ပြည်တွင်းကုန်သွယ်မှုသတင်း

   မကွေးတိုင်းဒေသကြီး၊ တိုင်းဒေသကြီးအစိုးရအဖွဲ့စီစဉ်ကြီးကြပ်မှုဖြင့် တိုင်းဒေသကြီးဆီကုန်သည်များအသင်းမှ မင်းကံကြီးရပ်ကွက်နှင့် ဆုံရပ်ကွက်ရှိ ပြည်သူများသို့ (၉-၉-၂၀၂၃)ရက်နေ့၊ နံနက်(၀၉း၃၀)နာရီအချိန်တွင် စားသုံးဆီရောင်းချပေးရာနေရာသို့သွားရောက်၍ ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ခရိုင်အုပ်ချုပ်ရေးမှူး ဦးအောင်ထူး၊ စားသုံးသူရေးဦးစီးဌာန၊ တိုင်းဒေသကြီးဦးစီးမှူး ဦးမြင့်ဝင်း၊ ခရိုင်/ မြို့နယ်စိစစ်ဖော်ထုတ်ကြပ်မတ်ရေးအဖွဲ့ဝင်တို့က သတ်မှတ်ဈေးနှုန်းထက် ပိုမိုရောင်းချမှုမရှိစေရေး စိစစ်ကြပ်မတ်ခြင်းများဆောင်ရွက်ခဲ့ကြပါသည်။

    ဆက်လက်၍ အောင်ချမ်းသာရပ်ကွက်အတွင်းရှိ လုပ်ငန်းရှင်ဒေါ်အေးအေးဝင်း၏ “ပါရမီ” စားသုံးဆီဆိုင်အရောင်းဆိုင်နှင့် လုပ်ငန်းရှင် ဒေါ်စန်းနွဲ့၏ “ စံပယ်ဦး” စားသုံးဆီအရောင်းဆိုင်များသို့သွားရောက်၍ ပြည်သူများအား စားသုံးဆီရောင်းချရာတွင် သတ်မှတ်ဈေးနှုန်းအတိုင်း ရောင်းချစေရန်နှင့် ဈေးနှုန်းမြှင့်တင်ရောင်းချမှုမရှိစေရေး ကွင်းဆင်းစစ်ဆေးခဲ့ကြပါသည်။

    (၆-၉-၂၀၂၃)ရက်နေ့၊ နံနက်(၀၉း၀၀)နာရီအချိန်တွင်လည်း မကွေးတိုင်းဒေသကြီးအစိုးရအဖွဲ့၏ စီစဉ်ကြီးကြပ်မှုဖြင့် မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းနှင့်ဆန်ကုန်သည်အသင်း၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင်များ၊ အထွေထွေအုပ်ချုပ်ရေးဦးစီးဌာနမှ အရာထမ်း၊ အမှုထမ်းများ၊ စားသုံးသူရေးရာဦးစီးဌာန၊ မြို့နယ်စည်ပင်သာယာရေးအဖွဲ့တို့ပူးပေါင်း၍ မကွေးမြို့၊ သိင်္ဂဂီရိရပ်ကွက်ရှိ “သီရိမင်္ဂလာ” ဓမ္မာရုံရှေ့တွင် ဆန်(၁)ပြည်လျှင် ကျပ်(၂၆၅၀)၊ စာအုန်းဆီ (၁)ပိဿာ လျှင် ကျပ်(၄၅၀၀)ဖြင့် အိမ်ထောင်စု(၁၁၀၀)စုအတွက် ဆန်(၃၀၀)ပြည်၊ စားအုန်းဆီ(၁၁၀၀)ပိဿာတို့ကိုလည်းကောင်း၊ မင်္ဂလာဈေးရှေ့တွင် အိမ်ထောင်စု(၁၁၀၀)စုအတွက် စားအုန်းဆီ(၁၁၀၀)ပိဿာ၊ ဆန်(၇၂၀) ပြည်တို့ကိုလည်းကောင်း၊  ဆားရွှေကင်းရပ်ကွက်ရှိ “ကင်းကျောင်း” ဓမ္မာရုံရှေ့တွင် အိမ်ထောင်စု (၅၅၀)စုအတွက် ဆန်(၁၈၀)ပြည်၊ စားအုန်းဆီ(၅၅၀)ပိဿာနှင့် မယ်လှတောင်ကျေးရွာအုပ်စု၊ ချောင်းဖြူကျေးရွာ၊ ရွာလယ်ဓမ္မာရုံရှေ့တွင် အိမ်ထောင်စု(၅၅၀)စုအတွက် စားအုန်းဆီ(၅၅၀)ပိဿာတို့ကိုလည်းကောင်း၊  စုစုပေါင်းအိမ်ထောင်စု (၃၃၀၀)စုအား ဆန်(၁)ပြည်၊ စားအုန်းဆီ(၁)ပိဿာနှုန်းဖြင့် ဈေးနှုန်းသက်သာစွာ တိုက်ရိုက်ရောင်းချပေးခဲ့ရာ ဆန်(၁၂၀၀)ပြည်၊ စားအုန်းဆီ(၃၃၀၀)ပိဿာရောင်းချပေးနိုင်ခဲ့ပါသဖြင့် နေ့စဉ် လူမှုစီးပွားဘဝအထောက်အပံ့ဖြစ်စေနိုင်ခဲ့ကြောင်း သတင်းရရှိပါသည်။

