ပြည်တွင်းကုန်သွယ်မှုသတင်း

      မြန်မာနိုင်ငံသည် ယခုအခါတွင် အသေးစား၊ အငယ်စား၊ အလတ်စား စီးပွားရေးလုပ်ငန်းများဖွံ့ဖြိုးတိုးတက်စေရေးအတွက် နိုင်ငံတော်အစိုးရမှ အလေးထားဆောင်ရွက်လျက်ရှိပါသည်။ မြို့ရွာများတွင် တစ်နိုင်တစ်ပိုင်စီးပွားရေးလုပ်ငန်းများဖြစ်သော စိုက်ပျိုးရေး၊ မွေးမြူရေးလုပ်ငန်းများအပြင် ဒေသထွက်ကုန်များအား တန်ဖိုးမြှင့်ထုတ်ကုန်ထုတ်လုပ်၍ MSMEs လုပ်ငန်းများဖွံ့ဖြိုးတိုးတက်စေရေးအတွက် လုပ်ကိုင်ဆောင်ရွက်လျက်ရှိပါသည်။ ထိုသို့လုပ်ငန်းများဖွံ့ဖြိုးတိုးတက်စေရန်ပြုလုပ်ခြင်းဖြင့် မိမိတို့အတွက် အလုပ်အကိုင်အခွင့်အလမ်းများရရှိနိုင်ပြီး ပြည်ပဈေးကွက်များသို့ ထိုးဖောက်ဝင်ရောက်လာကာ နိုင်ငံတော်အတွက်လည်း နိုင်ငံခြားဝင်ငွေလည်းရရှိနိုင်မည်ဖြစ်ပါသည်။

       ပဲခူးတိုင်းဒေသကြီး၊ ပြည်ခရိုင်အနေဖြင့် MSMEs လုပ်ငန်းများဖွံ့ဖြိုးတိုးတက်စေရေးအတွက် အသေးစား၊ အငယ်စား၊ အလတ်စား စီးပွားရေးလုပ်ငန်းများကို တန်ဖိုးမြှင့်တိုးတက် ထုတ်လုပ်နိုင်စေရေးအတွက် နိုင်ငံတော်အစိုးရကလည်း ကူညီပံ့ပိုးပေးလျက်ရှိပါသည်။ ပြည်ခရိုင်အနေဖြင့် MSMEs လုပ်ငန်းရှင်ပေါင်း ၅၀ဦးကျော်ရှိပြီး ပြည်မြို့နယ်တွင် ၃၀ဦးကျော်၊ ရွှေတောင်မြို့နယ်တွင် ၁၀ဦးကျော်၊ ပန်းတောင်းမြို့နယ်တွင် ၂ဦး၊ ပေါက်ခေါင်းမြို့နယ်တွင် ၁၀ဦးကျော်ရှိပါသည်။ ပြည်မြို့နယ်အနေဖြင့် စားသောက်ကုန်လုပ်ငန်းများဖြစ်သော နွားနို့မှတစ်ဆင့် တန်ဖိုးမြှင့်ထုတ်ကုန် နို့ဆီ၊ မလိုင်လုံး၊ မလိုင်ခဲ၊ ဒိန်ချဉ်လုပ်ငန်းများရှိကြောင်း၊ သဘာဝသစ်သီးများဖြစ်သော ကတွက်သီး၊ သရက်သီး၊ မရန်းသီး၊ ဆီးသီး၊ ချဉ်ပေါင်ဖူး စသည့်အသီးများအား ယိုများပြုလုပ်၍ရောင်းချခြင်းအပြင် ချဉ်ပေါင်ဖူးကို ဂျယ်လီ၊ ချဉ်ပေါင်ဖူးဖျော်ရည်များကိုလည်းထုတ်လုပ်ရောင်းချရန် တီထွင်စမ်းသပ်နေပါသည်။ ထို့ပြင် ထမင်းသုပ်လုပ်ငန်းများကို တစ်ဆင့်မြှင့်တင်ပြီး တစ်ခါစားအထုပ်များထုတ်လုပ်၍ရောင်းချခြင်း၊ ရှားစောင်းလက်ပတ်ယိုပြုလုပ်ခြင်း၊ မြေပဲယို၊ နှမ်းယိုများပြုလုပ်ခြင်း၊ ငရုတ်သီးအား အလှော်မှုန့်၊ အကြမ်းမှုန့်၊ အရောင်တင်မှုန့်များအပြင် ကုလားပဲကိုခွဲကြမ်းပြုလုပ်ပြီး ထိုမှတစ်ဆင့် ပဲမှုန့်၊ အကြော်မှုန့်များပြုလုပ်၍ရောင်းချခြင်း စသည့်လုပ်ငန်းများလုပ်ကိုင်ကြပါသည်။ နိုင်ငံ့စီးပွားဖွံ့ဖြိုးတိုးတက်စေရေးအတွက် အချိန်ကုန်လူပင်ပန်းသက်သာစေရန်အတွက် လယ်ယာများတွင် အသုံးပြုရန်  ကောက်စိုက်စက်၊ မြေဩဇာချစက်၊ ကြံစိုက်စက်များထုတ်လုပ်နိုင်သည့်အပြင် ပဲမျိုးစေ့ချ စက်နှင့် မတ်ပဲရိတ်စက်များကို ထပ်မံထုတ်လုပ်ရန် စီစဉ်ဆောင်ရွက်နေကြပါသည်။ ့ပြင် လယ်ယာများတွင် စပါးနှင့်ပဲအထွက်နှုန်းကောင်းမွန်ရန်အတွက်အသုံးပြုရန် သဘာဝမြေဩဇာများထုတ်လုပ်သည့် လုပ်ငန်းများလည်းရှိပါသည်။ လူအသုံးအဆောင်ပစ္စည်းများဖြစ်သော ဆပ်ပြာဆီကုန်ကြမ်းများထုတ်လုပ်ခြင်း၊ ထိုမှတစ်ဆင့် အသင့်သုံးဆပ်ပြာဆီများ၊ ကိုယ်တိုက်ဆပ်ပြာများ၊ မျက်နှာသစ်ဆပ်ပြာများထုတ်လုပ်သော လုပ်ငန်းရှင်ပေါင်းများစွာရှိပါသည်။

