ပြည်တွင်းကုန်သွယ်မှုသတင်း

   မကွေးတိုင်းဒေသကြီး၊ ပခုက္ကူခရိုင်၊ ပခုက္ကူကြက်သွန်နီကုန်စည်ဒိုင်တွင် မိုးစိုက်(ဥစိုက်) ကြက်သွန်နီများ ရေစကြို၊ ပခုက္ကူကျွန်းနှင့် ပေါက်နယ်ဒေသများမှ အများအပြားဝင်ရောက်လျက်ရှိ ပါသည်။  ၂၀၂၄ခုနှစ်၊ ဇန်နဝါရီလ(ပထမပတ်)တွင်  ပခုက္ကူကုန်စည်ဒိုင်၌ ဖြစ်ပေါ်ခဲ့သော ကြက်သွန်နီ မိုးစိုက်(ဥစိုက်)များ၏ ဒိုင်ပြတ်လက်ကားဈေးမှာ  ထိပ်စ တစ်ပိဿာလျှင် ကျပ်(၂၆၀၀)၊ အလတ် စတစ်ပိဿာလျှင် ကျပ်(၂၃၀၀)၊ အနိမ့် တစ်ပိဿာလျှင် ကျပ်(၂၀၀၀)ဖြစ်ခဲ့ပြီး၊ ဇန်နဝါရီလ (ဒုတိယပတ်)တွင် မိုးစိုက်(ဥစိုက်)များမှာ ထိပ်စ တစ်ပိဿာလျှင် ကျပ်(၂၃၅၀-၂၅၀၀)၊ အလတ်စတစ် ပိဿာလျှင် ကျပ်(၂၃၀၀-၂၀၀၀)၊ အနိမ့် တစ်ပိဿာလျှင် ကျပ်(၂၀၀၀-၁၈၀၀)ဖြစ်ပြီး တစ်ပိဿာလျှင် ကျပ်(၁၀၀ မှ ၁၅၀)ထိကျနေပြီး တစ်နေ့လျှင် ကုန်ချိန်(၁၀၀၀၀၀)ကျော် အရောင်းအဝယ်ဖြစ်လျက်ရှိပါသည်။

   ဇန်နဝါရီလ(ဒုတိယပတ်)တွင် ပခုက္ကူခရိုင် ကြက်သွန်နီ ကုန်စည်ဒိုင်၌ ဖြစ်ပေါ်ခဲ့သောကြက် သွန်နီဈေးနှုန်းများမှာ ယောနယ်(ပေါက်) ဒေသ၏ ကြက်သွန်နီဈေးနှုန်းမှာ ထိပ်စ တစ်ပိဿာလျှင် ကျပ် (၂၅၀၀)၊ အလတ်စ တစ်ပိဿာလျှင် ကျပ် (၂၀၀၀) ၊ အနိမ့် တစ်ပိဿာလျှင် ကျပ် (၁၈၀၀) ဖြစ်ပြီး  တစ်နေ့လျှင်ကုန်ချိန် (၁၀၀၀၀ မှ ၅၀၀၀၀)အထိ၊ ရေစကြို(ကျွန်း)နှင့် ပခုက္ကူ(ကျွန်း) ထိပ်စ တစ်ပိဿာလျှင် ကျပ် (၂၃၀၀)၊ အလတ်စ တစ်ပိဿာလျှင် ကျပ်(၁၉၀၀)၊ အနိမ့် တစ်ပိဿာလျှင် ကျပ်(၁၇၀၀)ဖြစ်ပြီး တစ်နေ့လျှင် ကုန်ချိန် ပိဿာ(၅၀၀၀၀ မှ ၁၅၀၀၀၀)ကျော် ဝင်ရောက် အရောင်း အဝယ်ဖြစ်နေကြောင်း တင်ပို့မှုအနေဖြင့် ရန်ကုန်ဘုရင့်နောင်နှင့် မြန်မာပြည်အနှံ့အပြား တင်ပို့လျက်ရှိကြောင်းနှင့် ဇန်နဝါရီလ(ဒုတိယပတ်)တွင် ဈေးအနည်းငယ်ကျဆင်းခဲ့ကြောင်း ကြက်သွန်နီကုန်စည်ဒိုင်မှ သိရှိရပါသည်။

