ပြည်တွင်းကုန်သွယ်မှုသတင်း

    ကိုင်းပင်သည် မြက်မျိုးဖြစ်ပြီး အမြစ်မှအကိုင်းအခက်များထွက်ပါသည်။ အရိုးမှာ ၆ပေမှ ပေ၂၀အထိမြင့်ပါသည်။ အရွက်သည် အလွန်ပါးပြီးရှည်၍ အပြင်ဖျား၌ ဖြူသောအပွင့်များပွင့်ပါသည်။ ကိုင်းဥသည် မြစ်နားကမ်းနားတွင်ရှိသည့်ကိုင်းပင်၌ စွဲကပ်သောမှိုတစ်မျိုးဖြစ်ပါသည်။ ကိုင်းပင်၏ ဥမဟုတ်ပါ။ ကားလမ်းဘေးကိုင်းပင်များတွင်လည်းမကပ်ပါ။ မြစ်နား၊ ကမ်းနား၌သာရရှိပါသည်။ ကိုင်းဥများကို ရေတက်ရက်တွင် လှေနှင့်လိုက်ခွရပြီး လိုသလောက်လည်း မရတတ်ပါ။ ကိုင်းဥသည် ၅ရက် (သို့) ရက်သတ္တပတ်အထားခံပါသည်။ ကိုင်းဥကို ဝါဆို၊ ဝါခေါင် ရေဖောင်ဖောင်ာရရှိပြီး အာဟာရပြည့်ဝ၍ ကလေးငယ်များအား ကျွေးလျှင် သန်ကောင်များ၊ တုတ်ကောင်များကိုကျစေပါသည်။ ကိုင်းဥကို နာလန်ထခါစသူများစားလျှင် အားရှိစေပြီး ကိုင်းဥတစ်လုံးလျှင် အိုဗာတင်းတစ်ခွက်မှာ ကြက်ဥ ၂လုံးနှင့် ညီမျှသည်ဟုလည်းဆိုကြပါသည်။ ကိုင်းဥကို ကင်၍သော်လည်းကောင်း၊ ကြော်၍သော်လည်းကောင်း စားသုံးကြပါသည်။ သွေးတိုးရောဂါရှိသူများအနေဖြင့် များများမစားသုံးသင့်ပါ။

      ကိုင်းဥဈေးကွက်၊ ဈေးနှုန်းအနေဖြင့် နိုဆီဘူးတစ်ဘူးလျှင် ၆၀၀၀ကျပ်၊ ၆၅၀၀ကျပ်ဖြင့် ရောင်းချကြောင်းသိရှိရပါသည်။

DOCA(ပဲခူး)

၂၁.၉.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံတစ်တန်ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းနှိုင်းယှဉ်ချက်ကို အောက်ပါ .pdf file တွင် ဝင်ရောက်ကြည့်ရှုနိုင်ပါသည် -

    ပြည်ခရိုင်၌ ၂၀၂၃ခုနှစ်၊ စက်တင်ဘာလတွင် ဆီထွက်သီးနှံဖြစ်သော မြေပဲနှင့်နှမ်းသီးနှံများထွက်ပေါ် ပြီဖြစ်သဖြင့် ပြည်ဈေးကွက်သို့ ဝင်ရောက်မှုရှိသဖြင့် နေ့စဉ် အရောင်းအဝယ်များပုံမှန်ဖြစ်လျက်ရှိပါသည်။

