမှာလည်း အိတ် ၅၀၀ကျော် ၆၀၀ဝင်ရောက်ခဲ့ကာ ဝယ်လိုအားမှာလည်း ဝင်လာသမျှအရောင်းအဝယ်ဖြစ်ခဲ့ပါသည်။ ပဲတီစိမ်းသီးနှံအား လက်ကားသမားဝယ်ယူမှုများနေပြီး ရန်ကုန်နှင့် မန္တလေးဝယ်လက်အထိပါ နေ့စဉ်ဝယ်ယူလျက်ရှိခဲ့ပါသည်။ ပဲတီစိမ်းသီးနှံသည် ပြည်အနီးတဝိုက်နှင့် မင်းတုန်း၊ ကံမမြို့နယ်များမှ ကုန်းလမ်းရေလမ်းဖြင့် ဝင်ရောက်လာသည်ဟု သိရှိရပါသည်။ ပဲဈေးနှုန်းမှာ ပိဿာ(၂၀)တစ်တင်းလျှင် ၅၀၀၀၀ကျပ်မှ ၅၅၀၀၀ကျပ်အထိ အရောင်းအဝယ် ဖြစ်ခဲ့ပါသည်။ ဈေးကွက်အတွင်း အခြားပဲများသည် ယခုနှစ်တွင် ဈေးကောင်းရရှိနေသော်လည်း ပဲတီစိမ်းသီးနှံသည် ဈေးအေးခဲ့သော သီးနှံဖြစ်ခဲ့ပါသည်။ ပြည်ပဝယ်လက်ပဲဈေးကွက်တွင်သာမက ပြည်တွင်းပဲဈေးကွက်အတွင်းမှာပါ ဈေးအနိမ့်ဖြင့် ရောင်းဝယ်နေခဲ့သော သီးနှံဖြစ်ခဲ့ပါသည်။

DOCA(ပဲခူး)

       ပြည်မြို့၏ ဩဂုတ်လ နောက်ဆုံးပတ်အတွင်း ပြည်ဈေးကွက်အတွင်း၌ ကြက်သွန်နီဈေးနှုန်းများ တစ်ပိဿာလျှင် ကျပ်၄၀၀နှုန်းခန့် မြင့်တက်သွားပြီး ဝင်ရောက်မှုနည်းသည့်အတွက် မြင့်တက်ရခြင်းဖြစ်ကြောင်းလည်း သိရှိရပါသည်။ ဝင်ရောက်မှုမှာ ၅ရက်ခြားတစ်ကြိမ်သာအဝင်ရှိပြီး ရေနံချောင်း၊ ဆိပ်ဖြူ၊ တောင်တွင်း၊ ကျောက်ပန်းတောင်းဘက်မှ လှောင်ကြက်သွန်များ စီးဝင်လျက်ရှိကာ အရည်အသွေးမှာလည်း ကောင်းမွန်လျက်ရှိကြောင်း သိရပါသည်။ တစ်ကြိမ်လျှင် အိတ် ၅၀၀ ပိဿာချိန်အားဖြင့် ၁၅၀၀၀ခန့် အဝင်ရှိနေသည်။ အရောင်းအဝယ်အနေဖြင့် ပြည်ဈေးကွက်သည် ကြားခံ လက်ကားဈေးကွက်ဖြစ်သဖြင့် မြန်အောင်၊ ကြံခင်း၊ သာယာဝတီခရိုင်၊ ဥသျှစ်ပင်စသည့် နယ်ကျော်စီးဆင်းမှုများနှင့် ပုံမှန်အရောင်းအဝယ်ဖြစ်လျက်ရှိပြီး ဝင်ရောက်မှု၏ လေးပုံသုံးပုံ ရောင်းဝယ်မှုရှိနေသည်။ ဈေးနှုန်းမှာ အရည်အသွေးကောင်းသည့် ကြက်သွန်နီအချော တစ်ပိဿာလျှင် လက်လီ/ လက်ကားကျပ် ၃၀၀၀/ ၃၂၀၀နှုန်းရှိပြီး အရည်အသွေးအသင့်အတင့် ကြီး/လတ်/သေး တစ်ပိဿာလျှင် ပွဲရုံလက်ကားဈေး ကျပ် ၂၅၀၀/ ၂၄၀၀/ ၂၃၀၀နှုန်းနှင့် လက်လီဈေးနှုန်းအနေဖြင့် အသေးများတွင် ကျပ် ၃၀၀၀/ ၂၉၀၀-၂၈၀၀/၂၇၀၀-၂၆၀၀ နှုန်းတို့ဖြင့် အသီးသီးရောင်းဝယ်လျက်ရှိနေပါသည်။

DOCA(ပဲခူး)

