ပြည်တွင်းကုန်သွယ်မှုသတင်း

                 ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်၊ တောင်ခွေးရဲကျေးရွာမှ တောင်သူဦးဇော်လင်း၏လယ်ယာမြေထဲတွင် ပန်းဂေါ်ဖီများကိုစိုက်ပျိုးရောင်းချခြင်းဖြင့် မိသားစုစားဝတ်နေရေးအတွက် ဝင်ငွေများတိုးပြီး စီးပွားရေးအဆင်ပြေလျက်ရှိကြောင်း သိရပါသည်။

                ဟင်းသီးဟင်းရွက်အုပ်စုဝင်ဖြစ်သော ပန်းဂေါ်ဖီသည် စားသုံးသူများက ရာသီစာအဖြစ်စားသုံးမှုများကြပါသည်။ ပန်းဂေါ်ဖီများကို ပြည်မြို့၊ ဈေးကြီးအပါအဝင် အခြားဈေးများတွင်လည်း အောက်တိုဘာလနှင့် နိုဝင်ဘာလဆန်းပိုင်းမှစပြီး ရောင်းချလျက်ရှိပါသည်။ ပန်းဂေါ်ဖီသည် အေး၍စိုစွတ်သောရာသီဥတုကို ကြိုက်နှစ်သက်သည်။စိုက်ပျိုးမှုမှာ မျိုးစေ့ကိုပျိုးထောင်ပြီး တစ်ဧကလျှင် အပင်ရေ (၁၂၀၀၀)ခန့်အထိစိုက်ပျိုးနိုင်ကြောင်း သိရှိရပါသည်။ စိုက်ပျိုးကာလမှာ ရက်ပေါင်း (၉၀) ကျော်အကြာတွင် အပွင့်များကို ခူးဆွတ်၍ရနိုင်ပါသည်။

                  ပန်းဂေါ်ဖီပွင့်များရောင်းချရာတွင် ကျေးရွာအတွင်းမှ ဈေးသည်များကလာရောက်ဝယ်ယူကြသလို ပြည်မြို့ပေါ်ရှိ ဈေးများသို့လည်းသွားရောက်ရောင်းချမှုများရှိပါသည်။ ပန်းဂေါ်ဖီပေါ်ဦးပေါ်ဖျားတွင် ဈေးကောင်းရရှိခဲ့သလို ယခုအချိန်တွင် အပွင့်ကြီးတစ်ပွင့်လျှင်(၃၀၀၀-၃၅၀၀)ကျပ်နှင့် အပွင့်သေးတစ်ပွင့်လျင် (၁၈၀၀-၂၀၀၀)ကျပ်အထိ ဈေးရကြောင်းသိရပါသည်။

                   ယခုအချိန်သည် ပန်းဂေါ်ဖီများ စတင်ထွက်ပေါ်ချိန်ဖြစ်သောကြောင့် စိုက်ပျိုးသူတောင်သူများ ဈေးကောင်းရကာ  အရောင်းသွက်ကြောင်း သိရှိရပါသည်။

DOCA(ပဲခူး)

               ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်လျက်ရှိပါသည်။ နိုဝင်ဘာလပထမပတ်တွင် မတ်ပဲတစ်တင်းကို ၁၂၀၀၀၀-၁၂၀၅၀၀ကျပ်ဖြင့် တစ်ရက်ကိုအိတ် (၁၀၀)ခန့်အဝယ်ရှိပါသည်။ နိုဝင်ဘာပထမပတ်တွင် ပဲတီစိမ်းသစ်များအဝင်ရှိပြီး တစ်တင်းကို ၉၀၀၀၀ကျပ်ဖြင့် တစ်ရက်ကိုအိတ် (၃၀၀-၄၀၀)ခန့် အဝယ်ရှိပါသည်။ နိုဝင်ဘာပထမပတ်တွင် ပဲစင်းငုံတစ်တင်းကို ၁၅၂၀၀၀ကျပ်ဖြင့် အရောင်းအဝယ်တစ်ခါတစ်ရံမှဖြစ်လျှင် အိတ် ၁၀၀ခန့်သာရှိပါသည်။ နိုဝင်ဘာလ ပထမပတ်တွင် ကုလားပဲ(HL) တစ်တင်းကို ၁၀၂၀၀၀ကျပ်၊ မြကြေးမှုံတစ်တင်းကို ၁၂၂၀၀၀ကျပ်ဖြင့် မြို့တွင်းခွဲစက်နှင့် ရန်ကုန်အဝယ်တစ်ရက်ကို အိတ်၂၀၀/၃၀၀ခန့်ရှိပါသည်။ နိုဝင်ဘာလပထမပတ်တွင် ပဲကြီး(ရွှေကျွန်း)တစ်တင်းကို ၈၇၀၀၀ကျပ်၊ ပဲကြီး(ကုန်းပဲ)တစ်တင်းကို ၉၂၀၀၀ကျပ်ဖြင့် မြို့တွင်းပဲကြော်သမားများ တစ်ရက်ကိုအိတ် ၂၅၀ခန့် အဝယ်ရှိပါသည်။ နိုဝင်ဘာလပထမပတ်တွင် ဘိုကိတ်ပဲတစ်တင်းကို ၁၀၀၀၀၀ကျပ်ဖြင့် မြို့တွင်းနှင့်ရန်ကုန်အဝယ်တစ်ရက်ကိုအိတ် (၁၀၀-၁၅၀)ခန့်ရှိပါသည်။ ပြည်ကုန်စည်ဒိုင်တွင် ပဲမျိုးစုံအရောင်းအဝယ်ဖြစ်မှုမှာ သွက်လျက်ရှိကြောင်း သိရှိရပါသည်။

DOCA(ပဲခူး)

                   ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် တည်ထားကိုးကွယ်သော တန်ခိုးကြီးရွှေဆံတော်စေတီတော်မြတ်ကြီးအား ဗုဒ္ဓပူဇနိယပွဲတော်ကို (၈.၁၁.၂၀၂၄)ရက်နေ့မှ (၁၇.၁၁.၂၀၂၄) ရက်နေ့အထိ (၁၀)ရက်တိုင်တိုင် စည်ကားသိုက်မြိုက်စွာ ကျင်းပပြုလုပ်သွားမည်ဖြစ်ပါသည်။

                  ထိုသို့ဘုးရာပွဲဈေးတွင် လူသုံးကုန်ပစ္စည်းအမျိုးမျိုး၊ စားသောက်ကုန်ပစ္စည်းအမျိုးမျိုး၊ ကလေးကစားစရာအရုပ်အမျိုးမျိုး တို့အားတည်ခင်းရောင်းချသွားမည်ဖြစ်ပါသည်။ ထိုဘုရားပွဲဈေးအား ဗိုလ်ချုပ်လမ်းတစ်လျှောက် နှင့် ဘုရားကြီးမြောက်စောင်းတန်းလမ်းတစ်လျှောက်တွင် ကျင်းပပြုလုပ်သွားမည်ဖြစ်ပါသည်။ ထိုသို့ တန်ဆောင်တိုင်ဘုရားပွဲဈေးနှင့်အတူ ဗိုလ်ချုပ်မြင်းစီးကျောက်ရုပ်နားရှိ MSMEsအရောင်းစင်တာလည်း ဒေသထုတ်ကုန်စုံလင်စွာဖြင့် နေ့စဉ်ပိတ်ရက်မရှိရောင်းချလျက်ရှိပါသည်။ ထိုဒေသထုတ်ကုန် အရောင်းစင်တာတွင် ပစ္စည်းအမျိုးအမည်ပေါင်း (၂၂၂)မျိုးဖြင့် ရောင်းချမှုရှိပါသည်။ ယခင်နှစ် ပြည်အရောင်းစင်တာအားဖွင့်ကာစတွင် ပစ္စည်းအမျိုးအမည်ပေါင်း (၁၆၁)မျိုးဖြင့်ရောင်းချခဲ့ပြီး ယခုအချိန်တွင် လုပ်ငန်းများဖွံ့ဖြိုးတိုးတက်လာ၍ (၆၁)မျိုးထပ်မံတိုးချဲ့ရောင်းချလာနိုင်ခဲ့ပါသည်။ ထိုသို့ကုန်ပစ္စည်းများထပ်မံတိုးချဲ့၍ ရောင်းချလာနိုင်ခဲ့ခြင်းမှာ ပြည်ခရိုင်ဦးစီးမှူးနှင့် ဝန်ထမ်းများအဖွဲ့က ဈေးကွက်များချိက်ဆတ်ပေးခြင်း၊ ဒေသထုတ်ကုန်များကို ရှာဖွေခြင်းများပြုလုပ် ဆောင်ရွက်ပေးနိုင်ခဲ့ပါသည်။

