ပြည်တွင်းကုန်သွယ်မှုသတင်း

           မိတ္ထီလာကုန်စည်ဒိုင်တွင် ယခုစက်တင်ဘာလပထမပတ်တွင်ဖြစ်ပေါ်နေသော ဆီထွက်သီးနှံ ဈေးနှုန်းများမှာ နှမ်းညိုတစ်တင်းလျှင် (၈၅၀၀၀-၈၇၀၀၀)ကျပ်၊ နှမ်းဖြူတစ်တင်းလျှင် (၉၀၀၀၀-၉၂၀၀၀) ကျပ်၊ နေကြာစေ့တစ်ပိဿာလျှင်(၅၈၀၀-၆၀၀၀)ကျပ်၊ မြေပဲဆီတစ်ပိဿာလျှင် (၁၅၀၀၀-၁၆၀၀၀)ကျပ်၊ နှမ်းဆီ(၁၃၀၀၀-၁၅၅၀၀)ကျပ်၊ နေကြာဆီတစ်ပိဿာလျှင်(၁၈၀၀၀) ကျပ်၊ နှမ်းဖတ်တစ်ပိဿာလျှင် (၂၇၅၀-၂၈၀၀)ကျပ်၊ ပဲဖတ်တစ်ပိဿာလျှင် (၄၅၀၀)ကျပ်၊ နေကြာဖတ် တစ်ပိဿာလျှင်(၂၀၀၀)ကျပ်ဖြင့် အရောင်းအဝယ်ဖြစ်လျက်ရှိပြီး ယခင်လနှင့်ကာလတူနှိုင်းယှဉ်လျှင် ဆီထွက်သီးနှံ ဈေးနှုန်းများတည်ငြိမ်နေပြီး အရောင်းအဝယ်အေးလျက်ရှိကြောင်း သိရပါသည်။

       ပဲမျိုးစုံဈေးကွက်တွင် V2 ကုလားပဲတစ်တင်းလျှင် (၈၃၀၀၀)ကျပ်၊929တစ်တင်းလျှင် (၈၀၀၀၀) ကျပ်၊ ပဲတီစိမ်းတစ်တင်းလျှင်(၈၈၀၀၀-၉၀၀၀၀)ကျပ် ဖြင့်အရောင်းအဝယ်ဖြစ်လျက်ရှိကြောင်း၊ ယခင်လနှင့် ကာလတူနှိုင်းယှဉ်လျှင် ပဲဈေးနှုန်းများလည်းတည်ငြိမ်နေကြောင်း သိရပါသည်။

         စားဖိုဆောင်သီးနှံဈေးနှုန်းများမှာ ကြက်သွန်နီတစ်ပိဿာလျှင်(၈၀၀-၉၀၀)ကျပ်၊ ငရုတ်သစ် တစ်ပိဿာလျှင်(၁၀၀၀၀-၁၂၀၀၀)ကျပ်ဈေးဖြင့်အရောင်းအဝယ်ဖြစ်လျက်ရှိကြောင်း၊ ယခင်လနှင့် ကာလတူနှိုင်းယှဉ်လျှင် ငရုတ်သစ်နှင့် ကြက်သွန်နီဈေးနှုန်းများမှာ တည်ငြိမ်နေကြောင်းသိရပါသည်။

          ဈေးကွက်အနေဖြင့် ဆီထွက်သီးနှံနှမ်းနှင့်ပဲမျိုးစုံကို ဒေသတွင်းဆီကြိတ်စက်များ၊ ပဲခွဲစက်များအပြင်  ရန်ကုန်၊ မန္တလေးမြို့များသို့တင်ပို့ရောင်းချကြကြောင်း၊ ငရုတ်၊ကြက်သွန်ကို ရန်ကုန်၊ ပဲခူး၊ မြဝတီ၊ တာချီလိတ်၊ ဘားအံ့၊ မော်လမြို့များသို့ တင်ပို့ရောင်းချကြောင်း သိရပါသည်။

DOCA(မန္တလေး)

