ပြည်တွင်းကုန်သွယ်မှုသတင်း

      သဘာဝဘေးအန္တရာယ် ရေကြီးမှုဒဏ်ခံခဲ့ရသော အောင်ပန်းမြို့သည် ယခုအခါတွင် ရေများ ပြန်ကျဆင်းသွားပြီဖြစ်၍ ယခင်ကကဲ့သို့ ကုန်စိမ်းဈေးကွက် ပြန်လည်ဦးမော့လာပြီဖြစ်ပါသည်။ ရှေ့ရက်များတွင် ရေလွှမ်းမိုးမှုကြောင့် သီးနှံဈေးနှုန်းများလျော့နည်းခဲ့သော်လည်း ယခုအခါတွင် ကုန်စိမ်းဈေးနှုန်းများ ပြန်လည်မြင့်တက်လာပြီဖြစ်ကြောင်း တောင်သူတစ်ဦးထံမှသိရပါသည်။

          ယခုအခါတွင် အာလူးတစ်ပိဿာလျှင် (၃၂၀၀) ကျပ်မှ (၅၃၀၀) ကျပ်၊ ကြက်သွန်ဖြူတစ်ပိဿာလျှင် (၁၀၀၀၀) ကျပ်မှ (၁၄၀၀၀) ကျပ်၊ ချင်း(ဂျင်း) တစ်ပိဿာလျှင် (၁၉၀၀) ကျပ်မှ (၂၀၀၀) ကျပ်၊ ဂေါ်ဖီတစ်ထုပ်လျှင် (၃၅၀) ကျပ်မှ (၁၀၀၀) ကျပ်၊  ခရမ်းချဉ်သီးတစ်ပိဿာလျှင် (၁၃၀၀) ကျပ်မှ (၁၆၀၀) ကျပ် အထိ အသီးသီးရှိကြောင်း အောင်ပန်းမြို့ ကုန်သည်တစ်ဦးထံမှသိရှိရပါသည်။

        “ ဒီရက်ပိုင်း ရေပြန်ကြသွားသည့်အတွက် သီးနှံဈေးကွက် နည်းနည်းပြန်ဖြစ်လာတယ်ပြောရမှာပေါ့။ တောင်သူတွေရဲ့ ဘဝက သီးနှံဈေးကွက်ပေါ် မှီခိုထားရတာဖြစ်တဲ့အတွက် ဈေးနှုန်းတွေအားလုံး ပုံမှန်အတိုင်းပြန်ဖြစ်စေချင်ပါတယ် ” ဟု ဒေသခံတစ်ဦးက ပြောကြားခဲ့ကြောင်းသိရှိရပါသည်။

DOCA(ရှမ်း)

      ရှမ်းပြည်နယ်(တောင်ပိုင်း)၊ အောင်ပန်းမြို့၊ ပင်းတယ၊ လွိုင်လင်နှင့် အနီးတဝိုက်ရှိကျေးရွာများတွင် ရာသီပေါ်သီးနှံဖြစ်သော ပန်းဂေါ်ဖီထုပ်များ စတင်ပေါများစွာထွက်ပေါ်လာပြီဖြစ်ကြောင်းသိရသည်။ အောင်ပန်း၊ ပင်းတယ၊ လွိုင်လင်အနီးတဝိုက်ရှိ ကျေးရွာများမှ တောင်သူများသည် ပန်းဂေါ်ဖီထုပ်များကို စီးပွားဖြစ်သော်လည်းကောင်း၊ တစ်နိုင်တစ်ပိုင်စားသုံးရန်အတွက်သော်လည်းကောင်း စိုက်ပျိုးကြကြောင်းသိရှိရသည်။

        စိုက်ပျိုးထွက်ရှိလာသော ပန်းဂေါ်ဖီထုပ်များကို အောင်ပန်းမြို့ မြို့မဈေးရှိ အဝယ်ဒိုင်ပွဲရုံများသို့ လာရောက်ရောင်းချကြကြောင်းနှင့် တချို့ကို ရန်ကုန်၊ မန္တလေးနှင့် အခြားနီးစပ်ရာမြို့များသို့လည်း တင်ပို့ရောင်းချကြကြောင်းသိရသည်။ ဈေးနှုန်းများမှာ အကြီးအသေးပေါ်မူတည်၍ လက်ကားဈေး ဂေါ်ဖီထုပ်တစ်ထုပ်လျှင် (၄၀၀) ကျပ်မှ (၈၅၀) ကျပ်အထိရှိပြီး လက်လီဈေး (၅၀၀) ကျပ် (၁၇၀၀) ကျပ်အထိရှိကြောင်းသိရှိရသည်။

