ပြည်တွင်းကုန်သွယ်မှုသတင်း

               မြန်မာနိုင်ငံတွင် ဆန်စပါးကို အဓိကထားစိုက်ပျိုးသော သီးနှံဖြစ်၍ မိုးစပါးနှင့် နွေစပါး စိုက်ဧက(၁၇)သန်းခန့်ရှိပြီး ဆန်စပါးထွက်ရှိမှု၏ (၇၀)ရာခိုင်နှုန်းခန့်မှာ ပြည်တွင်းစားသုံးမှုဖြစ်ကြောင်း သိရှိရပါသည်။

              ရှမ်းပြည်နယ်(တောင်ပိုင်း)တွင် ဧည့်မထအုပ်စုဝင်စပါးမျိုးများဖြစ်သော ဒေသအခေါ် ရွှေအပ်၊ ရွှေရင်အေးစပါးမျိုးများကို အများဆုံးစိုက်ပျိုးကြပြီး ယခုအချိန်တွင် တစ်တင်းလျှင် (၃၀၀၀၀/-) ကျပ်ဖြင့် အရောင်းအဝယ်ဖြစ်နေကြောင်း သိရှိရပါတယ်။

              ညောင်ရွှေမြို့၊ ဆီဆိုင်မြို့၊ ဟိုပုံးမြို့၊ တောင်ကြီးမြို့တို့၌ အများဆုံးစိုက်ပျိုးကြပြီး စိုက်ပျိုး ထွက်ရှိသောစပါးများကို ကြိတ်ခွဲ၍ အခြားတိုင်းဒေသကြီးများဖြစ်သော ရန်ကုန်မြို့၊ မန္တလေးမြို့များသို့ လည်း တင်ပို့ရောင်းချကြကြောင်း သိရှိရပါတယ်။

              ဒေသဆန်အနေဖြင့် (၂၄)ပြည်တစ်အိတ်လျှင် (၁၃၀၀၀၀-၁၄၀၀၀၀)ကျပ်အထိရှိပြီး ၎င်းစပါးမျိုးများသည် တစ်ဧကလျှင် တင်း(၇၀-၈၀)အထိ ထွက်ရှိသောကြောင့် စိုက်ပျိုးထုတ်လုပ်သူ တောင်သူများ အနေဖြင့် နှစ်စဉ်အကျိုးအမြတ်များရရှိသည့် သီးနှံဖြစ်ကြောင်းသိရှိရပါသည်။

              ရှမ်းပြည်နယ်(တောင်ပိုင်း) အင်းလေးဒေသဖြစ်သော ညောင်ရွှေမြို့နယ်တွင် မိုးကြိုစပါး (နွေစပါး)များကိုလည်း စတင်စိုက်ပျိုးလျက်ရှိကြောင်း သိရှိရပါသည်။

DOCA(ရှမ်း)

          ရှမ်းပြည်နယ် (တောင်ပိုင်း) အောင်ပန်းဒေသတွင် ယခုတစ်ပတ်ပြောင်းသီးနှံမှာ     တစ်ပိဿာ လျှင်(၁၄၇၀-၁၄၉၀)ကျပ် အမြင့်ဈေးဖြင့်ငြိမ်နေပြီး ပြည်ပအဆွဲသွက်နေသောကြောင့် စီးဆင်းမှုမှာ အားကောင်းနေပါသည်။ကြက်သွန်ဖြူသီးနှံမှာ ဈေးကွက်အတွင်းအသစ်များ ဝင်ရောက်မှုရှိလာပြီး ရှမ်းကြက်သွန်ဖြူ(အသစ်)ထူး-၅နှင့်ထူးလွန်အရောမှာ တစ်ပိဿာလျှင် (၇၀၀၀-၈၀၀၀)ကျပ်ခန့် ဈေးရှိနေကြပြီးကြက်သွန်ဖြူအဟောင်း ထူး-၁၊ ထူး-၂ နှင့် ထူးလွန်မှာလက်ကျန်မရှိတော့ဘဲ တစ် ပိဿာလျှင် ထူး ၃-၁၁၀၀၀ကျပ်၊ ထူး ၄-၁၂၀၀၀ကျပ်၊ ထူး ၅-၁၃၀၀၀ကျပ် နှင့် ဥတစ်လုံးဆိုဒ်မှာ ၂၅၀၀၀ကျပ်ဖြင့် ပြည်တွင်းဈေးကွက်သုံးသာစီးဆင်းနေပါသည်။

