ပြည်တွင်းကုန်သွယ်မှုသတင်း

      မန္တလေးတိုင်းဒေသကြီး၊ ကျောက်ဆည်ခရိုင်တွင် ပဲတီစိမ်း(မိုးကြို)ကို ၂၀၂၄-၂၀၂၅ ဘဏ္ဍာနှစ်တွင် ကျောက်ဆည်မြို့နယ်တွင် (၆၄၄၆)ဧက၊ စဉ့်ကိုင်မြို့နယ်တွင် (၄၄၉၇)ဧက၊ မြစ်သားမြို့နယ်တွင် (၁၁၂၃၄)ဧက၊ စုစုပေါင်း (၂၂၁၇၇)ဧကစိုက်ပျိုးနိုင်ခဲ့ပြီး ယခုအချိန်ထိ (၂၁၂၅)ဧကရိတ်သိမ်းပြီးစီးပြီဖြစ်ကြောင်း ခရိုင်ကြေးတိုင်နှင့်မြေစာရင်းဦးစီးဌာန၏ စာရင်းများအရသိရှိရပါသည်။ ပဲတီစိမ်း (မိုးကြို)ကိုမတ်လမှစတင်ပြီး တောင်သူအများစုသည် ဆည်ရေသောက်ရေသွင်းစနစ်ဖြင့် အများဆုံးစိုက်ပျိုးကြကြောင်း၊ စိုက်ပျိုးရာတွင် အရည်အသွေးနှင့် အထွက်နှုန်းကောင်းမွန်သော ရေဆင်း-၁၁ မျိုးနှင့် ကျောက်စိမ်းမျိုးများကိုသာရွေးချယ်စိုက်ပျိုးကြရာ (၁)ဧကကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် စုစုပေါင်း (၃၀၀၀၀၀/-) ကျပ်ခန့်ကုန်ကျကြောင်း၊ အထွက်နှုန်းအနေဖြင့်(၁)ဧကလျှင် (၁၁-၁၂)တင်းခန့်ထွက်ရှိပြီး စျေးနှုန်းအနေဖြင့် ယခင်နှစ်တွင် (၁)တင်းလျှင် (၅၅၀၀၀/-)ကျပ်စျေးနှုန်းရှိခဲ့ကြောင်း၊ ယခုအချိန်တွင် (၆၂၀၀၀/-)ကျပ်စျေးနှုန်းဖြင့် အရောင်းအဝယ်ဖြစ်လျက်ရှိရာ (၁)ဧကအကျိုးအမြတ်အနေဖြင့် (၃၈၀၀၀၀/-)ကျပ်ခန့်ရရှိကြောင်း၊ ပဲတီစိမ်း(မိုးကြို) စိုက်ပျိုးသော တောင်သူတစ်ဦး၏ ပြောကြားချက်အရသိရှိရပါသည်။

DOCA(မန္တလေး)

      စားသုံးသူရေးရာဦးစီးဌာန၊ သထုံခရိုင်၊ ပေါင်မြို့နယ်တာဝန်ခံသည်   ၂၇-၆-၂၀၂၄ ရက်နေ့တွင် မိတ်ဖက်ဌာနများနှင့်ပူးပေါင်း၍ ပေါင်မြို့နယ်၊ မင်္ဂလာဈေးအရှေ့တွင် ပြည်သူများသို့ သက်သာသောဈေးနှုန်းဖြင့် ဆန်များရောင်းချရာတွင် စနစ်တကျရှိစေရေး၊ စားသုံးသူပြည်သူများလက်ဝယ် အမှန်တကယ်ရောက်ရှိရေး၊ သင့်တင့်မျှတသော ဈေးနှုန်းဖြစ်စေရေးအတွက် ကြီးကြပ်ဆောင်ရွက်ခဲ့သည်။

      အဆိုပါနေ့တွင် ဆန်စက်လုပ်ငန်းရှင်များနှင့် ကုန်သည်ကြီးများအသင်းတို့ပူးပေါင်း၍ အိမ်ထောင်စုတစ်စုလျှင် (၂) ပြည်နှုန်းဖြင့် ပေါ်ဆန်း (၁၀) အိတ်၊ ဧည့်မထ (၄၀) အိတ်အားရောင်းချပေးခဲ့ရာတွင် ပေါ်ဆန်းဆန်တစ်ပြည်လျှင် (၅၀၀၀) ကျပ်၊ ဧည့်မထတစ်ပြည်လျှင် (၃၂၀၀) ကျပ်ဖြင့်ရောင်းချပေးခဲ့ကြောင်းသိရှိရပါသည်။

DOCA(မွန်)

     စစ်ကိုင်းတိုင်းဒေသကြီး၊ စားသုံးသူရေးရာဦးစီးဌာနမှ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ အိမ်ဆောက်ပစ္စည်းရောင်းချသည့်ဆိုင်များသို့ အပတ်စဉ်သွားရောက်ကွင်းဆင်းစစ်ဆေးခြင်းဆောင်ရွက်လျက်ရှိကြောင်းသိရသည်။

