ပြည်တွင်းကုန်သွယ်မှုသတင်း

    မွန်ပြည်နယ်သည် စပါးစိုက်ဧကများပြီး ဆန်ဖူလုံမှုရှိပြီး ဒေသထွက် ဧည့်မထ(စပါး) စိုက်ပျိုးမှုများပြီး ပိုလျှံသော်လည်း ပေါ်ဆန်း(ဆန်)များကို အခြားတိုင်းဒေသကြီးမှလည်း ဝယ်ယူ တင်သွင်းရသောဒေသဖြစ်သည်။

    ဖေဖော်ဝါရီလနောက်ဆုံးအပတ်တွင် မော်လမြိုင်မြို့၌ဖြစ်ပေါ်နေသော ဆန်ဈေးနှုန်းများမှာ ပေါ်ဆန်း(ဆန်)၂၄ပြည်တစ်အိတ်လျှင်  ကျပ် ၁၂၂၀၀၀၊ တစ်ပြည်လျှင် ကျပ် ၅၃၀၀ ဖြစ်ပြီး ယခင် အပတ်နှင့်နှိုင်းယှဉ်ပါကဈေးနှုန်းပြောင်းလဲမှုမရှိဘဲ ယခင်လနှင့်နှိုင်းယှဉ်ပါကပေါ်ဆန်း(ဆန်) ၂၄ပြည် တစ်အိတ်လျှင်  ကျပ် ၁၂၀၀၀၊ တစ်ပြည်လျှင် ကျပ် ၆၀၀ ခန့် ဈေးနှုန်းမြှင့်တက်လာပြီး ယခင်နှစ် ဖေဖော်ဝါရီ ၂၉ ရက်တွင် ဖြစ်ပေါ်နေသော ပေါ်ဆန်း(ဆန်) ပေါ်ဆန်း(ဆန်)၂၄ပြည်တစ်အိတ်လျှင်  ကျပ်၅၂၀၀၀၊ တစ်ပြည်လျှင် ကျပ် ၂၃၀၀ ခန့်ဈေးနှုန်းမြှင့်တက်လာခဲ့သည်ကို တွေ့ရှိရသည်။

     ဧည့်မထ(ဆန်)မှာ ဖေဖော်ဝါရီလ နောက်ဆုံးအပတ်တွင် ဧည့်မထ(ဆန်) ၂၄ပြည်တစ်အိတ်လျှင် ကျပ် ၇၉၀၀၀၊ တစ်ပြည်လျှင် ကျပ် ၃၅၀၀ ဖြစ်ပေါ်နေပြီး ယခင်အပတ်နှင့် နှိုင်းယှဉ်ပါက ဈေးနှုန်း ပြောင်းလဲခြင်းမရှိဘဲ ယခင်လနှင့်နှိုင်းယှဉ်ပါက ဧည့်မထ(ဆန်) ၂၄ပြည် တစ်အိတ်လျှင် ၁၁၀၀၀ ကျပ် ၊ တစ်ပြည်လျှင် ၅၀၀ ကျပ်  ယခင်နှစ်အလားတူ ကာလနှင့်နှိုင်းယှဉ်ပါကလည်း ဧည့်မထ(ဆန်) ၂၄ပြည်တစ်အိတ်လျှင် ကျပ်၂၁၀၀၀၊ တစ်ပြည်လျှင် ကျပ် ၁၀၀၀ ခန့်ဈေးနှုန်းမြှင့်တက်လာခဲ့သည်ကို တွေ့ရှိရသည်။

