၂၅.၃.၂၀၂၄ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
ရွှေတောင်မြို့နယ်၊ ဆည်ကြီးကုန်အုပ်စု၊ ကြက်ဖြူတောင်ကျေးရွာတွင် ရုံးပတီသီးများကိုစိုက်ပျိုးထားရှိပြီး မျိုးမှာ ကျောက်စိမ်းမျိုးဖြစ်ပါသည်။ ရုံးပတီသီးကို နတ်တော်လတွင် စတင် စိုက်ပျိုးပြီး တပေါင်းလတွင် အသီးများစတင်ခူးဆွတ်ရပါသည်။ ရုံးပတီပင်သည် ပူနွေးသောရာသီဥတုကို ကြိုက်နှစ်သက်၍ အေးသောရာသီဥတုကို မနှစ်သက်ပါ။ ရုံးပတီသီးကို ပန်းပွင့်ပြီး တစ်ပတ်ခန့်ကြာလျှင် ခူးဆွတ်ရပြီး တစ်ရက်ခြားတစ်ခါခူးဆွတ်ပေးရပါသည်။ ရာသီဥတုပူပြင်းပါက အရင့်မြန်သောကြောင့် နေ့စဉ်ခူးဆွတ်ပေးရပြီး တစ်ခါခူးဆွတ်လျှင် အသီးတောင့် (၃၀၀၀)ခန့်ရရှိပါသည်။ ယခု၂၀၂၄ခုနှစ်၊ မတ်လ ဒုတိယပတ်၌ ဈေးကွက်များ၌ ရုံးပတီသီး(၁၀)တောင့်ကို ၂၀၀ကျပ်ဖြင့်ရောင်းချနေပြီး ရန်ကုန်မြို့သို့လည်းတင်ပို့ရောင်းချကြောင်းသိရှိရပါသည်။
DOCA(ပဲခူး)
ပြည်မြို့ရှိဈေးကွက်များတွင် ၂၀၂၄ခုနှစ်၊ ဖေဖော်ဝါရီလကုန်ပိုင်းမှစ၍ ညောင်ဖူးများကို ဈေးကွက်တင်ရောင်းချကြောင်းသိရပါသည်။ ညောင်ဖူးဆိုသည်မှာ ယခုကဲ့သို့သော နွေဦးရာသီ ညောင်ရွက်အဟောင်းများကြွေပြီး ရွက်နုများဝေချိန်၌ အရွက်နုလေးများကို ခူး၍ပြုတ်ပြီး ညောင်ဖူးအဖြစ်ရောင်းချကြပါသည်။ ထိုသို့ရောင်းချသောညောင်ဖူးများမှာ ပေါ်ဦးပေါ်ဖျားဖြစ်၍ လူအများကဝယ်ယူစားသုံးကြသဖြင့် ဈေးကောင်းရကြပါသည်။ ၂၀၂၄ခုနှစ်၊ မတ်လ ဒုတိယပတ်၌ ဈေးကွက်များတွင်ရောင်းချသော ညောင်ဖူးဈေးနှုန်းမှာ တစ်ဆယ်ကျပ်သားလျှင် ၅၀၀ကျပ်၊ တစ်ပိဿာလျှင် ၅၀၀၀ကျပ်ဖြင့် လက်လီရောင်းချကြပါသည်။ ပြည်မြို့ရှိဈေးများသို့ လာရောက်ရောင်းချသောညောင်ဖူးများမှာ ပြည်မြို့အနီးကျေးရွာများမှ လာရောက်ရောင်းချကြသဖြင့် ကျေးလက်နေပြည်သူများအနေဖြင့် မိသားစုအပိုဝင်ငွေများရရှိကြောင်းသိရပါသည်။
DOCA(ပဲခူး)