         ရွှေတောင်မြို့နယ်၏ လူအသုံးအဆောင်ဖြစ်သော ဝတ်စားဆင်ယင်မှုအနေဖြင့် မြန်မာ့ရိုးရာချည်ထည်လုပ်ငန်းပေါင်းမြောက်မြားစွာရှိပြီး စည်းလုပ်ငန်းလုပ်ကိုင်သူ (၆၆)ဦးခန့်ရှိကြောင်းသိရပါသည်။ စက်မှုကုန်ကြမ်းသီးနှံဖြစ်သော ဝါမှတစ်ဆင့် ဝါဂွမ်း၊ ဝါဂွမ်းမှတစ်ဆင့် ချည်ငင်ပြီး ချည်ထည်များကို ရက်လုပ်ရောင်းချသည့် စက်ရက်ကန်းများ၊ လက်ရက်ကန်းများမှ အဆင့်မြှင့်ထုတ်ကုန် ၂/၁၀၀ချည်၊ ၂/၈၀ချည်များထုတ်လုပ်ရောင်းချသည့် လုပ်ငန်းများရှိကြောင်း၊ စားသောက်ကုန်လုပ်ငန်းများအနေဖြင့် ရွှေတောင်ခေါက်ဆွဲ၊ ရွှေတောင်ထမင်းသုပ်များကို အသင့်စားသုံး၍ရပြီး တစ်ခါစားထမင်းသုပ်အထုပ်များအား အဆင့်ီပါကင်ထုပ်များထုပ်၍ ပြည်ပဈေးကွက်သို့ တင်ပို့ရောင်းချသောလုပ်ငန်းများလည်းရှိပါသည်။ ့ပြင် အစာကြေဆေး များအဖြစ် ဆင်တုံးမနွယ်၊ ရှောက်ပေါင်း၊ ရှောက်တောင့်များပြုလုပ်၍ရောင်းချကြပြီး လူ့အသုံးအဆောင်ပစ္စည်းများဖြစ်သော ဝါးမှတစ်ဆင့် ဝါးကုလားထိုင်၊ ထန်းကုလားထိုင်များအပြင် တစ်နိုင်တစ်ပိုင်ခမောက်လုပ်ငန်းများလုပ်ကိုင်သည့် လုပ်ငန်းများလည်းရှိပါသည်။

