ပြည်တွင်းကုန်သွယ်မှုသတင်း

     တောင်ငူမြို့သို့ အညာဒေသမှထွက်သော ဩဇာသီးများဝင်ရောက်လျက်ရှိရာ ပေါ်ဦးပေါ်စ၌ တစ်လုံးလျှင် ၁၀၀၀ကျပ်မှ ၁၅၀၀ကျပ်အထိပေးရပါသည်။ ယခုအခါတွင် တောင်ငူဒေသမှ ဩဇာသီးများပေါ်လာပြီဖြစ်သဖြင့် တစ်လုံးလျှင် ၅၀၀ကျပ်၊ သုံးလုံးယူလျှင် ၁၀၀၀ကျပ်ဖြင့် ဈေးကျသွားပြီဖြစ်ကာ ပေါများစွာစားသုံးနိုင်ကြပြီဖြစ်ပါသည်။

    ဩဇာသီးတွင် ဗီတာမင် B6 သင့်တင့်စွာပါဝင်သောကြောင့် နှလုံးသွေးကြောကျဉ်းရောဂါနှင့် လေဖြတ်ရောဂါတို့ကိုကာကွယ်ပေးကြောင်း သုတေသနစာတမ်းများအရ သိရှိရပါသည်။ ဩဇာသီးအလွန်အကျွံစားသုံးမိလျှင်လည်း ရင်ကြပ်ရောဂါရနိုင်သဖြင့် သင့်တင်စွာစားသုံးသင့်ပါကြောင်း ရေးသားလိုက်ရပါသည်။

DOCA(ပဲခူး)

    တောင်ငူမြို့၊ ညောင်ပင်ဈေးရှိ သစ်သီးဆိုင်များတွင် ပင်မှည့်သီး (ခေါ်) လိုင်းမချူးသီးတစ်ပိဿာလျှင် ၃၀၀၀ကျပ်ဖြင့်ရောင်းချပါသည်။ ပင်မှည့်သီးကို သကြားနှင့်တို့စားနိုင်သည့်အပြင် ဖျော်ရည်အဖြစ်လည်းသောက်သုံးနိုင်ပါသည်။ ပင်မှည့်သီးဖျော်ရည်ကို ပုံမှန်သောက်သုံးပေးခြင်းအားဖြင့် ကျန်းမာရေးကို များစွာအထောက်အကူပြုပါသည်။

     ပင်မှည့်သီးတွင်ပါဝင်သည့် သကြားဓာတ်သည် ဝမ်းချုပ်ခြင်းကိုကာကွယ်ပေးခြင်းကြောင့် ဝမ်းပုံမှန်မသွားသူများ၊ ဝမ်းချုပ်တတ်သူများသောက်သုံးသင့်သော ဖျော်ရည်တစ်ခွက်ဖြစ်ပါသည်။ ပင်မှည့်သီးဖျော်ရည်ကိုသောက်သုံးခြင်းကြောင့် ခန္ဓာကိုယ်အတွင်းရှိ မလိုအပ်သောအဆီပိုများကိုလျော့ကျစေပါသည်။ ပင်မှည့်သီးတွင်ပါဝင်သော ဗီတာမင်အေသည် ကိုယ်ခံအားကိုကောင်းစေပြီး ကင်ဆာနှင့်နှလုံးရောဂါမဖြစ်အောင် ကာကွယ်ပေးပါသည်။

   ပင်မှည့်သီးကို အနှစ်သပ်သပ်ထုပ်ပိုး၍ ဈေးကွက်အတွင်း ရောင်းချလျက်ရှိပါသည်။ ပင်မှည့်သီးအနှစ်ကို ၅၀၀ဂရမ်၊ ၁၀၀ဂရမ်ဟူ၍ နှစ်မျိုးထုတ်လုပ်ရောင်းချလျက်ရှိပါသည်။ ပင်မှည့် သီးအနှစ် ၅၀၀ဂရမ်တစ်ထုပ်လျှင် ၄၀၀၀ကျပ်၊ ၁၀၀၀ ဂရမ်တစ်ထုပ်လျှင် ၇၈၀၀ကျပ်ဖြင့် တောင်ငူမြို့၊ ဈေးကွက်အတွင်း ရောင်းချလျက်ရှိကြောင်းသိရှိရပါသည်။

DOCA(ဧရာဝတီ)

     စစ်ကိုင်းတိုင်းဒေသကြီးအစိုးရအဖွဲ့၏ လမ်းညွှန်မှုဖြင့် ဝန်ထမ်းများနှင့် ဒေသခံပြည်သူများ နေ့စဉ် နေထိုင်စားသောက်ရေးအထောက်အကူဖြစ်စေရန်အတွက် အခြေခံစားသောက်ကုန်တို့ကို သက်သာသောဈေးနှုန်းဖြင့် ၂၀၂၃ခုနှစ်၊ စက်တင်ဘာလ (၇)ရက်နေ့၊ နံနက် (၈:၀၀)နာရီအချိန်တွင် ရွှေဘိုမြို့၊ အမှတ် (၁)ရပ်ကွက်၌ ရောင်းချပေးကြောင်းသိရှိရပါသည်။

