ပြည်တွင်းကုန်သွယ်မှုသတင်း

      ဂျူးမြစ်ကို တောင်ကြီးနှင့် ပင်းတယမြို့တို့တွင် အများဆုံးစိုက်ပျိုးကြပြီး ထိုမှတစ်ဆင့် မြို့များနှင့် နယ်များရှိ ဈေးများသို့ တင်ပို့ရောင်းချကြပါသည်။ ပြည်မြို့ရှိ ဈေးကွက်များသို့လည်း တင်ပို့ရောင်းချသဖြင့် စားသုံးသူများလည်း ဝယ်ယူစားသုံးကြပါသည်။ ဂျူးမြစ်ကို အတို့အမြုပ်အနေဖြင့်လည်းကောင်း၊ ချဉ်ရည်ဟင်းချက်၍သော်လည်းကောင်း စားသုံးကြသလို ရှမ်းပြည်ဘက်တွင် မြေပဲ၊ ပဲပုတ်တို့ဖြင့်ရော၍ကြော်ပြီး စားသုံးကြသလို ရောင်းချသည်များလည်း ရှိပါသည်။ ထိုဂျူးမြစ်ကြော်ကို မြေပြန့်ဒေသမှ စားသုံးသူပြည်သူများက ဝယ်ယူစားသုံးကြပါသည်။ ဂျူးမြစ်ကို ထိုသို့တန်ဖိုးမြှင့် ထုတ်ကုန်အဖြစ် ထုတ်လုပ်ရောင်းချသဖြင့် လူအများကရှမ်းပြည်လက်ဆောင်အဖြစ် လက်ဆောင်များပေးခြင်း၊ မိမိကိုယ်တိုင်စားသုံးရန်အတွက်ဖြစ်စေ ဝယ်ယူကြပါသည်။ ဂျူးမြစ်မှ ထုတ်လုပ်နိုင်သော တန်ဖိုးမြှင့်ထုတ်ကုန်များမှာ အအေးခံဂျူးရွက်၊ ဂျူးမြစ်ရှာလကာရည်၊ သီးရွက်စုံဆလတ်၊ ငါးဂျူးမြစ်ခဲပတ်ကင်နှင့် အသင့်သုံးကျန်းမာရေး ဟင်းခတ်အမွှေးအကြိုင်တို့ဖြစ်ပါသည်။ ထိုသို့ ဂျူးမြစ်မှတဆင့်တန်ဖိုးမြှင့် ထုတ်ကုန်များကို ပြည်ခရိုင်အနေဖြင့် ထုတ်လုပ်ရောင်းချနိုင်မည်ဆိုလျှင် အမြစ်အတိုင်း အစိမ်းရောင်းချခြင်းထက် ပိုမိုအကျိုးအမြတ်များစွာ ရရှိနိုင်မည်ဟု ခန့်မှန်းရပါသည်။ စက်တင်ဘာလတတိယအပတ်တွင် ဈေးကွက်အတွင်းရောင်းချသော ဂျူးမြစ်ဈေးမှာ ဂျူးမြစ်အစည်း တစ်စည်းလျှင် (၆၀၀-၇၀၀)ကျပ်ဖြင့် ရောင်းချကြောင်း သိရပါသည်။ ယခင်နှစ်ဖြစ်သော ၂၀၂၃ခုနှစ်တွင် ဂျူးမြစ်အစည်းတစ်စည်းလျှင် ၅၀၀ကျပ်ဖြင့် ယခုနှစ်တွင် ဈေးအနည်းငယ် မြင့်တက် လာသည်ဟု သိရပါသည်။

DOCA(ပဲခူး)

     မြန်မာနိုင်ငံတွင် အမျိုးသားအများစုမှာ ကွမ်းစားတက်သူများဖြစ်၍ ကွမ်းစားသူများ အများအပြားရှိသဖြင့် ကွမ်းသီး၊ ကွမ်းရွက်များနေ့စဉ် အရောင်းအဝယ်ဖြစ်လျက်ရှိပါသည်။ ပြည်ခရိုင်၊ ပြည်မြို့တွင် အရောင်းအဝယ်ဖြစ်လျက်ရှိသော ကွမ်းသီးများကို ရန်ကုန်မြို့မှတစ်ဆင့် မှာယူတင်သွင်း ရောင်းချနေကြောင်းသိရပါသည်။ ပြည်မြို့တွင်ကွမ်းသီးပင်ကို စီးပွားဖြစ်စိုက်ပျိုးခြင်းမရှိဘဲ အိမ်ခြံဝန်းများအတွင်းတွင် အလှပန်းပင်အနေဖြင့် စိုက်ပျိုးကြပါသည်။