         ပေါက်ခေါင်းမြို့နယ်အနေဖြင့် ကြံအများဆုံးစိုက်ပျိုးသောမြို့နယ်ဖြစ်ပြီး ဝါသီးနှံလည်း စိုက်ပျိုးခြင်း၊ နှမ်းနှင့်မြေပဲများကိုလည်းစိုက်ပျိုးသည့် မြို့နယ်ဖြစ်သည့်အတွက် ထိုသီးနှံများမှတစ်ဆင့် စားသောက်ကုန်များထုတ်လုပ်ရောင်းချသော လုပ်ငန်းရှင်များရှိသည့်အပြင် အဝတ်အထည်လုပ်ငန်းများဖြစ်သော ရိုးရာချည်ထည်များကိုလည်းထုတ်လုပ်ရောင်းချသည့် လုပ်ငန်းရှင်များလည်းရှိပါသည်။ ကြံသီးနှံကိုအခြေခံ၍ ကြံမှ တစ်ဆင့်မြှင့်ထုတ်ကုန်ဖြစ်သော သကြားအပြင်၊ ကြံမွ၊ မြေပဲကြံသကာ၊ မြေပဲယို၊ နှမ်းယို၊ မြေပဲဆားလှော်လုပ်ငန်းများလုပ်ကိုင်ဆောင်ရွက်ကြပါသည်။

       ထိုသို့ အသေးစား၊ အလတ်စား၊ အငယ်စား စီးပွားရေးလုပ်ငန်းများလုပ်ကိုင်လျက်ရှိသော ပြည်ခရိုင်အတွင်းရှိ စီးပွားရေးလုပ်ငန်းရှင်များအနေဖြင့် မိမိတို့၏ထုတ်ကုန်များကို အဆင့်မြှင့်တင်၍ ထုတ်လုပ်ကာ ဈေးကွက်များ၊ ဈေးရောင်းပွဲတော်များ၌ ရောင်းချမည်ဆိုပါက လူအများပိုမိုသိရှိပြီး ရောင်းအားမြင့်တက်၍ ပြည်တွင်းဈေးကွက်သာမကဘဲ ပြည်ပဈေးကွက်သို့ပါ ထိုးဖောက်ဝင်ရောက်နိုင်၍ လူမှုစီးပွားရေးဘဝတိုးတက်ဖွံ့ဖြိုးလာနိုင်မည်ဖြစ်ပါသည်။ ့ပြင် စွန့်ပစ်ပစ္စည်းများမှ တန်ဖိုးမြင့်ထုတ်ကုန်ထုတ်လုပ်လာနိုင်မည်ဆိုပါက ပိုမိုအကျိုးအမြတ် ဖြစ်ထွန်းလာနိုင်ပြီး အမှိုက်ထဲမှ ရွှေဖြစ်မည်ဖြစ်ပါသည်။ MSMEs လုပ်ငန်းများဖွံ့ဖြိုးတိုးတက်လာပါက ရရှိနိုင်သောကောင်းကျိုးများမှာ စီးပွားရေးဖွံ့ဖြိုးတိုးတက်မှုမြင့်မားခြင်း၊ လူနေမှုအဆင့်အတန်းများ တိုးတက်ကောင်းမွန်လာခြင်းနှင့် နိုင်ငံခြားရင်းနှီမြုပ်နှံမှုများကြောင့် နိုင်ငံခြားဝင်ငွေရရှိလာနိုင်ခြင်း စသည့်ကောင်းကျိုးများရရှိလာနိုင်မည်ဖြစ်ပါသည်။