 မြေပဲ

     ပြည်ခရိုင်၊ ပြည်မြို့ရှိ ပွဲရုံများနှင့် ဈေးကွက်များသို့ မြေပဲဝင်ရောက်မှုလှိုင်လာသဖြင့် တစ်ရက်လျှင် အိတ်၁၅၀၀ခန့်ဝင်ရောက်နေပါသည်။ ဝင်ရောက်မှုများလာသကဲ့သို့ အဝယ်လည်းများလာသဖြင့် ဝင်သလောက် နေ့စဉ် အရောင်းအဝယ်ဖြစ်နေသည်ကိုတွေ့ရပါသည်။ မိုးမြေပဲဆန်များကို ‌ ပြည်- အောင်လံ ကြားရှိ ကျေးရွာများမှ ပြည်ဈေးကွက်သို့ တင်ပို့ရောင်းချကြပါသည်။ မြေပဲစိုက်တောင်သူများကအတောင့်အတိုင်းမရောင်းချတော့ဘဲ မြေပဲဆံကိုသာ လာရောက်ရောင်းချကြောင်းသိရပြီး ဝင်ရောက်လာသောမြေပဲဆံများကို ပဲကြော်ဖိုသမားများက ဝယ်ယူမှုနည်းသော်လည်း ဆီစက်လုပ်ငန်းသမားများက ဆီကြိတ်ရန် ဝယ်ယူမှုရှိကြသောကြောင့် အရောင်းအဝယ်သွက်လျက်ရှိပါသည်။ ပြည်ဈေးကွက်မှတစ်ဆင့် မြေပဲဆံများကို မန္တလေးတိုင်းသို့လည်းတင်ပို့ရောင်းချကြောင်းသိရပါသည်။ မိုးမြေပဲမှာ အထွက်လှိုင်လာချိန်ဖြစ်သဖြင့် မြေပဲဆံဈေးနှုန်းမျာလည်း ယခင်ဩဂုတ်လ နောက်ဆုံးပတ်ထက် ဈေးအနည်းငယ်လျော့နည်းသွားခဲ့ပါသည်။ စက်တင်ဘာလ ပထမပတ်တွင် မြေပဲဆန်ဈေးများမှာ မြေပဲဆီဆန် (အဖြူ ) တစ်ပိဿာလျှင် ၆၀၀၀ကျပ်နှင့် ဆီဆံ (အနီ)တစ်ပိဿာလျှင် ၇၅၀၀ကျပ်နှင့် လုံးဆံ(အဖြူ) တစ်ပိဿာလျှင် ၆၅၀၀ကျပ်၊ လုံးဆံ (အနီ) တစ်ပိဿာလျှင် ၈၁၀၀ကျပ်ဖြင့် အရောင်းအဝယ်ဖြစ်လျက်ရှိပါသည်။ ဩဂုတ်လ နောက်ဆုံးပတ်နှင့်ယှဉ်လျှင် မြေပဲဆံ/ လုံးဆံအရော ဆီဆံပါ တစ်ပိဿာလျှင် ၁၀၀၀ကျပ်ခန့် ဈေးအနည်းငယ်ပြန်ကျသွားကြောင်းတွေ့ရပါသည်။ မြေပဲဆံဈေးနှုန်းအနည်းငယ်ကျသွားသော်လည်း မြေပဲဆီဈေးမှာ တစ်ပိဿာလျှင် ၁၃၅၀၀ကျပ်ဖြင့်  တစ်ပိဿာ ၅၀၀ကျပ်ခန့်ဈေးပြန်ကျသွားခဲ့ပါသည်။ ယခုကဲ့သို့ မြေပဲဆီဈေးနှုန်းများကျဆင်းလာရခြင်းမှာ နိုင်ငံတော်အနေဖြင့် သက်သာသောဈေးနှုန်းများဖြင့် စားအုန်းဆီများကိုရောင်းချပေးခြင်း၊  မြေပဲများ အထွက်လှိုင်ချိန်ဖြစ်သဖြင့် ဈေးကွက်တွင် မြေပဲဆန်လက်ကျန်များနေသဖြင့် ဆီဈေးမှာ အနည်းငယ်ကျဆင်းလာခြင်းဖြစ်ကြောင်းသိရပါသည်။

