ပြည်တွင်းကုန်သွယ်မှုသတင်း

     ပြည်ထောင်စုနယ်မြေ၊ နေပြည်တော်အတွင်း မိုးစပါး (၁၃၀၈၉၁) ဧက၊ စိုက်ပျိုးထားရှိပြီး ဖြစ်ပါသည်။ မိုးစပါး စိုက်ပျိုးမှုမှာ အောင်မြင်ဖြစ်ထွန်းမှု အခြေအနေကို တွေ့ရှိနေရပါသည်။ မိုးစပါး စိုက်ပျိုးမှု တစ်လသက်တမ်းခန့်တွင် ရေကြီးမှုကြောင့်  ပျက်စီးမှု အနည်းငယ် ရှိခဲ့ပါသည်။ ရေကြီး နစ်မြုပ်သည့် အနေအထားတွင် ပျိုးပင်များ အစားထိုးစိုက်ပျိုးကြသည်ကို တွေ့ရှိရပါသည်။ ဆန်ကြိတ်ခွဲ ထုတ်လုပ်မှုများလည်း ပုံမှန်အတိုင်း ကြိတ်ခွဲထုတ်လုပ်လျက်ရှိပါသည်။ ဒေသတွင်း ဈေးကွက်များတွင်သာ လှည့်ပတ်မှုရှိနေပါသည်။ စပါးဈေးနှုန်းများလည်း တည်ငြိမ်မှုရှိနေပါသည်။ ယခင်နှစ်တွင် နွေစပါး ကြိတ်ခွဲမှုများ ရန်ကုန်နှင့် ရှမ်း(တောင်)သို့ တင်ပို့မှုများ ရှိခဲ့သော်လည်း ယခုနှစ်တွင် တင်ပို့မှုများ လျော့နည်းနေသည်ကို တွေ့ရှိရပါသည်။

DOCA(ပြည်ထောင်စုနယ်မြေ)

       ၂၀၂၄ ခုနှစ်၊ စက်တင်ဘာလ ၃ ရက်‌နေ့၊ နေ့လယ် (၁၄း၀၀) နာရီအချိန်တွင် တနင်္သာရီတိုင်းဒေသကြီး၊  ထားဝယ်မြို့၊ အိမ်ရှေ့ပြင်ရပ်ကွက်၊ ရေးလမ်းရှိ ဟိုင်းဝေးစတားယာဉ်ရပ်နားစခန်းသို့  မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းမှ စီစဥ်မှုဖြင့် Mahar Phone Let Yone  ကုမ္ပဏီမှ တင်ပို့ရောင်းချသည့် တစ်ပေပါလျှင် ၁၁၀ ပိဿာပါ စားအုန်းဆီ ၈၄ ပေပါကို ယာဥ်မောင်း ဦးမျိုး‌ဇော်ဝင်း၊ မော်တော်ယာဥ်အမှတ် 7P-7112/ ISUZU အမျိုးအစားမော်တော်ယာဥ်ဖြင့်  ရောက်ရှိလာရာ တိုင်းဒေသကြီးစားသုံးသူရေးရာဦးစီးမှူး ဦးစိုးဦးနှင့် တာဝန်ရှိသူများက သွားရောက်စစ်ဆေးခဲ့ပြီး အဆိုပါ စားအုန်းဆီ ၈၄ ပေပါအား ထားဝယ်မြို့ အနောက်ရပ်၊ ဗိုလ်ချုပ်လမ်းရှိ ဒေါ်သီတာမိုး၏ AAA ကုန်စုံဆိုင် အပါအဝင်အထိုင်ရောင်းချနေသည့် လက်လီဆိုင် ၁၅ ဆိုင်တို့မှ သတ်မှတ်ရည်ညွှန်းဈေးအတိုင်း စားသုံးသူပြည်သူများသို့  ခွဲဝေရောင်းချပေးသွားမည်ဖြစ်ကြောင်း သိရှိရပါသည်။

