ပြည်တွင်းကုန်သွယ်မှုသတင်း

ပဲခူးတိုင်းဒေသကြီး၊သာယာဝတီခရိုင်၊ လက်ပံတန်းမြို့တွင်ရှိသော ငါးမွေးကန်များ၏ အဓိက အစားအစာသည် ဖွဲနုများဖြစ်သည်။သာယာဝတီခရိုင်အတွင်းရှိဆန်စက်များကြိတ်ခွဲ ထုတ်လုပ်ရာမှ ထွက်ရှိသောဆန်ထွက်ပစ္စည်းဖွဲနုများကို ဒေသတွင်းတိရိစ္ဆာန်အစားအစာအဖြစ် အသုံးပြုလျက်ရှိ ကြောင်း နှင့် အခြားသောတိုင်းနှင့်ပြည်နယ်များသို့လည်း တင်ပို့ရောင်းချလျက်ရှိကြောင်း သိရှိရပါ သည်။ဇန်နဝါရီလနောက်ဆုံးပတ်တွင် ဖွဲနုတစ်ပေါင်လျှင် ၃၂၀ ကျပ်ဖြစ်ပြီး၊ဖွဲနု ၆၅ ပေါင်တစ်အိတ် လျှင် ၂၀၈၀၀ ကျပ်ဈေးဖြင့် အရောင်းအဝယ်ဖြစ်နေကြောင်း၊ ယခုဖေဖော်ဝါရီလ နောက်ဆုံးပတ် တွင် ဖွဲနုတစ်ပေါင် ၃၃၀ ကျပ်ပေါက်ဈေးသာရှိနေကြောင်း၊ဖွဲနု ၆၅ ပေါင် တစ်အိတ်လျှင် ၂၁၄၅၀ ကျပ် ဈေးဖြင့်လက်လီရောင်းချရကြောင်း၊ ဖွဲနုဈေးကွက်အနေဖြင့် ယခင်လနှင့်ယခုလ ဈေးနှုန်း နှိုင်းယှဉ်ပါ ကဒေသတွင် လိုအပ်ချက်များသောကြောင့် ဈေးနှုန်းသည် အတက်ဘက်သို့ ဦးတည် သွားပါသည်။

DOCA(ပဲခူး)

          ပြည်မြို့နယ်တွင် ပန်းဂေါ်ဖီစိမ်းများကို ပန်းဂေါ်ဖီအဖြူကဲ့သို့ အအေးကြိုက်ကြပါသည်။ စက်တင်ဘာလ တွင် စတင်စိုက်ပျိုးပြီး ဆောင်းရာသီရိုးရိုးပန်းဂေါ်ဖီများပေါ်ချိန်တွင် ထွက်ပေါ်ကြ ပါသည်။ အေး၍ခြောက်သွေ့ သောဒေသများတွင် ပန်းဂေါ်ဖီအစိမ်းမှာ အပင်သက်တမ်း(၁၁)လခန့် အထိကြာမြင့်သည်ဟုသိရှိရပါသည်။ ပန်းဂေါ်ဖီစိမ်း စိုက်ပျိုးသည့် နေရာများမှာ အောင်ဆန်း ပြည်သာယာဘက်ရှိ ဉယျာဉ်ခြံမြေများတွင် စိုက်ပျိုးကြပါသည်။ သဲဆန်သော နုန်းမြေများတွင် စိုက်ပျိုးကြပြီး တစ်ဧကလျှင် မျိုးစေ့အနေဖြင့် ပေါင်ဝက်ခန့် လိုအပ်သည်ဟုသိရှိရပါသည်။ ပန်းဂေါ်ဖီစိမ်းကို စိုက်ပျိုးပြီး ၂လခွဲ ၃လအကြာတွင် စတင်ခုတ်ယူနိုင်ပြီး အချိန်မှီမခုတ်ပါက ပန်းပွင့်မှာ အရောင်ပြောင်းသွားသည်ဟုသိရပါသည်။ ပန်းဂေါ်ဖီအစိမ်း တစ်ဧကလျှင် မျိုးအလိုက် ကွာခြားပြီး မျိုးကောင်းလျှင် ကောင်းသလိုတစ်ဧကလျှင် ပျမ်းမျှအပွင့်ရေ ၁၅၀၀-၂၀၀၀ခန့်ထွက် ရှိသည်ဟုသိရပါသည်။