          အာလူးသီးနှံမှာ ဈေးကွက်အတွင်း လှိုင်လှိုင်ဝင်ရောက်နေသဖြင့် ဈေးကျဆင်းနေပြီး တစ်ပိဿာလျှင်မားကစ်S2/ S1-၅၀၀၀ကျပ်၊ မျက်နီ S2/S1-၄၀၀၀ကျပ်၊ OK-၃၀၀၀ကျပ်၊ A1-၂၅၀၀ကျပ် နှင့် ဆွဲသီးမှာ ၂၀၀၀ ကျပ်အသီးသီးဈေးရှိနေကြပြီး ရန်ကုန်၊ မန္တလေးဒေသများမှ အဆွဲကောင်း၍ စီးဆင်းမှုမှာကောင်းနေပါ သည်။

          ချင်းသီးနှံမှာမြေနီအခက်ကြီးတစ်ပိဿာလျှင် ၃၀၀၀ကျပ် နှင့် အလတ်မှာ ၂၅၀၀ကျပ်ဖြင့် ပြည်ပဝယ်လိုအားမရှိသောကြောင့်အကျဈေးဖြင့်ငြိမ်နေပြီးစီးဆင်းမှုမှာပုံမှန်ဖြစ်နေပါသည်။

          ကုန်စိမ်းသီးနှံများတွင် ဂေါ်ဖီ (၁၀၀၀-၁၅၀၀)ကျပ်၊ ပန်းမုံလာ (၁၀၀၀-၁၅၀၀)ကျပ်၊ ရွှေပဲ (၄၀၀၀-၅၀၀၀)ကျပ်၊ မုန်ညှင်း (၈၀၀-၁၀၀၀)ကျပ်၊ ဖရုံသီး (၁၂၀၀-၁၅၀၀)ကျပ်၊ ခရမ်းသီး (၂၅၀၀-၃၀၀၀)ကျပ်၊ ခရမ်းချဉ်သီး (၆၀၀-၁၀၀၀)ကျပ်၊ ငရုတ်ပွ (၅၀၀၀-၅၅၀၀)ကျပ်၊ မုန်လာဥနီ (၂၅၀၀- ၃၀၀၀)ကျပ် နှင့် ဘိုစား (၄၅၀၀-၄၈၀၀)ကျပ်ဖြင့် ဈေးနှုန်းထူးခြားစွာပြောင်းလဲမှုမရှိဘဲ ဈေးအေး လျက်ရှိပြီး စီးဆင်းမှုမှာ ယခင်အပတ်တိုင်း ပုံမှန်ဖြစ်နေပါကြောင်း လေ့လာသိရှိရပါသည်။

DOCA(ရှမ်း)

          မကွေးတိုင်းဒေသကြီး၊ အထက်မင်းလှမြို့၊ ဇေယျာသီဈေး၌ ခရမ်းချဉ်သီး(ထိုင်ဝမ်)မျိုးကို ပတ်ဝန်းကျင်ကျေးရွာများဖြစ်သော မယ်ဇလီတော၊ ဥယျာဉ်၊ ပန်းတော်ပြင်စသည့်ကျေးရွာများအပြင် တောင်တွင်းကြီးမြို့၊ မကွေးမြို့၊ မင်းဘူးမြို့နှင့် ရှမ်းပြည်နယ် တောင်ကြီးမြို့၊ အောင်ပန်းမြို့တို့မှ မှာယူ ရောင်းချကြောင်း သိရသည်။

          ၂၀၂၅ခုနှစ်၊ ဖေဖော်ဝါရီလ(တတိယပတ်)တွင် ခရမ်းချဉ်သီး(၁)ပိဿာလျှင် အလုံးအကြီး အသေးအလိုက် ကျပ်(၉၀၀-၁၀၀၀)ဖြင့် ရောင်းချလျက်ရှိပြီး ယခင်(ဒုတိယပတ်)တွင် (၁)ပိဿာလျှင် ကျပ်(၁၀၀၀-၁၃၀၀)ဈေးနှုန်းဖြင့်ရောင်းချလျက်ရှိရာ ယခုတစ်ပတ်တွင် ခရမ်းချဉ်သီး(၁)ပိဿာလျှင် ကျပ်(၁၀၀-၃၀၀)ဈေးနှုန်းကျဆင်း၍ အရောင်းအဝယ်ဖြစ်လျက်ရှိကြောင်း၊ ယခုအချိန်တွင် ဒေသ တွင်းခရမ်းချဉ်သီးစိုက်ခင်းများမှာ လှိုင်လှိုင်ထွက်ရှိနေသည့်အတွက် ဈေးနှုန်းများမှာတဖြေးဖြေး ကျဆင်းလာရခြင်းဖြစ်ကြောင်း သိရှိရပါသည်။