ပြည်ခရိုင်၊ ပြည်မြို့အနီးတစ်ဝိုက်ရှိ ကျေးရွာများ၌ နှစ်စဉ်စိုက်ပျိုးလေ့ရှိသော ကျောက်စိမ်းဖရဲသီးများမှာ ရောင်းအားကောင်းလျက်ရှိပါသည်။ ၎င်းဖရဲသီးများကို ရန်ကုန်တိုင်းသို့ အများဆုံးတင်ပို့ရောင်းချကြပြီး အောင်လံ၊ မကွေး၊ တောင်တွင်းနှင့် ဧရာဝတီတစ်ဖက်ကမ်းရှိ ပန်းတောင်း၊ ဥသျှစ်ပင်၊ ကံမ၊ သရက်၊ မင်းဘူးမြို့များသို့လည်း တင်ပို့ရောင်းချကြောင်းသိရှိရပါသည်။ ယခုနှစ်တွင် စိုက်ပျိုးသူများပြားလာပြီး မန္တလေးတိုင်းမှဝင်ရောက်လာသော ဂျပန်မျိုး ထိုင်ဝမ်ဖရဲသီးများကြောင့် ဈေးကွက်၌ ယှဉ်ပြိုင်ရောင်းချရသည့်အတွက် ယခင်နှစ်များထက် အကျိုးအမြတ်နည်းပါးကြောင်းသိရပါသည်။ ၂၀၂၄ခုနှစ်၊ မတ်လ ဒုတိယပတ်၌ ဈေးကွက်တွင်ရောင်းချသော ဖရဲသီးဈေးနှုန်းများမှာ ကျောက်စိမ်းဖရဲသီးအလုံးချောတစ်လုံးလျှင် ၂၅၀၀ကျပ်၊ အလတ်တစ်လုံးလျှင် ၂၀၀၀ကျပ်၊ အသေးတစ်လုံးလျှင် ၁၅၀၀ကျပ်ဖြင့်လည်းကောင်း၊ ထိုင်ဝမ်(ဂျပန်မျိုး) ဖရဲသီးတစ်လုံးလျှင် ၅၀၀၀ကျပ်၊ အလတ်တစ်လုံးလျှင် (၃၅၀၀-၄၀၀၀) ကျပ်ဈေးနှုန်းတို့ဖြင့် အရောင်းအဝယ်ဖြစ်နေကြောင်းသိရှိရပါသည်။
DOCA(ပဲခူး)
ပြည်ဈေးကွက်တွင် ရောင်းချနေသော ပုစွန်ခြောက်များအနက် ရခိုင်ဘက်မှလာသော ပုစွန်ခြောက်များရှိသည့်အပြင် ပုသိမ်ဘက်မှလာသော ပုစွန်ခြောက်များလည်းရှိကြောင်းသိရှိရပါသည်။ ပုစွန်ခြောက်သည် ရာသီမရွေးပုံမှန်အရောင်းအဝယ်ဖြစ်သော ကုန်ပစ္စည်းဖြစ်ပါသည်။ ပုစွန်ခြောက်ဝင်ရောက်သည့်ဒေသနှင့် အရည်အသွေးပေါ်မူတည်၍ ဈေးနှုန်းကွာခြားပါသည်။ ၂၀၂၄ခုနှစ်၊ မတ်လ ဒုတိယပတ်တွင် ပုစွန်ခြောက်အကောင်ကြီး ရှယ်တစ်ပိဿာလျှင် ၁၀၀၀၀၀ကျပ်၊ အလတ်စားတစ်ပိဿာလျှင် ၈၀၀၀၀ကျပ်၊ အသေးတစ်ပိဿာလျှင် (၇၀၀၀၀-၆၀၀၀၀) ကျပ်ဈေးနှုန်းတို့ဖြင့် အရောင်းအဝယ်ဖြစ်နေကြောင်းသိရှိရပါသည်။ ပုစွန်ခြောက်အသေးအမှုန့်ဈေးနှုန်းမှာမူ တစ်ပိဿာလျှင် ၂၅၀၀၀ကျပ်ဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။
