ပြည်တွင်းကုန်သွယ်မှုသတင်း

         စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့နယ်တွင် စပါးနှင့် ဆီထွက်သီးနှံများအပြင် ပဲမျိုးစုံကိုလည်းစိုက်ပျိုးကြောင်းသိရသည်။ ယခုအခါ မတ်ပဲသီးနှံများ ဈေးကွက်အတွင်း ဝင်ရောက်လျက်ရှိပြီး စက်တင်ဘာလ တတိယပတ်အတွင်း၌ ဈေးနှုန်းများမှာ မတ်ပဲ(ဂျပန်)တစ်တင်းလျှင် ၉၅၀၀၀ကျပ်၊ မတ်ပဲထွက်တိုးတစ်တင်းလျှင် ၁၀၀၀၀၀ကျပ်ဖြင့် အရောင်းအဝယ်ဖြစ်လျက်ရှိကြောင်း၊  ဈေးကွက်အနေဖြင့် ကန့်ဘလူခရိုင်မှထွက်ရှိသော မတ်ပဲများကို မန္တလေးမြို့ရှိပွဲရုံများသို့ တင်ပို့ရောင်းချလျက်ရှိကြောင်းသိရသည်။

    မတ်ပဲသီးနှံများသည် ကန့်ဘလူမြို့နယ်အတွင်းရှိကျေးရွာများမှ အဓိကဝင်ရောက်လျက်ရှိပြီး စက်တင်ဘာလ ဒုတိယပတ်ဈေးနှုန်းများနှင့်နှိုင်းယှဉ်ပါက ယခုလ တတိယပတ်အတွင်း မတ်ပဲ(ဂျပန်) တစ်တင်းလျှင် ငွေကျပ်(၂၀၀၀)၊  မတ်ပဲထွက်တိုးတစ်တင်းလျှင် ငွေကျပ်(၂၀၀၀) မြင့်တက်၍ အရောင်းအဝယ်ဖြစ်လျက်ရှိကြောင်း သီးနှံရောင်းဝယ်ရေးလုပ်ငန်းရှင်ထံမှသိရှိရပါသည်။

DOCA(စစ်ကိုင်း)

         မြန်မာနိုင်ငံသည် လယ်ယာစိုက်ပျိုးရေးလုပ်ငန်းကို အဓိကလုပ်ကိုင်ကြသည့် နိုင်ငံဖြစ်သည်နှင့်အညီ စစ်ကိုင်းတိုင်းဒေသကြီး၊ ကန့်ဘလူခရိုင်သည်လည်း လယ်ယာစိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်သည်။ ယခုအခါ ကန့်ဘလူခရိုင်၏ အဓိကစိုက်ပျိုးသီးနှံတစ်ခုဖြစ်သည့် အစေ့ထုတ်ပြောင်းများ စတင်ရိတ်သိမ်းလျက်ရှိကြောင်းသိရသည်။

          အစေ့ထုတ်ပြောင်းကို မေလကုန်တွင်စတင်စိုက်ပျိုးပြီး စက်တင်ဘာလဆန်းမှစတင်၍ ရိတ်သိမ်းရကြောင်း၊ စိုက်ပျိုးရာတွင် မျိုးအနေဖြင့် C.P.808 နှင့် C.P.888 မျိုးများကို အများဆုံးစိုက်ပျိုးကြပြီး၊ စိုက်ပျိုးမှုအတွက် မျိုး၊သွင်းအားစု၊ လုပ်သားခ၊ ထွန်ယက်ခအပါအဝင် တစ်ဧကလျှင် စုစုပေါင်းငွေကျပ်၆၈၀၀၀၀ခန့်ကုန်ကျကြောင်း၊ အထွက်နှုန်းအနေဖြင့် တစ်ဧကလျှင် ၄၉တင်းခန့်ထွက်ရှိပြီး ဈေးနှုန်းအနေဖြင့် စက်တင်ဘာလ တတိယပတ်တွင် အစေ့ထုတ်ပြောင်းတစ်တင်းလျှင် ငွေကျပ်၂၆၀၀၀ဖြင့် အရောင်းအဝယ်ဖြစ်လျက်ရှိကြောင်းသိရသည်။

