ပြည်တွင်းကုန်သွယ်မှုသတင်း

               ရန်ကုန်တိုင်းဒေသကြီးသို့ ပြည်နယ်နှင့် တိုင်းဒေသကြီးအသီးသီးမှ ဝင်ရောက်လာသည့် ကြက်သွန်နီများသည် အနောက်ပိုင်းခရိုင်၊ စားသုံးသူရေးရာဦးစီးဌာန ကွပ်ကဲမှုအောက်ရှိ ဘုရင့်နောင်ကုန်စည်ဒိုင်သို့  နေ့စဉ်မော်တော်ယာဉ်များဖြင့် ဝင်ရောက်လျက်ရှိပါသည်။ ပွဲရုံများ၏  ကြက်သွန်နီလက်ကျန်အခြေအနေများအား  အမှန်ကန်ဆုံးသိရှိနိုင်ရန်အတွက် ဘုရင့်နောင်ပွဲရုံဝင်းအတွင်းရှိ  ကြက်သွန်နီပွဲရုံ (၄၀) အနက် Random စနစ်ဖြင့် ပွဲရုံ (၁၀) ရုံအား မေးမြန်းချက်များအရလည်းကောင်း၊ ဘုရင့်နောင်ကုန်စည်ဒိုင်သို့ ကြက်သွန်နီ နေ့စဉ်ဝင်ရောက်မှုစာရင်းများအရလည်းကောင်း၊ ကြက်သွန်နီလက်ကျန်အခြေအနေအား နေ့စဉ်စုံစမ်းလျက်ရှိပါသည်။ နိုဝင်ဘာလ (၄) ရက်မှ နိုဝင်ဘာလ (၁၀) ရက်နေ့အထိ ဘုရင့်နောင်ကုန်စည်ဒိုင်သို့ ကြက်သွန်နီ ဝင်ရောက်ရာဒေသများဖြစ်သည့် ဆိပ်ဖြူ၊ မုံရွာ၊ မြင်းခြံ(ကံဆင့်) ဒေသတို့မှ ကြက်သွန်နီ (၇၂၀၀၀၀) ပိဿာဝင်ရောက်ခဲ့ပြီး (၆၀) ရာခိုင်နှုန်းခန့် ပြန်လည်စီးထွက်မှုရှိကြောင်းသိရှိရပါသည်။ ထို့ကြောင့် ကြက်သွန်နီလက်ကျန်မှာ (၂၈၈၀၀၀) ကျန်ရှိကြောင်း ကုန်စည်ဒိုင်သတင်းအရ သိရှိရသည်။ ဆိပ်ဖြူ ကြက်သွန်နီ (အသစ်) အချော တစ်ပိဿာ ကျပ် ၃၀၀၀၊ အသန့်မှာ တစ်ပိဿာ ကျပ် ၄၀၀၀ ၊ အကြီးမှာ ကျပ် ၄၅၀၀၊ ရှယ်မှာ ကျပ် ၄၈၀၀၊  မုံရွာ ကြက်သွန်နီ (အသစ်) အချော တစ်ပိဿာ ကျပ် ၃၀၀၀၊ အသန့်မှာ တစ်ပိဿာ ကျပ် ၄၀၀၀ ၊ အကြီးမှာ ကျပ် ၄၅၀၀၊ ရှယ်မှာ ကျပ် ၄၈၀၀၊ မြင်းခြံ(ကံဆင့်)ကြက်သွန်နီ(အသစ်) အချောတစ်ပိဿာ ကျပ် ၃၀၀၀၊ အသန့်မှာ တစ်ပိဿာ ကျပ် ၄၁၀၀ ၊ အကြီးမှာ ကျပ် ၄၃၀၀၊ ရှယ်မှာ ကျပ် ၄၇၀၀  ဈေးတို့အသီးသီးရှိကြောင်း စုံစမ်းသိရှိရပါသည်။

                 ယခင်အပတ်နှင့် ယခုအပတ် ကြက်သွန်နီဈေးနှုန်းများနှိုင်းယှဉ်ရာတွင် ဈေးနှုန်းများမှာ ယခင်အပတ်ထက် အနည်းငယ်မြှင့်တက်မှုများရှိကြောင်း သိရှိရပါသည်။

