ပြည်တွင်းကုန်သွယ်မှုသတင်း

   မကွေးတိုင်းဒေသကြီး၊ ပခုက္ကူမြို့ ဆီထွက်သီးနှံမျိုးစုံနှင့် ပဲမျိုးစုံရောင်းဝယ်ရေးဈေးကွက်သို့ နေ့စဉ်ဆီထွက်သီးနှံမြေပဲစိုက်ပျိုးမှုများသော မြိုင်၊ ပေါက်၊ ရေစကြို၊ ထီးလင်း၊ ဂန့်ဂေါ၊ ဆော၊ ကျောက်ထု၊ လောင်းရှည်၊ ရေနံချောင်းမြို့နယ်များနှင့် စစ်ကိုင်းတိုင်း၊ မန္တလေးတိုင်းဒေသကြီးအတွင်းရှိ ကျေးရွာများမှ ထွက်ရှိသော မြေပဲ(အသစ်)ပဲများဖြစ်သည့် မြေပဲဆံ(အဖြူ)၊ မြေပဲဆံနီ (လုံးကြီး)များ မြေပဲအတောင့်ခြောက်များ နေ့စဉ်ဝင်ရောက်လျက်ရှိပြီး တစ်ပတ်အတွင်း အိတ်ရေ (၃၀၀၀)ခန့် အရောင်းအဝယ် ဖြစ်လျက်ရှိကြောင်း သိရှိရပါသည်။

   ၂၀၂၄ခုနှစ်၊ ဩ‌ဂုတ်လ(ဒုတိယပတ်)မှစ၍ ဈေးတက်ပြီး အရောင်းအဝယ်ဖြစ်ခဲ့ရာ မြေပဲလုံးဆံ တစ်ပိဿာလျှင် အမြင့်ဈေးကျပ်(၁၁၅၀၀)ဖြင့် အရောင်းအဝယ်ဖြစ်ပြီး ဩဂုတ်လ(စတုတ္ထပတ်)တွင် မြေပဲ(အသစ်)များ လှိုင်လှိုင်ပေါ်ချိန်ရောက်ရှိ၍ ဈေးအနည်းငယ်ကျဆင်းလာပြီး မြေပဲလုံးဆံ တစ်ပိဿာလျှင် ကျပ်(၉၈၀၀-၉၅၀၀)ဈေးဖြင့် အရောင်းအဝယ်ဖြစ်ခဲ့ကြောင်း၊ စက်တင်ဘာလ (ပထမပတ်)တွင် ဈေးဆက်လက်ကျဆင်းပြီး မြေပဲလုံးဆံတစ်ပိဿာလျှင် ကျပ်(၈၈၀၀-၈၅၀၀)ထိ အရောင်းအဝယ်ဖြစ်ပြီး (ဒုတိယပတ်)တွင် ဈေးကွက်သို့ မြေပဲဝင်ရောက်မှုနည်းလာ၍ ဈေးအနည်းငယ် ပြန်လည်မြှင့်တက်ခဲ့ကြောင်း၊ (တတိယပတ်)တွင် မြေပဲဆံ(နီ)လုံးဆံ တစ်ပိဿာ လျှင် ကျပ်(၉၅၀၀-၉၁၀၀)၊ ဆီဆံတစ်ပိဿာလျှင်  ကျပ်(၈၅၀၀-၈၂၀၀)၊ မြေပဲလုံးဆံ(ဖြူ) တစ်ပိဿာလျှင် ကျပ် (၉၂၀၀-၉၀၀၀)၊ ဆီဆံတစ်ပိဿာလျှင် ကျပ်(၈၀၀၀-၇၈၀၀)ဈေး ဖြင့် အရောင်းအဝယ်ဖြစ်ပြီး တစ်လအတွင်း မြေပဲဆံ တစ်ပိဿာလျှင် ကျပ်(၂၀၀၀)ခန့် ဈေးကျဆင်းကြောင်း၊ မြေပဲတောင့် အခြောက်ဈေးကွက်အနေဖြင့် မြေပဲအောင်မြင်မှု အရည်အသွေးမှုတည်၍ မြေပဲ (၈)ပိဿာဝင် တစ်တင်းလျှင် ကျပ်(၃၅၀၀၀-၃၃၀၀၀-၃၀၀၀၀)ဈေးအသီးသီးဖြင့် အရောင်းအဝယ်ဖြစ်ကြောင်း၊ မြို့ပေါ်ရှိ ပဲခွဲစက်၊ ဆီစက်လုပ်ငန်းရှင်များ၊ မြေပဲဆားလှော်လုပ်ငန်းရှင်များမှ ဝယ်ယူမှုများကြောင်း၊ မန္တလေးဈေးကွက်သို့ တင်ပို့လျက်ရှိပြီး ထိုမှတစ်ဆင့် တရုတ်နိုင်ငံသို့ တင်ပို့ကြောင်း၊ ပခုက္ကူဈေးကွက်သို့ရောက်ရှိသည့် မြေပဲအတောင့်နှင့်အဆံများ ဝင်သလောက်အရောင်းအဝယ်ဖြစ်ကြောင်း မြို့ပေါ်ရှိ ဆီထွက်သီးနှံရောင်းဝယ်ရေးလုပ်ငန်းရှင်ထံမှ သိရှိရပါသည်။