DOCA(မကွေး)

    ရခိုင်ပြည်နယ်၊ ရသေ့တောင်မြို့၌ ကုန်ပစ္စည်းများအား ဈေးနှုန်းမြှင့်တင်ရောင်းချခြင်းရှိ/မရှိ ကွင်းဆင်းစစ်ဆေးခြင်းကို ၂၀၂၃ခုနှစ်၊ စက်တင်ဘာလ(၆)ရက်နေ့၊ နံနက် (၀၉:၀၀) နာရီအချိန်တွင် မြို့နယ်အဆင့် အခြေခံစားသောက်ကုန်ဈေးနှုန်းများထိန်းသိမ်းကြီးကြပ်ရေးကော်မတီနှင့် မြို့နယ်အုပ်ချုပ်ရေးအဖွဲ့တို့ပူးပေါင်း၍ မြို့ပေါ်ရပ်ကွက်များရှိ ဈေးဆိုင်များနှင့်မြို့မဈေးကြီးအတွင်း ရောင်းချလျက်ရှိသော ကုန်ပစ္စည်းအရောင်းဆိုင်များအား ကွင်းဆင်းစစ်ဆေးခဲ့ကြပါသည်။

    ထိုသို့ ကွင်းဆင်းစစ်ဆေးရာတွင် မြို့နယ်စီမံအုပ်ချုပ်ရေးအဖွဲ့၊ ဒုတိယမြို့နယ်အုပ်ချုပ်ရေးမှူး ဦးကျော်လင်းအောင်နှင့်အဖွဲ့ဝင်များ၊ မြို့နယ်စည်ပင်သာယာရေးအဖွဲ့မှ မြို့နယ်ဦးစီးမှူး ဒေါ်မအေးသန်း၊ ရသေ့တောင်မြို့နယ်၊ စားသုံးသူရေးရာဦးစီးဌာနမှ ဦးတင်ထွန်းရွှေ (အကြီးတန်းစာရေး)တို့က မြို့ပေါ်ရပ်ကွက်ရှိ စားသောက်ကုန်ပစ္စည်းအရောင်းဆိုင်များ၊ ဆောက်လုပ်ရေးပစ္စည်းအရောင်းဆိုင်များ၊ ဆေးနှင့်ဆေးပစ္စည်းအရောင်းဆိုင်များ၊ မြို့မဈေးကြီးအတွင်း ရောင်းချလျက်ရှိသောဆန်ဆိုင်များ၊ လူသုံးကုန်ပစ္စည်းအမျိုးမျိုးအရောင်းဆိုင်များသို့သွားရောက်၍ ဈေးနှုန်းမြှင့်တင်ရောင်းချခြင်းရှိ/မရှိ ကွင်းဆင်းစစ်ဆေးခဲ့ပြီး ပုံမှန်ဈေးနှုန်းများထက်ပို၍ ဈေးနှုန်းမြှင့်တင်ရောင်းချခြင်းများမပြုလုပ်ကြရန် အသိပေးနှိုးဆော်ခဲ့ကြောင်းနှင့် စားသုံးသူရေးရာဦးစီးဌာန၊ ဦးတင်ထွန်းရွှေ(အကြီးတန်းစာရေး)က ကုန်စုံဆိုင်ပိုင်ရှင်တို့လိုက်နာရမည့်တာဝန်များအကြောင်းကိုလည်းကောင်း၊ ကုန်စည်များရောင်းချရာတွင် (FDA) ထောက်ခံချက်ရရှိသော ကုန်စည် များနှင့် စားသုံးသူရေးရာဦးစီးဌာနမှ ဥပဒေနှင့်အညီ ပြဋ္ဌာန်းသတ်မှတ်ထားသော ကုန်အညွှန်းအမှတ်အသားပြည့်စုံစွာဖော်ပြထားသည့်ကုန်စည်များကိုသာရောင်းချကြရန်နှင့် ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များကိုမရောင်းချရန် အသိပညာပေးဆွေးနွေးပြောကြားခဲ့ကြောင်း သတင်းရရှိပါသည်။