     ဝန်ထမ်းများနှင့် ဒေသခံပြည်သူများအား သက်သာသောဈေးနှုန်းဖြင့် ရောင်းချပေးခြင်းကို ရွှေဘိုတပ်နယ်မှ တာဝန်ရှိသူများ၊ ခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များ၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များ၊ ဦးဆောင်မှုဖြင့် ခရိုင်/ မြို့နယ်အသေးစား၊ အလတ်စား စီးပွားရေးလုပ်ငန်းဖွံ့ဖြိုးတိုးတက်ရေးဦးစီးဌာန၊ စားသုံးသူရေးရာဦးစီးဌာန၊ မွေးမြူရေးနှင့်ကုသရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ ဝန်ထမ်းများက လွတ်လပ်စွာဝယ်ယူနိုင်ရေး ဆောင်ရွက်ပေးလျက်ရှိရာ ယနေ့ရောင်းချပေးသည့် အခြေခံစားသောက်ကုန်အရေအတွက်အားဖြင့် ကြက်ဉ (၁၅၀၀) လုံး၊ ကြက်သားပိဿာချိန် (၄၀)၊ ဆီ (၅၀)ကျပ်သားဘူး (၄၀၀)ဘူး၊ ဆန် (၃၀၀)ပြည်တို့ကို ဈေးနှုန်းချိုသာစွာလက်ဝယ်အရောက် ရောင်းချပေးခဲ့ရာ ဌာနဆိုင်ရာဝန်ထမ်းများနှင့် ဒေသခံပြည်သူများက စနစ်တကျတန်းစီ၍ ဝယ်ယူခဲ့ကြကြောင်းသိရှိရပါသည်။

DOCA(စစ်ကိုင်း)

     စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်စီမံအုပ်ချုပ်ရေးအဖွဲ့၏ အစီအစဉ်ဖြင့် ကျွန်းလှမြို့နယ်၊ စီမံအုပ်ချုပ်ရေးအဖွဲ့ဥက္ကဋ္ဌ ဦးမျိုးတင့်ထူးနှင့် မစဖအဖွဲ့ဝင်များ၊ စည်ပင်သာယာရေးအဖွဲ့မှ အမှုဆောင်အရာရှိ ဦးစိုးထိုက်၊ စားသုံးသူရေးရာဦးစီးဌာန၊ မြို့နယ်တာဝန်ခံ ဒေါ်ဝေဝေအောင်တို့ပူးပေါင်းကာ (၉-၁၀-၂၀၂၃) ရက်နေ့၊ နံနက်(၀၉း၀၀)နာရီအချိန်မှ နေ့လယ်(၁၂း၀၀)နာရီအချိန်ထိ  ကျွန်းလှမြို့၊ အထွေထွေအုပ်ချုပ်ရေးဦးစီးဌာနရုံးဝင်းအတွင်း စားအုန်းဆီများကို နိုင်ငံ့ဝန်ထမ်းများ၏ လက်ဝယ်အရောက် သက်သာသောဈေးနှုန်းဖြင့် ရောင်းချပေးခဲ့ကြပါသည်။

     အဆိုပါစားအုန်းဆီများရောင်းချရာတွင် နိုင်ငံ့ဝန်ထမ်းများ သက်သာသောဈေးနှုန်းဖြင့် စားအုန်းဆီများဝယ်ယူရရှိစေရန်နှင့် စားဝတ်နေရေးအဆင်ပြေစေရန်အတွက် စားအုန်းဆီ (၁)ပိဿာလျှင် (၅၂၀၀)ကျပ်နှုန်း၊ နိုင်ငံ့ဝန်ထမ်း (၁)ဦးလျှင် စားအုန်းဆီ(၁)ပိဿာနှုန်းဖြင့် နိင်ငံ့ဝန်ထမ်းဦးရေ (၅၅၀) တို့အား စားအုန်းဆီ (၅၅၀) ပိဿာရောင်းချပေးခဲ့ကြောင်း၊ စားအုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှထုတ်ပြန်ပေးလျက်ရှိသော စားအုံးဆီတစ်ပိဿာရည်ညွှန်းဈေးနှုန်းဖြင့် ရရှိသည့်အပေါ်မူတည်၍ ဆက်လက်ရောင်းချပေးနိုင်ရေးအတွက် ကန့်ဘလူခရိုင်ဆီကုန်သည်များနှင့်ပူးပေါင်းစီမံဆောင်ရွက်လျက်ရှိကြောင်း မြို့နယ်စီမံအုပ်ချုပ်ရေးအဖွဲ့ဥက္ကဋ္ဌက ပြောကြားပေးခဲ့ကြောင်း သတင်းရရှိပါသည်။

DOCA(စစ်ကိုင်း)

