ပြည်တွင်းကုန်သွယ်မှုသတင်း

           မန္တလေးတိုင်းဒေသကြီး၊ မြင်းခြံခရိုင်၊ မြင်းခြံမြို့နယ် အေးမြသီတာဈေးကြီးအတွင်းတွင် ပုပ္ပားဒေသမှထွက်ရှိသော ခရမ်းချဉ်သီးများကို တစ်ပိဿာလျှင်(၂၀၀၀)ကျပ်နှုန်းဖြင့်လည်းကောင်း၊ ရှမ်းပြည်နယ် အင်းလေးဒေသမှထွက်ရှိသော ခရမ်းချဉ်သီးများကို တစ်ပိဿာလျှင်(၂၅၀၀)ကျပ်မှ(၃၀၀၀)ကျပ် ဈေးနှုန်းများဖြင့် ဒေသအလိုက်ထွက်ရှိမှု၊ အနှစ်အရသာနှင့် လူကြိုက်များစားသုံးမှုနှင့်သယ်ယူပို့ဆောင်ခ စရိတ်များကိုလိုက်၍ ဈေးနှုန်းများအသီးသီးရှိပါကြောင်း၊ ခရမ်းချဉ်သီးမှာ ဟင်းဖြစ်လွယ်ပြီး စားသုံးမှုများသောကြောင့် ဈေးကွက်တွင် ပုံမှန်အရောင်းအဝယ်ဖြစ်လျက်ရှိပါသည်။ ခရမ်းချဉ်သီးမှာ အသားအရေကို ကြည်လင်စေပြီး အရိုးများကို သန်မာစေခြင်း၊ ဆီးကျိတ်ကင်ဆာ၊ အူမကြီးကင်ဆာနှင့် အစာအိမ်ကင်ဆာတို့ကို ကာကွယ်ပေးသည့်အပြင် ဆေးလိပ်သောက်သုံးသူများအတွက် နီကိုတင်းရန်မှ ကာကွယ်ပေးနိုင်သည့်အတွက် များများစားသုံးပေးသင့်သော သီးနှံတစ်မျိုးပင်ဖြစ်ကြောင်း သိရှိရပါသည်။

DOCA(မန္တလေး)

         မန္တလေးတိုင်းဒေသကြီး၊ မြင်းခြံခရိုင်၊ မြင်းခြံမြို့နယ် အေးမြသီတာဈေးနှင့်စည်ပင်သာယာဈေးကြီးအတွင်း သစ်သီးတန်းများ၊ ဗိုလ်ချုပ်လမ်းနှင့် ဘဘလမ်းအတွင်းရှိ သစ်သီးအရောင်းဆိုင်များတွင် မြင်းခြံမြို့အနီးဝန်းကျင်ရှိ ကျေးရွာများမှထွက်ရှိသောဖရဲသီးများနှင့် စစ်ကိုင်းတိုင်းဒေသကြီး၊ ကနီဒေသမှထွက်ရှိသော ဖရဲသီး(ဒုံးကျည်သီး)များကို ရောင်းချလျက်ရှိရာ ဒေသခံအများပြည်သူများကြိုက်နှစ်သက်၍ ဝယ်ယူစားသုံးလျက်ရှိပါသည်။ ရောင်းဈေးများအနေဖြင့် အလုံးအကြီးအသေးအပေါ်လိုက်၍ (၂၀၀၀)ကျပ်မှ(၃၀၀၀)ကျပ်အထိ ဈေးနှုန်းများဖြင့် အရောင်းအဝယ်ဖြစ်လျက်ရှိပါသည်။ ဖရဲသီးတွင်ပါဝင်သော ဗီတာမင်နှင့်သတ္တုဓာတ်များသည် ခန္ဓာကိုယ်၏ ရေဓာတ်ကိုပြည့်ဝစေသင့်အပြင် ကျောက်ကပ်ပျက်စီးမှုနှင့် ကင်ဆာရောဂါများကို ကာကွယ်ဟန့်တားပေးနိုင်သည့် အကျိုးအာနိသင်များရှိပါသည်။ မြန်မာလူမျိုးများသည် ကွမ်းယာစားသုံးခြင်းများ များသည့်အတွက် ကွမ်းဂျိုးများကျစေသည့်အတွက် ကွမ်းစားသူများအဖို့ ဖရဲသီးသည် စားသုံးပေးသင့်သောအသီးတစ်မျိုးလည်းဖြစ်ပါသည်။ ခေတ်နှင့်အညီ ထုတ်လုပ်ထားသော အစားအစာများကို စားသုံးခြင်းအစား သဘာဝအသီးအနှံများကို စားသုံးပေးခြင်းသည် ကျန်းမာရေးအတွက် ကောင်းမွန်ပြီး ဈေးကွက်ဖြစ်ထွန်းကာ ဒေသတွင်းစိုက်ပျိုးရေးတောင်သူများအတွက်လည်း အကျိုးစီးပွားများ ဖြစ်ထွန်းအောင်မြင်လာမည်ဖြစ်ပါသည်။

