ပြည်တွင်းကုန်သွယ်မှုသတင်း

    ဧရာဝတီတိုင်းဒေသကြီး ၊ ပုသိမ်ခရိုင်၊ ပုသိမ်မြို့ရှိ ဘူတာဈေးတွင် ရောင်းချလျက်ရှိသည့် ကြက်ဥ၊ ဘဲဥများမှာ ဒေသတွင်းကြက်ခြံ၊ ဘဲခြံများမှ ဝယ်ယူရောင်းချလျက်ရှိပြီး၊ လိုအပ်ချက် အရ ဘိုကလေးမြို့မှလည်း ဝယ်ယူရောင်းချကြောင်း သိရသည်။ ၂၀၂၄ ခုနှစ်၊ စက်တင်ဘာလ တတိယပတ်အတွင်း ဖြစ်ပေါ်နေသော ကြက်ဥ၊ ဘဲဥဈေးနှုန်းများမှာ ကြက်ဥကြီးတစ်လုံးလျှင် (၃၈၀)ကျပ်၊ ဥလတ်တစ်လုံးလျှင်(၃၅၀)ကျပ် ၊ ဥသေးတစ်လုံးလျှင်(၃၂၀)ကျပ်နှင့် ဘဲဥကြီး တစ်လုံးလျှင် (၄၅၀) ကျပ်၊ ဥသေးတစ်လုံးလျှင်(၄၀၀)ကျပ်၊ ငုံးဥ(၁၀)လုံးလျှင် (၁၀၀၀)ကျပ်ဖြင့် အရောင်းအဝယ်ဖြစ်လျက်ရှိပြီး ယခင်လကာလတူဖြစ်ပေါ်ခဲ့သော ဈေးနှုန်းများထက်အနည်းငယ် ကျဆင်းသွားပါသည်။

     ကြက်ဥ၊ ဘဲဥ၊ ငုံးဥများကို စားသောက်ဆိုင်များ၊ မုန့်လုပ်ငန်းများတွင် အများဆုံး အသုံးပြုကြပြီး အိမ်ရှင်မများမှ မိသားစုထမင်းဝိုင်းအတွက် ဟင်းလျာအဖြစ် ချက်ပြုတ်ရာတွင် လည်း အသုံးပြုလျက်ရှိပါသည်။

DOCA(ဧရာဝတီ)

      မကွေးတိုင်းဒေသကြီး၊ ပခုက္ကူခရိုင်အတွင်းရှိ ပခုက္ကူမြို့သည် မိမိဒေသမှ စိုက်ပျိုးထွက်ရှိသော ဆီထွက်သီးနှံနှင့် ပဲမျိုးစုံများအပြင် အခြားတိုင်းဒေသကြီးအတွင်းရှိ မြို့နယ်များမှထွက်ရှိသော သီးနှံမျိုးစုံ ပခုက္ကူဈေးကွက်သို့ ဝင်ရောက်အရောင်းအဝယ်ဖြစ်လျက်ရှိခြင်းကြောင့် ပခုက္ကူမြို့သည် စီးပွားရေး အချက်အချာကျ၍ ကုန်သွယ်မှုလုပ်ငန်းများဖွံ့ဖြိုးတိုးတက်လျက်ရှိသည်။ ၂၀၂၄ခုနှစ်၊ စက်တင်ဘာလ (စတုတ္ထပတ်)တွင် ပခုက္ကူမြို့ ပဲဈေးကွက်တွင် ကုလားပဲသီးနှံအရောင်းအဝယ်သွက်လျက်ရှိကြောင်း၊ ကုလားပဲလက်ကျန်နည်းသော်လည်း အမြင့်ဈေးဖြင့် ဈေးငြိမ်၍ အရာင်းအဝယ်ဖြစ်လျက်ရှိကြောင်းသိရှိရသည်။