         ယခင်အပတ် ရှမ်းပြည်နယ်တောင်ပိုင်းအတွင်း မိုးသည်းထန်စွာရွာသွန်းမှုကြောင့် ရေကြီးရေလျှံမှုများနှင့် မြေပြိုမှုများကြောင့် ကုန်ပစ္စည်းများမှာ ရောင်းသူဝယ်သူမရှိဘဲ အရောင်းအဝယ်ပါးလျက်ရှိကြောင်းသိရှိရသည်။ ယခုအခါတွင် ရေများလျော့ကျသွားပြီး ကားလမ်းများ ပြန်လည်ပွင့်လင်းလာ၍ ရောင်းဝယ်ကုန်သွယ်မှုများ တဖြည်းဖြည်းပြန်လည်စတင်လာပြီဖြစ်ကြောင်း ဒေသခံတစ်ဦး၏ ပြောကြားချက်အရသိရှိရပါသည်။

DOCA(ရှမ်း)

       ရှမ်းပြည်နယ်(အရှေ့ပိုင်း)၊ ကျိုင်းတုံမြို့သည် ရေခံ၊ မြေခံကောင်းသည်နှင့်အညီ စိုက်ပျိုးရေးလုပ်ငန်းများကို အဓိကစိုက်ပျိုးလျက်ရှိရာ ၂၀၂၃-၂၀၂၄ ခုနှစ်၊ မိုးရာသီ မေလမှစ၍ ဖူးစားပြောင်း (ခေါ်) သကြားပြောင်းကို တစ်နိုင်တစ်ပိုင်စိုက်ပျိုးကြပါသည်။ ဖူးစားပြောင်း(ခေါ်) သကြားပြောင်းသည် ဩဂုတ်လ ပထမပတ်တွင် စတင်ထွက်ရှိပြီး စိုက်ပျိုးကြသည့် တောင်သူများအနေဖြင့် မိသားစုအပိုဝင်ငွေများရရှိကြောင်းသိရှိရပါသည်။

       ဖူးစားပြောင်း(ခေါ်) သကြားပြောင်းသည် ရေလုံလောက်စွာရရှိပါက (နွေ၊ မိုး၊ ဆောင်း) တစ်နှစ်ပတ်လုံးစိုက်ပျိုးနိုင်ပြီး ကုန်ကျစရိတ်များအနေဖြင့် မျိုးသွင်းအားစု၊ ပိုးသတ်ဆေး၊ လုပ်သားခအပါအဝင် တစ်ဧကလျှင် စုစုပေါင်း (၈) သိန်းကျပ်ခန့်ကုန်ကျကြောင်း၊ သကြားပြောင်းစိုက်ပျိုးပြီး ရက်ပေါင်း (၈၀) မှ (၉၀) ရက်အတွင်း အသီးများကို စတင်ခူးဆွတ်နိုင်ပြီး သကြားပြောင်းတစ်ဧကလျှင် အဖူးပေါင်း (၁၄၀၀၀) ခန့်ထွက်ရှိကြောင်းသိရှိရပါသည်။ လက်ရှိအချိန် စက်တင်ဘာလတွင် ဖူးစားပြောင်း (ခေါ်) သကြားပြောင်းရောင်းချရသည့်ဈေးနှုန်းမှာ တစ်ဖူးလျှင် လက်ကားဈေးနှုန်း (၆၀၀) ကျပ်ဖြင့်လည်းကောင်း၊ လက်လီဈေးနှုန်း (၇၀၀) ကျပ်ဖြင့်လည်းကောင်း အရောင်းအဝယ်ရှိပြီး အကျိုးအမြတ်အနေဖြင့် တစ်ဧကလျှင် (၄) သိန်းကျပ်ခန့်ရရှိကာ ဖူးစားပြောင်း (ခေါ်) သကြားပြောင်းစိုက်တောင်သူများ ဝင်ငွေရရှိပြီး အဆင်ပြေလျက်ရှိကြောင်း ဈေးကွက်သတင်းအရသိရှိရပါသည်။