DOCA(ပဲခူး)
ဘူးပင်မှရရှိသော ဘူးသီး၊ ဘူးရွက်များသည် မြန်မာလူမျိုးများ ကြိုက်နှစ်သက်စွာစားသုံးသော သီးနှံများအနက် တစ်မျိုးအပါအဝင်ဖြစ်သည်။ ဘူးပင်သည် ပူနွေးစွတ်စိုသော ရာသီဥတုကို ကြိုက်နှစ်သက်၍ မြန်မာနိုင်ငံအပူပိုင်းဒေသတွင် စိုက်ပျိုးပါက ပိုမိုဖြစ်ထွန်းအောင်မြင်လျက်ရှိသည်။ မကွေးတိုင်းဒေသကြီး၊ ပခုက္ကူမြို့နယ်အတွင်း ဧရာဝတီမြစ်ရိုးတစ်လျှောက်ရှိ ကျွန်းရွာများဖြစ်သော ကျွန်းညိုကြီး၊ ကံလှ၊ သံပုရာပင်ကုန်း၊ တင်းဂတ်၊ နန်းတော်ရပ်အုပ်စုတွင်းရှိ ကျေးရွာများတွင် ကုန်စိမ်းသီးနှံစိုက်ခင်းများကို ရာသီအလိုက်စိုက်ပျိုး၍ စီးပွားဖြစ်လုပ်ကိုင်ကြပါသည်။ စိုက်ပျိုးရာ၌ ဘူးပင်စိုက်ခင်းများကို သီးသန့်မြေကွက်၊ ဥယျာဉ်ခြံမြေများနှင့် ကြက်သွန်ခင်း၊ မြေပဲ၊ ပဲမျိုးစုံစိုက်ခင်းများတွင်လည်း ကြားညှပ်၍ မိသားစုတစ်နိုင်တစ်ပိုင်စိုက်ပျိုးခြင်းအပြင် စီးပွားဖြစ်လည်းစိုက်ပျိုးကြသည်။
ဘူးပင်စိုက်ပျိုုးရာတွင် မျိုးစေ့အနေဖြင့် ယခင်နှစ်စိုက်ခင်းထွက် မျိုးကောင်းမျိုးသန့် ဘူးသီးအလုံးကြီးမှရရှိသောမျိုးစေ့နှင့် ထိုင်ဝမ်မျိုးစေ့ထုပ်တို့ကို ဝယ်ယူ၍စိုက်ပျိုးကြသည်။ အစိမ်းနုရောင် ဘူးသီး(ဗြောင်) နှင့် အစိမ်းရင့်ရောင် အဖြူကြားဘူးသီးမျိုးကို စိုက်ပျိုးကြသည်။ ပေါင်တင်၍ ကျင်းတူးစိုက်ပျိုးခြင်းနှင့် ထယ်ကြောင်းနောက်၌ အစေ့ချစိုက်ပျိုးခြင်း(၂)မျိုးဖြင့် စိုက်ပျိုးကြသည်။ ကိုင်းကျွန်းမြေများတွင် စိုက်ပျိုးခြင်းဖြစ်၍ အထွက်နှုန်းကောင်းမွန်သည်။ မြစ်ရေကျချိန် တော်သလင်း၊ သီတင်းကျွတ်လတွင် စတင်စိုက်ပျိုးပြီး တစ်လအကြာတွင် ဘူးညွန့်များကိုခူး၍ ရောင်းချရပြီး နှစ်လခန့်အကြာတွင် ဘူးသီးများစတင်သီးကြောင်း၊ ဘူးပင်တစ်ပင်လျှင် ကြီးထွားမှုပေါ်မူတည်ပြီး အသီး(၂၀-၃၀)ထိသီးကြောင်း ဒေသခံစိုက်တောင်သူများထံမှသိရှိရပါသည်။