           မန္တလေးတိုင်းဒေသကြီး၊ ကျောက်ဆည်ခရိုင်သည် ဆီထွက်သီးနှံမျိုးစုံ အောင်မြင်ဖြစ်ထွန်းလျက်ရှိရာ ၄င်းသီးနှံများအနက် မိုးနှမ်းသီးနှံကို ၂၀၂၅-၂၀၂၆ ဘဏ္ဍာနှစ်တွင် မြစ်သားမြို့နယ်တွင်(၄၂၀၀)ဧက စိုက်ပျိုးပြီး ၎င်းဧကများအားလုံး ရိတ်သိမ်းပြီးစီးပြီဖြစ်ကြောင်း သက်ဆိုင်ရာဌာန၏စာရင်းများအရ သိရှိရပါသည်။ မိုးနှမ်း(၁)ဧကစိုက်ပျိုးလျှင် မျိုးအနေဖြင့်(၂-၃) ပြည်စိုက်ပျိုးရကြောင်း(၁)ပြည်လျှင် (၈၀၀၀/-)ကျပ်စျေးနှုန်းဖြင့် ဝယ်ယူစိုက်ပျိုးရကြောင်း၊ မိုးနှမ်းစိုက်ပျိုးမှု (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၃၅၀၀၀၀/-) ကျပ်ခန့် ကုန်ကျကြောင်း၊ စိုက်ပျိုးသောမျိုးများမှာ နှမ်းညို၊ နှမ်းနက်မျိုးများကို အများဆုံးစိုက်ပျိုးကြကြောင်း၊ အများဆုံးစိုက်ပျိုးသောရွာများမှာ ရိုးကန်၊ ကျားတွင်း၊ နွားလျှာရိုးရွာများဖြစ်ကြောင်း၊  ယခုအချိန်တွင် နှမ်းဖြူ တစ်တင်းလျှင်(၉၇၀၀၀/-)ကျပ်၊ နှမ်းညို တစ်တင်း လျှင် (၈၂၀၀၀/-)ကျပ်၊ နှမ်းနက်တစ်တင်းလျှင်(၈၂၀၀၀/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း သိရှိရပါသည်။ (၁)ဧက အထွက်နှုန်းအနေဖြင့် (၁၁-၁၂)တင်းခန့်ထွက်ရှိခဲ့ပြီး အကျိုးအမြတ်အနေဖြင့် (၈၆၇၀၀၀/-)ကျပ်မြတ်ခဲ့ကြောင်း မိုးနှမ်းစိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

           မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ ကုန်စိမ်းပွဲရုံများသို့ ရှမ်းမြေပဲထောင့်အစိုများ ဈေးကွက်အတွင်းသို့ ဖြိုင်ဖြိုင်ဝင်ရောက်လာပြီး အရောင်းအဝယ်ကောင်းနေကြောင်း သိရှိရပါသည်။ မြေပဲထောင့်အစိုများသည် ယခုအချိန်တွင် မြေပြန့်ဒေသများမှ  ထွက်ရှိမှုနည်းပါးပြီး  တောင်ပေါ်ဒေသများဖြစ်သည့် ပင်းတယ၊ အောင်ပန်း၊ ရေဦး၊ ရွာငံဒေသများမှ အဓိကအများဆုံး ဝင်ရောက်လာကြောင်း၊  မြေပဲစိုက်ပျိုးရာတွင် မြေပဲပင်များကို ကျင်းတူးကာ တစ်ကျင်းလျှင် နှစ်စေ့နှုန်းဖြင့် တစ်တောင်ခြားစိုက်ပျိုးကြကြောင်း၊ တစ်ပတ်အကြာတွင် အညှောင့်များ စတင်ထွက်ရှိပြီး သုံးလအကြာတွင် စတင်နှုတ်ယူ၍ရကြောင်း၊ သဲနှုန်းမြေပေါ်တွင် စိုက်ပျိုးပါက အထွက်နှုန်းတိုး ကြောင်း၊ မြေပဲများအား နှုတ်ယူပြီးပါက မြေပဲတောင့် အစိုများကို  ဈေးကွက်အတွင်းသို့ တင်ပို့ရောင်းချကြပါကြောင်း၊ ရောင်းချရာတွင် လက်ကားဈေးအနေဖြင့်  မြေပဲအစို (၁)ပြည်လျှင် (၂၀၀၀/-)ကျပ်၊ လက်လီဈေး(၁)ပြည်လျှင်(၂၅၀၀/-)ကျပ် များဖြင့် ရောင်းဝယ်ဖြစ်နေကြောင်း၊ ဈေးသည်များမှလည်း ရှမ်းမြေပဲများကိုဝယ်ယူ၍ အစိမ်းရောင်းချသလို ပြုတ်၍လည်း ရောင်းချလျက်ရှိကြောင်း၊ မြေပဲကို ပြုတ်ပြီးပြန်လည်ရောင်းချပါက အစို(၁)ပြည်လျှင်(၂၅၀၀/-)ကျပ်ဈေးဖြစ်ပြီး၊ ပြုတ်၍ရောင်းချပါက (၁)ဗူးလျှင်(၅၀၀/-)ကျပ်နှင့်  (၁)ပြည်လျှင်(၄၀၀၀/-)ကျပ်ရရှိသောကြောင့် ပိုမိုအကျိုးမြတ်ဖြစ်ထွန်းကြောင်း၊ မြေပဲစားသုံးခြင်းဖြင့် ပရိုတိန်းဓာတ်၊ မဂ္ဂနီစီယမ်ဓာတ်တို့ ပါဝင်ကြောင်း၊ သွေးလည်ပတ်မှုကို ကောင်းမွန်စေပြီး သွေးပေါင်ချိန်ကို ထိန်းညှိပေးကြောင်း အဆစ်ရောင်ရမ်းခြင်းနှင့် နှလုံးရောဂါဖြစ်နိုင်ခြေကို လျော့ချပေးကြောင်း လေ့လာသိရှိရပါသည်။ ကျန်းမာရေး အကျိုးကျေးဇူးရှိသော မြေပဲကို ဝယ်ယူစားသုံးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

