ပြည်တွင်းကုန်သွယ်မှုသတင်း

    ပြည်ဈေးကွက်တွင် ၂၀၂၃ခုနှစ်၊ မိုးရာသီကာလ ဇွန်လ၊ ဇူလိုင်လ၊ ဩဂုတ်လနှင့် စက်တင်ဘာလတို့တွင် ဘုရားပန်းအိုးများကပ်လှူပူဇော်ရန်အတွက် အရောင်အသွေးစုံလင်လှသောသစ္စာပန်းများကို ဈေးကွက်ထဲ၌ ရောင်းချလျက်ရှိပါသည်။ ဈေးကွက်တွင် ရောင်းချနေသောသစ္စာပန်းများကို ပြည်မြို့အနီးတဝိုက်ရှိ ကျေးရွာများဖြစ်သော မှော်ဇာဘက်မှ လာရောက်ရောင်းချသည့်အပြင် ပြည်ခရိုင်၊ ရွှေတောင်ဘက်မှလည်း သစ္စာပန်းများကို လာရောက်ရောင်းချကြောင်းသိရပါသည်။

     သစ္စာပန်းမှာ ဘုရားကပ်လှူရန်ဖြစ်စေ၊ ပန်းအလှထိုးရန်ဖြစ်စေ၊ ပန်းပြပွဲများ၌ ပန်းအလှပြရန်ဖြစ်စေ အသုံးများသောပန်းတစ်မျိုးဖြစ်ပါသည်။ သစ္စာပန်းသည် အရောင်အသွေးစုံလင်လှပြီး အဖြူရောင်၊ ပန်းနုရောင်၊ ခရမ်းရောင်၊ မရမ်းရောင်၊ အနီရောင် (အနု/အရင့်) နှင့် အဝါရောင် (အနု/ အရင့်) ဟူ၍ရှိပါသည်။ သစ္စာပန်းကို မိုးဦးကျကာလတွင် စိုက်ပျိုးကြပြီး တစ်ဧကလျှင် ပန်းမျိုးဥတစ်သောင်းခန့်လိုအပ်သည်ဟုသိရပါသည်။ ပန်းပင်ကို မိုးတွင်း၌ စိုက်ပျိုးသော်လည်း မိုးပြတ်သွားလျှင် အပင်အခြေအနေကိုကြည့်၍ ရေသွင်းပေးနိုင်ပါသည်။ ရေသွင်းသည့်အခါ နှံ့နှံ့စပ်စပ်သွင်းပေးရန်လိုအပ်ပြီး အပင်ပေါက်ညီ၍ အပွင့်များလည်းလှပမည်ဖြစ်ပါသည်။

    ပြည်ခရိုင်မြို့နယ်များဖြစ်သော ပြည်မြို့ရှိ ကျေးရွာများနှင့် ရွှေတောင်မြို့ရှိ ကျေးရွာများတွင် သစ္စာပန်းကို တစ်နိုင်တစ်ပိုင်လည်းစိုက်ပျိုးကြသည့်အပြင် စီးပွားဖြစ်လည်းစိုက်ပျိုးကြပါသည်။ ထွက်ရှိလာသောသစ္စာပန်းများကို ပန်းဒိုင်များမျာ အခင်းထဲအထိ လာရောက်ဝယ်ယူကြကြောင်းသိရပါသည်။ ထိုမှတစ်ဆင့် ဈေးကွက်များသို့ ပြန်လည်ဖြန့်ဖြူးရောင်းချပြီး ရန်ကုန်မြို့သို့လည်း တင်ပို့ရောင်းချကြောင်းသိရပါသည်။ ဈေးကွက်များတွင် ရောင်းချသောသစ္စာပန်းဈေးများမှာ (၅)ခိုင်ပါ းတစ်စည်းလျှင် (၈၀၀)ကျပ်မှ (၁၀၀၀)ကျပ်ဖြင့် ရောင်းချကြောင်းသိရပါသည်။

DOCA(ပဲခူး)