       ယခင်က ကျေးလက်ဒေသများတွင် ဖွံ့ဖြိုးမှုနိမ့်ကျခဲ့ရခြင်းမှာ တစ်ဦးခြင်းဝင်ငွေရရှိမှုနည်းပါးခြင်းလည်းပါဝင်ပါသည်။ ယခုအခါတွင် ဒေသဖွံ့ဖြိုးရေးစီမံကိန်းများပါဝင်မှုကြောင့် လုပ်ငန်းစီမံကိန်းအသစ်များတိုးချဲ့ပြုလုပ်လာနိုင်ကြသဖြင့် အလုပ်အကိုင်အခွင့်အလမ်းများလည်း ဖွံ့ဖြိုးတိုးတက်များပြားလာကြမည်ဖြစ်ပါသည်။ စိုက်ပျိုးရေးနှင့်မွေးမြူရေးကဏ္ဍများတွင်လည်း တစ်နိုင်တစ်ပိုင်စိုက်ပျိုးမွေးမြူလာကြရာမှ စီးပွားဖြစ်စိုက်ပျိုးမွေးမြူလာကြသဖြင့် ဝင်ငွေများ များပြားလာကြပါသည်။ ထို့အတူ စက်မှုလက်မှုလုပ်ငန်းများလည်း ပိုမိုထုတ်လုပ်လာနိုင်ပြီး လမ်းပန်းဆက်သွယ်ရေးကောင်းမွန်မှုကြောင့် ဒေသတစ်ခုမှ အခြားဒေသတစ်ခုသို့ရောင်းချနိုင်ခြင်းဖြင့်လည်း ဝင်ငွေများစွာရရှိလာကြပါသည်။ ထိုကဲ့သို့ တစ်ဦးချင်းဝင်ငွေများ များပြားလာသည့်အတွက် ပညာရေး၊ ကျန်းမာရေးနှင့် နေထိုင်မှုအဆင့်အတန်းများမှအစ မြင့်မားလာနိုင်မည်ဖြစ်ပါသည်။

    ထို့ကြောင့် အသေးစား၊ အငယ်စား၊ အလတ်စား လုပ်ငန်းရှင်များအနေဖြင့် မိမိတို့၏ထုတ်ကုန်များကို အဆင့်မြှင့်တင်ထုတ်လုပ်ခြင်း၊ စနစ်တကျထုပ်ပိုးနိုင်ပါက နိုင်ငံခြားအထိ ကုန်ပစ္စည်းများထိုးဖောက်ဝင်ရောက်လာနိုင်မည်ဖြစ်၍ မိမိတို့အနေဖြင့်လည်း ဝင်ငွေများတိုးတက်လာနိုင်မည်ဖြစ်ပြီး နိုင်ငံအတွက်လည်း ပြည်ပဝင်ငွေများရရှိလာနိုင်မည်ဖြစ်ကြောင်း လေ့လာသုံးသပ်တင်ပြလိုက်ရပါသည်။

DOCA(ပဲခူး)

