ပြည်တွင်းကုန်သွယ်မှုသတင်း

   ၂၀.၂.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

    တောင်ငူမြို့တွင် ပေါ်ဆန်း ဆန်သစ်များဝင်ရောက်လာပြီဖြစ်ရာ ဖေဖော်ဝါရီလ ဒုတိယပတ်တွင် ရွှေဘိုပေါ်ဆန်း တစ်အိတ်လျှင် ၁၅၀၀၀၀ ကျပ်၊ ဖျာပုံပေါ်ဆန်း တစ်အိတ်လျှင် ၁၂၅၀၀၀ ကျပ်၊ ဒေသပေါ်ဆန်းမှာ တစ်အိတ်လျှင်   ၁၁၅၀၀၀ ကျပ်၊ ဧည့်မထဆန် တစ်အိတ်လျှင် ၈၇၀၀၀ ကျပ်မှ ၉၀၀၀၀ ကျပ်ဖြင့် ယခင်အပတ်ကအတိုင်း ဈေးနှုန်းတည်ငြိမ်နေပါသည်။

     ဖေဖော်ဝါရီလ ၊ ဒုတိယပတ်တွင် စပါးတင်း ၁၀၀ လျှင် ၂၄၀၀၀၀၀ ကျပ်၊ ဆန်ကွဲကြီး တစ်အိတ်လျှင် ၅၅၀၀၀ ကျပ်၊ ဆန်ကွဲသေး တစ်အိတ်လျှင် ၄၇၀၀၀ ကျပ်၊ ဖွဲနု တစ်အိတ်လျှင် ၂၀၀၀၀ ကျပ်ဖြင့် ယခင်အပတ်ကအတိုင်း ဈေးနှုန်းတည်ငြိမ်နေပါသည်။

     မတ်ပဲ(၃၀ ပိဿာအိတ်)မှာ တစ်အိတ်လျှင် ၁၅၇၀၀၀ ကျပ်ဖြင့် ဈေးနှုန်းတည်ငြိမ်နေပြီး ပဲတီစိမ်းမှာ ယခင်ဖေဖော်ဝါရီ ပထမအပတ်က တစ်အိတ်လျှင် ၁၂၅၀၀၀ ကျပ်ရှိရာမှ ယခုဖေဖော်ဝါရီ ဒုတိယအပတ်တွင် တစ်အိတ်လျှင် ၁၁၇၀၀၀ ကျပ်ဖြင့် ဈေးနှုန်းအနည်းငယ်ကျပါသည်။ ပဲလွန်းဖြူမှာ ယခင် ဖေဖော်ဝါရီ ပထမအပတ်က တစ်အိတ်လျှင် ၁၀၁၀၀၀ ကျပ်ရှိရာမှ ယခုဖေဖော်ဝါရီ ဒုတိယအပတ်တွင် ၁၁၀၀၀၀ ကျပ်ဖြင့် ဈေးတက်ကြောင်း သိရှိရပါသည်။

DOCA(ပဲခူး)

     တောင်ငူခရိုင်၊ ဖြူးမြို့တွင် မြေပဲဆီမှာ တစ်ပိဿာလျှင် ၁၅၀၀၀ ကျပ်ဖြင့် ဈေးနှုန်းတည်ငြိမ်နေပြီး စားအုန်းဆီမှာ တစ်ပိဿာလျှင် ၆၂၀၀ ကျပ်ဖြင့် ရောင်းချပါသည်။

     ကြက်သွန်နီမှာ ယခင်တစ်လခန့်က တစ်ပိဿာလျှင် ၃၅၀၀ ကျပ်မှ ၄၅၀၀ ကျပ်ရှိရာမှ ယခုဖေဖော်ဝါရီ ဒုတိယအပတ်တွင် တစ်ပိဿာလျှင် ၂၂၀၀ ကျပ်မှ ၂၅၀၀ ကျပ်အထိ ဈေးနှုန်းကျဆင်းပြီး ကြက်သွန်ဖြူမှာ တစ်ပိဿာလျှင် ၁၆၀၀၀ ကျပ်မှ ၂၀၀၀၀ ကျပ်၊ အာလူးမှာ တစ်ပိဿာလျှင် ၂၅၀၀ ကျပ်မှ ၃၀၀၀ ကျပ်ဖြင့် ဈေးနှုန်းတည်ငြိမ်နေပါသည်။

