ပြည်တွင်းကုန်သွယ်မှုသတင်း

            ဧရာဝတီတိုင်း‌ဒေသကြီး၊ ဟင်္သာတခရိုင်၊ဇလွန်မြို့နယ်၊ ဦးပုညလမ်း၊ ညောင်ပင်ဈေးရပ်ကွက်တွင် ဒေသထုတ်ကုန်ဖြစ်သော “ဖြူလေး” ဂျင်းသုပ်၊ငှက်ပျောကြော်လုပ်ငန်းအား ဇလွန်မြို့နယ် ဦးစီးမှူး ရုံးမှ စစ်ဆေးရေးအရာရှိ ဒေါ်စိမ်းမြသီတာ မှ (၂၁.၂.၂၀၂၅)ရက်နေ့ နံနက် (၀၉:၀၀)နာရီအချိန်တွင် ကွင်းဆင်းလေ့လာခဲ့ပါသည်။

          ထိုသို့ကွင်းဆင်းခဲ့ရာတွင် ထုတ်ပိုးရောင်းချသည့် ကုန်စည်များတွင် ကုန်အညွှန်းအမှတ်အသား ပြည့်စုံမှန်ကန်စွာ ဖော်ပြခြင်းရှိ/မရှိ၊ ထုတ်လုပ်မှုအခြအနေ၊ အရောင်းအဝယ်ဖြစ်မှု အခြေအနေများအား မေးမြန်းဆွေးနွေးခဲ့ပါသည်။ ဈေးကွက်အတွင်းရောင်းချနေသော ကုန်စည်များပေါ်တွင် ကုန်စည်အမျိုး အစားကိုလိုက်၍ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ဓါတ်မတည့်‌ကြောင်းဖော်ပြချက်၊ သတိပေးချက်နှင့် ကျန်းမာရေး ဆိုင်ဘေးထွက်ဆိုးကျိုး ဖော်ပြခြင်းရှိ/မရှိ၊ သက်ဆိုင်ရာဌာနများ၏ ထောက်ခံချက် ဖော်ပြထားမှုရှိ/မရှိ တို့ကို စစ်ဆေးခဲ့ပြီး၊ ရောင်းဝယ်မှုအနေဖြင့် နွေဦးကာလများတွင် ဘုရားဖူးလာသူများမှ အိမ်ပြန်လက်ဆောင်၊ ဒေသလက်ဆောင်အဖြစ် ဝယ်ယူခြင်းကြောင့် ရောင်းအားပိုမိုကောင်းမွန်ကြောင်း သိရသည်။  စားသုံးသူများကြိုက်နှစ်သက်သော ဒေသအစားအစာများစွာရောင်းချလျက်ရှိပြီးမြို့နယ် အတွင်း၊ ခရိုင်အတွင်းနှင့် အခြားတိုင်းဒေသကြီးများသို့ ဒေသလက်ဆောင်အဖြစ်  တင်ပို့ရောင်းချလျက် ရှိကြောင်း သိရှိရပါသည်။

DOCA(ဧရာဝတီ)

           ဧရာဝတီတိုင်းဒေသကြီး၊ ကြံခင်းမြို့နယ်၏ မြေဩဇာကောင်းမွန်သော နှုန်းမြေပေါ်တွင် ငရုတ်သီးစိုက်ပျိုးရန် အကောင်းဆုံးဖြစ်ပြီး ဟင်းခတ်အမွှေးအကြိုင်သီးနှံတွင် မပါမဖြစ်သုံးစွဲနေသောငရုတ်သီး ကို ပြည်ပသို့တင်ပို့ရန်နှင့် ပြည်တွင်းသုံးစွဲရန် ယခုနှစ်ဆောင်းရာသီတွင် စိုက်ဧက( ၄၈၃ ) ဧကဝန်းကျင် စိုက်ပျိုးလျက်ရှိကြောင်း သိရသည်။