ဘူးသီး၊ ဘူးရွက်ဈေးကွက်အနေဖြင့် ယခုနှစ်သီးနှံပေါ်စအချိန်တွင် ဘူးညွန့်တစ်ညွန့်လျှင် ကျပ် (၁၅)ဈေးနှုန်းဖြင့် ဖောက်သည်ပေးသွင်းရပြီး ယခင်နှစ်တွင် တစ်ညွန့်လျှင် ကျပ်(၁၀)ဖြင့် အရောင်းအဝယ်ဖြစ်ခဲ့ကြောင်း၊ ဘူးသီးတစ်လုံးလျှင် အရွယ်အစားလိုက်၍ ကျပ်(၄၀၀-၁၀၀၀)လက်ကားဈေးဖြင့် ပေးသွင်းရကြောင်း၊ ဘူးသီးသည် နွေရာသီသီးနှံဖြစ်၍ မတ်လဆန်းပိုင်းတွင် ဘူးသီးများလှိုင်လှိုင်သီး၍ ဈေးကွက်ကျဆင်းသွားကြောင်း၊ ဘူးသီးတစ်လုံးလျှင် ကျပ်(၁၅၀-၅၀၀)ထိ ဈေးကွက်ကျဆင်းသွားကြောင်း၊ နေ့စဉ် ဘူးညွန့်(၁၀၀)၊ ဘူးသီးအလုံး(၃၀)ခန့် ခူး၍ရောင်းချရကြောင်း၊ ဘူးသီး၊ ဘူးရွက်ကို အခြေခံဟင်းတစ်မျိုးအဖြစ် ချက်ပြုတ်စားသုံးကြသကဲ့သို့ မြန်မာ့ရိုးရာအစားအစာအဖြစ်လည်း အကြော်ဆိုင်များတွင် အကြော်ကြော်၍ ရောင်းချလျက်ရှိကာ ဝယ်ယူစားသုံးမှုများကြောင်း၊ စိုက်ခင်းထွက် ဘူးသီး၊ ဘူးရွက်များကို ပခုက္ကူမြို့ရှိ မြို့မစည်ပင်ဈေးနှင့် ပန်းခြံဈေးတို့တွင် လက်ကားဈေးဖောက်သည်ပေးသွင်းရကြောင်းသိရှိရပါသည်။
ဘူးပင်စိုက်ပျိုးခြင်းဖြင့် ဘူးရွက်များကိုရောင်းချရ၍ နေ့စဉ်ဝင်ငွေရရှိခြင်းကြောင့် စိုက်တောင်သူများအနေဖြင့် မိသားစုစီးပွားရေးအဆင်ပြေကြောင်း၊ စိုက်ပျိုးရာတွင် ကုန်ကျစရိတ်သက်သာပြီး အလွယ်တကူဝင်ငွေရရှိသောကြောင့် ဒေသခံတောင်သူများမှာ ကုန်စိမ်းသီးနှံ ဘူးပင်ကို နှစ်စဉ်မပြတ်စိုက်ပျိုးလျက်ရှိကြောင်းသိရှိရပါသည်။
DOCA(မကွေး)
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့ပေါ်ရှိ ဆေးဆိုင်များတွင် ရာသီအကူးအပြောင်းကာလဖြစ်၍ အိမ်သုံးဆေးဝါးများအနက် နှာစေးပျောက်ဆေး၊ ချောင်းဆိုးပျောက်ဆေးနှင့် အကိုက်ခဲပျောက်ဆေးများမှာ ပိုမိုရောင်းချရကြောင်း ဆေးနှင့်ဆေးပစ္စည်းရောင်းချသူများထံမှသိရှိရပါသည်။