     ပြည်မြို့ရှိကွမ်းခြံတစ်ခြံလျှင် ကွမ်းပင် ၅၀၀မှ ၁၀၀၀အထိ စိုက်ပျိုးကြပါသည်။ ကွမ်းညွှန့် တစ်ညွန့်လျှင် ယခင်နှစ်များက ၁၀၀ကျပ်နှုန်းသာ ဈေးနှုန်းရှိခဲ့ပြီး ယခုနှစ်အချိန်တွင် ၃၀၀ကျပ်နှုန်း ဈေးရှိပါသည်။ ကွမ်းရွက်များခူးဆွတ်ချိန်တွင် (၁၅)ရက်တစ်ခါခူးဆွတ်ရပြီး တစ်ခါခူးဆွတ်လျှင် ပိဿာချိန် ၃၀မှ ၅၀အထိ ထွက်ရှိပါသည်။ ကွမ်းစိုက်ပျိုးရာဒေသများမှာ ပြည်မြို့နယ်အတွင်းရှိ ကြာအင်းရွာ၊ ဖုမ္မသိမ်ရွာနှင့် ဝက်ပုတ်၊ အင်းမစသည့်မြို့များမှလည်း ကွမ်းများအား စီးပွားဖြစ်စိုက်ပျိုးကြောင်း သိရှိရပါသည်။ စိုက်ပျိုးသော ကွမ်းအမျိုးအစားများမှာ စလင်းကွမ်း၊ အင်းမကွမ်း၊ ကွမ်းနုဝါ၊ အင်္ဂပူကွမ်းတို့ စိုက်ပျိုးကြပါသည်။ ယခင်နှစ်တွင် ကွမ်းဈေးမှာ တစ်ပိဿာလျှင် အမြင့်ဆုံးဈေးနှုန်းမှာ ၅၀၀၀ကျပ် သာဖြစ်ပြီး ယခုနှစ်တွင် ကွမ်းဈေးနှုန်းမှာ ယခုအချိန်ထိ ပေါက်ဈေး တစ်ပိဿာလျှင် ၁၂၀၀၀ကျပ်၊ ၁၃၀၀၀ကျပ်ဈေးတို့ဖြင့် ဈေးကွက်အတွင်း ရောင်းချလျက်ရှိကြောင်း သိရှိရပါသည်။

DOCA(ပဲခူး)

    ပြည်မြို့ရှိဈေးများထဲတွင် ပြည်အနီးတဝိုက်ရှိ ကျေးရွာများဖြစ်သော မှော်ဇာ၊ တောင်လုံးညိုရွာနှင့် ပြည်မြို့အနောက်ဘက်ကမ်းရှိ ကျေးရွာများမှ မျှစ်များချိုးယူ၍ ရောင်းချလျက်ရှိပါသည်။ မျှစ်၏သဘာဝအရောင်မှာ အဖြူရောင်ဖြစ်ပြီး မျှစ်အစိမ်းကိုပြုတ်လိုက်လျှင် ဝါကျင့်ကျင့်အရောင် ပြောင်းသွားတတ်ပါသည်။ ယခုအချိန် ဈေးကွက်တွင်ရောင်းချနေသော မျှစ်အမျိုးအစား များမှာ မျှစ်စပ်နှင့်မျှစ်ပြုတ်များ ဖြစ်ပါသည်။ သြဂုတ်လနောက်ဆုံးပတ်တွင် မျှစ်စပ်ဈေးမှာ တစ်ပိဿာလျှင် ၃၀၀၀-၄၀၀၀ကျပ်နှင့် မျှစ်ပြုတ်တစ်ပိဿာလျှင် ၁၅၀၀-၂၀၀၀ကျပ်ဖြင့် ပြည်မြို့ ဈေးကွက်ထဲတွင် ရောင်းချလျက်ရှိကြောင်း သိရှိရပါသည်။

    ရွှေဖရုံသီး၏ အညွန့်နှင့်အသီးကို တို့စရာအဖြစ်လည်းကောင်း၊ သီးစုံအဖြစ် ငါးအသားမျိုးစုံတို့နှင့်ရောနှော၍ ချက်ပြုတ်စားသောက်ကြပါသည်။ ရွှေဖရုံသီးကို ပြည်မြို့နယ်အတွင်းရှိ မှော်ဇာကျေးရွာ၊ တောင်လုံးညိုကျေးရွာများတွင် စိုက်ပျိုးကြပြီး ထွက်ရှိလာသောရွှေဖရုံသီးများကို ပြည်မြို့အတွင်းရှိဈေးများနှင့် ရန်ကုန်မြို့ရှိ သီရိမင်္ဂလာဈေး၊ ဒညင်းကုန်းဈေးများသို့ တင်ပို့ရောင်းချ လျက်ရှိကြောင်း သိရှိရပါသည်။ ယခုအချိန်ဖြစ်သော ဩဂုတ်လနောက်ဆုံးပတ်တွင် ရောင်းချလျက်ရှိသော ရွှေဖရုံသီးဈေးမှာ အကြီးတစ်လုံးလျှင် ၁၃၀၀-၁၅၀၀ကျပ်ဖြင့် ရောင်းချကြောင်းသိရပါသည်။ ယခင်နှစ် ဩဂုတ်လနောက်ဆုံးပတ်တွင် ရွှေဖရုံသီးတစ်လုံးလျှင် ၁၅၀၀-၂၀၀၀ကျပ်ဖြင့် ရောင်းချခဲ့သဖြင့် ယခုနှစ်တွင်ရွှေဖရုံသီးဈေးများ အနည်းငယ်ကျဆင်းလာသည်ကို တွေ့ရှိရပါသည်။