 DOCA(မကွေး)

   မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့၌ အရောင်းအဝယ်ဖြစ်လျက်ရှိသော ကြက်သွန်နီပွဲရုံဈေးကွက်သို့ ဒေသတွင်း ကြက်သွန်နီစိုက်ပျိုးထွက်ရှိမှုများသော အနောက်ပိုင်းရွာ သစ်ရပ်ကွက်နှင့် ဂွေးပင်၊ ချတောက်ရွာသစ်၊ ရွာသာအေး၊ အနောက်ကံတွင်း၊ အနောက်ကမ်းဖြူ၊ ပေတောကျေးရွာများနှင့် ချောက်၊ ဆင်ဖြူကျွန်း၊ စလင်းမြို့များမှ ထွက်ရှိသော ကြက်သွန်နီ များလည်း ဝင်ရောက်အရောင်းအဝယ်ဖြစ်ကြောင်း၊  ၂၀၂၄ခုနှစ်၊ စက်တင်ဘာလ(ဒုတိယပတ်)တွင် ကြက်သွန်နီပိဿာချိန်(၃)သိန်းခွဲခန့် အရောင်းအဝယ်ဖြစ်ကြောင်း၊ မိုးရွာသွန်းမှုများ၍ ဆက်သွယ်ရေးအခက်အခဲများကြောင့် ဈေးကွက်သို့ ကုန်ဝင်ရောက်မှုနည်းကြောင်း သိရှိရပါသည်။

    ဈေးနှုန်းဈေးကွက်အနေဖြင့် စက်တင်ဘာလ(ဒုတိယပတ်)တွင် ကြက်သွန်နီအရည်အသွေးနှင့် အရွယ်အစားလိုက်၍ ကြက်သွန်နီတောဈေး(ဂျွန်) တစ်ပိဿာလျှင် ကျပ်(၁၈၀၀ - ၁၄၀၀)ဈေးဖြင့် အရောင်းအဝယ်ဖြစ်ကြောင်း၊ ပွဲရုံမှ ပြန်လည်သန့်စင်ပြီး ရောင်းချရာတွင် ကြက်သွန်နီ တစ်ပိဿာ လျှင် ကျပ်(၂၄၀၀ - ၂၀၀၀) ဈေးဖြင့် ဒေသတွင်းရောင်းချလျက်ရှိကြောင်း သိရှိရပါသည်။

      ကုန်စည်စီးဆင်းမှုအနေဖြင့် ဒေသတွင်းကြက်သွန်နီများကို ရန်ကုန်ဘုရင့်နောင်ပွဲရုံသို့ တစ်ပတ်အတွင်း ကားအစီး(၃၀)ခန့် တင်ပို့ပြီး မြဝတီမြို့မှတစ်ဆင့် ထိုင်း၊ ဗီယက်နမ်နိုင်ငံများသို့ တင်ပို့လျက်ရှိကြောင်း၊ စက်တင်ဘာလ(ဒုတိယပတ်)တွင်  ကြက်သွန်နီ ကုန်ချိန်ပိဿာ (၃)သိန်းခွဲ၊ တန်ချိန်အားဖြင့် (၅၇၂)တန်ခန့် ကုန်စည်စီးဆင်းခဲ့ကြောင်း ဈေးကွက်မှ  သိရှိရပါသည်။

DOCA(မကွေး)

   မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်အတွင်းရှိ ဒေသခံစိုက်ပျိုးရေး တောင်သူများအနေဖြင့် မြေအောက်ရေဖြင့် နွေ၊ မိုး၊ ဆောင်း ရာသီမပြတ် ယောချောင်းနှင့် ကျောချောင်းကို အမှီပြု၍ ရာသီအလိုက်သီးနှံမျိုးစုံ စိုက်ပျိုးကြပြီး ဆန်စပါး၊ ပဲမျိုးစုံနှင့် ကုန်စိမ်းသီးနှံများအပြင် ဆီထွက်သီးနှံမြေပဲကိုလည်း ဒုတိယအများဆုံး စီးပွားဖြစ်စိုက်ပျိုးကြောင်း သိရှိရပါသည်။ ယခင်နှစ်က မြေပဲသီးနှံကို တစ်နှစ်လျှင် တစ်ကြိမ်သာစိုက်ပျိုးကြသော်လည်း ယခု၂၀၂၄ခုနှစ်တွင် မိုးမြေပဲနှင့် ဆောင်းမြေပဲကို စိုက်ဧက(၃၅၀၀)ခန့် တိုးချဲ့စိုက်ပျိုးလာကြောင်း သိရသည်။

   ဆောင်းမြေပဲကို စက်တင်ဘာလဆန်းတွင် မြေပြန်လည်ပြုပြင်ပြီး ထွန်ချောင်းဆွဲ၍ အလုပ်သမားငှားရမ်းပြီး အစေ့ချစိုက်ပျိုးပြီး ဒီဇင်ဘာလလယ်တွင် ထွက်ပေါ်မည်ဖြစ်ကြောင်း၊ တစ်ဧက လျှင် မျိုးစေ့ (၂)တင်းခန့်ကုန်ကျပြီး (၁)ပြည်လျှင် ကျပ်(၂၅၀၀၀)ဖြင့် ဝယ်ယူရကြောင်း၊ မြေပြုပြင်ခနှင့် အခြားသွင်းအားစုစရိတ်အပါအဝင် တစ်ဧကလျှင် ကျပ်(၁၂)သိန်းခန့်ကုန်ကျကြောင်း သိရှိရပါသည်။

   မိုးမြေပဲထွက်ရှိသည့် ဩဂုတ်လတွင် မြေပဲတောင့်အခြောက်တစ်တင်းလျှင် ကျပ်(၈၀၀၀၀)၊ မြေပဲလုံးဆံတစ်ပြည်လျှင် ကျပ်(၂၀၀၀၀)၊ မြေပဲဆီတစ်ပိဿာလျှင် ကျပ်(၄၂၀၀၀)ဈေးဖြင့် ရောင်းချရကြောင်း၊ မြို့ပေါ်ရှိဆီစက် လုပ်ငန်းရှင်များမှ ဝယ်ယူကြောင်း၊ အချို့တောင်သူများမှလည်း မြေပဲအတောင့်ရောင်းချခြင်းမရှိဘဲ ကိုယ်တိုင်ဆီကြိတ်၍ ရောင်းချကြောင်း၊ ဒေသတွင်း၌သာ အရောင်းအဝယ်ဖြစ်လျက်ရှိကြောင်း၊ တစ်ဧကလျှင် တင်း(၃၂)တင်းခန့်ထွက်ရှိပြီး ကျပ်(၁၃၀၀၀၀) ခန့် အကျိုးအမြတ်ရရှိကြောင်း၊ ပေါက်မြို့နယ်အတွင်း နယ်မြေအခြေအနေအရ ဈေးနှုန်းကြီးမြင့်ရခြင်းဖြစ်ကြောင်း သိရှိရပါသည်။

 DOCA(မကွေး)

   မကွေးတိုင်းဒေသကြီး၊ အထက်မင်းလှမြို့နယ်၊ ပန်းတောပြင်ကျေးရွာအုပ်စု၊ မယ်ဇလီတောကျေးရွာ၌ နှမ်း၊ နေကြာ၊ ဝါ၊ ကြက်သွန်နီ၊ မြေပဲနှင့် အခြားသီးပင်စားပင်များကို ရာသီအလိုက် စိုက်ပျိုးကြပြီး မိုးခရမ်းချဉ်သီး (ထိုင်ဝမ်မျိုး) စိုက်ဧက(၁၃)ဧကခန့်ကို တောင်သူ(၁၀)ဦးမှ ၂၀၂၄ခုနှစ်၊ ဩဂုတ်လကုန်တွင် စတင်စိုက်ပျိုးခဲ့ကြောင်း သိရှိရပါသည်။