DOCA(မကွေး)

          မကွေးတိုင်းဒေသကြီး၊ အထက်မင်းလှမြို့၊ ပန်းတော်ပြင်ကျေးရွာအုပ်စုရှိ မယ်ဇလီတော ကျေးရွာ၌ ၂၀၂၄ခုနှစ်၊ နိုဝင်ဘာလတွင် ပျိုးပင်စိုက် ကြက်သွန်နီ ဧက(၅၀)စိုက်ပျိုးခဲ့ရာ ၂၀၂၅ခုနှစ်၊ ဖေဖော်ဝါရီလဆန်းတွင် စတင်တူးဖော်လျက်ရှိကြောင်း သိရသည်။

          စိုက်ပျိုးရာတွင် ရေသွင်းဘောင်တင်စနစ်ဖြင့် စိုက်ပျိုးထားကြောင်း၊ မျိုးအနေဖြင့် ပျိုးပင်ကို ရေနံချောင်းမြို့မှ ဝယ်ယူကြောင်း၊ (၁)ဧကလျှင် မျိုးဖိုး၊ လုပ်အားခ၊ ရေသွင်းခ၊ မြေပြုပြင်ခနှင့် အခြား သွင်းအားစုစရိတ်အပါအဝင် ကျပ်(၃၈)သိန်းခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် ပိဿာချိန်(၃၀၀၀)ခန့်ထွက်ရှိကြောင်း၊ ဈေးနှုန်းအနေဖြင့် (၁)ပိဿာလျှင် ကျပ်(၂၇၀၀)ဖြင့် ရောင်းချ ရ၍ အကျိုးအမြတ်အနေဖြင့် ကျပ်(၄၃)သိန်းခန့်ရရှိကြောင်း၊ ဈေးကွက်အနေဖြင့် ရန်ကုန်မြို့၊ ဘုရင် နောင်ပွဲရုံသို့ တိုက်ရိုက်တင်ပို့ရောင်းချကြောင်း၊ ယခုနှစ်တွင် ရာသီဥတုမညီမျှမှုကြောင့် ကြက်သွန်နီ ပင်များ အသေအပျောက်များပြီး ယခင်နှစ်ကထက်ကြက်သွန်အထွက်နှုန်းလျော့ကျသော်လည်း ဈေးကောင်းရသောကြောင့် စိုက်တောင်သူများအနေဖြင့် ထိုက်သင့်သည့် အကျိုးအမြတ်ရရှိကြောင်း မယ်ဇလီ တောကျေးရွာနေ ကြက်သွန်နီစိုက် တောင်သူတစ်ဦးထံမှ သိရှိရပါသည်။

DOCA(မကွေး)

          မကွေးတိုင်းဒေသကြီး၊ မကွေးခရိုင်၊ မကွေးဈေးကွက်သို့ မြို့နယ်အတွင်းရှိ မိကျောင်းရဲ၊ လျောင်းတော်ဦး၊ ကံသစ်၊ ရွာဟောင်းကန်၊ သစ်ရာကောက် စသည့်ကျေးရွာများနှင့် မြို့သစ်၊ နတ်မောက်မြို့တို့မှထွက်ရှိသော နှမ်းမျိုးစုံနှင့် အခြားပဲမျိုးစုံများ ဝင်ရောက်ရောင်းဝယ် ဖောက်ကား လျက်ရှိပါသည်။

          ၂၀၂၅ခုနှစ်၊ ဖေဖော်ဝါရီလ(တတိယပတ်)တွင် နှမ်းနီ(၁)တင်းလျှင် ကျပ်(၁၁၅၀၀၀)၊ နှမ်းဖြူ (၁)တင်းလျှင် ကျပ်(၁၂၅၀၀၀)၊ နှမ်းနက်(စမုံ) (၁)တင်းလျှင် ကျပ်(၂၃၀၀၀၀)၊ နှမ်းညိုကြား (၁)တင်း လျှင် ကျပ်(၉၇၀၀၀)ဖြစ်ပြီး နှမ်းသီးနှံထွက်ပေါ်ရာသီမဟုတ်သည့်အတွက် အရောင်းအဝယ်အေး လျက်ရှိကြောင်း၊ တင်ပို့မှုအနေဖြင့် တစ်ပတ်အတွင်း မန္တလေးမြို့သို့အိတ်ရေ(၃၀၀)တင်ပို့ခဲ့ပြီး တန်ချိန်(၁၁၀) အရောင်းအဝယ်ဖြစ်ခဲ့ကြောင်း သိရသည်။

DOCA(မကွေး)