          စက်တင်ဘာ(စတုတ္ထပတ်)တွင် ဖြစ်ပေါ်နေသော ကုလားပဲဈေးနှုန်းများမှာ  ကုလားပဲ(929) တစ်တင်းလျှင် ကျပ်(၉၈၀၀၀)၊ ကုလားပဲ(V₆) တစ်တင်းလျှင် ကျပ်(၁၁၅၀၀၀)၊ ကုလားပဲ(V₂) တစ်တင်းလျှင် ကျပ်(၁၀၆၀၀၀)၊ ကုလားပဲ(HL) တစ်တင်းလျှင် ကျပ်(၉၂၀၀၀)၊ ကုလားပဲခြမ်းတစ်တင်းလျှင် ကျပ်(၁၃၆၀၀၀)ဈေးဖြင့် အရောင်းအဝယ်ဖြစ်လျက်ရှိကြောင်းသိရသည်။ ယခုအချိန်တွင် ပြည်တွင်း၌ ပဲစားသုံးမှုမြင့်မားလျက်ရှိ၍ ကုလားပဲခြမ်းများ အရောင်းအဝယ်သွက်လျက်ရှိကြောင်း၊ ဈေးနှုန်းနှိုင်းယှဉ်ပါက တစ်လအတွင်း  ကုလားပဲတစ်တင်းလျှင် ကျပ်(၁၀၀၀)ခန့်ဈေးတက်၍ အရောင်းအဝယ်ဖြစ်လျက်ရှိကြောင်း၊ ဒေသတွင်းဈေးကွက်တွင် ကုလားပဲလက်ကျန်နည်းနေသော်လည်း လာမည့်အောက်တိုဘာလတွင် ပဲ(အသစ်)များ စိုက်ပျိုးချိန်ရာသီနီး၍ ကုလားပဲဈေးကွက်ကျဆင်းခြင်းမရှိဘဲ ဆက်လက်မြင့်တက်နိုင်ကြောင်း၊ စက်တင်ဘာလ(စတုတ္ထ)ပတ်တွင် ကုလားပဲသီးနှံမှာ ပြည်တွင်းဝယ်လိုအားကောင်း၍ အရောင်းအဝယ်သွက်ပြီး ပြည်ပတင်ပို့မှုမရှိကြောင်း ပဲမျိုးစုံရောင်းဝယ်ရေးဈေးကွက်မှသိရှိရပါသည်။

DOCA(မကွေး)

       မကွေးတိုင်းဒေသကြီး၊ ပခုက္ကူမြို့တွင် ၂၀၂၄ခုနှစ်၊ ဩဂုတ်လ(စတုတ္ထပတ်)တွင် ဖြစ်ပေါ်နေသော ဘိလပ်မြေဈေးနှုန်းများမှာ ကြံ့နှစ်ကောင် ဘိလပ်မြေ တစ်အိတ်လျှင် ကျပ်(၁၁၃၀၀)၊ အယ်လဖာ ဘိလပ်မြေတစ်အိတ်လျှင် ကျပ်(၁၁၂၀၀)၊ အပါချီ ဘိလပ်မြေတစ်အိတ်လျှင် ကျပ်(၁၂၈၀၀)ဈေးဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။