          ကြံခင်းမြို့နယ်အတွင်းရှိ ငရုတ်စိုက်တောင်သူများသည် ကျောက်စိမ်း၊ ဇီစွယ်နှင့် မိုးဂုတ်တို့ကို အဓိကစိုက်ပျိုးကြကြောင်း၊ သီးနှံစိုက်ပျိုးမှု ကုန်ကျစရိတ်အနေဖြင့် တစ်ဧကလျှင် မျိုး၊ သွင်းအားစု၊ လုပ်အားခအပါအဝင် ၈ သိန်းကျပ်ခန့် ကုန်ကြပါသည်။ ငရုတ်ထွက်ရှိမှုအနေဖြင့် တစ်ဧကလျှင် ပိဿာချိန် ၁၃၀၀ ကျော် ထွက်ရှိပြီး၊ တစ်ပတ်ခြားတစ်ကြိမ်ခူးဆွတ်ရပါသည်။ ဈေးနှုန်းအနေဖြင့် ငရုတ်အစိုတစ်ပိဿာလျှင် ၃၀၀၀ ကျပ်မှ ၅၀၀၀ကျပ် အထိရရှိကြောင်း၊ အကျိုးအမြတ်အနေဖြင့် ၃ သိန်းကျပ် ဝန်းကျင်ရရှိကာ ထွက်ရှိသော ငရုတ်သီးများကို ငရုတ်ဒိုင်သို့ရောင်းချကြောင်း၊ ငရုတ်ဒိုင်မှတဆင့် မြို့နယ်တွင်း နှင့် ပုသိမ်မြို့တို့သို့ အဓိက တင်ပို့ရောင်းချကြောင်း ငရုတ်စိုက်တောင်သူတစ်ဦး၏ ပြောကြားချက်အရ သိရှိရပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊ မြန်အောင်ခရိုင်၊ အင်္ဂပူမြို့နယ်သည် လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်ကြပြီး ဆောင်းသီးနှံ ပဲမျိုးစုံကိုလည်း စိုက်ပျိုးလျက်ရှိပါသည်။  အင်္ဂပူမြို့နယ် အတွင်း ပဲလွန်းစိုက်ဧက (၈၉၇၈ ဧက) စိုက်ပျိုးထားပြီး ခူးဆွတ်ချိန်တွင် သုံးသီးခန့်ခူးဆွတ်နိုင်ပါသည်။ တစ်ဧကလျှင် စိုက်ပျိုးမြေအနေအထား၊ သွင်းအားစု၊ သီးနှံဖြစ်ထွန်းအောင်မြင်မှုအပေါ်မူတည်၍ (၁၇ တင်း မှ ၂၃ တင်း)ခန့်ထွက်ရှိကြောင်း သိရှိရပါသည်။ ဆောင်းသီးနှံ ပဲလွန်းကို စိုက်ပျိုးရာတွင် မြေပြုပြင် ခ၊ မျိုး၊ သွင်းအားစု၊ ခူးဆွတ်ချွေလှေ့ခ၊ လုပ်သားခအပါအဝင် တစ်ဧကလျှင် ၉ သိန်းဝန်းကျင်ခန့် ကုန်ကျ ကြောင်း၊ ယခုအခါ အင်္ဂပူမြို့နယ်တွင်ပဲလွန်းသီးနှံများလှိုင်လှိုင်ထွက်ရှိပြီဖြစ်ရာ ပဲလွန်းဖြူတစ်တင်းလျှင် ၇၆၅၀၀/-ကျပ်၊ ပဲလွန်းနီ တစ်တင်းလျှင် ၈၃၀၀၀/-ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခုနှစ်တွင် ဈေးကောင်းရရှိသဖြင့် ပဲစိုက်တောင်သူများ အကျိုးအမြတ်ပိုမိုရရှိကာ ပဲကုန်သည်များမှ တစ်ဆင့် ဒေသတွင်းရောင်းဝယ်မှုနှင့် ဟင်္သာတဈေးကွက်သို့ တင်ပို့ရောင်းချလျက်ရှိကြောင်း သိရှိရပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်တွင် ၂၀၂၃-၂၀၂၄ ခုနှစ်တွင် ဆောင်း သီးနှံအဖြစ် ဆီထွက်သီးနှံ  ၂၂၈၉၃ ဧက ၊ ပဲမျိုးစုံ ၁၆၈၁၈၇ ဧက ၊ စားဖိုဆောင်သီးနှံ ၃၁၀၉ ဧက နှင့် အခြားသီးနှံ စိုက်ဧက ၁၅၁၃၀ ဧက စိုက်ပျိုးခဲ့ပြီး၊ ၂၀၂၄-၂၀၂၅ ခုနှစ်တွင် ဆောင်းသီးနှံအဖြစ် ဆီထွက်သီးနှံ ၁၃၉၁၁ ဧက ၊ ပဲမျိုးစုံ ၁၆၈၁၈၇ ဧက ၊ စားဖိုဆောင်သီးနှံ ၃၁၀၉ ဧက နှင့် အခြားသီးနှံ စိုက်ဧက ၁၅၆၇၈ ဧက၊ စုစုပေါင်း ၂၀၁၈၈၆ ဧက စိုက်ပျိုးခဲ့ပါသည်။ စားဖိုဆောင်သီးနှံ တစ်ခုဖြစ်သော ငရုတ်သီးနှံနှင့်ပတ်သတ်၍ ကွင်းဆင်းလေ့လာရာတွင် ငရုတ်သီးနှံသည် နှုန်းတင်မြေနု ကိုင်းမြေတွင် ပိုမို ဖြစ်ထွန်းပြီး အထွက်နှုန်းကောင်းကြောင်း သိရှိရပါသည်။ ဟင်္သာတမြို့နယ်တွင် ငရုတ်စိုက်ဧက ၃၁၀၉ ဧက စိုက်ပျိုးခဲ့ပြီး ယခုအချိန်တွင် ငရုတ်သီးနှံများလှိုင်လှိုင်ထွက်ရှိလာပြီဖြစ်ရာ တစ်ပတ်ခြားတစ်ကြိမ်  ခူးဆွတ်လျက်ရှိပါသည်။ ငရုတ်သီးတွင် မိုးထောင်သီးနှင့် အောက်ဆွဲသီးဟူ၍ (၂)မျိုးရှိပြီး မိုးထောင်သီး သည် အထွက်ကောင်းပြီးဈေးကောင်းရရှိသဖြင့်တောင်သူအများစိုက်ပျိုးကြပါသည်။ ငရုတ်သီးကိုအမှည့် စိုအဖြစ် လည်းကောင်း၊ ငရုတ်ခြောက်အဖြစ်သော်လည်းကောင်း အရောင်းအဝယ်ပြုလုပ်ကြပြီး လက်ရှိ တွင် မိုးတောင်သီး အစိုတစ်ပိဿာလျှင်  ၂၉၀၀ ကျပ်မှ ၃၀၀၀ ကျပ်အတွင်း အရောင်းအဝယ်ရှိပြီး ငရုတ်ခြောက် တစ်ပိဿာလျှင် ၁၂၀၀၀ ကျပ် အရောင်းအဝယ်ရှိပါသည်။ ငရုတ်အမှည့်စိုကို ကွန်တိန်နာ ကားများဖြင့် ရန်ကုန်၊ မြဝတီသို့ တိုက်ရိုက် ဝယ်ယူတင်ပို့နေပြီး ၊ ငရုတ်ခြောက်ကို ရန်ကုန်၊ ဘုရင့်နောင် ပွဲရုံများသို့ တင်ပို့ရောင်းချကြပါသည်။ အထွက်နှုန်းအနေဖြင့် တစ်ဧကလျှင် အစိုပိဿာချိန် ၃၀၀၀ ခန့် ရှိပြီး၊ငရုတ်အခြောက်အနေဖြင့် ပိဿာချိန် ၁၀၀၀ ခန့်ထွက်ရှိပါသည်။ယခင်နှစ် ကာလတူ ငရုတ်ဈေးမှာ အစိုတစ်ပိဿာလျှင် ၁၂၀၀ ကျပ် နှင့် အခြောက်တစ်ပိဿာလျှင် ၇၀၀၀ ကျပ်မှ ၈၀၀၀ ကျပ်သာ ရှိပါသည်။ ယခုကာလ သီးနှံပေါ်ချိန်တွင် ဈေးနှုန်းတစ်ဆ မြင့်တက်သွားပြီး အထွက်နှုန်းမှာလည်း ပိုမို မြင့်မားမှု ကြောင့် တစ်ဧကလျှင် ကျပ်သိန်း ၆၀ မှ ၇၀ ကျပ်ခန့်အကျိုးအမြတ် ရရှိသည့်အတွက် ကိုင်းစိုက်တောင်သူများအတွက် ငရုတ်သီးနှံသည် ဝင်ငွေတိုးစေသော မီးဖိုချောင်သုံးသီးနှံတစ်မျိုးဖြစ်ကြောင်း သိရှိရပါသည်။

