ပြည်တွင်းကုန်သွယ်မှုသတင်း

    ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်သည် ပုသိမ်-မုံရွာကားလမ်း ဘေးတွင် တည်ရှိပြီး လမ်းမကြီး၏ ဘေးဝဲယာတစ်လျှောက်တွင် မြေလွတ်မြေရိုင်းများစွာ ပေါများသည့်အလျောက် တောင်ကုန်းတောင်တန်းများတွင် စီးပွားရေးအရ တွက်ခြေကိုက်သည့် နှစ်ရှည်ပင်များ စိုက်ပျိုးလျက်ရှိကြပါသည်။ လေးမျက်နှာမြို့နယ်အတွင်း ကျွန်း၊ ပျဉ်ကတိုး၊ မာန်ဂျန်ရှား စသည့် ရတနာတန်းဝင်သစ်ပင်များ စိုက်ပျိုးကြသည့်အပြင် စက်မှုကုန်ကြမ်းအတွက် အထူးလိုအပ်လျက်ရှိသော ရာဘာကိုလည်း စီးပွားဖြစ် စိုက်ပျိုးလာကြရာ (၃၀၄၀)ဧကသည် ကုမ္ပဏီ(၅)ခုမှ စိုက်ပျိုး၍ ကျန်(၁၆၈၀)ဧကသည် ပုဂ္ဂလိကပိုင် တစ်နိုင်တစ်ပိုင်စိုက်ပျိုးကြပြီး စုစုပေါင်း (၄၇၂၀)ဧက ရှိပါသည်။ ရာဘာ တစ်ဧကလျှင် တန်းကြား(၂၄')နှင့်ပင်ကြား(၁၀')ကြား ထားရှိပြီး ရာဘာပင်(၂၀၁) ပင် စိုက်ပျိုးနိုင်ပါသည်။ အပင်သက်တမ်း(၇)နှစ်တွင် ရာဘာပင်၏ အောက်ခြေမှ(၄၈")အမြင့်တွင်၊ အချင်း(၁၈")ရှိပါက စတင်အစေးခံယူနိုင်ပြီး လက်ရှိရာဘာအစေးခြစ်လျက်ရှိသည့် ဧကပေါင်း (၂၁၂၅) ဧကရှိပါသည်။ လေးမျက်နှာမြို့နယ်တွင် ရာဘာစိုက်ပျိုးထုတ်လုပ်သည့် ကုမ္ပဏီ(၅)ခုရှိပြီး၊ ၎င်းတို့မှာ တိုးတက် ကုမ္ပဏီ၊ ညီပေါင်းကုမ္ပဏီ၊ ကြယ်နီကုမ္ပဏီ၊ 711 ကုမ္ပဏီနှင့် မျိုးကျော်လင်း ကုမ္ပဏီတို့ ဖြစ်ပါသည်။ တိုးတက်ကုမ္ပဏီသည် စိုက်ဧက (၆၀၀) ရှိပြီး လက်ရှိ အစေးခြစ် ဧက (၅၀၀)၊  ကြယ်နီကုမ္ပဏီသည် စိုက်ဧက(၄၄၀)ရှိပြီး လက်ရှိအစေးခြစ် ဧက (၂၅၀)၊ မျိုးကျော်လင်း ကုမ္ပဏီသည် ဧကပေါင်း (၁၂၀၀) ရှိပြီး အစေးခြစ်ဧက (၇၀၀)၊ ညီပေါင်းကုမ္ပဏီသည် ဧက(၃၀၀)ရှိပြီး အစေး ခြစ်ဧက(၂၇၅)နှင့် 711 ကုမ္ပဏီသည် ဧကပေါင်း(၅၀၀)ရှိပြီး လက်ရှိ အစေးခြစ်ဧက(၁၅၀)ရှိပါသည်။   စိုက်ပျိုးသည့် ရာဘာမျိုးများမှာ (BBM-24)၊ (2000-စီးတီး)၊ (39-35) မျိုးနှင့် (260) မျိုးတို့ဖြစ်ပါသည်။ ရာဘာ အစေးခံယူရာတွင် စက်တင်ဘာလ ဒုတိယပတ်မှ မတ်လ ဒုတိယပတ်အထိ (၆)လ ဆက်တိုက် အစေးခံယူနိုင်ပြီး၊ ရာဘာပင်များအရွက်ဟောင်းကြွေ၍ ရွက်သစ်အနုထွက်ချိန်တွင် တစ်လခွဲ ခန့်အစေးခံခြင်းရပ်နားထားပြီး ရာဘာခြံများတွင် မီးတားလမ်းများ ပြုလုပ်ရှင်းလင်းရပါသည်။ ဧပြီလ တတိယပတ်လောက်တွင် ရာဘာအစေးခံခြင်းလုပ်ငန်းကို ပြန်လည်စတင်ခဲ့ပြီး ဇွန်လပိုင်း မိုးများ သောကာလတွင် အစေးခံခြင်းကို ရပ်နားပြီး ရာဘာခြံအတွင်း ပေါင်းမြက်ရှင်းခြင်း၊ ဓါတ်မြေဩဇာ ထည့်သွင်းခြင်းစသည်တို့ကို   ဆောင်ရွက်ကြရပါသည်။