DOCA(တနင်္သာရီ)

      ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန ကွပ်ကဲမှုအောက်ရှိ ဘုရင့်နောင် ကုန်စည်ဒိုင်သို့  နေ့စဉ် မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန် အခြေအနေများအား အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီနေ့စဉ်ဝင်ရောက်မှု စာရင်းများအရလည်းကောင်း၊ ကြက်သွန်နီ လက်ကျန်အခြေအနေအား နေ့စဉ်စုံစမ်းလျက်ရှိပါသည်။ ဩဂုတ်လ (၂၇) ရက်မှ စက်တင်ဘာလ (၂) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီ ဝင်ရောက်ရာဒေသများဖြစ်သည့် ဆိပ်ဖြူ၊ မြင်းခြံ၊ ရွှေဘိုဒေသတို့မှ ကြက်သွန်နီ (၆၃၀၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့် ပြန်လည်စီးထွက်မှု ရှိကြောင်းသိရှိရပါသည်။ ထို့ကြောင့် ကြက်သွန်နီ လက်ကျန်မှာ (၂၅၂၀၀၀) ကျန်ရှိကြောင်း ကုန်စည်ဒိုင်သတင်းအရ သိရှိရပါသည်။ ဆိပ်ဖြူ ကြက်သွန်နီ (အသစ်) အချော တစ်ပိဿာ ကျပ် ၁၅၀၀၊ အသန့်မှာ တစ်ပိဿာ ကျပ် ၂၁၀၀ ၊ အကြီးမှာ ကျပ် ၂၂၀၀၊ ရှယ်မှာ ကျပ် ၂၃၀၀၊  မြင်းခြံ ကြက်သွန်နီ(အသစ်) အချော တစ်ပိဿာ ကျပ် ၁၄၀၀၊ အသန့်မှာ တစ်ပိဿာ ကျပ် ၁၈၀၀၊ အကြီးမှာ ကျပ် ၁၉၀၀၊ ရှယ်မှာ ကျပ် ၂၀၀၀၊ ရွှေဘို ကြက်သွန်နီ (အသစ်) အချော တစ်ပိဿာ ကျပ် ၁၈၀၀၊ အသန့် မှာ တစ်ပိဿာ ကျပ် ၂၂၀၀ ၊ အကြီးမှာ ကျပ် ၂၄၀၀၊ ရှယ်မှာ ကျပ် ၂၅၀၀  ဈေးတို့အသီးသီးရှိကြောင်း စုံစမ်းသိရှိရပါသည်။

DOCA(ရန်ကုန်)

      ယခုဩဂုတ်လနောက်ဆုံးပတ်တွင် ပြည်ဈေးကွက်၌ ဆင်ခရမ်းချဉ်သီးများ ဝင်ရောက်မှုနည်းပါးပြီး ဈေးကောင်းရလျက်ရှိနေပါသည်။ မင်းတုန်း၊ ဥသျှစ်ပင်ဘက်မှ တစ်ပတ်လျှင် တစ်ကြိမ်ခန့်သာ အဝင်ရှိပြီး အလုံး ၃၀/ ၄၀ခန့်သာ ဝင်ရောက်မှုရှိနေပြီး ယခင်မတ်လတွင် အလုံးရေ ၁၀၀၀ခန့် ရက်ခြားအဝင်ရှိခဲ့ပြီး ဈေးနှုန်းမှာလည်း တစ်လုံးလျှင်ကျပ် ၂၅၀ ဝန်းကျင်ခန့် ရောင်းချမှုရှိခဲ့ကြောင်း သိရှိရသဖြင့် ယခုဩဂုတ်လနောက်ဆုံးပတ်တွင် တစ်လုံးလျှင် အကြီး၊ အသေး အပေါ်မူတည်၍ ကျပ် ၄၀၀-၅၀၀နှုန်းဖြင့် အသီးသီးရောင်းချလျက်ရှိကြောင်း သိရှိရပါသည်။