DOCA(မကွေး)

    ကင်ပွန်းသီးကို ယောနယ်ဒေသ၊ အညာဒေသများတွင် အများအပြားစိုက်ပျိုးလျက်ရှိပြီး ပခုက္ကူမြို့မဈေးတွင် ရောင်းချလျက်ရှိပါသည်။ ကင်ပွန်းသီးကို ယောနယ်ဒေသမှာ အများအပြား စိုက်ပျိုးလျက်ရှိကြောင်း၊ မကွေးတိုင်းဒေသကြီး ပခုက္ကူခရိုင်အတွင်းရှိ မြိုင်၊ ကမ္မနှင့် မြစ်ခြေမြို့ နယ်များမှ လည်းစိုက်ပျိုးထုတ်လုပ်လျက်ရှိကြောင်း မြို့မဈေးသည်များနှင့် ဒေသခံများထံမှ သိရှိရပါသည်။

   ကင်ပွန်းသီးကို ရှေးယခင်ကပင် မြန်မာလူမျိုးအများအပြားအသုံးပြုလျှက်ရှိပါသည်။ ကင်ပွန်းပင်မှရရှိသောအသီးများကို ရှေးမြန်မာအမျိုးသမီးများခေါင်းဆေးမင်္ဂလာပြုလုပ်ရာတွင် တရော်နှင့် ကင်ပွန်း သီးကိုရော၍ အသုံးပြုခဲ့ကြသည်မှာ ယနေ့တိုင်ပင်ဖြစ်ပါသည်။ ကင်ပွန်းသီးမှာ မြန်မာလူများအတွက် ခေါင်းဆေးမင်္ဂလာပြုလုပ်ရာတွင်သာမက ကလေးသူငယ်များ နှာခေါင်းပိတ်လျှင် ကင်ပွန်းသီးကို သွေး၍လိမ်းပေးခြင်းဖြင့် သက်သာပျောက်ကင်းကြောင်း၊ အရေပြားနှင့် ဆက်စပ်သည့်ရောဂါများဖြစ်သော အရေပြားလေးဘက်နာ၊ နှင်းခူနှင့် တင်းတိတ်များကိုသွေးလိမ်းခြင်းဖြင့် သက်သာစေပါသည်။ ထို့အပြင် ရင်ကြပ်ရောဂါ၊ ခေါင်းကိုက်ခြင်းဝေဒနာများ၊ သွေးစီးဆင်မှုမှတဆင့် အရေပြားတစ်လျှောက်ရှိ အညစ်အကြေးဓာတုပစ္စည်းများကိုလည်း ဖယ်ရှားပေးခြင်း၊ အရေပြား ခြောက်သွေ့အက်ကွဲခြင်းများကို သွေး၍လိမ်းပေးခြင့်ဖြင့် သက်သာပျောက်ကင်း စေပါသည်။ 

    ကင်ပွန်းသီးတွင် သွေးလည်ပတ်မှုကိုကောင်းစေသော(antioxidants) ပါဝင်သောကြောင့် ကင်ဆာဖြစ်စေသောဆဲလ်များကို လျှော့ချနိုင်သောကြောင့် ကင်ဆာရောဂါအချို့ကို သက်သာစေ သည့်အပြင် ခန္ဓာကိုယ်သွေးလည်ပတ်မှုကောင်းမွန်စေရန်အတွက်  ခေါင်းလျှော်ရည်တွင် ကင်ပွန်းသီး ကိုပြုတ်၍ထည့်သုံးခြင်းဖြင့် ဦးရေပြားသွေးလည်ပတ်မှုကို ကောင်းမွန်စေကြောင်း  သိရှိရပါသည်။

