ပြည်တွင်းကုန်သွယ်မှုသတင်း

     မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်သည် ချင်းတွင်းမြစ်နှင့် ဧရာဝတီမြစ်တို့ဆုံရာ မြို့နယ်တစ်ခုဖြစ်ပါသည်။ ရေစကြိုမြို့နယ်တွင် မိုးသီးနှံများဖြစ်သည့် မြေပဲ၊ နှမ်း၊ ပဲတီစိမ်း၊ ပဲစဉ်းငုံ၊ အစေ့ထုတ်ပြောင်းနှင့် ဝါသီးနှံများကို စိုက်ပျိုးကြပါသည်။ မိုးသီးနှံများထဲတွင် နိုင်ငံတော်မှ ပြည်တွင်းဖြစ် အဝတ်အထည်များ ထုတ်လုပ်နိုင်ရန်အတွက် အခြေခံလိုအပ်သည့် ချည်များ အများအပြားထွက်ရှိစေရေး ဝါသီးနှံများစိုက်ပျိုးမှုကို ပံ့ပိုးကူညီဆောင်ရွက်လျှက်ရှိပါသည်။ ရေစကြိုမြို့နယ်အနေဖြင့် ဝါသီးနှံကို (၃၁၃၄) ဧက စိုက်ပျိုးကြောင်းသိရှိရပါသည်။  မြေခဲတောင်၊ ကိုင်းမကျီး၊ ပခန်း၊ မြေဖြူ၊ ဂွေးချို၊ စည်သာ၊ ဆင်ချောင်းကျေးရွာများတွင် အဓိကစိုက်ပျိုးလျက်ရှိကြောင်း သိရသည်။

    ဝါသီးနှံများကို နှမ်း၊ မြေပဲ၊ ပဲတီစိမ်း သီးနှံခင်းများတွင် ကြားညှပ်စိုက်ပျိုးခြင်းနှင့် အများအား ဖြင့် သီးသန့်စိုက်ပျိုးကြပါသည်။ မျိုးများအနေဖြင့် ဒေသမျိုး၊ ငွေချည်-၉၊ ရွှေတောင်-၁၀၊ ချည်မျှင် ရှည်ဝါများကို ဩဂုတ်လတွင် စတင်စိုက်ပျိုးကြကြောင်း၊ မိမိအနေဖြင့် ယခင်နှစ်က (၅)ဧက စိုက်ပျိုး ခဲ့ကြောင်း၊ ယခုနှစ်တွင် (၇)ဧက စိုက်ပျိုးထားရှိကြောင်း၊ (၁)ဧက အနေဖြင့် မျိုးစေ့ (၇)ပိဿာခန့် ကုန်ကျပြီး ထွန်ယက်ခ၊ မျိုးစေ့၊ စိုက်စရိတ်၊ သွင်းအားစု၊ ခူးဆွတ်ရိတ်သိမ်းခြင်း တို့အတွက် စုစုပေါင်း ကုန်ကျစရိတ်မှာ (၆) သိန်းခန့် ကုန်ကျပြီး အထွက်နှုန်းအနေဖြင့် (၁) ဧကတွင် (၂၅၀ မှ၃၅၀) ပိဿာ ထွက်ရှိကြောင်း၊ (၁)ပိဿာလျှင် ကျပ်(၃၅၀၀)ခန့်ရောင်းရပြီး အကျိုးအမြတ်အနေဖြင့် ကျပ်(၅)သိန်း ခန့်ရရှိကြောင်း သိရသည်။ 

   ဝါသီးနှံသည် မိုးသီးနှံဖြစ်သည့်အတွက် မိုးတွင်းကာလမှာ စိုက်ပျိုးကြကာ မိုးကြိုက်သောသီးနှံဖြစ်ပြီး မိုးကောင်းသောနှစ်များတွင် ပိုမိုထွက်ရှိပါကြောင်း၊ သွင်းအားစုဖြစ်သည့် မြေဩဇာနှင့်ပိုးသတ်ဆေးများ စနစ်တကျသုံးစွဲမည်ဆိုလျှင် ပိုမိုထွက်ရှိနိုင်ပါကြောင်း၊ အခြားသီးနှံများကဲ့သို့ အလုပ်မရှုပ်ပဲ သက်သာသောကြောင့် တောင်သူများ ပိုမိုစိုက်ပျိုးကြကြောင်း၊ ယခုအချိန်တွင် ဝါသီးနှံများမှာ အပင်ဖြစ်ထွန်းအားကောင်းမွန်ပြီး အကိုင်းအခက်များ ဝေဆာကာ အသီးအပွင့်များ စတင်ပွင့်ဖူးလျက်ရှိပါကြောင်း၊ ရာသီဥတုအခြေအနေမှာလည်း ကောင်းမွန်လျက်ရှိသဖြင့်  ယခုနှစ်တွင် ကုန်ကျစရိတ်များပြားသလို အထွက်နှုန်းများကောင်းနိုင်ကြောင်း၊ တောင်သူများမျှော်လင့်နေသည့် အကျိုးအမြတ်ရရှိမည်ဖြစ်ကြောင်း  တောင်သူတစ်ဦး၏ ပြောပြချက်အရ သိရှိရပါသည်။