စီးဝင်မှုစီးထွက်မှု

      မွန်ပြည်နယ်အတွင်းသို့ (၁၈.၂.၂၀၂၄ မှ ၂၄.၂.၂၀၂၄) ရက်နေ့ထိ ပေါ်ဆန်း(ဆန်) ဝင်ရောက် မှုမှာ ရန်ကုန်တိုင်းဒေသကြီးမှ (၁၉၁၉၉)အိတ်(၉၆၀တန်)၊ စစ်ကိုင်းတိုင်းဒေသကြီးမှ (၂၅၂၅) အိတ်(၁၂၆တန်)၊ ဧရာဝတီတိုင်းဒေသကြီးမှ (၁၆၂၈)အိတ် (၈၁တန်) ပဲခူးတိုင်းဒေသကြီးမှ (၂၉၉၀)အိတ်(၁၄၅တန်)၊ စုစုပေါင်း(၂၆၅၄၂)အိတ်(၁၃၂၇တန်)ခန့်စီးဝင်လျှက်ရှိပြီး ပြည်နယ်တွင်းမှ စီးထွက်မှုမှာ  ကရင်ပြည်နယ်သို့ ပေါ်ဆန်း (ဆန်) (၁၈)တန်၊ ကမာကြည်(ဆန်)(၂၂)တန်၊ ဧည့်မထ (ဆန်)(၄၁)တန်၊ စုစုပေါင်း(၈၁)တန်ခန့်ရှိကြောင်း ပြည်နယ် ဆန်ကုန်သည်အသင်းထံမှ သိရှိရသည်။

DOCA(မွန်)

     ကျောက်ဆည်ခရိုင်အတွင်း နနွင်းများကို ၂၀၂၄ခုနှစ်၊ ဖေဖော်ဝါရီလ ပထမပတ်မှစတင်၍ တူးဖော်လျက်ရှိရာ ယခုအချိန်တွင် နနွင်းများလှိုင်လှိုင်ထွက်ပေါ်လျက်ရှိပါသည်။ နနွင်းစတင်တူးဖော်ချိန်တွင် စျေးနှုန်းများကောင်းမွန်လျက်ရှိပြီး တောဝယ် နနွင်းအစို (၁)တင်းလျှင် (၁၂၅၀၀-၁၄၀၀၀) ကျပ်အထိရောင်းချခဲ့ရပြီး ဖေဖော်ဝါရီလ ဒုတိယအပတ်မှစတင်၍ နနွင်းစျေးများကျဆင်းလာပြီး တောဝယ် နနွင်းအစို(၁)တင်းလျှင် (၁၁၂၀၀-၁၁၆၀၀)ကျပ်အထိဈေးနှုန်းကျဆင်းခဲ့ပါသည်။ ၂၀၂၃ခုနှစ်၊ ဖေဖော်ဝါရီလတွင် နနွင်းတက်(၁)တင်းလျှင်(၈၈၀၀)ကျပ်၊ နနွင်းတက်အခြောက်(၁)ပိဿာလျှင် (၃၆၀၀)ကျပ်၊ နနွင်းမှုန့်(၁)ဘူးလျှင် (၈၀၀-၁၀၀၀)ကျပ်စျေးနှုန်းတို့ဖြင့် ရောင်းဝယ်လျက်ရှိပြီး ယခုဖေဖော်ဝါရီလ နောက်ဆုံးပတ်တွင် တောဝယ် နနွင်းတက်စို(၁)တင်းလျှင် (၁၁၂၀၀)ကျပ်၊ နနွင်းတက်အခြောက် (၁)ပိဿာလျှင် (၅၅၀၀)ကျပ်၊ နနွင်းမှုန့်(၁)ဘူးလျှင် (၁၀၀၀-၁၂၀၀)ကျပ်စျေးနှုန်းတို့ဖြင့် ရောင်းချရကြောင်း၊ နနွင်းများကို ပွဲစားများက ယာခင်းထဲအရောက်လာရောက်ဝယ်ယူပြီး နနွင်းကို ရေနွေးဖျော၊ အခြောက်ခံကာ မြို့ပေါ်ပွဲရုံများသို့သွားရောက်ရောင်းချကြောင်း၊ တချို့ပွဲစားများမှာ နနွင်းတက်အခြောက်များကိုလှောင်ထားပြီး စျေးနှုန်းမြင့်တက်ချိန်ရောက်မှသာ ထုတ်ရောင်းကြကြောင်း၊ နနွင်းများကို ပွဲရုံများမှတစ်ဆင့် ရန်ကုန်-မန္တလေးမြို့များသို့ တင်ပို့ရောင်းချကြကြောင်းသိရှိရပါသည်။

DOCA(မန္တလေး)

      မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးလျက်ရှိပြီး စားဖိုဆောင်သီးနှံတစ်မျိုးဖြစ်သော ငရုတ်သီးနှံကိုလည်းစိုက်ပျိုးလျက်ရှိရာ (၂၀၂၃-၂၀၂၄) ဘဏ္ဍာနှစ်တွင် (၅၈၁၀)ဧကစိုက်ပျိုးထားကြောင်း ခရိုင်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရသိရှိရပါသည်။ ငရုတ်စိုက်ပျိုးမှု(၁)ဧကလျှင် ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၁၅)သိန်းကျပ်ခန့်ကုန်ကျကြောင်း၊ အများဆုံးစိုက်ပျိုးသော ငရုတ်မျိုးများမှာ (၆၉၂)ငရုတ်မျိုးနှင့် ကျားခေါင်းမျိုးတို့ဖြစ်ကြပါသည်။ ယခုအချိန်တွင် ကျားခေါင်းငရုတ်မျိုးများမှာ စတင်ထွက်ရှိနေပြီး (၁)ဧကလျှင် (၅)ရက်ခြားခူးဆွတ်မှုအနေဖြင့် (၁၀)တင်းနှုန်း၊ ပိဿာအနေဖြင့် (၈၀)ပိဿာခန့်ထွက်ရှိကြောင်း၊ ငရုတ်စျေးနှုန်းအနေဖြင့် ငရုတ်အစို(၁)ပိဿာလျှင် (၂၃၀၀-၂၄၀၀)ကျပ်စျေးနှုန်းတို့ဖြင့်ရောင်းချရကြောင်း၊ ငရုတ်အစိုများကို ငရုတ်ခင်းများအထိ လာရောက်ဝယ်ယူသူများရှိသလို နီးစပ်ရာပွဲရုံများသို့လည်းရောင်းချသူများရှိပါသည်။ အထွက်နှုန်းအနေဖြင့် ငရုတ်စတင်ထွက်ပေါ်ချိန်မှ ငရုတ်သီးအခင်းဖြတ်ချိန်အထိ ပိဿာ(၈၀၀-၉၀၀) အထိထွက်ရှိနိုင်ကြောင်း၊ ငရုတ်များကောင်းမွန်ပါက အကျိုးအမြတ်ပိုမိုရရှိနိုင်မည်ဖြစ်ကြောင်း ငရုတ်စိုက်ပျိုးသော တောင်သူတစ်ဦး၏ ပြောပြချက်အရသိရှိရပါသည်။

DOCA(မန္တလေး)

     မန္တလေးတိုင်းဒေသကြီး၊ ကျောက်ဆည်ခရိုင်အတွင်းရှိ စဉ့်ကိုင်မြို့နယ်သည် စပါးကိုအဓိကထားစိုက်ပျိုးပြီး ကျေးလက်နေတောင်သူများသည် မိုးစပါးများရိတ်သိမ်းပြီးချိန်တွင် ဆောင်းကုလားပဲကိုလည်းစိုက်ပျိုးလျက်ရှိရာ စဉ့်ကိုင်မြို့နယ်တွင် ဆောင်းကုလားပဲစိုက်ဧက (၁၆၃၀၄)ဧကစိုက်ပျိုးထားကြောင်း ခရိုင်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရသိရှိရပါသည်။ဆောင်းကုလားပဲကို အောက်တိုဘာနှင့် နိုဝင်ဘာလတို့တွင် စတင်စိုက်ပျိုးကြပြီး စိုက်ပျိုးရာတွင် မျိုးအနေဖြင့် (၁)ဧကလျှင် ၁တင်းမှ ၁တင်းခွဲနှုန်းပက်ကြဲကြပြီး တောင်သူအများစုသည် ရိုးရိုးကုလားပဲမျိုးနှင့် V2 ကုလားပဲအဖြူလုံးကြီးမျိုးများကိုသာ အများဆုံးစိုက်ပျိုးကြကြောင်း၊ (၁)ဧကကုန်ကျစရိတ်အနေဖြင့် မျိုး၊ ထွန်ယက်ခ၊ သွင်းအားစု၊ လုပ်သားခ၊ စုစုပေါင်း (၂၅၀၀၀၀/-)ကျပ်ခန့်ကုန်ကျကြောင်း၊ (၁)ဧကပျမ်းမျှအထွက်နှုန်းအနေဖြင့် (၇-၈)တင်းခန့်ထွက်ရှိကြောင်းသိရှိရပါသည်။ ယခုအချိန်တွင် ဆောင်းကုလားပဲများဖြိုင်ဖြိုင်ရိတ်သိမ်းလျက်ရှိပြီး ကုလားပဲစျေးနှုန်းအနေဖြင့် ယခင်နှစ်တွင် ကုလားပဲရိုးရိုးတစ်တင်းလျှင် (၅၈၀၀၀/-)ကျပ်၊ ကုလားပဲ V2 တစ်တင်း လျှင် (၆၂၀၀၀/-)ကျပ်စျေးနှုန်းများရှိခဲ့ပြီး ယခုနှစ်ကုလားပဲဖြိုင်ဖြိုင်ထွက်ပေါ်ချိန်၌ ကုလားပဲရိုးရိုးတစ်တင်းလျှင် (၈၀၀၀၀/-)ကျပ်၊ ကုလားပဲ V2 တစ်တင်းလျှင် (၈၇၀၀၀/-)ကျပ်စျေးနှုန်းတို့ဖြင့် အရောင်းအဝယ်ဖြစ်နေကြောင်း၊ အကျိုးအမြတ်အနေဖြင့် (၄၅၀၀၀၀-၅၀၀၀၀၀)ကျပ်ခန့်ရရှိကြောင်း ကိုကုလားပဲစိုက်တောင်သူတစ်ဦး၏ ပြောပြချက်အရသိရှိရပါသည်။ ကုလားပဲစိုက်ပျိုးခြင်းသည် အချိန်ကုန်သက်သာပြီး ကုန်ကျစရိတ်နည်းပါးသောကြောင့် ကုလားပဲသီးနှံကို ပိုမိုတိုးချဲ့စိုက်ပျိုးသင့်ကြောင်း ရေးသားတင်ပြလိုက်ရပါသည်။