          ပန်းဂေါ်ဖီစိမ်း ဈေးနှုန်းဈေးကွက်အနေဖြင့် ပြည်ဈေးကွက်တွင် ယခုအချိန်တွင် ဈေးကောင်း ရနေပြီး တစ်ပွင့် လျှင် (၁၅၀၀-၂၀၀၀)ကျပ်၊ အပွင့်သေးလျှင် (၉၀၀-၁၀၀၀)ကျပ်အထိ ရောင်းချ ကြောင်း သိရှိရပါသည်။ ပြည်ဒေသတွင် စိုက်ပျိုးသောပန်းဂေါ်ဖီစိမ်းမှာ ဒေသတွင်းသာ စားသုံးပြီး နယ်သို့တင်ပို့ ရောင်းချခြင်းမရှိဟု သိရှိရပါသည်။ ပန်းဂေါ်ဖီအစိမ်းမှာ ပန်းဂေါ်ဖီအဖြူထက် ဈေးကောင်းပြီး လူကြိုက်များသဖြင့် ပိုမိုတိုးချဲ့စိုက်လျှင် စိုက်ပျိုးသူအဖို့ ပိုမိုအကျိုးအမြတ် ဖြစ်ထွန်းမည်ဖြစ် ကြောင်း လေ့လာသုံးသပ်တင်ပြအပ်ပါသည်။

DOCA(ပဲခူး)

ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ ညောင်လေးပင်ခရိုင်ဦးစီးမှူးရုံးအနေဖြင့် စား သုံးသူကာကွယ်ရေးလုပ်ငန်းများ၊ ကုန်ဈေးနှုန်းတည်ငြိမ်ရေးလုပ်ငန်းများကို အင်တိုက်အားတိုက် ဆောင်ရွက်လျက်ရှိရာ ၂၆.၂.၂၀၂၅ ရက်နေ့တွင် ညောင်လေးပင်ခရိုင်တာဝန်ခံရုံးမှ ခရိုင်ဦးစီးမှူး ဦး ရဲမင်းထွဋ်၊ ဒုခရိုင်ဦးစီးမှူး ဦးစောသန်းထိုက်ကျော်၊ ညောင်လေးပင်မြို့နယ်တာဝန်ခံ ဦးကျော်သက် မိုး၊ အငယ်တန်းစာရေး ဦးနေမျိုးဝင်း၊ မိတ်ဖက်ဌာနဖြစ်သော ပြွန်တန်ဆာမြို့နယ်အထွေထွေ အုပ်ချုပ်ရေးဦးစီးဌာန နှင့်အတူ ပြွန်တန်ဆာမြို့၊ မြို့မ(၃)၊ မင်းလမ်းရပ်ကွက်ရှိ New Age ရေတိုင်ကီ လုပ်ငန်း လုပ်ကိုင်သော လုပ်ငန်းရှင်ဖြစ်သူ ဦးအောင်ကျော်မင်းနှင့် လုပ်ငန်းအခြေအနေများကို တွေ့ဆုံဆွေးနွေးခဲ့ပါသည်။

