ပြည်တွင်းကုန်သွယ်မှုသတင်း

       ပေါက်ခေါင်းမြို့နယ်၌ MSMEs လုပ်ငန်းအဖြစ် ဆပ်ပြာနှင့် ဆပ်ပြာအမျိုးမျိုးထုတ်လုပ်ခြင်းလုပ်ငန်းများကို တစ်နိုင်တစ်ပိုင်လုပ်ကိုင်လျက်ရှိပါသည်။ ထိုအထဲတွင် ဖြူစင်ရှင်းသန့် ဆပ်ပြာဆီလုပ်ငန်းလုပ်ကိုင်သည့် ဒေါ်သီတာနှင့်သွားရောက်တွေ့ဆုံမေးမြန်းခဲ့ပါသည်။ ဒေါ်သီတာသည် ပေါက်ခေါင်းမြို့နယ်၊ ကမ္မကြီးကျေးရွာ၊ ငါးခူအိုင်အုပ်စုတွင်နေထိုင်၍ ၂၀၂၃ခုနှစ်မှစတင်၍ ဆပ်ပြာဆီလုပ်ငန်းကို စတင်လုပ်ကိုင်ခဲ့သူဖြစ်ပါသည်။ ဆပ်ပြာကုန်ကြမ်းများကို ပြည်မြို့ရှိ စိန်ရတီစတိုးဆိုင်မှဝယ်ယူပြီး ဆပ်ပြာခရင်မ်၊ ဘက်စုံသုံးဆပ်ပြာနှင့် ရှားစောင်းမျက်နှာသစ်ဆပ်ပြာအမျိုးမျိုးကို ထုတ်လုပ်ရောင်းချလျက်ရှိပါသည်။ ထုတ်လုပ်မှုအနေဖြင့် တစ်နေ့လျှင် ဆပ်ပြာခရင်မ် (၁၆)ဘူး၊ ဘက်စုံသုံးဆပ်ပြာရေ (၁၅)ဘူးနှင့် ရှားစောင်းလက်ပတ်မျက်နှာသစ်ဆပ်ပြာခဲ (၁၅)ခဲခန့်ထုတ်လုပ်နိုင်ပြီး မြို့နယ်အတွင်းရှိကျေးရွာများသို့ တင်ပို့ရောင်းချလျက်ရှိပါသည်။ ရောင်းချသောဈေးနှုန်းများအနေဖြင့် သြဂုတ်လ၊ တတိယအပတ်တွင် ဆပ်ပြာခရင်မ်တစ်ဘူးလျှင် ၂၅၀၀ကျပ်၊ ဘက်စုံသုံးဆပ်ပြာတစ်ဘူးလျှင် ၁၂၀၀ကျပ်၊ ရှားစောင်းမျက်နှာသစ်တစ်ခဲလျှင် ၃၀၀၀ကျပ်တို့ဖြင့် ရောင်းချလျက်ရှိကြောင်းသိရှိရပါသည်။

DOCA(ပဲခူး)

      တောင်ငူမြို့တွင် အာလူးမှာ ယခင်က တစ်ပိဿာလျှင် အသေး ၂၀၀၀ကျပ်၊ အလတ် ၂၅၀၀ကျပ်နှင့် အကြီး ၃၀၀၀ကျပ်ရှိခဲ့ရာမှ ယခုသြဂုတ်လ၊ တတိယအပတ်တွင် တစ်ပိဿာလျှင် အသေး ၃၈၀၀ကျပ်၊ အလတ် ၄၀၀၀ကျပ်နှင့် အကြီး ၄၅၀၀ကျပ်ရှိသဖြင့် တစ်ပိဿာလျှင် ၁၅၀၀ကျပ်မှ ၁၈၀၀ကျပ်အထိဈေးနှုန်းမြင့်တက်လာပါသည်။

   မြေပဲဆန်(အဖြူ)မှာ ယခင်လတွင် တစ်ပိဿာလျှင် ၈၅၀၀ကျပ်ရှိခဲ့ရာမှ ယခုသြဂုတ်လ၊ တတိယအပတ်တွင် တစ်ပိဿာလျှင် ၁၁၀၀၀ကျပ်ရှိသဖြင့် တစ်ပိဿာလျှင် ၂၅၀၀ကျပ်ဈေးတက်ပါသည်။ မြေပဲဆန် (အနီ)မှာ ယခင်လတွင် တစ်ပိဿာလျှင် ၈၅၀၀ကျပ်ရှိခဲ့ရာမှ ယခုသြဂုတ်လ၊ တတိယအပတ်တွင် တစ်ပိဿာလျှင် ၁၁၅၀၀ကျပ်ရှိသဖြင့် တစ်ပိဿာလျှင် ၃၀၀၀ကျပ်ဈေးနှုန်းမြင့်တက်လာပါသည်။

