ပြည်တွင်းကုန်သွယ်မှုသတင်း

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်၌ ရာသီပေါ်သီးနှံများကို မိသားစု တစ်ပိုင်တစ်နိုင်စိုက်ပျိုးလျက်ရှိရာ စားသုံးသူရေးရာဦးစီးဌာနမှ မြို့နယ်တာဝန်ခံဦးမျိုးဝင်းသန်းနှင့် ဝန်ထမ်း(၁)ဦးတို့သည် ကန့်ဘလူမြို့နယ်၊ အမှတ်(၃)ရပ်ကွက်ရှိ ဦးလှအောင်၏ ငရုတ်စိုက်ခင်းသို့ ကွင်းဆင်းလေ့လာခဲ့ကြောင်း သိရသည်။

          လုပ်ငန်းရှင်၏ ပြောပြချက်အရ ငရုတ်စိုက်ပျိုးနိုင်ရန်အတွက် ဦးစွာငရုတ်ပျိုးပင်များကို မိမိကိုယ်တိုင် အိမ်မှာပျိုးထောင်းကြောင်း၊ အရန်သင့်စိုက်ပျိုးနိုင်ရန်အတွက် မြေဆွေးထည့်ကာ မြေပြုခြင်းကို ကြိုတင်ဆောင်ရွက်ထားရကြောင်း၊ စိုက်ပျိုးရေးလုပ်ငန်းတွင် မရှိမဖြစ်အရေးကြီးသည့် ရေကိုအဝီစိတွင်းမှ အသုံးပြုကြောင်း၊ ယခုစိုက်ပျိုးထားသည့် ငရုတ်မျိုးမှာ အောက်ဆွဲငရုတ်မျိုးနှင့် မိုးထောင်ငရုတ် မျိုးတို့ဖြစ်ကြောင်း၊ ငရုတ်သီးသည် စတင်စိုက်ပျိုးပြီး ရက်ပေါင်း(၉၀)ခန့်အကြာ တွင်အသီးများကို စတင်ခူးဆွတ်ရကြောင်း၊ ဩဂုတ်လ တတိယပတ်အတွင်း ငရုတ်သီးစိမ်း လက်က္ကား(၁)ပိဿာလျှင် (၃၅၀၀မှ ၃၈၀၀)ကျပ်နှင့် လက်လီ(၁)ပိဿာလျှင် (၄၀၀၀)ကျပ်နှင့် (၅၀) ကျပ်သားလျှင် (၂၀၀၀)ကျပ်တို့ဖြင့် ရောင်းချရသည့်အတွက် စိုက်ပျိုးသူများအနေဖြင့် ထိုက်သင့် သည့်အကျိုးအမြတ်များရရှိကာ အဆင်ပြေလျက်ရှိကြောင်း သိရသည်။

DOCA (စစ်ကိုင်း)  

        စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့မဈေးရှိ ကုန်စုံဆိုင်များတွင် လူသုံးကုန် ပစ္စည်းများ၊ စားသောက်ကုန်ပစ္စည်းများနှင့် မီးဖိုချောင်သုံးပစ္စည်းဖြစ်သည့် ပဲငပိအစိုနှင့် ပဲငပိအခြောက် များကို ရွှေဘိုမြို့နှင့် ရေဦးမြို့မှ ဝယ်ယူရောင်းချလျက်ရှိကြောင်း သိရှိရပါသည်။ ၂၀၂၅ ခုနှစ်၊ ဩဂုတ်လ တတိယပတ်အတွင်း ကန့်ဘလူ“မြို့မဈေး”ရှိ ကုန်စုံဆိုင်များတွင် ရောင်းချလျှက်ရှိသော ပဲငပိအစိုဈေးနှုန်း အနေဖြင့် ပဲငပိအစိုလက္ကား တစ်ပိဿာလျှင် (၇၅၀၀)ကျပ်၊  လက်လီတစ်ပိဿာလျှင် (၈၀၀၀)ကျပ်၊ ရေဦးပဲငပိခြောက် (အချို)တစ်ပိဿာလျှင် (၂၀၀၀၀)ကျပ်၊ (အငံ)တစ်ပိဿာလျှင် (၁၅၀၀၀)ကျပ်နှင့် (၁၀) ကျပ်သားလျှင် (၁၆၀၀)ကျပ်တို့ဖြင့် ရောင်းချလျက်ရှိကြောင်း၊ ယခုချိန်ခါသည် လုပ်ငန်းခွင်ရာသီဖြစ်သော ကြောင့် ပဲငပိများအရောင်းသွက်လျက်ရှိကြောင်း သိရှိရသည်။

DOCA (စစ်ကိုင်း)