      ရာဘာအပင်မှ အစေးများကို အခဲအဖြစ်ပြုပြင်၍ လူသုံးကုန်ပစ္စည်းများတွင် အသုံးပြုသည့် အတွက် အလွန်အသုံးဝင်သော စက်မှုကုန်ကြမ်းဖြစ်သည့်အလျှောက် ယခုအခါ ရာဘာဈေးနှုန်းမှာ  တစ်ပေါင်လျှင် ( ၃၀၀၀/-ကျပ် )အထိ ဈေးရရှိပြီး၊ ရာဘာမှိုင်းခံပြားများကို Rs-1, Rs-2, Rs-3 ဟူ၍ အမျိုးအစား အဆင့်(၃)ဆင့်ခွဲ၍ သတ်မှတ်ကြပါသည်။ Rs-2 သတ်မှတ်သော မှိုင်းခံပြား တစ်ပေါင်လျှင် (၂၅၀၀/-ကျပ် )၊ Rs-3 သတ်မှတ်သော မှိုင်းခံပြား တစ်ပေါင်လျှင် (၂၄၀၀/-ကျပ်) ဈေးနှုန်းရရှိပြီး၊ ရန်ကုန်တိုင်းဒေသကြီးနှင့် မန္တလေးတိုင်းဒေသကြီးရှိ ရာဘာ လူသုံးကုန်ပစ္စည်း ထုတ်လုပ်ရေးစက်ရုံ များနှင့်ရာဘာကုန်ကြမ်းသုံးစက်ရုံများသို့ တင်ပို့ရောင်းချလျက်ရှိပါသည်။ ရာဘာပင်သည် နှစ်ရှည်ပင် ဖြစ်၍ နှစ်(၃၀)ခန့် ဆက်တိုက် ရာဘာအစေးခြစ်နိုင်သည်ဖြစ်၍ ရေရှည်စီးပွားရေးအတွက် အကျိုးရှိသော လုပ်ငန်းတစ်ခုဖြစ်ပါသည်။ အဆင့်မှီ ရာဘာပြားများကို တိုးတက်ထုတ်လုပ်ခြင်းဖြင့်ပြည်ပသို့ တင်ပို့နိုင်ပြီး နိုင်ငံခြားဝင်ငွေရရှိစေကာ နှစ်ရှည်စိုက်ပျိုးရေးလုပ်ငန်းတစ်ခုဖြစ်ကြောင်း လေ့လာတင်ပြအပ်ပါသည်။

DOCA(ဧရာဝတီ)

     မကွေးတိုင်းဒေသကြီး၊ သရက်ခရိုင်၊ အောင်လံမြို့၊ အောင်လံကုန်စည်ဒိုင်တွင် နှမ်းနှင့် ပဲမျိုးစုံသီးနှံများ အရောင်းအဝယ်ဖြစ်လျက်ရှိကြောင်း သိရသည်။

      ၂၀၂၄ခုနှစ်၊ စက်တင်ဘာလ(ဒုတိယပတ်)တွင် အနိမ့်စ နှမ်းနက်(စမုန်) (၁)တင်းလျှင် ကျပ်(၁၆၀၀၀၀ မှ ၁၆၆၅၀၀)၊ ထိပ်စ နှမ်းနက်(စမုန်) (၁)တင်းလျှင် ကျပ်(၁၇၀၀၀၀ မှ ၁၉၆၅၀၀) ဖြစ်၍ ယခင်တစ်ပတ်နှင့် နှိုင်းယှဉ်ပါက ယခုတစ်ပတ်တွင် အနိမ့်စ နှမ်းနက်(စမုန်) ကျပ်(၁၀၀၀၀) ဈေးနှုန်းမြင့်တက်ခဲ့ပြီး ထိပ်စ နှမ်းနက်(စမုန်) ကျပ်(၃၀၀၀ မှ ၁၃၅၀၀)ဈေးနှုန်းကျဆင်း၍ အရောင်းအဝယ်ဖြစ်ခဲ့ကြောင်း၊ တစ်ပတ်အတွင်း နှမ်းနက်(စမုန်)တင်းရေ (၂၂၄၀၀)တင်း၊ တန်ချိန်(၂၇၉)တန် အရောင်းအဝယ်ရှိခဲ့ပါကြောင်း သိရသည်။

