ပြည်တွင်းကုန်သွယ်မှုသတင်း

    ကျောက်ဆည်ခရိုင်သည် ဆည်ရေသောက်ဒေသဖြစ်သောကြောင့် သီးနှံမျိုးစုံစိုက်ပျိုးဖြစ်ထွန်းလျက်ရှိပြီး ၄င်းသီးနှံများအနက် မြေပဲသီးနှံကိုလည်း တောင်သူများတိုးချဲ့စိုက်ပျိုးလျက်ရှိပါသည်။ ယခုအချိန်တွင် တောင်သူများမှာ မိုးမြေပဲများကို အောင်မြင်စွာရိတ်သိမ်းပြီး ဆောင်းမြေပဲများကိုလည်းစိုက်ပျိုးလျက်ရှိရာ (၂၀၂၃-၂၀၂၄) ဘဏ္ဍာနှစ်၌ ဆောင်းမြေပဲလျာထားဧက (၁၀၇၈)ဧကလျာထားပြီး ကျောက်ဆည်မြို့နယ်တွင် (၂၉၇)ဧက၊ စဉ့်ကိုင်မြို့နယ်တွင် (၅၆)ဧက၊ မြစ်သားမြို့နယ်တွင် (၈၀၃) ဧက၊ စုစုပေါင်းဆောင်းမြေပဲစိုက်ဧက (၁၁၅၆)ဧကစိုက်ပျိုးနိုင်ခဲ့ကြောင်း၊ ခရိုင်လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရသိရှိရပါသည် ။ဆောင်းမြေပဲကို စက်တင်ဘာလနှင့် အောက်တိုဘာလများတွင် စိုက်ပျိုးကြပြီး (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၅၃၀၀၀၀/)ကျပ်ခန့်ကုန်ကျကြောင်း၊ မြေပဲဈေးနှုန်းအနေဖြင့် ယခင်နှစ်၌ မိုးမြေပဲတောင့်တစ်တင်းလျှင် (၃၆၀၀၀/)ကျပ်၊ မြေပဲဆံတစ်ပိဿာလျှင် (၅၆၀၀/)ကျပ်၊ မြေပဲဆီတစ်ပိဿာလျှင် (၁၃၅၀၀/)ကျပ်ရှိခဲ့ပြီး ယခုအချိန်တွင် မြေပဲတောင့်တစ်တင်းလျှင် (၂၂၅၀၀/) ကျပ်၊ မြေပဲဆံတစ်ပိဿာလျှင် (၆၂၀၀/)ကျပ် ၊ မြေပဲဆီတစ်ပိဿာလျှင် (၁၂၅၀၀/)ကျပ်တို့ဖြင့် ရောင်းဝယ်လျက်ရှိကြောင်း၊ ဆောင်းမြေပဲပေါ်ချိန်တွင် ဈေးနှုန်းကောင်းမွန်ပါက  အကျိုးအမြတ်များပိုမိုရရှိနိုင်ကြောင်း  မြေပဲစိုက်တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

     ရှမ်းပြည်နယ်(အရှေ့ပိုင်း)ဒေသဖြစ်သော မိုင်းဆတ်၊ မိုင်းယောင်း၊ တာချီလိတ်၊ မိုင်းဖြတ်မြို့နယ်တို့တွင် တောတောင်များအတွင်း သဘာဝအလျောက်ပေါက်ရောက်သော တံမြတ်စည်းပင် များကို မိသားစုအပိုဝင်ငွေရရှိရန်အတွက် စတင်ခုတ်ယူနေကြပြီဖြစ်ပါသည်။