      ပြည်ဈေးကွက်တွင် ဆီထွက်သီးနှံများဖြစ်သော နှမ်းနှင့် မြေပဲဆန်ဈေးနှုန်းများမြင့်တက်လာခဲ့ပါသည်။ မိုးနှမ်းနှင့် မိုးမြေပဲများစိုက်ပျိုးချိန်ဖြစ်၍ ဝင်ရောက်မှုမရှိခြင်း၊ ဒေသတွင်း၌လည်း လာရောက်ရောင်းချခြင်းမရှိ၍ ယခင်လက်ကျန်များဖြင့်သာ အရောင်းအဝယ်ဖြစ်လျက်ရှိပါသည်။ မြေပဲဆန်မှာ ဝယ်လိုအားရှိသော်လည်း ပစ္စည်းလက်ကျန်နည်းနေသည့်အတွက် ဈေးများမြင့်တက်လာပြီး နှမ်းသီးနှံမှာလည်း နောက်ထပ်(၁)လခွဲအကြာတွင် ထွက်ပေါ်လာမည်ဖြစ်သည်ဟုသိရပါသည်။ ယခုအချိန်တွင်  လူအများမှာ မြေပဲဆီနှင့် နှမ်းဆီကိုဝယ်ယူစားသုံးကြသည့်အတွက် ဆီစက်သမားများကလည်း နှမ်းနှင့်မြေပဲကိုဆီကြိတ်ရန်အဝယ်ရှိသဖြင့် သီးနှံများထွက်ပေါ်မှုမရှိသေးဘဲ စပ်ကူးမတ်ကူးအချိန်ဖြစ်၍ ဈေးနှုန်းများမြင့်တက်လာသည်ဟုသိရပါသည်။ သြဂုတ်လ ဒုတိယအပတ်တွင် မြေပဲဆီဆန်(အဖြူ)တစ်ပိဿာလျှင် ၈၂၀၀ကျပ်၊ (အနီ)တစ်ပိဿာလျှင် ၈၀၀၀ကျပ်နှင့် မြေပဲလုံးဆန် (အဖြူ)တစ်ပိဿာလျှင် ၈၆၀၀ကျပ်၊ (အနီ)တစ်ပိဿာလျှင် ၈၃၀၀ကျပ်ဖြင့် ရောင်းချကြပြီး ဈေးကွက်များတွင် မြေပဲကြော်စားရန်အတွက် ရောင်းချသောမြေပဲဆန်ဈေးမှာ နို့ဆီဘူးတစ်ဘူးလျှင် (၁၀၀၀-၁၁၀၀)ကျပ်ဖြင့် ရောင်းချလျက်ရှိပါသည်။ နှမ်းဈေးမှာ ဈေးကွက်တွင် ပစ္စည်းပြတ်နေသော်လည်း နှမ်းနီတစ်တင်းလျှင် ၁၁၂၀၀၀ကျပ်၊ နှမ်းနက်တစ်တင်းလျှင် ၁၄၃၀၀၀ကျပ်နှင့် စမုံနက်နှမ်းတစ်တင်းလျှင် ၁၄၈၀၀၀ကျပ်ဖြင့် ရံဖန်ရံခါသာ အရောင်းအဝယ်ဖြစ်လျက်ရှိသည်ဟုသိရပါသည်။ ယခင်ဇူလိုင်လ၊ ဒုတိယအပတ်နှင့်နှိုင်းယှဉ်လျှင် မြေပဲဆီဆန် (အဖြူ)နှင့် (အနီ)တစ်ပိဿာလျှင် ၁၂၀၀ကျပ်စီ၊ မြေဆန်လုံးဆန်(အဖြူ)တစ်ပိဿာလျှင် ၉၀၀ကျပ်၊ (အနီ)တစ်ပိဿာလျှင် ၈၀၀ကျပ်ဖြင့် ဈေးနှုန်းများမြင့်တက်လာခဲ့ပါသည်။ နှမ်းဈေးများမှာမူ ယခင်ဇူလိုင်လ၊ ဒုတိယအပတ်အတိုင်း ဈေးငြိမ်နေသည်ကိုတွေ့ရပါသည်။

          ပြည်ဈေးကွက်ဖြစ်ပေါ်ခဲ့သော ဆီထွက်သီးနှံဈေးနှုန်းများအား ၂၀၂၃ခုနှစ်နှင့် ၂၀၂၄ခုနှစ်  (၂)နှစ်အလိုက် နှိုင်းယှဉ်ကြည့်မည်ဆိုလျှင်-

          အထက်ပါဇယားကိုကြည့်ခြင်းအားဖြင့် မြေပဲသီးနှံဈေးနှုန်းနှင့် နှမ်းသီးနှံဈေးများအနေဖြင့် ၂၀၂၃ခုနှစ်ထက် ၂၀၂၄ခုနှစ်တွင် ဈေးနှုန်းများမြင့်တက်လာခဲ့သည်ုတွေ့ရှိရပါသည်။ ယခုနှစ်တွင် မိုးရေကြီးခြင်း၊ မြစ်ရေများလျှံခြင်းတို့ကြောင့် နှမ်းခင်းနှင့် မြေပဲခင်းများနစ်မြုပ်သည့်အတွက် ရေနစ်သည့်သီးနှံများ ထွက်ပေါ်ချိန်တွင် နှမ်းမြေပဲအထွက်နည်းနိုင်သည်ဟု တောင်သူတစ်ဦးထံမှသိရှိရပါသည်။