DOCA(မန္တလေး)

          သာစည်မြို့ရှိမြို့မဈေးသည် သာစည်မြို့၊အမှတ်(၄)ရပ်ကွက်တွင်ရှိပြီး နေ့စဉ် ဈေးသည်၊ ဈေးဝယ်များနှင့် စည်ကားလျက်ရှိပါသည်။ မြို့မဈေးတွင် အသားငါး၊ ဟင်းသီးဟင်းရွက်၊ ဘုရားပန်းစသည့် လက်လီဈေးသည်များမှာ ဈေးဝယ်များနှင့် နေ့စဉ်အရောင်းသွက်သည်ကို တွေ့ရသည်။

         ယခုစက်တင်ဘာလဆန်းတွင်မြို့မဈေးရှိ ဘုရားပန်းဈေးသည်များအနေဖြင့် ဘုရားပန်းတင်ပို့ရာ မြို့ရွာများတွင် မိုးများ၍စိုက်ခင်းများရေဝင်ရာ ပန်းများပျက်စီးသဖြင့် ပန်းဈေးအနည်းငယ် တက်လျက်ရှိကြောင်း သိရှိရပါသည်။  ပန်းတိမ်မနိုင်၊ ကျောက်ဆည်သပြေငုတ်၊ ဂန္ဓမာ(အဖြူ/အဝါ/ပန်း/ခရမ်း) ပိုက်စွပ်နှင်းဆီပန်း၊ ရေမွှေးပန်းများ ရောင်းချနေတာကို တွေ့ရပါသည်။ ဈေးနှုန်းများအနေနဲ့ ပန်းတိမ်မနိုင်(၁၀ခက်စီး)တစ်စီး (၃၀၀၀)ကျပ်၊ဂန္ဓမာ(အဖြူပွင့်အကြီး)တစ်စီး (၆၀၀၀)ကျပ်၊ အဝါပွင့်ကြီးတစ်စီး (၅၀၀၀)၊ ပန်းခရမ်းရောင်အပွင့်သေးတစ်စီး(၄၀၀၀)၊ ကျောက်ဆည်သပြေငုတ်(သေး)ငါးငုတ်ပါ တစ်စီး (၂၀၀၀) ကျပ် သစ္စာပန်းအဖြူ (၅)ခက်စီးတစ်စီး (၄၀၀၀)ကျပ်၊ ပိုက်စွပ်နှင်းဆီ ရောင်စုံ (၁၀)ပွင့်စီး (၁)စီးလျှင် (၃၀၀၀-၃၅၀၀)ကျပ်၊ ရေမွှေးပန်း(၁၀)ခက်ပါ (၁)စီးလျှင် (၇၀၀)ကျပ်၊ အရောင်းအဝယ်ဖြစ်နေပြီး ဩဂုတ်လဆန်းနှင့် နှိုင်းယှဉ်ပါက ဈေးအနည်းငယ်မြင့်တက်နေကြောင်း သိရသည်။ ဗုဒ္ဓဘာသာမြန်မာလူမျိုးအနေနှင့် နေအိမ်၊ ဘုန်းကြီးကျောင်းမှာရှိတဲ့ ဘုရားပန်းကိုမညှိုးအောင် ကပ်လှူကြတဲ့အတွက် ဘုရားပန်းဈေးကွက်ကတော့ ရာသီမရွေးအရောင်းသွက်ကြောင်း သိရှိရပါသည်။

DOCA(မန္တလေး)

