ပြည်တွင်းကုန်သွယ်မှုသတင်း

     ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့ရှိ စက်တင်ဘာလတတိယအပတ်တွင် ရောင်းချနေသောဟင်းသီးဟင်းရွက်ဈေးနှုန်းများမှာ အိုးဖရုံသီးတစ်လုံး ၇၀၀ ကျပ်၊ အဝိုင်းဖရုံသီး တစ်လုံး (၅၀၀-၁၀၀၀) ကျပ်၊ ဂေါ်ရခါးသီး ၁လုံး ၅၀၀ ကျပ်၊ ကိုင်းငရုတ်သီး တစ်ပိဿာ ၃၀၀၀ ကျပ်၊ ခရမ်းချဉ်သီး တစ်ပိဿာ ၃၀၀၀ ကျပ်၊ နံနံပင် ၁ပိဿာ ၁၅၀၀၀ ကျပ်၊ ပဲတောင့်ရှည်အတောင့် ၂၅ တောင့် တစ်စည်းလျှင် ၁၀၀၀ ကျပ်၊ ပဲစောင်းလျားသီး တစ်ပိဿာ ၃၀၀၀ ကျပ်၊ ကြက်ဟင်းခါးသီး (အသေး)တစ်ပိဿာ ၂၀၀၀ ကျပ်၊ ကြက်ဟင်းခါးသီး(အကြီး) တစ်လုံးလျှင်၇၀၀ ကျပ်၊ ခရမ်းသီးတစ် ပိဿာလျှင် ၄၀၀၀ ကျပ်၊ ပဲပင်ပေါက် တစ်ဆယ်ကျပ်သားလျှင် ၇၀၀ ကျပ်၊ သံပုရာသီး တစ်လုံးလျှင် ၁၀၀ကျပ်၊ မုန်လာဥနီ တစ်ဆယ်ကျပ်သားလျှင် ၁၅၀၀ ကျပ်၊ ဂျူးမြစ် တစ်ပိဿာ ၁၀၀၀၀ ကျပ်၊ မုန်ညှင်းထုပ်ဆစ်ဆယ်ကျပ်သားလျှင် ၁၅၀၀ကျပ်၊ ရုံးပတီသီး တစ်ပိဿာ ၃၀၀၀ ကျပ်၊ သခွားသီး တစ်လုံးလျှင် ၁၀၀၀ ကျပ်၊ ကန်စွန်းရွက် တစ်စည်းလျှင် ၅၀၀ ကျပ်၊ ဖရုံညွန့် တစ်စည်းလျှင် ၇၀၀ ကျပ်ဈေး၊ ပန်းဂေါ်ဖီ ၃၀၀၀ကျပ်ဈေးဖြင့် ရောင်းချနေကြကြောင်း လက်ပံတန်းမြို့မဈေးရှိ ဟင်းသီးဟင်းရွက်ရောင်းချသူများထံမှ  မေးမြန်းသိရှိရပါသည်။

DOCA(ပဲခူး)

    ပဲခူးတိုင်းဒေသကြီး၊ သာယာဝတီခရိုင်၊ အုတ်ဖိုမြို့နယ်တွင် ကျေးရွာအုပ်စုပေါင်း ၅၄ အုပ်စုရှိပြီး အများအားဖြင့် လယ်ယာစိုက်ပျိုးရေးဖြင့် အဓိကအသက်မွေးဝမ်းကျောင်းလုပ်ကိုင်ကြပါသည်။ မြို့နယ်အတွင်းလယ်ယာစိုက်ပျိုးသော ဧကမှာ ၉၃၁၅၅ ဧကရှိပြီး စပါးကိုအဓိကစိုက်ပျိုးကြပြီး ယခုစက်တင်ဘာလဆန်းပိုင်းတွင် ကောက်စောစပါးများ စတင်ရိတ်သိမ်းလျက်ရှိရာ လယ်ယာလုပ်သားများ၊ လယ်သမားများ ရိတ်ခြွေစက်များဖြင့် အချိန်တိုအတွင်းတွင် ရိတ်ခြွေနိုင်ပါသည်။ ရိတ်ခြွေစက်များဖြင့် ရိတ်ခြွေခြင်းဖြင့်အလုပ်အကိုင် အဆင်ပြေလျက်ရှိကြောင်း လယ်ယာလုပ်ကိုင်နေသူ တောင်သူတစ်ဦးထံမှ သိရှိရသည်။