    ကင်ပွန်းသီးကို ပခုက္ကူခရိုင်မြို့မစည်ပင်သာဈေးနှင့် အမှတ်(၂)ဈေးတို့တွင် အများအပြား ရောင်းချလျက်ရှိပြီး ဈေးနှုန်းအနေဖြင့် ကင်ပွန်းသီးတစ်ပိဿာလျှင် ကျပ်(၁၈၀၀) မှ (၂၀၀၀)ဖြင့် ရောင်းချနေကြောင်း မြို့မဈေးသည်များထံမှ သိရှိရပါသည်။

DOCA(မကွေး)

   မြန်မာနိုင်ငံစက်သုံးဆီတင်သွင်း/သိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီအနေဖြင့် တိုင်းဒေသကြီး/ပြည်နယ်အလိုက် မြို့ကြီးများ၏ ရည်ညွှန်းလက်ကားဈေးနှုန်းများကို နေ့စဉ်ထုတ်ပြန်ပေးလျက်ရှိပါသည်။

  စစ်ကိုင်းတိုင်းဒသကြီး၊ ကန့်ဘလူခရိုင်၊ ကျွန်းလှမြို့နယ်တွင် စက်သုံးဆီဆိုင်(၃)ဆိုင်ပုံမှန်ဖွင့်လှစ်ရောင်းချလျက်ရှိပြီး ၂၀၂၄ခုနှစ်၊ ဇန်နဝါရီလ ပထမပတ်တွင် စက်သုံးဆီဈေးနှုန်းများမှာ ဓာတ်ဆီ (92) တစ်လီတာလျှင် ကျပ်(၂၈၄၀)၊ ဓာတ်ဆီ (95) တစ်လီတာလျှင် ကျပ်(၂၉၄၅)၊ ဒီဇယ် (ရိုးရိုး) တစ်လီတာလျှင် ကျပ်(၂၅၉၅)၊ ဒီဇယ်(ပရီမီယမ်)တစ်လီတာလျှင် ကျပ်(၂၆၉၅)ဖြင့် ရောင်းချလျက်ရှိကြောင်းသိရှိရပါသည်။

    ယခု ၂၀၂၄ခုနှစ်၊ ဇန်နဝါရီလ ဒုတိယပတ်တွင် စက်သုံးဆီဈေးနှုန်းများမှာ ဓာတ်ဆီ(92) တစ်လီတာလျှင် ကျပ်(၂၈၁၅)၊ ဓာတ်ဆီ(95)တစ်လီတာလျှင် ကျပ်(၂၉၄၀)၊ ဒီဇယ်(ရိုးရိုး) တစ်လီတာလျှင် ကျပ်(၂၆၄၀)၊ ဒီဇယ်(ပရီမီယမ်)တစ်လီတာလျှင် ကျပ်(၂၇၂၀)ဖြင့်ရောင်းချသောကြောင့် ယခင်အပတ်နှင့်နှိုင်းယှဉ်ပါက ဓာတ်ဆီ(92)တစ်လီတာလျှင် ကျပ်(၂၅)၊ ဓာတ်ဆီ(95)တစ်လီတာလျှင် (၅)ကျပ်ကျဆင်းလျက်ရှိကြောင်းနှင့် ဒီဇယ်(ရိုးရိုး)တစ်လီတာလျှင် ကျပ်(၄၅) ဒီဇယ် (ပရီမီယမ်) တစ်လီတာလျှင် ကျပ်(၂၅)ဖြင့် ယခင်အပတ်ထက် ဈေးနှုန်းမြင့်တက်လျက်ရှိကြောင်း ကျွန်းလှမြို့ ၊ စက်သုံးဆီဆိုင်များမှ သတင်းရရှိပါသည်။

DOCA(စစ်ကိုင်း)

   ထန်းမြစ်(ခ)  ထန်းပင်ပေါက်များသည် ထန်းသီးစေ့မှထွက်ရှိလာသော ဆောင်းရာသီကာလတွင် ရရှိသည့်ရာသီစာတစ်မျိုးဖြစ်ပြီး အညာဒေသတစ်ခုတည်းတွင်သာထွက်ရှိသော အစားအစာတစ်မျိုးပင်ဖြစ်ပါသည်။