         အကျိုးအမြတ်အနေဖြင့် အစေ့ထုတ်ပြောင်းတစ်ဧကလျှင်ငွေကျပ်၅၉၀၀၀၀ခန့်အကျိုးအမြတ်ရရှိကြောင်း၊ ဈေးကွက်အနေဖြင့် ရွှေဘိုမြို့၊ မန္တလေးမြို့များရှိပွဲရုံများသို့ တင်ပို့ရောင်းချ ကြောင်း၊ ယခုအပတ်တွင် အရောင်းအဝယ်ဖြစ်လျက်ရှိသော အစေ့ထုတ်ပြောင်းဈေးနှုန်းများသည် ယခင်နှစ်ကာလတူထက် ဈေးကောင်းရရှိသောကြောင့် စိုက်ပျိုးသူများအနေဖြင့် ထိုက်သင့်သည့် အကျိုးအမြတ်များရရှိကာ အဆင်ပြေလျက်ရှိကြောင်းသိရပါသည်။

DOCA(စစ်ကိုင်း)

         မြန်မာနိုင်ငံသည် စိုက်ပျိုးရေးကိုအခြေခံပြီး အခြားစီးပွားရေးကဏ္ဍများကိုလည်း ဖွံ့ဖြိုးတိုးတက်အောင်ဆောင်ရွက်နေသော နိုင်ငံတစ်ခုဖြစ်သည်။ စစ်ကိုင်းတိုင်းဒေသကြီး၊ ကန့်ဘလူမြို့နယ်တွင်လည်း လယ်ယာစိုက်ပျိုးရေးလုပ်ငန်းများအပြင် ကွမ်းခြံများကို မိမိတို့ယာကွက်များ၌လည်းကောင်း၊ နေအိမ်ခြံဝင်းများ၌လည်းကောင်း မိသားစုဝင်ငွေရရှိသည့်အတွက် စိုက်ပျိုးကြကြောင်းသိရသည်။

         ၂၀၂၄ခုနှစ်၊ စက်တင်ဘာ တတိယပတ်အတွင်းဖြစ်ပေါ်နေသော ကန့်ဘလူခရိုင်၏ ကွမ်းဈေးနှုန်းများအနေဖြင့် အရည်အသွေးပေါ်မူတည်၍ ကွမ်းရွက်(ရှယ်)တစ်ပိဿာလျှင် ငွေကျပ်၈၀၀၀ဖြင့်လည်းကောင်း၊ ကွမ်းရွက်(ကြီး)တစ်ပိဿာလျှင် ငွေကျပ်၃၀၀၀ဖြင့်လည်းကောင်း၊ ကွမ်းရွက်(သေး)တစ်ပိဿာလျှင် ငွေကျပ်၂၀၀၀ဖြင့်လည်းကောင်း အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့်   ကန့်ဘလူမြို့နယ်မှထွက်ရှိသည့် ကွမ်းရွက်များကို ကန့်ဘလူမြို့၊ ကျွန်းလှမြို့နှင့် မန္တလေးမြို့များသို့ တင်ပို့ရောင်းချလျက်ရှိပြီး စက်တင်ဘာလ ဒုတိယပတ်တွင် အရောင်းအဝယ်ဖြစ်သည့်ဈေးနှုန်းများနှင့်နှိုင်ယှဉ်ပါက ယခုအပတ်အတွင်း ကွမ်းဝင်ရောက်မှုများပြားသော်လည်း ကွမ်းဈေးနှုန်းတည်ငြိမ်နေပြီး အရောင်းအဝယ်ဖြစ်လျက်ရှိကြောင်း ကွမ်းရွက်ရောင်းဝယ်ရေးလုပ်ငန်းရှင်ထံမှသိရပါသည်။

DOCA(စစ်ကိုင်း)

