မြန်မာနိုင်ငံသည် စိုက်ပျိုးရေးကိုအခြေခံပြီး အခြားစီးပွားရေးကဏ္ဍများကိုလည်း ဖွံ့ဖြိုးတိုး တက်အောင် ဆောင်ရွက်နေသော နိုင်ငံတစ်ခုဖြစ်ပြီး စစ်ကိုင်းတိုင်းဒေသကြီး၊ ကန့်ဘလူမြို့နယ် တွင်လည်း လယ်ယာစိုက်ပျိုးရေးလုပ်ငန်းများအပြင် ကွမ်းခြံများကို မိမိတို့ယာကွက်များ၌လည်း ကောင်း၊ နေအိမ်ခြံဝင်းများ၌လည်းကောင်း မိသားစုဝင်ငွေရရှိသည့်အတွက် စိုက်ပျိုးကြကြောင်း သိရသည်။

          ၂၀၂၅ ခုနှစ်၊ စက်တင်ဘာလ ပထမပတ်တွင် ဖြစ်ပေါ်နေသော ကန့်ဘလူမြို့နယ်၏ ကွမ်းရွက် ဈေးနှုန်းများမှာ အရည်အသွေးပေါ်မူတည်၍ ကွမ်းရွက်(ရှယ်)တစ်ပိဿာလျှင် (၅၀၀၀မှ ၆၅၀၀) ကျပ်၊ ကွမ်းရွက်(ကြီး)တစ်ပိဿာလျှင် (၃၅၀၀)ကျပ်၊ ကွမ်းရွက်(သေး)တစ်ပိဿာလျှင် (၂၅၀၀)ကျပ် ဖြင့် အရောင်းအဝယ်ဖြစ်လျက်ရှိကြောင်း၊ ယခင်အပတ်ဈေးနှုန်းများနှင့် နှိုင်းယှဉ်ပါက ယခုပတ် အတွင်း ကွမ်းရွက်တစ်ပိဿာလျှင်(၅၀၀)ကျပ် ဆက်လက်မြင့်တက်လာကြောင်း၊ ကွမ်းရွက်ကို ကန့်ဘလူခရိုင်အတွင်းနှင့် မန္တလေးမြို့သို့ တင်ပို့ရောင်းချကြောင်း ကွမ်းရွက်ရောင်းဝယ်ရေး လုပ်ငန်းရှင်များထံမှ သိရှိရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့သစ်သီးဈေးကွက်သို့ ယခု စက်တင်ဘာလ ပထမပတ်အတွင်း မင်းကွတ်သီးနှင့် ကြက်မောက်သီးများ ဝင်ရောက်မှုလျော့နည်းလာကြောင်း၊ ကြက်မောက်သီးနှင့် မင်းကွတ်သီးများသည် မော်လမြိုင်ဒေသထွက်နှင့် မန္တလေးတိုင်း ဒေသကြီးမှလည်း ဝင်ရောက်လျက်ရှိကြောင်း သိရှိရသည်။

    ၂၀၂၅ ခုနှစ်၊ စက်တင်ဘာလ ပထမပတ်အတွင်း ကန့်ဘလူမြို့သစ်သီးဈေးကွက်တွင် မင်းကွတ်သီး အကြီး(၁)လုံးလျှင် (၅၀၀)ကျပ်၊ အသေး(၁)လုံး(၃၀၀)ကျပ်တို့ဖြင့် ရောင်းချကြောင်း၊ ကြက်မောက်သီး အသေး(၁)လုံးလျှင် (၃၀၀)ကျပ်၊ အကြီး(၁)လုံးလျှင် (၅၅၀)ကျပ်နှင့် (၁၀)လုံးလျှင် (၅၀၀၀)ကျပ်တို့ဖြင့် ရောင်းချလျက်ရှိပြီး ယခင်အပတ်ဈေးနှုန်းများနှင့် နှိုင်းယှဉ်ပါက ယခုပတ်အတွင်း မင်းကွတ်သီးဈေးနှုန်းများ အနည်းငယ်ကျဆင်းသွားကြောင်း သစ်သီးဆိုင်များမှ သိရှိရပါသည်။

DOCA(စစ်ကိုင်း)

         မန္တလေးတိုင်းဒေသကြီး၊မိတ္ထီလာခရိုင်၊မိတ္ထီလာမြို့မဈေးတွင် ဒေသထွက်အစားအစာများ၊ ဒေသထွက်အသီးအနှံများနှင့်အခြားဒေသမှဝင်ရောက်လာသည့်အရန်သင့်အစားအစာများ ရောင်းချလျှက်ရှိပါသည်။