      ပြည်ပဲမျိုးစုံဈေးကွက်၌ ပြည်တွင်း၊ ပြည်ပဝယ်လိုအားရှိသော ပဲမျိုးစုံမှာ နေ့စဉ် ရောင်းဝယ်မှုဖြစ်လျက်ရှိရာ မတ်ပဲ၊ ပဲတီစိမ်း၊ ပဲစင်းငုံသီးနှံများကို အဓိကထားရောင်းဝယ်နေကြသည့်အပြင် ကုလားပဲ၊ ပဲကြီး စသည့် သီးနှံများကလည်း ဒေသတွင်းဝယ်လက်နှင့် အခြားဝယ်လက်တို့နှင့်ပါ ရောင်းဝယ်မှုဖြစ်ခဲ့ကြပါသည်။ ပြည်ပဝယ်လက် အဓိကအဝယ်ရှိသည့် မတ်ပဲသီးနှံမှာ ၂၀၂၃ခုနှစ်၊ စက်တင်ဘာလအတွင်း ဈေးနှုန်းများမြင့်တက်နေသော ပဲသီးနှံဖြစ်ခဲ့ပါသည်။ ပြည်ပဝယ်လိုအား ငွေဈေးအတက်/အကျပေါ်မူတည်၍ ဈေးနှုန်းများပြောင်းလဲမှုရှိကြပါသည်။ ယခုနှစ်အတွင်း မတ်ပဲသီးနှံသည် ပဲသစ်ပေါ်စအချိန်တွင် ပိဿာ၂၀ဝင် တစ်တင်းလျှင် ကျပ် (၆)သောင်းခန့်ဈေးဖွင့်ခဲ့ပြီး တဖြည်းဖြည်းဈေးနှုန်းများမြင့်တက်လာခဲ့ရာ မေလမှစ၍ ပဲတစ်တင်းလျှင် ၇၅၅၀၀ကျပ်ဖြင့် ရောင်းချမှုဖြစ်ခဲ့ပြီး ဇွန်လဆန်းပိုင်းတွင်မူ ပဲတစ်တင်းလျှင် ကျပ်၈သောင်းကျော်ထိမြင့်တက်ခဲ့ပြီး လကုန်ပိုင်းမှစ၍ ဈေးအနည်းငယ်ပြန်လျော့သွားသောကြောင့် တစ်တင်းလျှင် ၇၂၅၀၀ကျပ်ဖြင့်သာရောင်းဝယ်နေခဲ့ကြပါသည်။ ဇူလိုင်လအတွင်း၌လည်း ကျပ်၇သောင်းခန့်ဖြင့်သာ ရောင်းဝယ်နေကြပြီး ဩဂုတ်လ လကုန်ပတ်မှစ၍ ဈေးနှုန်းပြန်မြင့်တက်လာတာကြောင့် ၇၉၀၀၀ကျပ်ထိရောင်းချမှုများဖြစ်ခဲ့ကာ ယခုစက်တင်ဘာလဆန်းမှစ၍ တစ်တင်းလျှင် ကျပ်၈သောင်းကျော်အထိပြန်လည်မြင့်တက်လာခဲ့ကြပါသည်။ ယခင်နှစ်၏ ယခုကာလအချိန်တွင် မတ်ပဲသီးနှံဈေးမှာ တစ်တင်းလျှင် ၆၆၀၀၀ကျပ်ဖြင့် အရောင်းအဝယ်ဖြစ်နေခဲ့ပါသည်။ မတ်ပဲသီးနှံ၏ နှစ်အလိုက် ကာလတူအချိန်ဖြစ်ပေါ်ခဲ့သော ဈေးနှုန်းများကိုလေ့လာရာမှ အောက်ပါအတိုင်းတွေ့ရှိရပါ သည်-

          ခုနှစ်                       ဈေးနှုန်း                            ဈေးနှုန်း

                                        (နိမ့်)                                (မြင့်)