နှမ်း

    ဆီထွက်သီးနှံတစ်မျိုးဖြစ်သော နှမ်းသီးနှံမှာ ယခုအချိန်တွင် ပြည်ဈေးကွက်သို့ မိုးနှမ်းအသစ်များ နေ့စဉ် ဝင်ရောက်မှုရှိပြီး တစ်နေ့လျှင် အိတ်(၁၀၀၀)ခန့်ဝင်ရောက်မှုရှိကြောင်းတွေ့ရပါသည်။ မိုးနှမ်းသစ်များမှာ နေ့စဉ် ဝင်ရောက်နေပြီး မိုးညို၊ မြန်အောင်၊ ကြံခင်းနှင့် နတ်တလင်းဘက်မှ နှမ်းနက်များလည်းဝင်ရောက်မှုရှိပါသည်။ ဝင်ရောက်လာသည့်နှမ်းနက်များကို မန္တလေးဝယ်လက်များက အများဆုံးဝယ်ယူကြပြီး ရန်ကုန်ဝယ်လက်များက အနည်းငယ်သာဝယ်ယူကြောင်းသိရှိရပါသည်။ ပြည်ခရိုင်အတွင်း၌ နှမ်းနက်သာအများအပြားစိုက်ပျိုးပြီး ဆီကြိတ်နှမ်းနီကို အနည်းငယ်သာစိုက်ပျိုးကြသဖြင့် ဆီစက်သမားများက ဆီကြိတ်ရန်လိုအပ်ချက်ရှိသည့်အခါ တခြားမြို့နယ်များမှဝယ်ယူ၍ ကြိတ်ခွဲကြကြောင်းသိရပါသည်။ နှမ်းဆီကို ပြည်ခရိုင်တွင် စားသုံးမှုနည်းသော်လည်း အခြားဆီများနှင့်ရောစပ်၍ ရောင်းချသည့်အခါ ဝယ်ယူကြကြောင်းသိရပါသည်။ ယခုစက်တင်ဘာလ ပထမပတ်တွင် နှမ်းဈေးနှုန်းများအနေဖြင့် နှမ်းနီ (၃) တင်းဝင် တစ်အိတ်လျှင် ၃၁၅၀၀၀ကျပ်၊ နှမ်းနက် (၃) တင်းဝင် တစ်အိတ်လျှင် ၂၈၀၀၀၀ကျပ်နှင့် စမုံနက်နှမ်း (၃ )တင်းဝင် တစ်အိတ်လျှင် ၃၂၀၀၀၀ကျပ်ဖြင့် အရောင်းအဝယ်ဖြစ်လျက်ရှိပါသည်။ ယခင်ဩဂုတ်လ တတိယပတ်ဈေးနှင့် နှိုင်းယှဉ်လျှင် နှမ်းနီ  (၃) တင်းဝင် တစ်အိတ်လျှင် ၅၀၀၀ကျပ်၊ နှမ်းနက်  (၃) တင်းဝင် တစ်အိတ်လျှင် ၄၀၀၀၀ကျပ်နှင့် စမုံနက်နှမ်း ၃တင်းဝင် တစ်အိတ်လျှင် ၃၀၀၀၀ကျပ် စသည်ဖြင့် ဈေးများအသီးသီးကျဆင်းလာခဲ့ကြောင်းသိရပါသည်။ ယခုကဲ့သို့ နှမ်းဈေးများကျဆင်းလာရခြင်းမှာ နှမ်းအထွက်လှိုင်ချိန်ဖြစ်ခြင်း၊ ဈေးကွက်မှ နှမ်းလက်ကျန်များလာသဖြင့် ဈေးနှုန်းများကျဆင်းလာခြင်းတို့ကြောင့်ဖြစ်ကြောင်း သိရပါသည်။ နှမ်းဆီဈေးမှာလည်း တစ်ပိဿာလျှင် ၁၂၀၀၀ကျပ်ဖြင့် ယခင်လ တတိယပတ်နှင့်ယှဉ်လျှင်  ၂၀၀၀ကျပ်ခန့် ဈေးနှုန်းများကျဆင်းလာသည်ကိုတွေ့ရပါသည်။

  ထို့ကြောင့် ပြည်တွင်းကုန်သွယ်မှုလုပ်ငန်းများဖွံ့ဖြိုးတိုးတက်စေရန်အတွက် မြေပဲနှင့်နှမ်းများအနက် အရည်အသွေးကောင်းသည့်မျိုးများကိုရွေးချယ်၍ စိုက်ပျိုးလာနိုင်မည်ဆိုပါက ပြည်တွင်းစားသုံးဆီများဖူလှုံလာမည်ဖြစ်ပြိး စားသုံးသူများအနေဖြင့် သက်သာသောဈေးနှုန်းများဖြင့် ဝယ်ယူစားသုံးနိုင်မည်ဖြစ်ပါသည်။ နိုင်ငံတော်အနေဖြင့်လည်း မျိုးကောင်းမျိုးသန့်များကိုရွေးချယ်၍ စိုက်ပျိုးသဖြင့် ပြည်ပတင်ပို့ရန် အရည်အသွေးကောင်းသောသီးနှံများရရှိနိုင်ပြီး ပြည်ပဝင်ငွေများလည်းရရှိနိုင်မည်ဖြစ်ကာ တောင်သူများအနေဖြင့်လည်း အကျိုးအမြတ်များရရှိ၍း အလုပ်အကိုင်အခွင့်အလမ်းများလည်းရရှိနိုင်မည်ဖြစ်ကြောင်း ရေးသားလိုက်ရပါသည်။

DOCA(ပဲခူး)