           နှမ်းဆုပ်သည်အညာဒေသ နှမ်းပေါ်ချိန်များတွင်စားရသော ဒေသထွက်အစားအစာ တစ်မျိုးဖြစ်သည်။  နှမ်းများကို ခဲ၊သဲသန့်စင်ပြီးနောက် လှော်၍ ထန်းညှက်နှင့်ရောထောင်းပြီး  ဆုပ်ထားသော နှမ်းဆုပ်များကို လူကြီး၊လူငယ်မရွေး  ကြိုက်နှစ်သက်ကြပါသည်။ ရှေးယခင် ကပင် နှမ်းဆုပ်ကို နှမ်းစိုက်တောင်သူများအနေနှင့် နှမ်းပေါ်ချိန်တွင် မိသားစုစားသုံးရန်နှင့် လက်ဆောင်ပေးရန် ပြုလုပ်ကြသော်လည်း စားသုံးသူများနှစ်သက်သည့်အတွက် ဈေးကွက်တွင် ရာသီမရွေး ရောင်းချရန် တစ်ပိုင်တစ်နိုင်ပြုလုပ် ရောင်းချလာကြတာ တွေ့ရပါသည်။ နှမ်းဆုပ် (၁၀)ကျပ်သားလျှင်  (၂၀၀၀)ကျပ်၊ (၂၅)ကျပ်သားလျှင် (၅၀၀၀)ကျပ်၊ (၅၀)ကျပ်သားလျှင် (၁၀၀၀၀)ကျပ် ၊ (၁)ပိဿာလျှင် (၂၀၀၀၀)ကျပ်တို့ဈေးရှိပြီး အချိုပွဲနှစ်သက်တဲ့ စားသုံးသူများ အတွက် ရိုးရာအစားအစာတစ်ခုအနေနှင့် အရောင်းအဝယ်သွက်လျှက်ရှိကြောင် သိရှိရပါသည်။

DOCA (မန္တလေး)

     စစ်ကိုင်းတိုင်းဒေသကြီး၊ ကန့်ဘလူခရိုင် ကန့်ဘလူမြို့ရှိ ကုန်စုံဆိုင်များတွင် ကြံသကာ၊ ရေဦးထန်းလျက်၊ ရေဦးပေါက်ပေါက်ဆုပ်၊ မြေပဲယို၊ နှမ်းယိုနှင့် ထန်းလျက်များ ရောင်းချလျက်ရှိရာ ထန်းလျက်များကို ရေဦးမြို့နှင့် ရွှေဘိုမြို့လက်လီ/လက္ကားဆိုင်များမှ ဝယ်ယူရောင်းချကြောင်း သိရ သည်။

    ၂၀၂၅ ခုနှစ်၊  စက်တင်ဘာလ ပထမပတ်တွင် ရောင်းချလျက်ရှိသော ထန်းလျက် ဈေးနှုန်းမှာ ကြက်မင်းကြီး(၁)ပိဿာ (၆၅၀၀)ကျပ်၊ ဝါးတော(၁)ပိဿာ (၆၀၀၀)ကျပ်၊ စမုံထန်းလျက်(၁) ပိဿာလျှင် (၉၀၀၀)ကျပ်ဈေးနှုန်းတို့ဖြင့် ရောင်းချလျက်ရှိကြောင်း၊ ထန်းလျက်ကို အစားအသောက်များ ချက်ပြုတ်ရာတွင်လည်းကောင်း၊ တိုင်းရင်းဆေး ဖော်စပ်ရာတွင်လည်းကောင်း၊ မုန့်လုပ်ရာတွင်လည်းကောင်း အသုံးပြုကြသည့်အတွက် ပုံမှန်အရောင်းအဝယ်ဖြစ်လျက်ရှိကြောင်း လုပ်ငန်းရှင်များထံမှ သိရသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူခရိုင်အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးကို အဓိကထားလုပ်ကိုင်ကြရာ ကန်ဇွန်းဥကို တစ်ပိုင်တစ်နိုင် အိမ်ခြံဝင်းများနှင့် မိမိယာကွက်များတွင် စိုက်ပျိုးကြပြီး ကန့်ဘလူမြို့မဈေးတွင် လာရောက်ရောင်းချကြောင်း၊ ကန်စွန်းဥကို အစိမ်းစားတာ၊ ပြုတ်စားတာနှင့် ကန်စွန်းဥပူတင်း စသည်ဖြင့် အမျိုးမျိုးပြုလုပ်စားသုံးကြကြောင်း၊ ကန်စွန်းဥကို  စားသုံးသူများနှင့် မုန့်လုပ်သူများက ဝယ်ယူလျက်ရှိကြောင်း သိရသည်။

      ၂၀၂၅ ခုနှစ်၊ စက်တင်ဘာလ ပထမပတ်အတွင်း ကန့်ဘလူမြို့မဈေးတွင် ရောင်းချနေသော  ကန်ဇွန်းဥဈေးနှုန်းမှာ လက္ကားဈေး(၁)ပိဿာလျှင် (၂၂၀၀)ကျပ်၊ လက်လီ(၁)ပိဿာလျှင် (၂၅၀၀)ကျပ်နှင့် (၂၅)ကျပ်သားလျှင် (၆၅၀)ကျပ်ဈေးနှုန်းတို့ဖြင့် ရောင်းချလျက်ရှိကြောင်း  ကန်စွန်းဥရောင်းချသူများထံမှ သိရှိရပါသည်။

DOCA(စစ်ကိုင်း)