         ကုလားပဲခြမ်းမှာ ယခင်လတွင် တစ်ပိဿာလျှင် ၆၂၀၀ကျပ်ရှိခဲ့ရာမှ သြဂုတ်လ၊ တတိယအပတ်တွင် တစ်ပိဿာလျှင် ၇၅၀၀ကျပ်ရှိသဖြင့် တစ်ပိဿာလျှင် ၁၃၀၀ကျပ်ဈေးနှုန်းမြင့်တက်လာကြောင်းနှင့် အရောင်းအဝယ်မှာ ပုံမှန်အတိုင်းရှိကြောင်း တောင်ငူမြို့ရှိ ကုန်စုံဆိုင်များမှသိရပါသည်။

DOCA(ပဲခူး)

     တောင်ငူခရိုင်၊ ဖြူးမြို့နယ်ရှိ လူငယ့်အားမာန် စိုက်ပျိုးရေးနှင့် လုပ်ငန်းစုံသမဝါယမအသင်းလီမီတက်သည် အသင်းသားများနှင့်မိသားစုဝင်များ လူမှုဘဝဖွံ့ဖြိုးတိုးတက်ရေးအတွက် အလုပ်အကိုင်အခွင့်အလမ်းများဖော်ဆောင်ပေးနိုင်သည့်အပြင် ဒေသစီးပွားရေးဖွံဖြိုးတိုးတက်ရေးကိုလည်း တစ်ဖက်တစ်လမ်းမှ အထောက်အကူပြုလျက်ရှိပါသည်။

        အသင်းပိုင်လယ်မြေ ၅၁၂ဧကရှိပြီး လက်ရှိတွင် မိုးစပါးဧက၅၀၀နှင့် ကြံ ၁၂ဧကစိုက်ပျိုးထားရှိပါသည်။ စပါးစိုက်ဧက ၅၀၀အနက် ဧက၃၀၀ကို နွေစပါးမျိုးထုတ်ရန်စိုက်ပျိုးပြီး ဧက၂၀၀ကို စားစပါးအတွက် စိုက်ပျိုးခြင်းဖြစ်ပါသည်။ မျိုးစပါးထုတ်မည့်ဧက ၃၀၀ကို ကောက်စိုက်စက်ဖြင့်စိုက်ပျိုးပြီး စားစပါးကို လူအားဖြင့်စိုက်ပျိုးပါသည်။

       မိုးစပါးအပြီးတွင် ဧက၅၀ကို ပဲတီစိမ်း၊ နွေစပါး နှစ်စဉ် သုံးသီးစိုက်ပျိုးပါသည်။ ဆီထွက်သီးနှံအတွက် နှမ်းနှင့် မြေဆီဩဇာအတွက် ပိုက်ဆံလျှော်စိုက်ပျိုးခြင်းကို မိုးစပါးအပြီးတွင် သီးထပ်အဖြစ် စိုက်ပျိုးကြောင်းသိရပါသည်။

       စိုက်ပျိုးရေးအခြေခံမှ ထွက်ရှိလာသောစပါးများကို အခြောက်ခံခြင်း၊ ကြိတ်ခွဲခြင်း၊ သဘာဝမြေဆီမြေဩဇာရရန်နှင့် လုပ်ငန်းခွင်တွင် အသုံးပြုနိုင်ရန်အတွက် ခိုင်းနွားမွေးမြူခြင်း၊ အသင်းသားများ၏ လူမှုလိုအပ်ချက်အတွက် အရောင်းဆိုင်ဖွင့်လှစ်ခြင်းကိုလည်း ဆောင်ရွက်ထားရှိပါသည်။

      အသင်းကို ၁၉၇၆ခုနှစ်တွင် စတင်တည်ထောင်ခဲ့ပြီး ယခုအခါတွင် အမှုဆောင်(၅)ဦး၊ အသင်းသား (၄၅)ဦးရှိပြီး အဆိုပါအသင်းသားဝန်ထမ်းမိသားစု ၁၀၀ဦးခန့်ကို အလုပ်အကိုင်ဖော်ဆောင်ပေးနိုင်ကြောင်းသိရပါသည်။

DOCA(ပဲခူး)

      တောင်ငူမြို့ရှိ အိမ်ဆောက်ပစ္စည်းအရောင်းဆိုင်များတွင် ကြံ့နှစ်ကောင်(အနီ)အမှတ်တံဆိပ် ဘိလပ်မြေမှာ ယခင်လကုန်တွင် တစ်အိတ်လျှင် ၉၈၀၀ကျပ်ရှိခဲ့ရာမှ သြဂုတ်လ၊ တတိယအပတ်တွင် တစ်အိတ်လျှင် ၁၁၅၀၀ကျပ်ရှိသဖြင့် နှစ်ပါတ်အတွင်း တစ်အိတ်လျှင် ၁၇၀၀ကျပ်ဈေးမြင့်တက်လျက်ရှိပါသည်။