     တံမြက်စည်းပင်များကို ထိုင်းနိုင်ငံသို့တင်ပို့ရန်နှင့် အိမ်သုံးတံမြက်စည်းပြုလုပ်ရန်အတွက် အဓိကခုတ်ယူကြသည်။ တံမြက်စည်းပင်များကို နှစ်စဉ် ဇန်နဝါရီလမှ မတ်လအတွင်း ခုတ်ယူရရှိပါသည်။ ယခင်နှစ်တွင် ခုတ်ယူရရှိထားသော တံမြက်စည်းပင်များကို နေလှန်းပြုပြင်ပြီး တံမြက်စည်းပြုလုပ်ရောင်းချရာတွင် တံမြက်စည်းတစ်ချောင်းလျှင် ကျပ်(၂၀၀၀)မှ ကျပ်(၂၅၀၀)ထိရရှိပြီး တံမြက်စည်းမွှေးကို အဝယ်ဒိုင်သို့ရောင်းချပါက တစ်ကီလိုလျှင် ကျပ်(၂၅၀၀)မှ ကျပ်(၄၅၀၀)ထိရရှိခဲ့ပါသည်။

   ယခုနှစ်တွင် တာချီလိတ်မြို့နယ်ရှိ တံမြက်စည်းအဝယ်ဒိုင်များသည် တံမြက်စည်းမွှေးအခြောက်တစ်ကီလိုလျှင် ကျပ်(၂၅၀၀)ဖြင့် စတင်ဝယ်ယူနေကြသောကြောင့် ကျေးလက်နေပြည်သူများမှာ မိသားစုအပိုဝင်ငွေရရှိရန်အတွက် တံမြက်စည်းပင်များကို စတင်ခုတ်ယူကာ နေလှန်းပြုပြင်နေကြပြီဖြစ်ကြောင်းသိရှိရပါသည်။

DOCA(ရှမ်း)

    ရန်ကုန်တိုင်းဒေသကြီး၊ တောင်ပိုင်းခရိုင်၊ သန်လျင်မြို့နယ်ရှိ  သီလဝါစက်မှုဇုန်၊ Wilmar ဆီကန်မှတစ်ဆင့် ရန်ကုန်တိုင်းဒေသကြီးအတွင်းရှိ မြို့နယ်များနှင့် အခြားတိုင်းဒေသကြီး/ ပြည်နယ် များရှိ ကိုယ်စားလှယ်များသို့ စားအုန်းဆီများကို နေ့စဉ် ထုတ်ပေးလျက်ရှိပါသည်။ စားအုန်းဆီကို ပြည်တွင်းဈေးကွက်၌ ရောင်းဝယ်ဖောက်ကားရာတွင် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ စားအုန်းဆီတင်သွင်း/သိုလှောင်/ဖြန့်ဖြူးခြင်းလုပ်ငန်းကြီးကြပ်ရေးကော်မတီက အပတ်စဉ်ထုတ်ပြန်ထားသော အခြေခံလက်ကားရည်ညွှန်းဈေးနှုန်းအပေါ် လက်ကားပြန်လည် ဖြန့်ဖြူးရောင်းချသူများအနေဖြင့် ဒေသအရောက်ဈေးနှုန်းများအပေါ် (၂)ရာခိုင်နှုန်းအမြတ်ထက်မပိုသောဈေးနှုန်းဖြင့် ဈေးကွက်အတွင်းသို့ ပြန်လည်ဖြန့်ဖြူးရောင်းချစေရေး ဈေးနှုန်းအဆမတန်မြှင့်တင်ရောင်းချခြင်းများမပြုလုပ်စေရေးတို့အတွက်လည်း ဝန်ထမ်းများက ကွင်းဆင်းကြပ်မတ်ဆောင်ရွက်လျက်ရှိကြောင်းနှင့် (၈-၁-၂၀၂၄)ရက်နေ့မှ (၁၃-၁-၂၀၂၄)ရက်နေ့အထိ စားအုန်းဆီကုမ္ပဏီ (၁၈)ခုနှင့် စားအုန်းဆီတန်ချိန် (၄၇၀၉.၃၈၃)တန်ထုတ်ပေးခဲ့ကြောင်းသိရှိရပါသည်။

DOCA(ရန်ကုန်)