DOCA(ရှမ်း)

     ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ် မြို့မဈေးကြီးအတွင်းတွင် စက်တင်ဘာလတတိယပတ်အတွင်း ရောင်းချနေသော အခြေခံစားကုန်များ၏ဈေးနှုန်းများမှာ  ကြက်သွန်နီ (ကြီး)တစ်ပိဿာလျှင် ၃၀၀၀ ကျပ်၊ ကြက်သွန်နီ(လတ်) တစ်ပိဿာလျှင် ၂၇၀၀ ကျပ်၊ ကြက်သွန်ဖြူ(ရှမ်းမွှာ) တစ်ပိဿာလျှင် ၂၄၀၀၀ ကျပ်၊ ကြူကုတ် တစ်ပိဿာလျှင် ၂၀၀၀၀ ကျပ်၊ ချင်းတက် တစ်ပိဿာလျှင် ၁၂၀၀၀ ကျပ်၊ ငရုတ်ခြောက် (အရှည်) တစ်ပိဿာလျှင် ၁၈၀၀၀ ကျပ်၊ ငရုတ်ခြောက်(အပု) တစ်ပိဿာလျှင် ၂၆၀၀၀ ကျပ်၊ အာလူး တစ်ပိဿာလျှင် ၈၀၀၀ ကျပ်တို့ဖြစ်ပြီး ယခင်ဩဂုတ်လထက် ဈေးအနည်းငယ် မြင့်တက်နေကြောင်း မြို့မဈေးကြီးအတွင်းရှိ ကုန်စုံဆိုင်များမှ သိရှိရပါသည်။ ပဲဈေးနှုန်းများမှာ မြေပဲလုံးဆံ တစ်ပိဿာလျှင်(၁၀၀၀၀)ကျပ်၊ ကုလားပဲခြမ်းစိမ်း တစ်ပိဿာလျှင်(၇၂၀၀)ကျပ်ဖြင့် ပုံမှန်ဈေးနှုန်းအတိုင်း အရောင်းအဝယ်ဖြစ်လျက်ရှိပြီး ငါးဈေးနှုန်းမှာ ငါးဘတ်တစ်ပိဿာလျှင် (၈၀၀၀) ကျပ်၊ တီလားဗီးယားငါးတစ်ပိဿာလျှင် (၅၀၀၀) ကျပ်ဖြင့် လှိုင်လှိုင်ပေါများစွာ‌ ရောင်းဝယ်လျက်ရှိကြောင်း မြို့မဈေးကြီးအတွင်းရှိ အသား/ငါး ရောင်းချသူများထံမှ သိရှိရပါသည်။

DOCA(ပဲခူး)

      စားသုံးသူရေးရာဦးစီးဌာန၊ သာယာဝတီခရိုင်ဦးစီးမှူးရုံးရှိ သာယာဝတီခရိုင်ဦးစီးမှူးနှင့် တာဝန်ရှိသူများသည် သာယာဝတီခရိုင်အတွင်းရှိ သီးနှံဈေးနှုန်းများနှင့် လက်ကျန်စာရင်းများကို သိရှိစေရန် (၂၂.၉.၂၀၂၄) ရက်နေ့တွင် ကွင်းဆင်းဆောင်ရွက်လျက်ရှိရာ မတ်ပဲဈေးနှုန်းများမှာ တစ်တန်လျှင် ၃၈၉၁၀၀၀ ကျပ်ဖြစ်ပြီး၊ မြေပဲဆံမှာတစ်တန်လျှင် ၅၀၀၀၀၀၀ ကျပ်၊ နှမ်းတစ်တင်းလျှင် ၅၂၀၀၀၀၀ ကျပ်နှင့် အစေ့ထုတ်ပြောင်းတစ်တန်လျှင် ၁၁၂၀၀၀၀ကျပ်ရှိပါသည်။ ဆိုင်၊ ပွဲရုံအတွင်း လက်ကျန်အခြေအနေမှာ မတ်ပဲလက်ကျန် ၇၅တန်ခန့်နှင့် အစေ့ထုတ်ပြောင်းမှာ လက်ကျန်မရှိတော့ကြောင်း သိရှိရပါသည်။

DOCA(ပဲခူး)