DOCA(ပဲခူး)

       ပြည်ဈေးကွက်အတွင်းမှ မီးဖိုချောင်သုံးသီးနှံများဖြစ်သော ကြက်သွန်ဖြူ(ရှမ်းစ)မှာ တောင်ကြီး၊ အောင်ပန်းမှ အဝင်ရှိပြီး ရက်ခြားအဝင်ရှိ၍ တစ်ပတ်လျှင် အိတ်(၁၂၀) ခန့်အဝင်ရှိပါသည်။ ကြက်သွန်ဖြူ(ကြူကုတ်)မှာ မန္တလေးမှအဝင်ရှိပြီး တစ်ပတ်လျှင် အိတ်(၁၀၀) ခန့်အဝင်ရှိကြောင်းသိရပါသည်။ ကြူကုတ်မှာ မန္တလေးဘက်မှအဝင်ရှိသည့်အပြင် ပြည်မြို့နှင့် နီးစပ်ရာမြို့ဖြစ်သော ရန်ကုန်၊ပြည်ပွဲရုံများမှလည်း အဝယ်ရှိကြောင်းသိရပါသည်။  အောင်ပန်းဘက်မှ ရှမ်းအာလူးများအဝင်ရှိပြီး မန္တလေးဘက်မှလည်း အဝင်ရှိပါသည်။ အာလူးမှာ ရက်ခြားအဝင်ရှိပြီး တစ်ပတ်လျှင် အိတ် (၁၂၀)ခန့်အဝင်ရှိပါသည်။

         သြဂုတ်လ၊ ဒုတိယအပတ်တွင် ဈေးနှုန်းများအနေဖြင့် ကြက်သွန်ဖြူ(ရှမ်းစ) တစ်ပိဿာလျှင် လက်လီ (၁၆၀၀၀)ကျပ်၊ လက်ကား(၁၅၀၀၀)ကျပ်၊ ကြက်သွန်ဖြူ(ကြူကုတ်)တစ်ပိဿာလျှင် လက်လီ (၁၃၀၀၀)ကျပ်၊ လက်ကား(၁၂၀၀၀)ကျပ်၊ အာလူးမှာ ယခင်တွင် တစ်ပိဿာလျှင် လက်လီ (၄၅၀၀)ကျပ်၊ လက်ကား (၄၀၀၀)ကျပ်မှ ယခုအခါ လက်လီ (၅၀၀၀)ကျပ်၊ လက်ကား (၄၅၀၀)ကျပ်ဈေးရှိပြီး ယခင်ထက် ဈေးအနည်းငယ်မြင့်တက်နေပြီး ယခုကဲ့သို့ဈေးနှုန်းများမြင့်တက်လာရခြင်းမှာ ဈေးကွက်အတွင်း လက်ကျန်နည်းနေခြင်းကြောင့်ဖြစ်သည်ဟု သိရပါသည်။ အရောင်းအဝယ်အနေဖြင့် ဒေသတွင်းစားသုံးသူလက်လီသမားများအဝယ်ရှိကြသည့်အပြင် လက်ကားဝယ်ယူသူလုပ်ငန်းရှင်များလည်းရှိပြီး အခြားမြို့နယ်များမှလည်း မှာယူခြင်းများဖြစ်ကြောင်းသိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိဈေးများနှင့် အသီးမျိုးစုံရောင်းချနေသော သစ်သီးဆိုင်များတွင် နာနတ်သီးအများအပြားရောင်းချနေကြောင်းတွေ့ရသည်။ နာနတ်သီးများကို ရှမ်းပြည်နယ်နှင့် မန္တလေးပွဲရုံများမှ မှာယူရောင်းချလျက်ရှိကြောင်းသိရသည်။ ရှမ်းပြည်နယ်၊ တောင်ကြီးမှ ကားရောက်သောနေရာအားလုံး၌ ရောင်းချပေးလျက်ရှိကြောင်းသိရသည်။ နာနတ်သီးမျိုးများမှာ ရှမ်းပြည်နယ်မြောက်ပိုင်း နာနတ်သီး၊ စဉ့်အင်နာနတ်၊ ပျားစပ်နာနတ်၊ အချိုအာမခံ နာနတ်၊ ပျားအရောနာနတ်ဟူ၍ ရောင်းချကြကြောင်းသိရပါသည်။ ကားကြီးတစ်စီးကို  နာနတ်သီးအလုံးရေ (၇၀၀၀)ခန့်ပါကြောင်းသိရပါသည်။ သြဂုတ်လ၊ ဒုတိယအပတ်တွင် နာနတ်သီးတစ်လုံးကို အလေးချိန် တစ်ပိဿာနှင့် သုံးဆယ်ကျပ်သားရှိ အလုံး(၁)လုံးကို (၁၅၀၀)ကျပ်ဖြင့်မှာယူနိုင်ကြောင်း၊ ပြည်မြို့ရှိသစ်သီးပွဲရုံများသို့ တစ်နေ့လျှင် နာနတ်သီးအလုံးရေ (၄၀၀ - ၅၀၀)လုံးခန့်ဝင်ရောက်ကြောင်း၊ ဝင်ရောက်လာသောနာနတ်သီးများကို လက်လီရောင်းချသည့်အသီးဆိုင်များအား တစ်ဆင့်ပြန်လည်ရောင်းချကြကြောင်းသိရှိှိရသည်။