DOCA(မကွေး)

       ပေါင်းတည်မြို့နယ် မြို့မဈေးအတွင်း စက်တင်ဘာလနောက်ဆုံးအပတ်တွင်ဖြစ်ပေါ်နေသော အခြေခံစားသောက်ကုန်ဈေးနှုန်းနှင့် သား/ ငါးဈေးနှုန်းများမှာ ကြက်သွန်နီအလတ်တစ်ပိဿာ (၁၈၀၀)ကျပ်၊ ကြက်သွန်နီထိပ်စ တစ်ပိဿာ (၂၄၀၀)ကျပ်၊ ကြက်သွန်ဖြူကြူကုတ် တစ်ပိဿာ (၂၄၀၀၀)ကျပ်၊ ရှမ်းမွှာတစ်ပိဿာ (၂၀၀၀၀)ကျပ်၊ ကြက်သွန်ဖြူဥတစ်လုံးတစ်ပိဿာ(၂၅၀၀၀)ကျပ်၊ ငရုတ်ခြောက်တစ်ပိဿာ(၁၅၀၀၀)ကျပ်၊ အာလူးတစ်ပိဿာ (၅၀၀၀)ကျပ်နှင့် အမဲသားတစ်ပိဿာ (၂၃၀၀၀)ကျပ်၊ ကြက်သား cpတစ်ပိဿာ(၂၀၀၀၀)ကျပ်၊ ဗမာ ကြက်တစ်ပိဿာ(၂၅၀၀၀)ကျပ်၊ ဝက်သားတစ်ပိဿာ(၂၂၀၀၀)ကျပ်၊ ဆိတ်သားတစ်ပိဿာ (၂၅၀၀၀)ကျပ်၊ ငါးမြစ်ချင်းတစ်ပိဿာ (၁၅၀၀၀)ကျပ်ဖြင့် ရောင်းချလျက်ရှိကြောင်း သိရပါသည်။

       ပဲခူးတိုင်းဒေသကြီး၊ နတ်တလင်းခရိုင်၊ ပေါင်းတည်မြို့ဈေးကွက်အတွင်းတွင် အခြေခံစားကုန်ဈေးနှုန်းများနှင့် သားငါးဈေးနှုန်းများမှာ ၂၀၂၄ခုနှစ်၊ စက်တင်ဘာလနောက်ဆုံးပတ်တွင် အနည်းငယ်မြင့်တက်လျက်ရှိကြောင်း စုံစမ်းသိရှိရပါသည်။

DOCA(ပဲခူး)

       ပဲခူးတိုင်းဒေသကြီး၊ နတ်တလင်းခရိုင်၊ သဲကုန်းမြို့နယ်တွင် မိုးစပါးစိုက်ဧက (၈၂၆၁၀)ကို စိုက်ပျိုးရန်လျာထားခဲ့ရာ လျာထားဧကအတိုင်း ပြည့်မီစွာစိုက်ပျိုးနိုင်ခဲ့ပါသည်။ ယခုစက်တင်ဘာလနောက်ဆုံးပတ်တွင် ကောက်စောစပါးများ စတင်ရိတ်သိမ်းနေပြီဖြစ်ရာ  ရိတ်သိမ်းပြီးစီးမှုဧက (၅၁၃) ရှိ၍ တစ်ဧကပျမ်းမျှအထွက်နှုန်း  ၉၂.၈၄တင်းရှိကြောင်း သိရှိရပါသည်။ ပေါ်ဦးစကောက်စောစပါး တင်း(၁၀၀)လျှင် ကွင်းဈေးစက်ကျကို အစိုဓာတ်(၂၅%)ဖြင့် (၁၆၅၀၀၀၀)ကျပ် ဈေးနှုန်းရှိကြောင်း သိရှိရပါသည်။

DOCA(ပဲခူး)

      စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီး မှူးရုံးအနေဖြင့် စားသုံးသူကာကွယ်ပေးရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေး လုပ်ငန်း များ ဆောင်ရွက်လျက်ရှိပြီး ပြည်တွင်းကုန်သွယ်မှုဖွံ့ဖြိုးရေးနှင့် စားသုံးသူကာကွယ်ရေး လုပ်ငန်းများဖြင့် နိုင်ငံစီးပွားဖွံ့ဖြိုးတိုးတက်စေရန် ဟူသော မျှော်မှန်းချက်နှင့်အညီ အသင်းအဖွဲ့များ၊ အစုအဖွဲ့များ ဖွဲ့စည်းပေးပြီး ပိုမိုအားကောင်းလာစေရေး ပူးပေါင်းဆောင်ရွက်လျက်ရှိပါသည်။ ပွဲရုံးများ၏ သီးနှံဈေးနှုန်းများနှင့် အရောင်းအဝယ်ဖြစ်မှုများကိုလည်း  တင်း/ တန် စာရင်းတို့ဖြင့် အပတ်စဉ်၊ လစဉ် တင်ပြလျက်ရှိပါသည်။

    ကန့်ဘလူပွဲရုံများအနေဖြင့် ၂၀၂၄ ခုနှစ်၊ စက်တင်ဘာလအတွင်း ပွဲရုံသို့ဝင်ရောက် အရောင်းအဝယ် ဖြစ်နေသော သီးနှံအမျိုးအစား၏ ဒေသပေါက်ဈေးနှုန်းများ အဝင် /အထွက် တင်းများ၏ အရောင်း အဝယ်ဖြစ်မှု အခြေအနေများမှာ ကုလားပဲ v2 (၄၈၀) တင်းဈေးနှုန်းမှာ (၉၅,၀၀၀) ကျပ်၊ ကုလားပဲ 929 (၁၂၇၅) တင်းဈေးနှုန်းမှာ (၉၀,၀၀၀)ကျပ်၊ ကုလားပဲ ထိုင်ဝမ် (၁၃၅) တင်း ဈေးနှုန်းမှာ (၈၅,၀၀၀) ကျပ်၊ မတ်ပဲ အမျိုးအစား (၅၆၂.၅) တင်း ဈေးနှုန်းမှာ (၁၀၅၀၀၀)ကျပ်၊  ပဲစဉ်းငုံ (နီ) (၁၀၈)တင်း ဈေးနှုန်းမှာ (၁၄၅,၀၀၀)ကျပ်၊ ပဲစဉ်းငုံ (ဖြူ) (၁၆.၅) တင်းဈေးနှုန်းမှာ (၁၃၅,၀၀၀) ကျပ်၊ နေကြာ (၄၄၄) တင်းဈေးနှုန်း မှာ (၅၈,၀၀၀)ကျပ်၊ ပဲတီစိမ်း (၇၂၀) တင်းဈေးနှုန်းမှာ (၇၇,၀၀၀)ကျပ်နှင့် CP ပြောင်းဆံ (၁,၆၅၀) တင်း ဈေးနှုန်းမှာ (၂၅,၀၀၀) ကျပ်  အသီးသီးပေါက်ဈေးရှိကြောင်း သိရသည်။

     ယခု ရာသီကာလတွင် ကုလားပဲများနှင့် ပြောင်းဆံများ လှိုင်လှိုင်ထွက်ရှိချိန်ဖြစ်ပြီး ယခင် ဩဂုတ်လ ပေါက်ဈေးနှုန်းနှင့်နှိုင်းယှဉ်ကြည့်မည်ဆိုပါက ကုလားပဲ (ထိုင်ဝမ်) တစ်တင်းလျှင် (၅,၀၀၀)ကျပ်၊ ကုလားပဲ v2 တစ်တင်းလျှင် (၄,၀၀၀)ကျပ်၊ ကုလားပဲ 929 တစ်တင်းလျှင် (၆,၀၀၀) ကျပ်၊ ပဲစဉ်းငုံ (ဖြူ) တစ်တင်း လျှင် (၃,၀၀၀) ကျပ်နှင့် ပဲတီစိမ်းတစ်တင်းလျှင် (၃၃,၀၀၀) ကျပ် ဈေနှုန်းများ အသီးသီး ကျဆင်းလျက်ရှိပြီး ပဲစဉ်းငုံ (အနီ) သည် ယခင်လဈေးနှုန်းအတိုင်း တည်ငြိမ်လျက်ရှိကာ  မတ်ပဲတစ်တင်းလျှင်(၅,၀၀၀)ကျပ်၊ နေကြာတစ်တင်းလျှင် (၁၅,၀၀၀)ကျပ်  ယခင်လဈေးနှုန်းထက် မြင့်တက်လျက်ရှိကြောင်း၊ ယခုရာသီတွင် ပြောင်းဆံများ အဝင်အများဆုံးကာလဖြစ်ပြီး ကန့်ဘလူမြို့ သံလမ်းအနောက်ဖက်ရှိ ကျေးရွာများအားလုံးမှ ဝင်ရောက်လာကြောင်းနှင့် မိမိတို့ပွဲရုံမှ သီးနှံများကို မန်းလေးမြို့ ဇောတိကပွဲရုံတစ်ခုတည်းကိုသာ တင်ပို့ ရောင်းချလျက်ရှိကြောင်း ကန့်ဘလူမြို့ပေါ်ရှိ  ပွဲရုံပိုင်ရှင်တစ်ဦးထံမှ သတင်းရရှိသည်။