       ယခုစက်တင်ဘာလ(စတုတ္ထပတ်)တွင် ဓာတ်မြေဩဇာဈေးနှုန်းများမှာ ဩဂုတ်လ (စတုတ္ထပတ်) ထက် ဈေးနှုန်းများတက်လာသည်ကိုတွေ့ရှိရပါသည်။ ယခုလက်ရှိဈေးနှုန်းများမှာ  အာမိုယူရီးယား(50)kgပါ တစ်အိတ်လျှင် ကျပ်(၈၅၀၀၀)၊ ဩဘာယူရီးယား (50)kgပါ တစ်အိတ်လျှင် ကျပ်(၉၃၀၀၀)၊ ရွှေနဂါးယူရီးယားတစ်အိတ်လျှင် ကျပ်(၁၂၀၀၀၀)၊ တရုတ်တီစူပါ သံကွင်း (50)kgပါ တစ်အိတ်လျှင် ကျပ်(၁၆၅၀၀)၊ တရုတ်ပုလဲရွှေတောင် (50)kgပါ  တစ်အိတ်လျှင် ကျပ်(၉၅၀၀၀)၊ မြန်မာဩဘာ ရွှေကောမက် (50)kg ပါ တစ်အိတ်လျှင် ကျပ်(၁၆၅၀၀၀)၊ ဩဘာကွန်ပေါင်း (50)kg ပါ တစ်အိတ်လျှင် ကျပ်(၁၄၀၀၀၀)၊ ကောမက်ကွန်ပေါင်း ၁၅း၁၅း၁၅ (50kg)ပါ တစ်အိတ်လျှင် ကျပ်(၁၄၀၀၀၀)၊ တရုတ်အာမို ၁၆း၁၆း၁၆ (50kg)ပါ တစ်အိတ်လျှင် ကျပ်(၁၄၅၀၀၀)ဖြင့် အရောင်းအဝယ်ဖြစ်လျက်ရှိကြောင်းသိရသည်။

         ယခုစက်တင်ဘာလ(စတုတ္ထပတ်)တွင် ဖြစ်ပေါ်နေသော ပိုးသတ်ဆေးဈေးနှုန်းများမှာ ဩဂုတ်လ (စတုတ္ထပတ်)ဈေးနှုန်းများထက် ဈေးတက်နေကြောင်း တွေ့ရသည်။  အာမိုမက်နီ ဖော့(500)cc တစ်ဘူးလျှင် ကျပ်(၅၅၀၀၀)၊ အာမိုမက်နီဖော့ (၁)လီတာတစ်ဘူးလျှင် ကျပ်(၁၀၅၀၀၀)၊ အာမိုစတား(၁)လီတာတစ်ဘူးလျှင် ကျပ်(၆၉၀၀၀)၊ အာမိုအီမာ(၂၅၀)cc တစ်ဘူးလျှင် ကျပ်(၂၀၀၀၀)၊ (၅၀၀)cc တစ်ဘူးလျှင် ကျပ်(၂၈၅၀၀)၊ (၁)လီတာတစ်ဘူးလျှင် ကျပ်(၅၃၀၀၀)၊ ဂျက်ကက် မင်းမဟော် (၁၀၀)cc တစ်ဘူးလျှင် ကျပ်(၁၆၅၀၀)၊ ဩဘာအဆီဖိတ် (500)gပါ တစ်ထုပ်လျှင် ကျပ်(၃၅၅၀၀)၊ ဩဘာငှက်ကြီးတောင်(၁၀၀)cc တစ်ဘူးလျှင် ကျပ်(၂၉၀၀၀)၊ ဩဘာ ငှက်ကြီးတောင်(၂၅၀)cc တစ်ဘူးလျှင် ကျပ်(၆၇၀၀၀)၊ မင်းမဟော် ဖော်ယူဘိုး (500)cc တစ်ဘူးလျှင် ကျပ်(၄၇၀၀၀)၊ မင်းမဟော် ဖော်ယူဘိုး (250)cc တစ်ဘူးလျှင် ကျပ်(၂၅၀၀၀)၊ မင်းမဟော် ဂုတ်မက်ပ် (၂၅၀)cc တစ်ဘူးလျှင် ကျပ် (၃၈၀၀၀)၊(၅၀၀)cc တစ်ဘူးလျှင်  ကျပ်(၆၈၀၀၀) ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။

        စက်တင်ဘာလ(စတုတ္ထပတ်)တွင် ယခင်ဩဂုတ်လ(စတုတ္ထပတ်)ထက်  ပိုးသတ်ဆေးဈေးနှုန်းမှာ မြင့်တက်လာသည်ကိုတွေ့ရှိရပြီး သီနှံသိုလှောင်ချိန်ဖြစ်သောကြောင့်  ပိုးသတ်ဆေးမှာ ပို၍အရောင်းအဝယ်ဖြစ်လျက်ရှိကြောင်း လုပ်ငန်းရှင်များထံမှသိရှိရပါသည်။