     စက်တင်ဘာလတတိယအပတ်တွင် ပြည်ဈေးကွက်တွင် အရောင်းအဝယ်ဖြစ်လျက်ရှိသော ကွမ်းသီးဈေးနှုန်းများမှာ ကွမ်းသီးစိတ် (အသန့်)တစ်ပိဿာလျှင် ၁၃၀၀၀ကျပ်၊ ကွမ်းသီးအခြမ်း (အသန့်)တစ်ပိဿာလျှင် ၈၀၀၀-၈၅၀၀ ကျပ် နှင့် ကွမ်းသီးခြမ်း(ဂျွန်)တစ်ပိဿာလျှင် ၇၅၀၀ကျပ်ဖြင့် ရောင်းချလျက်ရှိကြောင်း သိရပါသည်။ ယခင်နှစ်တွင် အရောင်းအဝယ်ဖြစ်ခဲ့သော ကွမ်းသီးဈေးနှုန်းများမှာ ကွမ်းသီးစိတ် (အသန့်) တစ်ပိဿာလျှင် ၄၅၀၀ကျပ်၊ ကွမ်းသီးစိတ် သောင်းပြောင်းရောရာ တစ်ပိဿာလျှင် ၄၀၀၀ကျပ်ဖြင့် ရောင်းချခဲ့သဖြင့် ယခုနှစ်တွင် ကွမ်းသီးဈေးများ မြင့်တက် လာကြောင်း သိရပါသည်။ ပြည်ဈေးကွက်တွင် ရောင်းချလျက်ရှိသော ကွမ်းသီးများကို ဒေသတွင်းရှိ ဈေးများတွင် ဖြန့်ဖြူးရောင်းချသကဲ့သို့ အနီးနားရှိနယ်ဈေးများသို့လည်း တင်ပို့ရောင်းချသဖြင့် တစ်နေ့လျှင် ပိဿာချိန် ၁၀၀အထိ အရောင်းအဝယ်ဖြစ်ကြောင်း ကွမ်းသီးရောင်းချသူတစ်ဦးထံမှ သိရှိရပါသည်။

DOCA(ပဲခူး)

       စစ်ကိုင်းတိုင်းဒေသကြီး၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကထားလုပ်ကိုင်သော ဒေသတစ်ခုဖြစ်ပြီး သီးနှံစိုက်ပျိုးရာတွင် အထွက်နှုန်းများ ပိုမိုကောင်းမွန်စေရန်နှင့် ပန်းတိုင်အထွက်နှုန်းရရှိရေးအတွက် ကန့်ဘလူခရိုင်အတွင်းရှိ  သီးနှံစိုက်ပျိုးသူများက ဝယ်ယူအသုံးပြုလျက်ရှိကြောင်းသိရသည်။

      ကန့်ဘလူခရိုင်၏ စက်တင်ဘာလ တတိယပတ်အတွင်း စိုက်ပျိုးရေးသုံးဓာတ်မြေဩဇာနှင့် ပိုးသတ်ဆေးဈေးနှုန်းများမှာ ပန်းဖူး(50)kg တစ်အိတ်လျှင် (၁၄၅၀၀၀)ကျပ်၊ မြှားကမ္ဘာ(50)kg တစ်အိတ်လျှင် (၁၂၄၀၀၀)ကျပ်၊ အာမို၊ ကျွဲနက်တံဆိပ် (၁၅:၁၅:၁၅) ကွန်ပေါင်းဓာတ်မြေဩဇာ (50)kg တစ်အိတ်လျှင် (၂၂၀၀၀၀)ကျပ်၊ ရွှေတောနစ်(၅၀၀)စီစီတစ်ဘူးလျှင် (၁၄၅၀၀)ကျပ်၊ မိုရယ်လ်မုန်း အမြစ်ပွား၊ အသီးတင်၊ အပင်သန် ဟော်မုန်းဆေး (၅၀၀)စီစီတစ်ဘူးလျှင် (၄၁၀၀၀)ကျပ်၊ အေမင်း စူပါစပါးပေါင်းသတ်ဆေး (၁)လီတာတစ်ဘူးလျှင် (၃၈၀၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခုအပတ်အတွင်း ဓာတ်မြေဩဇာဈေးနှုန်းများ အနည်းငယ်မြင့်တက်လာကြောင်း  ဓာတ်မြေဩဇာနှင့်ပိုးသတ်ဆေးရောင်းချသည့် ဆိုင်များထံမှသိရပါသည်။ 

DOCA(စစ်ကိုင်း)