DOCA(မန္တလေး)

     မန္တလေးတိုင်းဒေသကြီး၊ ကျောက်ဆည်ခရိုင်၌ (၂၀၂၃-၂၀၂၄) ဘဏ္ဍာနှစ်တွင် ပဲစင်းငုံ(မိုးဦး) အား ကျောက်ဆည်မြို့နယ်တွင် (၈၆၇)ဧက၊ မြစ်သားမြို့နယ်တွင် (၆၈၅)ဧက၊ စုစုပေါင်း (၁၅၅၂)ဧက စိုက်ပျိုးပြီး ယခုလက်ရှိအချိန်ထိ (၃၀၂)ဧကရိတ်သိမ်းပြီးဖြစ်ကြောင်း ခရိုင်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန၏ စာရင်းများအရသိရှိရပါသည်။ ပဲစင်းငုံသီးနှံကို သီးသန့်စိုက်ပျိုးမှုများအပြင် သီးထပ်သီးညှပ်အဖြစ်လည်းစိုက်ပျိုးကြပါသည်။ စိုက်ပျိုးမှုအနေဖြင့် ပဲစင်းငုံ(၁)ဧကလျှင်ဘ(၄)ပြည်ကုန်ကျပြီး တချို့တောင်သူများသည့် ပဲစင်းငုံများအား မိမိတို့အိမ်တွင် သေချာစွာသိမ်းဆည်းထားပြီး မျိုးအဖြစ်အသုံးပြုကြခြင်းလည်းရှိပြီး ပွဲရုံများ၌ ဝယ်ယူ၍စိုက်ပျိုးခြင်းလည်းရှိကြောင်းသိရှိရပါသည်။ (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း(၂၅၀၀၀၀/-)ကျပ်ခန့်ကုန်ကြပြီး အထွက်နှုန်းအနေဖြင့် (၈-၁၀)တင်းခန့်ထွက်ရှိကြောင်း၊ ပဲစင်းငုံစျေးနှုန်းအနေဖြင့် ယခင်နှစ်တွင် တစ်တင်းလျှင် (၆၅၀၀၀/-)ကျပ်၊ ယခုနှစ်တွင် တစ်တင်းလျှင် (၁၂၀၀၀၀/-)ကျပ်စျေးနှုန်းတို့ဖြင့် ရောင်းဝယ်လျက်ရှိကြောင်း၊ (၁)ဧကအကျိုးအမြတ်အနေဖြင့် (၇၀၀၀၀၀/-)ကျပ်ခန့်ရရှိကြောင်း ပဲစင်းငုံသီးနှံစိုက်ပျိုးသူ တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)