          ၂၀၂၀                      ၂၉၀၀၀ကျပ်                       ၃၄၀၀၀ကျပ်

          ၂၀၂၁                      ၄၈၀၀၀ကျပ်                      ၆၀၀၀၀ကျပ်

          ၂၀၂၂                      ၆၅၀၀၀ကျပ်                      ၆၆၀၀၀ကျပ်

          ၂၀၂၃                      ၈၀၅၀၀ကျပ်                      ၈၂၅၀၀ကျပ်

     နှစ်အလိုက်ဈေးနှုန်းများအရ ၂၀၂၀ခုနှစ်တွင် မတ်ပဲသီးနှံမှာ ပိဿာ (၂၀) ဝင် တစ်တင်းလျှင် အနိမ့်ဈေး ၂၉၀၀၀ကျပ်မှ အမြင့်ဈေး ၃၄၀၀၀ကျပ်သာရရှိခဲ့ပြီး အဆိုပါနှစ်တွင် ကိုဗစ်ကာလဖြစ်သည့်အတွက် မတ်ပဲသီးနှံသာမက အခြားသောပဲသီးနှံများလည်း ဈေးအေးခဲ့သောနှစ်ဖြစ်ခဲ့ပါသည်။ ၂၀၂၁ခုနှစ်တွင်မူ သီးနှံဈေးနှုန်းများပြန်လည်မြင့်တက်လာပြီး စက်တင်ဘာလအတွင်း မတ်ပဲသီးနှံ ပိဿာ(၂၀)ဝင် တစ်တင်းလျှင် အနိမ့်ဈေး ၄၈၀၀၀ကျပ်မှ အမြင့်ဈေး ၆၄၀၀၀ကျပ်ထိရရှိခဲ့ကြပါသည်။ ၂၀၂၂ခုနှစ်၊ စက်တင်ဘာလအတွင်း မတ်ပဲပိဿာ(၂၀)ဝင် တစ်တင်းလျှင် အနိမ့်ဈေး ၆၅၀၀၀ကျပ်မှ အမြင့်ဈေး ၆၆၀၀၀ကျပ်ထိ ဈေးရရှိခဲ့သည့်အတွက် စိုက်ပျိုးထုတ်လုပ်သူတောင်သူများမှာ ထိုက်သင့်သောအကျိုးအမြတ်များရရှိခဲ့ကြပါသည်။ တချို့တောင်သူများမှာမူ ပဲပေါ်စကတည်းက ရောင်းချမှုများရှိကြပြီး စိုက်ဧကများသူများနှင့် ငွေကြေးအဆင်ပြေသူတို့မှာ ထွက်လာသမျှ ပဲထုတ်လုပ်ရောင်းချမှုမရှိဘဲ သိုလှောင်ထားကြကာ ဈေးအမြင့်ကြိုက်ဈေးရောက်မှ ထုတ်ရောင်းချသည်ဟုသိရပါသည်။ ယခုနှစ်တွင် မတ်ပဲသီးနှံအပြင် အခြားပဲသီးနှံများပါဈေးနှုန်းများမြင့်တက်လာခဲ့သောကြောင့် ယခုအချိန်၌ ရှေးယခင်နှစ်များ၏ ဈေးနှုန်းများထက် သိသိသာသာပိုမိုမြင့်တက်လာခဲ့ကြပါသည်။ သို့သော်လည်း စိုက်ပျိုးထုတ်လုပ်သူတောင်သူများအနေဖြင့် ပဲသစ်ပေါ်စအချိန်တွင် ၆၀၀၀၀ကျပ်သာရရှိခဲ့သောကြောင့် လက်ဝယ်ကျန်သူတောင်သူအနည်းစုလောက်သာ အကျိုးအမြတ်ပိုသောသီးနှံဖြစ်ခဲ့ကြပါသည်။ တချို့တောင်သူများအနေဖြင့် ကျပ်၇၀၀၀၀ခန့်ရှိစဉ်တွင် မျိုးပဲလောက်သာချန်၍ လက်ကျန်ပဲများထုတ်ရောင်းချလာကြပြီး တောင်သူတချို့မှာ ယခု ကျပ်၈၀၀၀၀ကျော်မှသာ ထုတ်ရောင်းချသူများလည်းရှိခဲ့ကြပါသည်။ မတ်ပဲသီးနှံသည် ပဲသစ်ပေါ်ချိန်မှစ၍ တစ်နှစ်တာလုံး ရောင်းဝယ်မှုဖြစ်သည့် ပဲအမျိုးအစားဖြစ်သောကြောင့် ပဲထွက်ပေါ်ချိန် အထွက်လှိုင်ချိန်များ၌ ဈေးကွက်အတွင်း အရောင်းအဝယ်သွက်ခဲ့ပြီး ကျန်ကာလများတွင်မူ နေ့စဉ် ပုံမှန် အိတ်(၃၀၀)ကျော်၊ အိတ်(၄၀၀) ရောင်းချမှုများရှိခဲ့ကြပါသည်။ မတ်ပဲသီးနှံကို ပြည်ဈေးကွက်၌ အဓိဝယ်ယူသည့်ဝယ်လက်များမှာ ရန်ကုန်ဝယ်လက်များဖြစ်ပြီး မျိုးပဲရာသီတွင်မူ နယ်ဝယ်လက်များအဝယ်ရှိကြသည်ဟုသိရပါသည်။ ယခုကာလဈေးနှုန်းမှာ မြင့်တက်လာသော်လည်း ပြည်ဈေးကွက်အတွင်း၌ မတ်ပဲသီးနှံအနေဖြင့် အရောင်းအဝယ်ပုံမှန်ဖြစ်လျက်ရှိကြောင်း လေ့လာသိရှိရပါသည်။

DOCA(ပဲခူး)

