ပြည်တွင်းကုန်သွယ်မှုသတင်း

      ပြည်တွင်းစားသုံးမှုနှင့်ပြည်ပသို့တင်ပို့သည့်ပဲတီစိမ်းမှာအရောင်းသွက်သည့် ပဲအမျိုးအစားဖြစ်ပြီး၊မန္တလေးတိုင်းဒေသကြီးအတွင်း၂၀၂၄-၂၀၂၅ခုနှစ် ပဲတီစိမ်းစိုက်ပျိုးမှု (၂၇၀၉၅၈)ရိတ်သိမ်း(၂၅၃၄၄၁)ဧက၊ အထွက်နှုန်း(၁၁.၆၄)တင်းနှင့် အထွက် (၂၉၄၉၀၁၇) တင်း ဖြစ်ကြောင်း သိရပါသည်။ မန္တလေးပွဲစား၊ ကုန်သည်၊ စက်ပိုင်များမဟာကထိန်တော်အသင်းတွင်၂၀၂၅ခုနှစ် စက်တင်ဘာလပထမပတ်အတွင်း ဖြစ်ပေါ်လျက်ရှိသောစျေးမှာ၃တင်းဝင်တစ်အိတ်လျှင် ပဲတီစိမ်း (ညာ) ၂၇၀၀၀၀ ကျပ်နှင့် ၃၁၀၀၀၀ ကျပ်၊တစ်ပိဿာစျေးမှာ ပဲတီစိမ်း (ညာ)၄၈၀၀ကျပ်နှင့် ၅၅၁၁ ကျပ်တို့ဖြစ်ကြောင်း သိရပါသည်။ ယခင်နှစ်ကာလတူတစ်ပိဿာစျေးမှာ ပဲတီစိမ်း(အညာ)၃၅၅၆ ကျပ်နှင့်၄၅၃၃ကျပ်၊ပဲတီစိမ်း(ပဲခွဲ)၂၃၁၁ကျပ်နှင့်၂၈၄၄ကျပ်တို့ဖြစ်ပေါ်ခဲ့ပြီး၊ကာလတူစျေးနှိုင်းယှဉ် ပါက ပဲတီစိမ်း(ညာ)မှာ တစ်ပိဿာလျှင် ၉၇၈ ကျပ်စျေး ပိုမိုရရှိကြောင်း သိရပါသည်။

DOCA (မန္တလေး)

   ပြည်ခရိုင်၊ ပြည်မြို့၏ ကုန်စည်ဒိုင်တွင် မတ်ပဲ၊ ပဲတီစိမ်း၊ ပဲစဉ်းငုံ၊ ကုလားပဲ၊ ပဲကြီး၊ ဘိုကိတ်၊ စားတော်ပဲ(ကျွန်း)တို့ ရောင်းဝယ်လျက်ရှိပါသည်။

          ပြည်ကုန်စည်ဒိုင်၏ ပထမပတ်တွင် မတ်ပဲတစ်တင်းကို (၉၂၃၀၀-၉၂၅၀၀)ကျပ်ဖြင့် ရန်ကုန် အဝယ်တစ်ရက်ကို အိတ် (၃၀၀)ခန့်အရောင်းအဝယ်ရှိပါသည်။ ပဲတီစိမ်းသစ်များလည်း တစ်ရက်ကို အိတ် (၅၀၀ - ၆၀၀)ခန့် အဝင်ရှိပြီး တစ်ရက်ကို ဝင်သလောက်အရောင်းအဝယ်ဖြစ်ပါသည်။ ပဲတီစိမ်း တစ်တင်းကို (၁၀၀၀၀၀)ကျပ်ဖြင့် အရောင်းအဝယ်ဖြစ်ပါသည်။

          ပြည်ကုန်စည်ဒိုင် ပထမပတ်တွင် ပဲစဉ်းငုံတစ်တင်းကို (၇၇၀၀၀ - ၇၈၀၀၀)ကျပ်ဖြင့် တစ်ရက်ကို အိတ် (၁၅၀ - ၂၀၀)ခန့် ရန်ကုန်အဝယ်ရှိပါသည်။ စက်တင်ဘာလ ပထမပတ်တွင် ကုလားပဲ(HL)တစ်တင်းကို (၈၇၀၀၀-၈၈၀၀၀) ကျပ်၊ မြကြေးမှုံတစ်တင်းကို (၉၄၀၀၀ - ၉၅၀၀၀) ကျပ်ဖြင့် မြို့တွင်းခွဲစက်သမားနှင့် ရန်ကုန်အဝယ်ရှိပါသည်။

