ပြည်တွင်းကုန်သွယ်မှုသတင်း

        ပြည်ခရိုင်တွင် ဝက်သားဈေးနှုန်းများမှာ ယခင်က သုံးထပ်သားတစ်ပိဿာလျှင် (၂၀၀၀၀)      ကျပ်ဖြင့်ဈေးငြိမ်နေခဲ့ရာမှ ယခု ၂၀၂၄‌ အောက်တိုဘာလမှစ၍ ဝက်သားဈေးနှုန်းမှာ တစ်ပိဿာလျှင် (၂၃၀၀၀)ကျပ်မှ နိုဝင်ဘာလ လဆန်းပိုင်းတွင် (၂၇၀၀၀)ကျပ်နှင့် နိုဝင်ဘာလ တတိယပတ်တွင် ဈေးကွက်အတွင်း၌ ဈေးနှုန်းမြင့်တက်ခဲ့ပါသည်။  ထိုသို့ ဝက်သားဈေးမြင့်တက်ရခြင်းမှာ အစာဈေးနှုန်း အနေဖြင့် ယခင်က 25kg တစ်အိတ်လျှင် (၄၀၀၀၀)ကျပ်မှ ယခု (၅၇၀၀၀)ကျပ်ထိဈေးမြင့်တက်လာခဲ့ပါသည်။ ဆန်ကွဲ၊ ဖွဲနုပေါ်သော်လည်း ဝက်အစာကျွေးရာတွင် ရောစပ်ရသော အာဟာရဖြည့်ဆေးတစ်မျိုးဖြစ်သည့် Premix အမျိုးအစားဆေးမှာ နိုင်ငံခြားမှဝယ်ယူရသည့်ဆေးဖြစ်ပြီး 100CC တစ်လုံးလျှင် (ဝက်သားကောင်ရေ (၁၀)ကောင်အသုံးပြုနိုင်) ယခင်က (၆၀၀၀)ကျပ်မှ ယခုအခါတွင် (၂၀၀၀၀)ကျပ်အထိဈေးနှုန်းမြင့်တက်ခဲ့ပါသည်။ ဇွန်လ၊ ဇူလှိုင်လ၊ ဩဂုတ်လများတွင်လည်း ဝက်မွေးမြူရေးခြံများ၌ အာဖရိကဝက်များ အပြင်းဖျားရောဂါဝင်ခဲ့သည့်အတွက် သေကြေပျက်စီးမှုများသောကြောင့် ဝက်သားဈေးနှုန်းမြင့်တက်ရခြင်းဖြစ်ကြောင်းသိရပါသည်။

DOCA(ပဲခူး)

         တောင်ငူခရိုင်၊ ဖြူးမြို့တွင် မတ်ပဲ၊ ပဲတီစိမ်းများ စိုက်ပျိုးဆဲကာလဖြစ်၍ ပဲသစ်များမပေါ်သေးဘဲ ယခင်နှစ်၏ လက်ကျန်တချို့ရှိနေပါသည်။ စက်တင်ဘာလက မတ်ပဲ (ပိဿာ ၃၀ ဝင်အိတ်) တစ်အိတ်လျှင် ၁၉၂၀၀၀ကျပ်ရှိခဲ့ရာမှ ယခုအပတ်တွင် တစ်အိတ်လျှင် ၁၇၆၀၀၀ကျပ်ရှိသဖြင့် တစ်အိတ်လျှင် ၁၆၀၀၀ကျပ်ဈေးနှုန်းကျဆင်းလာပါသည်။

        ပဲတီစိမ်းမှာ စက်တင်ဘာလက (ပိဿာ ၃၀ ဝင်အိတ်) တစ်အိတ်လျှင် ၁၁၅၀၀၀ကျပ်ရှိခဲ့ရာမှ ယခုအပတ်တွင် တစ်အိတ်လျှင် ၁၃၅၀၀၀ကျပ်ရှိသဖြင့် တစ်အိတ်လျှင် ၂၀၀၀၀ကျပ်ဈေးတက်လာပါသည်။ ပဲလွန်းဖြူမှာ ယခင်နှစ်ထွက် လက်ကျန်မရှိ၍ အရောင်းအဝယ်မဖြစ်ကြောင်း ဖြူးမြို့ ရွှေခြင်္သေ့မင်းပွဲရုံမှသိရပါသည်။

DOCA(ပဲခူး)

         ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ်တွင် ဒေသခံတောင်သူလယ်သမားကြီးများသည် စိုက်ပျိုးမြေများကောင်းမွန်မှုကြောင့် နွေစပါး၊ မိုးစပါးနှင့် ဆောင်းသီးနှံများဖြစ်သော မတ်ပဲ၊ ပဲတီစိမ်း၊ မြေပဲ၊ နေကြာ စသည့်သီးနှံများကို စီးပွားဖြစ်စိုက်ပျိုးလုပ်ကိုင်လျက်ရှိကြပါသည်။