    မှော်ဘီမြို့နယ်၊ လှပဒါးကျေးရွာ၊ ဥယျာဉ်ခြံမြေအတွင်း၌ ပန်းများကို တစ်နိုင်တစ်ပိုင်စိုက်ပျိုးကြပါသည်။ ပေါင်ဆွဲစိုက်ပျိုးပြီး ယခုအချိန်တွင် ဂန္ဓမာပန်းများကို ပိုမိုစိုက်ပျိုးကြပါသည်။ လှပဒါးကျေးရွာတွင် စုစုပေါင်း (၅)ဧကခန့်စိုက်ပျိုးထားပြီး ဈေးကွက်မှာ ခြံတွင် ရောင်းချခြင်းနှင့် မှော်ဘီဈေးနှင့် ထောက်ကြန့်ရတနာဈေးတို့တွင် ပြန်လည်ရောင်းချခြင်းတို့ရှိပါသည်။

     ပျိုးပင်များကို တောင်ကြီးမြို့မှမှာယူရပြီး တစ်ပင်လျှင် (၁၄)ကျပ်နှုန်းကျသင့်၍ (၃)လတစ်ကြိမ် ရာသီအလိုက် စိုက်ပျိုးခဲ့ပြီး ကျောက်စိမ်းမျိုးကို (၄)လတစ်ကြိမ်နှင့် တစ်ပွင့်ထိုးဂန္ဓမာကိုမူ (၃)လတစ်ကြိမ်စိုက်ပျိုးကြကြောင်း၊ တစ်ပွင့်ထိုးဂန္ဓမာစိုက်ပျိုးရာတွင် တန်းအလိုက် မီးထွန်းပေးရကြောင်း၊ စံပယ်ဖြူမျိုးနှင့် စံပယ်ဝါမျိုးတို့ကို (၄)လတစ်ကြိမ်စီ အသီးသီးစိုက်ပျိုးကြပါသည်။ အဖူးအပွင့်အားဆေးအဖြစ် Foltron (ဖော်တရွန်)အားဆေးကို  ပန်းသက်တမ်းအရ (၃)ကြိမ်ဖြန်းပေးရကြောင်းနှင့် အမြတ်အစွန်းအနေဖြင့် (၃:၁)ပုံသာမြတ်ကြောင်း ဈေးရောင်းချပန်းစိုက်ပျိုးသူတစ်ဦးထံမှသိရှိရပါသည်။

DOCA(ရန်ကုန်)

    ဆီးပင်သည် မြန်မာနိုင်ငံအနှံ့အပြား၌ ပေါက်ရောက်ပြီး ဆီးသီးအများဆုံး သီးသည့်ရာသီမှာ ဆောင်းရာသီဖြစ်သည်။ မြန်မာနိုင်ငံအနှံ့အပြားတွင် ဆီးပင်များကို တွေ့မြင်နိုင်သည်။ အထူးသဖြင့် ခြောက်သွေ့သော   မန္တလေး၊ မကွေးနှင့် စစ်ကိုင်းနယ်ပယ်များတွင် ဆီးပင်များပေါများစွာ ပေါက်ရောက်သည်။ တစ်ချို့ဆီးပင်များသည် စိုက်ပျိုးခြင်း မဟုတ်ဘဲ အလေ့ကျပေါက်ရောက်လေ့ရှိပြီး အချို့ဥယာဉ်များတွင်မူ ဆီးပင်ကို စီးပွားဖြစ် စနစ်တကျ စိုက်ပျိုးထားကြသည်။