DOCA(ဧရာဝတီ)

         ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင် မော်ကျွန်းမြို့နယ်တာဝန်ခံ ဦးမင်းဇော်လတ်နှင့်ဝန်ထမ်းများသည် အထွေထွေအုပ်ချုပ်ရေးဦးစီးဌာန၊ မွေးမြူရေးနှင့်ကုသရေးဦးစီးဌာန၊ ကျန်းမာရေးဦးစီးဌာန၊ စားအုန်းဆီကိုယ်စားလှယ်တို့နှင့် ပူးပေါင်း၍ (၂၁.၂.၂၀၂၅) ရက်နေ့ နံနက်(၀၈:၀၀) နာရီအချိန်တွင် မော်ကျွန်းမြို့နယ် ၁၃ လမ်းရှိ စီးပွားရေးဘဏ်ရှေ့တွင် ပင်စင်စားဝန်ထမ်းများအား ဆီ၊ ဆန်၊ ကြက်ဥ ရောင်းချပေးမှုနှင့် ဆေးစစ်ဆေးမှုများပြုလုပ်ခဲ့ပါသည်။

               ထိုသို့ရောင်းချရာတွင် ဌာနဆိုင်ရာများမှ ပင်စင်စားဝန်ထမ်းများအား သက်သာသောဈေးနှုန်းများဖြင့် ဆီ၊ ဆန်၊ ကြက်ဥများ ဝယ်ယူရရှိနိုင်ရေးအတွက်ဆောင်ရွက်ပေးခဲ့ကြောင်းသိရှိရပါသည်။ ဆီတပိသာလျှင် (၇၈၀၀)ကျပ်၊ ဧည့်မထဆန်တစ်ပြည်လျှင် (၂၈၀၀)ကျပ် နှင့် ကြက်ဥ(၁၃)လုံးလျှင် (၅၀၀၀)ကျပ် ဖြင့်ရောင်းချပေး ကြောင်းသိရှိရပါသည်။ ဆက်လက်၍လည်း ပင်စင်စားဝန်ထမ်းများအား ဌာနဆိုင်ရာများမှ ကျန်းမာရေးစစ်ဆေးမှုများ ပြုလုပ်ပေးခဲ့ကြောင်း သိရှိရပါသည်။

DOCA(ဧရာဝတီ)