         ယခုနှစ် စက်တင်ဘာလတွင် ရာဂီမုန်တိုင်းကြောင့် တောင်ငူမြို့နယ်၊ စစ်တောင်းမြစ်ဘေးရှိ ကျေးရွာတချို့တွင် ရေကြီးရေလျှံမှုဖြစ်ပွား၍ စပါးခင်းများပျက်စီးမှုရှိသော်လည်း သီးနှံမှ ဝင်ငွေတိုးပွားစေရန်နှင့် စားနပ်ရိက္ခာဖူလုံစေရေးအတွက် မတ်ပဲကို အားထားစိုက်ပျိုးကြပါသည်။

     မတ်ပဲစိုက်ပျိုးသည့်ကျေးရွာများတွင် မြို့နယ်စိုက်ပျိုးရေးဦးစီးဌာန၏ ကြီးကြပ်မှုဖြင့် တစ်ဧကပန်းတိုင်အထွက်နှုန်းရရှိရေးအတွက် မျိုးကောင်းမျိုးသန့်ရရှိရေး၊ စနစ်တကျစိုက်ပျိုးရေးနှင့် ပိုးသတ်ဆေးနှင့် သွင်းအားစုများ စနစ်တကျနှင့် အချိုးကျမှန်ကန်စွာသုံးစွဲနိုင်ရေးများကို ကျေးရွာများတွင် သင်တန်းပေးခြင်း၊ မြို့နယ်စိုက်ပျိုးရေးဦးစီးဌာန၏ ကွင်းတာဝန်ခံများက ကြီးကြပ်ပေးခြင်းများ ဆောင်ရွက်ပေးလျက်ရှိပါသည်။

       မတ်ပဲစိုက်ပျိုးရိတ်သိမ်းပြီး နွေစပါးများပြန်လည်စိုက်ပျိုးနိုင်ရန်အတွက် အထွက်နှုန်းကောင်း၊ သက်တမ်းတို မတ်ပဲမျိုးများကို စိုက်ပျိုးလာကြပါသည်။ မြန်မာနိုင်ငံဆီထွက်သီးနှံနှင့် ပဲမျိုးစုံအသင်းမှ ရာဂီမုန်တိုင်းကြောင့်ပျက်စီးသွားသည့် တောင်သူများအတွက် မတ်ပဲဧက ၁၀၀၊ ပဲတီစိမ်းဧက ၃၀၀ တို့အတွက် မျိုးစေ့များ အခမဲ့လှူဒါန်းထောက်ပံ့ပေးထားပါသည်။

          အထွက်ကောင်း TBL 9 မတ်ပဲ ၉၈၅၀ဧက၊ ရေဆင်း ၅ မတ်ပဲ ၅၂၅၀ဧက၊ ရေဆင်း ၇ မတ်ပဲ ၅၆၉၁ဧက၊ စုစုပေါင်း ၂၀၇၉၁ဧကစိုက်ပျိုးထားပါသည်။ မတ်ပဲသက်တမ်း ၇၅ရက်မှ ၉၀ရက်သာရှိသဖြင့် နွေစပါးများကိုလည်း အချိန်မီစိုက်ပျိုးနိုင်မည်ဖြစ်ပါသည်။

         တောင်ငူမြို့နယ်အတွင်း ၂၀၂၄-၂၀၂၅ ခုနှစ် နိုင်ငံ့စီးပွားမြှင့်တင်ရေးရန်ပုံငွေမှ ရာဂီမုန်တိုင်းအရှိန်ကြောင့် ပျက်စီးခဲ့သည့် ဆောင်းသီးနှံကိုပြန်လည်စိုက်ပျိုးနိုင်ရန် ကျေးရွာအုပ်စု (၁၃)ခု၊ ဧကပေါင်း (၁၄၀၀၆)ဧကအတွက် တစ်ဧကလျှင် ကျပ်တစ်သိန်းနှုန်း ချေးငွေထုတ်ချေးထားပြီးဖြစ်ရာ မတ်ပဲအတွက် လိုအပ်သည့်သွင်းအားစုများ၊ ပိုးသတ်ဆေး၊ မှိုသတ်ဆေး၊ အပွင့်အားဆေးများကို ဝယ်ယူစုဆောင်းထားရှိကြပြီးဖြစ်ပါသည်။

         ယခင်နှစ် အထွက်နှုန်းမှာ ၁၉.၇၈ တင်းဖြစ်ပါသည်။ မတ်ပဲစိုက်ဧကများအားလုံး အပင်ပေါက်ကောင်းမွန်လျက်ရှိပါသည်။ ပန်းတိုင်အထွက်နှုန်းကျော်လွန်ထွက်ရှိပါက တောင်သူဦးကြီးများ ဝင်ငွေတိုးတော့မည်ဖြစ်ပါသည်။