DOCA(ရန်ကုန်)

               ၁၁.၁၁.၂၀၂၄ ရက်နေ့ ဘုရင့်နောင်ကုန်စည်ဒိုင်တွင် ဖြစ်ပေါ်ခဲ့သော ကြက်သွန်ဖြူတစ်ပိဿာဈေးနှုန်းများမှာ အောင်ပန်းထူး-၂ ကျပ် ၁၃၀၀၀၊  အောင်ပန်းထူး-၃ ကျပ် ၁၄၀၀၀၊ အောင်ပန်းထူး-၄ ကျပ် ၁၅၀၀၀၊ အောင်ပန်းထူး-၅ ကျပ် ၁၆၀၀၀၊ ကြက်သွန်နီ ဈေးနှုန်းများမှာ ဆိပ်ဖြူရှယ် ကျပ် ၄၅၀၀၊ ဆိပ်ဖြူလတ်ကြီး ကျပ် ၄၀၀၀/ ၄၂၀၀၊ ဆိပ်ဖြူလတ်သန့် ကျပ် ၃၇၀၀/ ၃၈၀၀၊ ဆိပ်ဖြူလတ်ချော ကျပ် ၂၆၀၀၊ မြင်းခြံလတ်ကြီး ကျပ် ၄၀၀၀၊ မြင်းခြံလတ်သန့် ကျပ် ၃၅၀၀၊ မြင်းခြံလတ်ချော ကျပ် ၂၅၀၀၊ မြင်းခြံလတ်ကြီး(ကံဆင့်) ကျပ် ၄၆၀၀၊ မြင်းခြံလတ်သန့်(ကံဆင့်) ကျပ် ၄၁၀၀၊  မြင်းခြံလတ်ချော(ကံဆင့်) ကျပ် ၃၀၀၀၊   မုံရွာရှယ် ကျပ် ၄၅၀၀၊  ပခုက္ကူလတ်ကြီး ကျပ် ၄၂၀၀၊ မုံရွာလတ်သန့် ကျပ် ၃၈၀၀၊  မုံရွာလတ်ချော ကျပ် ၂၆၀၀ ဈေးတို့အသီးသီးရှိကြကြောင်း ကုန်စည်ဒိုင်မှစုံစမ်းသိရှိရပါသည်။

DOCA(ရန်ကုန်)