DOCA(မကွေး)

       မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်၊ လက်ပံတောကျေးရွာ၌ နှမ်း၊ မြေပဲ၊ ကုလားပဲ၊ ပဲတီစိမ်း၊ မတ်ပဲနှင့် ပဲစင်းငုံသီးနှံများကို စိုက်ပျိုးကြပြီး တောင်သူ (၁၀)ဦးခန့်အနေဖြင့် မြေပဲစိုက်ဧက(၁၅၀)ဧကကို ၂၀၂၄ခုနှစ်၊ ဩဂုတ်လတွင် စတင်စိုက်ပျိုးခဲ့ကြောင်းသိရသည်။

        မျိုးအနေဖြင့် ပင်ထောင်(အနီ)မျိုးကို ထွန်‌ကြောင်းဆွဲအစေ့ချစနစ်ဖြင့်စိုက်ပျိုးကြပြီး (၁)ဧကလျှင် မျိုး(၃)တင်းခန့်ကုန်ကျကြောင်း၊ မျိုးကို ယခင်နှစ်မြေပဲစိုက်ခင်းမှထွက်ရှိသည့် မြေပဲများကို မျိုးအနေဖြင့်ဖယ်ချန်၍ စိုက်ပျိုးခြင်းဖြစ်ကြောင်း၊ အပင်သက်တမ်း(၃)လအကြာတွင် ခူးဆွတ်ရကြောင်း၊ စိုက်ပျိုးစရိတ်အနေဖြင့် မြေပြုပြင်ခ၊ လုပ်အားခနှင့် အခြားသွင်းအားစုစရိတ်အပါအဝင် ကျပ်(၆၅၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်တွင် (၁)ဧကလျှင် တင်း(၁၀၀)နီးပါးထွက်ရှိခဲ့ပြီး ဈေးနှုန်းအနေဖြင့် မြေပဲတောင့်(၁)တင်းလျှင် ကျပ်(၂၀၀၀၀)၊ ဈေးရရှိခဲ့ကြောင်း၊ ဈေးကွက်အနေဖြင့် မင်းဘူးမြို့ရှိ ပွဲရုံများသို့တင်ပို့ရောင်းချကြောင်း လက်ပံတောကျေးရွာနေ မြေပဲစိုက်တောင်သူ ဒေါ်ဌေးထံမှသိရှိရပါသည်။

DOCA(မကွေး)

       မကွေးတိုင်းဒေသကြီးသည် ဆီထွက်သီးနှံဖြစ်သော မြေပဲ၊ နှမ်း၊ ကြက်သွန်နီနှင့် အခြားပဲမျိုးစုံကို အဓိကထားစိုက်ပျိုး၍ အခြားတိုင်းဒေသကြီးနှင့်ပြည်နယ်များသို့ တင်ပို့ရောင်းချလျက်ရှိပြီး  မကွေး၊ တောင်တွင်းကြီး၊ အောင်လံ၊ ရေနံချောင်း၊ ဆိပ်ဖြူနှင့် ပခုက္ကူကုန်စည်ဒိုင်တွင် နှမ်း၊ ကြက်သွန်နီနှင့် ပဲမျိုးစုံသီးနှံများ ပုံမှန်အရောင်းအဝယ်ဖြစ်လျက်ရှိပါသည်။