      ငရုတ်သီးခြောက်မှာ ယခင်တစ်လခန့်က တစ်ပိဿာလျှင် ၁၂၀၀၀ ကျပ်မှ ၁၅၀၀၀ ကျပ် အထိရှိရာမှ ယခုဖေဖော်ဝါရီ ဒုတိယအပတ်တွင် တစ်ပိဿာလျှင် ၁၁၀၀၀ ကျပ်မှ ၁၃၀၀၀ ကျပ် အထိဖြင့် ဈေးနှုန်းအနည်းငယ်ကျဆင်းပါသည်။

       ကုလားပဲခြမ်းမှာ ယခင်တစ်လခန့်က တစ်ပိဿာလျှင် ၆၁၅၀ ကျပ်ရှိရာမှ ယခုဖေဖော်ဝါရီ ဒုတိယအပတ်တွင် တစ်ပိဿာလျှင် ၇၀၀၀ ကျပ်ဖြင့်ဈေးတက်ပြီး ကုလားပဲလုံးမှာ တစ်ပိဿာလျှင် ၅၀၀၀ ကျပ်ဖြင့် ဈေးနှုန်းတည်ငြိမ်နေပါသည်။

        မြေပဲဆံ(အဖြူ)မှာ ၇၅၀၀ ကျပ်ဖြင့် ဈေးနှုန်းတည်ငြိမ်နေပြီး မြေပဲဆံ(အနီ)မှာ ယခင် တစ်လခန့်က တစ်ပိဿာလျှင် ၈၀၀၀ ကျပ်ရှိရာမှ ယခုဖေဖော်ဝါရီ ဒုတိယအပတ်တွင် တစ်ပိဿာလျှင် ၈၅၀၀ ကျပ်ဖြင့် ဈေးနှုန်းအနည်းငယ်တက်ကြောင်း သိရှိရပါသည်။

DOCA(ပဲခူး)

     မြန်မာလူမျိုးတို့သည် မိမိတို့အိမ်များတွင်လည်းကောင်း၊ ဘုရားကျောင်းကန်များတွင်လည်းကောင်း ဘုရားပန်းများကို ဝေဝေဆာဆာကပ်လှူကြသဖြင့် ပန်းစိုက်တောင်သူများမှာ ရောင်းအားကောင်းလျက်ရှိပါသည်။ တောင်ငူမြို့နယ် ရှမ်းဝတီးကျေးရွာတွင် ပန်းမျိုးစုံစိုက်ပျိုးလျက်ရှိရာ ယခုအခါ သစ္စာပန်းများ လှိုင်လှိုင်ပေါ်နေပြီ ဖြစ်၍ တောင်ငူမြို့ ညောင်ပင်ဈေးသို့ လာရောက်၍ ရောင်းချကြပါသည်။

      သစ္စာပန်းသည် အထပ်လိုက်ပွင့်သည့်ပန်းဖြစ်ပြီး ရိုးတံမှာ ရေတွင်အချိန်ကြာမြင့်စွာထားသော်လည်း အနံ့ဆိုးမရှိသဖြင့် လူကြိုက်များသည့် ပန်းဖြစ်ပါသည်။ ယခင်နှစ်များက သစ္စာပန်း ရောင်စုံများ မတွေ့ရသလောက်ဖြစ်သော်လည်း ယခုနောက်ပိုင်းတွင် ရောင်စုံသစ္စာပန်းများ စိုက်ပျိုး လာကြပါသည်။

    သစ္စာပန်းရောင်စုံ ၅ တန်ပါတစ်စည်းလျှင် ၇၀၀ ကျပ်မှ ၁၀၀၀ ကျပ်အထိ ရောင်းချရကြောင်း၊ သစ္စာပန်းများသည် ဘုရားကပ်လှူရာတွင် အခြားပန်းများနှင့်မတူ တမူထူးသပ္ပာယ်သည့်အတွက် လူကြိုက်များ၍ ရောင်းအားကောင်းကြောင်း သိရှိရပါသည်။

DOCA(ပဲခူး)

     ပဲခူးတိုင်းဒေသကြီး ၊  တောင်ငူခရိုင်၊  တောင်ငူမြို့နယ်တွင် မတ်ပဲခင်းများ ရိတ်သိမ်းပြီးစီး၍ နွေစပါးများ စိုက်ပျိုးနေကြပြီ ဖြစ်ပါသည်။ တောင်ငူမြို့နယ်တွင် ယခုနှစ်အတွင်း နွေစပါး ၁၉၂၇၁ ဧက စိုက်ပျိုးရန် လျာထားကြောင်း သက်ဆိုင်ရာဌာနများ၏ စာရင်းဇယားများအရ သိရှိရပါသည်။ တောင်ငူမြို့နယ်တွင် နွေစပါးစိုက်လယ်မြေများကို အရှေ့ရိုးမတောင်ပေါ်ရှိ ပသိဆည်၊ ကရင်ချောင်းဆည်၊ ကမ်းနီဆည်၊ ပဲခူးရိုးမတောင်ပေါ်ရှိ ခပေါင်းဆည်နှင့် စစ်တောင်းမြစ်ရေတင် စီမံကိန်းတို့မှ ရေပေးဝေလျက်ရှိပါသည်။

