ပြည်တွင်းကုန်သွယ်မှုသတင်း

ပဲခူးတိုင်းဒေသကြီး၊ ပြည်ခရိုင်၊ ပြည်မြို့မှ မကွေးတိုင်းဒေသကြီး၊ မင်းဘူးမြို့နယ်၊ ရွှေစက်တော်ဘုရားသို့သွားသော လမ်းမဘေးတွင် လေးပင်ဆီးသီးကဲ့သို့ထွက်ရှိသော ဇီးကြက်တူရွေးဆီးသီးများ အရောင်းအဝယ်ဖြစ်လျက်ရှိပါသည်။ ဇီးကြက်တူရွေးဆီးသီးသည် စလေဆီးသီးထက်ပို၍စားကောင်းပြီး အသားများကာ အစေ့မပါသောဆီးသီးဖြစ်ပါသည်။ အစိမ်းလုံးမှ မှည့်သွားသည်အထိ ပျော့မသွားဘဲ အကြွပ်သီးဖြစ်ကာ အလွန်ချိုသောအသီးဖြစ်ပါသည်။ အထားခံသောအသီးဖြစ်သောကြောင့် နိုင်ငံခြားအထိပို့ရသော အသီးဖြစ်ကြောင်းလည်းသိရပါသည်။
ဇီးကြက်တူရွေးမှာ ဒီဇင်ဘာလမှ ဖေဖော်ဝါရီလအထိထွက်ရှိကြောင်းသိရှိရပါသည်။ ပြည်မြို့ အတွင်းရှိ Order စနစ်ဖြင့် Online Shopping ရောင်းချသူများ လက်မလည်အောင်ရောင်းချနေသော အသီးဖြစ်ပါသည်။ ဇီးကြက်တူရွေးဆီးသီးကို လေးပင်ဆီးသီးကဲ့သို့ ပြည်ရာနှင့်ချီ၍ ရောင်းချနေကြောင်းလည်းသိရှိရပါသည်။ ဈေးနှုန်းများအနေဖြင့် ဇီးကြက်တူရွေးဆီးသီးတစ်ပြည်လျှင် ၄၂၀၀ကျပ်ဖြင့်ရောင်းချကြောင်းသိရှိရပါသည်။
DOCA(ပဲခူး)

     ပဲခူးတိုင်းဒေသကြီး၊ ပြည်ခရိုင်၊ ပေါက်ခေါင်းမြို့နယ်တွင် တိုင်ထောင်ပဲများစိုက်ပျိုးထားရှိရာ မြို့နယ်တာဝန်ခံနှင့် ဝန်ထမ်းများသည် (၂၂-၁-၂၀၂၄) ရက်နေ့၊ နံနက် (၁၀:၀၀)နာရီအချိန်တွင် သဖန်းချိုအုပ်စု၊ သဖန်းချိုကျေးရွာသို့သွားရောက်၍ ကွင်းဆင်းစစ်ဆေးလေ့လာခဲ့ကြပါသည်။

     အဆိုပါတိုင်ထောင်ပဲစိုက်ပျိုးသူ တောင်သူဦးမောင်စောမှာ ၎င်းအနေဖြင့် တိုင်ထောင်ပဲ (၀.၂၅)ဧကကို တစ်ယောက်စိုက်စိုက်ပျိုးထားရှိပြီး မျိုးစေ့ချစိုက်ပျိုးထားကြောင်း၊ ယခုအချိန်တွင် တိုင်ထောင်ပဲများထွက်ပေါ်လာ၍ ဈေးကွက်သို့ သွားရောက်ရောင်းချမှုလည်းရှိပြီး စိုက်ခင်းထဲအထိ လာရောက်ဝယ်ယူသူများလည်းရှိကြောင်း၊ တိုင်ထောင်ပဲ (၀.၂၅)ဧကတွင် စုစုပေါင်း ကုန်ကျစရိတ်မှာ မျိုးစေ့၊ တိုင်ဖိုး၊ ဆေးဖိုး၊ ခူးဆွတ်ခအပါအဝင် (၂၈၆၀၀၀)ကျပ်ခန့်ကုန်ကျကြောင်းသိရပါသည်။ တိုင်ထောင်ပဲထွက်ပေါ်ချိန်တွင် (၀.၂၅)ဧက တစ်ယောက်စိုက်ကို (၄၇၅၀၀)တောင့်ထွက်ရှိပြီး ရောင်းဈေးမှာ တစ်ထောင့်လျှင် (၁၅)ကျပ်နှုန်းဖြင့်ရောင်းချရ၍ ဝင်ငွေအနေဖြင့်  (၇၁၂၅၀၀)ကျပ်ရရှိကြောင်းသိရှိရပါသည်။ ထို့ကြောင့် တိုင်ထောင်ပဲရာသီချိန်တွင် တောင်သူ၏အကျိုးအမြတ်မှာ (၄၂၆၅၀၀)ကျပ်ခန့်အကျိုးအမြတ်ရရှိသဖြင့် ထပ်မံတိုးချဲ့စိုက်ပျိုးလျှင် ဒီထက်မက ဝင်ငွေများရရှိနိုင်မည်ဖြစ်ကြောင်း လေ့လာသုံးသပ်တင်ပြလိုက်ရပါသည်။

DOCA(ပဲခူး)

     စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင် ဖြန့်ဖြူးခြင်းလုပ်ငန်းကြီးကြပ်ရေး ကော်မတီအနေဖြင့် စားအုန်းဆီ ကမ္ဘာ့ဈေးနှုန်းဖြစ်ပေါ် ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများ ဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပို့သည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိပါသည်။

    ယခုအပတ်အတွင်း ကမ္ဘာ့စားအုန်းဆီ ထုတ်လုပ်တင်ပို့သည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ ၂၀၂၄ ခုနှစ်၊ ဇန်နဝါရီလ ၂၉ ရက်နေ့မှ ဖေဖော်ဝါရီလ ၄ ရက်နေ့အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာလျှင် ၅,၃၈၀ ကျပ်ဖြစ်ကြောင်း ထုတ်ပြန်ကြေညာထားပါသည်။

    ထို့အပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့်ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေးထုတ် ပြန်ထားသည်။

     အခြေခံလက်ကားရည်ညွှန်းဈေးနှုန်းများကို စားသုံးသူရေးရာဦးစီးဌာန၏ Website: www.doca.gov.mm၊  Facebook Page နှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

    ၂၇.၁.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

၂၆.၁.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။