ပြည်တွင်းကုန်သွယ်မှုသတင်း

              ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်တွင် ဒေသခံတောင်သူလယ်သမား ကြီးများသည် စိုက်ပျိုးမြေများ ကောင်းမွန်မှုကြောင့် နွေစပါး၊ မိုးစပါးနှင့် ဆောင်းသီးနှံများဖြစ်သော မတ်ပဲ၊ ပဲတီစိမ်း၊ မြေပဲ၊ နေကြာ စသည့်သီးနှံများကို စီးပွားဖြစ် စိုက်ပျိုးလုပ်ကိုင်လျက်ရှိကြပါသည်။

              ယခုနှစ် စက်တင်ဘာလတွင် ရာဂီမုန်တိုင်းကြောင့် တောင်ငူမြို့နယ်၊ စစ်တောင်းမြစ်ဘေးရှိ ကျေးရွာတချို့တွင် ရေကြီးရေလျှံမှုဖြစ်ပွား၍ စပါးခင်းများပျက်စီးမှုရှိသော်လည်း သီးနှံမှဝင်ငွေတိုးပွားစေရန်နှင့် စားနပ်ရိက္ခာဖူလုံစေရေးအတွက် မတ်ပဲကို အားထားစိုက်ပျိုးကြပါသည်။

             မတ်ပဲစိုက်ပျိုးသည့် ကျေးရွာများတွင် မြို့နယ်စိုက်ပျိုးရေးဦးစီးဌာန၏ ကြီးကြပ်မှုဖြင့် တစ်ဧကပန်းတိုင်အထွက်နှုန်း ရရှိရေးအတွက် မျိုးကောင်းမျိုးသန့်ရရှိရေး၊ စနစ်တကျစိုက်ပျိုးရေးနှင့် ပိုးသတ်ဆေးနှင့် သွင်းအားစုများ စနစ်တကျနှင့် အချိုးကျမှန်ကန်စွာ သုံးစွဲနိုင်ရေးများကို ကျေးရွာများတွင် သင်တန်းပေးခြင်း၊ မြို့နယ်စိုက်ပျိုးရေးဦးစီးဌာန ကွင်းတာဝန်ခံများမှ ကြီးကြပ်ပေးခြင်းများကို ဆောင်ရွက်ပေးလျက်ရှိပါသည်။

             မတ်ပဲစိုက်ပျိုးရိတ်သိမ်းပြီး နွေစပါးများပြန်လည်စိုက်ပျိုးနိုင်ရန်အတွက် အထွက်နှုန်းကောင်း၊ သက်တမ်းတို မတ်ပဲမျိုးများကို စိုက်ပျိုးလာကြပါသည်။ မြန်မာနိုင်ငံဆီထွက်သီးနှံနှင့်ပဲမျိုး စုံအသင်းမှ ရာဂီမုန်တိုင်းကြောင့် ပျက်စီးသွားသည့် တောင်သူများအတွက် မတ်ပဲ ဧက ၁၀၀၊ ပဲတီ စိမ်း ဧက ၃၀၀ တို့ကို မျိုးစေ့များ အခမဲ့လှူဒါန်းထောက်ပံ့ပေးထားပါသည်။

             အထွက်ကောင်း TBL 9 မတ်ပဲ ၉၈၅၀ ဧက၊ ရေဆင်း ၅ မတ်ပဲ ၅၂၅၀ ဧက၊ ရေဆင်း ၇ မတ်ပဲ ၅၆၉၁ ဧက၊ စုစုပေါင်း ၂၀၇၉၁ ဧက စိုက်ပျိုးထားပါသည်။ မတ်ပဲသက်တမ်း ၇၅ ရက်မှ ၉၀ ရက်သာရှိသဖြင့် နွေစပါးများလည်း အချိန်မီစိုက်ပျိုးနိုင်မည်ဖြစ်ပါသည်။

            တောင်ငူမြို့နယ်အတွင်း ၂၀၂၄-၂၀၂၅ ခုနှစ် နိုင်ငံ့စီးပွားမြှင့်တင်ရေးရန်ပုံငွေမှ ရာဂီမုန်တိုင်းအရှိန်ကြောင့်ပျက်စီးခဲ့သည့် ဆောင်းသီးနှံပြန်လည်စိုက်ပျိုးနိုင်ရန် ကျေးရွာအုပ်စု (၁၃)ခု၊ ဧကပေါင်း (၁၄၀၀၆)ဧကအတွက် တစ်ဧကလျှင် ကျပ်တစ်သိန်းနှုန်း ချေးငွေထုတ်ချေးထားပြီးဖြစ်ရာ မတ်ပဲအတွက်လိုအပ်သည့် သွင်းအားစုများ၊ ပိုးသတ်ဆေး၊ မှိုသတ်ဆေး၊ အပွင့်အားဆေးများကို ဝယ်ယူစုဆောင်းထားရှိကြကြောင်းသိရသည်။