DOCA(ပဲခူး)

     ပြည်ခရိုင်အနေဖြင့် ယခုနှစ်မိုးမြေပဲများ စိုက်ပျိုးချိန်တွင် စိုက်ဧက (၄၀၆၈၁)ဧက စိုက်ပျိုးနိုင်ခဲ့ပါသည်။ ပြည်မြို့နယ်တွင် ၁၂၇၅၉ဧက၊ ပေါက်ခေါင်းမြို့နယ်တွင် ၁၅၃၄၃ဧက၊ ပန်းတောင်း မြို့နယ်တွင် ၃၈၃၃ဧကနှင့် ရွှေတောင်မြို့နယ်တွင် ၈၇၄၆ဧက စိုက်ပျိုးထားပြီး ဖြစ်ပါသည်။ ယခုအချိန်တွင် မိုးမြေပဲများထွက်မှုမရှိသေးဘဲ ဈေးကွက်တွင် လက်ကျန်များနည်းသွားချိန်ဖြစ်၍ မြေပဲဆန်ဈေးများ ဆက်လက်မြင့်တက်လာခဲ့ပါသည်။ မြေပဲဆန်ဈေးနှုန်းများအနေဖြင့် ယခုဩဂုတ်လနောက်ဆုံးပတ်တွင် ဆီဆန်(အဖြူ)တစ်ပိဿာလျှင် ၉၀၀၀ကျပ်၊ ဆီဆန်(အနီ) တစ်ပိဿာ လျှင် ၈၈၀၀ကျပ်၊ လုံးဆန်(အဖြူ)တစ်ပိဿာလျှင် ၁၀၀၀၀ကျပ်၊ လုံးဆန်(အနီ) တစ်ပိဿာလျှင် ၉၈၀၀ကျပ်ဖြင့် အရောင်းအဝယ်ရှိသော်လည်း တစ်နေ့လျှင် ပိဿာ(၂၀)ဝင်အိတ် (၂၀၀)ကျော်သာ အရောင်းအဝယ်ဖြစ်လျက်ရှိပါသည်။ ပြည်ဈေးကွက်သို့ မြေပဲဆန်ဝင်ရောက်မှုအနေဖြင့် ပြည်မြို့ အနောက်ဘက်ကမ်းရှိ ပန်းတောင်းနှင့် ဥသျှစ်ပင်ဘက်မှ ရက်ခြားတစ်နေ့လျှင်အိတ်(၂၀၀)ခန့် အဝင်ရှိကြောင်း သိရှိရပါသည်။ မြေပဲဆန်ဈေးနှုန်းများအား ယခင်လဖြစ်သော ဇူလိုင်လ နောက်ဆုံးပတ်နှင့် ယခုဩဂုတ်လနောက်ဆုံးပတ်နှင့် နှိုင်းယှဉ်ကြည့်မည်ဆိုလျှင် မြေပဲဆီဆန် (အဖြူ)နှင့်(အနီ)မှာ တစ်ပိဿာလျှင် ၈၀၀ကျပ်၊ လုံးဆန်(အဖြူ) တစ်ပိဿာလျှင် ၁၄၀၀ကျပ်နှင့် လုံးဆန်(အနီ) တစ်ပိဿာလျှင် ၁၅၀၀ကျပ်ဖြင့် ဈေးနှုန်းများ အသီးသီးမြင့်တက်လာခဲ့ပါသည်။ မြေပဲဆီဆန်များကို ဆီစက်သမားများကအဝယ်ရှိပြီး လုံးဆန်ကို ပဲလှော်သမားများနှင့် ဈေးကွက်အတွင်း မြေပဲဆန်အစိမ်းရောင်းချသူများက ဝယ်ယူမှုရှိကြောင်း သိရှိရပါသည်။ ဈေးကွက်တွင် ရောင်းချလျက်ရှိသော မြေပဲဆန် တစ်ဘူးလျှင် ၁၅၀၀-၁၇၀၀ကျပ်ဖြင့် ရောင်းချလျက်ရှိကြောင်း သိရှိရပါသည်။

DOCA(ပဲခူး)