     နှမ်းနီဈေးနှုန်းမှာ (ဒုတိယပတ်)တွင် (၁)တင်းလျှင် အနိမ့်စ ကျပ်(၁၁၀၀၀၀)၊ ထိပ်စ ကျပ်(၁၁၃၃၀၀)ဖြစ်၍ ဈေးနှုန်းပြောင်းလဲမှုမရှိကြောင်း၊ တစ်ပတ်အတွင်း နှမ်းနီတင်းရေ (၆၆၀)၊ တန်ချိန်(၁၆)တန် အရောင်းအဝယ်ရှိခဲ့ကြောင်း၊ နှမ်းဖြူ (၁)တင်းလျှင် ကျပ်(၁၁၀၀၀၀)ဖြစ်ပြီး ယခင်တစ်ပတ်အတိုင်း ဈေးနှုန်းပြောင်းလဲမှုမရှိဘဲ တင်းရေ(၂၇၀)၊ တန်ချိန်(၆.၆)တန် အရောင်းအဝယ်ဖြစ်ခဲ့ကြောင်း သိရသည်။

    ဈေးကွက်အနေဖြင့် နှမ်းနက်(စမုန်)နှင့်နှမ်းဖြူတို့ကို မန္တလေးမြို့သို့တင်ပို့ရောင်းချပြီး နှမ်းနီကို မြို့နယ်တွင်း ဆီစက်လုပ်ငန်းများမှ ဝယ်ယူကြကြောင်း အောင်လံကုန်စည်ဒိုင်မှ သိရှိရပါသည်။

DOCA(မကွေး)

  မကွေးတိုင်းဒေသကြီး၊ မကွေးဈေးကွက်အတွင်း ကြက်သွန်နီများ နေ့စဉ်ဝင်ရောက် အရောင်းအဝယ်ဖြစ်လျက်ရှိရာ စက်တင်ဘာလ(ဒုတိယပတ်)တွင် ကြက်သွန်နီ (၁)ပိဿာလျှင် ကျပ်(၁၉၀၀-၂၀၀၀-၂၂၀၀) ဖြစ်ပြီး ယခင်တစ်ပတ်နှင့်နှိုင်းယှဉ်ပါက ကျပ်(၃၀၀-၄၀၀-၃၀၀) ခန့် ဈေးနှုန်းကျဆင်းခဲ့​​ပါသည်။ ဈေးကွက်အနေဖြင့် မင်းဘူး၊ သရက်၊ ကံမ၊ နတ်မောက်၊ ငဖဲမြို့များမှ ဝယ်ယူကြကြောင်း၊ တစ်နေ့လျှင် ပိဿာချိန် (၁၀၀၀)ခန့်၊ တန်ချိန်(၉) တန်ခန့် အရောင်းအဝယ်ဖြစ်လျက်ရှိကြောင်း သိရသည်။

  ရေနံချောင်းမြို့နယ်မှ ဒေသထွက်ကုန်ဖြစ်သော ကြက်သွန်နီဈေးနှုန်းများမှာ စက်တင်ဘာလ (ဒုတိယပတ်)တွင် (၁)ပိဿာလျှင် ကျပ်(၁၄၀၀-၁၆၀၀-၁၈၀၀) ဖြစ်ပြီး ဈေးနှုန်းပြောင်းလဲမှုမရှိကြောင်း၊ ကြက်သွန်နီများကို ရေနံချောင်းပွဲရုံမှ တစ်ဆင့် ရန်ကုန်၊ ပြည်၊ အောင်လံမြို့သို့ တင်ပို့ရောင်းချကြောင်း၊ တစ်ရက်လျှင် တန်ချိန် (၁၄) တန်ခန့် အရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(မကွေး)

     မကွေးတိုင်းဒေသကြီး၊ အထက်မင်းလှမြို့နယ်၊ ပန်းတော်ပြင်ကျေးရွာအုပ်စု၊ မယ်ဇလီတော ကျေးရွာသည် မြေပဲ၊ နှမ်း၊ ဝါ၊ ခရမ်းချဉ်သီး၊ မေမြို့ပန်း၊ သပြေပန်းနှင့် အခြားသီးပင်စားပင်များကို ရာသီအလိုက်စိုက်ပျိုးကြပြီး မိုးနှမ်းကို ၂၀၂၄ခုနှစ်၊ ဇွန်လကုန်တွင် တောင်သူ(၇၀)ဦးမှ ဧက(၃၀၀) ခန့် စိုက်ပျိုးခဲ့ကြောင်း သိရသည်။