DOCA(ပဲခူး)

        မျှစ်သည် သဘာဝအလျောက် ပေါက်ရောက်လေ့ရှိပြီး မိုးရာသီတွင် အများဆုံးပေါက်လေ့ရှိပါသည်။ မိုးရာသီတွင် အိမ်ရှင်မများ၏ မိသားစုထမင်းဝိုင်းတွင် ရာသီစာဟင်းလျာအဖြစ် မျှစ်ကိုပြုတ်ကာ ငါးပိရည်အတို့အမြှပ်အဖြစ် စားကြသကဲ့သို့ တချို့အိမ်ရှင်မများကလည်း ဟင်းလျှာအမျိုးမျိုးအဖြစ် ချက်စား၊ ကြော်စားကြပါသည်။ မျှစ်သည် ကျန်းမာရေးအတွက် ကောင်းကျိုးများစွာပေးစွမ်းနိုင်သည့် အစားအသောက်တစ်ခုဖြစ်ပါသည်။

      မျှစ်စားခြင်းမှရရှိနိုင်သည့် ကျန်းမာရေးဆိုင်ရာကောင်းကျိုးများ(၁၀)ချက်ကို ကျန်းမာရေးဆိုင်ရာ သိကောင်းစရာဗဟုသုတအဖြစ် ကောက်နုတ်ကိုးကားဖော်ပြအပ်ပါသည်။ ၎င်းတို့မှာ- ကယ်လိုရီပါဝင်မှုနည်းပါးခြင်း၊ သကြားပါဝင်မှုနည်းပါးခြင်း၊ အဆီပါဝင်မှုမပါသလောက်နည်းပါးခြင်း၊ ပရိုတင်းဓာတ်ပါဝင်ခြင်း၊ ဗီတာမင်နှင့်သတ္တုဓာတ်များပါဝင်ခြင်း၊ ဝိတ်ကျစေခြင်း၊ နှလုံးရောဂါဖြစ်ပွားနိုင်ချေကိုလျော့ကျစေခြင်း၊ ခုခံအားကောင်းစေခြင်း၊ အူမကြီးလုပ်ဆောင်ချက်ကို ကူညီပေးနိုင်ခြင်း၊ အနာကျက်မြန်စေခြင်း စသည့် အကျိုးကျေးဇူးများရရှိပြီး မျှစ်သည် စားသုံးသင့်သည့် အစားအစာများထဲတွင် တစ်ခုအပါအဝင်ဖြစ်ပါသည်။

          ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်တွင် ထွက်ရှိသော မျှစ်ဈေးနှုန်းမှာ ကျိုင်းတုံမြို့မဈေး၌ တစ်စည်းလျှင် အစည်းအကြီး/ အသေးပေါ်မူတည်၍ (၁၀၀၀) ကျပ်မှ (၁၅၀၀) ကျပ်ပေးဝယ်ရပါသည်။ တစ်စည်းလျှင် (၁၀) လက်မခန့်အရှည်ရှိသည့် မျှစ် ၅ချောင်း/ ၆ချောင်းရှိပြီး မျှစ်သည် အရင်းအနှီးစိုက်ထုတ်စရာမလိုဘဲ သဘာဝကပေးသော တောတောင်များ၌ မျှစ်ရှာသွား၍ မျှစ်ချိုးသူများသာရရှိကာ မျှစ်ကိုရောင်းချခြင်းဖြင့် အိမ်သုံးစရိတ်ဝင်ငွေရရှိနေကြောင်းသိရပါသည်။

DOCA(ရှမ်း)

       ရှမ်းပြည်နယ် (တောင်ပိုင်း) မြို့တော်ဖြစ်သည့် တောင်ကြီးမြို့၏ ညနေပိုင်းတွင်သာ ဖွင့်လှစ်ရောင်းချသည့် ညဈေးတန်းတွင် ဒေသထွက်သီးနှံနှင့် အစားအစာများ တစ်နိုင်တစ်ပိုင်ရောင်းချလျက်ရှိပါသည်။