    တစ်နှစ်တွင် ပုံမှန် တစ်လ၊ နှစ်လသာ ရှားရှားပါးပါးပေါ်သော ရာသီစာကိုင်းဥကို ယခုလိုအချိန် မြစ်ကမ်းနားဘေးနားရှိ ကိုင်းပင်များတွင် တွေ့ရတတ်ပါသည်။ ကိုင်းဥဟုခေါ်ဆိုသော်လည်း ဥလည်း မဟုတ်သလို မှိုလည်းမဟုတ်၊ အသီးလည်းမဟုတ်ကြောင်း သိရပါသည်။ ကိုင်းပင်၏ပင်စည်မှ အစေးများစုပြီး ဥကဲ့သို့ဖြစ်တည်နေသော အစားအစာတစ်မျိုးဖြစ်ကြောင်း လေ့လာသိရှိရပါသည်။ အင်ဥကဲ့သို့ ချောမွေ့မှုမရှိဘဲ ကြမ်းတမ်းတမ်းရှိပြီး အရသာမှာဆိမ့်သောအရသာရှိပါသည်။ ကိုင်းဥကိုဆားနှင့် ငရုတ်ကောင်းဖြူး၍ ကင်စားကြသကဲ့သို့ အချို့မှာလည်း ကန်စွန်းရွက်နှင့်ရော၍ ကြော်စားတတ်ကြပါသည်။ ရာသီစာဖြစ်ပြီးလူကြိုက်များသော်လည်း ရှားပါးပြီး အနည်းငယ်သာထွက်ရှိသော ကြောင့် ဈေးကွက်အတွင်းတွင် အနည်းငယ်သာ တွေ့ရတတ်ပါသည်။

    ပြည်ဈေးကွက်တွင် ရောင်းချနေသော ကိုင်းဥဈေးနှုန်းများမှာ ယခင်နှစ်တွင် နို့ဆီဘူးတစ်ဘူးလျှင် ၃၅၀၀ကျပ်ဈေးရှိခဲ့ပြီး ယခုနှစ်တွင် နို့ဆီဘူးတစ်ဘူးလျှင် ၈၀၀၀ကျပ်ဈေးဖြင့်ရောင်းချသဖြင့် ယခုနှစ်တွင် ကိုင်းဥဈေးမှာ နို့ဆီဘူးတစ်ဘူးလျှင် ၄၅၀၀ကျပ်ခန့် ဈေးနှုန်းများမြင့်တက်လျက်ရှိ ကြောင်း လေ့လာသိရှိရပါသည်။

DOCA(ပဲခူး)

      ဧရာဝတီတိုင်းဒေသကြီး ဟင်္သာတခရိုင်၌ ၂၀၂၄ မိုးစပါးကို ဟင်္သာတမြို့နယ်တွင် (၆၆၆၅၄) ဧက၊ ဇလွန်မြို့နယ်တွင် (၃၀၅၄၆)ဧက နှင့် လေးမျက်နှာမြို့နယ်တွင် (၃၀၂၄၅)ဧက၊ စုစုပေါင်း (၁၂၇၄၄၅)ဧက စိုက်ပျိုးကြပြီး၊ သီးထပ်အဖြစ် မတ်ပဲ၊ပဲတီစိမ်းနှင့် နွေစပါးတို့ကို စိုက်ပျိုးကြပါသည်။  စိုက်ပျိုးသော စပါးမျိုးများမှာ ဆင်းသုခ၊ မနောသုခ၊ GW-11 ၊ GW-18 ၊  မှော်ဘီ ၃ ၊ ရက်(၉၀)၊ ရွှေဧရာ၊ ပခန်း   စသောမျိုးများကို အဓိကစိုက်ပျိုးကြပါသည်။

          ၂၀၂၄ ခုနှစ် မေလ နောက်ဆုံးပတ်က စိုက်ပျိုးသော မိုးစပါးများသည် ၂၀၂၄ ခုနှစ် စက်တင် ဘာလ ဒုတိယပတ်တွင် စတင်ထွက်ရှိလာကြပါသည်။ စားသုံးသူရေးရာဦးစီးဌာန၊ ဟင်္သာတမြို့နယ်ဦးစီးမှူးသည်  (၂၄.၉.၂၀၂၄)နေ့တွင်  ၂၀၂၄  ခုနှစ်ထွက်  ကောက်စောမိုးစပါး ရိတ်သိမ်းသော ဟင်္သာတမြို့နယ်၊ စခန်းကြီးကျေးရွာအုပ်စု၊ အုန်းပင်စုကျေးရွာ(တောင်ပိုင်း)ရှိ၊ တောင်သူ ဦးသိန်းမြင့် ၏ GW-11 စပါးမျိုးစိုက်ပျိုးထားသော  လယ်(၄.၀၀)ဧကသို့  ကွင်းဆင်းလေ့လာခဲ့ပါသည်။ တစ်ဧကလျှင် ပျမ်းမျှအစိုဓါတ် ရာခိုင်နှုန်း(၂၄-၃၀)ကြားရှိပြီး  (၅၅)ပေါင် တင်း(၉၀)မှ(၉၅)တင်းကြား ထွက်ရှိကြောင်း သိရှိရပါသည်။ ကွင်းပေါက်ဈေးမှာ အစို(၅၅)ပေါင် တင်း(၁၀၀)လျှင် (၁၅ သိန်း ကျပ်) ဈေးဖြင့် ရောင်းချရပြီး တစ်ဧကလျှင်(၇ သိန်းကျပ်)ဝန်းကျင်ခန့် အကျိုးအမြတ်ရရှိကြောင်း တောင်သူဦးသိန်းမြင့်ထံမှ ပြောကြားပါသည်။

DOCA(ဧရာဝတီ)