        ၂၀၂၄ခုနှစ်၊ စက်တင်ဘာလ(တတိယပတ်)တွင် ကုန်စည်ဒိုင်များတွင် အရောင်းအဝယ်ဖြစ်ပေါ်နေသော ကုန်ပစ္စည်းတစ်ပိဿာဈေးနှုန်းများမှာ မကွေးကုန်စည်ဒိုင်တွင် နှမ်းဖြူ ကျပ်(၈၀၇၀)၊ နှမ်းနီ ကျပ်(၈၁၃၀)၊ နှမ်းနက်(စမုန်) ကျပ်(၁၃၃၃၀)၊ နှမ်းညိုကြား ကျပ်(၇၂၀၀)၊ ကုလားပဲ(929) ကျပ်(၅၁၆၀)၊ ကုလားပဲ (ဟော်လန်) ကျပ်(၅၁၁၀)၊ မြေပဲလုံးဆန်(ဖြူ/ နီ) ကျပ်(၈၉၀၀)၊ ပဲလွန်းဝါ ကျပ်(၃၄၂၀)၊ ပဲကြီးဖြူ ကျပ်(၄၂၁၀)၊ မတ်ပဲ ကျပ်(၆၃၀၀)၊ စားတော်ပဲ ကျပ်(၇၀၀၀)၊ ပဲစင်းငုံ ကျပ်(၇၅၅၀)ဖြစ်ပြီး ယခင်အပတ်ထက် ယခုအပတ်တွင် နှမ်းဖြူ ကျပ်(၂၀၀)၊  နှမ်းနီ ကျပ်(၂၀၀)၊ နှမ်းနက်(စမုန်) ကျပ် (၃၃၀)၊ ပဲလွန်းဝါ ကျပ်(၁၀၀)၊ ကုလားပဲ(ဟော်လန်) ကျပ်(၆၀)၊ ကုလားပဲ(929)ကျပ်(၁၆၀)၊ စားတော်ပဲ ကျပ် (၁၀၀)၊ မတ်ပဲ ကျပ်(၅၀)၊ မြေပဲလုံးဆန်(ဖြူ) ကျပ်(၃၀၀)၊ မြေပဲလုံးဆန်(နီ) ကျပ်(၆၀၀) ဈေးနှုန်းမြင့်တက်ခဲ့ကြောင်းသိရသည်။

       တစ်ပတ်အတွင်း တန်ချိန်(၈၉၀)ခန့်အရောင်းအဝယ်ဖြစ်ခဲ့ပြီး ရန်ကုန်မြို့သို့ ကုလားပဲအိတ်ရေ (၁၀၀၀)၊ နှမ်းအိတ်ရေ (၂၅၀၀)၊ ပဲကြီးအိတ်ရေ(၈၀၀)၊ မြေပဲအိတ်ရေ(၅၀၀၀)၊ မန္တလေးမြို့သို့ နှမ်းအိတ်ရေ (၇၂၅၀၀)၊ စုစုပေါင်းအိတ်ရေ(၈၁၈၀၀) တင်ပို့ခဲ့ကြောင်းသိရှိရသည်။

      တောင်တွင်းကြီးကုန်စည်ဒိုင်တွင် နှမ်းနက်(စမုန်) ကျပ်(၁၀၀၀၀)၊ နှမ်းပြာ ကျပ်(၇၅၅၅)၊  နှမ်းဖြူသန့် ကျပ်(၈၆၇၀)၊ နှမ်းနီ(၇၇၈၀)၊ ပဲကြီးဖြူ ကျပ်(၄၅၀၀)၊ ကုလားပဲဝါ(သေး) ကျပ်(၃၉၅၀)၊ ကုလားပဲ(ဟော်လန်) ကျပ်(၄၃၀၀)၊ ပဲတီစိမ်း ကျပ်(၃၅၀၀)ဖြစ်ပြီး ယခင်အပတ်ထက် ယခုအပတ်တွင် နှမ်းနက်(စမုန်) ကျပ် (၃၃၃၅)၊ နှမ်းပြာ ကျပ်(၂၄၄၅)၊ နှမ်းနီ ကျပ်(၁၃၅)၊  ကုလားပဲဝါ(သေး) ကျပ်(၂၀၀)၊ ကုလားပဲ(ဟော်လန်) ကျပ် (၄၅၀)ဈေးနှုန်းကျဆင်းခဲ့ပြီး ပဲတီစိမ်း ကျပ်(၂၅၀)၊ နှမ်းဖြူ ကျပ်(၆၇၀)ဈေးနှုန်းမြင့်တက်ခဲ့ပြီး တစ်ပတ်အတွင်း တန်ချိန် (၁၂၀.၇၅)ခန့်အရောင်းအဝယ်ဖြစ်ခဲ့ပါသည်။