     တောင်ငူမြို့နယ်၏ ပျှမ်းမျှမိုးရေချိန်လက်မမှာ ၇၆.၁၆ ရှိပြီး ယခုနှစ်မိုးရွာသွန်းမှုမှာ မိုးရေချိန် လက်မ ၇၀.၆၁ ရှိရာ ပျှမ်းမျှမိုးရေချိန်ထက် လျော့နည်းသော်လည်း ဆည်များတွင် နွေစပါး အတွက် စိုက်ပျိုးရေလုံလောက်စွာ ရှိနေပါသည်။ နွေစပါး ပန်းတိုင်အထွက်နှုန်း ရရှိရေးအတွက် စိုက်ပျိုးရေးဦးစီးဌာနမှ မျိုးကောင်းမျိုးသန့် ရရှိစေရေးနှင့် သွင်းအားစုများရရှိစေရေးကို ဆောင်ရွက်ပေးလျက်ရှိပါသည်။ စိုက်ပျိုးစရိတ်ရရှိစေရန် အတွက်လည်းစိစစ်၍ ချေးငွေများရရှိအောင် ကူညီဆောင်ရွက်ပေးပါသည်။

    နွေစပါးစိုက်ပျိုးမည့် တောင်သူလယ်သမားကြီးများအတွက် ကျေးရွာအုပ်စုအလိုက် ကွင်းဆင်း၍ စပါးဆားရည်စိမ်စိုက်ပျိုးခြင်းနှင့် အကျိုးသက်ရောက်မှုများ၊ ဘောင်စနစ်ဖြင့် ပျိုးထောင် ခြင်း၊ မျိုးစေ့များ ပူးကပ်ခြင်းမရှိအောင် မျိုးစေ့ချ စိုက်ပိုးခြင်း၊ ပျိုးခင်းစနစ်တကျ ပြုစုခြင်း၊ ကောက်ကွက်မှန်အောင် စိုက်ပျိုးခြင်း၊ သွင်းအားစုများအား အချိန်ကိုက် အချိုးကျထည့်သွင်းခြင်း၊ ပေါင်းမြက်ရှင်းလင်းခြင်း၊ ပိုးမွှားရောဂါ ကာကွယ်နှိမ်နင်းခြင်း၊ အောင်ရေထုတ်ခြင်း၊ ရိတ်သိမ်းချိန် မှန်ကန်အောင် ဆောင်ရွက်ခြင်း နည်းစနစ်များကို သင်တန်းပေးခြင်းများကို ဆောင်ရွက်ပေးပါသည်။

     နွေစပါးအထွက်တိုးလျှင် အပိုဝင်ငွေတိုးမည်ဖြစ်သဖြင့် စပါးစိုက်ပျိုးခြင်းကို အားထည့်၍ ဆောင်ရွက်ကြပါသည်။ ခပေါင်းရေလှောင်တမံမှ ၁၂၂၄၄ ဧက၊ ပသိဆည်မှ ၁၅၁၁ ဧက၊ ကမ်းနီ ရေလွှဲဆည်မှ ၁၃၃၉ ဧက၊ ကရင်ချောင်းရေလွှဲဆည်မှ ၆၁၆ ဧက၊ သဖန်းပင်နှင့် ရွာတန်းရှည်ရှိ စစ်တောင်းမြစ် လျှစ်စစ်မြစ်ရေတင်စီမံကိန်းများမှ ၉၅၀ ဧက၊ ချောင်းပိတ် ၁၀၉၈ ဧက၊ အင်းအိုင် ၁၄၃၉ ဧကနှင့် အခြားဆိုလာနှင့် စက်ရေတင်စီမံကိန်းမှ ၇၄ ဧက စိုက်ပျိုးခြင်း ဖြစ်ပါသည်။

    အထွက်တိုးစပါးများဖြစ်သည့် နှံကောက်၊ ရက် ၉၀၊ ဆင်းသုခ၊ ရတနာတိုး၊ မနောသုခ၊ စပါးများကို Drum-seeder ၊ လက်ဆွဲကောက်စိုက်စက်များဖြင့် ပန်းတိုင်အထွက်နှုန်းရရှိအောင် ဆောင်ရွက်လျက်ရှိပါကြောင်း သိရှိရပါသည်။

DOCA(ပဲခူး)