           မန္တလေးတိုင်းဒေသကြီး၊ ကျောက်ဆည်မြို့နယ်အတွင်း၌ရှိသော တောင်သူများသည် စပါးနှင့် ဆီထွက်သီးနှံများကို အဓိကထားစိုက်ပျိုးကြသော်လည်း ဝယ်လိုအားရှိပြီး နေ့စဉ်ဝင်ငွေရရှိရေးအတွက်  သီးပင်စားပင်များကိုလည်း စိုက်ပျိုးရောင်းချလျက်ရှိရာ ကျောင်းကုန်း၊ ကလိုင်ကျော်နှင့် မြောင်းဘောင်ကျေးရွာတွင် စိုက်ပျိုးလျက်ရှိပြီး မိသားစုစားဝတ်နေရေး အဆင်ပြေလျက်ရှိကြောင်း သိရှိရပါသည်။ ပဲထောင့်ရှည်စိုက်ပျိုးမှုအနေဖြင့် တိုင်ထောင်ဝါး၊မျိုး၊ သွင်းအားစု၊ လုပ်သားခအပါအဝင် စုစုပေါင်း(၅၀၀၀၀၀/-)ကျပ်ခန့် ကုန်ကျကြောင်း၊ ပဲထောင့်ရှည်မျိုးအနေဖြင့် အစိမ်းရောင်မျိုး၊ ကတီပါရောင်ဟူ၍ နှစ်မျိုးရှိရာ အများဆုံးစိုက်ပျိုးသောမျိုးမှာ အစိမ်းရောင်မျိုးကိုသာ အဓိကထား စိုက်ပျိုးကြကြောင်း၊ တိုင်ထောင်ပဲသည် စိုက်ပျိုးပြီး တစ်လအတွင်း ထွက်ပေါ်သောကြောင့် ရာသီမရွေး၊ အချိန်မရွေးစိုက်ပျိုးကြကြောင်း၊ တစ်ဧကအထွက်နှုန်းအနေဖြင့် (၅၀၀)ပိဿာခန့် ထွက်ရှိကြောင်း၊ အကျိုးအမြတ်အနေဖြင့် စိုက်ပျိုးစရိတ်နှုတ်ပြီး (၇၅၀၀၀၀/-)ကျပ်ခန့် မြတ်ကြောင်း၊ ပဲထောင့်ရှည်များ လှိုင်လှိုင်ခူးဆွတ်နေရပြီး ရောင်းဈေးအနေဖြင့် ပွဲရုံသွင်းဈေး တစ်ပိဿာလျှင် (၂၅၀၀/-)ကျပ် သွင်းရပြီး၊ လက်လီရောင်းဈေးအနေဖြင့် တစ်ပိဿာလျှင် (၃၀၀၀/-) ကျပ်ဖြင့် ရောင်းချကြကြောင်း၊ နေ့စဉ်ခူးဆွတ်ပြီး ရောင်းချရသည့်အတွက် မိသားစုစားဝတ်နေရေး အဆင်ပြေလျက်ရှိကြောင်း ပဲထောင့်ရှည်စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)