          ညဈေးတန်းဟုခေါ်ဆိုသည့်အတိုင်း နေ့စဉ်နေ့လယ် (၁၄း၀၀)နာရီအချိန်မှ ည(၀၉း၀၀)နာရီအထိ ဖွင့်လှစ်ရောင်းချလျက်ရှိပါသည်။ ညဈေးတန်းများကို ဆိုင်ခန်းများနှင့်သော်လည်းကောင်း၊ ကား/ တွန်းလှည်းများဖြင့် ရောင်းချလျက်ရှိပါသည်။ ဈေးတန်းတွင် ငါးထမင်းနယ်၊ ရှမ်းခေါက်ဆွဲ၊ ဝက်သားချဉ်၊ ဟင်းထုပ်၊ ငါးပေါင်း စသည့်ဒေသထွက်အစားအစာများနှင့် အကင်မျိုးစုံ၊ မာလာဟင်း၊ မာလာမောက်ချိုက်၊ ကယားဝက်အူချောင်း၊ ထမင်းကြော်၊ ခေါက်ဆွဲကြော်၊ ကောက်ညှင်းပေါင်း၊ အကြော်စုံ စသည့်အစားအစားများ စုံလင်စွာရောင်းချလျက်ရှိပါသည်။

          ရှမ်းပြည်နယ် တောင်ကြီးမြို့ရှိ ညဈေးတန်းသည် ဒေသခံပြည်သူများကြားတွင်သာမက Online ပေါ်တွင် ကြော်ငြာမှုကြောင့် Food Blogger၊ Travel Blogger များကလည်း လာရောက်လည်ပတ်၍ ဆွဲဆောင်မှုရှိသောနေရာအဖြစ် Video များရိုက်ကူးလျက်ရှိကြောင်းသိရပါသည်။

          စားသုံးသူပြည်သူများလည်း ညနေခင်းအေးအေးတွင် လမ်းလျှောက်ရင်း ဝယ်ယူစားသောက်ကြသဖြင့် ဈေးသယ်များမှာလည်း အရောင်းအဝယ်ဖြစ်ပြီး ညဈေးတန်းမှာလည်း ရောင်းသူ၊ ဝယ်သူများဖြင့် စည်ကားနေကြောင်းသိရှိရပါသည်။

DOCA(ရှမ်း)

            ရှမ်းပြည်နယ်(တောင်ပိုင်း)၊ ကလောခရိုင်၊ အောင်ပန်းမြို့နယ်တွင် ဂေါ်ရခါးသီး(ခေါ်)စူကာသီးများကို စီးပွားဖြစ်စိုက်ပျိုးလျက်ရှိကြောင်းသိရှိရပါသည်။

     ဂေါ်ရခါးသီး(ခေါ်)စူကာသီးများကို တစ်ဧကစိုက်ပျိုးလျှင် ခန့်မှန်းကုန်ကျစရိတ်မှာ အလုပ်သမားငှားရမ်းခ၊ စင်ထိုးရသောဝါးလုံး၊ မျောတိုင်နှင့် ဓာတ်မြေဩဇာအပေါ်မူတည်၍ ကုန်ကျစရိတ် သိန်း(၂၀) ကျပ်မှ သိန်း (၃၀)ကျပ်အထိကုန်ကျပြီး  ဂေါ်ရခါးသီးကို စတင်စိုက်ပျိုးသည့်အချိန်မှစ၍ ခန့်မှန်း (၄)လ အကြာတွင် စတင်ခူးဆွက်နိုင်ကြောင်း၊ အသီးများစောစောထွက်ပါက ဈေးကောင်းပိုရကြောင်းသိရှိရပါသည်။ အသီးသာမက အရွက်များကိုလည်းရောင်းချရကြောင်းသိရှိရပါသည်။ ဂေါ်ရခါးသီးတစ်လုံးလျှင် (၈၀)ကျပ်မှ (၁၀၀)ကျပ်အထိရောင်းချရကြောင်းနှင့် ထွက်ရှိလာသော ဂေါ်ရခါးသီးများကို ရှမ်းပြည်နယ်တွင်သာမက ရန်ကုန်နှင့် မန္တလေးမြို့များသို့ အဓိကတင်ပို့ရောင်းချလျက်ရှိကြောင်းသိရှိပါသည်။

DOCA(ရှမ်း)