    မြန်မာနိုင်ငံ၌ ဆီးပင်ကို အစေ့များမှမျိုးပွားယူကြသည်။ မြေထုပ်စည်းခြင်းဖြင့်လည်း မျိုးပွားယူနိုင်သည်။ အစေ့မှ မျိုးပွားလျှင် ခြောက်နှစ်၊ ခုနစ်နှစ်ကြာမှ အသီးသီးသည်။ သို့သော် မြေထုပ် စည်းခြင်းဖြင့် မျိုးပွားယူလျှင် ပထမနှစ် သို့မဟုတ် ဒုတိယနှစ်တွင် သီးသည်။ ဆီးပင်ကို စိုက်ပျိုးရာတွင် အတန်းလိုက် တစ်ပင်နှင့်တစ်ပင် ပေ (၂ဝ)စီခွာ၍ စိုက်ပျိုးသင့်သည်။ ဆီးသီး အမျိုးမျိုးရှိရာ များစွာသော ဆီးသီးတို့မှာချဉ်သောအရသာရှိသည်။ အချို့သည် ဆီးသီးမှည့်များကိုခူး၍ အခြောက်ခံကာ ဆီးယိုထိုးကြသည်။ အမှုန့်ပြုလုပ်၍လည်း ဆီးပေါင်း၊ ဆီးပြားများ ပြုလုပ်ကြသည်။  ပခုက္ကူမြို့မှ ထွက်ရှိသည့် ဆီးထုပ်၊ ဆီးပြားများသည် ဈေးကွက်၌ နာမည်ကြီးလှသည်။

   ဆီးသီးတွင် ဗီတာမင်နှင့် သတ္တုဓါတ်၊ အမျှင်ဓါတ်စသည့် ဓါတ်များစွာပါဝင်သည်။ အစာခြေစနစ်ကို ကောင်းမွန်စေခြင်း၊ အရွယ်မတိုင်ခင် အိုမင်းရင့်ရော်မှုကို လျော့ကျစေခြင်း၊ ဦးနှောက်ကျန်းမာပြီး အားပြည့်စေခြင်း၊ စိတ်ဖိစီးမှုကို လျော့ချစေခြင်း၊ အမြင်အာရုံကို ကောင်းမွန်စေခြင်း အစရှိသဖြင့် ကောင်းကျိုးများစွာရရှိစေသည့်အပြင် ကျန်းမာရေးအတွက်လည်း အကျိုးပြုစေသဖြင့် ဆီးသီးကို စားသုံးပေးသင့်သည်။

    မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်၊ လေးပင်ကျေးရွာမှ ဆီးသီးကို စီးပွားဖြစ် စိုက်ပျိုးလျက်ရှိကြသည်။ မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်၊ လေးပင်ကျေးရွာမှ ထွက်ရှိသည့် ဆီးသီးများသည် ဈေးကွက်တွင် ရောင်းအားကောင်းသည်။ လေးပင်ကျေးရွာ ထွက်ဆီးသီးသည် မန်းရွှေစက်တော် ဘုရားပွဲတော်ချိန်၌ ရောင်းအားကောင်းပြီး တစ်ပြည်ကို ငွေကျပ် (၅၀၀၀)အထိ ဈေးနှုန်းမြင့်တက်ကာ ရောင်းချနေရကြောင်း လေးပင်ကျေးရွာနေ ဆီးသီးရောင်းချသူများထံမှ သိရသည်။

    ဆီးသီးရောင်းချရာတွင် ဆီးပန်းသီး၊ ဆီးသစ်တော်၊ ဆီးခွဲသီး အလုံးအကြီး အသေးအပေါ်မူတည်၍ ဈေးနှုန်းအမျိုးမျိုးရှိကာ တစ်ပြည်ကို ငွေကျပ်(၃၀၀၀) မှစတင်ကာ ကျပ်(၃၅၀၀)၊ ကျပ်(၄၀၀၀)၊ ကျပ် (၄၅၀၀)နှင့် ကျပ်(၅၀၀၀)အထိ ရောင်းချလျက်ရှိကြောင်း သိရသည်။ အချို့သည် လေးပင်ဆီးသီးများကို တဆင့်မှာယူ၍ Online ပေါ်မှ  Delivery ဖြင့်လည်းကောင်း၊ အချို့သည်   ဈေးထဲတွင်လည်း ပြည်ကောက် ဖြင့်လည်းကောင်း တစ်ပိုင်တစ်နိုင် စီးပွားဖြစ်ရောင်းချလျက်ရှိကြောင်း သိရှိရပါသည်။

DOCA(မကွေး)