   ထန်းပင်မြစ်သည် စိမ့်သက်သောအရသာရှိသည်။ ရင့်သော ထန်းပင်မြစ်က စေးထန်းကာ အရသာပိုကောင်းသည်။ မြန်မာ့ဆေးကျမ်းများတွင်   ထန်းပင်မြစ်သည် သွေး၊   လေ၊ သည်းခြေတို့ကိုနိုင်၏။ ဝမ်းကိုလားစေ၏။ သလိပ်ကိုကြေစေ၏။ အသားနှင့် အားကိုဖြစ်စေ၏။ အစာကြေညက်ခြင်းနှင့် ဝမ်းမီးတောက်ခြင်းကိုနိုင်၏ဟူ၍  ဖော်ပြထားသည်။ ထန်းပင်မြစ်သည် လူတို့၏ခန္ဓာကိုယ်အတွက် လိုအပ်သော ဗီတာမင်ဘီဓာတ်ပေါင်းစုအပြင် အဆီဓာတ်နှင့် ပရိုတိန်းဓာတ်များလည်းပါရှိသည်။ အမျှင်ဓာတ်ကြွယ်ဝစွာပါရှိ၍ အစာခြေစနစ်ကို တိုးတက်ကောင်းမွန်စေကာ ဝမ်းချုပ်ခြင်းမှလည်း ကာကွယ်ပေးသည်။ ဆောင်းရာသီတွင်သာ ပေါပေါများများရရှိသော ထန်းပင်မြစ်သည် ခန္ဓာကိုယ်တွင်း  အပူဓာတ်ကို လျှော့ချပေးနိုင်သည့် ဆေးဖက်ဝင်ရာသီစာတစ်မျိုးဖြစ်သည်။

   ထန်းစေ့များကို ဝါခေါင်လ၊ တော်သလင်းလများတွင် စိုက်ပျိုးကြသည်။ ထန်းပင်မြစ်များကို တန်ဆောင်မုန်းလ၊ နတ်တော်လတို့တွင် ထန်းပင်မြစ်အား ဖော်ယူနိုင်သည်။ ရရှိပြီးသော ထန်းပင်မြစ်များကို ၁၀ချောင်းစည်း၊ ၁၅ချောင်းစည်း၊ ၂၅ချောင်းစည်းများပြုလုပ်ကာ ဈေးကွက်အတွင်း ရောင်းချကြသည်။

   (အညာဒေသ) မကွေးတိုင်းဒေသကြီးတွင် ထန်းပင်မြစ်များ လှိုင်လှိုင်ပေါ်လာပြီဖြစ်ရာ ယခင် နှစ်ထက် ဈေးနှုန်းအနည်းငယ် မြင့်တက်လျက်ရှိကြောင်း မကွေးမြို့၊ မြို့မဈေး၊ ကန်သာဈေး၊ ရန်ပယ်ဈေးတို့ရှိ ထန်းပင်မြစ်ရောင်းဝယ်သူများထံက သိရသည်။ ၂၀၂၄ခုနှစ်၊ ယခုဇန်နဝါရီလ (ဒုတိယပတ်)တွင် ထန်းပင်မြစ်ဈေးနှုန်းအနေဖြင့် ထန်းပင်မြစ်(သေး) ၁၀ချောင်း တစ်စည်းလျှင် ကျပ်(၈၀၀)၊ ထန်းပင်မြစ်(လတ်) ၁၀ချောင်း တစ်စည်းလျှင် ကျပ်(၁၀၀၀)နှင့် ထန်းပင်မြစ်(ကြီး) ၁၀ချောင်း တစ်စည်းလျှင် ကျပ်(၁၂၀၀)ဖြစ်ပြီး အညာကျေးလက်ဒေသရှိ တောင်သူလယ်သမား ကြီးများအတွက် မိသားစုဝင်ငွေတိုးစေနိုင်သော မြေကြီးထဲကရွှေတစ်မျိုးပင်ဖြစ်ကြောင်း ရေးသား တင်ပြလိုက်ရပါသည်။

DOCA(မကွေး)

       မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် စိုက်ပျိုးရေးဒေသဖြစ်သော်လည်း စပါးစိုက်ဧကနည်းပြီး စားသုံးဆန်ဖူလုံမှုမရှိ၍ အခြားတိုင်းဒေသကြီးများနှင့် မြို့နယ်များမှ ဆန်များဝယ်ယူတင်သွင်းရသော ဒေသဖြစ်ပါသည်။ မကွေးတိုင်းဒေသကြီး၊ ဆင်ဖြူကျွန်း၊ စလင်း၊ ရှောက်တော၊ တောင်တွင်းကြီးနှင့် စစ်ကိုင်းတိုင်း၊ ရွှေဘိုမြို့နှင့် ဧရာဝတီတိုင်းဒေသကြီး၊ ပုသိမ်၊ မြောင်းမြ၊ ဖျာပုံ၊ မြန်အောင်ဒေသများမှ ကုန်းလမ်းကြောင်းဖြင့် ဆိပ်ဖြူမြို့သို့ ဝင်ရောက်လျက်ရှိပါသည်။

    ဆိပ်ဖြူဒေသတွင် ဆန်များဝယ်ယူစားသုံးရပြီး ဆန်ထွက်ရှိရာဒေသများမှလည်း ဆန်ဈေးနှုန်းအနည်းငယ်မြင့်တက်၍ ဆိပ်ဖြူမြို့၊ ဆန်ဈေးကွက်တွင်လည်း ဈေးနှုန်းအနည်းငယ်မြင့်တက်လာကြောင်းတွေ့ရှိရသည်။

 ၂၀၂၄ခုနှစ်၊ ဇန်နဝါရီလ(ပထမပတ်)တွင် အရောင်းအဝယ်ဖြစ်နေသော ဆန်ဈေးနှုန်းများမှာ ဒေသတွင်း စားသုံးမှုများသော ဧရာပဒေသာဆန်(ဆင်ဖြူကျွန်း) တစ်အိတ်လျှင် ကျပ်(၁၄၆၀၀၀)၊ ဧရာပဒေသာ(မြောင်းမြ) တစ်အိတ်လျှင် ကျပ်(၁၂၀၅၀၀)၊ ဧရာပဒေသာပေါ်ဆန်းရော(ထူးရှယ်) တစ်အိတ်လျှင် ကျပ်(၁၅၀၀၀၀)၊ ရာပြည့်ဖန်သီးတစ်အိတ်လျှင် ကျပ်(၁၀၃၀၀၀)၊ ရွှေဝါထွန်း (မြောင်းမြ) ဆန်အသစ်တစ်အိတ်လျှင် ကျပ်(၇၈၀၀၀)၊ မနောသုခ(ဆင်ဖြူကျွန်း) တစ်အိတ်လျှင် ကျပ်(၁၂၆၀၀၀)၊ မနောသုခ (မြောင်းမြ) တစ်အိတ်လျှင် ကျပ်(၉၁၀၀၀)၊ ဆင်းသုခ(ဆင်ဖြူကျွန်း) တစ်အိတ်လျှင် ကျပ်(၁၁၂၀၀၀)၊ ဆင်းသုခ(မြောင်းမြ) တစ်အိတ်လျှင် ကျပ်(၉၅၀၀၀) ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိပြီး ဒုတိယစားသုံးမှုအများဆုံးဖြစ်သော ရွှေဘိုပေါ်ဆန်းမွှေးတစ်အိတ်လျှင် ကျပ်(၁၈၁၀၀၀)၊ သိင်္ဂီပေါ် ဆန်းတစ်အိတ်လျှင် ကျပ်(၁၂၁၀၀၀) ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိပါသည်။ ဇန်နဝါရီ(ပထမပတ်)တွင် ယခင်ဒီဇင်ဘာလ(စတုတ္ထပတ်)ထက် ဆန်တစ်အိတ်လျှင် ကျပ်(၁၀၀၀) ခန့် ဈေးနှုန်းမြင့်တက်ကာ အရောင်းအဝယ်ဖြစ်နေကြောင်း ဆန်ရောင်းဝယ်ရေးဈေးကွက်မှသိရှိရသည်။

DOCA(မကွေး)