           မိတ္ထီလာမြို့သည် မြန်မာနိုင်ငံအလယ်ပိုင်းတွင်တည်ရှိပြီး အုန်းပင်စိုက်ပျိုးထွက်ရှိမှုနည်းသည့်အတွက် အုန်းသီးကို ရန်ကုန်မြို့မှတဆင့် ဝယ်ယူရောင်းချရကြောင်းသိရသည်။ မိတ္ထီလာမြို့၊ မြိုမဈေးသို့ ၂/၃ရက်ခြားတစ်ကြိမ်လျင် အုန်းသီးအလုံးရေအနေဖြင့် အခွံချွတ်ပြီး(၁၀၀၀)လုံးခန့်၊ ပွဲဝင်အုန်းသီး အလုံးရေ(၅၀၀)လုံးမှ (၁၀၀၀)လုံးခန့်ဝင်ရောက်လျက်ရှိပါသည်။ အုန်းသီးဈေးကွက်အနေဖြင့် အခွံချွတ်ပြီးအုန်းသီးမှာ မုန့်ပဲသရေစာပြုလုပ်ရန်အတွက် ဝယ်လိုအားရှိခြင်းကြောင့် ပုံမှန်အရောင်းဝယ်ဖြစ်ပြီး ပွဲဝင်အုန်းသီးမှာ ဝါမဝင်မှီ၊ ဝါကျွတ်ကာလများ၌ အိမ်တွင်းအုန်းဆွဲရန်၊ အလှူမင်္ဂလာပွဲများတွင် ကန်တော့ပွဲထိုးရန်တို့အတွက် ရောင်းပိုမိုတွင်ကျယ်ကြောင်းသိရသည်။ မိတ္ထီလာဈေးကွက်တွင် ရောင်းဝယ်ဖြစ်သော ဈေးနှုန်းများမှာ အခွံချွတ်အုန်းသီးမှာ အလုံးအကြီး/ အသေးပေါ်မူတည်၍ တစ်လုံး (၃၅၀၀-၅၀၀၀)ကျပ်၊ ပွဲဝင်အုန်းသီးမှာ (၆၀၀၀-၇၀၀၀)ကျပ်တို့ရှိကြောင်း ဈေးကွက်မှ သိရှိရပါသည်။

DOCA(မန္တလေး)

      ကယားပြည်နယ်၊ လွိုင်ကော်မြို့တွင် စက်သုံးဆီအရောင်းဆိုင်များ ပုံမှန်ပြန်လည်ဖွင့်လှစ် ရောင်းချနေကြပြီး ၂၀၂၅ခုနှစ်၊ စက်တင်ဘာလ (၅)ရက်နေ့တွင် ဖြစ်ပေါ်နေသော စက်သုံးဆီ ဈေးနှုန်းများမှာ Octane(92) တစ်လီတာလျှင် (၃၈၀၅)ကျပ်၊ Octane(95) တစ်လီတာလျှင် (၃၈၇၀)ကျပ်၊ ပရိမီယမ်ဒီဇယ် တစ်လီတာလျှင် (၄၀၃၀)ကျပ်၊ ရိုးရိုးဒီဇယ် တစ်လီတာလျှင် (၃၄၂၀) ကျပ်ဖြင့် ရောင်းချနေကြောင်း သိရပါသည်။

     ယခင်တစ်ပတ်ဈေးနှုန်းများမှာ Octane(92) တစ်လီတာလျှင် (၃၇၉၅)ကျပ်၊ Octane(95) တစ်လီတာလျှင် (၃၈၈၅)ကျပ်၊ ပရိမီယမ်ဒီဇယ် တစ်လီတာလျှင် (၄၀၀၀)ကျပ်၊ ရိုးရိုးဒီဇယ် တစ်လီတာလျှင် (၃၃၉၅) ကျပ်ဖြင့် ရောင်းချခဲ့ကြပြီး ဈေးနှုန်းများနှိုင်းယှဉ်ကြည့်လျှင် Octane(92) တစ်လီတာလျှင် (၁၀)ကျပ်၊ ပရိမီယမ်ဒီဇယ် တစ်လီတာလျှင် (၃၀)ကျပ်၊ ရိုးရိုးဒီဇယ် တစ်လီတာ လျှင်(၂၅)ကျပ်ဖြင့် ဈေးနှုန်းများ အသီးသီးမြှင့်တက်လာပြီး Octane(95)တစ်လီတာလျှင်(၁၅)ကျပ် ဈေးနှုန်းကျဆင်းလာကြောင်း စက်သုံးဆီရောင်းချသူများထံမှ သိရှိရပါသည်။

DOCA(ကယား)