                    ပဲခူးတိုင်းဒေသကြီးအတွင်းတွင် ဒေသထုတ်ကုန်အရောင်းစင်တာများကို ပဲခူးမြို့တွင်တစ်ဆိုင်၊ ပြည်မြို့တွင်တစ်ဆိုင်၊ နောက်ပိုင်းတောင်ငူမြို့တွင်လည်း ထပ်မံတိုးချဲ့ဖွင့်လှစ်သွားရန် အစိုးရအဖွဲ့မှ စီစဉ်ဆောင်ရွက်လျက်ရှိပါသည်။ ထိုသို့ဒေသထုတ်ကုန်အရောင်းစင်များအား ဖွင့်လှစ်ရခြင်း၏ရည်ရွယ်ချက်မှာ တိုင်းဒေသကြီးအတွင်းရှိ အသေးစား၊ အငယ်စားနှင့် အလတ်စား MSMEs စီးပွားရေးလုပ်ငန်းများဖွံ့ဖြိုးတိုးတက်စေရန်နှင့် ပြည်တွင်းပြည်ပဈေးကွက် ရရှိစေမည်ဖြစ်ပါသည်။ အားသာချက်အနေဖြင့် ဒေသထုတ်ကုန်နှင့် ဒေသထွက်အစားအစာများကို တစ်နေရာတည်းတွင် တစ်စုတစ်စည်းတည်း ဒေသခံပြည်သူများနှင့် ဘုရားဖူးခရီးသွားဧည့်သည်များ အလွယ်တစ်ကူဝယ်ယူသုံးစွဲနိုင်မည်ဖြစ်ပါသည်။

                  ထို့ကြောင့်ဘုရားဖူးလာပြည်သူများနှင့် ဒေသခံပြည်သူများအနေဖြင့် ပြည်အရောင်းစင်တာတွင် ပဲခူးတိုင်းဒေသကြီးအတွင်းရှိ ဒေသထုတ်ကုန်များအား ဘုရားဖူးလာရင်းဝင်ရောက်ကြည့်ရှု ဝယ်ယူသုံးစွဲနိုင်ပါကြောင်း အသိပေးအပ်ပါသည်။

DOCA(ပဲခူး)

    မကွေးတိုင်းဒေသကြီး၊ မကွေးခရိုင်၊ မကွေးမြို့ပေါ်ရှိ ဈေးများတွင် ဒေသတွင်းပန်းများနှင့် မန္တလေးတိုင်းဒေသကြီး၊ ပြင်ဦးလွင်မြို့မှ ပန်းမျိုးစုံတို့ ဝင်ရောက်အရောင်းအဝယ်ဖြစ်လျက်ရှိကြောင်း ပန်းမျိုးစုံ ရောင်းချသူများထံမှ  သိရသည်။