      ပြည်ဈေးကွက်၌ ယခုဩဂုတ်လနောက်ဆုံးပတ်တွင် ဒန့်သလွန်သီးဈေးနှုန်းများ မြင့်တက်လျက်ရှိပြီး ဝင်ရောက်မှုမှာလည်း တစ်ပတ်လျှင်တစ်ကြိမ်ခန့်သာ အဝင်ရှိသဖြင့် မြင့်တက်ရခြင်း ဖြစ်ကြောင်း သိရှိရပါသည်။ ပြည်မြို့အနောက်ဘက်ကမ်းရှိ ဆင်တဲရွာအနီးတဝိုက်မှသာအဝင်ရှိပြီး အတောင့် ၅၀/ ၆၀ခန့်သာ အဝင်ရှိနေပါသည်။ ပေါ်ဦးပေါ်ဖျားရှားပါးချိန်ဖြစ်သည့်အတွက် အဝင်လည်းနည်းကာ ဈေးကောင်းရခဲ့ပြီး ယခင်နှစ်တွင်တစ်တောင့်လျှင် ကျပ် ၃၀၀နှုန်းရှိခဲ့၍ ယခုဩဂုတ်လ နောက်ဆုံးပတ်တွင် အတောင့်အချော၊ အကြီး၊ အသေးပေါ်မူတည်၍ ကျပ် ၄၅၀-၅၀၀နှုန်းဖြင့် အသီးသီး ရောင်းချလျက်ရှိကြောင်း သိရှိရပါသည်။

 DOCA(ပဲခူး)

      ပြည်ကုန်စည်ဒိုင်သည် လမ်းပန်းဆက်သွယ်ရေး  အချက်အခြာကျသော ပြည်မြို့တွင် ဖွင့်လှစ်ထားသောကြောင့် ပဲမျိုးစုံအရောင်းအဝယ်မှာ ကောင်းမွန်လျက်ရှိပါသည်။

မတ်ပဲ

    ပြည်ကုန်စည်ဒိုင်၏ ဩဂုတ်လပထမပတ်တွင် မတ်ပဲတစ်တင်းကို ၁၁၂၀၀၀ကျပ်ဖြင့် တစ်ရက်ကိုအိတ် ၁၅၀/၂၀၀ခန့် ရန်ကုန်ဒိုင်မှ အဝယ်ရှိပါသည်။ ဒုတိယပတ်တွင် ပဲတစ်တင်းလျှင် ၁၂၄၀၀၀-၁၂၄၅၀၀ကျပ်ဖြင့် ရန်ကုန်အဝယ်တစ်ရက်ကို အိတ်၂၀၀ခန့် အဝယ်ရှိပါသည်။ တတိယပတ်တွင် မတ်ပဲတစ်တင်းကို ၁၂၁၀၀၀- ၁၂၁၅၀၀ကျပ်ဖြင့် ရန်ကုန်အဝယ် တစ်ရက်ကိုအိတ် ၂၀၀ခန့် အဝယ်ရှိပါသည်။ စတုတ္တပတ်တွင် မတ်ပဲတစ်တင်းလျှင် ၁၂၅၀၀၀-၁၂၅၅၀၀ကျပ်ဖြင့် ရန်ကုန်အဝယ်တစ်ရက်ကို အိတ် ၁၅၀/၂၀၀ခန့်အဝယ်ရှိပါသည်။