   ယခုလို မိုးဖြိုင်ဖြိုင်ရွာပြီး စိုစွတ်သောရာသီတွင် ထွက်‌ပေါ်လာသည့် ရာသီစာ ကတက်ဥကို လူတိုင်း မြင်ဖူး၊ စာဖူးကြလိမ့်မည်ဖြစ်သည်။ ကတက်ဥကို ကရင်ပြည်နယ်တွင် အရည်သောက်ဟင်းအဖြစ်ချက် စားကြသလို ဒေသစာ ကတက်မုန့်အဖြစ်လည်း လုပ်စားကြသည်။

   ကရင်ပြည်နယ်၏ ဒေသစာ ကတက်ဥကို မုန့်ပြုလုပ်ရာတွင် ဆန်ထောင်း၊ အုန်းသီး၊ ထန်းလျက်၊ ဆားအနည်းငယ်၊ နွယ်တန်းရွက်နှင့် ပေါင်းအိုး(၁)လုံး လိုအပ်ပါသည်။ ထန်းလျက်ကို လိုအပ်သလောက် မပျစ်မကျဲ အရည်ကျိုထားရပါသည်။

   ကတက်မုန့်ပြုလုပ်ပုံ အဆင့်ဆင့်မှာ ရေစိမ်ထားသောဆန်ကို သစ်သားဆုံမှာထည့်ပြီး ကြေလုနီးနီး ဆန်ကွဲဖြစ်သွားသည်အထိ မောင်းထောင်းတံဖြင့် ထောင်းပြီး ဆန်မုန့်တွေကို ဇလုံထဲမှာ ထည့်ထားရပါမည်။ ကတက်ဥကို အမွှေးအမျှင် ဖယ်ရှားပြီး ဓားနဲ့မွှန်း၍ ကြေနေအောင် တောက်တောက်စင်းပြီး ကြေသွားတဲ့ ကတက်ဥ ချွဲချွဲလေးတွေကို ထောင်းထားသော ဆန်မှုန့်ဇလုံထဲထည့်ပြီး အရည်ကျိုထားသော ထန်းလျက် ထည့်၊ ဆား အနည်းငယ်ဖြင့် သမအောင်နယ်ပေးရပါမည်။ ထို့နောက် မုန့်သားကို (၁)ကြိမ်နယ်ပြီးပါက ခပ်ပါးပါးခြစ်ထားတဲ့ အုန်းသီးဖတ်လေးများထည့်ပြီး နောက်ထပ် တစ်ခါနယ်ပေးရပါမည်။ အားလုံးသမပြီ ဆိုပါက ခွက်ကတော့လုပ်ထားတဲ့ သစ်ရွက်ခွက်လေးထဲ နီညိုချွဲပျစ်နေတဲ့ နယ်ပြီးသားမုန့်ဖတ်ကို မပြည့်တပြည့်လေးထည့်ရပါမည်။ သစ်ရွက်ဖက် (သို့မဟုတ်) နွယ်တန်းရွက်ကို ခေါက်ပိတ်၍ နှီးပြား လေးနဲ့ ခိုင်အောင်ထုပ်ထားပြီး အသင့်တည်ထားတဲ့ ပေါင်းအိုးထဲသို့ ထည့်ပေါင်းရပါမည်။ နွယ်တန်းရွက်သည် အနံ့သင်းသင်းလေးရှိနေပြီး မုန့်လုပ်စားရာမှာ အရသာနဲ့လိုက်ဖက်လှပါသည်။ ထို့နောက် အဖုံးအုပ်ကာ မိနစ် (၂၀)ကြာပေါင်းပြီး မုန့်ပေါင်းအိုးကို ဖွင့်လိုက်တဲ့အခါ ခပ်ပွပွဖောင်းဖောင်းနဲ့ ကျက်နေပြီဖြစ်တဲ့ ကတက်မုန့် ပူပူနွေးနွေးကို ရရှိမှာဖြစ်ပါသည်။ အုန်းသီးမထည့်ဘဲ ပေါင်းပြီး မုန့်ကျက်သွားတဲ့ခါမှသာ ခြစ်ထားပြီးသား အုန်းသီးလေးများကို ဖြူးပြီးစားလို့လည်း ရပါသေးသည်။

   ကျက်အောင်ပေါင်းပြီးရလာတဲ့ အုန်းသီးနဲ့ ထန်းလျက်တို့ရဲ့ မွေးပျံ့နေတဲ့ ပူပူနွေးနွေး ကျက်ပြီးခါစ ကတက်မုန့်လေးများကို လက်ဖက်ရည်၊ကော်ဖီ၊ရေနွေးကြမ်းတို့ဖြင့် တွဲဖက်စားသုံးကြတဲ့ ကရင်ပြည်နယ် ရဲ့ မိုးရာသီဒေသစာမုန့်အဖြစ် ရရှိပြီးဖြစ်ပါမည်။ ကရင်ပြည်နယ် ဒေသစာ ကတက်မုန့်ကို ဘားအံမြို့ပေါ်ရှိ ဈေးများတွင် တစ်ခုလျှင် ၅၀၀/- ကျပ်နှုန်းဖြင့် ရောင်းချနေကြောင်း တွေ့ရှိရပါသည်။

DOCA(ကရင်)