     မုံရွာမြို့၊ ချင်းတွင်းရတနာစျေး၌  ရောင်းချနေသော ပုစွန်ခြောက်၊ ငါးခြောက်များမှာ ရန်ကုန်၊ မန္တလေး၊ ရခိုင်ပြည်နယ်ဘက်မှ ဝင်ရောက်ကြောင်း သိရပါသည်။ ပုစွန်၊ ငါးခြောက်စျေးနှုန်းများမှာ ဝင်ရောက်သည့် ဒေသအ‌ပေါ် မူတည်၍လည်းကောင်း၊ အရည်အသွေးကိုလိုက်၍လည်းကောင်း ကွာခြားလျက်ရှိပါသည်။

       ၂၀၂၃ခုနှစ်၊ စက်တင်ဘာလ ဒုတိယအပတ်တွင် ရောင်းချနေသော ဈေးနှုန်းများမှာ ပုစွန်ခြောက် (၁)ပိဿာလျှင် ကျပ်(၆၅၀၀၀)မှ ကျပ်(၈၅၀၀၀)၊ ငါးရံ့ခြောက် (၁)ပိဿာလျှင် ကျပ်(၅၅၀၀၀မှ ၈၀၀၀၀)၊ ငါးပုတ်လုံးခြောက် (၁)ပိဿာလျှင် ကျပ်(၁၆၀၀၀မှ ၁၈၅၀၀)၊  ငါးပုတ်သင် (၁)ပိဿာလျှင် ကျပ်(၁၅၀၀၀မှ ၁၈၀၀၀) ၊ အာပြဲခြောက် (၁)ပိဿာလျှင် ကျပ်(၁၅၀၀၀မှ ၂၂၀၀၀)၊ ငါးကျည်းခြောက် (၁)ပိဿာလျှင် ကျပ်(၃၅၀၀၀မှ ၄၅၀၀၀)၊ ငါးနီတူးခြောက် (၁)ပိဿာလျှင် ကျပ်(၁၂၀၀၀ မှ ၁၄၀၀၀)၊ ငါးဖန့်ဝိုင်း(ငါးပိကောင်) (၁)ပိဿာလျှင် ကျပ်(၁၅၀၀၀မှ ၁၇၅၀၀)ရှိကြောင်း ချင်းတွင်းရတနာဈေးတွင် ရောင်းချနေသော ငါးခြောက်ကုန်သည်များထံမှ သိရပါသည်။

DOCA(စစ်ကိုင်း)