          မန္တလေးတိုင်းဒေသကြီး၊ ကျောက်ဆည်မြို့နယ်အတွင်းရှိတောင်သူများသည် စပါး၊ ပဲ၊ ပြောင်း၊ နှမ်း၊ ငရုတ်စသည့် သီးနှံမျိုးစုံအားစိုက်ပျိုးကြသည့်အပြင် ကြက်ဟင်းခါးသီးသီးနှံကိုလည်း မိသားစုတစ်ပိုင်တစ်နိုင်မှ စီးပွားဖြစ်အထိစိုက်ပျိုးလာကြပါသည်။ ကြက်ဟင်းခါးသီး သီးနှံသည် ခါးသည့်အရသာရှိသောကြောင့် သွေးလည်ပတ်မှုကောင်းမွန်စေခြင်း၊ မျက်စိနှင့် အာရုံကြောစနစ်ကိုကောင်းမွန်စေခြင်း၊ ကိုယ်ခံအားစနစ်ကိုလည်းကောင်းမွန်စေခြင်း၊ ဆီးချိုရောဂါဖြစ်ပွားမှုနှုန်းကိုလည်း ထိန်းချုပ်ပေးနိုင်ခြင်း၊ အမြင်အားရုံကိုလည်းကောင်းမွန်စေခြင်းနှင့် ကြက်ဟင်းခါးသီးအရည်သည်လည်းအနာနှင့် ယားယံမှုများကုသရာတွင်လည်း အလွန်အသုံးဝင်ပါကြောင်းသိရှိရပါသည်။ ကြက်ဟင်းခါးသီး သီးနှံကို ရာသီမရွေးစိုက်ပျိုးနိုင်ပြီး ဗိုလ်တစ်ထောင် မျိုးကိုအများဆုံးစိုက်ပျိုးကြပါသည်။ အများဆုံးစိုက်ပျိုးသော ကျေးရွာများမှာ ကျောင်းကုန်း၊ ကလိုင်ကျော်နှင့်မင်းစုကျေးရွာများတွင် စိုက်ပျိုးကြပါသည်။ စိုက်ပျိုးမည်ဆိုပါက မျိုးစေ့ကို ပျိုးထောင်ပြီး ရက်(၂၀)ခန့်အတွင်းတွင်စိုက်ပျိုးရပါကြောင်း၊ စိုက်ပျိုးပြီး(၃)လခန့်အကြာတွင် အသီးများစတင်ခူးဆွတ်နိုင်ပါကြောင်း၊ စတင်ခူးဆွတ်သည်မှ တစ်ပတ်နှင့်တစ်ပတ်အထွက်နှုန်းများပိုမိုလာကြောင်း၊ (၁)ဧကအထွက်နှုန်းအနေဖြင့် စတင်ခူးဆွတ်ချိန်တွင် ပိဿာ(၂၀၀-၃၀၀) ခန့်ထွက်ရှိပြီး အများဆုံးထွက်ရှိသောအချိန်တွင် ပိဿာ(၄၅၀-၅၀၀)ခန့်အထိထွက်ရှိကြောင်း၊ (၁)ဧကကုန်ကျစရိတ်အနေဖြင့် ပျိုးထောင်ခြင်း၊ မြေပြင်ခြင်း၊ သွင်းအားစု၊ လုပ်သားခ အပါအဝင် စုစုပေါင်း (၇၀၀၀၀၀/-)ကျပ်ကျော်ခန့်ကုန်ကြကြောင်း၊ ကြက်ဟင်းခါးသီးစျေးနှုန်းအနေဖြင့် လက်လီစျေးအနေဖြင့် (၁)ပိဿာလျှင်(၃၀၀၀/-)ကျပ်၊ လက်ကားစျေးအနေဖြင့်(၁)ပိဿာလျှင် (၂၅၀၀/-)စျေးနှုန်းစျေးနှုန်းများဖြင့်ရောင်းချရပါကြောင်း၊ (၁)ဧက အကျိုးအမြတ်အနေဖြင့် (၆၀၀၀၀၀/-)ကျပ်ခန့်မြတ်ကြောင်း၊ ကုန်စိမ်းသီးနှံဖြစ်သည့်အတွက် တစ်ပတ်နှင့်တစ်ပတ် စျေးနှုန်းများမတူညီကြောင်း၊ ကုန်စိမ်းပွဲစားများမှ စိုက်ခင်းများအထိ လာရောက်ဝယ်ယူသည့်အတွက်ကြောင့် သယ်ယူစရိတ်သက်သာကြောင်း၊ ပွဲစားများမှတဆင့် ရန်ကုန်၊ မန္တလေးမြို့များသို့လည်း တင်ပို့ရောင်းချကြကြောင်း၊ ကျန်းမာရေးအတွက်လည်းအသုံးဝင်ပြီး တွက်ခြေကိုက်သည့် သီးနှံဖြစ်ကြောင်း တောင်သူတစ်ဦး၏ပြောကြားချက်အရ သရှိရပါသည်။

DOCA(မန္တလေး)