   ကတွက်ပင်သည် ညောင်ပင်မျိုးနွယ်ပင်ဖြစ်ပြီး အခေါက်၊ အရွက်၊ အသီးနှင့်တကွ တစ်ပင်လုံးတွင် အမွေးနုများရှိပြီး အသီးမှာ ဇီးဖြူသီးအရွယ်ခန့်ရှိ၍ အရောင်မှာ အစိမ်းရောင်၊ ခရမ်းရောင်၊ အညိုရောင်၊ အဝါရောင်၊ နီညိုရောင်၊ အမဲရောင်ဟူ၍ အရောင်မျိုးစုံရှိပါသည်။ မြန်မာနိုင်ငံရှိ သစ်တောတိုင်းတွင် ကတွက်ပင်များတွေ့ရ၍ မြန်မာနိုင်ငံအောက်ပိုင်း၌ အများဆုံးတွေ့ရသည်။ ကတွက်သီးကို သဖန်းသီးဟူ၍လည်းခေါ်ကြပါသည်။ ကတွက်သီး၏ ထူးခြားချက်မှာ ကတွက်ပန်းပွင့်သည် ကတွက်သီး၏ အတွင်းထဲတွင်ရှိပါသည်။အသီးပျော့၍ အခွံပါးပြီး ကတွက်သီးမှည့်ကို အသီးအတိုင်းသော်လည်းကောင်း၊ ထန်းညှက်ဖြင့် ယိုထိုး၍လည်းကောင်း စားသုံးကြပါသည်။ ကတွက်သီးကိုစားသုံးခြင်းဖြင့် ဝမ်းချုပ်မှုကာကွယ်ပေးသည်။ ကင်ဆာတိုက်ဖျက်ပေးနိုင်သည်။ သကြားဓာတ်လျော့နည်းစေ၍ ဆီးချိုသမားများအတွက် ဆီးချိုကိုထိန်းချုပ်ပေးနိုင်ပါသည်။ သွေးတိုးကိုလည်းကာကွယ်ပေးသည်။ ကိုယ်ခံအားစနစ်ကောင်းမွန်စေသည်။ ကတွတ်သီးကို အလွန်အကျွံစားသုံးမည်ဆိုလျှင် အစာအိမ်နာများဖြစ်တတ်ပါသည်။ အသည်းကိုထိခိုက်စေသည်။ သွေးတွင်းသကြားဓာတ်နည်းသူများအနေဖြင့် စားသုံးရန်မသင့်ပါ။ ပြည်မြို့တွင် ကတွတ်သီး အလုံး (၁၀၀) လျှင် ၁၅၀၀ကျပ်နှုန်းဖြင့် ရောင်းချလျက်ရှိပြီး ပေါက်ခေါင်း၊ ပန်းတောင်း၊ ရွှေတောင်၊ သဲကုန်းဘက်တို့မှ လာရောက်ရောင်းချလေ့ရှိကြကြောင်းသိရှိရပါသည်။

DOCA(ပဲခူး)

    စပျစ်သီးသည် လူကြိုက်များသည့် အသီးတစ်မျိုးဖြစ်ပြီး အရောင်အသွေး၊ အနံ့၊ အရသာနှင့်လည်းပြည့်စုံသည်။ ခရမ်းရောင်ရင့်ရင့်၊ အနီရောင်၊ အစိမ်းရောင် စသည်ဖြင့် အရောင်အမျိုးမျိုးရှိပါသည်။ အရသာကောင်းသကဲ့သို့ ဆေးဖက်လည်းဝင်ပါသည်။

    စပျစ်သီးတွင် ကယ်လ်လိုရီ၊ ကာဗိုဟိုက်ဒရိတ်၊ ပရိုတင်း၊ အဆီ၊ အမျှင်ဓာတ်၊ ဗီတာမင် C၊ ဗီတာမင် K၊ သီရာမင်း၊ Riboflavin၊ ဗီတာမင် B6၊ ပိုတက်ဆီယမ်၊ ကော့ပါး၊ မဂ္ဂနိ စသည့် အာဟာရ ၁၃မျိုးပါဝင်ပြီး ကင်ဆာကာကွယ်ပေးခြင်း၊ နှလုံးကိုကျန်းမာစေခြင်း၊ သွေးပေါင်ကျ စေခြင်း၊ ဝမ်းမှန်စေခြင်း၊ ဓာတ်မတည့်မှုကိုသက်သာစေခြင်း၊ မျက်လုံးကိုကျန်းမာစေခြင်း၊ ဝက်ခြံမပေါက်စေခြင်း စသည့်ကျန်းမာရေးကို အထောက်အကူပြုပါသည်။

    စပျစ်သီးအစေ့သည် ဆီးချိုရောဂါကြောင့်ဖြစ်သော အမြင်အာရုံပြဿနာကိုလည်းကာကွယ်ပေးပါသည်။ စပျစ်ဝိုင်ကြိုက်သူများအတွက် အရောင်ရင့်ရင့်ကို ရွေးချယ်သောက်သုံးခြင်းဖြင့် သွေးကျဲစေနိုင်ပါသည်။ တောင်ငူမြို့ရှိ သစ်သီးဆိုင်များတွင် စပျစ်သီးတစ်ပိဿာလျှင် ၂၀၀၀၀ကျပ်ဖြင့်ရောင်းချကြောင်းနှင့် လူကြိုက်များ၍ ရောင်းအားကောင်းကြောင်းသိရှိရပါသည်။

DOCA(ပဲခူး)