    မယ်ဇလီတောကျေးရွာနေ တောင်သူဦးဝင်းသိန်းက ၎င်းအနေဖြင့် မိုးခရမ်းချဉ်သီး(၂)ဧကခန့်စိုက်ပျိုးထားပြီး (၁)ဧကလျှင် မျိုးစေ့ထုပ်(၆)ထုပ်မှ (၈)ထုပ်ထိကုန်ကျကြောင်း၊ စိုက်ပျိုးရာတွင် မျိုးစေ့အားပျိုးထောင်ပြီး အပင်(၂၅)ရက်သားအရွယ်တွင် မြေချ၍ ဘောင်တင်စနစ်ဖြင့် စိုက်ပျိုးကာ အပင်သက်တမ်း(၉၀)ရက်သားတွင် စတင်ခူးဆွတ်နိုင်ကြောင်း၊ မျိုးစေ့(၁)ထုပ်လျှင် ကျပ်(၂)သောင်း မှ (၃)သောင်းထိပေးရပြီး မင်းလှမြို့စိုက်ပျိုးရေးဆေးဆိုင်များမှ ဝယ်ယူပါကြောင်း၊ ကုန်ကျစရိတ်အနေဖြင့် မျိုးဖိုး၊ လုပ်အားခ၊ မြေပြုပြင်ခနှင့် အခြားသွင်းအားစုစရိတ်အပါအဝင် ကျပ်(၂၈)သိန်း မှ (၃၀)ကြားကုန်ကျပါကြောင်း၊ အထွက်နှုန်းအနေဖြင့် ယခင်နှစ်က (၁)ဧကလျှင် ပိဿာချိန်(၅)ထောင် မှ(၁)သောင်းထိထွက်ရှိပြီး (၁)ပိဿာလျှင် ကျပ်(၁၂၀၀ မှ ၁၈၀၀)ထိဈေးရရှိခဲ့ကြောင်း၊ ဈေးကွက်အနေဖြင့် မင်းလှမြို့ဈေးနှင့် မန်းသံပုရာကန်ရေနံချက်စက်ရုံ(PIC)ဈေးသို့ တင်ပို့ရောင်းချကြောင်း၊ ခရမ်းချဉ်သီးမှာ မိုးရာသီတွင်စိုက်ပျိုးရာ၌ အပင်ဖြစ်ထွန်းမှုနည်းပြီး အသီးအထွက်နှုန်း လျော့နည်းသော်လည်း ဈေးကောင်းရရှိတတ်ပြီး ဆောင်းရာသီတွင်မူ အထွက်နှုန်းကောင်း၍ ဈေးကောင်းရရှိမှု နည်းပါးကြောင်း သိရှိရပါသည်။

DOCA(မကွေး)

   မကွေးတိုင်းဒေသကြီး၊ မကွေးမြို့ ကန်သာဈေး၊ မြို့မဈေး၊ ရန်ပယ်ဈေးနှင့် ရန်ကင်းဈေးများတွင် သဘာဝအလျှောက်ပေါက်ရောက်ပြီး မိုးရာသီတွင် ထွက်ပေါ်သည့်မျှစ်များ အရောင်းအဝယ် ဖြစ်နေကြောင်း သိရှိရပါသည်။

     မကွေးမြို့ပေါ်ရှိဈေးများသို့ ဒေသတွင်းမှထွက်ရှိသည့်မျှစ်များ နေ့စဉ် ကုန်ချိန် (၅၀၀၀-၇၀၀၀)ခန့် ဝင်ရောက်အရောင်းအဝယ်ဖြစ်လျက်ရှိကြောင်း၊  ၂၀၂၄ ခုနှစ်၊ စက်တင်ဘာလ (တတိယပတ်)အတွင်း မျှစ်ပြုတ် တစ်ပိဿာလျှင် ကျပ်(၄၀၀၀-၅၀၀၀)၊ မျှစ်ချဉ် တစ်ပိဿာလျှင် ကျပ် (၄၀၀၀-၄၅၀၀)၊ မျှစ်ရေစိမ်ကျ တစ်ပိဿာလျှင် ကျပ်(၅၀၀၀-၆၀၀၀)ဖြင့် နေ့စဉ်အရောင်းအဝယ်ဖြစ်နေကြောင်း မြို့မဈေးသည်များထံမှ သိရှိရပါသည်။

  ရာသီပေါ်ချိန်တွင် မျှစ်များ ပို၍စားကောင်းသဖြင့် အိမ်ရှင်မများမှလည်း မျှစ်များကို ကြော်ချက်၍သော်လည်းကောင်း၊ မျှစ်ထောင်းသုပ်၍သော်လည်းကောင်း၊ ငပိရည်တို့စရာအဖြစ် လည်းကောင်း အမျိုးမျိုးပြုလုပ်၍ စားသုံးလေ့ရှိကြောင်း သိရှိရပါသည်။

(DOCA)မကွေး