          စက်တင်ဘာ၊ ပထမပတ်တွင် ပဲကြီး(ရွှေကျွန်း)တစ်တင်းကို (၁၂၀၀၀၀)ကျပ်၊ ပဲကြီး (ကုန်းပဲ) တစ်တင်းကို (၁၁၀၀၀၀)ကျပ်ဖြင့် မြို့တွင်းပဲကြော်သမားများ တစ်ရက်ကို အိတ် (၃၀၀)ခန့် အဝယ် ရှိပါသည်။

          စက်တင်ဘာ၊ ပထမပတ်တွင် စားတော်ပဲ (ကျွန်း)တစ်ရက်ကို အိတ် (၂၀၀၀၀၀)ကျပ်ဖြင့် မြို့တွင်း အဝယ် တစ်ရက်ကို အိတ် (၁၀- ၁၅)အိတ်ခန့် အရောင်းအဝယ်ရှိပါသည်။ပြည်မြို့သည် အချက်အခြာကျသော မြို့ဖြစ်၍ ပဲမျိုးစုံအရောင်းအဝယ်မှာ သွက်လျက်ရှိပါ သည်။

DOCA(ပဲခူး)

   တောင်ငူမြို့ ဈေးများရှိ သစ်သီးဆိုင်များတွင် ပန်းသီး၊ နဂါးမောက်သီး၊ လိမ္မောသီး၊ ပန်းသစ်တော်၊ ငှက်ပျောသီး၊ နဂါးမောက်သီး၊ သရက်သီးစသောဒေသထွက်နှင့် အခြားအရပ်ဒေသများမှ သစ်သီးဝလံ များလာရောက်ရောင်းချသည့်အပြင် အခြားဒေသများမှ သစ်သီးဝလံများကို မှာယူရောင်းချလျက်ရှိရာ ယခုအခါ တည်သီးများအား ကရင်ပြည်နယ်၊ မြဝတီမြို့မှတဆင့် မှာယူရောင်းချ လျက်ရှိပါသည်။

တည်သီး(Persimmoni)ပင်၏ မူရင်းဒေသသည် တရုတ်ပြည်ဖြစ်ပြီး ထိုမှတစ်ဆင့် အခြားနိုင်ငံ များဆီသို့ ပျံ့နှံ့လာခြင်းဖြစ်သည်ဟု သိရှိရသည်။ တည်သီးပင်၏သက်တမ်းသည် ၅၀-၇၅နှစ်ရှိပြီး သစ်သားအရည်အသွေးကလည်း ကောင်းမွန်သောကြောင့် အပင်အိုသွားသည့်အခါ သစ်မာအနေဖြင့် အသုံးပြုကြသည်။ အနံ့အရသာ ချိုချိုမွှေးမွှေးရှိပြီး အာဟာရဓါတ်များပေါကြွယ်ဝသဖြင့် ကျန်းမာရေးနှင့် အင်မတန်ညီညွှတ်လှပေသည်။