    ဧရာဝတီတိုင်းဒေသကြီး ပုသိမ်မြို့တွင် ပြောင်းဖူးကို အိမ်မဲမြို့နယ် ၊ ရေကြည်မြို့နယ် ၊ ကျောင်းကုန်းမြို့နယ်များတွင် စီးပွားဖြစ်စိုက်ပျိုးကြသည်။ ပြောင်းဖူးမျိုးစေ့အဖြစ် လေယာဉ် အမှတ် တံဆိပ်ကိုအသုံးပြုပြီး တစ်ထုပ်လျှင်(၂၈၀၀)ကျပ်ပေးရကြောင်း၊ တစ်ဧကလျှင် (၆-၇)ထုပ်စိုက်ရပါသည်။ စိုက်ပျိုးပြီး (၇)ရက်အကြာတွင် အပင်ပေါက်၍ ပေါင်းပင်များကို (၁၅)ရက်ကြာလျှင် ပေါင်းမြတ်ရှင်းရပါသည်။ ရက်(၆၀)ခန့်အကြာတွင် စတင်ခုတ်ပြီး ရောင်းချပါသည်။

   ပုသိမ်မြို့တွင် ရောင်းချနေသောပြောင်းဖူးဈေးနှုန်းမှာ စက်တင်ဘာလ ၊ တတိယအပတ်တွင် ပြောင်းဖူး ( အဝါ )တစ်ဖူးလျှင် (၅၀၀)ကျပ်ဖြစ်ပြီး(၁၀) ဖူးဈေးမှာ (၄၀၀၀) ကျပ်ဈေးနှုန်းဖြစ်သည်။ ပြောင်းဖူး(အဖြ)တစ်ဖူးလျှင် (၄၀၀) ကျပ်ဖြစ်ပြီး (၁၀)ဖူးဈေးမှာ (၃၅၀၀) ကျပ်ဖြစ်ပါသည်။

     ပြောင်းဖူးသည် လူကြီးလူငယ်မရွေးကြိုက်နှစ်သက်သော သီးနှံတစ်မျိုးဖြစ်ပါသည်။ ပြောင်းဖူးကိုပြုတ်၍သော်လည်းကောင်း ၊ ကြော်၍သော်လည်းကောင်း ၊ မီးဖုတ်၍သော်လည်းကောင်း စားသုံးကြပါသည်။ ပြောင်းဖူးစားသုံးခြင်းဖြင့် သတ္တုဓာတ်ကြွယ်ဝခြင်း သွေးအားနည်းရောဂါကာကွယ်ပေးခြင်း နှလုံးကျန်းမာစေခြင်း အမျှင်ဓာတ်ပြည့်ဝခြင်းစသည့် ကောင်းကျိုးများရရှိကြောင်း သိရပါသည်။

DOCA(ဧရာဝတီ)

    ၂၀၂၄ ခုနှစ်၊ စက်တင်ဘာလအတွင်း ဧရာဝတီတိုင်းဒေသကြီး ၊ ပုသိမ်မြို့ရှိ ကျေးလက်ဒေသများရှိ ဒေသထွက်ခရမ်းချဉ်သီး ဈေးနှုန်းအနည်းငယ်မြင့်တက်ခဲ့ကြောင်း သတင်းရရှိသည်။

    ဈေးနှုန်းအနေဖြင့် ယခင်လက ခရမ်းချဉ်သီး အလုံးကြီးဈေးနှုန်း တစ်ပိဿာလျှင် (၄၅၀၀) ကျပ်၊ အလုံးအလတ်ဈေးနှုန်း တစ်ပိဿာ   (၄၀၀၀) ကျပ် ဖြစ်ပြီး ယခုအခါ ခရမ်းချဉ်သီး အလုံးကြီးဈေးနှုန်း တစ်ပိဿာလျှင် (၅၀၀၀) ကျပ်၊ အလုံးအလတ်ဈေးနှုန်း တစ်ပိဿာလျှင် (၄၅၀၀) ကျပ်တို့ဖြစ် အရောင်းအဝယ်ဖြစ်လျက်ရှိကြောင်း  သိရပါသည်။

       ဧရာဝတီတိုင်းဒေသကြီးအတွင်း ဖြစ်ပေါ်နေသော ဩဂုတ်လ  နောက်ဆုံးပတ်နှင့် စက်တင်ဘာလ ပထမပတ်ဈေးနှုန်း နှိုင်းယှဉ်ခြင်းအားဖြင့် ဧရာဝတီတိုင်းဒေသကြီးအတွင်း ခရမ်းချဉ်သီး ဈေးနှုန်း အနည်းငယ် မြင့်တက်ခဲ့ကြောင်း သိရပါသည်။  

DOCA(ဧရာဝတီ)