    မိုးနှမ်းစိုက်ပျိုးရာတွင် နှမ်းနီမျိုးကို အဓိကစိုက်ပျိုးကြပြီး တောင်သူ ဦးဝင်းသိန်းက ၎င်းအနေဖြင့် နှမ်းနီ(၅)ဧကခန့်ကို ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊  မျိုးကို ယခင်နှစ်နှမ်းစိုက်ခင်းမှထွက်ရှိသည့် နှမ်းစေ့များကို မျိုးအဖြစ်ဖယ်ချန်၍ စိုက်ပျိုးပြီး (၁)ဧကလျှင် မျိုး(၂)ပြည်ခန့် ကုန်ကျပါကြောင်း၊ စိုက်ပျိုးပြီး ရက်ပေါင်း(၇၅)ရက်အကြာတွင် ရိတ်သိမ်းရကြောင်း၊ ကုန်ကျစရိတ်အနေဖြင့် လုပ်အားခ၊ မြေပြုပြင်ခနှင့် အခြား သွင်းအားစုစရိတ်အပါအဝင် စုစုပေါင်း ကျပ်(၃၅၀၀၀၀)ခန့်ကုန်ကျကြောင်း၊ အထွက်နှုန်းအနေဖြင့် (၁)ဧကလျှင် (၇)တင်းသာ ထွက်ရှိပြီး ယခုစက်တင်ဘာလ(ဒုတိယပတ်)တွင် နှမ်းနီ(၁)တင်လျှင် ကျပ်(၁၁၀၀၀၀) ခန့် ဈေးရရှိကြောင်း၊ ဈေးကွက်အနေဖြင့် မင်းလှမြို့ရှိ ပွဲရုံများသို့ရောင်းချပြီး ထိုမှတဆင့် မန္တလေးမြို့သို့ တင်ပို့ကြောင်း၊ အကျိုးအမြတ်အနေဖြင့် (၁)ဧကလျှင် ကျပ်(၄၂၀၀၀၀)ခန့် ရရှိကြောင်း၊ ယခုနှစ်တွင် မိုးခေါင်မှုကြောင့် မင်းလှမြို့နယ်အတွင်း နှမ်းအထွက်နှုန်းလျော့နည်းကြသော်လည်း နှမ်းဈေးမှာ ယခင်နှစ်ကထက် ဈေးကောင်းရရှိ၍ တောင်သူများအနေဖြင့် ထိုက်သင့်သည့်အကျိုးအမြတ်များရရှိပါကြောင်း သိရှိရပါသည်။

DOCA(မကွေး)

      မကွေးတိုင်းဒေသကြီး၊ မကွေးခရိုင်၊ မကွေးဈေးကွက်၌ မကွေးမြို့နယ်အတွင်းရှိ ကျေးရွာများနှင့် မင်းဘူးခရိုင်အတွင်းရှိ ကျေးရွာများမှ ထွက်ရှိသည့် ကုလားပဲသီးနှံများ နေ့စဉ် အရောင်းအဝယ်ဖြစ်လျက်ရှိရာ  ၂၀၂၄ ခုနှစ်၊ စက်တင်ဘာလ (ဒုတိယပတ်)တွင် ကုလားပဲဝါ(929) တစ်တင်းလျှင် ငွေကျပ် (၉၅၀၀၀)၊ ကုလားပဲဝါ(HL) တစ်တင်းလျှင်  ငွေကျပ်(၉၄၀၀၀)ဖြင့် အရောင်းအဝယ်ဖြစ်ကြောင်း၊ ဈေးကွက်အနေဖြင့် ရန်ကုန်၊ မန္တလေးနှင့် ပြည်မြို့များသို့ တင်ပို့လျက်ရှိကြောင်း သိရသည်။

    စက်တင်ဘာလ(ပထမပတ်) ဈေးနှုန်းများဖြင့် နှိုင်းယှဉ်ပါက စက်တင်ဘာလ ပထမပတ်တွင် ကုလားပဲ တစ်တင်းလျှင် ငွေကျပ် ၁၀၀ဝ မြင့်တက်လာကြောင်း၊ ဈေးကွက်အတွင်း ဝယ်လိုအားကောင်းသော်လည်း ယခင်နှစ်ကထွက်ရှိသည့် ကုလားပဲများသာ အရောင်းအဝယ်ဖြစ်သောကြောင့် ဈေးနှုန်မြင့်တက်ရခြင်းဖြစ်ကြောင်း မကွေးဈေးကွက်မှ သိရသည်။

    ကုလားပဲကို နေ့စဉ်စားသုံးခြင်းဖြင့်လည်း ပရိုတင်းဓါတ်ရရှိ၍ ခန္ဓာကိုယ်ကြီးထွားဖွံ့ဖြိုးစေသည့်အပြင် နှလုံးကို ကျန်းမာစေခြင်း၊ အရိုးအဆစ်သန်မာစေခြင်းစသည့် ကျန်းမာရေးအကျိုးကျေးဇူးများ ရရှိနိုင်ပါ၍ စားသုံးသင့်ပါကြောင်း အကြုံပြုအပ်ပါသည်။

DOCA(မကွေး)