ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ် တွင် တောင်သူအချို့သည် မိုးရာသီ၌ ပန်းစိုက်ပျိုးခြင်းကို ဆောင်ရွက်ကြပြီး ၂၀၂၅ ခုနှစ် မိုးရာသီတွင် ဂန္ဓမာအုပ်စုဝင် စူပါကျောက်စိမ်း နှင့် မြနှင်းပုလဲ မျိုးများကို အများဆုံးစိုက်ပျိုးကြပြီး ၇၉၁ ဧက စိုက်ပျိုးထားရှိပါသည်။ စူပါကျောက် စိမ်းမျိုးသည် အဖြူရောင်အပွင့်တွင် အစိမ်းရောင်ဝတ်ဆံရှိပြီး မြနှင်းပုလဲသည် အဖြူရောင်အပွင့်တွင် ခရမ်းရောင်သန်းသည့်ဝတ်ဆံရှိပါသည်။
ဇလွန်မြို့နယ်၊ သဲကုန်းကျေးရွာမှ ကျောက်စိမ်းပုလဲ အပင် ၅၀၀၀ စိုက်ပျိုးသူ တောင်သူ ဦးနိုင်လင်းဦးနှင့်တွေ့ဆုံ၍ စိုက်ပျိုးထုတ်လုပ်မှုအခြေအနေများကို ကွင်းဆင်းစုံစမ်းခဲ့ရာ စူပါကျောက် စိမ်း ဂန္ဓမာ ပန်းမျိုးများကို ပန်းပွဲစားများမှတဆင့် ပြင်ဦးလွင်မှ မှာယူရပြီး ပျိုးတစ်ပင်လျှင် ၃၀ ကျပ်မှ ၃၅ ကျပ်ခန့်ပေးရပါသည်။ အပင် ငါးထောင်စိုက်ပျိုးရန်အတွက် ပျိုးပင်ဘိုး တစ်သိန်းခွဲ ကျပ်၊ ပျိုးဘောင်ဘိုး နှင့် စိုက်ခ အတွက် တစ်သိန်းကျပ်၊ပန်းမိုးပလတ်စတစ် တစ်စအတွက် တစ်သိန်းခွဲ ကျပ်၊ မှိုသတ်ဆေး၊ ပိုးသတ်ဆေးနှင့် မြေဩဇာဘိုး နှစ်သိန်းခွဲကျပ်ခန့်နှင့် ညအလင်းရောင်ပေးရန် အတွက် ၁၃ ဝပ် မီးသီးအလုံး ၃၀ နှင့် မီးကြိုးမီခေါင်းဘိုး တစ်သိန်းခွဲကျပ် စုစုပေါင်း ရှစ်သိန်းကျပ်ခန့် ကုန်ကျပါသည်။ မီးသီး၊ မီးခေါင်းနှင့် မီးကြိုးများကို နောက်နှစ်စိုက်ချိန်တွင်ပြန်လည်အသုံးပြုနိုင် ပါသည်။
စူပါကျောက်စိမ်း ဂန္ဓမာပန်းကို ဇွန်လတွင်စတင်စိုက်ပျိုးပြီး ၄ လအကြာ အောက်တိုဘာလ ကုန် စက်တင်ဘာလဆန်းတွင် စတင်ခူးရပါသည်။ အပင်သက် ၁၅ ရက်တွင်ထိပ်ဖြတ်၍ အတက် ၃ တက် ဖြာထွက်ပြီး တစ်တက်လျှင် ၃ ပွင့်မှ ၄ပွင့်ထိ ပွင့်နိုင်ပါသည်။ပန်းပွင့်အရွယ်အစားကိုလိုက်၍ ခူးရ ပြီး အပင် ငါးထောင်အတွက် စခူးချိန်မှ အပင်ကုန်ခူးပြီးချိန်ထိ ၁၅ ရက်ခန့်ကြာမြင့်ပါသည်။ စူပါ ကျောက်စိမ်း ဂန္ဓမာပန်း နှစ်ပင် (အပွင့် ၂၀ခန့်) ပါတစ်စီးကို ၂၀၂၄ ခုနှစ် တွင် ၃၀၀၀ ကျပ်မှ ၃၅၀၀ ကျပ် ထိရောင်းချရပြီး အပင် ၅၀၀၀ ပန်းတစ်ခင်းလျှင် တစ်ဆယ့်ငါးသိန်းခန့် ဝင်ငွေရရှိနိုင်ပြီး ခုနှစ်သိန်း ကျပ်ခန့် အမြတ်ရရှိနိုင်ပါသည်။
ဇလွန်မြို့နယ်မှ ထွက်ရှိသော စူပါကျောက်စိမ်း ဂန္ဓမာပန်းများကို ရန်ကုန် သီရိမင်္ဂလာဈေး နှင့် ဟင်္သာတ ၊ ပုသိမ်၊ မြန်အောင်မြို့များသို့တင်ပို့ရောင်းချကြပါသည်။ ဂန္ဓမာအပင် ၅၀၀၀ စိုက်ပျိုး ရန်အတွက် အလျား ပေ ၄၀၊ အနံ ၇၅ ပေခန့် ကျယ်ဝန်းသော မြေကွက် တွင် စိုက်ပျိုးနိုင်ပြီး တစ်ဧက ၏ ၁၄ ပုံ ၁ပုံကျယ်ဝန်းသော မြေကွက်သာ လိုအပ်ပါသည်။ မြေတစ်ဧကတွင် အပင် ၇၀၀၀၀ မှ ၈၀၀၀၀ ကြားထိ စိုက်ပျိုးနိုင်ပါသည်။ မြေအကျယ် နည်းနည်းတွင် အရင်းအနှီးနည်းနည်းဖြင့် ထက်ဝက်ခန့်အကျိုးအမြတ်ရှိပြီး ဈေးကွက်ဝယ်လိုအားရှိသော ဇလွန်မြို့နယ်မှ ဂန္ဓမာပန်း စိုက်ပျိုး ခြင်းကို လေ့လာတင်ပြအပ်ပါသည်။
DOCA(ဧရာဝတီ)