       မန္တလေးတိုင်းဒေသကြီး၊  ကျောက်ဆည်ခရိုင်တွင်းရှိ  တောင်သူများသည် စပါး၊ နှမ်း၊ ပဲ၊ ပြောင်း၊ ငရုတ်   စသည့်သီးနှံမျိုးစုံကိုစိုက်ပျိုးကြသော်လည်း   စားဖိုဆောင်သီးနှံတစ်မျိုးဖြစ်သည့်  ခရမ်းချဉ်သီးကိုလည်း စီးပွားဖြစ်အများအပြားစိုက်ပျိုးကြပါသည်။ အများဆုံးစိုက်ပျိုးသည့် ခရမ်းချဉ်သီးမျိုးများမှာ         (555) မျိုးနှင့်  wonder( 100) မျိုးများကိုစိုက်ပျိုးကြပြီး  ရာသီဥတုနှင့် ရေမြေသဘာဝကိုက်ညီမှုကြောင့် ဒေသနေတောင်သူများသည် ( 555 ) ခရမ်းချဥ်မျိုးကို ပို၍စိုက်ပျိုးကြပါသည်။ ခရမ်းချဉ်စိုက်ပျိုးမည်ဆိုပါက   တစ်ဧကလျှင် မျိုးစေ့   ၆ထုပ်မှ  ၇ထုပ်စိုက်ရကြောင်း၊   မျိုးစေ့တစ်ထုပ်လျှင် (၁၁၀၀၀)ကျပ်ပေးရကြောင်း၊  မျိုးစေ့ကို ပျိုးဘောင်ဖြင့်ပျိုးထောင်ပြီး  ပျိုးပင် ‌(၁)လကျော်အရွယ်တွင် စတင်စိုက်ပျိုးရကြောင်း၊ စိုက်ပျိုးရာတွင် ဝါးဖြင့် တိုင်ထောင်စိုက်ပျိုးရပါသည်။ သို့မှသာ အသီးများဖြိုင်ဖြိုင်သီးပြီး ပင်စည်ခံနိုင်ရည်ရှိမည်ဖြစ်ကြောင်း၊ အများဆုံးစိုက်ပျိုးသောရွာများမှာ ကျောင်းကုန်း၊ ငါးမြွေကုန်း၊ အင်ရောင်ရွာများဖြစ်ကြောင်း၊ စတင်စိုက်ပျိုးပြီး (၂)လခွဲသက်တမ်းတွင် အသီးများစတင်ခူးဆွတ်နိုင်ပြီး (၃-၄)ရက်ခြားတစ်ကြိမ်ခူးဆွတ်ရကြောင်း၊ စတင်ခူးဆွတ်ချိန်တွင် တစ်ဧကလျှင် ပိဿာချိန်(၃၀-၄၀)ခန့်ထွက်ရှိပြီး တစ်ပတ်ထက်တစ်ပတ် အထွက်နှုန်းပိုမိုလာကြောင်း၊ အများဆုံးထွက်ရှိသောအချိန်တွင် (၁)ဧကလျှင် ပိဿာ(၄၀၀-၇၀၀)ခန့်ထွက်ရှိကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊လုပ်သားခအပါအဝင် စုစုပေါင်း (၁၂၀၀၀၀၀)ကျပ်ခန့်ကုန်ကျကြောင်းသိရှိရပါသည်။ သက်တမ်းအနေဖြင့် (၂)လကျော်ခန့်ခူးဆွတ်ရကြောင်း၊ ဈေးနှုန်းဈေးကွက်အနေဖြင့်ဖောက်သည်ဈေး (၁) ပိဿာလျှင် (၄၅၀၀-၅၀၀၀)ကျပ်ဈေးနှုန်းရရှိပြီး လက်လီဈေးနှုန်းအနေဖြင့် (၁) ပိဿာလျှင် (၆၀၀၀)ကျပ်ဈေးနှုန်းများဖြင့် အရောင်းအဝယ်ဖြစ်နေကြောင်း၊ ကုန်စိမ်းသီးနှံဖြစ်သည့်အတွက် စျေးနှုန်းအတက်အကျရှိနိုင်ကြောင်း၊ ထွက်ရှိလာသောခရမ်းချဉ်သီးများကို ဖောက်သည်များက စိုက်ခင်းများအထိလာရောက်ဝယ်ယူကြသည်များလည်းရှိပြီး မန္တလေးမြို့ရှိ ကုန်စိမ်းဒိုင်များသို့လည်းသွားရောက်ရောင်းချကြ‌ကြောင်း၊ တစ်ဧကအကျိုးအမြတ်အနေဖြင့် (၂၃၀၀၀၀၀-၂၄၀၀၀၀၀)ကျပ်ရရှိသောကြောင့် တွက်ချေကိုက်သည့်သီးနှံဖြစ်ပါကြောင်း တောင်သူတစ်ဦး၏ပြောကြားချက်အရသိရှိရပါသည်။

DOCA(မန္တလေး)