  တနင်္သာရီတိုင်းဒေသကြီး၊ ထားဝယ်မြို့အတွင်းရှိ ကျေးရွာများနှင့် မြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို လုပ်ကိုင်စားသောက်ကြရာမှ စားဖိုဆောင်သီးနှံဖြစ်သည့် ခရမ်းချဉ်သီး ကိုလည်း တစ်နိုင်တစ်ပိုင်စိုက်ပျိုးလျက်ရှိပြီး ထားဝယ်မြို့မစျေးကြီးများနှင့် ကမ်းနားပျံကျစျေးများ တွင် အရောင်းအဝယ်ကောင်းလျက်ရှိပြီး တစ်နိုင်တစ်ပိုင်ရောင်းချလျက်ရှိကြောင်း သိရှိရပါသည်။

    ထားဝယ်မြို့ စည်ပင်သာယာစျေးကြီးများနှင့် ကမ်းနားပျံကျစျေးများတွင် စျေးကွက်တွင် ခရမ်းချဉ်သီးစျေးနှုန်းများမှာ စျေးကောင်းရရှိကာ တစ်ပိဿာလျှင် (၃၀၀၀) ကျပ်ခန့်ရှိပြီး အရင်လနှင့် နှိုင်းယှဥ်ပါက(၅၀၀)ကျပ်ခန့်မြင့်တက်လျက်ရှိကြောင်း သိရှိရပါသည်။

DOCA(တနင်္သာရီ)

                 မန္တလေးတိုင်းဒေသကြီး၊ ကျောက်ဆည်ခရိုင်သည် အညာဒေသ လယ်တွင်းကိုးခရိုင်တွင် ခရိုင် တစ်ခုအပါအဝင်ဖြစ်ပြီး စိုက်ပျိုးရေးလုပ်ငန်းကိုအခြေခံ၍ စပါး၊ ပဲမျိုးစုံ၊ ဆီထွက်သီးနှံမျိုးစုံ၊ ငရုတ်၊ သရက်နှင့်ငှက်ပျောစသည့် သီးနှံများကိုရာသီအလိုက် စိုက်ပျိုးလျက်ရှိရာ ငှက်ပျောသီးနှံကို တစ်နိုင်တစ်ပိုင်စိုက်ပျိုးရာမှ စီးပွားဖြစ်စိုက်ပျိုးလာကြပါသည်။ ငှက်ပျောသီးကို ရာသီမရွေးစိုက်ပျိုးနိုင်ပြီး တစ်ဧကလျှင် အပင်ရေ ၈၀၀ ခန့် ဝင်ဆံ့စိုက်ပျိုးရကြောင်း၊ ပင်ခြားတန်းခြား ၈ ပေခြား စိုက်ပျိုးကာ စိုက်ပျိုးပြီး (၉-၁၀)လခန့်အကြာတွင် ငှက်ပျောဖူးများ စတင်ထွက်ရှိ၍ ငှက်ပျောဖူးထွက်ပြီး(၄) လခန့်အကြာတွင် ရောင်းတန်းဝင် ငှက်ပျောခိုင်များ ခုတ်ယူရရှိလာကြောင်း၊ ကျောက်ဆည်ဒေသ၌ ဖီးကြမ်းငှက်ပျောမျိုးများကို အဓိကထား စိုက်ပျိုးကြပြီး ပျိုးပင်၊ သွင်းအားစု၊ လုပ်သားခအပါအဝင် တစ်ဧကလျှင် စုစုပေါင်း ငွေကျပ် (၂၀ )သိန်းခန့် ကုန်ကျကြောင်း၊ တစ်ဧကလျှင် ငှက်ပျောခိုင် ၈၀၀ ခန့်၊ လှည်းအစီးအရေအတွက်အားဖြင့်(၂၀)စီးထွက်ရှိကြောင်း၊ အခိုင်(၄၀)ပါလှည်းတစ်စီးလျှင် (၅၀၀၀၀၀)ကျပ် အရောင်းအဝယ်ဖြစ်နေကြောင်း၊ စျေးကွက်အနေဖြင့် ငှက်ပျောပွဲစားများမှ ခြံများသို့လာရောက်ဝယ်ယူ၍ ကျောက်ဆည်မြို့ဒေသတွင်း၊ ရွှေသိမ်တော်ဘုရားရှိ ကန်တော့ပွဲရောင်းချသည့်ဆိုင်များနှင့်ရန်ကုန်၊ မန္တလေး၊ ပဲခူးမြို့များသို့ တင်ပို့ရောင်းချကြောင်း၊ ငှက်ပျောခိုင်၊ ငှက်ပျောအရွက်၊ ငှက်ပျောအသားတက်(ပင်ပေါက်)များပါ ရောင်းချရသဖြင့် တစ်ပင်လုံး အသုံးဝင်သော ဖီးကြမ်းငှက်ပျောများ စိုက်ပျိုးရာတွင် အကျိုးအမြတ်များရရှိပြီး တွက်ခြေကိုက်သည့်အတွက် စီးပွားဖြစ် စိုက်ပျိုးလာကြကြောင်း သိရှိရပါသည်။

DOCA(မန္တလေး)