             ယခင်နှစ်က အထွက်နှုန်း ၁၉.၇၈ တင်းဖြစ်ပါသည်။ မတ်ပဲစိုက်ဧကများအားလုံး အပင်ပေါက် ကောင်းမွန်လျက်ရှိပါသည်။ ပန်းတိုင်အထွက်နှုန်း ကျော်လွန်ထွက်ရှိပါက တောင်သူဦးကြီးများ ဝင်ငွေတိုးတော့မည်ဖြစ်ပါသည်။

              ယခင်နှစ်က မတ်ပဲဈေးနှုန်းမှာ ပိဿာ(၃၀)အိတ် တစ်အိတ်လျှင် ၁၄၅၀၀၀ ကျပ်ဖြစ်ပြီး ယခုနှစ်ပေါက်ဈေးမှာ ၁၇၅၀၀၀ ကျပ် ဖြစ်ပါသည်။ တောင်သူလယ်သမားတစ်ဦးချင်း မတ်ပဲပေါ်ချိနတွင် ပန်းတိုင်အထွက်နှုန်းကျော်လွန်ထွက်ရှိ၍ ဈေးကောင်းရောင်းရပါက ဝင်ငွေတိုးကာ တိုင်းပြည်၏ GDP တိုးတက်လာမည်ဖြစ်ပါကြောင်း သိရှိရပါသည်။

DOCA(ပဲခူး)

             ကောက်ရိုးမှိုစိုက်ပျိုးခြင်းသည် မြန်မာလူမျိုးတို့နှင့် မစိမ်းပါ။ ကောက်ရိုးမှိုသည် သဘာဝအလျောက် ကောက်ရိုးပုံ၊ ကောက်ရိုးပြတ်ပုံများမှ အလိုအလျောက်ကောက်ရိုးမှိုများ ပွင့်ထွက်လာသည်ကိုလည်းတွေ့ရကြောင်း၊ ကျေးလက်ဒေသများတွင် ကောက်ရိုးပုံများကို ရေလောင်းခြင်း၊ ဆန်ကွဲ၊ ဖွဲနုများကြဲပက်ပေးခြင်းဖြင့် ကောက်ရိုးမှိုစိုက်ပျိုးကြကြောင်း၊ ကောက်ရိုးမှိုကို စနစ်တကျစိုက်ပျိုးခြင်းမရှိသဖြင့် အထွက်နှုန်းမကောင်းခြင်း၊ လုံးဝမထွက်ခြင်း၊ အထွက်နောက်ကျခြင်းနှင့် အပွင့်ငယ်ခြင်းတို့ဖြစ်တတ်ကြောင်း သိရသည်။

             ကန့်ဘလူမြို့နယ်တွင် တစ်နိုင်တစ်ပိုင် ကောက်ရိုးမှိုစိုက်ပျိုးစိုက်ပျိုးသူ ဦးဝင်းဦး၏ပြောပြချက်အရ ကောက်ရိုးမှိုစိုက်ပျိုးချိန်သည် အလွန်အရေးကြီးကြောင်း၊ ကောက်ရိုးမှိုစိုက်ပျိုးရာတွင် လိုအပ်သောအခြေခံကုန်ကြမ်းများဖြစ်သည့် သန့်ရှင်းခြောက်သွေ့သော ကောက်ရိုး(သို့မဟုတ်) ရိုးပြတ်များ၊ ဂျပ်စက္ကူများ၊ နွားချေးမြေဆွေး စသည်တို့နှင့် စိုက်ပျိုးကြကြောင်း၊ စိုက်ပျိုးစရိတ်အနေဖြင့် အလျား(၉)ပေနှင့် အကျယ်(၃)ပေကို ကျပ်(၄၅၀၀၀)ခန့် ကုန်ကျစရိတ်ရှိကြောင်း၊ ကောက်ရိုးမှိုများကို စိုက်ပျိုးပြီး(၁၅)ရက်ခန့်တွင် စတင်ခူးဆွတ်ရကြောင်း၊ ကောက်ရိုးမှိုတစ်ဘောင်လျှင်(၁၀-၁၅)ပိဿာထိ ခူးဆွတ်ရကြောင်း၊ ဈေးကွက်အတွင်း ကောက်ရိုးမှိုတစ်ဆယ်ကျပ်သား လျှင်(၁၂၀၀)ကျပ်၊ ကောက်ရိုးမှိုတစ်ပိဿာလျှင် ငွေကျပ် (၁၂၀၀၀)ခန့် ရောင်းချရသောကြောင့် စိုက်ပျိုးသူများအနေဖြင့် ထိုက်သင့်သည့်အကျိုးအမြတ်များရရှိကာ မိသားစုအဆင်ပြေလျက်ရှိကြောင်း သိရှိရပါသည်။