        ကျောက်ဆည်ခရိုင်သည်  စိုက်ပျိုးရေးဒေသဖြစ်သောကြောင့်  သီးနှံမျိုးစုံစိုက်ပျိုးဖြစ်ထွန်းလျက်ရှိပါသည်။ ရာသီအလိုက် သီးနှံမျိုးစုံစိုက်ပျိုးသည့်အနက် ဝါသီးနှံကိုလည်း တစ်ခရိုင်လုံးစိုက် ပျိုးကြပါသည်။ ၂၀၂၄-၂၀၂၅ ဘဏ္ဍာနှစ်တွင် မိုးနှောင်းချည်မျှင်ရှည်ဝါစိုက်ဧကအနေဖြင့် ကျောက်ဆည်မြို့နယ်တွင် (၁၃၃၂၅)ဧက၊ စဉ့်ကိုင်မြို့နယ်တွင် (၉၄၂၇) ဧက၊ မြစ်သားမြို့နယ်တွင် (၅၃၀၀)ဧကစိုက်ပျိုးနိုင်ခဲ့ပြီး နိုဝင်ဘာလဆန်းပိုင်းတွင် မိုးနှောင်းချည်မျှင်ရှည်ဝါရိတ်ဧက(၁၃၅၀)ဧကရိတ်သိမ်းပြီးစီးပြီဖြစ်ကြောင်း ခရိုင်ကြေးတိုင်နှင့် မြေစာရင်းဦးစီးဌာန၏ စာရင်းများအရသိရှိရပါသည်။ မိုးနှောင်းဝါစိုက်ပျိုးမှုတွင်    ဘောင်ကြောင်းပေးစနစ်ဖြင့်စိုက်ပျိုးကြကြောင်း၊ မျိုးအနေဖြင့် အိန္ဒိယ(ရာကာ) မျိုးများဖြစ်သော(၃၃၃)လုံး၊ (၆၆၆)လုံး၊  (၉၉၉)လုံးမျိုးများကိုသာအများဆုံးစိုက်ပျိုးကြကြောင်း၊ မျိုးအသုံးပြုမှုအနေဖြင့် တစ်ဧကလျှင် ဝါမျိုးစေ့ (၁၂-၁၃)ပိဿာအသုံးပြုစိုက်ပျိုးရကြောင်း၊ ဝါမျိူးစေ့တစ်ပိဿာကို (၂၅၀၀/-)ကျပ်စျေးဖြင့် ဝယ်ယူစိုက်ပျိုးရကြောင်း၊ တစ်ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစု‌ပေါင်း(၃၅၀၀၀၀/-)ကျပ်ခန့်ကုန်ကျကြောင်း၊ ဇူလိုင်လ၊ သြဂုတ်လများတွင် စတင်စိုက်ပျိုးခဲ့သော မိုးနှောင်းချည်မျှင်ရှည်ဝါများကို ယခုနိုဝင်ဘာလဆန်းပိုင်းတွင် ဝါများစတင်ထွက်ရှိလာပြီဖြစ်ကြောင်း၊ ဇူလိုင်လတွင် စိုက်ပျိုးခဲ့သော စဉ့်ကိုင်မြို့နယ်ရှိ ရွာတော်ရွာ၊ ထန်းတောရွာ၊ ‌‌‌ညောင်ပင်သာရွာများတွင် စတင်ထွက်ရှိနေခြင်းဖြစ်သည်။ အခြားမြို့နယ်များတွင် မိုးနှောင်းချည်မျှင်ရှည်ဝါများ စတင်ထွက်ရှိခြင်းမရှိသေးပါ။ ဝါတစ်ဧကအထွက်နှုန်းအနေဖြင့် ပိဿာ(၄၀၀-၅၀၀)အထိထွက်ရှိကြောင်း၊ ဝါစျေးနှုန်းအနေဖြင့် ဝါတစ်ပိဿာလျှင် (၂၉၀၀-၃၀၀၀/-) ကျပ်ဖြင့်ရောင်းဝယ်လျက်ရှိပြီး ‌တောင်သူများက မြို့ပေါ်ရှိပွဲရုံများသို့ တိုက်ရိုက်သွားရောက်ရောင်းချကြ‌ကြောင်း ပွဲရုံများမှတစ်ဆင့် ရန်ကုန်၊ မန္တလေးမြို့များသို့ တင်ပို့ရောင်းချကြကြောင်း၊ ဝါတစ်ပိဿာလျှင် (၃၀၀၀/-)ကျပ်ဖြင့် အထွက်ပိဿာ(၄၀၀)ရရှိသဖြင့် တစ်ဧကကုန်ကျစရိတ်နှုတ်ပြီးပါက (၈၅၀၀၀၀/-) ကျပ်ခန့်မြတ်ကြောင်း၊ ဝါများစတင်ကောက်ယူချိန်မှ အားလုံးရိတ်သိမ်းပြီးဆုံးချိန်အထိ နေရောင်ခြည်ကောင်းစွာရရှိပါက  ဝါများအရည်အသွေးကောင်းစွာထွက်ရှိနိုင်မည်ဖြစ်ကြောင်း ဝါစတင်ထွက်ရှိသော စဉ့်ကိုင်မြို့နယ်မှ ဝါစိုက်တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

       မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်၌ ၂၀၂၄ခုနှစ်၊ နိုဝင်ဘာလ (ပထမပတ်)မှစတွင်  ကြက်သွန်နီဈေးနှုန်းများမြင့်တက်ပြီး အရောင်းအဝယ်ဖြစ်လျက်ရှိပါသည်။ ဆိပ်ဖြူမြို့နယ်အတွင်းရှိ ကြက်သွန်နီစိုက်ပျိုးထွက်ရှိရာဒေသများနှင့် အခြားမြို့နယ်များဖြစ်သည့် ပခုက္ကူ၊ ချောက်၊ ဆင်ဖြူကျွန်း၊ စလင်း၊ တညောင်မြို့နယ်ဒေသထွက် ကြက်သွန်နီများလည်း ဝင်ရောက်အရောင်းအဝယ် ဖြစ်လျက်ရှိကြောင်း၊ ကြက်သွန်နီကုန်ဆုံးရာသီချိန် ရောက်ရှိသော်လည်း  ဈေးကွက်သို့ ကုန်ဝင်ရောက်မှုများကြောင်း၊ တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ(၄)သောင်း၊ တစ်ပတ်အတွင်း ပိဿာ(၃) သိန်းခန့် ဈေးကွက်သို့ ဝင်ရောက်အရောင်းအဝယ်ဖြစ်ကြောင်း သိရသည်။

      ဈေးနှုန်းအနေဖြင့် ၂၀၂၄ခုနှစ်၊ နိုဝင်ဘာလ(ပထမပတ်)တွင် ဈေးနှုန်းဆက်လက်မြင့်တက်ပြီး အရောင်းအဝယ်ဖြစ်ခဲ့ရာ ကြက်သွန်နီအရည်အသွေးနှင့် အရွယ်အစားလိုက်၍ တောဈေး(ဂျွန်) တစ်ပိဿာ လျှင် ကျပ်(၄၀၀၀-၂၅၀၀)၊ ပွဲရုံများမှ ပြန်လည်သန့်စင်ပြီး ဥအကြီးအရွယ်အစား၊ အရောင်အဆင်းအလိုက် ကြက်သွန်နီတစ်ပိဿာလျှင် ကျပ်(၄၇၀၀-၃၀၀၀) ဈေးဖြင့် ဒေသတွင်း နေရာအနှံ့အပြား ရောင်းချလျက်ရှိကြောင်း၊ ပြည်တွင်းဈေးကွက်အပြင် ပြည်ပအဝယ်လိုက်၍ ဈေးနှုန်းမြင့်တက်လာခြင်းဖြစ်ပြီး ယခင် အောက်တိုဘာလ(စတုတ္ထပတ်)နှင့် ဈေးနှုန်းနှိုင်းယှဉ်ပါက ယခုတစ်ပတ်တွင် ကြက်သွန်နီ တစ်ပိဿာလျှင် ကျပ်(၅၀၀)ခန့် ဈေးနှုန်းမြင့်တက်၍ အရောင်းအဝယ်ဖြစ်လျက်ရှိကြောင်း သိရသည်။

     ဈေးကွက်အနေဖြင့် ဆိပ်ဖြူဒေသထွက် ကြက်သွန်နီများကို ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များသို့ တင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်၊ ဘင်္ဂလားဒေ့ရှ်နိုင်ငံများသို့ တင်ပို့လျက်ရှိကြောင်း၊ နိုဝင်ဘာလ(ပထမပတ်)တွင် ကြက်သွန်နီကုန်ချိန် ပိဿာ(၃)သိန်း၊ တန်ချိန်အားဖြင့် (၄၉၀)တန်ခန့် ကုန်စည်စီးဆင်းခဲ့ကြောင်း ဈေးကွက်မှ သိရှိရပါသည်။

DOCA(မကွေး)