မန္တလေးနှမ်းစျေးနှုန်းစျေးကွက်
ဆီထွက်သီးနှံဖြစ်သည့်နှမ်းသီးနှံမှာ ပြည်တွင်းစားသုံးခြင်းနှင့် ပြည်ပသို့တင်ပို့သည့်သီးနှံ တစ်မယ်ဖြစ်ပြီး၊မကွေးတိုင်းဒေသကြီး၊ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီးတို့မှာ အဓိကစိုက်ပျိုးလျက်ရှိကြောင်းသိရပါတယ်။မန္တလေးတိုင်းဒေသကြီးအတွင်း နှမ်းသီးနှံကို နွေနှမ်း၊ မိုးနှမ်းနှင့် ဆောင်းနှမ်း (မိုးနှောင်းနှမ်း)အဖြစ် စိုက်ပျိုး လျက်ရှိကြောင်း သိရပါတယ်။ မန္တလေး တိုင်းဒေသကြီးအတွင်း ဆီထွက်သီးနှံစိုက်ပျိုးမှုများအနက် ၂၀၂၄-၂၀၂၅ ခုနှစ်နှမ်း သီးနှံစိုက်ပျိုးမှု ၉၆၂၃၈၃ ဧက၊ရိတ်သိမ်းမှု ၈၈၉၄၂၈ ဧက၊အထွက်နှုန်း ၄.၄၆ တင်းနှင့် အထွက်စုစုပေါင်း ၃၉၆၂၈၆၉ တင်းဖြစ်ကြောင်း သိရပါတယ်။ ပြည်တွင်း၌ နှမ်းသီးနှံအား ဆီကြိတ်ခွဲ၍ နှမ်းဆီအဖြစ် စားသုံးခြင်း၊ နှမ်းလှော်ဆီမွှေး၊နှမ်းယို၊နှမ်းဖတ်၊နှမ်းလှော်နှင့် သရေစာမုန့် အမျိုးမျိုးတို့တွင် နှမ်းအားထည့်သွင်း စားသုံးကြောင်း တွေ့ရပါတယ်။ နှမ်းသီးနှံမှာ ပရိုတင်းဓာတ် များစွာ ပါဝင်ပြီး၊ ဆေးဖက်ဝင်ကြောင်း သိရပါတယ်။ ဆီထွက်သီးနှံ မြေပဲ၊ နှမ်းနှင့် နေကြာသီးနှံ များအား စားသုံးဆီကြိတ်ခွဲ၍ ပြည်တွင်းစားဆီဖူလုံမှုရှိစေရန်နှင့်စားဆီများတင်သွင်းမှု လျော့ချနိုင်ရန် အတွက် နိုင်ငံတော်မှတွန်းအား ပေးဆောင်ရွက်လျက်ရှိကြောင်း သိရပါတယ်။နှမ်းသီးနှံမှာ ပြည်တွင်းစားဆီကြိတ်ခွဲသည့်အရေးကြီးကုန်စည်တစ်မျိုးဖြစ်ပြီး၊ပြည်ပသို့ တင်ပို့သည့် စျေးကွက် ဝင်သီးနှံဖြစ်ကြောင်းသိရပါတယ်။ မန္တလေးပွဲစား၊ကုန်သည်စက်ပိုင်များမဟာကထိန်တော် အသင်း တွင် ၂၀၂၅ခုနှစ်ဖေဖော်ဝါရီလတတိယပတ်အတွင်း ဖြစ်ပေါ်လျက်ရှိသည့်နှမ်းအမျိုးအစားအလိုက် ပေါက်စျေးများမှာ ၃တင်းဝင်အိတ် (၄၅ပိဿာပါ) တစ်အိတ်လျှင် နှမ်းဖြူ(ဗမာ)၃၂၃၀၀ဝိ/- နှင့် ၃၃၅၀၀ဝိ/-၊ဆောင်းနှမ်း ၅၂၅၀၀ဝိ/- နှင့် ၅၄၀၀၀ဝိ/-၊တစ်ပိဿာစျေးမှာ နှမ်းဖြူ(ဗမာ )၇၁၇၈ ကျပ်နှင့် ၇၄၄၄ ကျပ်၊ဆောင်းနှမ်း ၁၁၆၆၇ ကျပ်နှင့် ၁၂၀၀၀ ကျပ်၊နှမ်းဖတ်စျေးမှာ ၄၃၀၀ ကျပ်နှင့် ၄၄၀၀ကျပ် စျေးတို့ဖြစ်ပေါ်လျက်ရှိကြောင်း သိရပါတယ်။ ယခင်နှစ်ကာလတူပေါက်စျေးမှာ ဆောင်းနှမ်းတစ်ပိဿာလျှင် ၇၆၆၇ ကျပ်နှင့်၇၈၈၉ ကျပ် တို့ဖြစ်ပေါ်ခဲ့ပြီး၊ ယခုနှစ်စျေးနှင့် ယခင် နှစ်စျေးနှိုင်းယှဉ်ပါက ဆောင်းနှမ်းစျေးမှာ ပိုမိုရရှိကြောင်း သိရပါတယ်။
DOCA(မန္တလေး)