တည်သီးသည် အမျှင်ဓါတ်ကြွယ်ဝသဖြင့် အစာခြေစနစ်ကို အထောက်အကူပြုပေးပါသည်။ အူနံရံ များအား အာဟာရစုပ်ယူမှုကောင်းစေသလို ဝမ်းမှန်စေပါသည်။ အဆာခံနိုင်စေပြီး သွေးတွင်း သကြားဓာတ်မတက်အောင် အထိရောက်ဆုံးကာကွယ်ပေးပါသည်။ ထို့အပြင် ဆိုဒီယမ်ပါဝင်မှုနည်း သဖြင့် သွေးပေါင်ချိန်ကို အကောင်းဆုံးထိန်းညှိပေးနိုင်ပါသည်။ တည်သီးတွင် ဗီတာမင် C ပါဝင်မှုရှိသဖြင့် ကိုယ်ခံအားကို အကောင်းဆုံးမြှင့်တင်ပေးသည့်အတွက် အအေးမိဖျားနာ၊ တုပ်ကွေး စသည့်ရောဂါများ မဖြစ်အောင် ကာကွယ်ပေးနိုင်သည့်အပြင် ခုခံတိုက်ထုတ်စေနိုင်ပါသည်။ ပိုတက်ဆီယမ်နှင့် သကြားဓါတ် ပါဝင်ခြင်းကြောင့် ခန္ဓာကိုယ်ကိုအကောင်းဆုံး အားဖြည့်ပေးနိုင်သည့်အတွက် ခြေကုန်လက်ပမ်းကျခြင်း၊ ပင်ပန်းနွမ်းနယ်ခြင်းမဖြစ်အောင် အထိရောက်ဆုံးကာကွယ်ပေးနိုင်သည်ဟု လေ့လာသိရှိရသည်။ “တန်ဆေးလွန်ဘေး” ဆိုသည့်စကားအတိုင်း  ရောဂါအခံရှိသူများနှင့် ကိုယ်ဝန်ဆောင်မိခင်တို့သည် ဆရာဝန်နှင့် တိုင်ပင်ပြီးမှသာ စားသုံးသင့်ကြောင်းလည်း ဖတ်ရှု့လေ့လာရပါသည်။

   ဈေးနှုန်းဈေးကွက်အနေဖြင့် တောင်ငူမြို့ဈေးများရှိ သစ်သီးဆိုင်များတွင် တည်သီးအလုံးသေး တစ်လုံးလျှင် ၂၅၀၀ ကျပ်၊ အလုံးကြီး တစ်လုံးလျှင် ၃၅၀၀ ကျပ်ဖြင့် ရောင်းချလျှက်ရှိပြီး များများဝယ်ယူ လိုပါက ဈေးနှုန်းအပြောင်းအလဲရှိကြောင်း တောင်ငူမြို့ဈေးများရှိ သစ်သီးဝလံအရောင်းဆိုင်များမှ သိရှိရပါသည်။

DOCA(ပဲခူး)

  မအူပင်ခရိုင်၊ မအူပင်မြို့နယ်၊ ချောင်းကလေးကျေးရွာ၊ ရွှေတော်မှော်ကျေးရွာ၊ ထနီးကျေးရွာများ တွင် ငှက်ပျောသီးပင်များ စိုက်ပျိုးလျက်ရှိသည်။ မအူပင်ခရိုင်အနေဖြင့် ငှက်ပျောစိုက်ဧက (၄၉၄၆၅) ဧကရှိကြောင်း မြို့နယ်စာရင်းများအရသိရသည်။

ထွက်ရှိသော ငှက်ပျောများကို မအူပင် အခွန်လွတ်ဈေးအတွင်းရောင်းချနေပြီး ငှက်ပျောရောင်းချသော ဆိုင်ကြီးများ ရှိသလို ရွာဈေးသည်များမှလည်း ဈေးအတွင်း လာရောက် ရောင်းချနေကြသည်။ ငှက်ပျော ၁ဖီးလျှင် ၂၀၀၀-၂၅၀၀ကျပ်ဖြင့် ရွာမှ ခြံထွက် တိုက်ရိုက်လာရောက်ရောင်းချသူများရှိပြီး တစ်ပါတ်လျှင် ၅ရက် ရောင်းချပြီး ငှက်ပျောအဖီးရေ တစ်နေ့လျှင် ၅၀-၇၀ ခန့်ရောင်းချရကြောင်း သိရသည်။ ငှက်ပျော ဆိုင်ကြီးများမှ ၁ဖီးလျှင် ၂၅၀၀-၃၀၀၀ကျပ်ဖြင့် ရောင်းချနေကြောင်းလဲသိရသည်။ ငှက်ပျောသီး ရောင်းချသော ဆိုင်ကြီးများသည် တစ်လလျင်  ၃ကြိမ် ရွာများမှ တစ်ကြိမ်လျှင် အခိုင်ရေ ၅၀ခန့် အဖီးရေ ၅၀၀ခန့် ခြံများမှ လာပို့ကြောင်း၊ ငှက်ပျောတစ်ခိုင်လျှင် ငွေကျပ် ၂၀၀၀၀ကျပ်ဖြင့် လက်ကားဈေးဝယ်ယူရ၍ ၁၀၀၀၀၀၀ကျပ် ရင်းနှီးရပြီး အကျိုးအမြတ်အနေဖြင့် ၁လလျှင် ၁၅၀၀၀၀ ကျပ် အကျိုးအမြတ်ကျန်ရှိကြောင်း ဈေးကွက်အတွင်းမှ သိရပါသည်။