DOCA(ရခိုင်)                                                                                                                                                  

  မွန်ပြည်နယ်၊ မော်လမြိုင်မြို့၊ ငါးဒိုင်၌ ၂၀၂၃ခုနှစ်၊ စက်တင်ဘာလအတွင်း ရောင်းချလျက်ရှိသောငါးအမယ်များမှာ ငါးတန်၊ ငါးရွှေကြီး၊ ငါးမြစ်ချင်း၊ ငါးသလောက်၊ တီလားပီးယား၊ ကင်းမွန် (အကြီး)၊ ကကတစ်၊ ငါးကွမ်းရှပ်၊ ငါးကြင်းဖြူ၊ ပလာတူး၊ ငါးနှပ်၊ ငါးပုလွေ၊ ပုစွန်ပျော့(အကြီး)၊ ပုစွန်ပျော့(အသေး)၊ ပုစွန်ထုပ်(အစိမ်း)ရေချို၊ ရေဘဝဲ၊ ပလာတူးတို့ရောင်းချကြောင်းသိရသည်။  

    ယင်းအမယ်မျိုးစုံများ၏ ဈေးနှုန်းအခြေအနေမှာ  ငါးတန်တစ်ပိဿာလျှင် ကျပ်၄၀၀၀၊ ငါးရွှေကြီးတစ်ပိဿာလျှင် ကျပ်၁၁၈၀၀၊ ငါးမြစ်ချင်းတစ်ပိဿာလျင် ကျပ်၇၀၀၀၊ ငါးသလောက်တစ်ပိဿာလျှင် ကျပ်၁၁၅၀၀၊ တီလားပီးယားတစ်ပိဿာလျှင် ကျပ်၈၅၀၀၊ ကင်းမွန်(အကြီး) တစ်ပိဿာလျှင် ကျပ်၂၇၀၀၀၊ ကင်းမွန်(အလတ်) တစ်ပိဿာလျှင် ကျပ်၂၅၀၀၀၊ ကင်းမွန်(အသေး) တစ်ပိဿာလျှင် ကျပ်၂၀၀၀၀၊ ကကတစ်တစ်ပိဿာလျှင် ကျပ်၁၆၅၀၀၊ ငါးကွမ်းရှပ်တစ်ပိဿာလျှင် ကျပ်၁၅၀၀၀၊ ငါးကြင်းဖြူတစ်ပိဿာလျှင် ကျပ်၁၁၂၀၀၊ ပလာတူးတစ်ပိဿာလျှင် ကျပ်၇၀၀၀၊ ငါးနှပ်တစ်ပိဿာလျှင် ကျပ်၅၀၀၀(အသေး)မှ ကျပ်၇၀၀၀(အကြီး)၊ ငါးပုလွေတစ်ပိဿာလျှင် ကျပ်၇၅၀၀၊ ရွှေငါးတစ်ပိဿာလျှင် ကျပ်၅၃၀၀၊ ပုစွန်ပျော့(အကြီး) တစ်ပိဿာလျှင် ကျပ်၂၁၂၀၀၊ ပုစွန်ပျော့(အသေး) တစ်ပိဿာလျှင် ကျပ်၁၈၄၀၀၊ ပုစွန်ထုပ်(အစိမ်း)ရေချို(အကြီး) တစ်ပိဿာလျှင် ၆၂၀၀၀ကျပ်၊ ပုစွန်ထုပ်(အစိမ်း)ရေချို(အလတ်) တစ်ပိဿာလျှင် ၄၇၀၀၀ကျပ်၊ ပုစွန်ထုပ်(အစိမ်း) ရေချို(အသေး)တစ်ပိဿာလျှင် ၃၉၀၀၀ကျပ်၊ ရေဘဝဲတစ်ပိဿာလျှင် ၂၃၀၀၀ကျပ်၊ ပလာတူး တစ်ပိဿာလျှင် ၄၈၀၀ကျပ်ဖြစ်ကြောင်းသိရသည်။ ၎င်းငါးဈေးနှုန်းများသည် အပတ်စဉ်အလိုက် အပြောင်းအလဲရှိနိုင်ကြောင်းသိရှိရပါသည်။