    ၂၀၂၄ ခုနှစ်၊ နိုဝင်ဘာလ (ပထမပတ်)တွင် မကွေးမြို့၌ ဖြစ်ပေါ်နေသော ပန်းဈေးနှုန်းများမှာ နှင်းဆီပန်း(၁၀ပွင့်) တစ်စီးလျှင် ငွေကျပ်(၄၀၀၀-၅၀၀၀)၊ သစ်ခွပန်းခိုင် တစ်စီးလျှင် ငွေကျပ် (၅၀၀၀-၇၀၀၀)၊ သစ္စာပန်း(၅ ပင်) တစ်စီးလျှင် ငွေကျပ် (၃၀၀၀-၃၅၀၀)၊ ဂန္ဓမာပန်း(ပွင့်သေး) တစ်စီးလျှင် ငွေကျပ် (၂၅၀၀-၃၀၀၀)၊ ဂန္ဓမာပန်း(ပွင့်ကြီး)တစ်စီးလျှင် ငွေကျပ် (၅၀၀၀-၆၀၀၀)၊ နှင်းပန်း တစ်စီးလျှင် ငွေကျပ် (၂၀၀၀-၂၅၀၀)၊ ပန်းတိမ်ငိုပန်း တစ်စီးလျှင် ငွေကျပ်(၃၀၀၀-၃၅၀၀)၊ သပြေငုတ် တစ်ပင်လျှင် ငွေကျပ် (၃၀၀၀-၅၀၀၀)၊ သပြေညွန့် တစ်စီးလျှင် ငွေကျပ် (၅၀၀)နှင့် ရေမွှေးပန်း တစ်စီးလျှင် ငွေကျပ် (၁၅၀၀-၂၀၀၀)တို့ဖြင့် အရောင်းအဝယ်ဖြစ်လျက်ရှိကြောင်း၊ ယခင်တစ်ပတ်နှင့် ဈေးနှုန်းနှိုင်းယှဉ်ပါက မြင့်တက်လာကြောင်း၊ မိုးရွာသွန်းမှုများကြောင့် လမ်းပန်းဆက်သွယ်ရေးခက်ခဲပြီး သယ်ယူစရိတ်မြင့်မား၍ ဈေးမြင့်တက်ရခြင်းဖြစ်ကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီးသည် ဆီထွက်သီးနှံနှင့် ပဲမျိုးစုံတို့ကို အဓိကစိုက်ပျိုးထွက်ရှိရာ အပူပိုင်းဒေသတစ်ခုဖြစ်ပြီး အခြားဒေသများမှ ထွက်ရှိသည့် သစ်သီးဝလံများကို ဝယ်ယူစားသုံးရကြောင်း၊ မကွေးမြို့တွင် မွန်ပြည်နယ်ဒေသထွက် မော်လမြိုင်ကျွဲကောသီးများ လှိုင်လှိုင်ဝင်ရောက်ကာ အရောင်းအဝယ်ဖြစ်လျက်ရှိကြောင်း သိရသည်။

     မွန်ပြည်နယ်ဒေသမှ ထွက်ရှိသည့် ကျွဲကောသီးများကို အလုံးအကြီးအသေး ပေါ်မူတည်၍ ကျွဲကောသီး(ပန်းရောင်) တစ်လုံးလျှင် ငွေကျပ်(၃၅၀၀-၅၀၀၀)၊ ကျွဲကောသီး(အဝါရောင်) တစ်လုံးလျှင် ငွေကျပ်(၃၀၀၀-၄၀၀၀) တို့ဖြင့် ရောင်းချကြောင်း၊ လမ်းပန်းဆက်သွယ်ရေးအခက်အခဲများကြောင့် ယခင်နှစ်ကထက် ဈေးနှုန်းပိုသော်လည်း ကျွဲကောသီးများ၏ အရည်အသွေး ကောင်းမွန်မှုကြောင့် ဝယ်ယူသူများ အကြိုက်တွေ့၍ ရောင်းအားကောင်းလျက်ရှိကြောင်း မကွေးမြို့ပေါ်ရှိ သစ်သီးမျိုးစုံ ရောင်းချသည့်ဆိုင်များမှ သိရသည်။

DOCA(မကွေး)