၂၀၂၄ခုနှစ်၊ မတ်လ(ဒုတိယပတ်)တွင် အရောင်းအဝယ်ဖြစ်ပေါ်နေသော အိမ်သုံးဆေးဝါးများမှာ Paracetamol Tablet 500 mg (၁၀)လုံးပါ (၁)ကတ်လျှင် ကျပ်(၄၀၀)၊ Decolgen (၁၀)လုံးပါ (၁)ကတ်လျှင် ကျပ်(၁၅၀၀)၊ Biogesic (၁၀)လုံးပါ (၁)ကတ်လျှင် ကျပ်(၁၁၀၀)၊ Bermeton (၁၀၀)လုံးပါ (၁)ဘူးလျှင် ကျပ်(၂၃၀၀)၊ ချောင်းဆိုးပျောက်ဆေးများဖြစ်သော Solmux (၄)လုံးပါ (၁)ကတ်လျှင် ကျပ်(၁၄၀၀) ၊ Woods'(၁)ဘူးလျှင် ကျပ်(၈၅၀၀)၊ Flemex (၁၀)လုံးပါ (၁)ကတ်လျှင် ကျပ်(၃၆၀၀)၊ နှာစေးပျောက်ဆေးများဖြစ်သော Cetirizine (၁၀)လုံးပါ (၁)ကတ်လျှင် ကျပ်(၃၀၀)၊ Mixagrip (၆)လုံးပါ (၁)ကတ်လျှင် ကျပ်(၁၂၀၀)တို့ဖြင့်ရောင်းချလျက်ရှိပြီး အခြားအိမ်သုံးဆေးဝါးများမှာ Civit (၁၀၀)လုံးပါ (၁)ဘူးလျှင် ကျပ်(၃၂၀၀)၊ Amoxicillin (၁၀)လုံးပါ (၁)ကတ်လျှင် ကျပ်(၈၀၀)၊ Enervon-C (၄)လုံးပါ (၁)ကတ်လျှင် ကျပ်(၁၆၀၀)၊ Oramin-G (၅)လုံးပါ (၁)ကတ်လျှင် ကျပ်(၃၅၀၀)၊ Vitahome (၁၀)လုံးပါ (၁)ကတ်လျှင် ကျပ်(၂၀၀၀)၊ Becozinc (၁၀)လုံးပါ (၁)ကတ်လျှင် ကျပ်(၄၄၀၀)၊ Vitamin-C 100mg (၁)လုံးလျှင် ကျပ်(၃၀၀) ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။ ရာသီအကူးအပြောင်းကာလဖြစ်၍ နှာစေးပျောက်ဆေးနှင့် ချောင်းဆိုးပျောက်ဆေးတို့မှာ ပိုမိုအရောင်းအဝယ်ဖြစ်လျက်ရှိကြောင်း ဆေးဆိုင်များမှသိရှိရပါသည်။
DOCA(မကွေး)
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မစည်ပင်ဈေး၌ ၂၀၂၄ခုနှစ်၊ မတ်လ (ဒုတိယပတ်)တွင် ရောင်းချလျက်ရှိသော အခြေခံစားသောက်ကုန်များ၏ လက်လီဈေးနှုန်းများမှာ ပေါ်ဆန်း (မြောင်းမြ)တစ်အိတ်လျှင် ကျပ်(၁၄၅၀၀၀-၁၅၀၀၀၀)၊ မနောသုခတစ်အိတ်လျှင် ကျပ်(၈၅၀၀၀-၉၅၀၀၀)၊ ဆင်းသွယ်လေးတစ်အိတ်လျှင် ကျပ်(၇၆၀၀၀)၊ ရက်(၉၀)ရှယ်တစ်အိတ်လျှင် ကျပ် (၁၀၅၀၀၀)၊ ဖန်သီးရှယ်တစ်အိတ်လျှင် ကျပ်(၁၂၅၀၀၀)၊ ဧရာပဒေသာ(စလင်း)အသစ်တစ်အိတ်လျှင် ကျပ်(၁၄၅၀၀၀)၊ ဧရာပဒေသာ(စလင်း) အဟောင်းတစ်အိတ်လျှင် ကျပ်(၁၆၀၀၀၀-၁၆၅၀၀၀)၊ မြေပဲဆုံဆီတစ်ပိဿာလျှင် ကျပ်(၁၄၅၀၀-၁၅၀၀၀)၊ စက်ပဲဆီသန့်တစ်ပိဿာလျှင် ကျပ်(၁၃၀၀၀)၊ နှမ်းဆီတစ်ပိဿာလျှင် ကျပ်(၁၂၅၀၀)၊ နေကြာဆီတစ်ပိဿာလျှင် ကျပ်(၁၃၀၀၀)၊ ကြက်သွန်နီတစ်ပိဿာလျှင် ကျပ်(၂၄၀၀-၂၈၀၀)၊ ကြက်သွန်ဖြူ(ရှမ်း) (အသစ်)တစ်ပိဿာလျှင် ကျပ်(၁၄၀၀၀-၁၆၀၀၀)၊ ကြက်သွန်ဖြူ(ကြူကုတ်) တစ်ပိဿာလျှင် ကျပ်(၁၂၀၀၀)၊ ကုလားပဲခြမ်းတစ်ပိဿာလျှင် ကျပ်(၈၃၀၀)၊ အာလူးတစ်ပိဿာလျှင် ကျပ်(၂၂၀၀-၂၅၀၀)၊ ချင်းတစ်ပိဿာလျှင် ကျပ်(၄၅၀၀)၊ ဆားတစ်ပိဿာလျှင် ကျပ်(၇၀၀)၊ မန်ကျည်းသီးမှည့်တစ်ပိဿာလျှင် ကျပ်(၃၅၀၀)၊ ကန်စွန်းရွက်တစ်စည်းလျှင် ကျပ်(၈၀-၁၀၀)၊ ချဉ်ပေါင်ရွက်တစ်စည်းလျှင် ကျပ်(၂၀၀)၊ ခရမ်းချဉ်သီးတစ်ပိဿာလျှင် ကျပ်(၅၀၀-၆၀၀)၊ ခရမ်းချိုသီးတစ်ပိဿာလျှင် ကျပ်(၆၀၀-၈၀၀)၊ ငရုတ်သီးစိမ်းတစ်ပိဿာလျှင် ကျပ်(၂၅၀၀)၊ ပန်းဂေါ်ဖီတစ်ပွင့်လျှင် ကျပ်(၇၀၀)၊ ကြက်သား (စီပီ) တစ်ပိဿာလျှင် ကျပ်(၁၃၀၀၀)၊ ကြက်သား (ဗမာ)တစ်ပိဿာလျှင် ကျပ်(၂၀၀၀၀)၊ ဝက်သားတစ်ပိဿာလျှင် ကျပ်(၁၈၀၀၀)၊ ဆိတ်သားတစ်ပိဿာလျှင် ကျပ်(၂၀၀၀၀)၊ ငါးကြင်းတစ်ပိဿာလျှင် ကျပ် (၁၀၀၀၀)၊ ငါးမြစ်ချင်းတစ်ပိဿာလျှင် ကျပ်(၉၅၀၀)၊ ကြက်ဥတစ်လုံးလျှင် ကျပ်(၂၅၀)၊ ဘဲဥတစ်လုံးလျှင် ကျပ်(၄၀၀)ဖြင့် ရောင်းချနေကြောင်းသိရှိရပါသည်။
ယခင်မတ်လ(ပထမပတ်)ဈေးနှုန်းတို့နှင့်နှိုင်းယှဉ်လျှင် ယခုအပတ်တွင် ကြက်သွန်နီတစ်ပိဿာလျှင် ကျပ်(၆၀၀)ခန့်၊ မန်ကျည်းသီးမှည့်(အစေ့လွတ်)တစ်ပိဿာလျှင် ကျပ်(၅၀၀)ခန့်၊ ခရမ်းချိုသီးတစ်ပိဿာလျှင် ကျပ်(၂၀၀)ခန့်ဈေးနှုန်း အသီးသီးမြင့်တက်ခဲ့ပြီး၊ ကြက်သွန်ဖြူ(အသစ်)တစ်ပိဿာလျှင် ကျပ်(၃၀၀၀)ခန့်၊ ကုလားပဲခြမ်း (၁)ပြည်လျှင် ကျပ်(၂၀၀)ခန့်ဈေးနှုန်းကျဆင်းသွားကြောင်း၊ ပခုက္ကူဒေသတွင်းရှိ ကျွန်းကျေးရွာများ၌ သီးနှံပေါ်ချိန်ဖြစ်၍ ဈေးနှုန်းကျဆင်းသွားကြောင်းနှင့် ၎င်းတို့ကို ပခုက္ကူမြို့မစည်ပင်ဈေးနှင့် အမှတ်(၂)ဈေးတို့တွင် ရောင်းချလျက်ရှိကြောင်း မြို့မဈေးသည်များထံမှသိရှိရပါသည်။
DOCA(မကွေး)
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့မဈေးအတွင်းရှိ အခြေခံစားသောက်ကုန်များရောင်းချလျက်ရှိသော အရောင်းဆိုင်များတွင် နေ့စဉ်နှင့်အမျှ ကုန်စိမ်းဟင်းသီးဟင်းရွက်များအပြင် အခြေခံစားသောက်ကုန်တစ်မျိုးဖြစ်သော ခေါက်ဆွဲခြောက်ထုပ်များလည်း အရောင်းအဝယ်သွက်လျက်ရှိကြောင်း၊ ရွှေဒင်္ဂါး (အဝါရောင်)ခေါက်ဆွဲခြောက်နှင့် စွမ်းထက်(အဖြူရောင်) ခေါက်ဆွဲခြောက်များလည်းဝင်ရောက်လျက်ရှိကြောင်း ပခုက္ကူမြို့မဈေးအတွင်းရှိ ရောင်းဝယ်ရေးလုပ်ငန်းရှင်တစ်ဦးထံမှသိရှိရပါသည်။
ခေါက်ဆွဲခြောက်ဈေးကွက်အနေဖြင့် ၂၀၂၄ခုနှစ်၊ မတ်လ(ဒုတိယပတ်)တွင် ရွှေဒင်္ဂါး (အဝါရောင်) (၂၅)စည်းပါ တစ်ထုပ်လျှင် ကျပ်(၁၄၅၀၀)၊ တစ်စည်းလျှင် ကျပ်(၆၀၀)၊ စွမ်းထက်(အဖြူရောင်) ခေါက်ဆွဲခြောက် (၅၀)ကျပ်သားတစ်စည်းလျှင် ကျပ်(၃၀၀၀)၊ (၂၅)ကျပ်သားတစ်စည်းလျှင် ကျပ်(၁၅၀၀)၊ (၂၀) ကျပ်သားတစ်စည်းလျှင် ကျပ်(၁၃၀၀)၊ ခေါက်ဆွဲစက်ကျ အကျိုးတစ်ပိဿာထုပ်တစ်စည်းလျှင် ကျပ်(၄၀၀၀)၊ (၁၀)ကျပ်သားတစ်စည်းလျှင် ကျပ်(၄၀၀)စသည့်ဈေးနှုန်းအသီးသီးဖြင့် အရောင်းအဝယ်ဖြစ်နေကြောင်း၊ ယခင်ဖေဖော်ဝါရီလ(ဒုတိယပတ်)တွင် ရွှေဒင်္ဂါး(အဝါရောင်)(၂၅)စည်းပါ တစ်ထုပ်လျှင် ကျပ်(၁၄၀၀၀)၊ တစ်စည်းလျှင် ကျပ် (၅၅၀)၊ စွမ်းထက်(အဖြူရောင်)ခေါက်ဆွဲခြောက် (၅၀)ကျပ်သားတစ်စည်းလျှင် ကျပ်(၂၇၀၀)၊ (၂၅) ကျပ်သားတစ်စည်းလျှင် ကျပ်(၁၃၀၀)၊ (၂၀)ကျပ်သားတစ်စည်းလျှင် ကျပ်(၁၂၀၀)၊ ခေါက်ဆွဲစက်ကျ အကျိုးတစ်ပိဿာထုပ်တစ်စည်းလျှင် ကျပ်(၃၅၀၀)၊ (၁၀)ကျပ်သားတစ်စည်းလျှင် ကျပ်(၃၅၀) ဈေးနှုန်းဖြင့် အရောင်းအဝယ်ဖြစ်ခဲ့၍ ယခုမတ်လ(ဒုတိယပတ်)တွင် ဈေးနှုန်းအနည်းငယ်မြင့်တက်၍ အရောင်းအဝယ်ဖြစ်နေကြောင်းသိရှိရသည်။