DOCA(မွန်)

   မန္တလေးတိုင်းဒေသကြီး၊ ကျောက်ဆည်ခရိုင်အတွင်း၌ စပါး၊ ပဲ၊ ပြောင်းတို့အပြင် ငှက်ပျောသီးနှံများကိုလည်းစိုက်ပျိုးကြပါသည်။ ခရိုင်အတွင်း၌ (၂၀၂၂-၂၀၂၃) ဘဏ္ဍာနှစ်တွင် ငှက်ပျောစိုက်ဧက(၂၅၃၅)ဧကစိုက်ပျိုးခဲ့ပြီး (၂၀၂၃-၂၀၂၄) ဘဏ္ဍာနှစ်တွင် ငှက်ပျောစိုက်ဧက (၂၅၉၁)ဧကစိုက်ပျိုးပြီးစီးပြီဖြစ်ကြောင်း သက်ဆိုင်ရာဌာန၏စာရင်းများအရ သိရှိရပါသည်။ ငှက်ပျောတစ်ဧကလျှင် ကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၁၅၀၀၀၀၀)ကျပ်ခန့်ကုန်ကျကြောင်း၊ ခရိုင်အတွင်း၌ ယခင်နှစ်ထက် ငှက်ပျောစိုက်ဧကပိုမိုစိုက်ပျိုးလျက်ရှိကြောင်း၊ တောင်သူများ ငှက်ပျောပိုမိုစိုက်ပျိုးရခြင်းမှာ ငှက်ပျောဈေးများ ဈေးကောင်းရရှိသောကြောင့် ပိုမိုစိုက်ပျိုးကြခြင်းဖြစ်ပါသည်။ ယခင်လက်ဟောင်းခြံထွက် ငှက်ပျောလှည်းတစ်စီးလျှင် (၄၀၀၀၀၀) ကျပ်ဈေးရှိပြီး ယခင်နှစ်၊ ငှက်ပျောပေါ်ချိန်တွင် အခိုင်(၄၀)ပါ ငှက်ပျောလှည်းတစ်စီးလျှင် (၂၄၀၀၀၀) ကျပ်သာရောင်းချခဲ့ရကြောင်း၊ ယခင်နှစ်တွင် ငှက်ပျောသီး (ဖီးကြမ်း) လက်ရင်းတစ်ဖီးလျှင် (၇၀၀)ကျပ်၊ လက်ဖျားတစ်ဖီးလျှင် (၄၀၀-၅၀၀)ကျပ်နှင့် ယခုလက်ရှိ ခြံ‌ဟောင်းထွက် ငှက်ပျောသီးဖီးကြမ်းလက်ရင်းတစ်ဖီးလျှင် (၃၀၀၀-၃၅၀၀)ကျပ်နှင့် လက်ဖျားတစ်ဖီးလျှင် (၂၀၀၀-၂၅၀၀)ကျပ်ဈေးနှုန်းများဖြင့် ရောင်းဝယ်လျက်ရှိကြောင်းသိရှိရပါသည်။ ငှက်ပျောသီးစားသုံးခြင်းဖြင့် ကင်ဆာရောဂါကိုကာကွယ်ပေးနိုင်ခြင်း၊ နှလုံးကိုကျန်းမာစေခြင်းနှင့် သွေးဖိအားကိုထိန်းညှိပေးခြင်း စသည့်အကျိုးကျေးဇူးများလည်းရရှိသဖြင့် ငှက်ပျောသီးနှံကိုလည်းတိုးချဲ့စိုက်ပျိုးသင့်ပါကြောင်း ရေးသားတင်ပြအပ်ပါသည်။