DOCA (စစ်ကိုင်း)

      မန္တလေးတိုင်းဒေသကြီး၊ ကျောက်ဆည်မြို့နယ်တွင် စပါး၊ပဲမျိုးစုံနှင့် ဆီထွက်သီးနှံများ စိုက်ပျိုးသည့်အပြင် စားဖိုဆောင်သီးနှံများကိုလည်း ရာသီအလိုက် မိသားစုအပိုဝင်ငွေရရှိအောင် စိုက်ပျိုးကြပါသည်။ ၎င်းသီးနှံများအနက် တိုင်ထောင်တစ်လပဲတောင့်ရှည်များကို တစ်နိုင်တစ်ပိုင်စိုက်ပျိုးလာကြပါသည်။ ယခင်အချိန်က ပဲတောင့်ရှည်သီးနှံများကို လယ်ကန်သင်းရိုးများတွင် စိုက်ပျိုးကြပြီး ယခုအချိန်တွင် လယ်မြေနှင့် ယာမြေများတွင် စီးပွားဖြစ်စိုက်ပျိုးလာကြပါသည်။ ပဲတောင့်ရှည်စိုက်ပျိုးရာတွင် မျိုးအနေဖြင့် အစိမ်းနု၊ အစိမ်းရင့်၊ ကတ္တီပါအနီရောင်မျိုးများသာ အသုံးများကြောင်း(အန်ဒီ ၃၁၃)တံဆိပ်မျိုးတစ်ထုတ်လျှင်(၆၀၀၀/-)ကျပ်‌ပေးဝယ်ရကြောင်း၊ (၁)ဧက ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစု‌ပေါင်း (၃၀၀၀၀၀/-) ကျပ် ဝန်းကျင်ခန့်ကုန်ကျကြောင်း၊ အထွက်နှုန်းအနေဖြင့် မြေအမျိုးအစား‌ပေါ်မူတည်ပြီး (၁)ဧကလျှင် ပိဿာ(၃၅၀-၄၀၀)အထိ ထွက်ရှိကြောင်း၊ ဈေးကွက်အနေဖြင့် ရာသီပေါ်စအချိန်တွင် ဖောက်သည်ဈေးအနေဖြင့် တစ်ပိဿာလျှင်(၃၁၀၀/-)ကျပ်၊ လက်လီဈေးနှုန်းအနေဖြင့်တစ်ပိဿာလျှင်(၃၆၀၀/-) ကျပ်ဖြင့်  ရောင်းချရပြီး ယခုလှိုင်လှိုင်ထွက်ပေါ်ချိန်တွင် ဖောက်သည်ဈေးအနေဖြင့် တစ်ပိဿာလျှင် (၃၀၀၀/-)ကျပ်၊ လက်လီဈေးနှုန်းအနေဖြင့် တစ်ပိဿာလျှင်(၃၅၀၀/-)ကျပ်၊ (၂၅)ကျပ်သားတစ်စီး လျှင်(၈၀၀-၁၀၀၀/-)ကျပ် ရောင်းချရကြောင်း၊ ပဲတောင့်ရှည်သီးနှံကို ပွဲစားများမှ စိုက်ခင်းအထိလာရောက်ဝယ်ယူကြကြောင်း၊ မြိို့ပေါ်ဈေးများသို့လည်း သွားရောက်ရောင်းချကြကြောင်း၊ တောင်သူအကျိုးအမြတ်အနေဖြင့် စိုက်ပျိုးစရိတ်နှုတ်ပြီးပါက(၇၅၀၀၀၀/-)ကျပ်ခန့်မြတ်ကြောင်း၊ ဈေးနှုန်းကောင်းမွန်မှုကြောင့် တောင်သူများ တွက်ချေကိုက်လျက်ရှိကြောင်း၊ စိုက်ပျိုးစရိတ်သက်သာပြီး မိသားစုအပိုဝင်ငွေလည်းရရှိကြောင်း၊ ရေဝင်ရောက်မှုမရှိသော ကျောက်ဆည်မြို့နယ်၊ ကျောင်းကုန်းကျေးရွာမှ ပဲတောင့်ရှည်စိုက်ပျိုးသော တောင်သူတစ်ဦး၏ ပြောကြားချက်အရ သိရှိရပါသည်။

DOCA(မန္တလေး)