          ယခင်နှစ် မတ်ပဲဈေးနှုန်းမှာ ပိဿာ(၃၀)ပါ အိတ်တစ်အိတ်လျှင် ၁၄၅၀၀၀ကျပ်ဖြစ်ပြီး ယခုနှစ်ပေါက်ဈေးမှာ ၁၇၅၀၀၀ကျပ်ဖြစ်ပါသည်။ တောင်သူလယ်သမားတစ်ဦးချင်း မတ်ပဲပေါ်ချိန်တွင် ပန်းတိုင်အထွက်နှုန်းကျော်လွန်ထွက်ရှိ၍ ဈေးကောင်းရောင်းရပါက ဝင်ငွေတိုးကာ တိုင်းပြည်၏ GDP တိုးတက်လာမည်ဖြစ်ပါကြောင်း ရေးသားတင်ပြလိုက်ရပါသည်။

DOCA(ပဲခူး)

         တောင်ငူခရိုင်၊ ဖြူးမြို့တွင် တစ်နိုင်တစ်ပိုင် ငွေနှင်းမှိုစိုက်ပျိုးရေးမှ မိသားစုအပိုဝင်ငွေရရှိလျက်ရှိပါသည်။ တောင်ငူမြို့မှ မှိုပျိုးထုပ်များကိုမှာယူပြီး အလျား ၁၀ပေ၊ အမြင့် (၂)ပေခန့်ရှိသည့် စင်ထိုး၍ စိုက်ပျိုးရပါသည်။ အမိုး၊ အကာလုံခြုံအောင်ပြုလုပ်ပေးရပြီး လေဝင်လေထွက် သင့်တင့်အောင်ပြုလုပ်ထားရပါသည်။

          မှိုပျိုးထုပ်စတင်ရောက်ရှိပြီးချိန်မှစ၍ စင်ပေါ်တွင် စနစ်တကျစီထားပြီး  တစ်နေ့(၃)ကြိမ်ရေလောင်းပေးရပါသည်။ လေးငါးရက်ခန့်အကြာတွင် မှိုအိတ်များမှ အဖြူရောင်မှိုပွင့်ကလေးများ တစ်အိတ်လုံးနီးပါးပွင့်လာသည့်အခါတွင် အိတ်အဝကိုဖွင့်ပေးရပါသည်။ အိတ်ဝဖွင့်ပြီး တစ်ပတ်၊ ၁၀ရက်ကြာလျှင် မှိုပွင့်များကိုခူးဆွတ်နိုင်ပြီဖြစ်ပါသည်။

          မှိုတစ်ကြိမ်စိုက်ပျိုးလျှင် လေးငါးကြိမ်အထိခူးဆွတ်နိုင်ပါသည်။ မှိုပျိုးထုပ် ၇၅ထုပ်စတင်စိုက်ပျိုးရာ မှို ၆ပိဿာ ၇၅ကျပ်သားခန့်ထွက်ရှိပါသည်။ မှိုပျိုးထုပ်တစ်ထုပ်လျှင် ၁၂၀၀ကျပ်ဖြင့်ဝယ်ယူပြီး ထွက်ရှိလာသောမှိုများကို တစ်ဆယ်ကျပ်သားလျှင် ၁၂၀၀ကျပ်ဖြင့် ပြန်လည်ရောင်းချပါသည်။ ငွေနှင်းမှိုစိုက်ပျိုးခြင်းလုပ်ငန်းသည် မီးဖိုချောင်စရိတ်အတွက် တွက်ချေကိုက်သောလုပ်ငန်းဖြစ်သောကြောင့် ရေရှည်စိုက်ပျိုးသင့်သည့်လုပ်ငန်းဖြစ်ကြောင်း တစ်နိုင်တစ်ပိုင်စိုက်ပျိုးသူ ဒေါ်သန်းသန်းအေး၏ ပြောပြချက်အရသိရပါသည်။

DOCA(ပဲခူး)