    ၂၀၂၄ခုနှစ်၊ ဇွန်လ ၂၄ရက်နေ့၊ နံနက်(၁၀:၀၀) နာရီအချိန်တွင် ကန့်ဘလူမြို့ပေါ်ရှိ ဘိလပ်မြေရောင်းချသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်းဈေးကွက်အခြေအနေတို့အားကွင်းဆင်းစိစစ်ခဲ့ရာ ဆောက်လုပ်ရေးလုပ်ငန်းသုံးပစ္စည်းများနှင့် ဘိလပ်မြေတို့ကို မန္တလေးမြို့မှဝယ်ယူရကြောင်း၊ ဈေးနှုန်းအနေဖြင့် “CROWN” အမှတ်တံဆိပ် ဘိလပ်မြေ‌တစ်အိတ်လျှင် ၁၃၅၀၀ကျပ်နှင့် “ကြံ့နှစ်ကောင်” အမှတ်တံဆိပ်ဘိလပ်မြေဈေးနှုန်းမှာ တစ်အိတ်လျှင်ကျပ်၁၂၃၀၀ဖြင့်ရောင်းချကြောင်း ဇွန်လ တတိယပတ်ဈေးနှုန်းများနှင့်နှိုင်းယှဉ်ပါက ယခုအပတ်အတွင်း ဈေးနှုန်းများကျဆင်းလျက်ရှိကြောင်း လုပ်ငန်းရှင်များထံမှသိရှိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့တွင် ဒေသထွက်အရန်ဟင်းဖြစ်သည့် လက်လုပ်ချဉ်အမျိုးမျိုးရောင်းချပြီး မိသားစုစားဝတ်နေရေးအတွက် ဝင်ငွေရှာသည့်လုပ်ငန်းကိုလုပ်ကိုင်လျက်ရှိရာ ပေါ်ဦးပေါ်ဖျားရာသီစာဖြစ်သည့် မုန့်ညှင်းချဉ်လုပ်ငန်းကို စတင်လုပ်ကိုင်ရောင်းချလျက်ရှိကြောင်းသိရပါသည်။

     ကန့်ဘလူမြို့မစည်ပင်သာယာဈေး၌  အချဉ်မျိုးစုံဖြစ်သည့် ပဲတီချဉ်၊ မုန့်ညှင်းချဉ်၊ သရက်ချဉ်၊ မုံလာချဉ်၊ သရက်သီးကုလားတည်ချဉ်၊ နှမ်းပတ်ချဉ်နှင့် သံပရာချဉ်တို့လုပ်ကိုင်ရောင်းချလျက်ရှိရာ မုန့်ညှင်းချဉ်သည်လည်း တစ်ခုအပါအဝင်ဖြစ်ပြီး မုန့်ညှင်းချဉ်ပြုလုပ်သည့်မုန့်ညှင်းရွက်မှာ ရှားပါးသောရာသီဖြစ်သောကြောင့် ကုန်ကြမ်းဖြစ်သည့်မုန့်ညှင်းရွက်ကို ကန့်ဘလူမြို့ပေါ်ရပ်ကွက်များမှ ရေလောင်းစိုက်ပျိုးသည့် စိုက်ပျိုးရေးတောင်သူများထံမှ အနည်းငယ်သာဝယ်ယူရရှိပြီး မုန့်ညှင်းရွက်တစ်စည်းလျှင် (၄၀၀)ကျပ်၊ (၃)စည်းလျှင် (၁၀၀၀) ကျပ်ဖြင့် တစ်ရက်ကို အစည်း(၂၀)မျှသာဝယ်ယူရရှိသဖြင့် အနည်းငယ်သာ လုပ်ကိုင်ရသေးကြောင်း၊ အစည်း(၂၀)အချဉ်သိပ်လျှင် မုန့်ညှင်းချဉ်(၂)ပိဿာ (၅၀)ကျပ်သားခန့်ရရှိပြီး တစ်ပိဿာလျှင် (၃၂၀၀)ကျပ်ဈေးနှုန်းဖြင့်ရောင်းချရကြောင်း၊ လက်ဖက်ရည်သောက်ပန်းကန်လျှင် (၅၀၀)ကျပ်နှုန်းဖြင့်ရောင်းချရကြောင်း၊  ရောင်းချသည့်အတွက် မရှိမဖြစ်မို့သာလုပ်ကိုင်ရောင်းချရပြီး အမြတ်ငွေအများကြီးမရရှိကြောင်း မြို့မစည်ပင်သာယာဈေးတွင် လက်လုပ်ချဉ်များရောင်းချနေသူတစ်ဦးထံမှသိရှိရပါသည်။

DOCA(စစ်ကိုင်း)

   ၁.၇.၂၀၂၄ ရက်နေ့တွင်  တိုင်းဒေသကြီး/ပြည်နယ်များ၏ စပါးဆန် ဈေးနှုန်းများအား ယခင်နှစ်၊ ယခင်လ၊ ယနေ့ ကာလတူ နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။