DOCA(ဧရာဝတီ)

   ဧရာဝတီတိုင်းဒေသကြီး၊ မအူပင်ခရိုင်အနေဖြင့် မြို့နယ်များအပါအဝင် ၁၅တန်နှင့်အထက် ဆန်စက်အလုံးရေ (၁၁၀)လုံး ရှိပြီး စပါးကြိတ်ခွဲထွက်ရှိမှုမှ ဆန်များကို ရန်ကုန်တိုင်းဒေသကြီးသို့ အဓိကထား၍ တင်ပိုနေပြီး ရန်ကုန်မှတဆင့် အခြားဒေသများသို့ နေ့စဉ် ပုံမှန် (စီးထွက်) လျက်ရှိကြောင်း သိရသည်။

   ၂၀၂၅ ခုနှစ် ဩဂုတ်လ ၁လအတွင်း မအူပင် ဆန်တင်ပို့မှု အိတ် ၁၀၁၃၅ ၊ ပန်းတနော် ဆန်တင်ပို့မှု ၁၆၁၅၈၊ ညောင်တုန်းဆန်တင်ပို့မှု ၁၁၃၂၅၀၊ ဓနုဖြူမြို့ဆန်တင်ပို့မှု ၂၀၃၅၂ အိတ်နှင့် စုစုပေါင်း (၁၅၉၈၉၅) တင်ပို့ပြီး တန်အားဖြင့် ၇၉၉၄ တန်တင်ပို့နိုင်ခဲ့ကြောင်း၊ အခြားမြို့နယ်များမှ တင်ပို့မှုနိုင်မှု အနေဖြင့် ၁၀၉၄၉၀ အိတ် နှင့် တန်အားဖြင့် ၅၄၇၄ တန်ကိုလည်းကောင်း တင်ပို့နိုင်ခဲ့ကြောင်း သိရသည်။ ဇူလိုင်လနှင့် ဩဂုတ်လ တင်ပို့မှုနှင့် နှိုင်းယှဉ်ပါက ဩဂုတ်လ မအူပင်ခရိုင် ၄မြို့နယ်မှ ဆန်မြို့နယ်တင်ပို့မှု (၁၅၉၈၉၅) တင်ပို့ပြီး  (၃၇၅၂)အိတ် လျော့နည်းတင်ပို့ကြောင်း ၊ အခြားမြို့နယ်တင်ပို့မှုမှာ ဇူလိုင်လ ဆန် ၃၀၆၂၉၁ အိတ် တင်ပို့သောကြောင့် ယခုလ (၁၉၆၈၀၁) အိတ်  လျော့နည်းတင်ပို့ကြောင်း တွေ့ရှိရသည်။ ဧရာဝတီတိုင်း ဒေသကြီးထွက် ဆန်များကို သီလဝါဆိပ်ကမ်း၊သံလျင်မြို့၊ ဆူးလေဆိပ်ကမ်း ပန်းပဲတန်းမြို့၊ Asiaworld ဆိပ်ကမ်းအလုံမြို့၊ ဇုန်-၂ ရွှေပြည်သာမြို့၊ ကျိုက်ဝိုင်းဈေး မရမ်းကုန်းမြို့၊ ကားကြီးဝန်း ဘုရင့်နောင်မြို့၊ ဇုန်-၃ လှိုင်သာယာမြို့၊ ယုဇန ၂လမ်း၊ ဘုရင့်နောင်မြို့၊ ၁ရပ်ကွက်မရမ်းကုန်းမြို့၊ ကျိုက်ဝိုင်းဈေး၊ မရမ်းကုန်းမြို့၊ ပဲခူးဈေးကြီး၊ ပဲခူးမြို့၊ သုဇနလမ်း၊ ထောက့်မြို့၊ ရွှေလင်ပန်း စက်မှုဇုန်လှိုင်သာယာမြို့၊ ပိတောက်လမ်း ဘုရင့်နောင်၊ AWPT ဆိတ်ကမ်းအလုံမြို့ တို့သို့ တင့်လျက်ရှိကြောင်း သိရှိရပါသည်။

DOCA(ဧရာဝတီ)