       Alpna အမှတ်တံဆိပ်နှင့် Apche အမှတ်တံဆိပ် ဘိလပ်မြေများမှာ ယခင်လကုန်ရက်တွင် တစ်အိတ်လျှင် ၉၆၀၀ကျပ်ရှိခဲ့ရာမှ သြဂုတ်လ၊ တတိယအပတ်တွင် တစ်အိတ်လျှင် ၁၁၃၀၀ကျပ်ရှိသဖြင့် နှစ်ပတ်အတွင်း တစ်အိတ်လျှင် ၁၇၀၀ကျပ်ဈေးမြင့်တက်လာပါသည်။

       Max အမှတ်တံဆိပ် ဘိလပ်မြေမှာ ယခင်လကုန်ရက်တွင် တစ်အိတ်လျှင် ၉၅၀၀ကျပ်ရှိခဲ့ရာမှ သြဂုတ်လ၊ တတိယအပတ်တွင် တစ်အိတ်လျှင် ၁၁၂၀၀ကျပ်ရှိသဖြင့် နှစ်ပတ်အတွင်း တစ်အိတ်လျှင် ၁၇၀၀ကျပ်ဈေးတက်မြင့်ကြောင်းနှင့် မိုးကာလဖြစ်သဖြင့် အရောင်းအဝယ်ပါးကြောင်းသိရပါသည်။

DOCA(ပဲခူး)

      မကွေးတိုင်းဒေသကြီး၊  သရက်ခရိုင်၊ အထက်မင်းလှမြို့နယ်အတွင်းရှိ ကျေးရွာများဖြစ်သော ပန်းတော်ပြင်၊ ရေခါး၊ ကုန်းကြီး၊ တောင်ဦး၊ လယ်လှနှင့် ဒေါင်းဘုတ် စသည့်ကျေးရွာများတွင်  ချည်မျှင်ရှည်ဝါကို ၂၀၂၄ခုနှစ်၊ ဩဂုတ်လ(တတိယပတ်)မှ စတင်၍ စိုက်ပျိုးနေပြီဖြစ်ကြောင်း သိရသည်။

      အထက်မင်းလှမြို့နယ်၊ တောင်ဦးကျေးရွာအုပ်စုရှိ တောင်ဦးကျေးရွာတွင် ရွှေတောင်(၈)၊ ရွှေတောင်(၁၀)မျိုးကို ဝါစိုက်တောင်သူ(၂၅၀)ဦးခန့်မှ စိုက်ဧက(၈၀၀)ဧကခန့် စိုက်ပျိုးထားကြောင်း၊ စိုက်ပျိုးရာတွင် ထွန်ကြောင်းဆွဲအစေ့ချစနစ်နှင့် ကျဲပက်စနစ်ကို အသုံးပြု၍ စိုက်ပျိုးကြကြောင်း သိရ သည်။ ၎င်းအနေဖြင့် ရွှေတောင်(၁၀)မျိုးကို မြို့နယ်စိုက်ပျိုးရေးဦးစီးဌာနမှ (၁)ပိဿာလျှင် ကျပ်(၃၀၀၀)ဖြင့်ဝယ်ယူ၍  ထွန်ကြောင်း ဆွဲစနစ်ဖြင့် (၁)ဧကခွဲခန့်စိုက်ပျိုးထားကြောင်း၊ ရက်ပေါင်း (၁၂၀)ကျော်တွင် ဝါကောက်ယူနိုင်ပြီဖြစ်ကြောင်း၊ (၁)ဧကလျှင် မျိုး(၇)ပိဿာခန့် ကုန်ကျကြောင်း၊  စိုက်ပျိုးမှုကုန်ကျစရိတ်အနေဖြင့်  (၁)ဧကလျှင် မျိုးခ၊ မြေပြုပြင်ခ၊ လုပ်အားခအပါအဝင် စုစုပေါင်း ကျပ်(၃၀၀၀၀၀)ခန့် ကုန်ကျကြောင်း၊ ယခင်နှစ်က(၁)ဧကလျှင် ဝါပိဿာ(၅၀၀)ကျော်ထွက်ရှိပြီး (၁)ပိဿာလျှင် ကျပ်(၂၈၀၀ - ၃၂၀၀)ဈေးနှုန်းရရှိခဲ့ကြောင်း၊ ဝါသီးနှံမှာ ရာသီဥတုကောင်းမွန်မူ ပေါ်မူတည်၍ အထွက်နှုန်းကွာခြားချက်ရှိကြောင်း၊ ယခင်နှစ်က မင်းလှမြို့နယ်၌ ရာသီဥတုကြောင့် ဝါသီးနှံအထွက်နှုန်းလျော့နည်းခဲ့သော်လည်း ဈေးကောင်းရရှိသောကြောင့် ဝါစိုက်တောင်သူများ အနေဖြင့် အကျိုးအမြတ်များရရှိခဲ့ကြကြောင်း၊ ဈေးကွက်အနေဖြင့် အထက်မင်းလှမြို့ရှိ ဝါပွဲရုံများသို့ တင်ပို့ရောင်းချကြောင်း တောင်ဦးကျေးရွာနေ ဝါစိုက်တောင်သူတစ်ဦးထံမှ  သိရှိရပါသည်။

DOCA(မကွေး)