တွေ့ဆုံဆွေးနွေးရာတွင် ခရိုင်ဦးစီးမှူး၊ ဒုခရိုင်ဦးစီးမှူးနှင့် မြို့နယ်တာဝန်ခံတို့က သိရှိလို သည့် အချက်များကို မေးမြန်းဆွေးနွေးခဲ့ရာ လုပ်ငန်းရှင် ဦးအောင်ကျော်မင်းက ပြန်လည်ဖြေကြား ပေးခဲ့ပါသည်။ မေးမြန်းဆွေးနွေးချက်များအရ New Age ရေတိုင်ကီလုပ်ငန်းသည် ထိုင်းနည်းပညာ ကို အခြေခံထားပြီး အိန္ဒိယပုံစံဖြင့် ထုတ်လုပ်ထားကြောင်း၊ ရေတိုင်ကီ ပြုလုပ်ရာတွင် SAG ကော်မှုန့် ကို အဓိကအသုံးပြုထားပြီး ရေတိုင်ကီ ၅၀၀ လီတာ တစ်ခုလျှင် ၁၈၅၀၀၀ကျပ်၊ ရေတိုင်ကီ ၁၀၀၀ လီတာတစ်ခုလျှင် ၃၀၆၀၀၀ကျပ်၊ ရေတိုင်ကီ ၁၅၀၀ လီတာ တစ်ခုလျှင်  ၄၁၀၀၀၀ကျပ်၊ ရေတိုင်ကီ ၂၀၀၀ လီတာ တစ်ခုလျှင် ၅၁၀၀၀၀ကျပ်ဖြင့် ရောင်းချပြီး ယင်းဈေးနှုန်းများသည် ရန်ကုန်အရောက် ဈေးနှုန်းများ ဖြစ်ကြောင်း သိရှိရပါသည်။ ရေတိုင်ကီ ပြုလုပ်ရာတွင် ကုန်ကြမ်းများအနေဖြင့် ကော် မှုန့်၊ Gas၊ လျှပ်စစ်တို့ အဓိကလိုအပ်ပြီး အလုပ်သမား(၆) ဦးနှင့် လုပ်ငန်းလည်ပတ်လျက် ရှိပါသည်။ ဈေးကွက်ဖြန့်ဖြူးမှုအနေဖြင့် တောင်ငူ၊ ရန်ကုန်၊ ပုသိမ်၊ တောင်ကြီးတို့ကို ရောင်းချလျက်ရှိပြီး လုပ်ငန်းအခက်အခဲမှာ လျှပ်စစ်မီးဖြစ်ကြောင်း သိရှိရပါသည်။ လျှပ်စစ်မီး မလာသောအခါမျိုးတွင် Gasအိုးဖြင့် လုပ်ငန်းလည်ပတ်ရပြီး ကျွမ်းကျင်လုပ်သားရှားပါးမှု၊ သယ်ပို့စရိတ်ကြီးမြင့်မှု၊ ကုန်ကြမ်း ရှားပါးမှု၊ ဈေးကွက်အတွင်းပြိုင်ဆိုင်မှု ပြင်းထန်ခြင်းတို့ကြောင့် ရေတိုင်ကီလုပ်ငန်း လုပ်ကိုင်ရာတွင် အခက်အခဲများနှင့် ကြုံတွေ့နေရကြောင်း သတင်းရရှိပါသည်။

DOCA(ပဲခူး)

              တောင်ငူခရိုင်၊ ဖြူးမြို့၊ ထန်းကုန်းရပ်ကွက်မှ ခြင်္သေ့မင်းအမှတ်တံဆိပ် မြေပဲယိုသည် လူကြိုက်များသော ဒေသထွက်လက်ဆောင်တစ်ခုဖြစ်ပါသည်။ ၎င်းမြေပဲယိုလုပ်ငန်းသည် လွန်ခဲ့ သော ၄၅ နှစ်ခန့် ၁၉၇၈ ခုနှစ်က စတင်ခဲ့ပြီး ထိုစဉ်က ဖြူးဈေးအတွင်း အလေးချိန်ဖြင့် ရောင်းချရာမှ လက်ရှိကာလအထိ ထုပ်ပိုးမှုအဆင့်ဆင့်နှင့် ရောင်းချရင်း လူသိများ ဈေးကွက်ရှိနေသော မြေပဲယို၊ နှမ်းယို ဖြစ်ပါသည်။

              လုပ်ငန်းစတင်စဉ်က ထန်းလျက်မြေပဲယိုနှင့် စတင်ခဲ့ပြီး ၁၉၈၀ ခုနှစ်ခန့်မှစ၍ သကြား မြေပဲယိုကို ကိုယ်ပိုင်ဖော်မြူလာထွင်ခဲ့ပါသည်။ ထိုစဉ်က ပစ္စည်းလည်းဈေးပေါ၍ အပျက်အစီး ခံနိုင်ခဲ့သဖြင့် လူအများကြိုက်နှစ်သက်သည့် သကြားမြေပဲယိုဖော်မြူလာကို ရရှိခဲ့ပြီး ထန်းလျက် မြေပဲယိုအစား သကြားမြေပဲယိုကို ပြောင်းလဲထုတ်လုပ်ခဲ့ပါသည်။

              ယခုအခါ သကြားမြေပဲယို၊ သကြားနှမ်းယိုနှင့် ကြံသကာမြေပဲယိုများ ထုတ်လုပ်ရောင်းချ လျက်ရှိနေပါသည်။ ကြံသကာမြေပဲယိုကို အချပ်ကြီးနှင့် အချပ်သေးဟူ၍ နှစ်မျိုးထုတ်လုပ်ပါသည်။ ဈေးနှုန်းများအနေဖြင့် သကြားမြေပဲယို(၅)ချပ်တွဲ တစ်ထုပ်လျှင် ၅၀၀၀ ကျပ်၊ သကြားနှမ်းယို တစ်ထုပ်လျှင် ၄၅၀၀ ကျပ်ဖြင့် ဈေးကွက်အတွင်း ရောင်းချလျက်ရှိပါသည်။