DOCA(ပဲခူး)

       ပဲခူးတိုင်းဒေသကြီး၊ ပြည်ပဲမျိုးစုံဈေးကွက်၌ နေ့စဉ် ပဲကြော်ဖိုလုပ်ငန်းသမားများဖြင့် အရောင်းအဝယ်ဖြစ်နေသောပဲသီးနှံမှာ ပဲကြီးသီးနှံဖြစ်ပြီး ပဲလက်ကျန်များ နေ့စဉ်အရောင်းအဝယ် ဖြစ်နေခဲ့ပါသည်။ ဒေသတွင်းပဲကြော်ဖိုလုပ်ငန်းသမားများ အဓိကဝယ်ယူမှုရှိကာ တစ်ရက်လျှင် အိတ် (၂၀၀/၃၀၀) ကျော်ရောင်းဝယ်မှုဖြစ်ပြီး ပဲဈေးမှာ (ရွှေကျွန်း) တစ်တင်းလျှင် ၉၀၀၀၀ကျပ်မှ ၉၂၀၀၀ကျပ်၊ (ကမ်းနား) တစ်တင်းလျှင် ၈၅၀၀၀ကျပ်မှ ၈၆၀၀၀ကျပ်ဖြင့်ရောင်းဝယ်နေခဲ့ကြပါသည်။  ယခင်နှစ်တွင် ပဲကြီးသီးနှံသည်  မတ်ပဲသီးနှံထက်ပင် ဈေးပိုမြင့်ခဲ့သော်လည်း ယခုနှစ်တွင်မူ ပဲကြီးသီးနှံဈေးနှုန်းသည် သိသိသာသာမြင့်တက်လာခြင်းမရှိဘဲ မတ်ပဲသီးနှံအနေဖြင့် ယခုနှစ်၌ ပဲဈေးနှုန်းများသိသိသာသာမြင့်တက်လာခဲ့ကာ ကျပ်  ၁သိန်းကျော်အထိရရှိလာသည့်အတွက် ပဲကြီးသီးနှံဈေးထက် ဈေးပိုသွားခဲ့ပါသည်။ ယခင်နှစ် ကာလတူချိန်၌ ပဲကြီးသီးနှံဈေးမှာ (ရွှေကျွန်း) တစ်တင်းလျှင် ၉၈၀၀၀ကျပ်၊ (ကမ်းနား) တစ်တင်းလျှင် ၉၅၀၀၀ကျပ်ဖြင့် အသီးသီးရောင်းဝယ်မှုဖြစ်ခဲ့သည့်အတွက် ယခုနှစ်ပဲကြီးဈေးနှုန်းမှာ ယခင်နှစ်ထက်ပင် ဈေးအနည်းငယ်လျော့နေခဲ့ကြောင်းသိရှိသည်။

DOCA(ပဲခူး)