DOCA(စစ်ကိုင်း)

              ကန့်ဘလူမြို့ မြို့မစည်ပင်သာယာဈေးကွက်အတွင်းသို့ ဒေသထွက်ခရမ်းချဉ်သီးများနှင့် ရှမ်းပြည်နယ် အောင်ပန်းတို့မှထွက်ရှိသော ခရမ်းချဉ်သီးများကို မန္တလေးတိုင်းဒေသကြီးမှ မှာယူရောင်းချပြီး အရောင်းအဝယ်ဖြစ်လျက်ရှိကြောင်း သိရှိရပါသည်။

          ခရမ်းချဉ်သီးများသည် ယခုအချိန်အခါကာလဖြစ်သည့် ဆောင်းရာသီတွင် မိမိတို့ဒေသထွက်ခရမ်းချဉ်သီးများ ဈေးကွက်အတွင်းသို့ဝင်ရောက်ကာ လှိုင်လှိုင်ထွက်ရှိလာသည့်အတွက် ဒေသတွင်းခရမ်းချဉ်သီးများကိုသာ မှာယူရောင်းချရပါသည်။ ဒေသထွက်ခရမ်းချဉ်သီးမှာ အချိန်ကြာမြင့်စွာထားလျင် ပုတ်လွယ်ပြီး အထားမခံသည့်အတွက် အကြိုက်နည်းကြပေမဲ့ ဈေးနှုန်းအနေဖြင့် သက်သောသောကြောင့် ယခုအခါမှာတော့ ဒေသထွက်ခရမ်းချဉ်သီးများကိုသာ လှိုင်လှိုင်ဝယ်ယူရောင်းချလျက်ရှိကြောင်း  ယခင်နိုဝင်ဘာလတွင် ခရမ်းချဉ်သီး ဈေးနှုန်းများမှာ တစ်ပိဿာလျှင် (၈၀၀၀/၁၀၀၀၀)ကျပ် ဈေးနှုန်ုးတို့ ဖြစ်ခဲ့ကြောင်း သိရှိရပါသည်။

            ယခု ဒီဇင်ဘာလဒုတိယအပတ်တွင် ဒေသထွက်ခရမ်းချဉ်သီးဈေးနှုန်းအနေဖြင့်  တစ်ပိဿာ လျှင်(၅၅၀၀/၆၅၀၀)ကျပ်ဖြစ်ပြီး (၂၅)ကျပ်သားလျှင်(၁၅၀၀/၂၀၀၀)ကျပ် ဈေးနှုန်းဖြင့် အရောင်းအဝယ်ဖြစ်လျက်ရှိကြောင်း ကန့်ဘလူမြို့ ကုန်စိမ်းသီးနှံ အရောင်းအဝယ်လုပ်နေသူများထံမှ သိရှိရပါသည်။

 DOCA(စစ်ကိုင်း)

           ကန့်ဘလူမြို့နယ်အတွင်းရှိ ကျေးရွာများဖြစ်သည့် ကာဘိုး၊ ဇီးကုန်း၊ ထန်းကုန်း ကျေးရွာများတွင် ပန်းဂေါ်ဖီကို စိုက်ပျိုးလျက်ရှိပြီး ကန့်ဘလူမြို့နှင့် ကျွန်းလှမြို့ ဈေကွက်အတွင်းသို့ ပို့ဆောင်ရောင်း ချလျက်ရှိကြောင်းသိရပါသည်။ ကန့်ဘလူမြို့ မြို့မဈေးတွင် ပန်းဂေါ်ဖီများကို ယခင်လများတွင် မန္တလေးမြို့ နှင့် ရှမ်းပြည်နယ်တို့မှ မှာယူရောင်းချရပြီး ယခုဆောင်းပိုင်းကာလဖြစ်သည့်  နိုဝင်ဘာလကုန် ဒီဇင်ဘာလ လဆန်းပိုင်းတွင် ဒေသတွင်းလှိုင်လှိုင်ထွက်ရှိသည့် ပန်းဂေါ်ဖီများကိုသာ ဝယ်ယူရောင်းချလျက်ရှိကြောင်း၊ ပန်းဂေါ်ဖီပွင့်များကို အပွင့်အကြီး/အ‌သေး ဗြွန်ဈေး(၁၃၀၀)ကျပ်ဖြင့် ဝယ်ယူကာ စားသုံးသူပြည်သူမျာကို ပြန်လည်ရောင်းချရာတွင် ပန်းဂေါ်ဖီ(အကြီး) တစ်ပွင့်လျှင်(၂၀၀၀)ကျပ်၊ ပန်းဂေါ်ဖီ (အလတ်)တစ်ပွင့် လျှင်(၁၈၀၀)ကျပ်နှင့် ပန်းဂေါ်ဖီ(အသေး) တစ်ပွင့်လျှင်(၁၅၀၀) ကျပ် ဈေးနှုန်းများဖြင့် ရောင်းချလျက်ရှိပြီး  ဒီဇင်ဘာလ(ပထမပတ်) တွင် ပန်းဂေါ်ဖီအပွင့် အကြီး/ အသေးပေါ်မူ တည်၍ တစ်ထုတ်လျှင် (၃၀၀၀/၂၅၀၀/၂၀၀၀)ကျပ် ဈေးနှုန်းများဖြင့် အရောင်းအဝယ်ဖြစ်ရှိပြီး  ယခင်ဒီဇင်ဘာလ ပထမအပတ် ဈေးနှုန်းနှင့်နှိုင်းယှဉ်ပါက ဈေးအနည်းငယ်ကျဆင်းလျက်ရှိကြောင်း သိရှိရပါသည်။