ပဲတီစိမ်း

     ပြည်ကုန်စည်ဒိုင်တွင် ပဲတီစိမ်းသစ် အဝင်ရှိပြီး ပဲတီစိမ်းတစ်တင်းကို ၅၅၀၀၀-၆၀၀၀၀ ကျပ်ဖြင့် ဈေးစဖွင့်၍ တစ်ရက်ကိုအိတ် ၁၀၀/၂၀၀ခန့် အရောင်းအဝယ်ရှိပါသည်။ ဒုတိယပတ်တွင် ၆၀၀၀၀ကျပ်ဖြင့် တစ်ရက်ကိုအဝယ် ၂၀၀/ ၂၅၀အိတ်ခန့် ရှိပါသည်။ တတိယပတ်တွင် ပဲတီစိမ်းတစ်တင်းကို ၆၀၀၀၀ကျပ်ဖြင့် တစ်ရက်ကို အိတ် ၃၀၀/၄၀၀ခန့် အဝယ်ရှိပါသည်။ စတုတ္တပတ်တွင် ပဲတီစိမ်းတစ်တင်းကို ၅၀၀၀၀-၅၅၀၀၀၀ကျပ်ဖြင့် အိတ် ၄၀၀/ ၅၀၀ခန့် အရောင်းအဝယ်ရှိကြောင်း သိရှိရပါသည်။

ပဲစင်းငုံ

   ဩဂုတ်လပထမပတ်တွင် ပဲစင်းငုံတစ်တင်းလျှင် ၁၃၇၅၀၀-၁၃၈၀၀၀ကျပ်ဖြင့် ရန်ကုန်အဝယ် တစ်ရက်ကို အိတ် ၂၀၀ခန့် ရှိပါသည်။ ဒုတိယပတ်တွင် ပဲစင်းငုံတစ်တင်းကို ၁၄၇၅၀၀-၁၄၈၀၀၀ ကျပ်ဖြင့် ရန်ကုန်အဝယ်တစ်ရက်ကို အိတ် ၂၀၀/၂၅၀ခန့် ရှိပါသည်။ ဩဂုတ်လတတိယပတ်တွင် ပဲစင်းငုံတစ်တင်းကို ၁၄၇၀၀၀-၁၄၇၅၀၀ကျပ်ဖြင့် ရန်ကုန်အဝယ်တစ်ရက်လျှင် အိတ် ၃၀၀ခန့် ရှိပါသည်။ စတုတ္ထပတ်တွင် ပဲစင်းငုံတစ်တင်းကို ၁၅၄၀၀၀ကျပ်ဖြင့် တစ်ရက်ကိုအိတ် ၃၀၀ခန့် အဝယ်ရှိကြောင်း သိရှိရပါသည်။

ကုလားပဲ

      ဩဂုတ်လပထမပတ်တွင် ကုလားပဲ(HL) တစ်တင်းကို ၈၇၀၀၀-၈၈၀၀၀ကျပ်၊ မြကြေးမှုံ တစ်တင်းကို ၉၀၀၀၀-၉၁၀၀၀ကျပ်ရှိ၍ မြို့တွင်းခွဲစက်သမားများသာ အဝယ်တစ်ရက်ကို အိတ် ၃၀၀ခန့်ရှိပါသည်။ ဒုတိယပတ်တွင် ကုလားပဲ(HL)တစ်တင်းကို ၁၀၁၅၀၀ကျပ်၊ မြကြေးမှုံ တစ်တင်းကို ၁၀၅၀၀၀ကျပ်ဖြင့် မြို့တွင်းခွဲစက်သမားအဝယ်တစ်ရက်ကို အိတ် ၂၅၀/ ၃၀၀ ခန့်ရှိပါသည်။ တတိယပတ်အတွင်း ကုလားပဲ(HL) တစ်တင်းကို ၁၀၁၀၀၀-၁၀၂၀၀၀ကျပ်၊ မြကြေးမှုံ တစ်တင်းကို ၁၁၀၀၀၀ကျပ်ဖြင့် ခွဲစက်သမားများတစ်ရက်ကိုအိတ် ၂၅၀ခန့် အဝယ်ရှိပါသည်။ စတုတ္ထပတ်တွင် ကုလားပဲ(HL) တစ်တင်းကို ၁၀၀၀၀၀-၁၀၁၀၀၀ကျပ်၊ မြကြေးမှုံတစ်တင်းကို ၁၁၁၀၀၀-၁၁၂၀၀၀ကျပ်ဖြင့် မြို့တွင်းခွဲစက်သမားများ တစ်ရက်ကိုအိတ် ၃၀၀ခန့် အဝယ်ရှိပါသည်။