     ပဲခူးတိုင်းဒေသကြီး၊ ညောင်လေးပင်မြို့နယ်ရှိ ဒေသထွက်ကုန် ရှောက်သီးမှထုတ်လုပ်သည့် ရှောက်ပျားရည်နှင့် ရှောက်သီးဆေးပြားသည် ကျန်းမာရေးနှင့်ညီညွတ်ပြီး ဒေသထွက် အိမ်ပြန် လက်ဆောင်အနေဖြင့် ဈေးကွက်အတွင်း တဖြည်းဖြည်းဝင်ရောက်လျက်ရှိကြောင်းသိရသည်။ ရှောက်ပျားရည်ထုတ်လုပ်ရန် ကုန်ကြမ်းဖြစ်သော ရှောက်သီးကို နီးစပ်ရာမြို့ဖြစ်သော ရွှေကျင်၊ ရှောက်ခြံများမှ အဓိကဝယ်ယူပြီး မွန်ပြည်နယ် ကျိုက်ထို၊ ဘီလင်းမြို့တို့ရှိ ရှောက်ခြံများမှလည်း ကုန်ကြမ်းလိုအပ်လျှင် လိုအပ်သလောက်ဝယ်ယူရပြီး ရှောက်သီးတစ်လုံးလျှင် (၈၀၀) ကျပ်မှ (၁၀၀၀) ကျပ်ထိ ဝယ်ယူရကြောင်းသိရှိရသည်။

        ရှောက်ပျားရည်ထုတ်လုပ်ရာတွင် ရှေးဦးစွာ ကုန်ကြမ်းဖြစ်သော ရှောက်သီးကို ထက်ခြမ်းခွဲပြီး စက်ဖြင့် ရှောက်ရည်ညှစ်ထုတ်သန့်စင်ရပြီး ရှောက်ပျားရည်ပြုလုပ်ရန်အတွက် သကြား၊ ပျားရည်၊ ရှောက်ချဉ်ရည်တို့ဖြင့် အချိုးအစားညီမျှစွာရောစပ်ပြီး အပူချိန် ( 90°C )အတွင်းကျိုချက်၍ ထုတ်လုပ်ရကြောင်းသိရှိရသည်။ ရှောက်ပျားရည်တစ်ပုလင်းအတွက် ရှောက်သီး (အနု၊ အရင့်၊ အကြီး၊ အသေး) ပေါ်မူတည်၍ ရှောက်သီး (၇လုံးမှ ၁၀လုံး)ခန့်အသုံးပြုရကြောင်းသိရှိရသည်။ ရှောက်ရည်ညှစ်ပြီး သန့်စင်ရာ၌ ကျန်ရှိသောရှောက်သီးဖတ်များအား ရှောက်သီးဆေးပြားထုတ်လုပ်ရန် အသုံးပြုပြီး  ပုံသဏ္ဌာန်အမျိုးမျိုးအနေဖြင့် ပျားရည်နှင့်နှပ်ထားသော (ရှောက်သီးဆေးပြားဘူး၊ ရှောက်ချိုမွှေး၊ ရှောက်ချိုပေါင်း၊ ရှောက်သီးဆေးပြားအမျှင်) စသည်ဖြင့် ထုတ်လုပ်လျက်ရှိပြီး လက်ရှိတွင် လုပ်သားအရေအတွက် (၃၀)ဦးခန့်ဖြင့် လုပ်ငန်းလုပ်ကိုင်လျက်ရှိကြောင်းသိရှိရပါသည်။ ထုတ်လုပ်မှုပမာဏအားဖြင့် တစ်နှစ်လျှင် ‌ရှောက်ချဉ်ရည်ပုလင်း နှစ်သိန်းခန့်၊ ‌ရှောက်ပျားရည်ပုလင်း ၅၀၀၀ခန့်၊ ‌‌‌ရှောက်သီးဆေးပြား တစ်နှစ်လျှင် ပိဿာချိန် (၇၀၀၀)ခန့်ထုတ်လုပ်ရောင်းချလျက်ရှိကြောင်းသိရှိရပါသည်။ ရှောက်ပျားရည်တစ်ပုလင်းလျှင် ၅၄၀၀ကျပ်ဖြင့် ရန်ကုန်၊ ပဲခူး၊ မန္တလေး၊ နေပြည်တော် (ပျဉ်းမနား)အပြင် မြန်မာနိုင်ငံအတွင်းရှိ နေရာအနှံ့အပြားသို့  တင်ပို့ရောင်းချလျက်ရှိပြီး လူကြိုက်များကြောင်းလည်းသိရှိရသည်။

       ထိုကဲ့သို့ ဒေသထွက်ကုန်ရှောက်သီးအား နည်းအမျိုးမျိုးဖြင့် လေလွင့်မှုနည်းပါးအောင်  ထုတ်လုပ်ရောင်းချနိုင်ခြင်းအားဖြင့်  အကျိုးအမြတ်အနေဖြင့်လည်း အတော်အသင့်ကောင်းမွန်သည့်အပြင် ဒေသခံလုပ်သားများအနေဖြင့်လည်း အလုပ်အကိုင်ရရှိသောကြောင့် စီးပွားဖြစ်လုပ်ငန်းတစ်ခုအဖြစ် ရပ်တည်လျက်ရှိကြောင်းသိရှိရပါသည်။

DOCA(ပဲခူး)