              ဒေသတွင်း၌ ဖြန့်ဖြူးရောင်းချလျက်ရှိသည့်အပြင် ပဲခူး၊ ရန်ကုန်၊ ပန်းတနော်၊ ပုသိမ်၊ မိတ္ထီလာ၊ မန္တလေး၊ မူဆယ်၊ ဘားအံ၊ မြဝတီမြို့များသို့ တင်ပို့ရောင်းချရပြီး မြဝတီမြို့မှ တစ်ဆင့် ထိုင်းနိုင်ငံဘန်ကောက်မြို့အထိ တင်ပို့ရောင်းချရကြောင်း သိရပါသည်။ 

              မိသားစုတပိုင်တနိုင်သာလုပ်ကိုင်သော်လည်း မှာသလောက် တင်ပို့ပေးနိုင်အောင်ထုတ် လုပ်ကြောင်း၊ လုပ်ငန်းတိုးချဲ့ချင်သော်လည်း လုပ်သားအခက်အခဲကြောင့် တိုးချဲ့နိုင်ခြင်းမရှိကြောင်း လုပ်ငန်းရှင် ဒေါ်မြင့်မြင့်ကြည်၏ ပြောပြချက်အရသိရပါသည်။

DOCA(ပဲခူး)

          ပြည်ခရိုင်၊ရွှေတောင်မြို့နယ်တွင် ပင်ဆိုင်ပင်များစိုက်ပျိုးထားသော ဆည်ကြီးကုန်းအုပ်စု၊ ကြက်ဖြူတောင်ကျေးရွာသို့ သွားရောက်၍ပင်ဆိုင်ဖူးစိုက်ပျိုးထွက်ရှိမှုနှင့် စျေးနှုန်းစျေးကွက်များကို သိရှိနိုင်ရန် သွားရောက်မေးမြန်းခဲ့ပါသည်။

          ရွှေတောင်မြို့နယ်တာဝန်ခံနှင့် ဝန်ထမ်းများအဖွဲ့သည်(၂၆.၂.၂၀၂၅)ရက်နေ့တွင် ဆည်ကြီး ကုန်းအုပ်စု၊ ကြက်ဖြူတောင်ကျေးရွာရှိ ပင်ဆိုင်စိုက်ပျိုးထားသော တောင်သူနှင့်တွေ့ဆုံပြီး မေးမြန်း ခဲ့ရာပင်ဆိုင်ဖူးများကို ဝါဆိုလတွင်စတင်စိုက်ပျိုးကြောင်း၊ ပင်ဆိုင်ဖူးစိုက်ပျိုးရာတွင် အစေ့ကိုစိုက်ပျိုး ရပြီးအပင်ပေါက်များကို ဝါဆိုလပြည့်ကျော်အချိန် စိုက်ပျိုးသောကွင်းတွင် မြောင်းဖော်၍ စိုက်ပျိုးရ ကြောင်း၊ ပင်ဆိုင်ဖူးကို တစ်ယောက်စိုက်သာစိုက်ပျိုးပြီး စိုက်ပျိုးသည့်မြောင်းမှာ ၇ မြောင်း၈မြောင်း ခန့်ဝင်ဆံ့ကြောင်း သိရှိရပါသည်။ ပင်ဆိုင်ဖူးများကို စိုက်ပျိုးပြီး တစ်လခွဲနှစ်လအကြာတွင် အဖူးများ ကိုစတင်ခူးဆွတ်ရပါသည်။ ပင်ဆိုင်တစ်ယောက်စိုက်လျှင် ပင်ဆိုင်ဖူးအစည်း(၅၀၀) ခန့်ထွက်ရှိသည် ဟုသိရှိရပါသည်။ ပင်ဆိုင်ဖူးများကို တစ်ရက်ခြားတစ်ခါခူးဆွတ်ရပြီး ပင်ဆိုင်ပင်တစ်ခါ စိုက်ပျိုးထား လျှင် အများဆုံး ၄လမှ၅လခန့်အထိ ခူးဆွတ်၍ရောင်းချရကြောင်းသိရှိရပါသည်။ ယခုဖေဖော်ဝါရီလ နောက်ဆုံးအပတ်တွင် ပင်ဆိုင်စျေးနှုန်းမှာ တစ်စည်းလျှင်(၃၀၀-၄၀၀)ကျပ်ဖြင့် ရောင်းချနေလျက် ရှိကြောင်းသိရှိရပါသည်။

DOCA(ပဲခူး)