ခေါက်ဆွဲခြောက်များမှာ မုံရွာမြို့မှ နေ့စဉ်ဝင်ရောက်လျက်ရှိကြောင်း၊ စားသုံးသူများအနေဖြင့် ဈေးနှုန်းချိုသာ၍ အလွယ်တကူစားသုံးနိုင်သည့်အတွက် ဝယ်ယူစားသုံးမှုများကြောင်း၊ စားသောက်ကုန်စီးပွားရေးလုပ်ငန်းရှင်များ၊ အသုပ်ဆိုင်များ၊ ကျောင်းဈေးတန်းရောင်းချသူဈေးသည်များအပြင် ပခုက္ကူကျွန်းကျေးရွာများမှ ဒေသခံများ၊ အခြေခံလူတန်းစားများအနေဖြင့်လည်း ဈေးနှုန်းသင့်တင့်မျှတမှုရှိခြင်းကြောင့် တစ်ရက်လျှင် ပိဿာ(၅၀-၇၀)၊ တစ်လလျှင် ပျမ်းမျှပိဿာ (၁၀၀၀)ခန့်အရောင်းအဝယ်ဖြစ်လျက်ရှိကြောင်း ပခုက္ကူမြို့မဈေးအတွင်းရှိ ဈေးသည်တစ်ဦးထံမှ သိရှိရပါသည်။
DOCA(မကွေး)
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့၊ မြိုင်လမ်းရှိ ကြက်ဥ၊ ဘဲဥ၊ ငုံးဥအရောင်းဆိုင်တွင် ၂၀၂၄ခုနှစ်၊ မတ်လ (ဒုတိယပတ်) တွင် ကြက်ဥအရွယ်အစားအလိုက် ကြက်ဥ(လက်လီ)ဈေးနှုန်းများမှာ ကြက်ဥ(အသေး)တစ်လုံးလျှင် ကျပ်(၂၃၀)၊ ကြက်ဥ(အလတ်)တစ်လုံးလျှင် ကျပ်(၂၅၀)၊ ကြက်ဥ(အကြီး) တစ်လုံးလျှင် ကျပ်(၂၇၀)၊ ဘဲဥတစ်လုံးလျှင် ကျပ်(၄၀၀)၊ ဆေးဘဲဥတစ်လုံးလျှင် ကျပ်(၄၅၀)ဈေးနှုန်းဖြင့် အရောင်းအဝယ်ဖြစ်ခဲ့ပြီး ယခင်မတ်လ(ပထမပတ်)ဈေးနှုန်းများနှင့်နှိုင်းယှဉ်လျှင် ဈေးနှုန်းအနည်းငယ်ကျဆင်းလာ၍ အရောင်းအဝယ်ဖြစ်ခဲ့ပါသည်။
ကြက်ဥ(လက်ကား)ဈေးနှုန်းအနေဖြင့် ယခင်မတ်လ(ပထမပတ်)တွင် တစ်ပိဿာလျှင် ကျပ် (၆၀၀၀-၆၃၀၀)ဖြစ်၍ ယခုမတ်လ(ဒုတိယပတ်)တွင် တစ်ပိဿာလျှင် ကျပ်(၅၈၀၀)ဖြင့် အရောင်းအဝယ်ဖြစ်နေပြီး ယခင်အပတ်ဈေးနှုန်းတို့နှင့်နှိုင်းယှဉ်လျှင် ကျပ်(၅၀၀)ခန့်ကျဆင်းသွားကြောင်း ကြက်ဥအရောင်းဆိုင်မှသိရှိရပါသည်။
DOCA(မကွေး)