ပဲကြီး

     ဩဂုတ်လပထမပတ်တွင် ပဲကြီး(ရွှေကျွန်း)တစ်တင်းကို ၈၉၀၀၀ကျပ်၊ ပဲကြီး (ကုန်းပဲ) တစ်တင်းကို ၈၅၀၀၀ကျပ်ဖြင့် မြို့တွင်းပဲကြော်သမားများ တစ်ရက်ကိုအိတ် ၂၀၀ခန့် အဝယ် ရှိပါသည်။ ဒုတိယပတ်တွင် ပဲကြီး(ရွှေကျွန်း)တစ်တင်းကို ၉၀၀၀၀ကျပ်၊ (ကုန်းပဲ)တစ်တင်းကို ၈၅၀၀၀ကျပ်ဖြင့် မြို့တွင်းပဲကြော်သမားများ အဝယ်ရှိပါသည်။ တတိယပတ်တွင် ပဲကြီး(ရွှေကျွန်း) တစ်တင်းကို ၉၀၀၀၀ကျပ်၊ ကုန်းပဲတစ်တင်းကို ၈၅၀၀၀ကျပ်ဖြင့် ဈေးအေးနေခဲ့ပြီး မြို့တွင်းအဝယ် တစ်ရက်ကို အိတ် ၃၀၀ခန့်ရှိခဲ့ပါသည်။ စတုတ္ထပတ်တွင် ပဲကြီး(ရွှေကျွန်း)တစ်တင်းကို ၉၀၀၀၀ကျပ်၊ ကုန်းပဲတစ်တင်းကို ၈၅၀၀၀ကျပ်ဖြင့် မြို့တွင်းပဲကြော်သမားများ တစ်ရက်ကိုအိတ် ၃၀၀/၄၀၀ခန့် အဝယ်ရှိခဲ့ပါသည်။

ဘိုကိတ်ပဲ

      ဩဂုတ်လပထမပတ်တွင် ဘိုကိတ်ပဲတစ်တင်းကို ၉၂၀၀၀-၉၃၀၀၀ကျပ်ဖြင့် မြို့တွင်းနှင့် ရန်ကုန် အဝယ်တစ်ရက်ကို အိတ် ၅၀/ ၁၀၀ခန့်ရှိခဲ့ပါသည်။ ဒုတိယပတ်တွင် ဘိုကိတ်ပဲတစ်တင်းကို ၉၅၀၀၀ကျပ်ဖြင့် မြို့တွင်းအဝယ်ရှိပါသည်။ တတိယပတ်တွင် ဘိုကိတ်ပဲတစ်တင်းကို ၉၈၀၀၀-၁၀၀၀၀၀ကျပ်ဖြင့် မြို့တွင်းအဝယ်တစ်ရက်ကို အိတ် ၁၅၀ခန့်ရှိခဲ့ပါသည်။ စတုတ္ထပတ်တွင် ဘိုကိတ်ပဲတစ်တင်းကို ၉၈၀၀၀ကျပ်ဖြင့် မြို့တွင်းအဝယ်တစ်ရက်ကိုအိတ် ၅၀/၁၀၀ခန့်ရှိခဲ့ပါသည်။

       ပြည်ကုန်စည်ဒိုင်၏ ပဲမျိုးစုံဈေးမှာ မတ်ပဲ၊ ပဲစင်းငုံ၊ ဘိုကိတ်ပဲတို့မှာ ဈေးမြင့်တက်လျက်ရှိပြီး ကုလားပဲ၊ ပဲကြီးဈေးမှာ အေးလျက်ရှိကြောင်း သိရှိရပါသည်။

DOCA(ပဲခူး)