DOCA(မန္တလေး)

    မန္တလေးတိုင်းဒေသကြီး၊ ကျောက်ဆည်ခရိုင်အတွင်း၌  (၂၀၂၃-၂၀၂၄) ဘဏ္ဍာနှစ်တွင် ဖူစားပြောင်းစိုက်ဧက(၂၅၀၄)ဧကစိုက်ပျိုးနိုင်ခဲ့ပြီး ယခုအချိန်အထိ ပြောင်းဖူးရိတ်သိမ်းဧက (၃၉၉) ဧကရိတ်သိမ်းပြီးစီးပြီး (၁)ဧကအထွက်နှုန်းအနေဖြင့် (၈၁၃၃)ဖူးထွက်ရှိကြောင်း သက်ဆိုင်ရာဌာန၏ စာရင်းများအရသိရှိရပါသည်။ ပြောင်းဖူးစိုက်ပျိုးမှု (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၂၆၀၀၀၀/-)ကျပ်ခန့်ကုန်ကျကြောင်း၊ ခရိုင်အတွင်း အများဆုံးစိုက်ပျိုးသောမြို့နယ်များမှာ ကျောက်ဆည်မြို့နယ်နှင့် မြစ်သားမြို့နယ်များတွင် အများဆုံးစိုက်ပျိုးကြကြောင်း၊ စိုက်ပျိုးသောပြောင်းဖူးမျိုးများမှာ သကြားပြောင်း၊ ထောပတ်ပြောင်းတို့ကိုစိုက်ပျိုးကြကြောင်း၊ ယခုလက်ရှိ ပြောင်းဖူးဖောက်သည်စျေးအနေဖြင့် တစ်ဖူးလျှင် (၁၈၀/-)ကျပ်၊ လက်လီ၃ဖူးလျှင် (၁၀၀၀/-)ကျပ်၊ ပြုတ်ပြီးသောပြောင်းဖူး(၁)ဖူးလျှင် (၅၀၀/-)ကျပ်တို့ဖြင့် ရောင်းဝယ်လျက်ရှိပြီး ပြောင်းဖူးစားသုံးခြင်းသည် ကျန်းမာရေးနှင့်ညီညွတ်ပြီး ပြောင်းဖူးကိုသားရေစာအနေဖြင့် စားသုံးကြပါသည်။ ထို့ပြင် ပြောင်းဖူးသီးနှံသည် တခြားဟင်းသီးဟင်းရွက်များထက် အာဟာရဓာတ်ပိုမိုပါဝင်ပြီး ကြော်စားခြင်းထက် ပြုတ်၍သုပ်စားပါက ပိုမိုအကျိုးရှိကြောင်း လေ့လာသိရှိရပါသည်။ ပြောင်းဖူးစိုက်ပျိုးမှုဖြင့် တောင်သူများအကျိုးအမြတ်ပိုမိုရရှိသဖြင့် မိသားစုစားဝတ်နေရေးပြေလည်ကြောင်း ပြောင်းဖူးစိုက်ပျိုးသူတောင်သူတစ်ဦး၏ပြောကြားချက်အရ သိရှိရပါသည်။

DOCA(မန္တလေး)