DOCA(စစ်ကိုင်း)

              စစ်ကိုင်းတိုင်းဒေသကြီးသည် ဆီထွက်သီးနှံများဖြစ်သည့် နေကြာ၊ မြေပဲ၊ နှမ်း၊ ပန်းနှမ်း အစရှိသည့် ဆီထွက်သီးနှံများ စိုက်ပျိုးထွက်ရှိရာဒေသတစ်ခုဖြစ်ရာ ဆီထွက်သီးနှံဖြစ်သည့် မြေပဲသီးနှံကို စစ်ကိုင်းတိုင်းဒေသကြီးအတွင်းရှိ မုံရွာ၊ တန့်ဆည်၊ ကနီ ၊ မင်းကင်း အစရှိသည့် ဒေသများတွင် အများဆုံးစိုက်ပျိုးထွက်ရှိကြောင်း သိရှိရပါသည်။ စစ်ကိုင်းတိုင်းဒေသကြီး၏ မြေပဲသီးနှံနှင့် စပ်လျဉ်း၍ စိုက်ပျိုးထွက်ရှိမှုအခြေအနေ၊ ဈေးကွက်ဈေးနှုန်းအခြေအနေ၊ မြေပဲဆီ ထုတ်လုပ်နိုင်မှု အခြေအနေ၊ မြေပဲတစ်ပိဿာ လျှင်ကြိတ်ခွဲထုတ်လုပ်နိုင်မှုအခြေအနေ၊ ကုန်ကျစရိတ်နှင့် အကျိုးအမြတ်ရရှိမှုအခြေအနေတို့မှာ စစ်ကိုင်းတိုင်းဒေသကြီးတွင် မြေပဲ စိုက်ဧက (၉၄၄၄၅၄)  ဧကခန့်ရှိပြီး၊ မြေပဲဆီ (တစ်ပိဿာ) ဈေးနှုန်းမှာ (၁၅၅၀၀) ကျပ်၊ မြေပဲဖတ် တစ်ပိဿာဈေးနှုန်ူးမှာ (၆၀၅၀) ကျပ်၊  မြေပဲဆီထုတ်လုပ်နိုင်မှုအခြေအနေမှာ မြေပဲဆံတစ်ပိဿာကြိတ်ခွဲလျှင်  ဆီ (၄၀) ကျပ်သားခန့်ထွက်ရှိပြီး၊ မြေပဲဖတ်အနေဖြင့် (၅၀) ကျပ်သားခန့် ထွက်ရှိကြောင်း၊ တစ်ဧက ကုန်ကျစရိတ်မှာ (၈၂၃၅၀၀) ကျပ်ခန့် ကုန်ကျပြီး၊ တစ်ဧက အထွက်တင်းမှာ (၅၅) တင်းခန့် ထွက်ရှိကြောင်း၊ တစ်တင်းကုန်ကျစရိတ် မှာ (၁၄၉၇၃) ကျပ်ခန့်၊ မြေပဲလုံးဆံ တစ်ပိဿာ ရောင်းဈေးမှာ (၉၀၀၀) ကျပ်နှင့် အကျိုးအမြတ်အနေဖြင့် တစ်ဧကလျှင် (၉၃၆၅၀၀) ကျပ်ခန့် ရရှိပြီး မုံရွာဒေသမှ ထွက်ရှိသော မြေပဲသီးနှံများမှ အချို့ကိုမန္တလေးကုန်စည်ဒိုင်သို့  တင်ပို့ပြီး၊ ကနီ၊ မင်းကင်း ဒေသမှ ထွက်ရှိ သောမြေပဲသီးနှံများအား မုံရွာကုန်စည်ဒိုင်သို့ တင်ပို့လျက်ကြောင်း သိရှိရပါသည်။

DOCA(ပဲခူး)