    ပြည်မြို့၏ သစ်သီးဝလံ၊ ဟင်းသီးဟင်းရွက်ဈေးကွက်အတွင်း သီးနှံမျိုးစုံရောင်းဝယ်လျက်ရှိကြသည့်အနက် ဟင်းကောင်းတစ်ခွက်အဖြစ်ပါဝင်နေသော မှိုသည် တစ်ခုအပါအဝင်ဖြစ်ပါသည်။ ယခုမိုးရာသီကာလတွင် မှိုအမျိုးအစား အမျိုးမျိုးထွက်ရှိကြရာ ကောက်ရိုးမှို၊ တောင်ပို့မှို၊ ငွေနှင်းမှို စသည်ဖြင့် ဈေးကွက်အတွင်းရောင်းချမှုများရှိကြပါသည်။ ရောင်းချမှုအများဆုံးမှာ ငွေနှင်းမှိုဖြစ်ပြီး တောင်ပို့မှို၊ ကောက်ရိုးမှို အမျိုးအစားများမှာမူ ငွေနှင်းမှိုကဲ့သို့ ပေါပေါများများမရှိကြသော်လည်း ဈေးကွက်အတွင်း၌ နေ့စဉ်ရောင်းဝယ်စားသုံးမှုရှိနေကြသော မှိုများအဖြစ်တွေ့ရှိရပါသည်။ ငွေနှင်းမှိုအမျိုးအစားမှိုများမှာမူ တစ်ပိဿာလျှင် ၄၅၀၀ကျပ်မှ ၆၀၀၀ကျပ်ဖြင့် အရောင်းအဝယ်ဖြစ်ပြီး ကောက်ရိုးမှုအမျိုးအစားမှာ တစ်ပိဿာလျှင် ၁၃၀၀၀ကျပ်၊ ၁၄၀၀၀ကျပ်၊ ၁၅၀၀၀ကျပ်တို့ဖြစ်၍ ဈေးကောင်းခဲ့ပြီး  တောင်ပို့မှိုမှာမူ တစ်ပိဿာလျှင် ၃၉၀၀၀ကျပ်မှ ၄၀၀၀၀ကျပ်ထိ ဈေးကောင်းပေးဝယ်ယူစားသုံးကြရကြောင်းသိရပါသည်။ ငွေနှင်းမှိုနှင့် ကောက်ရိုးမှိုများကို ပျိုးထုပ်များဖြင့် စိုက်ပျိုးထုတ်လုပ်ကြသည့်အတွက် ရာသီမရွေးဝယ်ယူစားသုံးနိုင်သော်လည်း တောင်ပို့မှိုကို ယခုရာသီတွင်သာ မှိုကျင်းရှိသော တောင်ပို့များ၌ နှုတ်ယူရောင်းချရသည့်အတွက် ကျန်ကာလများတွင် ရှားပါးသည်ဟုတွေ့ရှိရပါသည်။ မှိုကြိုက်သော အိမ်ရှင်မများအနေဖြင့် ရာသီစာ တောင်ပို့မှိုတို့ကို ဈေးကြီးပေးဝယ်ယူ၍ ချက်ပြုတ်စားသုံးကြကာ အဆိုပါဟင်းတစ်ခွက်ရှိလျှင်ပင် တခြားအသားဟင်းများမလိုဘဲ  ထမင်းမြိန်စွာစားသုံးနိုင်သည့် ဟင်းတစ်ခွက်ဖြစ်သည်ဟုဆိုကြပါသည်။ သက်သက်လွတ်ဟင်းလျာအဖြစ်လည်း ဝါတွင်းကာလ၌ သက်သက်လွတ်စားသုံးသူများအတွက် အဆင်ပြေပြီး ကောင်းမွန်သော ဟင်းအမယ်တစ်မျိုးဖြစ်ကြောင်းသိရပါသည်။ ငွေနှင်းမှိုအမျိုးအစားငွေများကို ငရုတ်သီးစိမ်း၊ မျှင်ငါးပိများနှင့် ကြိုက်နှစ်သက်ရာ အချို၊ အစပ်ချက်ပြုတ်ကြော်လှော်စားသုံးကြပြီး ကောက်ရိုးမှိုအမျိုးအစားများကိုမူ မှိုဟင်းသီးသန့်သော်လည်းကောင်း၊ ကန်စွန်းရွက်နှင့်ရော၍ မှိုကန်စွန်းဟင်းလျာအဖြစ်လည်းကောင်း စားသုံးကြပါသည်။ စားသောက်ဆိုင်ကြီးများတွင် မှိုကန်စွန်းဟင်းလျာကို ဈေးကောင်းပေး၍ ဝယ်ယူစားသုံးကြကြောင်းသိရပါသည်။

DOCA(ပဲခူး)

    ပြည်ခရိုင်ရှိ နွေစပါးများမှာ ၂၀၂၃ခုနှစ်၊ စက်တင်ဘာလဆန်းတွင် တင်း၁၀၀လျှင် ၁၅၁၀၀၀၀ကျပ်ဖြင့် ဈေးငြိမ်နေပြီး ဆန်ဈေးများမှာ ၂၄ပြည်ပါ တစ်အိတ်လျှင် ၆၃၀၀၀ကျပ်ဖြင့် အရောင်းအဝယ်ရှိပါသည်။ နွေစပါးဈေးများမှာ ယခင်နှစ်ဖြစ်သော ၂၀၂၃ခုနှစ်၊ စက်တင်ဘာလတွင် စပါးဈေးမှာ ၁၁၀၀၀၀၀ကျပ်၊ ဆန်တစ်အိတ်လျှင် ၄၈၀၀၀ကျပ်ဖြင့် အရောင်းအဝယ်ရှိခဲ့ပါသည်။ နွေစပါးအမျိုးအစားများမှာ ရတနာတိုးစပါးများကိုသာ အဓိကထားစိုက်ပျိုးပြီး GW-11၊ ထိုင်းနှံကောက်မျိုးများကိုမူ အနည်းငယ်သာစိုက်ပျိုးပါသည်။ နွေစပါးမှာ မိုးစပါးထက်အထွက်နှုန်းကောင်းသောကြောင့် ဆည်ရေရသောနေရာများတွင် နွေစပါးကို တောင်သူများအားထား၍ ပိုမိုစိုက်ပျိုးကြပါသည်။ အထွက်ကောင်းသောကြောင့် အကျိုးအမြတ်ပိုမိုရရှိပြီး စပါး/ဆန်မှာ အရောင်းအဝယ်အေးနေသောကြောင့် ယခုကာလအတွင်း ဈေးငြိမ်နေခြင်းဖြစ်ကြောင်းသိရှိရပါသည်။

DOCA(ပဲခူး)