       အောင်လံကုန်စည်ဒိုင်တွင် သိပ္ပံနှမ်းနက် ကျပ်(၁၃၁၀၀)၊ နှမ်းနီ ကျပ်(၇၅၅၅)၊ နှမ်းဖြူ ကျပ် (၇၃၃၅)၊ ပဲတီစိမ်း ကျပ်(၃၀၀၀)၊ ပဲစင်းငုံနီ ကျပ် (၇၅၀၀)၊ ကုလားပဲ (ဟော်လန်) ကျပ်(၄၉၇၅)၊ ကုလားပဲ(မြကြေး) ကျပ်(၅၃၅၀)၊ ပဲကြီးကျပ် (၄၄၀၀)၊ မတ်ပဲ ကျပ်(၆၂၅၀)၊ ဝါ ကျပ်(၃၁၀၀)ဖြစ်ပြီး ယခင်အပတ်ထက် ယခုအပတ်တွင် သိပ္ပံနှမ်းနက် ကျပ်(၂၃၅)ဈေးနှုန်းကျဆင်းခဲ့ပြီး ကုလားပဲ (ဟော်လန်) ကျပ်(၃၀၀)၊ မြေပဲလုံးဆန်ဖြူ ကျပ်(၂၀၀)၊ မတ်ပဲ ကျပ်(၁၀၀)၊ နှမ်းနီ ကျပ်(၂၂၀)ဈေးနှုန်းမြင့်တက်ခဲ့ပါသည်။ တစ်ပတ်အတွင်း တန်ချိန် (၃၈၄)ခန့်အရောင်းအဝယ်ဖြစ်ခဲ့ကြောင်းသိရသည်။ 

       ရေနံချောင်းကုန်စည်ဒိုင်တွင် ကြက်သွန်နီ ကျပ်(၁၅၀၀-၂၃၀၀)၊ ယခင်အပတ်ထက် ယခုအပတ်တွင် ကျပ်(၂၀၀-၃၀၀)ဈေးနှုန်းမြင့်တက်ခဲ့ပြီး တစ်ပတ်အတွင်း တန်ချိန်(၉၇.၉၇)ခန့်အရောင်းအဝယ်ဖြစ်ခဲ့ကြောင်းသိရသည်။  

       ဆိပ်ဖြူကုန်စည်ဒိုင်တွင် ကြက်သွန်နီ ကျပ်(၁၆၀၀-၂၁၀၀)၊ ယခင်အပတ်ထက် ယခုအပတ်တွင် ကျပ်(၁၀၀)ဈေးနှုန်းမြင့်တက်ခဲ့ပြီး တစ်ပတ်အတွင်း တန်ချိန်(၅၂.၂၅)ခန့်အရောင်းအဝယ်ဖြစ်ခဲ့ကြောင်းသိရသည်။

     ပခုက္ကူကုန်စည်ဒိုင်တွင် ကုလားပဲ(929) ကျပ်(၄၈၃၀)၊ ပဲစင်းငုံ ကျပ်(၇၆၀၀)၊ ပဲယင်း ကျပ် (၃၀၀၀)ဖြစ်ပြီး တစ်ပတ်အတွင်း တန်ချိန်(၅၀)ခန့် အရောင်းအဝယ်ဖြစ်ခဲ့ကြောင်းသိရပါသည်။

DOCA(မကွေး)