          မန္တလေးတိုင်းဒေသကြီး၊ ပြင်ဦးလွင်ခရိုင်သည် ရာသီဥတုအေးမြပြီး မြေဆီလွှာကောင်းမွန်သောကြောင့် နှစ်ရှည်သီးနှံအပြင် ဟင်းသီးဟင်းရွက်သစ်သီးဝလံများစိုက်ပျိုးပြီး ကျေးလက်နေ၊ မြို့နေအများစုမှာ မိသားစုဝင်ငွေအပြင် အပိုဝင်ငွေရရှိပြီး အလုပ်အကိုင်အဆင်ပြေလျက်ရှိပါသည်။ ဆလပ်ရွက်ပင်ကိုလည်း မိမိခြံဝင်းအတွင်း တစ်ပိုင်တစ်နိုင်မှ စီးပွားဖြစ်တိုးချဲ့စိုက်ပျိုးလျက်ရှိပါသည်။ ၄င်းသီးနှံများမှဆလပ်ရွက်ကို မြန်မာနိုင်ငံဒေသမရွေးစိုက်ပျိုးနိုင်ပြီး အေးမြသောရာသီဥတုကို ကြိုက်သောကြောင့်တောင်ပေါ်ဒေသများတွင် တစ်နှစ်ပတ်လုံးစိုက်ပျိုးပါသည်။ ဂေါ်ဖီကဲ့သို့အထုပ်မျိုးနှင့် ရွက်ဖြန့်မျိုးဟူ၍ နှစ်မျိုးစိုက်ပျိုးကြပါသည်။ အရောင်အားဖြင့် အစိမ်းရောင်၊ အနီရောင်ဟူ၍ နှစ်မျိုးရှိသည်။ မြေအမျိုးမျိုးတွင်စိုက်ပျိုးနိုင်ပြီး အကောင်းဆုံးမြေမှာ သဲနုန်းမြေဖြစ်သည်။ ပူအိုက်သောရာသီတွင် စိုက်ပျိုးပါက ပွင့်တံအထွက်စောပြီး အပင်မဖြစ်ထွန်းပဲ အရသာမှာခါးသက်၍ အရွက်ခြောက်ပြီး အပင်ပုပ်ခြင်းတို့ ဖြစ်စေသည်။ ဆလပ်ကိုပျိုးထောင်စိုက်ပျိုးရသလို တိုက်ရိုက်လည်းစိုက်ပျိုးနိုင်သည်။ ဩဂုတ်လနှင့် စက်တင်ဘာလများတွင် အစေ့တိုက်ရိုက်စိုက်ပျိုးပြီး နိုဝင်ဘာလတွင်ပျိုးထောင် စိုက်ပျိုးကြသည်။ ညီညာသောဘောင်များပြုလုပ်ပြီး (၁၆-၁၈)လက်မခြားပြီး စိုက်တန်းကို လက်ဖြင့်အလျားလိုက် ခပ်တိမ်တိမ်ဆွဲပေးပြီး စိုက်ကြောင်းထဲသို့ မျိုးစေ့ကိုချပြီး စိုက်ပျိုးနိုင်ပါသည်။ တစ်ပင်နှင့်တစ်ပင် (၁-၁.၅)ပေခြား၍စိုက်ပျိုးပြီး တစ်ဧကလျှင်မျိုးစေ့ (၁၀၀-၁၅၀)ဂရမ် လိုအပ်ပါသည်။ စိုက်ပျိုးပြီးတစ်လအကြာ ဆလပ်ကိုစတင်ခူးယူစားသောက်၍ရပါကြောင်း၊ ဆလပ်ရွက်အထုပ်မျိုးကို ရောင်းချရန်အတွက် အရွယ်ရောက်ပြီးအထုပ်တင်းလာချိန်တွင် ခူးဆွတ်နိုင်ပါသည်။ မြန်မာနိုင်ငံတွင် ဆလပ်ရွက်ကို အတို့အမြုပ်လုပ်စားခြင်း၊ အသားကင်နှင့်တွဲစားခြင်း၊ သုပ်စားခြင်းအမျိုးမျိုး ကြိုက်နှစ်သက်သလိုလုပ်စားနိုင်ပါသည်။ ဆလပ်ရွက်တွင်ဗီတာမင်အေ၊ ဗီတာမင်စီပါဝင်သောကြောင့်၊ အာရုံကြောစနစ်ကောင်းမွန်ခြင်း၊ မျက်လုံးအားကောင်းစေပြီး ခန္ဓာကိုယ်အဆိပ်အတောက်တွေလျောချပြီး၊ ကြွက်သားယိုယွင်းပျက်စီးမှုကိုလည်းကာကွယ်ပေးပါသည်။ လူသားအကျိုးပြုဓါတ် များစွာပါဝင်ပြီး ဝယ်ယူရန်လွယ်ကူသော ဆလပ်ရွက်ကိုစားသုံးပေးသင့်ပါကြောင်း ယခုဆလပ်ရွက် တစ်ထုပ်လျှင်(၅၀၀)ကျပ်ဖြင့်ရောင်းချလျက်ရှိကြောင်း သိရှိရပါသည်။

DOCA(မန္တလေး)